(Winchester f. 71-96; Caxton V.1-V.12; Vinaver, Vol. 1, pp. 186.1-247.9; Shepherd pp. 113.1-151.23)


f. 71 (V.1)

h yt be Felle Whan Kynge Arthure had wedded

quene Gwenyuere And fulfylled the rounde

table And so aftir his mervelous knyghtis

And he had venquyshed the moste party of his

enemyes // Than sone aftir come Sir Laun//

celot de Lake vnto Þe courte And Sir Trystramis come

that tyme also // And than so hit be felle that Þe Emperour

of Roome Lucius sente vnto Arthure messyngers commaun//

dynge hym for to pay his trewage Þat his Auncettryes haue

payde be fore hym // Whan kynge Arthure wyste what

they mente he loked vp with his gray yȝen and angred at

Þe messyngers passyng sore // than were this messyn//

gers a ferde and knelyd stylle and durste nat a ryse

they were so a ferde of his grymme countenaunce // Þan

one of Þe knyghtes messyngers spake a lowde And seyde

crowned kynge mysse do no messyngers · For we be come

 at his commaundemente as servytures sholde // Than

spake Þe conquerrour Þou recrayed & coward knyghte

why feryst Þou my countenaunce · there be In this halle

& they were sore aggreved Þou durste nat for a deuke//

dom of londis loke In Þer facis // Sir seyde one of Þe Se

natoures so cryste me helpe I was so a ferde whan I

loked In thy face that myne herte wolde nat serue for

to sey my message · But sytthen hit is my wylle for to sey

myne erande // The gretis welle Lucius the Emperour

of Roome and commaundis Þe vppon payne Þat woll falle

to sende hym Þe trewage of this Realme that thy fadir

Uther Pendragon payde oÞer ellys he woll be reue Þe all

thy Realmys Þat Þou weldyst // Thow seyste well seyde

Arthure but for all thy brym wordys I woll nat be to

ouer hasty · And Þer fore Þou and thy felowys shall a byde here


f. 71v (V.1)


vij· dayes and shall calle vnto me my counceyle of my

moste trusty knyghtes and deukes and Regeaunte kynges

and erlys and barowns and of my moste wyse doctours

// And whan we haue takyn oure avysement ye shall

haue your answere playnly suche as I shall a byde by

// Than Þe noble kynge commaunded Sir Olegis to loke

that these men be seteled and serued with Þe beste Þat there be

no deyntes spared vppon them Þat noÞer chylde nor horse

fauȝt no thynge · For they are full Royall peple · And

thouȝe they haue greved me & my courte yet we muste

remembir on oure worshyp · So they were led In to

chambyrs & served as rychely of deyntes Þat myght be

gotyn // So Þe Romaynes had Þer of grete mervayle

// Than Þe kynge vnto counsayle called his noble

knyghtes · And with In a towre there they assembled Þe

moste party of Þe knyghtes of Þe rounde table Than Þe

kynge commaunded hem of theire beste counceyle //

// Sir seyde Sir Cador of Cornwayle as for me I

am nat hevy of this message for we haue be many

dayes rested Now Þe lettyrs of Lucius the Emperoure

lykis me welle · For now shall we haue warre & wor//

shyp · Be cryste I leve welle seyde Þe kyng sir Cador

this message lykis the but yet they may nat be so An//

swerde for Þer spytevous speche grevyth so my herte

that truage to roome woll I neuer pay There fore

counceyle me my knyghtes for crystes love of hevyn

// For this muche haue I founde In Þe Cronycles of

this londe Þat sir Belyne and sir Bryneof my bloode

elders that borne were In Bretayne And they hath

ocupyed Þe Empyreship ·viij· score wyntyrs // And aftir

Constantyne oure kynnesman conquerd hit and dame


f. 72 (V.1-2)


Elyne ys son of Ingelonde was Emperour of Roome

and he recouerde the crosse Þat cryste dyed vppon · // And

thus was Þe Empyre kepte be my kynde elders & thus

haue we evydence I nowȝe to Þe Empyre of hole Rome

// Than answerde kynge Angwysshaunc vnto Arthure

Sir Þou ouȝte to be a boven all othir crysten kynges for

of knyghthode and of noble counceyle Þat is all way

In the // And Scotlonde had neuer scathe syne ye were

crowned kynge // And whan Þe Romaynes raynede

vppon vs they raunsomed oure elders and raffte vs of

oure lyves // There fore I make myne avow vnto

mylde Mary and vnto Jhucryste that I shall be aven//

ged vppon the Romaynes And to farÞer thy fyght I shall

brynge Þe ferse men of armys fully ·xxt·Ml· of tyred

men I shall yeff hem my wages for to go and warre

on the Romaynes & to dystroy hem and all shall be with

In ·ij· ayges to go where Þe likes // Than Þe kyng of

lytyll Brytayne sayde vnto kynge Arthure Sir an//

swere these alyauntes and gyff them Þer answere and

I shall somen my peple and ·xxxt·Ml· men shall ye

haue at my costis and wages · ye sey well seyde Þe

kynge Arthure // Than spake a myghty deuke that

was lorde of weste walys Sir I make myne a vo//

we to god to be revenged on the Romaynes · And to

haue Þe vawarde and Þer to vynquyshe with victory Þe

vyscounte of Roome // For onys as I paste on pyl//

grymage all by the poynte Tremble than Þe vysco//

unte was In Tulkayne and toke vp my knyghtys

& raunsomed them vnresonable // And than I complay//

ned me to the Potestate Þe Pope hym self but I had

no thynge ellys but plesaunte wordys of reson at


f. 72v (V.2)


Roome might I none haue and so I yode my way sore

rebuked and Þer fore to be a venged I woll a rere of my

wyghteste walshemen and of myne owne fre wagis

brynge you ·xxxt·Ml· // Than sir Ewayne and his son

Ider that were nere cosyns vnto Þe conquerrour yet we//

re they cosyns bothe twayne and they helde Irelonde

& Argayle and all the oute Iles · Sir seyde they vnto

kynge Arthure here we make oure avowes vntoo

Cryste manly to ryde In to Lumbardy and so vnto Me//

layne wallys and so ouer the poynte Tremble In to Þe

vale of vyterbe and Þer to vytayle my knyghtes and for

to be a venged on the Romayns we shall bryng the

xxxt·Ml· of good mennys bodyes // Than leepe In yong

Sir Launcelot de Laake with a light herte & seyde vnto

kynge Arthure thouȝe my londis marche nyghe thyne

enemyes yet shall I make myne a vow aftir my po//

wer Þat of good men of armys aftir my bloode thus

many I shall brynge with me ·xx·Ml· helmys In haubir//

kes attyred Þat shall neuer fayle you whyles oure ly//

ves lastyth // than lowȝe sir Bawdwyn of Bre//

tayne and carpys to Þe kynge I make myne avow

vnto Þe vernade noble · for to brynge wth me ·x·Ml·

good mennys bodyes Þat shall neuer fayle whyle there

lyvis lastyth // Now I thanke you seyde the kynge

kynge with all my trew herte I suppose by Þe ende be

done & dalte Þe Romaynes had bene bettir to haue

leffte Þer proude message // So whan Þe ·vij· nyghte

was atte an ende the Senatours be sought Þe kynge

to haue an answere hit is well seyde Þe kynge // Now

sey ye to youre Emperour that I shall In all haste me

redy make with my keene knyghtes and by Þe Reuer of Rome


f. 73 (V.2)


holde my Rounde table and I woll brynge with me the

beste peple of ·xv· Realmys And with hem ryde on Þe

mountaynes In the mayne londis and myne doune

Þe wallys of Myllayne the proude and syth ryde vn//

to Roome with my Royallyst knyghtes // Now ye haue

your answere · hygh · you Þat ye were hense & frome

shall gyff you ·vij· dayes to passe vnto Sandwyche

NOw spede you I counceyle you & spare nat

youre horsis and loke ye go by watlynge

strete and no way ellys and where nyght fallys

on you loke ye there a byde be hit felle oÞer towne

I take no kepe for hit longyth nat to none Alyaun//

tis for to ryde on nyghtes and may ony be founde a

spere length oute of Þe way and Þat ye be In Þe water

by the ·vij· nyghtes ende there shall no golde vndir

god pay for youre Raunsom // Sir seyde this Se//

natoures this is an harde conduyte we be seche you  

that we may passe saufly · Care ye nat seyde the

kynge youre Conduyte is able // Thus they passed

fro Carleyle vnto Sandwyche warde that hadde

but ·vij· dayes for to passe thorow Þe londe and so

Sir Cador brought hem on her wayes · But the

Senatours spared for no horse but hyred hem ha//

keneyes frome towne to towne · And by Þe sonne was

sette at Þe·vij· dayes ende they com vnto Sandwy//

che so blythe were they neuer and so the same nyght

they toke Þe watir and passed In to Flaundres &

aftir Þat ouer Þe grete mountayne Þat hyght Godarde

and so aftir thorow Lumbardy and thorow Tuskayne

And sone aftir they come to the Emperour Lucius and  


f. 73v (V.2)


Þer they shewed hym Þe lettyrs of kynge Arthure And

how he was Þe gastfullyst man that euer they on loked

// Whan Þe Emperour Lucius hadde redde Þe lettyrs and

vndir stoode them welle of theire credence he fared as

a man were rased of his wytte I wente Þat Arthure wold

haue obeyed you & serued you vnto your honde · for so he be

semed oÞer ony kynge crystynde for to obey ony Senatour

Þat is sente fro my persone // Sir sayde Þe Senatours lette

be suche wordis for Þat we haue ascaped on lyve we may

thonke god euer · For we wolde nat passe a yen to do that

message for all your brode londis · And Þer fore Sirres

truste to oure sawys ye shall fynde hym your vttir ene//

mye and seke ye hym and ye lyste for In to this londis

wolle he com & Þat shall ye fynde with In this half yere

for he thynkys to be Emperour hym self · For he seyth

ye haue ocupyed Þe empyre with grete wronge for all

his trew auncettryes sauff his fadir Vther were Emper//

oures of Rome And of all Þe soueraynes that we sawe euer

he is the Royallyst kynge Þat lyvyth on erthe // For we

sawe on Newerys day at his rounde table ·ix· kyngis

and Þe fayryst felyship of knyghtes ar with hym that durys

on lyve And Þer to of wysedome and of fayre speche and

all Royalte and Rychesse they fayle of none // There

fore Sir be my counsayle rere vp your lege peple and

sende kynges and dewkes to loke vnto your marchis And Þat

the mountaynes of Almayne be myghtyly kepte // Be

Eftir seyde the Emperour I caste me for to passe Almayne

And so furth In to fraunce and Þer be reve hym his londis

I shall brynge with me many gyauntys of Geene that one

of them shall be worth an ·C· of knyghtes And perleous pas//

sage shall be surely kepte with my good knyghtes // Than Þe


f. 74 (V.2)


Emperour sente furth his messyngers of wyse olde knyȝtes

vnto a Contrey callyd Ambage and Arrage and vnto Aly//

sundir to ynde to Ermony that the Reuer of Enfrate

rennys by · And to Assy Anfryke and Europe the large

and to Ertayne and Elaunye to the oute yles to Arrabe

to Egypte to Damaske and to Damyake and to noble

deukis & erlys · Also Þe kynge of Capydos and Þe kyng

of Tars and of Turke and of Pounce and of Pampoy//

le and oute of Preter Johus londe · Also Þe sowdon of

Surre and frome Nero vnto Nazareth and frome Ga//

rese to Galely there come Sarysyns and be com sudgettis

vnto Rome So they come glydyng in Galyes Also ther

come Þe kynge of Cypres and Þe Grekis were gadirde

& goodly arrayed with Þe kynge of Macidony and of Calabe

and of Catelonde bothe kynges and deukes And the kynge

of Portyngale with many thousande Spaynardis // Thus

all thes kynges and dukys and Admyrallys noblys assem//

bled with xvi· kynges at onys And so they com vnto Rome with

grete multytude of peple // whan Þe Emperour vndirstood

Þer comynge he made redy all his noble Romaynes & all

men of warre be twyxte hym and Flaundrys // Also he

had gotyn with hym fyffty gyauntys that were engendirde

with feudis And all tho he lete ordeyne for to a wayte on his

persone and for to breke Þe batayle of Þe frunte of Arthurs

knyghtes // But they were so much of Þer bodyes Þat horsys

myght nat bere them · And thus Þe Emperour with all hys
horryble peple drew to passe Almayne to dystroy Arthur//

es londys that he wan thorow warre of his noble

knyghtes // And so Lucius com vnto Cullayne And Þer by a

Castelle be Segyd & wanne hit with In a whyle & feffed

hit with Saresyns · And thus Lucius with In a whyle destryed


f. 74v (V.2-3)


many fayre contrayes Þat Arthure had wonne be fore of Þe

myghty kynge Claudas so this Lucius lucu disperched a brode

his oste Syxty myle large and commaunde hem to mete

with hym In Normandy In the contray of Constantyne and

at Barflete there ye me a byde for the douchery of

Bretayne I shall thorowly dystroy hit ·

NOw leve we Sir Lucius And speke we of kyng Ar//

thure that commaunded all Þat were vndir his obey//

saunce aftier the vtas of Seynte Hyllary Þat all shulde be

assembled for to holde a parlement at yorke with In Þe wallys

and Þer they concluded shortly to a reste all Þe shyppes of this

londe And with In ·xv· dayes to be redy at Sandwych Now

sirrys seyde Arthure I purpose me to passe many perelles

wayes and to ocupye Þe Empyre Þat myne elders a fore

haue claymed Þer fore I pray you counseyle me Þat may

be beste and moste worshyp // The kynges & knyghtes ga//

dirde hem vnto counsayle & were condecended for to

make ·ij· chyfftaynes · that was Sir Baudwen of Bre//

tayne an Auncient & an honorable knyght for to councey//

le and comforte Sir Cadore son of Cornwayle Þat was

at Þat tyme called Sir Constantyne that aftir was kynge

aftir Arthurs dayes // And Þer In the presence of all Þe lordis

the kynge resceyved all Þe rule vnto thes ·ij· lordis and

quene Gwenyvere And Sir Trystrams at Þat tyme he left

with kynge Marke of Cornwayle for Þe lone of labeale

Isode where fore Sir Launcelot was passyng wrothe

// Than quene Gwenyuer made grete sorrow that the

kynge and all Þe lordys sholde so be departed And Þer she

fell doune on a swone and hir ladyes bare hir to her

chambir // Than Þe kynge commaunded hem to god & be

lefte Þe quene In Sir Constantynes and Sir Bandewens 


f. 75 (V.3-4)


