¶ Capitulum primum

IN the begynnynge of Arthur after he was chosen kyng by aduēture and by grace for the most party of the barons knewe not that he was Vther pendragons sone / But as Merlyn made it openly knowen / But yet many kynges & lordes helde grete werre ayenst hym for that cause / But wel Arthur ouercame hem alle / for the mooste party the dayes of his lyf he was ruled moche by the counceil of Merlyn / Soo it fell on a tyme kyng Arthur sayd vnto Merlyn / my barons wille lete me haue no rest but nedes I muste take a wyf / and I wylle none take / but by thy counceill and by thyne aduys / it is wel done said Merlyn / that ye take a wyf / for a man of your bounte and noblesse shold not be without a wyf / Now is ther ony that ye loue more than another / ye said kyng Arthur / I loue gweneuer the kynges doughter Lodegrean of the land of Camelerd / the whiche holdeth in his hows the table round that ye told he had of my fader Vther / And this damoysel is the moost valyaunt and fayrest lady that I knowe lyuynge or yet that euer I coude fynde / Syre sayd Merlyn as of her beaute and fayrenes she is one of the fayrest on lyue / But and ye loued her not so wel as ye doo / I shold fynde yow a damoysel of beaute and of goodenesse that shold lyke yow & plese yow and your herte were not sette / But there as a mans herte is set / he wylle be lothe to retorne / that is trouth said kyng Arthur / but Merlyn warned the kynge couertly that gweneuer was not holsome for hym to take to wyf / for he warned hym that launcelot shold loue her and she hym ageyne / and so he torned his tale to the auentures of Sancgreal / Thenne merlyn desyred of the kynge for to haue men with hym that shold enquere of gweneuer / and so the kyng graunted hym / & Merlyn wente forth vnto kyng Lodegrean of Camyllerd / & told hym of the desyre of the kyng that he wold haue vnto his wyf Gweneuer his doughter / that is to me sayd kyng Lodegreans the best tydynges that euer I herd that so worthy a kyng of prowesse and noblesse wille wedde my doughter / And os for my landes I wylle gyue hym wyst I it myght please hym /


Page  101 [leaf 51r]


but he hath londes ynowe / hym nedeth none / but I shalle sende hym a gyfte shalle please hym moche more / for I shalle gyue hym the table round / the whiche Vtherpendragon gaue me / & whan it is ful complete / ther is an C knyghtes & fyfty / And as for on C good knyghtes I haue my self / but I fawte / l / for so many haue ben slayne in my dayes / and so Ladegreans delyuerd his doughter Gweneuer vnto Merlyn / and the table round with the C knyghtes / and so they rode fresshly with grete royalte / what by water and what by land / tyl that they came nyghe vnto london

¶ Capitulum Secundum

WHanne kyng Arthur herd of the comyng of gweneuer and the C knyghtes with the table round / thenne kynge Arthur maade grete Ioye for her comyng / and that ryche presente / and said openly this fair lady is passyng welcome vnto me / for I haue loued her longe / And therfore ther is nothyng so lyef to me / And these knyghtes with the round table pleasen me more than ryght grete rychesse / And in alle hast the kynge lete ordeyne for the maryage and the Coronacyon in the moost honorable wyse that coude be deuysed Now Merlyn said kyng Arthur / goo thow and aspye me in al this land l knyghtes whiche ben of most prowesse & worship / within short tyme merlyn had founde suche knyȝtes that shold fulfylle xx & xiij knyghtes but no mo he coude fynde Thenne the Bisshop of Caunterbury was fette and he blessid the syeges with grete Royalte and deuoycyon / and there sette the viij and xx knyghtes in her syeges / and whan this was done / Merlyn said fayr syrs ye must al aryse and come to kyng Arthur for to doo hym homage / he will haue the better wil to mayntene yow / and so they arose and dyd their homage / & when they were gone / merlyn fond in euery syeges letters of gold that told the knyghtes names that had sytten therin / But two syeges were voyde / And so anone cam yong gawayn & asked the kyng a yefte Aske said the kyng / & I shal graunte it yow / syr I aske that ye will make me knyȝt / that same day ye shall wedde faire Gweneuer / I will do it with a good wil said kyng arthur & do vnto yow all the worship that I may / for I must by reson ye ar myn neuew my susters sone /

¶ Ca iij


Page  102 [leaf 51v]


FOrth with alle ther cam a poure man in to the Courte and broughte with hym a fayre yonge man of xviij yere of age rydynge vpon a lene mare / and the poure man asked all men that he met / where shall I fynde kyng arthur / yonder he is sayd the knyghtes / wylt thow ony thynge with hym / ye sayd the poure man / therfor I cam hyder / anone as he came before the kyng he salewed hym and sayd O kyng Arthur the floure of all knyghtes and kynges I byseche Ihesu saue the / Syr it was told me that at this tyme of your maryage ye wolde yeue any man the yefte that he wold aske / oute excepte that were vnresonable / that is trouth said the kynge suche cryes I lete make / and that will I holde so it apayre not my realme nor myne estate / ye say wel and graciously said the poure man / Syre I aske no thyng els but that ye wil make my sone here a knyghte / it is a grete thynge thow askest of me said the kyng / what is thy name said the kyng to the poure man / syr my name is Aryes the Cowherd / whether cometh this of the or of thy sone said the kyng / Nay syre said Aryes / this desyre cometh of my sone and not of me / For I shal telle yow I haue xiij sones / & alle they will falle to what laboure I put them & wille be ryght glad to doo labour / but this child wylle not laboure for me for ony thyng that my wyf or I may doo / but alweyes he wille be shotynge or castynge dartes / and glad for to see batailles and to behold knyghtes / And alweyes day and nyghte he desyreth of me to be made a knyȝt what is thy name sayd the kynge vnto the yonge man / Syre my name is Tor / the kyng beheld hym fast / and sawe he was passyngly wel vysaged and passyngly wel made of his yeres Wel said kyng Arthur vnto Aryes the Cowherd fetche al thy sones afore me that I may see them / and so the poure man did and al were shapen moche lyke the poure man / But Tor was not lyke none of hem al in shap ne in contenaunce / for he was moche more than ony of hem / Now said kyng Arthur vnto the Cowherd / where is the swerd he shalle be made knyght with al / it is here sayd Tor / take it oute of the shethe sayd the kynge / and requyre me to make yow a knyght Thenne Tor alyght of his mare and pulled oute his swerd knelynge and requyrynge the kynge / that he wold maake


Page  103 [leaf 52r]


hym knyght / & that he myghte be a knyght of the table round As for a knyȝt I will make yow / & therwith smote hym in the neck with the swerd sayēg be ye a good knyȝt / & so I pray to god so ye may be / & yf ye be of prowesse and of worthynesse ye shalle be a knyght of the table round / Now Merlyn sayd Arthur say wether this Tor shall be a good knyghte / or no / ye syre he ought to be a good knyght / for he is comen of as good a man as ony is on lyue / and of kynges blood how so syr sayd the kynge / I shalle telle yow sayd Merlyn / This poure man Aryes the cowherd is not his fader / he is no thyng syb to hym / for kynge Pellinore is his fader / I suppose nay said the Cowherd / fetche thy wyf afore me said merlyn / and she shalle not say nay / anon the wyf was fet which was a fair houswyf / and there she ansuerd Merlyn ful womanly / and there she told the kynge and Merlyn that whan she was a maide & went to mylke kyen / ther met with her a sterne knyght / & half by force he had my maidenhede / & at that tyme he bigat my sone Tor / & he toke awey from me my greyhound that I had that tyme with me / & saide that he wold kepe the greyhound for my loue / A said the Cowherd I wende not thys / but I may bileue it wel / for he had neuer no tatches of me / sir said Tor vnto Merlyn dishonoure not my moder / syr said merlyn it is more for your worship than hurte / for your fader is a good man & a kyng / & he may ryght wel auaunce you and your moder / for ye were begoten or euer she was wedded / that is trouth said the wyf / hit is the lasse gryef vnto me sayd the Cowherd

¶ Capitulum Quartum

SO on the morne kyng Pellinore cam to the Court of kynge Arthur / whiche had grete ioye of hym and told hym of Tor / how he was his sone / and how he hadde made hym knyght at the request of the Cowherd / Whan Pellinore beheld Tor / he pleasyd hym moche / so the kyng made gawayne knyght / but Tor was the fyrst he made at the feest / What is the cause said kyng Arthur that there ben two places voyde in the syeges / Syre said Merlyn / ther shalle no man syt in tho places / but they shall be of moost worship / But in the sege perillous there shall no man sytte therin but one / and yf ther be ony so hardy to doo it he shall be destroyed / & he that


Page  104 [leaf 52v]


shalle sytte there shalle haue no felawe / And therwith Merlyn tooke kynge Pellinore by the hand / and in the one hand next the two seges and the sege peryllous he said in open audyence this is your place and best ye are worthy to sytte there in of ony that is here / there at sat syr gawayne in grete enuy & told Gaherys his broder / yonder knyghte is put to grete worship / the whiche greueth me sore / for he slewe our fader kynge Lot / therfor I wille slee hym said Gauayne with a swerd / that was sente me that is passyng trenchaunt / ye shall not soo said Gaherys at this tyme / For at this tyme I am but a squyer / and whan I am made knyght / I wol be auenged on hym and therfor broder it is best ye suffre tyl another tyme that we may haue hym oute of the Courte / for & we dyd so / we shold trouble this hyhe feest / I wyl wel said gauayn as ye wylle /

¶ Capitulum quintum

THenne was the hyghe feeste made redy / and the kynge was wedded att Camelott vnto Dame Gweneuer in the chirche of saynt steuyns with grete solempnyte / And as euery man was set after his degree / Merlyn wente to alle the knyghtes of the round table / and bad hem sytte styll that none of hem remeue / for ye shalle see a straunge and a merueillous aduenture / Ryght so as they sat ther came rennyng in a whyte hert in to the halle and a whyte brachet next hym and xxx couple of black rennyng houndes cam after with a greete crye / and the hert went aboute the table round as he went by other boordes / the whyte brachet boot hym by the buttok & pulled oute a pees / where thurgh the herte lepte a grete lepe / and ouerthrewe a knyght that sat at the boord syde / and therwith the knyȝt aroos & toke vp the brachet / & so went forth oute of the halle & toke his hors & rode his wey with the brachet / right so anone cam in a lady on a whyte palfrey & cryed aloude for the kyng Arthur / Syre suffre me not to haue this despyte for the brachet was myn that the knyght lad aweye / I maye not doo therwith said the kynge