hondis And all Inglonde holy to rule as them selfe

demed beste // And whan Þe kynge was an horsebak

he seyde In herynge of all Þe lordis If Þat I dye In this

Jurney here I make Þe Sir Constantyne My trew Ayre

for Þou arte nexte of my kyn save Sir Cadore thy fadir

And Þer fore if Þat I dey I woll Þat ye be crowned kynge

// Ryght so he sought & his knyghtes towarde Sande//

wyche · where he founde be fore hym many galyard

knyghtes · for Þer were Þe moste party of all Þe rounde ta//

ble redy on Þobankes for to sayle whan Þe kynge lyked

// Than In all haste Þat myght be they shypped Þer horsis

& harneyse & all maner of ordynaunce Þat fallyth for

Þe were & tentys and pavylyons many were trussed

and so they shotte frome Þe bankes many grete caryckes

and many shyppes of forestage with coggis and galeyes

& sperynesse full noble with galeyes & galyottys Rowyng

with many Ores · And thus they strekyn forth In to

the stremys many sadde hunderthes ·

Here Folowyth the dreme of kynge Arthure·

As the kynge was In his Cog and lay In his Ca//

ban he felle in a slumberyng & dremed how a

dredfull Dragon dud drenche muche of his peple

& com fleyng one wynge oute of Þe weste partyes and

his hede hym semed was enamyled with asure and his

shuldyrs shone as Þe golde & his wombe was lyke may//

les of a merveylous hew and his tayle was fulle of

tatyrs & his feete were floryssed as hit were fne

sable · And his clawys were lyke clene golde with an

hydeouse flame of fyre Þer flowe oute of his mowth lyke

as Þe londe & Þe watir had flawmed all on fyre // Than

hym semed Þer com oute of Þe oryent a grymly Beare


f. 75v (V.4)


all blak In a clowde And his pawys were as byg as a

poste he was all to Rongeled with lugerande lokys And he

was the fowlyst beste Þat euer ony man sye he Romed and

rored so rudely Þat mervayle hit were to telle // Than

Þe dredfull dragon dressyd hym a yenste hym & come

In Þe wynde lyke a Faucon & freyshely strykis Þe Beare

and agayne Þe gresly Beare kuttis with his grysly tuskes

Þat his breste and his brayne was bloode hit rayled

all ouer Þe see // Than Þe worme wyndis a way & fleis

vppon hyght and com downe with suche a sowȝe & towched 

the beare on Þe ridge Þat fro Þe toppe to Þe tayle was ·x·

foote large & so he rentyth the beare & brennys hym

vp clene Þat all felle ouer ponder bothe Þe fleysh and the

bonys And so hit slotered a brode on Þe see // Anone the

kynge waked of his dreme & In all haste he sente for

a Philoȝopher and charged hym to telle what sygny//

fyed his dreme // Sir seyde the Phyloȝopher Þe Dra//

gon Þou dremyste of be tokyns thyne owne persone that

thus here sayles with thy syker knyghtes · And Þe coloure

of his wyngys is thy kyngdomes Þat Þou haste with thy

knyghtes wonne · And his tayle Þat was all to tatered

sygnyfyed your noble knyghtes of Þe Rounde table · And

the Beare that Þe dragon slowe a bove In the clowdis

be tokyns som tyraunte Þat turmentis thy peple oÞer

Þou art lyke to fyght with som Gyaunte boldely In Batay//

le be thy self a lone // There fore of this dredfull

dreme drede Þe but a lytyll and care nat now sir con//

querroure but comforte thy self // Than with In a

whyle they had a syght of Þe bankys of Normandy

and at Þe same tyde Þe kynge aryved at Barfflete &

founde Þer redy many of his grete lordis and he had


f. 76 (V.4-5)


commaunded at Crystemasse be fore hym self & cl

Than come Þer come an husbande man oute of the

contrey and talkyth vnto Þe kyng wondurfull

wordys · And sayde sir here is a foule Gyaunte of

Gene that turmentyth thy peple mo than ·v·C· &

many mo of oure chyldren Þat hath bene his sustynaun//

ce all this ·vij· winters yet is Þe sotte neuer cesid but

In Þe contrey of Constantyne he hath kylled all oure

knave chyldren and this nyght he hath cleyȝte the

duches of Bretayne as she rode by a ryver with her

ryche knyghtes & ledde hir vnto yondir mounte to ly

by hir whyle hir lyff lastyth // Many folkys folowed

hym mo than ·v· hundird Barounes and bachelers

and knyghtes full noble but euer she shyreked wondirly

lowde Þat Þe sorrow of Þat lady cover shall we neuer // She

was thy cousyns wyff Sir Howell the hende a man

Þat we calle nyȝe of thy bloode // Now as Þou arte oure

Ryghtwos kynge rewe on this lady and on thy lyege

peple & revenge vs as a noble conquerroure sholde

Alas seyde kynge Arthure this is a grete myscheffe

I had levir than all the Realmys I welde vnto my

crowne Þat I had bene be fore that freyke a furlonge

way for to haue rescowed that lady · And I wolde

haue done my payne // Now felow seyde Arthure

woldist Þou ken me where Þat carle dwellys I trowe I

shall trete with hym or I far passe // Sir conquerrour

seyde the good man be holde yondir ·ij· fyrys for Þer

shalte Þou fynde Þat carle be yonde Þe colde strendus

and tresoure oute of numbir Þer mayste Þou sykerly fyn//

de more tresoure as I suppose than is In all Fraunce

aftir // The kynge seyde good man pees & carpe


f. 76v (V.5)


to me no more thy soth sawys haue greved sory

my herte // Than he turnys towarde his tentys

& carpys but lytyl ·// Than Þe kynge seyde vnto

Sir Kay In counceyle & to Sir Bedwere Þe bolde

thus seyde he loke Þat ye ·ij· aftir evynsonge be sure//

ly armed & your beste horsis · for I woll ryde on

pylgrymage prevayly and none but we ·iij· And

whan my lordis is servyd we woll ryde to seynte

Mychaels mounte where mervayles ar shewed // A

none Sir Arthure wente to his wardrop & caste

on his armoure bothe his Gesseraunte and his Bas//

net with his brode shylde · And so he bulkys hym tyll his

stede Þat on Þe bente hoved · Than he stertes vppon loffte &

hentys Þe brydyll and stirres hym stoutly & sone he

fyndis his knyghtes ·ij· full clenly arrayed · And than they

trotted on stylly to gedir ouer a blythe contray full of ma//

ny myrry byrdis · And whan they com to Þe forlonde

Arthrue and they a lyght on hir foote // Now fastenys

seyde Arthure oure horsis Þat none nyȝe oÞer · for I woll

seche this seynte be my self a lone and speke wyth this

maystir man Þat kepys this mountayne // Than the

kynge yode up to Þe creste of Þe Cragge · And than he

comforted hym self with Þe colde wynde And than he yode

forth by ·ij· welle stremys · And Þer he fyndys ·ij fyres

flamand full hyȝe · And at Þat one fyre he founde a care//

full widow wryngande hir handys syttande on a gra//

ve Þat was new marked // Than Arthure salued hir &

she hym a gayne and asked hir why she sate sorowyng

// Alas she seyde carefull knyght Þou carpys ouer lowde

yon is a werlow woll destroy vs bothe I holde Þe vnhappy

what doste Þou on this mountayne // Thouȝe here were





   Suche fyffty


f. 77 (V.5)


suche fyffty ye were to feyble for to mache hym all at

onys · Where to berys Þou armoure hit may Þe lytyll avayle

for he nedys none oÞer wepyn but his bare fyste // here is

a douches dede Þe fayryst Þat lyved he hath murthered that

mylde with oute ony mercy he forced hir by fylth of hym

self and so aftir slytte hir vnto Þe navyll // Dame seyde

Þe kynge I com fro Þe conquerrour sir Arthure for to trete

with Þat tirraunte for his lyege peple // Fy on suche tretyse

she seyde Þan for he settys nought by Þe kynge noÞer by no

man ellys // But & Þou haue brought Arthurs wyff dame

Gwenyvere he woll be more blyther of hir than Þou

haddyste geffyn hym halfondele fraunce and but yf Þou

haue brought hir prese hym nat to nyȝe loke what he

hath done vnto ·xv· kynges he hath made hym a coote full

of precious stonys and Þe bordoures Þer of is the berdis ·xv·

kynges and they were of Þe Þe grettyst blood Þat dured on erÞe

othir farme had he none of xv realyms · This presente was

sente hym to this laste Crystemasse they sente hym In fay//

the for savyng of Þer peple · And for Arthurs wyff he lodgys

hym here for he hath more tresoure than euer had Arthure

or ony of his elders // And now Þou shalt fynde hym at souper

with ·vi· knave chyldirne · And Þer he hath made pykyll & powder

with many precious wynes and ·iij· fayre maydens Þat turnys the

broche · That bydis to go to his bed for they ·iij· shall be dede

with In ·iiij· oures or Þe fylth is fulfylled Þat his fleyshe askys

// Well seyde Arthure I woll fulfylle my message for alle

your grym wordis // Than fare Þou to yondir fyre Þat flamys

so hyȝe and Þer Þou shalt fynde hym sykerly for sothe // Than he

paste forth to Þe creste of Þe hylle & syȝe where he sate at

his soupere a lone gnawing on a lymme of a large man &

there he beekys his brode lendys by Þe bryght fyre and


f. 77v (V.5)


brekelys hym somys and ·iij· damsels turned ·iij· brochis

And Þer on was ·xij· chyldir but late borne and they were

broched in maner lyke birdis // Whan the kyng be hylde

Þat syght his herte was nyȝe bledyng for sorow // Than 

he haylesed hym with angirfull wordys · Now he that all

weldys geff Þe sorow theef Þer Þou syttes for Þou art Þe fowlyste

freyke Þer euer was fourmed & fendly Þou fedyst the · Þe devill

haue thy foule // And by what cause Þou carle hast Þou kylled

Þes crysten chyldern Þou haste made many martyrs by mour//

theryng of this londis // There fore Þou shalt haue thy mede

thorow Mychael · that owyth this mounte · And also why

haste Þou slayne this fayre douches // There fore dresse

Þe doggysson for Þou shalt dye this day thorow Þe dynte of my

hondis // Than Þe gloton gloored and gravid full foule

he had teeth lyke a grayhounde he was Þe foulyst wyȝte

Þat euer man sye and Þer was neuer suche one fourmed on erÞe

for Þer was neuer devil · In helle more horryblyer made for

he was fro Þe hede to the foote ·v· fadom longe and large

And Þer with sturdily he sterte vppon his leggis & cauȝte a

clubbe In his honde all of clene Iron · Than he swappis

at Þe kynge with Þat kyd wepyn he cruysshed downe with the

club · the Coronal · doune to Þe colde erÞe · the kynge couerde

hym with his shylde & rechis a bove evyn In fourmede In

the myddis of his forehead Þat Þe slypped blade vnto the

brayne rechis // yet he shappis at sir Arthure but Þe

kynge shuntys a lytyll and rechis hym a dynte hyȝ

vppon Þe haunche And Þer he swappis his Genytrottys In

sondir // Than he rored & brayed and yet angurly he stry//

kes and fayled of sir Arthure and Þe erÞe hittis Þat he kutte

In to the swarffe a large swerde length and more // Þan

the kynge sterte vp vnto hym & raught hym a buffette 


f. 78 (V.5)


and kut his baly In sundir Þat oute wente Þe gore Þat Þe grasse

and Þe grounde all foule was be gone // Than he kaste

a way Þe clubbe and cauȝte Þe kynge In his armys & hande//

led Þe kynge so harde Þat he crushed his rybbes // Than Þe

balefull maydyns wronge hir hondis and kneled on Þe

grounde & to cryste called with Þat Þe warlow wrath Arthure

vndir and so they waltyrde & tumbylde ouer Þe craggis and

busshys and eythir cleyght oÞer full faste In Þer armys and

er whyles Arthure was a boven and oÞer whyle vndir &

so they neuer leffte tyll they fylle Þer as Þe floode marked · But

euer In Þe walterynge Arthure hittis hym with a shorte dagger

vp to Þe hyltys · and In his fallynge Þer braste of Þe gyauntes

Rybbys ·iij· evyn at onys And by fortune they felle there

as Þe ·ij knyghtes a boode with theire horsis // Whan Sir Kay

saw Þe kynge and the gyaunte so I cleyght to gyder / Alas

sayd sir kay we ar forfete for euer yondir is our lorde ouer

fallen with a fende hit is nat so seyde Þe kynge but helpe me

sir Kay for this corseynte haue I clegged oute of Þe yon//

dir clowys // In fayth seyde Sir Bedwere this is a

foule carle and cauȝte Þe corseynte oute of Þe kynges armys 

And there he seyde I haue mykyll wondir and Mychael

Be of suche a makyng that euer god wolde suffir hym to

A byde In hevyn · And if seyntis be suche that servys

Jhu I woll neuer seke for none be Þe feyth of my body

The kynge than lough at Bedwers wordis & seyde

this seynte haue I fought nyȝe vnto my grete daun//

gere · But stryke of his hede and sette hit on a troun//

cheonne of a speare and geff hit to thy seruaunte that is

swyffte horsed and bere hit vnto sir Howell Þat is In

harde bondis and bydde hym be mery for his enemy

is destroyed · And aftir in Barflete lette brace hit on a 


f. 78v (V.5)


Barbycan that all Þe comyns of this contrey may hit

be holde // And than ye ·ij· go vp and fecche me my

shelde my swerde and Þe boystouse clubbe of Iron · And

yf ye lyste ony tresoure take what ye lyst for Þer may

ye fynde tresoure oute of numbir · So I haue the Curtyll

I kepe no more · for this was a freysh Gyaunte and

mykyll of strength · For I mette nat with suche one this

xv· wyntir Sauff onys In Þe mounte of Arrabe I mette

with suche an oÞer · but this was fersar that had I nere

founden had nat my fortune be good // Than Þe knyȝtes

fecched the Clubbe and Þe coote And all Þe remenaunte

and toke with hem what tresoure that hem lyked · Than

Þe kynge & they sterte vppon Þer horsys · And so they rode fro

thens Þer as they came fro ·/ And a none Þe clamoure was

howge a boute all Þe contrey · And than they wente with

one voyse to fore Þe kynge and thanked god & hym Þat

Þer enemy was destroyed // All thanke ye god seyde Ar//

thure and no man ellys looke Þat the gooddys be skyffted

that none playne of his parte // Than he commaunded his

cosyn sir howell to make a kyrke on Þat same cragge In

Þe worshyppe of seynte Mychael · On Þe morne frome

Barflete remevyth Þe kynge with all his grete batayle

proudly arrayed // And so they shooke ouer Þer stremys In to

a fayre champayne And Þer by doune In a valey they

pyght vp hir tentys · And evyn at Þe mete whylecome

ij· messyngers · that one was Þe Marchall of Fraunce Þat

seyde to Þe kynge how Þe Emperour was com In to Fraunce

and hath destroyed much of oure marchis and is com

In to Burgayue and many borowys hath destroyed and

hath made grete slaughtir of your noble people & where

that he rydyth all he destroyed And now he is comyn


f. 79 (V.5-6)


In to dowse Fraunce And Þer he brennys all clene // Now all

the Dowse le perys both denkys and oÞer · And Þe peerys of

Parys towne ar fledde downe In to Þe lowe contrey towarde

Roome And but yf Þou helpe them Þe sunner they muste yelde hem

all at onys bothe Þe bodyes and townys they can none othir

succour but nedys they muste yelde them in haste

Than Þe kynge byddis Sir Borce now bowlke the

blythe · And Sir Lyonel and Sir Bedwere loke Þat

ye fare with Sir Gawayne my nevew with you and take as many

good knyghtes and loke Þat ye ryde streyte vnto Sir Lucuis and

sey I bydde hym In haste to remeve oute of my londys · And

yf he woll nat so bydde hym dresse his batayle and lette vs

redresse oure ryghtes with oure handis · And Þat is more wor//

shyppe than thus to ouer ryde maysterlesse men // Than a

none In all haste they dressed hem to horse bak thes noble

knyghtes // And whan they com to Þe grene wood they sawe

be fore hem many prowde pavylyons of sylke of diverse

coloures Þat were sette In a medow be syde a Ryver And the

Emperoures pavylyon was In Þe myddys with an Egle display//

ed on loffte // Than thorow the wood oure knyghtes roode

tylle Þat they com vnto the Emperoures tente // But be

hynde them they leffte stuff of men of armys In a boyshe//

mente And Þer he leffte In Þe boyshemente Sir Lyonel · And

Sir Bedwere Sir Gawayne and sir Borce wente with the

message // So they rode worthyly In to Þe Emperoures tente

and spoke bothe at onys with hawte wordys // Now geff Þe

sorow Sir Emperour & all thy sowdyars Þe a boute // For why

ocupyest Þou with wronge the Empyreship of Roome that

is kynge Arthures heritage be kynde of his noble Elders

there lakked none but Uther his fadir · There fore Þe kyng

commaundyth Þe to ryde oute of his londys oÞer ellys to fyght


f. 79v (V.6)


for all and knyghtly hit wynne // ye sey well seyde Þe Emperour

as youre lorde hath you commaunded // But telle your lorde

I sende hym gretynge · but I haue no Joy of your Reuckys

thus to rebuke me & my lordys // But sey youre lorde

I woll ryde downe by Sayne and wynne all Þat Þer to longes

and aftir ryde vnto Roome and wynne hit vp clene · hit

be semys Þe ylle seyde Sir Gawayne that ony such an

Elffe sholde bragge suche wordys · For I had levir than

all Fraunce to fyght a yenste Þeer I seyde Sir Borce

than to welde all bretayne oÞer Burgayne the noble

// Than a knyght Þat hyght Sir Gayns Þat was cosyn

vnto Þe Emperour he seyde thes wordys · These englyshe

Bretouns be braggars of kynde · for ye may see how

They boste and bragge as they durste bete all Þe worlde

// Than grevid Sir Gawayne at his grete wordys

and with his bowerly bronde Þat bryght semed he stroke    

of Þe hede of Sir Gayns the knyght and so they turned       

Þer horsis and rode ouer watyrs and woodys In to they

com ny Þe busshemente Þer Sir Lyonell and Sir Bedwere

were hovyng stylle // Than Þe Romaynes folowed faste

on horsebak and on foote ouer a fayre champeyne vnto

a fayre wood // Than turnys hym Sir Borce wyth

a freyshe wylle and sawe a gay knyght all floryshed In

golde Þat bare downe of Arhtures knyghtes woundirfull ma//

ny // Than Sir Borce aspyed hym he kaste In feautir

a spere and gyrdis hym thorow oute Þe body that his

guttys fylle oute and Þe knyght to Þe grounde Þat gresly

gronyd // Than preced In a bolde barowne all In purp//

pull arrayed he threste In to Þe prece of kyng Arthures

knyghtes and fruysshed downe many good knyghtes And he

was called Calleborne the strengyste of pavynes londis


f. 80 (V.6)


And Sir Borce turned hym to & bare hym thorow the

brode shylde and Þe brode of his breste Þat he felle to Þe erÞe

as dede as a stone // Than Sir Feldenake the myghty Þat

was a praysed man of armys he gurde to Sir Gawayne

for greff of sir Ganys and his oÞer felowys And sir Gawayne

was ware and drew Galantyne his swerde and hyt hym

such a buffette Þat he cleved hym to Þe breste · And than he cauȝ//   

te his courser & wente to his ferys // than a rych man                          

of Rome one of Þe Senatours called to his felowys & bade

hem returne for yondir ar shrewed messengers & bolde

boosters · If we folow them ony farther Þe harme shall be

owrys · And so Þe Romaynes returned lyghtly to theire

tentys and tolde Þe Emperour how they had spedde ·/ And how

Þe marchall of Rome was slayne and mo than ·v·Ml· In Þe

felde dede · But yet one they wente and departe oure bushe//

mente brake on bothe sydys of Þe Romaynes · And Þer the

bolde Bedwer and sir Lyonel · bare downe Þe Romaynes on

euery syde // There oure noble knyghtes of mery Ingelonde

bere hem thorow Þe helmys & bryght sheldis & slew hem

downe · And Þer Þe hole roughte returned vnto Þe Emperour &

tolde hym at one worde his men were destroyed ·x· Ml· by

batayle of tyred knyghtes · for they ar Þe brymmyst men Þat evir

we saw In felde // But all wayes Sir Borce And Sir

Gawayne freyshly folowed on the Romaynes evyn vnto Þe

Emperoures tentes // Than oute ran Þe Romaynes on euery

syde bothe on horse & on foote to many oute of numbir · But

freyshly fauȝt as euer dud ony knyghtes · But Sir Gawayne

was on Þe right honde & dud what he myght · But there

were so many hym a gaynste he myght nat helpe Þer his fe//

rys · but was fayne to turne on his horse othir his lyffe


f. 80v (V.6)


muste he lese // Sir Borce and Sir Berell Þe good baroun//

nes fouȝt as ·ij· boorys Þat myght no farÞer passe // But at Þe

laste thouȝe they loth were they were yolden & takyn and

saved Þer lyves yet Þe stale stoode a lytyll on fere with Sir Gaway//

ne Þat made sorow oute of mesure for thes ·ij· lordys · But

than cam In a freysh kngyht clenly arrayed Sir Idres Sir

Uwaynes son a noble man of armys he brought ·v·C· good

men In haubirkes attyred · And whan he wyste Sir Borce

and sir Berel were cesed of werre Alas he sayde this is to

muche shame & ouer muche losse // For with kynge Arthure and

he know Þat thes ·ij· knyghtes bene thus loste he woll neuer mery

be tyll this be revenged · A fayre knyght sayde sir Gawayne

Þou muste nedis be a good man for so is thy fadir I knowe

full well thy modir In Ingelonde was Þou borne Alas thes

Romaynes this day haue chaced us as wylde harys & they

haue oure noble chyfften takyn In the felde Þer was neuer

a bettir knyght Þat strode vppon a steede // Loo where they lede

oure lordys ouer yondir brode launde · I make myne a vowe

seyde Sir Gawayne I shall neuer se my lorde Arthure but yf

I reskew hem Þat so lyghtly ar ledde vs fro // That is knyȝtly

spokyn seyde Sir Idres & pulde vp her brydyls & halowed

ouer Þat champayne · there was russhynge of sperys & swapp//

yng of swerdis · And sir Gawayne with galantyne his swerde

dud many wondyrs // Than he threste thorow Þe prece vnto

hym Þat lad sir Bors and bare hym thorow vp to Þe hyltys &

lad a way sir Bors strayte vnto his ferys // Than sir Idrus

Þe yonge sir Uwaynes son he threste vnto a knyght Þat had sir

Berell Þat Þe brayne and Þe blode clevid on his swerde // Þer

hym a grete buffet That sawe sir Idres and aftir rydyth

& had slayne Þe Senatour but Þat he yelded hym In haste yet


f. 81 (V.6)


he was loth to be yoldyn but Þat he nedys muste // And with Þat sir

Idrus ledde hym oute of Þe prees vnto sir lyonel · And vnto

Syr lovel Idrus brothir and commaunded hem to kepe hym

on payne of theire hedis · Than Þer be gan a passyng harde

stoure · for Þe Romaynes euer wexed euer bigger // Whan Sir

Gawayne Þat aspyed he sente forth a knyght vnto kyng Arthu//

re And telle hym what sorow we endure & how we haue

takyn Þe chefe chaunceler of Rome · And Petur is presoner

a Senatoure full noble & odir proude pryncis we knowe

nat theire namys And pray hym as he is oure lorde to res//

cowe us be tyme for oure presoners may pay rychesse oute of

numbir And telle hym Þat I am wounded wondirly sore // Whan

Þe messyngers com to Þe kyng & tolde hym thes wordys the

kynge thanked cryste clappyng his hondys · And for thy trew

sawys & I may lyve many wyntyrs Þer was neuer no knyght better

Rewardid · but Þer is no golde vndir god Þat shall save Þer lyvys

I make myne a vow to god · And sir Gawayne be In ony perel

of deth for I had levir Þat Þe Emperour  & all his chyff lordis were

sunkyn In to helle than ony lorde of Þe rounde table were lyt//

tyrly wounded // So forth Þe presoners were brought be fore

Arthure And he commaunded hem In to kepyng of Þe Conestablys

warde surely to be kepte as noble presoners // So with In a why//

le com In Þe fore Ryders · that is for to say Sir Bors Sir

Bedwere Sir Lyonell And sir Gawayne that was sore woun//

ded with all hir noble felyshyp they loste no man of worshyppe

// So anone Þe kyng lete rensake Sir Gawayne anone In

his syght And sayde fayre Cosyn me knys of thyne hurtys

And yf I wyste hit myght glad thy hert othir fare Þe bettir with

hit I sholde presente Þe with hir hedys thorow whom Þou art thus

rebuked · That were lytyll a vayle sayde sir Gawayne for

theire hedys had they lorne & I had wolde my self & hit were


f. 81v (V.6-7)


shame to sle knyghtes whan they be yolden // Than was Þer Joy

& game amonge Þe knyghtes of rounde table And spoke of Þe grete

provesse Þat Þe messyngers ded Þat day thorow dedys of Armys // So

on Þe morne whan hit was day Þe kyng callyd vnto hym sir

Eador of Cornwayle And sir Clarrus of Clereounte A clene

man of Armys · And sir Cloudres Sir Clegis ·ij· olde noble

knyghtes And sir Bors Sir Berell noble good men of armys

And also Sir Bryan de les ylyes and sir Bedwere Þe bolde

And also he called sir Launcelot In heryng of all peple and

seyde I pray Þe Sir as Þou lovys me take hede to thes oÞer knyȝtes

& boldely lede thes presoners vnto Paryse towne Þer for to be

kepte surely as they me love woll haue · And yf ony Rescowe

be falle moste I assye the In me as Jhu me helpe // Than

sir Launcelot and sir Cador with thes oÞer knyghtes attyred oute

of Þer felyshyp ·x· Ml· be tale of bolde men arayed of Þe beste of

Þer company · And than they vnfolde Baners & let hem be displayed

NOw turne we to Þe Emperour of Rome Þat wyste by aspye

whethir this presoners sholde wende · he callyd vnto

hym sir Edolf And sir Edwarde ·ij· myghty kynges · And Sir

Sextore of lybye And Senatours many · And Þe kyng of Sur//

re And Þe Senatoure of Rome Sawtre all thes turned

towarde Troyes with many preved knyghtes to be trappe Þe kynges

fondis men Þat were charged with Þe presoners // Thus ar oure

knyghtes passed towarde paryse a busshemente lay be fore them

of Sixty Ml· menof Armys // Now lordis seyde sir Launcelot

I pray you herkyns me a whyle I drede Þat In this woodys

be leyde a fore vs many of oure enemyes · There fore

be myne advyse sende we ·iij· good knyghtes I assente me

seyde Sir Cador And all they seyde Þe same & were aggre//

ed Þat Sir Claryon and sir Clement Þe noble Þat they sholde

dyscouer Þe woodys bothe Þe dalys & Þe downys · So forth rode


f. 82 (V.7)


thes ·iij· knyghtes & aspyed In the woodis men of armys ry//

dyng on sterne horsys // Than Sir Clegys cryed on low//

de is Þer ony knyght kyng oÞer cayser Þat dare for his lordis love

Þat he servyth recountir with a knyght of Þe rounde table be he

kyng oÞer knyght here is his recounter redy // An Erle hym

answeryd angirly agayne and seyde thy lorde wenys with

his knyghtes to wynne all Þe worlde I trow your currage shal

be aswaged In shorte tyme // Fye on Þe cowarde seyde Sir

Clegis as a cowarde Þou spekyste for by Jhu myne armys

ar knowyn thorow oute all Inglonde and Bretayne And

I am com of olde Barounes fo Auncetry noble and Sir

Clegis is my name a knyght of Þe table rounde · And frome

Troy Brute brought myne elders // Thou be semeste

well seyde Þe kyng to be one of Þe good be thy bryght browys

but for all Þat Þou caust comeoure oÞer sey Þer shall none Þat is here

medyll with Þe this tyme // Than sir Clegis Returned And vnto

sir Cadore And tolde hem what he had seyde seyne In the

woodis of Þe fayryste fyght of men of armys to Þe numbir of

Sixty Ml· And Þer fore lordynges fyght you be hovys oÞer ellys

shunte for shame chose wheÞer ye lykys // Nay be my faith

sayde sir Launcelot to turne is no tyme for here is all olde

knyghtes of olde grete worshyp Þat were neuer shamed · And as

for me & my cousyns of my bloode we ar but late made

knyghtes yett wolde we be loth to lese Þe worshyp Þat oure

eldyrs haue deserued · ye sey well seyde sir Cador And all

thes knyghtes of youre knyghtly wordis comfortis vs all

and I suppose here is none woll be glad to returne · And as

for me seyde sir Cador I had leuer dye this day than onys to

turne my bak // ye sey well seyde sir Borce lette vs set on

hem freyshly and Þe worshyp shall be oures And cause oure


f. 82v (V.7)