¶ With this there came a knyght rydynge al armed on a grete hors / and tooke the lady awey with hym with force / and euer she cryed and made grete dole / whanne she was gone the kynge was glad for she


Page  105 [leaf 53r]


made suche a noyse / Nay said merlyn / ye may not leue this advētures so lyghtely / For these aduentures must be brought agayne or els it wold be disworship to yow and to your feest I wyll said the kynge that al be done by your aduys / Thenne saide merlyn lete calle syr gauayne / for he must brynge ageyne the whyte herte / Also syr ye must lete calle Syre Tor / for he must brynge ageyne the brachet / and the knyght or els slee hym / Also lete calle kynge Pellinore for he must brynge ageyne the lady and the knyght or els slee hym / and these thre knyghtes shalle doo merueillous auētures or they come ageyn Thenne were they called al thre as it reherceth afore / and eueryche of hem toke his charge / and armed them surely / But sir gauayne had the fyrst request / and therfore we wille begynne at hym /

¶ Capitulum vj

SYre gauayne roode more than a paas and gaheryse his broder that roode with hym in stede of a squyer to doo hym seruyse / Soo as they rode they sawe two knyȝtes fyghte on horsbak passyng sore / so syr gauayn & his broder rode betwixe them / and asked them for what cause they foughte so / the one knyght ansuerd and sayd / we fyghte for a symple mater / for we two be two bretheren born & begoten of one man & of one woman / allas said sir gauayn why do ye so / syr said the eldar / ther cam a whyte hert this way this day & many hoūdes chaced hym / & a whyte brachet was alwey next hym / and we vnderstood it was auenture made for the hyhe feest of kynge Arthur / and therfore I wold haue gone after to haue wonne me worship / and here my yonger broder said he wolde go after the herte / for he was better knyght than I / And for this cause we felle at debate / & so we thouȝt to preue whiche of vs bothe was better knyȝt / This is a symple cause said sir gauayn / vncouth mē ye shold debate with al & no broder with broder / therfor but yf ye wil do by my coūceil I wil haue ado with yow / that is ye shal yelde you vnto me / & that ye go vnto kyng Arthur and yelde yow vnto his grace / sir knyȝt said the ij bretheren we are forfoughten & moche blood haue we loste thorow our wilfulnesse / And therfore we wolde be loth to haue adoo with yow / thenne do as I will haue yow said sir gauayne /


Page  106 [leaf 53v]


we wille agree to fulfylle your wylle / But by whom shalle we saye that we be thyder sente / ye maye say / by the knyȝt that foloweth the quest of the herte that was whyte / Now what is your name sayd gauayne / Sorlouse of the forest said the eldar & my name is sayde the yonger Bryan of the forest and soo they departed and wente to the kynges Court / and Syr gauayne on his quest / and as gauyne folowed the herte by the crye of the houndes euen afore hym ther was a grete Ryuer / and the hert swamme ouer / and as syr gauayne wold folowe after / ther stode a knyght ouer the other syde and sayd / Syre knyghte come not ouer after this herte / but yf thou wilt Iuste with me / I wille not faille as for that said sir gauayn to folowe the quest that I am in / and soo maade his hors to swymme ouer the water / and anone they gat theire speres / and ranne to gyder ful hard / but syre gauayne smote hym of his hors / and thenne he torned his hors & bad hym yelde hym / Nay sayd the knyght not so though thow haue the better of me on horsbak / I pray the valyaunt knyght alyghte a foote and matche we to gyders with swerdes / what is youre name said sir gauayne / Alardyn of the Ilys said the other / thenne eyther dressid her sheldes and smote to gyders / but sir gauayne smote hym so hard thorow the helme that it went to the braynes and the knyght felle doune dede / A said Gaheryse that was a myghty stroke of a yonge knyght /

¶ Capitulum Septimum

THēne Gauayne and Gaheryse rode more than a paas after the whyte herte / and lete slyppe at the herte thre couple of greyhoundes / and so they chace the herte in to a castel / and in the chyef place of the castel they slewe the hert / syr gauayne and gaheryse folowed after / Ryght soo there came a knyght oute of a chamber with a swerd drawe in his hand and slewe two of the greyhoundes euen in the syghte of syre gauayne / and the remenaunte he chaced hem with his swerd oute of the castel / And whan he cam ageyne he sayd / O my whyte herte / me repenteth that thow art dede / for my souerayne lady gaf the to me / and euyll haue I kepte the / and thy deth


Page  107 [leaf 54r]


shalle be dere bought and I lyue / and anone he wente in to his chamber and armed hym / and came oute fyersly / & there mette he with syr gauayne / why haue ye slayne my houndes said syr gauayn / for they dyd but their kynde / and leuer I had ye had wroken your angre vpon me than vpon a dom best thow saist trouth said the knyght I haue auengyd me on thy houndes and so I wille on the or thow goo / Thenne syr Gauayne alyght afoote and dressid his shelde and stroke to gyders myghtely / and clafe their sheldes and stoned their helmes and brak their hawberkes that the blood ranne doune to their feet / Atte last syr gauayne smote the knyght so hard that he felle to the erthe / and thenne he cryed mercy / and yelded hym and besought hym as he was a knyghte and gentylman / to saue his lyf / thow shalt dye said sir gauayne for sleyng of my houndes / I wille make amendys said the knyght vnto my power / Syr gauayne wold no mercy haue but vnlacyd his helme to haue stryken of his hede / Ryght soo came his lady oute of a chamber and felle ouer hym / and soo he smote of her hede by mysauenture / Allas saide Gaheryse that is fowle and shamefully done / that shame shal neuer from yow / Also ye shold gyue mercy vnto them that aske mercy / for a knyȝt without mercy is withoute worship / Syr gauayne was so stonyed of the deth of this fair lady / that he wiste not what he dyd / and said vnto the knyght aryse I wille gyue the mercy / nay nay said the knyght / I take no force of mercy now / for thou hast slayne my loue and my lady that I loued best of alle erthely thynge / Me sore repentith it said syr gauayn / for I thoughte to stryke vnto the / But now thow shalt goo vnto kyng Arthur and telle hym of thyne aduentures and how thow arte ouercome by the knyghte that wente in the queste of the whyte herte / I take no force said the knyȝt whether I lyue or I dye but so for drede of deth he swore to goo vnto kynge Arthur / & he made hym to bere one greyhound before hym on his hors and another behynde hym / what is your name said sir gauayn or we departe / my name is said the knyght Ablamor of the marise / soo he departed toward Camelot

¶ Capitulum Octauum


Page  108 [leaf 54v]


ANd syr gauayne went in to the castel and made hym redy to lye there al nyght / and wold haue vnarmed hym / what wylle ye doo sayd gaheryse / wylle ye vnarme yow in this Countrey / ye may thynke ye haue many enemyes here / they had not sooner sayd that word but ther cā four knyghtes wel armed and assayled syr gauayne hard and said vnto hym thou newe made knyght thow hast shamed thy knyghthode / for a knyght withoute mercy is dishonoured Also thow hast slayne a fayr lady to thy grete shame to the worldes ende / and doubte thow not thow shalt haue grete nede of mercy or thow departe from vs / And therwith one of hem smote syr gauayne a grete stroke that nygh he felle to the erthe / and gaheryse smote hym ageyne sore / and soo they were on the one syde and on the other / that syr gauayne and gaheryse were in ieopardy of their lyues / and one with a bowe an archer smote syr gauayne thurȝ the arme that it greued hym wonderly sore / And as they shold haue ben slayne / there cam four fair ladyes / and besought the knyghtes of grace for syre gauayne / and goodely atte request of the ladyes they gaf syr gauayne and gahersye their lyues / & made hem to yelde them as prysoners / thenne gauayne and gaheryse made grete dole / Allas sayd syre gauayne myn arme greueth me sore / I am lyke to be maymed and so made his complaynt pytously / erly on the morow ther cam to syr gauayne one of the four ladyes / that had herd alle his complaynte and said syr knyȝte what chere / not good said he it is your owne defaulte sayd the lady / for ye haue doone a passynge fowle dede in the sleynge of the lady / the whiche will be grete vylany vnto yow / But be ye not of kynge Arthurs kyn saide the lady / yes truly sayd syr gauayne / what is your name saide the lady / ye must telle it me or ye passe / my name is gauayne the kyng Lott of Orkeney sone / and my moder is kynge Arthurs syster / A thenne are ye neuewe vnto kyng Arthur sayd the lady / and I shalle so speke for yow that ye shall haue conduyte to go to kynge Arthur for his loue / and soo she departed / and told the foure knyghtes how theire prysoner was kynge Arthurs neuewe / and his name is syr gauayne kyng Lots sone of Orkeney / and they gaf hym the hertes hede by cause it was in


Page  109 [leaf 55r]


his quest /

¶ Thenne anone they delyuerd syr Gauayne vnder this promyse that he shold bere the dede lady with hym in this maner / The hede of her was hanged aboute his neck and the hole body of hyr lay before hym on his hors mane / Ryght soo rode he forth vnto Camelot / And anone as he was come merlyn desyred of kyng Arthur þt Syre Gauayne shold be sworne to telle of alle his auentures / and how he slewe the lady / and how he wold gyue no mercy vnto the knyght / where thurgh the lady was slayne / Thenne the kynge and the quene were gretely displeasyd with syr gauayn for the sleynge of the lady / And ther by ordenaunce of the quene ther was set a quest of ladyes on syr gauayn / and they Iuged hym for euer whyle he lyued to be with all ladyes & to fyȝte for her quarels / & that euer he shold be curteys / & neuer to refuse mercy to hym / that asketh mercy / Thus was gauayne sworne vpon the four euuangelystes that he shold neuer be ageynst lady ne gentilwoman / but yf he fought for a lady / and his aduersary fouȝt for another /

And thus endeth the auenture of syr gauayn that he dyd at the maryage of kyng Arthur Amen