kyng to honoure vs for euer and to gyff vs lordshyppis

& landys for oure noble dedys And he Þat faynes hym to

fyght Þe devyl haue his bonys & who save ony knyghtes

for lycoure of goodys tylle all be done & know who shal

haue Þe bettir he doth nat knyghtly so Jhu me helpe // Þan

anone Sir Launcelot and Sir Cador tho ·ij· myghty Dukis

dubbed knyghtys worshyp to wynne Joneke was Þe fyrste

a Juster full noble Sir Hectuner and Sir Alyduke bothe

of Inglonde borne And sir Hanerel and sir Hardolf full har//

dy men of Armys · Also Sir Harry and Sir Harygall Þat

good men where bothe // Now felowys seyde Sir Launcelot

and sir Cador the kene Comhydir sir Bedwere and sir Berel ·

take with you sir Raynolde and sir Edwarde that ar sir Ronlon//

dis chyldir & loke Þat ye take kepe to thes noble presoners what

chaunce so vs be tyde save them & your self this commaundement

we geff you as ye woll answere to oure souerayne lorde

And for ony stowre Þat euer ye se vs be stadde stondys In your

stale & sterte ye no ferÞer · And yf hit be falle Þat ye se oure charge

si to muche than recouer your self vnto som kydde catell & than

ryde you faste vnto oure kynge and pray hym of soccour as he

is oure kynde lorde // And than they fruyshed forth all at

onys of Þe bourelyest knyghtes Þat euer brake brede with mo than

v ·C· at Þe formyst frunte & caste Þer speares In feawter all at

onys and save trumpettes Þer was no noyse ellys // Than the

Romaynes ofte Remeved alytyll and Þe lorde Þat was kynge

of Lybye that lad all Þwe formyste route hekeste his psere In fe//

autyr & bare his course evyn to sir Berel and strake hym

thorow Þe gorge that he and his horse felle to Þe grounde &    

so he was brought oute of his lyff // Alas sayde sir Cadore         

now carefull is myne herte Þat now lyeth ded my Cosyn Þat

I beste loved he alyght off his horse and toke hym in hys


f. 83 (V.7)


armys · And Þer commaunded knyghtes to kepe well Þe corse // Than

Þe kynge craked grete wordys on lowde & seyde one of you prow//

de knyghtes is leyde full lowe // yondir kyng seyde sir Cador

carpis grete wordis · But & I may lyve or this dayes ende I

shall countir with yondir kynge so Cryste me helpe // Sir seyde sir

Launcelot meve you nat to fore but take your speare In your honde

& we shall you nat fayle // Than sir Cador Sir Launcelot and

sir Bors the good men of armys thes ·iij· feawtyrd Þer sperys

and threste In to Þe myddys & ran thorow oute Þe grete oste twy//

se oÞer ·iij· tymes · And whan Þer sperys were brokyn they swange

oute Þer swerdis & slowe of noble men of armys mo than an ·C·

And than they rode a yen to theire ferys // Than a lowde the

kynge of lybye cryed vnto sir Cador well haue ye revenged

Þe deth of your knyght For I haue loste for one knyght an ·C· by

vij· score · And there with Þe batayle be gan to Joyne & grete

slaughter Þer was on Þe sarysens party but thorow Þe noble provesse

of kyng Arthures knyghtes ·x· were takyn & lad forth as preso//

ners Þat greved sore sir Launcelot Sir Cador and Sir Bors

Þe brym The kynge of Lybye be helde Þer dedis and sterte on

a sterne horse and vmbely closed oure knyghtes & drove

downe to Þe grounde many a good man · For Þer was Sir Aladu//

ke slayne And also sir Ascamour sore wounded And Sir herawde

and sir heryngale hewyn to pecis And Sir Lovell was takyn                                 

And Sir Lyonell als · And nere had sir Clegis Sir Cleremon//                              

de had nat bene with Þe knyghthode of Sir Launcelot tho newe                           

made knyghtes had be slayne euerychone // Than sir Cador ro//                        

de vnto Þe kyng of Lybye with a swerde well stelyd & smote hym                       

an hyȝe vppon Þe hede Þat Þe brayne folowed // Now haste thow

seyde sir Cador come boote a gaynewarde and Þe devyll haue                             

thy bonys Þat euer Þou were borne // Than Þe Sowdan of Surre                          

was wood wrothe · for Þe deth of Þat kynge grevid hym at his


f. 83v (V.7)


herte and recomforted his peple and sette sore on oure

knyghtes // Than sir Launcelot and Sir Bors encountyrs

with hym sone And with In a whyle as tellyth Þe Romaynes

they had slayne of Þe Sarazens mo than ·v·Ml· And sir Kay

Þe kene had takyn a Captayne And Edwarde had takyn ·ij//

Erlys and Þe Sawdon of Surre yeldid hym vp vnto Sir

Launcelot And Þe Senatur of Sautre yeldid hym vnto sir

Cador // Whan Þe Romaynes & Þe Sarezens aspyed how Þe

game yode they fledde with all hir myght to hyde there hedis

// Than oure knyghtes folowed with a freysshe fare And flew

downe of Þe Sarezens · And folowed with a freysshe fare // And

Sir Launcelot ded so grete dedys of armys Þat day Þat sir Cador

And all Þe Romaynes had mervayle of his myght for Þer was

noÞer kynge Cayser noÞer knyght Þat day myght stonde hym

ony buffette Þer fore was he honoured dayes of his lyff For

neuer ere or Þat day was he proved so well For he and Sir

Bors and sir Lyonel · was but late a fore at an hyȝe feste

made all ·iij· knyghtes // And thus were Þe Romaynes &

Þe Sarezens slayne a downe clene save a fewe were reco//

vwde Þer by In to a lytyll castell · And than Þe noble Reuckys

of Þe Rounde table there as Þe felde was toke vp hir good

bodyes of Þe noble knyghtes & garte sende them vnto kyng

Arthure In to the erthe to be caste So they all rode vnto

Paryse and be leffte Þe presoners Þer with the Pure proveste &

than they were delyuerde In to sure sauff garde · Than

euery knyght toke a spere & dranke of Þe colde wyne and

than fersely In a brayde returned vnto Þe kynge // Whan

Þe kynge his knyghtes sawe he was than meruelously reioy//

ced & cleyght knyght be knyght In his armys & sayde all

Þe worshyp In Þe worlde ye welde be my fayth // There

was neuer kyng sauff my selff Þat welded evir such knyȝtes  


f. 84 (V.7-8)


Sir seyde Sir Cador there was none of vs Þat fayled othir

But of Þe knyghthode of Sir Launcelot hit were meruayle

to telle & of his bolde Cosyns ar rpoved full noble knyȝtes

But of wyse wytte & of grete strengthe of his ayge sir

Launcelot hath no felowe // Whan Þe kyng herde sir Cador

sey such wordys he seyde hym be semys for to do such dedis

// And sir Cadore tolde Arthure whyche of Þe good knyghtis

were slayne · The kynge of Lybye And he slew the fyrste

knyght on oure syde Þat was Sir Berell And sir Aladuke

was an oÞer a noble man of armys And sir Maurel · And sir

Mores that were ·ij· brethyrn with sir Manaduke and Sir

Mandyff ·ij good knyghtes // Than Þe kynge with a keverchoff

wyped his Iyen & sayde your corrage & your hardynesse nere

hande had you destroyed · for & ye had turned agayne ye

had loste no worshyp · For I calle hit but foly to a byde whan

knyghtes bene ouer macched · Not so sayde sir Launcelot

the shame sholde euer haue bene oures · That is trouthe

seyde sir Clegis and Sir Bors for knyghtes ons shamed

Recouerys hit neuer // Now leve Sir Arthure and his no//

ble knyghtes and speke we of a Senatoure Þat ascaped fro

Þe batayle whan he com to Lucius the Emperour of Rome

he seyde Sir with draw Þe what doste Þou here In this mar//

chis and to ouer ren poore peple Þou shalt wynne no thyng

ellys · & if Þou dele with kynge Arthure and his doughty knyȝtes

Þou wynnys naught ellys but grete strokys oute of me//

sure · For this day one of Arthurs knyghtes was worth

In batayle an ·C· of oures // Fye on Þe seyde Lucyus for

cowardly Þou spekyste yf my harmys me greve thy wor//

dys greveth me much more // Than he called to hym

his counceyle men of noble bloode // So by all theire

advyse he sent forth a knyght Þat hyght Sir Leomye he  


f. 84v (V.8)


dressed his peple & hyȝe hym he bade & take hym of the

beste men of armys many sad hundrethis & go be fore

and we woll folow aftir // But Þe kynge of Þer commynge

was prevely warned & than In to Sessoyne he dressid his

peple & forstalled Þe Romaynes from Þe kyd castels & Þe

walled townes · And Þer sir vyllers the valyaunte made

his avow evyn by fore Þe kynge to take oÞer to sle the

vycounte of Rome or ellys to dye there fore ·/

Than Þe kyng commaunded Sir Cadore to take he//

de to Þe rerewarde and take reukys of Þe rounde

table Þat the beste lykes sauff Sir Launcelot & Sir Bors

with many mo othir Sir Kay Sir Clegis shall be Þer als and

sir Marroke Sir Marhaulte shall be with me In fere & all

thes with mo oÞer shall a wayte vppon my persone // Thus

kynge Arthure disparcled all his oste in dyverse partyes that

they sholde nat ascape but to fyght them be hovys · whan

Þe emperour was entyrd In to Þe vale of Sessoyne he myȝt

se where kyng Arthure hoved In batayle with baners

displayed on every syde was he be sette Þat he myght nat

ascape but oÞer to fyght oÞer to yelde hym Þer was none oÞer

boote // Now I se well seyde sir Lucyus yondir traytoure

hath be trayed me · Than he redressis his kynghtes on

dyverse partyes & sette vp a dragon with Eglys many one ene//

wed with Sabyl · // And than he lete blow vp with trumpettes

& with tabours Þat all Þe vale dyndled And than he lete crye

on lowde with trumpettes and with tabours Þat all Þe vale dyn//

ned And than he lete cry on lowde Þat all men myȝt here

// Syrs ye know well Þat Þe honoure & worshyp hath

euer folowyd Þe Romaynes · And this day let hit nevir be

loste for Þe defauȝte of herte for I se well by yondyr

ordynaunce this day shall dye much peple & Þer fore




                                         Do douȝtyly                                   


f. 85 (V.8)


do doughtly this day & Þe felde is ourys · Than anone Þe

welshe kyng was so nyȝe Þat he herde Sir Lucyus Than

he dressed hym to the vycounte his a vow for to holde

his armys were full clene And Þer In was a dolefull

dragon and In to Þe vawarde he pykys hym with styff

spere In honde And Þer he mette wyth Þe valyaunte vyl//

lers hym self Þat was vycounte of Rome and Þer he smo//

te hym thorow Þe shorte rybbys with a speare Þat the bloode

braste oute on euery syde and so fylle to the erthe and

neuer spake mo wordys aftir // Than Þe noble Sir Uway//

ne boldely approched & gyrde thorow oute Þe Emperoures

batayle where was Þe thyckest prece & slew a grete

lorde by Þe Emperoures standard And than flow to Þe Ba//

ner & strake hit thorow oute with his bryght swerde

& so takyth hit fro hem & rydyth with hit a way vnto his

felyshyp // Than sir Launcelot lepe forth with his stede

evyn streyght vnto Sir Lucyus and In his wey he

smote thorow a kynge Þat stoode althir nexte hym &

his name was Jacounde a Sarezen full noble · & than

he russhed forth vnto Sir Lucyus and smote hym on

Þe helme with his swerde Þat he felle to Þe erthe · And syth he

rode thryse ouer hym on a rowe and so toke Þe Baner of

Rome & rode with hit a way vnto Arthure hym self · And

all seyde Þat hit sawe Þer was neuer knyght dud more

worshyp In his dayes // Than dressed hym sir Bors

vnto a sterne knyght and smote hym on the vmbrell

Þat his necke braste · Than he joyned his horse vntyl

a sterne Gyaunte & smote hym thorow bothe sydys

And yet he slewe In his way turnyng ·ij· oÞer knyghtes

Be than Þe bowe men of Inglonde & of Bretayne

be gan to shote · And these othir Romaynes & Sarezens


f. 85v (V.8)


shotte with dartis & with crosse bowys · Þer be gan a stronge

batayle on euery syde and much slaughter on Þe Romay//

nes party and Þe douche men with quarels dud muche

harme for they were with Þe Romaynes with hir bowys of

horne // And Þe grete gyauntes of Gene kylled downe

many knyghtes with clubbys of steele crusshed oute hir

braynes · Also they sqwatte oute Þe braynes of many

coursers // Whan Arthure had aspyed Þe Gyauntes workes

he cryed on lowde Þat knyghtes myght here seyde fay//

re lordys loke your name be nat loste lese nat youre

worshyp for yondir bare legged knavys and ye shal

se what I shall do as for my trew parte he toke there

oute Excalyber And gurdys towarde Galapas that

grevid hym moste he kut hym of by the kneis clenly

Þer In sondir // Now art Þou of a syse seyde Þe kyng lyke

vnto oure ferys And than he strake of his hede swyf//

tely // Than come In Sir Cadore and Sir Kay Sir

Gawayne And good Sir Launcelot Sir Bors Sir Ly//

onel · and sir Ector de Marys and Sir Ascamore the

good knyght Þat neuer fayled his lorde Sir Pelleas

and sir Marhault that were preved men of armys

All thes grymly knyghtes sette vppon Þe gyauntys

And by Þe dyntys were dalte and Þe dome yoldyn

They had felled hem starke dede of fyffty all to the

bare erthe // So forth they wente wyth Þe kynge tho

knyghtes of Þe rounde table was neuer kyng noÞer knyghtes

dud bettir syn god made Þe worlde they leyde on with longe

swerdys & swapped thorow braynes shyldys noÞer no shere

armys myght hem nat with stonde tyll they leyde on the

erthe ·x·Ml· at onys // Than Þe Romaynes reled a lytyl//

for they were som what rebuked // But kyng Arthure


f. 86 (V.8)


with his pryce knyghtes preced sore aftir // Than Sir Kay Sir

Clegis and Sir Bedwere the Ryche encountyrs with them

by a clyff syde & Þer they ·iij· by good meanys slowe In Þat chace

mo than ·v·C· And also Sir Kay Roode vnto a kyng of Ethy//

ope and bare hym thorow & as he turned hym a gayne

towarde his ferys a tyrraunte strake hym be twyxte

Þe breste & Þe bowellys // And as he was hurte yet he tur//

ned hym a gayne & smote Þe todir on Þe hede Þat to Þe breste

hit rauȝte And seyde thouȝe I dey of thy dente thy praysyng  

shall be lytyll // Whan Sir Clegys and sir Bedwere saw

that Sir Kay was hurt they fared with Þe Romaynes as gray//

houndis doth with harys · And than they returned a yen vnto

noble kynge Arthure And tolde hym how they had spedde

Sir kyng sayde Sir Kay I haue serued Þe longe now bryng

me vnto som beryellys for my fadyrs sake And commaunde

me to dame Gwenyuere thy goodly quene and grete wel ·

my worshypfull wyfe Þat wratthed me neuer and byd hir for

my love to worche for my soule // Than wepte kynge Ar//

thure For routhe at his herte And seyde Þou shalt lyve for

euer my herte thynkes And Þer with Þe kynge hym self pulled

oute the truncheoune of Þe speare & made lechis to seche

hym sykerly And founde noÞer lyvir nor lungys noÞer bowelles

that were attamed // And than Þe kyng putte hym In hys

owne tente with syker knyghtes And sayde I shall revenge

thy hurte & I may a ryght rede // Than Þe kynge In this

malyncoly metyys with a kynge And with Excalyber he smote

his bak In sundir than In Þat haste he metys with a nothir &

gurde hym In Þe waste thorow bothe sydes · Thus he russhed

here & there thorow Þe thyckyst pres more than ·xxxti· tymes

// Than Sir Launcelot Sir Gawayne and sir Lovel· ys son

Gerde oute one Þat one hande where Lucyus the Emperoure


f. 86v (V.8)


                        hym self In a launde stoode · Anone as Sir Lucyus sawe

                        Sir Gawayne he sayde all on hyght Þou art welcom I wys

                        For Þou sekyst aftir sorow here Þou shalt be sone ouer macched //

Sir Launcelot was wroth at hys grymme wordys and

gurde to hym with his swerde a bouen vppon hys bryght

helme Þat Þe Raylyng bloode felle doune to his feete // And

Sir Gawayne wyth his longe swerde leyde on faste Þat      

iij· Amerallys deyde thorow Þe dynte of his hondis //      

so lovel· fayled nat In Þe pres he slew a kynge & a deuke Þat        

knyghtes were noble // Than Þe Romaynes Releved whan

they sye hir lorde so hampred they chaced and choppedde

doune many of oure knyghtes good And In that Rebukyng

they bare Þe bolde Bedwere to the colde erthe & wyth a

ranke swerde he was merveylously wounded // yet sir

Launcelot and sir Lovel · rescowed hym blyve · with Þat come

In kynge Arthure with Þe knyghtes of Þe table Rounde and

rescowed Þe ryche men that neuer were lyke to ascape

at Þat tyme for ofte tymes thorow envy grete hardynesse

is shewed Þat hath bene Þe deth of many kyd knyghtes for

thouȝe they speke fayre many one vnto oÞer yet whan

they be In batayle eyÞer wolde beste be praysed

A   None as kynge Arthure had a fyght of Þe Emperour

   Lucyus For Kynge noÞer for Captayne he taryed

no lenger And eythir with her swerdys swapped at othir so

Sir Lucyus with his swerde hit Arthure ouer thwarte Þe nose

& gaff hym a wounde nyȝe vnto Þe tunge Sir Arthure

was wroth and gaff hym a noÞer with all Þe myght Þat In hism     

arme was leved that frome Þe creste of his helme vnto   

Þe bare pappys hit wente a doune And so ended Þe Emperourm   

// Than Þe kyng mette with Sir Cadore his kene Cousyn

                                    and prayde hym kylle doune clene for love of sir Kay


f. 87 (V.8)


my foster broÞer · And for Þe love of Sir Bedwer Þat longe

hath me serued · There fore save none for golde nothir for

syluer · For they Þat woll accompany them with Sarezens the

man Þat wolde save them were lytyll to prayse And Þer fore

sle doune & save noÞer hethyn nothir crystyn · Than Sir

Cadore Sir Clegis cauȝte to her swerdys · And sir Launce//

Lot Sir Bors Sir Lyonel · Sir Bors Sir Ector de marys

they whyrled thorow many men of armys · And sir Gaway//

ne Sir Gaherys Sir Lovell And Sir Florens his brothir

Þat was gotyn of Sir Braundyles systir vppon a mountay//

ne · All thes knyghtes russhed forth In a frunte with many

mo knyghtes of the Rounde table that here be not reher//

sid // They hurled ouer hyllys valeyes & clowys and slow

downe on euery honde wondirfull many that thousandis

In an hepe lay thrumbelyng to gedir · But for all that the

Romaynes and Þe Sarezens cowde do oÞer speke to yolde

them self Þer was none saved but all yode to the swerde for

evir kynge Arthure rode In the thyckeste of Þe pres and

raumped downe lyke a lyon many Senatours noble // he

wolde nat a byde vppon no poure man for no maner of

thyng & euer he slow slyly & slypped to a noÞer tylle all were

slayne to the numbir of a ·C·Ml· and yet many a thousande

ascaped thorow prevy frendys // And than Relevys the

kynge with his noble knyghtes & rensaked ouer all Þe feldis

for his bolde barouns And tho Þat were dede were bur//

ryed as Þer bloode asked And they Þat myght be saved there

was no salve spared noÞer no deyntes to dere Þat myght

be gotyn for golde oÞer syluer · And thus he let save many

knyghtes Þat wente neuer to recouer · But for Sir Kayes reco//

vir and of Sir Bedwers the ryche was neuer man vn//

dir god so glad as hym self was // Than Þe kynge rode


f. 87v (V.8)


streyte Þer as Þe Emperoure lay & garte lyffte hym

vp lordely with barounes full bolde And Þe Sawdon

of Surre and of Ethyope the kyng · And of Egypte

and of Inde ij· knyghtes full noble wyth ·xvij· oÞer

kynges were takyn vp als · And also Syxty Senatours

of Roome that were honoured full noble men & all

Þe elders // The kynge let bawme all thes with many

good gummys and setthen lette lappe hem In Syxty folde

of Sendell large And than lete lappe hem In lede Þat

for chauffynge oÞer chongyng they sholde neuer savoure

And sytthen lete close them In chestys full clenly a

rayed & Þer baners a bovyn on Þer bodyes and Þer shyldys

turned vpwarde Þat eviry man myght knowe of what

contray they were // So on the morne they founde

In the heth ·iij· Senatours of of Rome · whan they

were brought to the kynge he seyde thes wordis //

Now to save your lyvys I take no force grete with that

ye woll meve on my message vnto grete Rome and

presente thes corses vnto the proude Potestate and

aftir hym my lettyrs & my hole entente & tell hem

In haste they shall se me And I trow they woll be ware

how they bourde with me & my knyghtes // Than Þe Emperour

hym self was dressed In a charyot and euery ·ij· knyghtys

In a charyot cewed fved aftir oÞer And Þe Senatours com aftir by cow//

plys In a corde // Now sey ye to the Potestate & all

Þe lordys aftir Þat I sende hem Þe trybet that I owe to Rome

for this is Þe trew trybet Þat I and myne elders haue

loste this ·x· score wyntyrs // And sey hem as me semes

I haue sent hem the hole somme And yf they thynke hit nat

I nowe I shall a mende hit whan Þat I com for suche tresou//

re muste they take as happyns vs here // So on Þe morne 


f. 88 (V.8-9)


thes Senatours Rayked Vnto Rome And with In ·xviij· dayes

they come to the Potestate and tolde hym how they hadde

brought Þe taxe and Þe trewage of ·x· score wynters bothe

of Ingelonde Irelonde And of all Þe est londys · For kyng

Arthure commaundys you noÞer trybet noÞer taxe ye neuer no//

no aske vppon payne of youre hedys · but yf your tytil be

Þe trewer than euer ouȝt ony of your elders // And for these

causys we haue foughtyn In Fraunce and Þer vs is foule

happed for all is chopped to Þe deth bothe Þe bettir & Þe worse

there fore I rede you store you wyth stuff for war is at

honde · For In the moneth of May this myscheff be felle

In the Contrey of Constantyne by Þe clere stremys And Þer

he hyred vs with his knyghtes & heled them Þat were hurte Þat

same day and to bery them that were slayne

NOw turne we to Arthure with his noble knyghtes Þat

entryth streyȝte In to Lushburne and so thorowe

Flaundirs and than to Lorayne he lauȝte vp all Þe lordshyp//

pys and sytthen he drew hym In to Almayne And vnto

Lumbardy the ryche and sette lawys In Þat londe that dured

longe aftir · And so In to Tuskayne and Þer the tirrauntys

destoyed and there were Captaynes full kene Þat kepte

Arthurs comyng and at streyte passages slew muche of

his peple and Þer they vytayled and garnysshed many good

townys // But Þer was a cite kepte sure defence a gaynste

Arthure and his knyghtes And Þer with angred Arthure And seyde

all on hyght I woll wynne this towne oÞer ellys many a

doughty shall dye // And than Þe kynge approched to Þe wallis

with oute shelde sauff his bare harneys // Sir seyde sir Flor//

ence foly Þou workeste for to nyȝe so naked this perleouse cite

And thow be a ferde seyde kynge Arthure I rede Þe faste fle

For they wynne no worshyp of me but to waste Þer toolys  


f. 88v (V.9)


For Þer shall neuer harlot haue happe by the helpe of oure lord

to kylle a crowned kynge Þat with Creyme is a noynted // Than

the noble knyghtes of Þe rounde table approched vnto the cite

and Þer horsis levys · they hurled on a frunte streyght vnto

Þe barbycans & Þer they slewe downe all Þat be fore them stondys

and In Þat bray Þe brydge they wanne And had nat Þe garuyson

bene they had wonne with In Þe yatys and Þe cite wonne thorow

wyghtnesse of hondys // And than oure noble knyghtes with

drew them a lytyll and wente vnto Þe kynge & prayde hym

to take his baronage and than he pyght his pavylyons of

palle and plantys all a boute the Sege and Þer he lette sett

vp suddeynly many engynes // Than Þe kynge called vnto

hym sir Florens And seyde these wordys my folkys wexen

feble for wantynge of vytayle And here by be forestes full

fayre and Þer as oure foomen many and I am sure they

haue grete store of bestes and thyder shall Þou go to Forrey

that forestes And with Þe shall go sir Gawayne and Sir

Wysharde with sir Walchere ij· worshypfull knyghtes with all Þe

wyseste men of Þe weste marchis // Also Sir Cleremount

and sir Clegis that were comly In armys And Þe Captay//

ne of Cardyff that is a knyght full good // Now go ye

and warne all this felyshep Þat hit be done as I commaunde

// So with Þat forth yode sir Florens and his felyshyp was

sone redy And so they rode thorow holtys and hethis tho//

row foreste & ouer hyllys And than they com In to a lowe

medow Þat was full of swete floures & Þer thes noble knyȝtes

bayted her stedis // And In Þe grekynge of Þe day Sir Gaw//

ayne hente his hors wondyrs for to seke // Than was he

ware of a man armed walkynge a paase by a woodis ease

by a revers syde and his shelde braced on his sholdir & he

on a stronge horse rydys with oute man wyth hym save a


f. 89 (V.9-10)


boy a lone Þat bare a grymme speare // The knyght bare

In his shelde of golde glystrand ·iij· Gryffons In Sabyll

and charbuckkle Þe cheff of Syluer · whan sir Gawayne was

ware of Þat gay knyght Than he gryped a grete spere and

rode streyght towarde hym on a stronge horse for to mete

with Þat strerne knyght where Þat he hoved // whan sir Gawayne

com hym nyȝe In englyshe he asked hym what he was

And Þater knyght answerde In his langage of Tuskayne

And sayde whoÞer pryckyst Þou pylloure Þat prefers Þe so large Þou

No pray prove whan Þe lykys for my presoner Þou shalt be for

All thy proude lokys // Thou spekyste proudly seyde sir

Gawayne but I counseyle Þe for all thy grymme wordis Þat

Þou grype to the thy gere or more grame falle

Than hir launcis they handylde by crauff of armys

And com on spedyly with full syker dyntes and there

they shotte thorow shyldys and mayles and thorow there

shene shuldyrs they were thorow borne the brede of an

hande // Than were they so wroth Þat a way wolde they neuer

but rathly russhed oute Þer swerdys and hyttys on Þer hel//

mys with hatefull dyntys and stabbis at hir stomakys with

swerdys well steled so freysshly Þo fre men fyghtes on the

grounde whyle Þe flamynge fyre flowe oute of hir hel//

mys // Than Sir Gawayne was grevid wondirly sore &

swynges his swerde Galantyne and grymly he strykys

and clevys Þe knyghtes shylde In sundir & thorow oute the

thycke haubirke made of sure mayles and Þe Rubyes that

were ryche · he russhed hem In sundir Þat men myght be hol//

de Þe lyvir and longes Than groned Þe knyght for his grymme

woundis and gyrdis to sir Gawayne and awkewarde hym

strykes and brastyth the rere brace and Þe vawm brace

bothe and but thorow a vayne Þat Gawayne sore greved for 


f. 89v (V.10)


so worched his wounde Þat his wytte chonged And Þer with all

his armure was all blody be renne // Than Þat knyght tal//

ked to Sir Gawayne and bade hym bynde vp his wounde

or thy ble chonge for Þou all be bledis this horse & thy bryȝt

wedys · for all Þe barbers of Bretayne shall nat thy blood

staunche // For who pat is hurte with this blaade bleed shal

he euer // Be god sayde Sir Gawayne hit grevys me but

lytyll yet shalt Þou nat feare me for all thy grete wordis

Thow trowyste with thy talkyne to tame my herte But

et Þou be tydys tene or Þou parte hense but Þou telle me In has//

te who may stanche my bledynge · That may I do and

I woll so Þou wolt succour me Þat I myght be fayre crystynde

and be com meke for my mysdedis // Now mercy I Jhu be

seche and I shall be com crysten and In god stedfastly be

leve & Þou mayste for thy manhode haue mede to thy soule

I graunte seyde Sir Gawayne So god me helpe to full

fyll all thy desyre Þou haste gretly hit deseruyd · So Þou say me

Þe soth what Þou sought here thus sengly thy self a lone and

What lorde or legeaunte Þou art vndir Sir he seyde I hyȝt  

Priamus and a Prynce is my fadir & he hath bene Re//

bell vnto Rome and ouer redyn muche of hir londis · &

my fadir is com of Alysaundirs bloode Þat was ouer leder of

kynges · And of Ector also was he com by Þe ryght lyne

& many mo were of my kynrede bothe Judas Macabeus

And deuke Josue And ayre I am alÞer nexte of Alysaundir

and of Anfryke and of all Þe oute Iles yet woll I be leue

on thy lorde Þat Þou belevyst on and take Þe for thy labour tresour

I now · for I was so haute In my herte I helde no man

my pere So was I sent In to this werre by Þe assente

of my fadir with ·vij· score knyghtes And now I haue enco//

untred with one hath geevyn fyghtyng my fylle There  


f.90 (V.10)