¶ Capitulum ix

THan Syre Tor was redy he mounted vpon his horsbak / and rode after the knyght with the brachet / so as he rode he mette with a dwarf sodenly / that smote hys hors on the hede with a staf / that he wente backward his spere lengthe / why dost thou so said syre Tor / for thou shalt not passe this way / but yf thow Iuste with yonder knyghtes of the pauelions / Thenne was Tor ware where two pauelions were / & grete sperys stood oute / and two sheldes henge on trees by the pauelions / I may not tary said syr Tor / for I am in a quest that I must nedes folowe / thou shalt not passe said the dwarf and therwith alle he blewe his horne / thenne ther cam one armed on horsbak / and dressyd his shelde / and cam fast toward Tor / and he dressid hym ageynst hym / and so ranne to gyders that Tor bare hym from his hors / and anone the knyght yeld hym to his mercy / But syr I haue a felawe in yonder pauelione that wille haue adoo with yow anone / he shall be welcome said syr Tor / Thenne was he ware of another knyght comyng with grete raundon / and eche of them dressid to other / that


Page  110 [leaf 55v]


merueille it was to see / but the knyght smote syre Tor a grete stroke in myddes of the shelde that his spere all to sheuered And syr Tor smote hym thurgh the sheld by lowe of the sheld and it wente thorow the coost of the knyȝt / but the stroke slewe hym not / And therwith syr Tor alyght & smote hym on the helme a grete stroke / and therwith the knyght yelded hym and besought hym of mercy / I wille wel said syr Tor / But thou and thy felawe must goo vnto kynge Arthur / and yelde yow prysoners vn to hym / by whome shall we say are we thyder sente / ye shall say by the knyght that wente in the quest of the knyght that wente with the brachet / Now what be your ij names said syr Tor / my name is sayd the one Sire Felot of Langduk / & my name is said the other Sir Petypase of wynchylse / Now go ye forth saide syre Tor and god spede yow & me / Thenne cam the dwarf and saide vnto syr Tor / I praye yow gyue me a yefte / I wylle wel said syr Tor / aske / I aske no more saide the dwarf / but that ye wille suffre me to doo yow seruyse / for I will serue no more recreaunt knyghtes / Take an hors said syr Tor and ryde on with me / I wote ye ryde after the knyght with the whyte brachet / and I shalle brynge yow there he is said the dwerf / And soo they rode thorow oute a forest / and at the last they were ware of two pauelions euen by a pryory with two sheldes / And the one shylde was enewed with whyte / and the other shelde was reed

¶ Capitulum x

THer with syr Tor alyghte and toke the dwarf his glayue / and soo he cam to the whyte pauelione / and sawe thre damoysels lye in it / and one paylet slepyng / & so he wente to the other pauelione / and found a lady lyeng slepyng ther in / But ther was the whyte brachet that bayed at her fast / and therwith the lady yede oute of the pauelione & all her damoysels / But anone as syr Tor aspyed the whyte brachet / he took her by force and took her to the dwerf / what / wille ye so sayd the lady take my brachet from me / ye sayd syr Tor / this brachet haue I sought from kynge Arthurs Courte hyder / well said the lady / knyght ye shalle not go fer with her / but that ye shalle be mette and greued / I shall abyde what auenture that


Page  111 [leaf 56r]


cometh by the grace of god / and so mounted vpon his hors / and passed on his way towarde Camelot / but it was so nere nyght he myȝt not passe but lytel ferther / knowe ye ony lodgyng said Tor I knowe none said the dwarf / but here besydes is an hermytage / and there ye muste take lodgynge as ye fynde / And within a whyle they cam to the heremytage & took lodgyng / and was there gras otys and breed for their horses soone it was sped / and full hard was their souper but there they rested hem al nyght tyl on the morne / and herd a masse deuoutely / and tooke their leue of the heremyte / and syre Tor prayed the heremyte to pray for hym / he sayd he wold and betooke hym to god / And soo mounted vpon horsbak and rode towardes Camelot a long whyle / with that they herd a knyȝte calle lowde that came after hem / and he sayd knyghte abyde / & yelde my brachet that thow took from my lady / Syr Tor retorned ageyne / and behelde hym how he was a semely knyghte and wel horsed and wel armed at al poyntes / thenne Syre Tor dressyd his shelde and took his spere in his handes and the other cam fyersly vpon hym / and smote bothe hors & man to the erthe / anone they aroos lyghtely and drewe her swerdes as egrely as lyons and put their sheldes afore them and smote thorow the sheldes that the cantels felle of bothe partyes / Also they tamyd their helmes that the hote blood ranne oute / and the thyck maylles of their hawberkes they carfe and rofe in sonder that the hote blood ranne to the erthe / and both they had many woundes and were passyng wery / But syr Tor aspyed that the other knyght faynted / and thenne he sewed fast vpon hym and doubled his strokes and garte hym go to the erthe on the one syde / thenne Syre Tor bad hym yelde hym / that wille I not said Abilleus whyle my lyf lasteth and the soule is within my body onles that thou wilt yeue me the brachet / that wylle I not doo sayd syre Tor / for it was my quest to brynge ageyne thy brachet / the or bothe /

¶ Capitulum xj

WYth that cam a damoysel rydynge on a palfrey as fast as she myȝt dryue and cryed with a lowde voys vnto Syre Tor / what wille ye with me sayd syr Tor / I byseche the


Page  112 [leaf 56v]


said the damoysel for kynge Arthurs loue / gyue me a yefte / I requyre the gentyl knyght as thow arte a gentilman / Now said Tor Aske a yefte and I wille gyue it yow / gramercy said the damoysel / Now I aske the hede of the fals knyght Abelleus / for he is the mooste outragyous knyght that lyueth & the grettest murtherer / I am loth seid syr Tor of that gyfte I haue gyuen yow / lete hym make amendys in that he hath trespaced vnto yow / now said the damoysel he may not / for he slewe myn owne broder afore myn owne eyen that was a better knyght than he / and he hadde had grace / and I kneled half an houre afore hym in the myre for to saue my broders lyf that had done hym no dammage but fought with hym by auenture of armes / and so for al that I coude do / he stroke of his hede wherfore I requyre the as thow arte a true knyght to gyue me my yefte or els I shal shame the in al the Court of kyng Arthur / for he is the falsest knyght lyuynge and a grete destroyer of good knyghtes / Thenne whan Abelleus herd this / he was more aferd / and yelded hym and asked mercy / I maye not now saide syr Tor / but yf I shold be founde fals of my promesse / for whyle I wold haue taken you to mercy / ye wold none aske but yf ye had the brachet ageyn that was my quest And therwith he tooke of his helme / and he aroos and fled / and syr Tor after hym and smote of his hede quyte / ¶ Now syr said the damoysel / it is nere nyght / I pray yow come & lodge with me here at my place / it is here fast by / I will wel said syr Tor / for his hors and he had ferd euyll syn they departed from Camelot / and soo he rode with her and had passyng good chere with her / and she hadde a passyng fair old knyght to her husband that made hym passynge good chere and wel easyd bothe his hors and he / and on the morne he herd his masse and brake his fast and tooke his leue of the knyghte and of the lady that besought hym to telle hym his name / Truly he said my name is syr Tor that was late made knyght / and this was the fyrst queste of armes that euer I dyd to brynge ageyn that this knyght Abelleus toke awey fro kyng arthurs courte / O fayr knyght said the lady and her husband / and ye come here in oure marches / come and see oure poure lodgynge / and it shalle be alweyes at your commaundement / Soo syre


Page  113 [leaf 57r]


Tor departed and came to Camelot on the thyrdde day by noone / and the kyng & the quene & alle the Courte was passyng fayne of his comyng and made grete ioye that he was come ageyne / for he wente from the Court with lytel socour / but as kyng Pellinore his fader gaf hym an old courser / and kyng Arthur gaf hym armour and a swerd / and els had he none other socour / but rode so forthe hym self alone / And thenne the kyng and the quene by merlyns aduys made hym to swere to telle of his auentures / and soo he told and made pryeues of his dedes as it is afore reherced / wherfor the kyng and the quene made hym grete ioye / nay nay saide Merlyn these ben but Iapes to that he shalle doo / for he shalle preue a noble knyght of prowesse as good as ony is lyuyng and gentyl and curteis & of good tatches and passyng true of his promesse / and neuer shalle outrage where thorow Merlyns wordes kynge Arthur gaf hym an erldome of londes that felle vnto hym / and here endeth the quest of Syr Tor kynge Pellenors sone

¶ Capitulum xij

THenne kynge Pellinore armed hym and mounted vpon his hors and rode more than a paas after the lady that the knyȝt ladde awey / And as he rode in a forest he sawe in a valey a damoysel sitte by a welle and a wounded knyght in her armes / and Pellenore salewed her / And whan she was ware of hym she cryed ouer lowde / helpe me knyghte for crystes sake kynge Pellinore & he wold not tarye he was so eger in his quest / and euer she cryed an C tymes after help Whanne she sawe he wold not abyde / she prayd vnto god to sende hym as moche nede of help as she had / and that he myȝt fele it or he dyed / Soo as the book telleth the knyght there dyed that there was wounded / wherfor the lady for pure sorowe slewe her self with his swerd / As kynge Pellinore rode in that valey he met with a poure man a labourer / Sawest thow not saide Pellinore a knyghte rydynge and ledynge aweye a lady / ye said the man / I sawe that knyght and the lady that made grete dole / And yonder bynethe in a valey ther shal ye see two pauelions and one of the knyȝtes of the pauelions


Page  114 [leaf 57v]


chalengyd that lady of that knyght and sayd she was his cosyn nere / wherfor he shold lede her no ferther / And soo they wage bataill in that quarel / the one saide he wold haue her by force / and the other said he wold haue the rule of her by cause he was her kynnesman and wold led her to her kyn / for this quarel he lefte them fyghtynge / And yf ye wille ryde a paas ye shalle fynde them fyghtyng / and the lady was beleft with the two squyers in the pauelions / god thanke the sayd kynge Pellenore / Thenne he rode a wallop tyll he had a syght of the two pauelions and the two knyghtes fyghtyng / anon he rode vnto the pauelions / and sawe the lady that was his quest / and sayd fayre lady ye must goo with me vnto the court of kynge Arthur / Syr knyght said the two squyers that were with her yonder are two knyghtes that fyghte for thys lady / goo thyder and departe them / and be agreed with hem / & thenne may ye haue her at your pleasyr / ye say wel sayd kyng Pellenore / And anone he rode betwixt them and departed hem and asked hem the causes why that they fought / Sir knyght said the one / I shalle telle yow / this lady is my kynneswoman nygh myn auntes doughter / And whan I herd her complayne that she was with hym maulgre her hede / I waged bataille to fyghte with hym / Syre knyght sayd the other whoos name was Hontzlake of wentland / and this lady I gat by my prowesse of armes this day at Arthurs courte / that is vntruly said / said kynge Pellenore / for ye cam in sodenly ther as we were at the hyghe feest and tooke awey this lady or ony man myght make hym redy and therfore hit was my quest to brynge her ageyne and yow bothe / or els the one of vs to abyde in the felde / therfor the lady shalle goo with me / or I wille dye for it / for I haue promysed hit kynge Arthur / And therfor fyghte ye no more / for none of yow shalle haue no parte of her at this tyme / And yf ye lyst to fyȝte for her / fyȝte with me / and I wille defende her / wel said the knyghtes make you redy / and we shalle assaile yow with al our power / And as kynge Pellenore wold haue put his hors for them syr Hontzlake roofe his hors thorow with a swerd and said / Now art thow on foote as wel as we are / whan kynge Pellinore aspyed that his hors was slayne / lyȝtely he lepte from his hors/


Page  115 [leaf 58r]


and pulled oute is swerd / and put his sheld afore hym / and sayde knyghte kepe wel thy heede / for thow shalt haue a buffet for the sleyng of my hors / So kyng Pellenore gaf hym suche a stroke vpon the helme that he clafe the hede doune to the chynne that he fylle to the erthe dede

¶ Capitulum xiij

ANd thenne he torned hym to the other knyȝte that was sore wounded / but whan he sawe the others buffet / he wold not fyghte / but kneled doune and sayd take my cosyn the lady with yow at youre request / and I requyre yow as ye be a true knyghte / put her to no shame nor vylony / What sayd kynge Pellenore wylle ye not fyghte for her / no syr sayd the knyghte I wylle not fyghte with suche a knyȝte of prowesse as ye be / wel said Pellenore / ye say wel / I promyse yow she shall haue no vylony by me as I am true knyght / but now me lacketh an hors said Pellinore / but I wylle haue hontzlakes hors / ye shalle not nede sayd the knyght / for I shalle gyue yow suche an hors as shalle please yow / so that ye wille lodge with me / for it is nere nyghte / I wille wel sayd kynge Pellenore abyde with yow al nyghte / and there he hadde with hym ryght good chere / and faryd of the best with passynge good wyne and had mery rest that nyghte / And on the morne he herd a masse and dyned / And thenne was broughte hym a fayre bay courser / and kynge Pellenors sadel sette upon hym / Now what shalle I calle yow said the knyȝt in as moche as ye haue my cosyn at your desyre of your quest Syr I shalle telle yow my name is kyng Pellenore of the Ilys and knyghte of the table round / Now I am glad said the knyght that suche a noble man shalle haue the rule of my cosyn / Now what is your name said Pellenore / I pray yow telle me / Syr my name is syr Meliot of Logurs / and this lady my cosyn hyght Nymue / and the knyghte that was in the other pauelione is my sworne broder a passynge good knyȝte and his name is Bryan of the Ilys / and he is ful loth to do wronge and ful lothe to fyghte with ony man / but yf he be sore souȝt on / so that for shame he may not leue it / It is merueil


Page  116 [leaf 58v]


said Pellinore that he wille not haue adoo with me / syr he wil not haue adoo with no man but yf it be at his request / Brynge hym to the Courte said Pellenore one of these dayes / Syr we wylle come to gyders / and ye shalle be welcome said Pellinore to the Courte of kynge Arthur / and gretely allowed for your comynge and so he departed with the lady / & brouȝt her to Camelot / Soo as they rode in a valey it was ful of stones / and there the ladyes hors stumbled and threwe her doun that her arme was sore brysed and nere she swouned for payne / Allas syr sayd the lady myn arme is oute of lythe wher thorow I must nedes reste me / ye shal wel said kyng Pellinore / and so he alyȝt vnder a fayr tree where was fayr grasse and he put his hors therto / and so leyd hym vnder the tree / and slepte tyl it was nyghe nyght / And whan he awoke / he wold haue ryden / Sir said the lady it is so derke that ye may as wel ryde backward as forward / soo they abode styll & made there their lodgyng / Thenne syr Pellenore put of his armour thēne a lytel afore mydnyȝt they herd the trottynge of an hors be ye styll said kyng Pellenore / for we shalle here of somme auenture

¶ Capitulum xiiij

ANd ther with he armed hym / so ryght euen afore hym ther met two knyghtes / the one cam froward Camelot / and the other from the northe / and eyther salewed other / what tydynges at Camelot sayd the one / by my hede saide the other ther haue I ben & aspyed the courte of kynge Arthur And ther is suche a felauship they may neuer be broken / and wel nyghe al the world holdeth with Arthur / for there is the flour of chyualrye / Now for his cause I am rydyng in to the north to telle or chyuetayns of the felauship that is withholden with kyng Arthur / as for that said the other knyght I haue brought a remedy with me that is the grettest poyson that euer ye herd speke of & to Camelot wyll I with it / for we haue a frend ryght nyghe kyng Arthur and wel cherysshed that shal poysone kynge Arthur / for so he hath promysed oure chyuetayns & receyued grete yeftes for to do it / Beware said the other knyght of Merlyn / for he knoweth all thynges by the deuyls crafte / therfore wille I not lete it said the knyghte / & so they departed in sonder / Anone after Pellenore maade hym


Page  117 [leaf 59r]


redy and his lady rode toward Camelot / And as they cam by the wel there as the wounded knyght was and the lady / there he fond the knyghte and the lady eten with lyons or wylde beestes al sauf the hede / wherfor he made grete sorowe and wepte passynge sore and said Allas her lyf myghte I haue saued / but I was so fyers in my quest therfore I wold not abyde / wherfore make ye suche doole said the lady / I wote not said Pellinore / but my herte morneth sore of the deth of her for she was a passyng fayr lady and a yonge / Now wylle ye doo by myne aduys said the lady / take this knyghte and lete hym be buryed in an heremytage / and thenne take the ladyes hede and bere it with yow vnto Arthur / So kyng Pellinore took this dede knyght on his sholders / and broughte hym to the heremytage and charged the heremyte with the corps / that seruyse shold be done for the soule / and take his harneys for your payne / it shalle be done said the heremyte as I wille ansuer vnto god

¶ Capitulum xv

ANd ther with they departed and cam there as the hede of the lady lay with a fair yelow here that greued kyng Pellinore passyngly sore whan he loked on hit / for moche he cast his herte on the vysage / And soo by none they came to Camelot / and the kynge and the quene were passyng fayn of his comynge to the Courte / And there he was made to swere vpon the four euuangelystes to telle the trouth of his quest from the one to the other / A syr Pellinore sayd quene Gweneuer ye were gretely to blame that ye saued not this ladyes lyf / Madame said Pellinore ye were gretely to blame and ye wold not saue your owne lyf & ye myȝt / but sauf your pleasir I was so furyous in my quest that I wold not abyde / & that repenteth me & shal the dayes of my lyf / Truly saide Merlyn ye ouȝt sore to repente it / for that lady was your own douȝter begoten on the lady of the rule / & that knyght that was dede was her loue / and shold haue wedded her / and he was a ryght good knyght of a yonge man and wold haue preued a good man / & to this court was he comyng & his name was sir Myles of the laūdys / & a knyȝt cam behynde hym / & slewe him with spere & his name is Lorayne le saueage a fals knyȝt & a coward / & she for grete sorow & dole slewe her self with


Page  118 [leaf 59v]


his swerd / and her name was Eleyne / And by cause ye wold not abyde and helpe her / ye shalle see youre best frende faylle yow whan ye been the grettest distresse that euer ye were / or shalle be / And that penaūce god hath ordeyned yow for that dede / that he that ye shalle most truste to of ony man alyue / he shalle leue yow ther ye shalle be slayne / Me forthynketh said kynge Pellinore that this shalle me betyde but god may fordoo wel desteny / Thus whan the quest was done of the whyte herte / the whiche folowed syr gawayne and the quest of the brachet folowed of syr Tor Pellenors sone / & the quest of the lady that the knyghte tooke aweye / the whiche kyng Pellinre at that tyme folowed / Thenne the kyng stablysshed all his knyghtes and gaf them that were of londes not ryche / he gaf them londes / and charged hem neuer to doo outragyousyte nor mordre / and alweyes to flee treason / Also by no meane to be cruel / but to gyue mercy vnto hym that asketh mercy vpon payn of forfeture of their worship and lordship of kyng Arthur for euermore / and alweyes to doo ladyes / damoysels / and gentylwymmen socour vpon payne of dethe / Also that no man take noo batails in a wrongful quarel for noo lawe ne for noo worldes goodes / Vnto this were all the knyghtes sworne of the table round both old and yong / And euery yere were they sworne at the hyghe feest of Pentecost.