fore sir knyght for thy kynges sake telle me thy name

// Sir seyde Sir Gawayne I am no knyght but I haue

be brought vp in the wardrope with Þe noble kyng Arthure

wyntyrs and dayes for to take hede to his armoure &

all his oÞer wedis and to poynte all Þe paltokkys Þat longe

to hym self and to dress doublettis for deukys & Erlys

and at yole he made me yoman and gaff me good gyff//

tys more than an ·C· pounde and horse & harneyse rych

// And yf I haue happe my hele to serue my lyege lorde I

shall be well holpyn In haste // A sayde Sir Priamus

and his knavys be so kene his knyghtes ar passynge good

// Now for thy kynges lone of hevyn and for thy kyngys

love wheÞer Þou be knave oÞer knyght tell Þou me thy name Be

god seyde Sir Gawayne Now woll I telle Þe soth I am kno//

wyn In his courte & kyd In his chambir and Rolled with Þe

Rychest of Þe Rounde table And I am a deuke dubbed wyth

his owne hondis Þer fore grucche nat good sir if me this

grace is be happened hit is Þe goodnesse of god Þat lente

me this strength // Now am I bettir pleased sayde Sir

Pryamus than Þou haddest gyff me Þe provynce of perysie Þe

Þe ryche for I had levir haue be toryn with ·iiij· wylde horse

than ony yoman had suche a loose wonne of me oÞer els ony

page oÞer prycker sholde wynne of me Þe pryce In this felde

gotyn But now I warne Þe sir knyght of Þe rounde table

here is by Þe deuke of Lorayne with his knyghtes and Þe dough//

tyeste of Dolphyne landys with many hyȝe duchemen & 

many lordis of Lumbardy and Þe garueson of godarde &

men of west walle worshypfull kynges And of Syssoyne

and of Southlonde Sarezyns many numbirde and there

named ar In Rollys Sixti ·Ml· of syker men of armys

There fore but Þou hyȝe Þe fro this heth hit woll harme


f. 90v (V.10)


vs both and sore be we hurte neuer lyke to recouer But ta//

ke Þou hede in haynxman Þat he no horne blow for and he

do than loke Þat he be hewyn on pecis for here hovys at thy

honde a ·C· of good knyghtes Þat ar of my retynew and to

a wayte vppon my persone · For and Þou be raught with Þat rouȝt

raunsom noÞer rede golde woll they none aske // Than

Sir Gawayne rode ouer a water for to gyde hym self and Þat

worshypfull knyght hym folowed sore wounded & so they

rode tylle they com to Þer ferys Þat were baytand hir horsys

In a low medow where lay many lordys lenyng on there

shyldys with lawȝyng and Japyng & many lowde wordys

// Anone as sir Wycharde was ware of sir Gawayne &

aspyed Þat he was hurte he wente towarde hym wepyng

& wryngyng his hondys // Than Sir Gawayne tolde

hym how he had macched with Þat myghty man of strengthe

there fore greve yow nat good Sir for thouȝe my shylde

be now thirled & my sholdir shorne · yett thys knyght Sir

Pryamus hath many perelouse woundys But he hath saluys

he seyth Þat woll hele vs bothe But here is new note In

honde nere than ye wene fore by an houre aftir none I

trow hit woll noy vs all // Than sir Pryamus and Sir

Gawayne a lyght bothe & lette hir horsys bayte In Þe fayre

medow Than they lette brayde of hir basnettys & hir brode

shyldys than eythir bled so muche Þat euery man had wondir Þat

they myght sitte In Þer sadyls or stonde vppon erthe // Now

fecche me seyde Sir Pryamus my vyall Þat hangys by the

gurdyll of my haynxman for hit is full of Þe floure of Þe

iiij· good watyrs Þat passis from paradyse Þe mykyll fruyte

In fallys Þat at one day fede shall vs all // putt Þat watirIn

oure fleysh · where Þe syde is tamed & we shall be hole with

In ·iiij· houres Than they lette clense Þer woundys with colde


f. 91 (V.10)


whyght wyne And than they lete a noynte them with bawme

ouer & ouer and holer men than they were with In an houres space

was neuer lyvyng syn god Þe worlde made So whan they

were clensed & hole they broched barellys & brought them

Þe wyne wyth brede & brawme & many ryche byrdys // And

whan they had etyn Sir Gawayne seyde lordynges go to ar//

mys · And whan they were armed & assembled to gedyrs with

A clere Claryon callys them to gedir to counceyle · And sir

Gawayne of Þe case hem tellys // Now tell vs sir Pryamus

All Þe hole purpose of yondir pryce knyghtes // Sirs seyde

Sir Pryamus for to rescow me they have made a vowe

er ellys manfully on this molde to be marred all at onys

This was Þe pure purpose whan I passed thens at hir perel//

lys to preff me vppon payne of Þer lyvys // Now good men

seyde Sir Gawayne grype vp your hertes & yf we gyltles

go this a way hit woll greffe oure kynge · And Sir Florens

In this fyght shall here a byde for to kepe Þe stale as a knyȝt

noble for he was chosyn & charged In chambir with Þe kynge

chyfften of this chekke and cheyff of vs all · And whethir he

woll fyght oÞer fle we shall folow aftir For as for me for all

yondir folkys faare for sake hem shall I neuer // A fadir seyde

Florens full fayre now ye speke for I am but a fauntekyn

to fraysted men of armys and yf I ony foly do Þe fauȝte mus// 

te be youres · There fore lese nat youre worshyp my wytt

is but symple & ye ar oure all Þer governoure Þer fore worke

as ye lykys // Now fayre lordys seyde Sir Pryamus

Cese youre wordys I warne you be tyme for ye shall fynde

In yondir woodys many perellus knyghtes they woll putte

furth beystys to bayte you oute of numbir and ye ar fraykis

In this fryth nat paste ·vij·C· and Þat is feythfully to fewe

to fyght with so many for harlottys and haynxmen wol helpe


f. 91v (V.10-11)


vs but a lytyll for they woll hyde them In haste for all Þer hyȝe

wordys // ye sey well seyde Sir Gawayne so god me helpe

// Now fayre sonne sayde Sir Gawayne vnto Florens woll

ye take youre felyshyp of Þe beste provyd men to Þe numbir of a

·C· knyghtes and prestly prove your self & yondir pray wynne I as//

sent me with good hert seyde Florence

Than sir Florens called vnto hym Sir Florydas with

v· score knyghtes & forth they flynged a faste trolle

and Þe folke of Þe bestes dryvys · Than folowed aftir sir Flo//

rens with noble men of armys fully ·vij·C· And one Sir Fe//

raunte of Spayne be fore on a fayre stede Þat was fostred

In farmagos Þe fende was his fadir he flyttys towarde

Sir Florens and sayde whoÞer flyset Þou false knyght · Than

Sir Florens was fayne and In feautyr castis his spere

& rydys towarde Þe rought & restys no lenger and full            

but In Þe forehede he hyttys Sir Feraunte and brake          

his necke bone // Than Feraunte his cosyn had grete ca//                   

re and cryed full lowde Þou haste slayne a knyght & kynge

                                    a noynted Þat or this tyme founde neuer frayke Þat myght a

byde hym a buffette Þer fore ye shall dey Þer shall none of you

ascape // Fye on Þe seyde Florydas Þou eregued wrecche and

Þer with to hym he flyngis with a swerde Þat all Þe fleysshe of his

flanke he flappys In sundir Þat all Þe fylth of Þe freyke and

many of his guttys fylle to Þe erthe Than lyghtly rydis

a raynke for to rescowe Þat Barowne Þat was borne In Þe

rodis & rebell vnto Cryste he preced In proudly and

aftir his pray wyndys · But Þe Raynke Rycharde of

Þe rounde table on a rede stede rode hym a gaynste and

threste hym thorow Þe shylde evyn to Þe herte · Than he

rored full rudely but rose he neuer more // Than alle

his feerys mo than ·v·C· felle vppon Sir Florence and  


f. 92 (V.11)


on his ·v· score knyghtes · Than Sir Florens and sir Flory//

das In feautir bothe castys Þer spearys and they felled ·v· at

Þe frunte at Þe fyrste entre and sore they assayled oure folke

and brake browys & brestys and felde many a downe //

// Whan Sir Pryamus Þe pryse knyght perceyved Þer gamys

he yode to Sir Gawayne and thes wordys seyde thy pryse

men ar sore be gone and put vndir · for they ar ouer sette

with Sarezens mo than ·v·C· now wolde Þou suffir me for the

loue of thy god with a small parte of thy men to succoure hem

be tyme // Sir grucch ye nat seyde Sir Gawayne Þe gre

is there owne for they mowe haue gyfftys full grete I gra//

unted of my lorde there fore lette them fyght whylys hem

lyftes Þe freysh knyghtes for som of hem fought nat Þer fylle of

all this ·v· wyntyr there fore I woll nat styrre wyth my

stale half my steede length · but yf they be stadde wyth mo//

re stuff than I se hem a gaynste // So by Þat tyme was Sir

Gawayne ware by Þe woodys syde men commynge woodly

with all maner of wepon · For Þer rode Þe Erle of Ethelwolde

havyng on eyÞerhalf many hole thousandys and Þe deuke

of douchemen dressys hym hym aftir & passis with Pryamus

knyghtes · Than Gawayne the good knyght he chered his 

knyghtes and sayde greve you nat good men for yondir gete

fyght and be nat a baysshed of yondir boyes In hir bryghte

weedis for & we feyght In fayth Þe felde is ourys // Than

they haled vp Þer brydyls and be gan walop and by Þat they

com nygh by a londys length they iowked downe with here

hedys many jantyll knyghtes a more jolyar joustynge was

neuer sene on erthe · Than Þe ryche men of Þe rounde table

ran thorow Þe thykkeste with hir stronge sperys Þat many a

raynke for Þat provesse ran In to Þe grevys & durste no kna//

vys but knyght kene of herte fyght more In this felde 


f. 92v (V.11)


but fledde // Be god seyde Sir Gawayne this gladys my

herte Þat yondir gadlynges be gone for they made a grete

numbir // Now ar they fewer In Þe felde whan they were

fyrst numbyrd by ·xxti·Ml· In feyth for all Þer grete boste

// Than Inbeaunce of Geane a myghty gyaunte he feau//

tred his speare to Sir Garrarde a good knyght of walys

he smote Þe waylshe knyght Evyn to Þe herte · Than our

knyghtes myghtyly meddeled wyth hir myddylwarde ·

but a none at all assemble many Saresyns were destro//

yed for Þe soueraynes of Sessoyne were salued for euer // By

Þat tyme Sir Pryamus the good prynce In Þe presence

of lordys Royall to his penowne he rode and lyghtyly

hit hentys and rode with Þe Royall rought of Þe rounde

table and streyte all his retynew folowed hym aftyr

oute of Þe woode they folowed as shepe oute of a folde

and streyte they yode to Þe felde and stood by Þer kynde lor//

de and sytthyn they sente to Þe deuke thes same wordis

Sir we haue bene thy Sowdyars all this ·vij· wynter and

now we for sake Þe for Þe love of oure lyege lorde Arthure

For we may with oure worshype wende where vs lykys

for garueson noÞer golde haue we none resceyved · Fye

on you Þe devyll haue your bonys · For suche Sowdyars

I sette but a lytyll // Than Þe deuke dressys his dowch

men streyte vnto sir Gawayne and to Sir Pryamus

So they ·ij· gryped Þer spearys and at Þe gaynyste In hem         

gurdys wyth hir noble myghtes and Þer sir Pryamusm           

metyth with Þe Marquesse of Moyses londe & smytyth

hym thorow // Than Chastelayne a chylde of kyng

Arthurs chambir he was a warde of Sir Gawaynes

of Þe weste marchis he chasis to Sir Cheldrake that

was a chyfteyne noble and with his spere he smote thorow






f. 93 (V.11)


Cheldrake and so Þat chek Þat chylde cheved by chauce of armys

// But than they chaced Þat chylde Þat he nowhere myght a scape

For one with a swerde the half of Þe chylde he smot In too // Whan

Sir Gawayne hit sawe he wepte wyth all his herte & Inward//                 

ly he brente for sorow // But anone Gotelake a good man of

armys for Chastelayne the chylde he chongyd his mode Þat Þe

wete watir wente doune his chykys // Than sir Gawayne

dressis hym & to a deuke rydys And Sir Dolphyn the deuke

droff harde a gaynste hym But Sir Gawayne hym dressyth

with a grete spere Þat Þe grounden hede droff to his herte yette            

he gate hit oute & ran to an oÞer one Sir hardolf an hardy           

man of armys and slyly In he lette hit slyppe thorow & sodey//

nly he fallyth to Þe erthe yet he slow In the slade of men of

armys mo than Syxty with his hondys // Than was Sir

Gawayne ware of Þe man Þat slew Chastelayne his chylde &

swyfftly with his swerde he smyttyth hym thorow Now and Þou

haddyst ascaped with outyn scathe Þe scorne had bene oures · &

aftir Sir Gawayne dressis hym vnto Þe route and russhyth

on helmys & rode streyte to Þe rerewarde and so his way

holdyth And Sir Pryamus hym all Þer nexte gydynge hym

his wayes and Þer they hurtelyth and hewyth downe hethyn

knyghtes many & Sir Florence on Þe er syde dud what he myȝt

There Þe lordys of Lorayne and of Lumbardy both were ta//

kyn and lad a way with oure noble knyghtes · For suche a chek

oure lordys cheved by chauce of Þat were Þat they were so a

vaunced for hit a vayled hem euer // Whan Sir Florence and

Sir Gawayne had Þe felde wonne than they sente be fore ·v·

score of knyghtes and her prayes & hir presoners passyth hem aftir ·

And Sir Gawawayne In a streyte passage he hovyth tyll

all Þe prayes were paste Þat streyte patthe Þat so fore he dredith

So they rode tyll they Þe cite sawe and sothly Þe same day with


 f. 93v (V.11-12)