Explicit the weddynge of kynge Arthur




(Winchester f.35-44v; Caxton III.1-III.15; Vinaver Vol. 1, pp. 97.1-120.28; Shepherd 62.1-77.37)


f. 35 (III.1)


IN the begynnyng of Arthure Aftir He was chosyn kynge

by adventure and by grace for the moste party of the barownes knew nat he was

Vther Pendragon son But as Merlyon made hit opynly knowyn · But

yet many kyngis and lordis hylde hym grete werre for that cause // But well

Arthur ouer com hem all the moste party dayes of hys lyff he was ruled by Þe counceile

of Merlyon So hit felle on a tyme kyng Arthur seyde vnto Merlion My ba/

rownes woll let me haue no reste but nedis I muste take a wyff & I wolde none

take but by thy counceile and advice // hit ys well done seyde Merlyon that

ye take a wyff · For a man of youre bounte and nobles scholde

not be with oute a wyff · Now is Þer ony seyde Marlyon that

ye love more than a noÞer · ye seyde kyng Arthur I love Gwe//

nyvere the kynges doughtir of lodegrean of Þe londe of Came//

lerde the whyche holdyth In his house the table rounde that ye

tolde me he had hit of my fadir Vther And this damesell is the

moste valyaunte and fayrest on lyve · But and ye loved hir not

so well as ye do I scholde fynde you a damesell of beaute and

of goodnesse that sholde lyke you and please you and youre

herte were nat sette · But there as mannes herte is sette

he woll be loth to returne · that is trouthe seyde kyng Arthur

But Marlyon warned the kyng covertly that Gwenyuer was nat

holsom for hym to take to wyff · For he warned hym that Laun//

celot scholde love hir and sche hym a gayne · And so he turned his

tale to the aventures of the Sankegreal · Than M· desyred of

the kyng for to haue men with hym Þat scholde enquere of Gwenyuer

and so the kyng grunted hym and so Merlyon wente forthe

vnto kyng Lodegean of Camylerde and tolde hym of the desire

of the kyng Þat he wolde haue vnto his wyff Gwenyuer his douȝter

That is to me seyde kyng Lodegreauns the beste tydynges that

euer I herde · that so worthy a kyng of provesse & noblesse wol wedde

my dougter · And as for my londis I wolde geff hit hym yf I wyste


f. 35v (III.1-3)


hit myght please hym but he hath londis I now he nedith none But I shall

sende hym a gyffte that shall please hym muche more for I shall gyff hym

the table rounde // Whych Vther hys fadir gaff me And whan hit ys

full complete there ys an C· knyghtes and L· And as For and C· good knyȝtes

I haue my selff But I wante L· for so many hathe be slayne in my dayes

And so kynge Lodgreaunce delyuerd hys doughtir Gwenyuer vnto M· and the

table rounde with the C· knyghtes and so they rode freysshly with grete roy//

alte what by watir and by londe tyll that they com nyghe vnto London

Whan kynge Arthure herde of the commynge of quene Gwenyuer and the

C· knyghtes with the table rounde Than kynge Arthure made grete Joy

for hir commynge and that ryche presente and seyde opynly thys fayre

Lady ys passyngly well com to me for I have loved hir longe And Þer fore

there ys no thynge so leeff to me and thes knyghtes with the table rownde

pleasith me more than ryght grete rychesse And in all haste the kynge

lete ordayne for the maryage and the coronacion In the moste honorablyst

wyse that cownde be devised // Now Merlion seyde kyng Arthure go Þou

and aspye me in all thys londe L· knyghtes which bene of moste provesse &

worship So with In shorte tyme Merlion had founde such knyghtes that

sholde fulfylle xxti and viij knyghtes but no mo wolde he fynde Than the

bysshop of Caunterbury was sette and he blyssed the segis with grete ·

royalte and devocion and there sette the viij· & xxti knyghtes in her segis

And whan thys was done M sayde fayre sirres ye muste all aryse

and com to kynge Arthure for to do hym omage he woll the better be in

wylle to maynteyne you and so they a rose and dud per omage And whan

they were gone M· founde in euery sege lettirs of golde that tolde Þe knyghtes

namys that had sitten there but ij· segis were voyde // And so anone com

In yonge Gawayne and asked the kynge a gyffte // Aske seyde the kynge

and I shall graunte you // Sir I aske that ye shall meke me knyght that

same day that ye shall wedde dame Gwenyuer I woll do hit with a goode

wylle seyde kynge Arthure and do vnto you all the worship that I

I may for I muste be reson ye ar my nevew my sistirs son · Forth with

all there com a poore man in to the courte and brought with hym a


f. 36 (III.3)


fayre yonge man of xviij· yere of ayge rydynge vppon a lene mare

And the poore man asked all men that he mette where shall I fynde

kynge Arthure yondir he ys seyde the knyghtes wolt Þo ony thynge with

hym ye seyde the poore man there fore I cam hydir And as sone as he

com be fore the kynge he salewed hym And seyde kynge Arthure the

floure of all kyngis I be seche Jhu save the // Sir hit was tolde me

that as thys tyme of youre maryaige ye wolde gyff ony man Þe gyffte

that he wolde aske you excepte hit were vnresonable // That ys trouÞe

seyde the kynge such cryes I lette make and that woll I holde so hit appayre

nat my realme nor myne astate // ye sey well and graciously seyde the

pore man // Sir I aske no tyunge elis but that ye woll make my sonne

knyght // hit ys a grete thynge Þou askyst off me seyde the kynge // What

ys thy name seyde the poore man to the kynge to the poore man // Sir

my name ys Aryes the cowherde whethir commith thys of the oÞer ells

of thy sonne seyde the kynge Nay sir seyd Aryes thys desyre commyth of

my son and nat off me For I shall telle you I haue xiij· sonnes And all

they woll falle to what laboure I putte them and woll be ryght

glad to do laboure but thys chylde woll nat laboure for no thynge Þat

my wyff and I may do but all wey he woll be shotynge or castynge

dartes and glad for to se batayles and to be holde knyghtes // And all wayes

day and nyght he desyrith of me to be made knyght // What ys thy

name seyde the kynge vnto the yonge man Sir my name ys Torre

Than the kynge behelde hym faste and saw he was passynly well

vysaged and well made of hys yerys well seyde kynge Arthure vnto

Aryes the cowherde go fecche all thy sonnes be fore me that I may se Þem

and so the pore man dud and all were shapyn muche lyke the poore

man But Torre was nat lyke hym noÞer in shappe ne in countenaunce

for he was muche more than ony of them Now seyde kyng Arthur

vnto the cowherde Where ys the swerde he shall me made knyght with

all hyt ys here seyde Torre take hit oute of the sheÞe seyde Þe kynge

and requyre me to make you knyght // Than Torre alyȝt of hys

mare and pulled oute hys swerde knelynge and requyrynge Þe kynge


f. 36v (III.3-4)


to make hym knyght and that he made hym knyght of the table rounde

As for a knyght I woll make you and there with smote hym in the

necke with the swerde be ye a good knyght and so I pray to god ye may

be and if ye be of proves and worthynes ye shall be of the table

rounde // Now M seyde Arthure whethir thys Torre shall be a good

man // yee hardely sir he ought to be a good man for he ys com of good

kynrede as ony on lyve and of kynges bloode // how so Sir seyd Þe kynge

I shall telle you seyde M Thys poore man Aryes the cowherde ys nat his

fadir for he ys no sybbe to hym For kynge pellynore ys hys fadir I sup/

pose nat seyde the cowherde // well fecch thy wyff be fore me seyde M·

and she shall nat sey nay Anone the wyff was fette forth · which was

a fayre houswyff And there she answerde M· full womanly and Þer

she tolde the kynge and M· that whan she was a mayde and wente to

mylke hir kyne there mette with me a sterne knyght and half be

force he had my maydynhode and at that tyme he be gate my sonne

Torre and he toke a wey fro me my grayhounde that I had that tyme

with me and seyde he wolde kepe the grayhounde fo my love A seyde

the cowherde I wente hit had nat be thus but I may be leve hit

well for he had neuer no tacchys of me Sir Torre seyde vnto M dis

honoure nat my modir Sir seyde M· hit ys more fo your worship

than hurte for youre fadir ys a good knyght and a kynge And he may

ryght well avaunce you and youre modir both for ye were begotyn

or evir she was wedded That ys troughte seyde the wyff hit ys the lesse

gryff vnto me seyde the cowherde So on the morne kynge pellynor

com to the courte of kynge Arthure And he had grete Joy of hym and

tolde hym of Sir Torre how he was hys sonne and how he had

made hym knyght at the requeste of the cowherde // Whan kynge

pellynor behelde Sir Torre he plesed hym muche So the kynge

made Gawayne knyght But Sir Torre was the firste he made at

that feste // What ys the cause seyde kynge Arthure that Þer ys ij placis

voyde in the Segis Sir seyd M· there shall no man sitte in Þo placis

but they that shall be moste of worship But in the Sege perelous there


f. 37 (III.4-5)


shall nevir man sitte but one and yf Þer be ony so hardy to do hit he shall

be destroyed And he that shall sitte Þer In shall have no felowe And Þer with

Merlyon toke kynge Pellinor by the honde and in that one hande nexte

the ij segis and the sege perelous he seyde in opyn audiens thys your place

for beste ar ye worthy to sitte Þer Inne of ony that here ys And there at

had Sir Gawayne grete envy and tolde Gaherys hys brothir yondir

knyght ys putte to grete worship whych grevith me sore for he slewe

oure fadir kynge Lott there fore I woll sle hym seyde Gawayne with a

swerde that was sette me that ys passynge trencheaunte // ye shall nat

so seyde Gaheris at thys tyme for as now I am but youre squyre And

whan I am made knyght I woll be avenged on hym And there fore

brothir hit ys beste to suffir tyll a noÞer tyme that we may have hym

oute of courte for and we dud so we shall trouble thys hyȝe feste //

I woll well seyde Gawayne Than was thys feste made redy and Þe

kynge was wedded at Camelot vnto dame Gwenyuere In Þe chirche

of seynte Stephyns with grete solempinte Than as euery man was

sette as hys degre asked M· wente to all the knyghtes of the rounde table

and bade hem sitte stylle that none of you remeve for ye shall se a

straunge and a mervalous adventure // Ryght so as they sate Þer com

rennynge Inne a whyght herte in to the hall and a whyght brachet

nexte hym and xxxti couple of blacke rennynge houndis com afftir

with a grete cry and the herte wente a boute the rounde table and as

he wente by the syde bourdis the brachet euer boote hym by the buttock

and pulde outte a pece where thorow the herte lepe a grete lepe

and ouer threw a knyght that sate at the syde bourde And there with

the knyght a rose and toke vp the brachet and so wente forthe oute

of the halle and toke hys horse and rode hys way with the brachett

Ryght so com In the lady on a whyght palferey And cryed a lowde

vnto kynge Arthure and seyd Sir suffir me nat to have thys despite

for the brachet ys myne that the knyght hath ladde away I may

nat do Þer with seyde the kynge So with thys Þer com a knyght rydyng 


f. 37v (III.5-6)


all armed on a grete horse and toke the lady away with forse wyth hym

and euer she cryed and made grete dole // So whan she was gone the

kynge was gladde for she made such a noyse // Nay seyde M· ye may

nat leve hit so thys adventure so lyghtly for thes adventures muste

be brought to an ende othir ellis hit woll be disworshyp to you and

to youre feste // I woll seyde the kynge that all be done by your advice

Than he lette calle Sir Gawayne for he muste brynge a gayne

the whyght herte Also Sir ye muste lette call Sir Torre for he muste

brynge a gay the brachette and the knyght othir ellis sle hym // Also

lette calle kynge Pellynor for he muste brynge a gayne the lady &

the knyght othir ellis sle hym and thes iij· knyghtes shall do meruayles

adventures or they com a gayne Than were they called all iij as

hit ys rehersed a fore and euery of them toke Þer charge and armed

them surely But Sir Gawayne had the firste requeste and Þer fore

we woll be gynne at hym And so forthe to thes oÞer

Here bigynnith Þe fyrst batayle Þat euer Sir Gawayne ded after he was made

Syr Gawayne rode more Þan a pace And Gaheris his //  knyght

brothir rode with hym in the stede of a squyre to do hym seruyse So as

they rode they saw ij knyghtes fyght on horse backe passynge sore So sir

Gawayne and hys brothir rode be twyxte them And asked them for

what cause they fought so // One of the knyghtes seyde we fyght but for

a symple mater for we ij· be ij brethirne and be begotyn of oo man

and oo woman // Alas seyde Sir Gawayne Sir seyde the elÞer broÞer

there com a whyght herte thys way thys same day and many

houndis chaced hym and a whyght brachett was all wey nexte

hym and we vndir stood hit was an adventure made for the hyȝe 

feste of Arthure And there fore I wolde have gone afftir to haue

wonne me worship And here my yonger brothir seyde he wolde

go aftir the harte for he was bygger knyght than I And for thys

cause we felle at debate and so we thought to preff which of vs

was the bygger knyght // For soth thys ys a symple cause seyde Gaw//

ayne for vncouth men ye sholde debate with all and no broÞer with brothir


f. 38 (III.6-7)


There fore do be my counceyle othir ellis I woll haue a do with you bothe

er yelde you to me And that ye go vnto kynge Arthure and yelde you

vnto hys grace // Sir knyght seyde the ij brethirne we ar for foughten

and muche bloode have we loste thorow oure wylfulnes And Þer fore

we wolde be loth to have a do with you // Than do as I woll have you

do seyde Sir Gawayne we a gre to fulfylle youre wylle // But by whom

shall we sey that we be thydir sente // ye may sey by the knyght that

folowith the queste of the herte // Now what ys youre name seyde Gaw//

ayne // Sir my name ys Sorluse of the foreyste seyde the elder And my

name ys seyde the yonger Bryan of the foreyste and so they departed and

wente to the kyngis courte And Sir Gawayne folowed hys queste And

as he folowed the herte by the cry of the howndis evyn be fore hym

there was a grete ryver and the herte swam ouer And as Sir Gawayn

wolde a folowed afftir there stood a knyght on the othir syde And seyde

Sir knyght com nat ouer aftir thys harte but if Þou wolt Juste with

me I woll nat fayle as for that seyde Sir Gawayne to folow the

queste that I am Inne And so made hys horse swymme ouer the watir

and anone they gate Þer glayves and ran to gydirs fulle harde But

Gawayne smote hym of hys horse and than he bade hym yelde hym                       

Nay seyde the knyght nat so for Þouȝe ye have the better of me on horsebak         

I pray the valyaunte knyght a lyght on foote and macche we to gidir                      

with oure swerdis // What ys youre name seyde Sir Gawayne Sir                                        

my name ys Alardyne of the oute Iles Than aythir dressed Þer shyldes                         

and smote to gydir But Sir Gawayne smote hym so harde thorow

the helme that hit wente to the brayne And the knyght felle downe

dede A· seyde Gaherys that was a myghty stroke of a yonge knyght

Than Sir Gawayne & Gaherys folowed afftir Ryght so Þer com a

knyght oute of a chambir with a swerde drawyn in hys honde and

slew ij of the gray houndes evyn in the syght of Sir Gawayne and Þe

remanente he chaced with hys swerde oute of the castell And whan

he com a gayne he seyde a my whyght herte me repentis Þat Þou


f. 38v (III.7)


arte dede for my soueraigne lady gaff the to me and evyll have I kepte the

and thy dethe shall be evyl · bought and I lyve And anone he wente

in to hys chambir and armyd hym and com oute fersely And there

he mette with Sir Gawayne and he seyde why have ye slayne my

howndys I wolde that ye had wrokyn youre angir vppon me rather

than vppon a dome beste Thou seist trouth seyde the knyght I have a

venged me on thy howndys and so I woll on the or Þou go // Than Sir

Gawayne a lyght on foote and dressed hys shylde and stroke to gydirs

myghtyly & clave Þer shyldis and stooned Þer helmys & brake Þer hawbirkes

that Þer blo Þirled downe to Þer feete So at the last Sir Gawayne smote

so harde that Þe knyght felle to the erthe and Þan he cryed mercy & yelded

hym and be sought hym as he was a Jantyll knyght to save hys lyff

Thou  shalt dey seyd Sir Gawayne for sleynge of my howndis I woll

 make a mendys seyde the knyght to my power But Sir Gawayne

wolde no mercy have but vnlaced hys helme to have strekyn of hys hede

Ryght so com hys lady oute of a chambir and felle ouer hym and so he

smote of hir hede by mysse fortune Alas seyde Gaherys that ys fowle

and shamefully done for that shame shall neuer from you // Also ye sholde

gyff mercy vnto them that aske mercy for a knyght with oute mercy ys with

oute worship // So sir Gawayne was sore a stoned of the deth of this

fayre lady that he wyst nat what he dud and seyde vnto the knyght

a ryse I woll gyff the mercy // Nay nay seyd the knyght I take no forse

of thy mercy now for Þou haste slayne with vilony my love and my lady

that I loved beste of all erthly tynge Me sore repentith hit seyde Sir

Gawayne for I mente the stroke vnto the But now Þou shalt go vnto kynge

Arthure and telle hym of thyne adventure and how Þou arte ouer com

by the knyght that wente in the queste of the whyght harte // I take no

force seyde the knyght wheÞer I lyve othir dey but at the last for feare

of dethe he swore to go vnto kynge Arthure and he made hym to bere

the one grehownde be fore hym on hys horse and the oÞer be hynde hym

What ys youre name seyde Sir Gawayne or we departe my name ys

seyde the knyght Blamoure of the maryse And so he departed towarde 


f. 39 (III.7-8)


Camelot And Sir Gawayne wente vnto the castell and made hym

redy to lye there all nyght and wolde have vnarmed hym // What

woll ye do seyde Gaherys woll ye vnarme you in thys contrey ye

may thynke ye haue many fooes in thys contrey // he had no sunner

seyde the worde but Þer com In iiij· knyghtes well armed & assayled

Sir Gawayne harde and seyde vnto hym Þou new made knyght

Þou haste shamed thy knyghthode for a knyght with oute mercy

ys dishonoured Also Þou haste slayne a fayre lady to thy grete shame

vnto the worldys ende and doute Þe nat Þou shalt have grete nede of

mercy or Þou departe frome vs And there with one of hem smote Sir

Gawayne a grete stroke that nygh he felle to the erthe And Ga//

herys smote hym a gayne sore And so they were assayled on Þe one

syde and on the othir that Sir Gawayne and Gaherys were in Jouparte

of Þer lyves And one with a bowe an Archer smote Sir Gawayne

thorow the arme that hit greved hym wondirly sore And as they

sholde have bene slayne there com iiij· fayre ladyes and be souȝt the 

knyghtes of grace for Sir Gawayne And goodly at the requeste of Þes

ladyes they gaff Sir Gawayne and Gaherys Þer lyves and made

them to yelde them as presoners Than Sir Gawayne & Gaherys

made grete dole Alas seyde Sir Gawayne my narme grevith me

sore that I am lyke to be maymed and so made hys complaynte

pytevously So erly on the morne there com to Sir Gawayne one

of the iiij· ladyes that had herd hys complaynte And seyd sir knyght

what chere that had herde hys complaynte Nat good / Why so hit ys

youre owne defaute seyde the lady for ye have done passynge foule

for the sleynge of thys lady the whych woll be grete vylony vnto you

But be ye nat of kynge Arthurs seyde the lady // yes truly seyde Syr

Gawayne // What ys youre name seyde Sir lady for ye muste telle or

ye passe Fayre lady my name ys Sir Gawayne the kynges son lotte of

Orkeney and my modir ys Kynge Arthurs sister Than ar ye nevew

Vnto the kynge seyde the lady well seyde the lady I shall so speke for you 


f. 39v (III.8-9)


that ye shall have to go vnto kynge Arthure for hys love and so she

departed and tolde the iiij· knyghtes how the presonere was kynge Arthurs

nevew And hys name ys Sir Gawayne kynge Lottis son of Orkeney

So they gaff hym leve and toke hym the hartes hede with hym be cause hit

was in the queste And than they delyuerde hym vndir thys promyse Þat

he sholde bere the dede lady with hym on thys maner the hede of her

was hanged a boute hys necke and the hole body of hir be fore hym

on hys horse mane // Ryght so he rode forthe vnto Camelot And a none

as he was com M· dud make kynge Arthure that Sir Gawayne was

sworne to telle of hys adventure and how he slew the lady and how

he wolde gyff no mercy vnto the knyght where thorow the lady was

slayne Than the kynge and the quene were gretely displeased with Sir

Gawayne for the sleynge of the lady And there by ordynaunce of the

queene there was sette a queste of ladyes vppon Sir Gawayne and

they juged hym for euer whyle he lyved & to be with all ladyes and to

fyght for hir quarels and euer that he sholde be curteyse and neuer to

refuse mercy to hym that askith mercy Thus was Sir Gawayne sworne

vppon the iiij· euangelystis that he sholde neuer be a yenste lady ne Jan//

till woman but if he fyght for a lady and hys aduersary fyghtith for

a noÞer And Þer endith the adventure of Sir Gawayne Þat he dud at Þe mariage

of Arthure ~  ~  ~  ~  ~  ~  ~


han Sir Torre was redy he mounted vppon horse backe &

rode afftir the knyght with the brachett And so as he rode

he mette with a dwarff suddeynly that smote hys horse on Þe hede

with a staff that he reled bakwarde hys spere lengthe // Why dost

Þou so seyde Sir Torre For Þou shall nat passe thys way but if Þou

Juste with yondir knyghtes of the pavilions Than was Sir Torre

ware where were ij pavilions and grete spery stood oute and ij shildes

hangynge on treys by the pavilions I may nat tarry seyd Sir Torre

for I am in a queste that I muste nedys folow Thou shalt nat passe


f. 40 (III.9-10)