a sawte hit was gotyn // Than Sir Florence and sir Gaway//

ne harborowed surely Þer peple & sytthen turnys to a tente

and tellyth Þe kynge all Þe tale truly Þat day how they travay//

led and how his ferse men fare welle all and fele of thy

foomen ar brought oute of lyff & many worshypfull perso//

ners ar yolden In to oure handys · But Chastelayne thy

chylde is chopped of Þe hede yette slewe he a cheff knyghte

his owne hondys this day

NOw thanked be god sayde Þe noble kynge but I mer//

vayle muche of Þat bourely knyght Þat stondyth by Þe

for hym semys to be a straungere for Þersonere is he none

lyke Sir seyde Sir Gawayne this is a good man of armys

he macched me sore this day In Þe mournyng and had nat his

helpe bene Þat had I founden · And now is he yolden vnto

god & to me Sir kyng for to be com Crysten and on good

beleve · And whan he is Crystynde and In the fayth be//

levys There lyvyth nat a bettir knyght nor a noblere of

his hondis // Than Þe kynge In haste crystynde hym fayre

and lette conferme hym Priamus as he was a fore and

lyghtly lete dubbe hym a deuke with his hondys And made

hym knyght of Þe table rounde And a none Þe kynge lette cry

a sawte vnto Þe towne and Þer was rerynge of laddyrs &

brekynge of wallys Þe payne Þat Þe peple had was pyte

to se // Than Þe duches hir dressed with damesls ryche and

Þe countes of Clarysyn with hir clere maydyns they kneled In

Þer kyrtyls Þer Þe kynge hovyth and be sought hym of socoure

for Þe sake of oure lorde and sey vs som good worde And

Cetyl · thy peple or Þe cite suddeynly be with a sawte wonne

For than shall dye many a soule Þat grevid Þe neuer // The

kynge of walys lyffte vp his vyser with a knyghtly coun//

tenaunce and kneled to hir myldely with full meke wordes


f. 94 (V.12)


and seyde shall none mysse do you madam Þat to me longis

for I graunte the Chartyrs and to thy cheff maydyns vn//

to thy chyldern and to thy chyff men In chambir that to

Þe longis // But thy deuke is In daunger my drede ys

Þe lesse // But ye shall haue lyvelode to leve by as to thyne

astate fallys // Than Arthure sendyth on eche syde wyth

sertayne lordis for to cese of Þer sawte for Þe cite was yolden

and Þer with Þe deuke is eldyst soune com with Þe keyes & kneled

downe vnto Þe kynge and be sought hym of his grace

// And Þer he cesed Þe sawte by assente of his lordis and the

deuke was dressed to douer with Þe kynges dere knyghtes · For to

dwelle In daunger and dole dayes of his lyff // Than Þe

kynge with his crowne on his hede recouerde Þe cite and the

castell and Þe Captaynes counestablys knew hym for lorde

and Þer he delyuerde and dalte by fore dyuerse lordis a dowre

for Þe deuches and hir chyldryn // Than he made wardens

to welde all Þat londis And so In Lorayne & Lumbardy he lodged

as a lorde In his owne and sette lawys In Þe londis as & hym

beste lyked // And than at Lammas he yode vnto Lusarne

he sought and lay at his leyser with lykynges I nowe // Than

he mevys ouer Þe mountaynes and doth many mervayles

and so goth In by Godarte that Gareth sone wynnys

// Than he lokys in to Lumbardy and on lowde spekyth

in yondir lykynge londis as lorde woll I dwelle sif Flo//

rence and Sir Floridas that day passed with ·v·C· good men

of armys vnto Þe cite of virvyn they sought at Þe gaynste

and leyde Þer a buysshement as hem beste lykys · So Þer com

oute of Þat cite many hundretthis and skyrmysshed wyth

oure fore ryders as hem beste semed · Than broke oute

oure buysshemente and Þe brydge wynnys and so rode

vnto Þer borowys with baners vp dysplayed There fledde


f. 94v (V.12)


much folke oure of numbir for ferde of Sir Florence and

his fers knyghtes · Than they busked vp a baner a bovyn Þe

gatis and of Sir Florence in fayth so fayne were they

neuer · The kynge than hovyth on an hylle and lokyth

to Þe wallys and sayde se be yondir sygne Þe cite is wonne

Than he lete make a cry thorow all Þe oste that vppon

payne of lyff a lymme and also lesynge of his goodys

Þat no lyege man Þat longyth to his oste sholde lye be no

maydens ne ladyes noÞer burgessis wyff Þat to the cite

longis // So whan this Conquerrour com In to Þe cite he pas//

sed in to Þe castell and Þer he lendis and comfortis Þe care//

full men with many knyghtly wordis & made there a

Captayne a knyght of his owne contrey & Þe comons

accorded Þer tyll // Whan Þe soueraygnes of Myllayne her//

de Þat Þe cite was wonne they sente vnto kynge Arthrue

grete sommys of Syluer Syxty horsys well charged &

be sought hym as souerayne to haue ruthe of Þe peple

and seyde they wolde be sudgectes vntyll hym for euer

and yelde hym seruyse & fewte surely for hir lordys

bothe for Plesaunce and Petresaynte and for Þe porte

Trembyll and so mekly to gyff for Myllayne a mylly//

on of golde and make homage vnto Arthure all hir

lyff tymes · Than Þe kynge by his counceyle a conduyte

hem sendys so to com In and know hym for lorde // Than

in to Tuskayne he turned whan he tyme semed & there

he wynnys towrys and townys full hyȝe and all he 

wasted in his warrys Þer he a way ryddys // Than he

spedys towarde Spolute with his spedfull knyghtys

and so vnto vyterbe he vytayled his knyghtes and to Þe

vale of vysecounte he devysed Þer to lygge in Þat vertuouse

vale amonge vynys full And Þer he suggeournys that 


f. 95 (V.12)


soueraigne with solace at his harte for to wete wheÞer the

Senatours wolde hym of succour be seke // But sone after

on a Saturday sought vnto kynge Arthure all Þe Sena//

toures Þat were on lyve and of Þe cunnyngyst Cardynallis

that dwelled in Þe courte and prayde hym of pece and

prefird hym full large and be sought hym as a souerayne

moste gouernoure vndir god for to gyff them lycence

for ·vi· wekys large Þat they myght be assembled all

And than in Þe cite of Syon that is Rome callyd to

crowne hym Þer kyndly with Crysemed hondys with Septa//

re for sothe as an Emperoure sholde // I assente me sey//

de Þe kynge as ye haue devysed and comly be Crystmas

to be crowned here after to reigne in my asstate and to

kepe my rounde table with Þe rentys of Rome to rule

as me lykys // And than as I am avysed to gete me

ouer Þe salte see with good men of armys to deme for his

deth · that for vs all on Þe Roode dyed · // Whan Þe Sena//

tours had this answere vnto Rome they turned and

made rydy for his corownemente in Þe moste noble

wyse and at Þe day assigned as Þe Romaynes me tel//

lys he was crowned Emperoure by the Poepys hondis

with all Þe Royalte in Þe worlde to welde for euer // Þere

they suggeourned Þat seson tyll aftir Þe tyme and stabelys//

shed all Þe londys frome Rome vnto Fraunce & gaff

londis & rentys vnto knyghtes that had hem well deser//

ued Þer was none Þat playned on his parte ryche nothir

poore · Than he commaunded Sir Launcelot and Sir

Bors to take kepe vnto Þer fadyrs landys Þat kynge

Ban & kynge Bors welded & her fadyrs loke Þat ye

take seynge in all your brode londis and cause youre

lyege men to know you as for Þer kynde lorde & suffir


f. 95v (V.12)


neuer your soueraynte to be alledged with your subiectes noÞer the

soueraygne of your persone and londys // Also Þe myghty

kynge Claudas I gyff you for to parte be twyxte you

evyn for to mayntene your kynrede Þat be noble knyȝtes

So Þat ye and they to Þe rounde table make your repeyre

// Sir Launcelot and Sir Bors de gaynys thanked

Þe kynge fayre and sayde Þer hertes & seruyse sholde euer

be his owne // Where art Þou Priamus thy fee is yet

be hynde / here I make Þe and gyff Þe deukedom of

Lorayne for euer vnto Þe and thyne ayres · And whan

we com in to Ingelonde for to purvey the of horse

mete and a Ml·li quarterly for to mayntene thy

seruauntes so Þou leve not my felyship this gyffte ys

thyne owne // The knyght thankys Þe kynge with

a kynde wylle and sayde as longe as I lyve my ser//

vys is youre owne // Thus Þe kynge gaff many

londys there was none Þat wolde aske Þat myghte

playne of his parte · For of Rychesse & welth they

had all at her wylle // Than the knyghtes & lordis

Þat to Þe kynge longis Called a counsayle vppon a

fayre morne and sayde Sir kynge we be seche

the for to here vs all we ar vndir youre lordship

well stuffid blyssed be god of many thynges And also

we haue wyffis weddid we woll be seche youre

good grace to Reles vs · to sporte vs with oure wyffis

for worshyp be Cryste this Journey is well ouer com

ye say well seyde Þe kynge for I nowȝe is as good

as a feste for to attemte god ouer muche I holde

hit not wysedom // And Þer fore make you all redy

and turne we in to Ingelonde // Than there was

trussynge of harneyse with caryage full noble and Þe


f. 96 (V.12- VI.1)


kynge toke his leve of Þe holy fadir Þe Pope and Pa//

tryarkys and Cardynalys and Senatoures full

ryche and leffte good governaunce in Þat noble cite and

all Þe contrays of Rome for to warde and to kepe on

payne of deth Þat in no wyse his comaundement be

brokyn · Thus he passyth thorow Þe contreyes of all

partyes and so kyng Arthure passed over Þe see vnto

Sandwyche haven // Whan quene Gwenyvere he//

de of his commynge she mette with hym at london &

so dud all oÞer quenys and noble ladyes · for Þer was

never a solempner metyng in one cite to gedyrs for

all maner of Rychesse they brought with hem at Þe full

// Here endyth Þe tale of Þe noble kynge Arthure

that was Emperour hym self thorow dygnyte of his

hondys · And here folowyth afftir many noble

talys of Sir Launcelot de Lake


Explycit the noble tale be twyxt kynge

Arthure and Lucus the Emperour of Rome



one aftir that kynge Arthure was com from

Rome In to Ingelonde than all Þe knyghtys

of Þe Rounde table resorted vnto Þe kynge & made

many joustys and turnementes and som Þer were Þat

were but knyghtes encresed In armys and worshyp

Þat passed all oÞer of her felowys in provesse and noble

dedys and Þat was well proved on many · But In

especiall hit was provyd on Sir Launcelot de Lake

for In all turnementes justys of dedys of armys both

for lyff and deth he passed all oÞer knyghtes and at

no tyme was he ovircom but yf hit were by treson



Incipit liber quintus

Book Five: the conqueste of kynge Arthur over Lucius

Chapter One

WHanne kyng Arthur had after longe werre rested / and helde a Ryal feeste and table rounde with his alyes of kynges / prynces / and noble knyghtes all of the round table / there came in to his halle he syttynge in his throne Ryal xij aūcyen men / berynge eche of them a braunche of Olyue in token that they cam as Embassatours and messagers fro the Emperour Lucyus / whiche was called at that tyme / Dictatour or procurour of the publyke wele of Rome / whiche sayde messagers after their entryng & comyng in to the presence of kynge Arthur dyd to hym theyr obeyssaūce in makyng to hym reuerence said to hym in this wyse / The hyghe & myghty Emperour Lucyus sendeth to the kyng of Bretayne gretyng / cōmaūdyng the to knouleche hym for thy lord / and to sende hym the truage due of this Royamme vnto thempyre / whiche thy fader and other to fore thy precessours haue paid as is of record / And thou as rebelle not knowynge hym as thy souerayne withholdest and reteynest contrary to the statutes and decrees maade by the noble and worthy Iulius Cezar conquerour of this royame / and fyrst Emperour of Rome / and yf thou refuse his demaunde and commaundement / knowe thou for certayne that he shal make stronge werre ageynst the / thy Royames & londes / and shall chastyse the and thy subgettys / that it shal be ensamble perpetuel vnto alle kynges and prynces / for to denye their truage vnto that noble empyre whiche domyneth vpon the vnyuersal world / Thenne whan they had shewed theffecte of their message / the kyng commaunded them to withdrawe them And said he shold take auyce of counceylle and gyue to them an ansuere / Thenne somme of the yonge knyghtes heryng this their message wold haue ronne on them to haue slayne them sayenge that it was a rebuke to alle the knyghtes there beyng present to suffre them to saye so to the kynge / And anone thePage  161 [leaf 81r] kynge commaunded that none of them vpon payne of dethe to myssaye them ne doo them ony harme / and commaūded a knyghte to brynge them to their lodgynge / and see that they haue alle that is necessary and requysyte for them / with the best chere / and that noo deyntee be spared / For the Romayns ben grete lordes / and though theyr message please me not ne my court yet I must remembre myn honour /

¶ After this the kyng lete calle alle his lordes and knyghtes of the round table to counceyl vpon this mater / and desyred them to saye theire aduys / thenne syr Cador of Cornewaile spacke fyrste and sayd Syre this message lyketh me wel / for we haue many dayes rested vs and haue ben ydle / and now I hope ye shalle make sharp warre on the Romayns where I doubte not we shal gete honour / I byleue wel sayd Arthur that this mater pleaseth the wel / but these ansuers may not be ansuerd / for the demaunde greueth me sore / For truly I wyl neuer paye truage to Rome / wherfore I pray yow to counceylle me / I haue vnderstande that Bellinus and Brenius kynges of Bretayne haue had tempyre in their handes many dayes / And also Constantyn the sone of Heleyne / whiche is an open euydence that we owe noo trybute to Rome / but of ryght we that ben descended of them haue ryght to clayme the tytle of thempyre /

¶ Capitulum Secundum

THenne ansuerd kynge Anguysshe of Scotland / Syr ye oughte of ryght to be aboue al other kynges / for vnto yow is none lyke ne pareylle in Crystendome / of knyȝt hode ne of dygnyte / & I counceylle you [ counceylleyou ] neuer to obey the Romayns / for whan they regned on vs / they destressyd oure elders / and putte this land to grete extorcions & taylles / wherfore I make here myn auowe to auenge me on them / and for to strengthe youre quarel I shal furnysshe [ xy ] M good men of warre and wage them on my costes / whiche shal awayte on yow with my self whan it shal please yow / and the kyng of lytel Bretayne graunted hym to the same xxx M / wherfor kynge Arthur thanked them / And thenne euery man Page  162 [leaf 81v] agreed to make warre / and to ayde after their power / that is to wete the lord of westwalis promysed to brynge xxx M men And syr Vwayne / syre Ider his sone with their cosyns promysed to brynge xxx M / thenne syre launcelot with alle other promysed in lyke wyse euery man a grete multytude /