thys wey seyde the dwarff and there with all he blew hys horne // Than

Þer com one armed on horsebacke and dressed hys shylde and com fast

towarde Sir Torre And than he dressed hym a yenste hem and so ran

to gydirs And Sir Torre bare hym frome hys horse and anone Þe knyȝt

yelded hym to hys mercy But Sir I have a felow in yondir pavilyon

that woll have a do with you a none he shall be well com seyde Sir Torre

Than was he ware of a noÞer knyght commynge with grete rawndon and

eche of hem dressed to oÞer that mervayle hit was to se / But Þe knyȝt

smote Sir Torre a grete stroke in myddys the shylde that his spere all

to shyverde And Sir Torre smote hym thorow the shylde be nethe Þat

hit wente thorow the coste of the knyght but the stroke slew hym nat

And there with Sir Torre alyght and smote hym on the helme a gete

stroke and there with the knyght yelded hym and be sought hym of mercy

I woll well seyde Sir Torre But ye and youre felow muste go vnto

kynge Arthure and yelde you presoners vnto hym // By whom shall

we sey we ar thydir sente / ye shall sey by the knyght that wente in Þe

queste of the knyght with the brachette // Now what be your ij namys

seyde sir Torre My name ys seyde that one Sir Phelot of Langeduke

and my name ys seyde the othir Sir Petipace of Wynchilsee Now go ye

forthe seyde Sir Torre and god spede you and me Than cam Þe dwarff

and seyde vnto sir Torre I pray you gyff me my bone I woll well seyde

Sir Torre aske and ye shall have I aske no more seyde the dwarff but Þat

ye woll suffir me to do you seruyse for I woll serue no more recreaunte

knyghtes well take an horse seyde Sir Torre and ryde one with me

For I wote seyde the dwarff ye ryde afftir the knyght with the whight

brachette and I shall brynge you where he ys seyde the brachet the

dwarff and so they rode thorow oute a foreste And at the laste they

were ware of ij· pavilions evyn by a pryory and that one shylde

was enewed with whyght and that othir shylde was rede · Ther with

Sir Torre a lyght and toke the dwarff hys swerde glayve and so

he com to the whyght pavilion he saw iij· damesels lye in hyt

on a paylette slepynge And so he wente vnto the toÞer pavylyon


f. 40v (III.10)


and founde a lady lyynge in hit slepynge but there In was the whyght

brachett that bayed at hym faste And than Sir Torre toke vp the bra//

chette and wente hys way and toke hit to the dwarffe And with the

noyse the lady com oute of the pavilion and all hir damesels & sayde

woll ye take my brachette from me // ye seyde Sir Torre the brachett

have I shought frome kynge Arthures courte hydir well seyde Þe lady

Sir knyght ye shall nat go farre with hir but that ye woll be mette

with and greved I shall a byde what adventure that commyth by the

grace of god and so mownted vppon hys horse and passed on hys

way towarde Camelot but hit was so nere nyght he myght nat passe

but litill farther · Know ye any lodgyng here nye seyde Sir Torre

I know none seyde the dwarff but here be sydys ys an ermytaige &

there ye muste take lodgynge as ye fynde And with In a whyle Þey

com they com to the hermytage and toke such lodgynge as was Þere

and as grasse and otis and brede for Þer horsis sone hit was spedde

and full harde was Þer souper but there they rested them all nyght

tylle on the morne and herde a masse devoutely and so toke Þer leve

of the Ermyte And so sir Torre prayde the Ermyte to pray for hym

And he seyde he wolde and be toke hym to god And so mownted vppon

horse backe And rode towardis Camelot a longe whyle // So with Þat they

herde a knyght calle lowde that com afftir them and seyde knyght

a byde and yelde my brachette that Þou toke frome my lady // Sir Torre

returned a gayne and be helde hym how he was a semely knyght

and well horsed and armed at all poyntes Than Sir Torre dressed

hys shylde and toke hys glayve in hys hondys And so they com fersely

on as freysshe men and droff both horse and man to the erthe A·

none they arose lyghtly and drew hir swerdis as egirly as lyons

and put Þer shyldis / be fore them and smote thorow Þer shyldys Þat the

cantels felle on bothe partyes Also they tamed Þer helmys that the

hote bloode ran oute and the thycke mayles of Þer hawbirkes they

carff and rooffe in sundir that Þe hote blood ran to the erthe And







f. 41 (III.10-11)


bothe they had many woundys and were passynge wery But sir Torre

aspyed that Þe tothir knyght faynted and than he sewed faste vppon

hym and doubled hys strokis and stroke hym to the erthe on the one

syde Than Sir Torre bade hym yelde hym // That woll I nat seyde ·

Abelleus whyle lastith the lyff and the soule In my body onles Þat Þou

wolte geff me the brachette That woll I nat seyde sir Torre for hit

was my queste to brynge a gayne the brachette Þee oÞer bothe // With

that cam a damesell rydynge on a palferey as faste as she myght

dryve and cryed with lowde voice vnto Sir Torre what woll ye with

me seyde Sir Torre I be seche the seyde the damesell for kynge Arthurs

love gyff me a gyffte I requyre the Jantill knyght as Þou arte a Jantill

man // Now seyde Sir Torre aske a gyffte and I woll gyff hit you //

Grauntemercy seyde the damesell Now I aske the hede of thys false

knyght Abelleus for he ys the moste outerageous knyght Þat lyvith

and the grettist murtherer // I am lothe seyde Sir Torre of Þat gyffte

I have gyvyn you · but lette hym make a mendys in that he hathe

trespasted a gayne you // Now seyde the damesell I may nat I may

nat for he slew myne owne brothir be fore myne yȝen that was 

a bettir knyght than he and he had had grace And I kneled halfe

an owre be fore hym in the myre for to sauff my brothirs lyff that

had done hym no damage but fought with hym by adventure of

armys And so for all that I coude do he strake of hys hede where

fore I requyre the as Þou arte a trew knyght to gyff me my gyffte

othir ellis I shall shame the in all the courte of kynge Arthure

for he ys the falsyste knyght lyvynge and a grete destroyer of men &

namely of good knyghtes // So whan Abellyus herde thys he was more

a ferde and yelded hym and asked mercy // I may nat now seyde Sir

Torre but I sholde be founde false of my promyse for ere whyle whan

I wolde haue tane you to mercy ye wolde none aske but iff ye had the

brachett a gayne that was my queste and there with he toke off

hys helme and there with he arose and fledde And Sir Torre afftir


f. 41v (III.11)


hym and smote of hys hede quyte Now sir seyde the damesell hyt ys

nere nyght I pray you com and lodge with me here by at my place

I woll well seyde Sir Torre for my horse and I have fared evyll syn

we departed from Camelot and so he rode with her and had passynge good

chere with hir and she had a passyng fayre olde knyght vnto hire hus//

bande that made hym good chere and well easyd both hys horse & hym

and on the morne herde hys masse and brake hys faste and toke hys

leve of the knyght and of the lady that be sought hym to telle hys name

Truly he seyde my name ys sir Torre that was laste made knyght and

thys was the firste queste of armys that euery ded to brynge a gayne

that Þys knyght Abelleus toke a way frome kynge Arthurs courte

Now fayre knyght seyde the lorde and the lady and ye com here in oure

marchys se here youre poore lodgynge and hit shall be all wayes at

youre commaundemente So Sir Torre departed and com to Camelot on

the third day by noone And the kynge and the quene and all the courte

was passynge fayne of hys commynge and made grete Joy that he was

com a gayne for he wente from the courte with litill succour But as

Kynge Pellynor hys fadir gaff hym an olde courser And kynge Arthur

gaff hym armour and swerde oÞer ellis had he none oÞer succour but rode so

forthe hym self a lone And than the kynge and the quene by Merlions

advice made hym swere to telle of hys adventures and so he tolde and

made prevys of hys dedys as hit ys be fore reherced where fore the

kynge and the quene made grete Joy Nay nay seyde M· thys ys but

Japis that he hath do for he shall preve anoble knyght of proves as

few lyvynge and Jantyl and curteyse and of good tacchys & passyng

trew of hys promyse and neuer shall he oute rage where thorow

Merlions wordis kynge Arthure gaff an Erledom of londis that

felle vnto hym And here endith the quest of Sir Torre Kynge

Pellynors sonne ~ ~  ~  ~  ~  ~  ~  ~  ~  ~  ~  ~


f. 42 (III.12)


Than Kynge Pellynore armed hym and mownted vppon

hys horse and rode more than a pace after Þe lady Þat the knyght

lad a way And as he rode in a foreyste he saw in a valey a damesell sitte

by a well and a wounded knyght in her armys And Kynge Pellynor

salewed hir And whan she was ware of hym she cryed on lowde and

seyde helpe me knyght for Jhu ys sake // But kynge Pellynore wolde

nat tarry he was so egir in hys queste and euer she cryed an C tymes

aftir helpe // Whan she saw he wolde nat a byde she prayde vnto god

to sende hym as much nede of helpe as she had and that he myght

feele hit or he deyed So as the booke tellith · the knyght there dyed that

was wounded where fore for pure sorow the lady slew hir selff with

hys swerde and kynge Pellynore rode in that valey he mette with a poore

man a laborer which seyde sawyst Þou ony knyght rydynge Þys way

ledyng a lady // ye sir seyde the man I saw that knyght and the lady that

made grete dole And yondir be neth in a valey there shall ye se ij· pavi//

lions And one of the knyghtes of the pavilions chalenged that lady of

that knyght and sh seyde she was hys Cosyne nere where fore he shold

lede hir no farther And so they waged batayle in that quarell that

one seyde he wolde have hir by force And that oÞer seyde he wold have

the rule of her for he was hir kynnesman and wolde lede hir to hir

kynne so for thys quarell he leffte hem fyghtynge And if ye woll ryde a

pace ye shall fynde them fyghtynge And the lady was leffte with ij· squyers

in the pavelons / God thanke the seyde kynge Pellynor Than he rode

a walop tylle he had a syght of the ij pavilions and the ij knyghtys

fyghtynge And anone he rode vnto the pavilions and saw the lady

how she was there for she was hys queste and seyde fayre lady ye

muste go with me vnto the courte of Kynge Arthure Sir knyght seyde

the ij· squyres / yondir ar ij knyghtes that fyght for thys lady // Go ye Þyder

and departe them and be ye agreed with them and than may ye have

hir at youre plesure // ye sey well seyde kynge pellynor And anone

he rode be twixte hem and departed them and asked Þem Þer causis why


f. 42v (III.12-13)


they fought // Sir knyght seyde that one I shall telle you · thys lady ys my

kynnes woman nye · my awntis doughtir And whan I herde hir complayne

that she was with hym magre hir hede I waged batayle to fyght with hym

Sir knyght seyde thys othir whos name was Outelake of Wentelonde and

thys lady I gate be my provesse of hondis and armys thys day At Arthurs

courte That ys nat trew seyde kynge Pellynor for ye com In suddeynly Þer

as we were at the hyȝe feste and toke a wey thys lady or ony man

myght make hym redy And there fore hit was my queste to brynge her

a gayne and you bothe othir ellis Þat one of vs to leve in the fylde Þerfore

thys lady shall go with me othir I shall dye Þerfore for so have I promysed

kynge Arthur and there fore fyght ye no more for none of you shall have

parte of hir at thys tyme And if ye lyst for to fyght for hir with me I woll

defende hir // well seyde the knyghtes make you redy and we shall assayle

you with all oure power And as kynge pellynor wolde have put hys

horse frome hym Sir Outelake roff hys horse thorow with a swerde &

seyde now art Þou a foote as well as we ar // Whan kynge pellynore

aspyed that hys horse was lyghtly he lepe frome hys horse and pulled oute

hys swerde and put hys shylde a fore hym and seyde knyght kepe the well

for Þou shalt have a buffette for the sleynge of my horse So kynge Pellynor

gaff hym such a stroke vppon the helme that he clave the hede downe to Þe

chyne and felle downe to the erthe dede Than he turned hym to the oÞer

knyght that was sore wounded but whan he saw that buffette he wolde

nat fyght but kneled downe and seyde take my Cosyn thys lady with you

as ys youre queste and I require you as ye be a trew knyght put hir

to no shame noÞer vylony // what seyde Kynge Pellynore woll ye nat

fyght for hir // No seyde the knyght I woll nat fyght with such a knyght

of proves as ye be // Well seyde kynge pellynore I promyse you she

shall have no vyllany by me as I am trew knyght but now me wantis

an horse seyde kynge Pellynor but I woll have Outelakis horse Sir

ye shall nat nede seyde the knyght for I shall gyff you such an horse as

shall please you so that ye woll lodge with me for hit ys nere nyght

I woll well seyde kynge Pellynore a byde with you all nyght and Þer he had


f. 43 (III.13)


with hym ryght good chere and fared of the beste with passyng good wyne

and had myry reste that nyght And on the morne he harde masse and

dyned And so was brought hym a fayre bay courser And kynge Pelly

nores sadyll sette vppon hym Now what shall I calle you seyde the knyȝt

In as much · as ye have my Cousyn at youre desyre of youre queste

Sir I shall telle you my name ys Kynge Pellynor kynge of the Ilis &

knyght of the table rounde // Now am I glad seyde the knyght that such

a noble man sholde haue the rule of my Cousyn Now what ys youre

name seyde Kynge Pellynor I pray you telle me // Sir my name ys Sir

Meliot de Logurs and thys lady my Cosyn hir name ys called Nenyve

And thys knyght that was in the oÞer pavilion was my sworne broÞer

a passynge good knyght And hys name ys Bryan of the Ilis and he

ys full lothe to do ony wronge or to fyght with ony man but if he

be sore souȝt on hit ys mervayle seyde kynge Pellynor he wolde nat

haue a do with me // Sir he woll nat have a do with no man but

if hit be at hys requeste // I pray you brynge hym to the courte one of

thes dayes seyde kynge Pellynor Sir we woll com to gydirs ye shall be

well com seyde kynge Pellynore to the courte of Kynge Arthure and ye shall

be gretely alowed for youre commynge And so he departed with the lady and

brought her to Camelot But so as they rode in a valey hit was full

of stonys and there the ladyes horse stumbled & threw her downe

and hir arme was sore brused that nere honde she swooned for payne

Alas seyde the lady my narme ys oute of lythe where Þorow I muste

nedys reste me // ye shall well seyde kynge Pellynor and so he a lyȝt

vndir a tre where was fayre grasse and he put hys horse Þer to and

so rested hem vndir the tre and slepte tylle hit was ny nyght And

whan he a woke he wold haue rydden forthe but the lady seyde

ye may as well ryde bakwarde as forewarde hit ys so durke So Þey

a bode stylle and made Þer theire lodgynge Than kynge Pellynor put

of hys armoure that so a litill to fore mydnyȝt they herde Þe trottynge

of an horse // be ye stylle seyde kynge Pellynor for we shall hyre of


f. 43v (III.13-15)


som aduenture And there with he armed hym // So ryght evyn be fore

hym there mette ij knyghtes that one com frowarde Camelot And that

othir com from the northe and eyÞer salewed oÞer and asked what tydynges

at Camelot seyde that one knyght // Be my hede there have I bene and

aspied the courte of kynge Arthure and there ys such a felyship Þat Þey

may neuer be brokyn And well nyȝe all the world holdith with Arthure

for there ys the floure of chevalry And now for thys cause am I rydyng

in to the northe to telle oure chyfftaynes of the felyship that ys with

holdyn with kynge Arthure as for that seyde the othir knyght I haue

brought a remedy with me that ys the grettist poysen Þat euer ye herde

speke off And to Camelot woll I with hit for we haue a frende

ryght nyghe the kynge well cheryshed that shall poysen kynge Arthur

for so hath he promysed oure chyfftaynes and receyved gete gyfftis for

to do hit Be ware seyde the othir knyght of Mlion for he knowith

all thynges by the devylles craffte As for that woll I nat lett seyde Þe

knyght and so they departed in sondir And anone aftir that Kynge

pellynor made hym redy and hys lady and rode towarde Camelot &

as they com by the welle there as the wounded knyght was & the lady

there he founde the knyght and the lady etyn with lyons oÞer with wylde

bestis all save the hede // Where fore he made grete sorow and wepte

passynge sore and seyde alas hir lyff myght I have saved but I was

so ferse in my queste that I wolde nat a byde // where fore make ye such

doole seyde the lady I wote nat seyde kynge Pellinore but my herte

rwyth sore of the deth of hir that lyeth yondir for she was a passyng

fayre lady and a yonge // Now woll do by myne advise take Þe knyȝt

and lette hym be buryed In an Ermytage And than take Þe ladyes

hede and bere hit with you vnto kynge Arthure So kynge Pellynor

toke thys ded knyght on hys shyld and brought hym to the Ermytage

and charged the heremyte with the coorse that seruyse sholde be done

for the soule and take ye ye hys harneyse for youre payne // hit shall

be done seyde the hermyte as I woll answere to god And Þer with they


f. 44 (III.15)


departed and com there as the lady lay with a fayre yalow hers Þat greved

kynge Pellynore passynge sore whan he loked on hit for much hys

herte caste vnto that vysage And so by noone they com vnto Camelot

And the kynge and the quene was passyng fayne of hys commynge to

the courte and there he was made to swere vppon the iiij· euangelistes

to telle the trouthe of hys queste from the one ende to that oÞer // A kynge

Pellynor seyde quene Gwenyuer ye were gretly to blame that ye saved

nat thys ladyes lyff // Madam seyde kynge Pellynore ye were gretely

to blame and ye wolde nat save youre owne lyff and ye myght //

But saff youre displesure I was so furyous in my queste Þat I wolde

nat a byde and that repentis me and shall do dayes of my lyff //

Truly ye ought sore to repente hit seyde M· for that lady was youre

owne doughtir be gotyn of the lady of the rule and that knyght Þat was

dede was hir love and sholde have wedded hir and he was a ryght

good knyght of a yonge man and wolde a preved a good man An to Þis

courte was he commynge And hys name was Sir Myles of Þe laundis

and a knyght com be hynde hym and slew hym with a spere And hys

name was Lorayne le saveage a false knyght and a cowherde And

she for grete sorow and dole slew hir selff with his swerde and hyr

name was Alyne and be cause ye wolde nat a byde and helpe hir

ye shall se youre beste frende fayle you whan ye be in the grettist dis//

tresse that euer ye were othir shall be and that penaunce god hath

ordayned you for that dede / that he Þat ye sholde truste moste on of ony

man on lyve he shall leve you there ye shall be slayne // Me forthyn//

kith hit seyde kynge Pellynor Þat Þus shall me be tyde but god may

well for do desteny // Thus whan the queste was done of Þe whyght

herte the whych folowed Sir Gawayne and the queste of Þe brachet

whych · folowed Sir Torre kynge Pellynors son And the queste of the Þe

lady that the knyghte toke a way whych at that tyme folowed kynge

pellynor Than the kynge stablysshed all the knyghtes and gaff Þem

rychesse and londys and charged them neuer to do outerage noÞer mourÞir


f. 44v (III.15)


and all wayes to fle treson And to gyff mercy vnto hym that askith mercy

vppon payne of forfiture oÞer worship and lordship of kynge Arthure

for evir more and all wayes to do ladyes damesels and Jantilwo//

men and wydowes strengthe hem in hir ryghtes and neuer to enforce

them vppon payne of dethe Also that no man take no batayles in a

wrongefull quarell for no love ne for no worldis goodis So vnto

thys were all knyghtes sworne of the table rounde both olde & yonge

And euery yere so were the sworne at the hyȝe feste of Pentecoste



                        Explicit the weddyng of kyng Arthur





Home -- Biography -- Morte Darthur -- Links -- Transcriptions


I -- II -- III -- IV -- V -- VI -- VII -- VIII -- IX -- X -- XI -- XII -- XIII -- XIV -- XV