¶ And whan kynge Arthur vnderstood theire courages and good wylles / he thanked them hertely / and after lete calle thembassatours to here theire ansuere / And in presence of alle his lordes and knyghtes he sayd to them in thys wyse / I wylle that ye retorne vnto your lord and procurour of the comyn wele for the Romayns / and saye ye to hym Of his demaunde and commaundement I sette nothyng / And that I knowe of no truage ne trybute that I owe to hym / ne to none erthely prynce / Crysten ne hethen / but I pretende to haue and occupye the soueraynte of thempyre / wherin I am entytled by the ryght of my predecessours somtyme kynges of this lond / and saye to hym that I am delybered and fully concluded to goo wyth myn armye with strengthe and power vnto Rome by the grace of god to take possession in thempyre / and subdue them that ben rebelle / wherfore I commaunde hym and alle them of Rome that incontynent they make to me their homage or to knouleche me for their Emperour and gouernour vpon payne that shal ensiewe / And thenne he commaunded his tresorer to gyue to them grete and large yeftes / and to paye alle theyr dispencys / and assygned syre Cador to conueye them oute of the land / and soo they took theire leue and departed / and tooke theyr shyppyng at Sandwyche / and passed forthe by flaundrys / Almayn / the montayns / and all ytalye vntyl they cam vnto Lucius / And after the reuerence made / they made relacyon of their ansuer lyke as ye to fore haue herd / whan themperour Lucyus had wel vnderstonde theyre credence / he was sore meued as he had ben al araged / & sayd / I had supposed that Arthur wold haue obeyed to my commaundement / and haue serued yow hym self / as hym wel bysemed or ony other kyng to doo / O syre sayd one of the senatours late be suche vayn wordes / for we late yow wete that I and my felawes were ful sore aferd to beholde his countenaunce / I fere me ye haue made a rodde for your self / for he entendeth to be lord of this empyre Page  163 [leaf 82r] whiche sore is to be doubted yf he come / for he is al another mā than ye wene / and holdeth the most noble courte of the world alle other kynges ne prynces maye not compare vnto his noble mayntene / On newe yeres daye we sawe hym in his estate whiche was the ryallest that euer we sawe / for he was serued at his table with ix kynges / and the noblest felauship of other prynces lordes and knyghtes that ben in the world / and euery knyghte approued and lyke a lord and holdeth table roūd And in his persone the moost manly man that lyueth / and is lyke to conquere alle the world / for vnto his courage it is to lytel / wherfore I aduyse yow to kepe wel youre marches and straytes in the montayns / For certaynly he is a lord to be doubted / Wel sayd Lucius bifore Eester I suppose to passe the moūtayns and soo forth in to fraunce / and there byreue hym his londes with Ianeweyes and other myghty warryours of Tuskane and lombardye / And I shall sende for them all that ben subgettys and alyed to thēpyre of Rome to come to myn ayde / and forthwith sente old wyse knyghtes vnto these countrayes / folowynge / fyrste to ambage and arrage / to Alysaundrye / to ynde. to hermonye / where as the ryuer of Eufrates renneth in to Asye / to Auffryke / and Europe the large / to ertayne and Elamye to Arabye / Egypte and to damaske / to damyete and Cayer / to Capadoce / to tarce / Turkye / pounce / and pampoylle / to Surrye and gallacye / And alle these were subgette to Rome and many moo / as Grece / Cypres / Macydone Calabre / Cateland / portyngale with many thousandes of spaynardys / Thus alle these kynges / dukes / and admyrals assembled aboute Rome with xvj kynges attones with grete multytude of peple / whan themperour vnderstood their comyng / he made redy his Romayns / and alle the people bytwene hym & Flaundres

¶ Also he hadde goten wyth hym fyfty Geaunts whiche had ben engendred of fendys And they were ordeyned to garde his persone / and to breke the frounte of the bataylle of kynge Arthur / And thus departed fro Rome and came doune the montayns for to destroye the londes that Arthur had conquerd and cam vnto Coleyne / and byseged a Castel there by / and wanne it soone and stuffed hit with two honderd sarasyns or Infydeles Page  164 [leaf 82v] and after destroyed many fayr countrees / whiche Arthur had wonne of kyng Claudas / And thus Lucius cam with alle his hoost whiche were disperplyd lx myle in brede / and commaunded them to mete with hym in Burgoyne / for he purposed to destroye the Royame of lytyl Bretayne /

Capitulo tercio

NOw leue we of Lucius the emperour and speke we of kynge Arthur / that commaunded alle them of his retenue to be redy atte vtas of hyllary for to holde a parlement at yorke / And at that parlement was concluded to areste alle the nauye of the lond and to be redy within xv dayes at sandwyche / and there he shewed to his armye how he purposed to conquere thempyre whiche he ought to haue of ryght / And there he ordeyned two gouernours of his Royame that is to say Syre Bawdewyn of Bretayne for the counceille to the best and syr Constantyn sone to syre Cador of Cornewaylle / whiche after the dethe of Arthur was kyng of this Royamme / And in the presence of alle his lordes he resyned the rule of the royame and Gweneuer his quene to them / wherfore syre launcelot was wrothe / for he left syre Trystram with kynge marke for the loue of beal Isoulde / Thenne the quene Gweneuer made grete sorowe for the departynge of her lord and other / and swouned in suche wyse that the ladyes bare her in to her chambre Thus the kyng with his grete armye departed leuyng the quene and Royamme in the gouernaunce of syre Bawduyn and Constantyn / And whan he was on his hors / he sayd with an hyhe voys yf I dye in this iourney I wyl that syre Constantyn be myn heyer and kyng crowned of this royame as next of my blood / And after departed and entred in to the see atte Sandwyche with alle his armye with a greete multitude of shyppes / galeyes / Cogges / and dromoundes / sayllynge on the see / Page  165 [leaf 83r]

¶ Capitulum iiij

ANd as the kyng laye in his caban in shyp / he fyll in a slomerynge and dremed a merueyllous dreme / hym semed that a dredeful dragon dyd drowne moche of his peple / and he cam fleynge oute of the west / and his hede was enameled with asure / and his sholders shone as gold / his bely lyke maylles of a merueyllous hewe / his taylle ful of tatters / his feet ful of fyne sable / & his clawes lyke fyne gold And an hydous flamme of fyre flewe oute of his mouthe / lyke as the londe and water had flammed all of fyre / After hym semed there came oute of thoryent / a grymly bore al blak in a clowde / and his pawes as bygge as a post / he was rugged lokynge roughly / he was the foulest beest that euer man sawe / he rored and romed soo hydrously that it were merueill to here / Thenne the dredeful dragon auaunced hym and cam in the wynde lyke a fawcon gyuynge grete strokes on the bore / and the bore hytte hym ageyne with his grysly tuskes / that his brest was al blody / and that the hote blood made alle the see reed of his blood / Thenne the dragon flewe awey al on a heyȝte / and come doune with suche a swough and smote the bore on the rydge whiche was x foote large fro the hede to the taylle / and smote the bore all to powdre bothe flesshe and bonys / that it flutteryd al abrode on the see / And therwith the kynge awoke anone / and was sore abasshed of this dreme / And sente anone for a wyse philosopher / commaundynge to telle hym the sygnyfycacion of his dreme / Syre sayd the philosopher / the dragon that thow dremedest of / betokeneth thyn owne persone that sayllest here / & the colours of his wynges ben thy Royames that thow haste wonne / And his taylle whiche is al to tatterd sygnefyeth the noble knyghtes of the round table

¶ And the bore than the dragon slough comyng fro the clowdes / betokeneth some tyraunt that tormenteth the peple / or else thow arte lyke to fyghte with somme Geaunt thy self / beynge horryble and abhomynable whoos pere ye sawe neuer in your dayes / wherfore Page  166 [leaf 83v] of this dredeful dreme doubte the no thynge / but as a Conqueror come forth thy self / Thenne after this soone they had syghte of londe and saylled tyl they arryued atte Barflete in Flaundres / and whanne they were there he fond many of his grete lordes redy / as they had ben commaunded to awayte vpon hym

¶ Capitulum v

THenne came to hym an husbond man of the countrey / and told hym how there was in the countre of Constantyn besyde Bretayne a grete gyaunt whiche hadde slayne murthered and deuoured moche peple of the countreye and had ben susteyned seuen yere with the children of the comyns of that land / in soo moche that alle the children ben alle slayne and destroyed / and now late he hath taken the duchesse of Bretayne as she rode by with her meyne / and hath ledde her to his lodgynge whiche is in a montayne for to rauysshe and lye by her to her lyues ende / and many people folowed her moo than v C / but alle they myghte not rescowe her / but they lefte he shrykyng and cryenge lamentably / wherfore I suppose than he hath slayn her in fulfyllynge his fowle lust of lechery / She was wyf vnto thy Cosyn syre Howel / whome we calle ful nyhe of thy blood / Now as thow a ryghtful kynge haue pyte on this lady / and reuenge vs al as thow arte a noble conquerour /

¶ Alas sayd kynge Arthur / this is a grete meschyef / I had leuer than the best Royame that I haue / that I hadde ben a forlonge way to fore hym for to haue rescowed that lady /

¶ Now felawe sayd kynge Arthur canst thou brynge me there as thys gyaunt haunteth / ye syre sayd the good man / loo yonder where as thow seest tho two grete fyres / there shalt thou fynde hym / and more tresour than I suppose is in al Fraunce / whanne the kynge hadde vnderstanden this pyteous caas / he retorned in to his tente /

¶ Thenne he callyd to hym syre kaye and syre Bedewere / & commaunded them secretely to make redy hors and harneis for hym self and them tweyne / For after euensonge he wold ryde on pylgremage with them two only vnto saynt Mychels Page  167 [leaf 84r] mounte / And thenne anone he maad hym redy / and armed hym at alle poyntes / and tooke his hors and his sheld / And soo they thre departed thens and rode forthe as faste as euer they myȝt tyl that they cam to the forlond of that mount And there they alyghted / and the kynge commaunded them to tarye there / for he wold hym self goo vp in to that mounte And soo he ascended up in to that hylle tyl he came to a grete fyre / and there he fonde a careful wydowe wryngynge her handes and makyng grete sorowe syttynge by a graue newe made / And thenne kynge Arthur salewed her / and demaunded of her wherfore she made suche lamentacion / to whome she ansuerd and sayd Syre knyghte speke softe / for yonder is a deuyll yf he here the speke / he wylle come and destroye the / I hold the vnhappy what dost thow here in this mountayne / For yf ye were suche fyfty as ye be / ye were not able to make resystence ageynst this deuyl / here lyeth a duchesse deede the whiche was the fayrest of alle the world wyf to syre Howel / duc of Bretayne / he hath murthred her in forcynge her / and has slytte her vnto the nauyl /

¶ Dame sayd the kynge / I came fro the noble Conqueroure kynge Arthur for the treate with that tyraunt for his lyege peple / Fy on suche treatys sayd she / he setteth not by the kynge ne by no man els / But and yf thou haue broughte Arthurs wyf dame Gweneuer / he shalle be gladder than thow haddest gyuen to hym half fraunce / Beware approche hym not to nygh / for he hath vaynquysshed xv kynges / and hath maade hym a cote ful of precious stones enbrowdred with theyre berdes / whiche they sente hym to haue his loue for sauacion of theyr peple at this laste Crystemasse / And yf thow wylt / speke with hym at yonder grete fyre at souper / wel sayd Arthur I wyll accomplysshe my message for al your ferdful wordes / and wente forth by the creast of that hylle / and sawe where he satte atte souper gnawynge on a lymme of a man / bekynge his brode lymmes by the fyre and brecheles / and thre fayr damoysels tornynge thre broches wheron were broched twelue yonge children late borne lyke yonge byrdes

¶ Whanne kynge Arthur beheld that pyteous syȝte / he had grete compassion on them so that his hert Page  168 [leaf 84v] bledde for sorowe / and hayled hym sayeng in this wyse he that alle the world weldeth gyue the shorte lyf & shameful dethe / And the deuyl haue thy soule / why hast thow murthred these yonge Innocent children / and murthred this duchesse / Therfore aryse and dresse the thow gloton / For this day shall thou dye of my hand / Thenne the gloton anone starte vp and tooke a grete clubbe in his hand / and smote at the kynge that his coronal fylle to the erthe / and the kynge hytte hym ageyn that he carf his bely and cutte of his genytours / that his guttes & his entraylles fylle doune to the ground / thenne the gyaunt threwe awey his clubbe / and caught the kynge in his armes that he crusshyd his rybbes / Thenne the thre maydens knelyd doune and callyd to Cryst for helpe and comforte of Arthur And thenne Arthur weltred and wrong / that he was other whyle vnder and another tyme aboue / And so weltryng and walowynge they rolled doune the hylle / tyl they came to the see marke / and euer as they soo weltred / Arthur smote hym with his daggar / and it fortuned they came to the place / where as the two knyghtes were and kepte Arthurs hors / thenne when they sawe the kynge fast in the gyaunts armes / they came and losed hym / And thenne the kynge commaunded syr kaye to smyte of the gyaunts hede / and to sette it vpon a truncheon of a spere / and bere it to syre howel / and telle hym that his enemy was slayne / and after late this hede be bounden to a barbycan that alle the peple may see and behold hit / and go ye two up to the montayn / and fetche me my sheld / my suerd and the clubbe of yron / And as for the tresour take ye it / for ye shalle fynde there good oute of nombre / So I haue the kertyl and the clubbe I desyre no more / This was the fyerst gyaunt that euer I mette with / sauf one in the mount of Arabe / whiche I ouercame / but this was gretter and fyerser / Thenne the knyghtes fette the clubbe and the kyrtyl / and some of the tresour they took to them self / and retorned ageyne to the host And anone this was knowen thurgh alle the countrey / wher for the peple came and thanked the kynge / And he sayd ageyne yeue the thanke to god / and departe the goodes among yow / And after that kynge Arthur sayd and commaunded his Cosyn howel that he shold ordeyne for a chirche to be bylded Page  169 [leaf 85r] on the same hylle in the worship of saynte Mychel /

¶ And on the morne the kynge remeuyd with his grete bataylle / and came in to Champayne and in a valeye / and there they pyght their tentys / and the kynge beynge set at his dyner / ther cam in two messagers / of whome that one was Marchal of fraūce and sayd to the kyng that themperour was entryd in to fraunce / and had destroyed a grete parte and was in Burgoyn and had destroyed and made grete slaughter of peple & brente townes and borowes / wherfor yf thou come not hastely / they must yelde vp their bodyes and goodes /

¶ Capitulum sextum

THenne the kynge dyd doo calle syre Gawayne / syre Borce / syr Lyonel and syre Bedewere / and commaunded them to goo strayte to syre Lucius / and saye ye to hym that hastely he remeue oute of my land / And yf he wil not / bydde hym make hym redy to bataylle and not distresse the poure peple / Thenne anone these noble knyghtes dressyd them to horsbak / And whanne they came to the grene wood / they sawe many pauelions sette in a medowe of sylke of dyuerse colours besyde a ryuer / And themperours pauelione was in the myddle with an egle displayed aboue / To the whiche tente our knyghtes rode toward / and ordeyned syr Gawayn and syre Bors to doo the message / And lefte in a busshement syre Lyonel / and syre Bedwere / And thenne syre Gawayn and syr Borce dyd their message / and commaunded Lucius in Arthurs name to auoyde his lond / or shortly to adresse hym to bataylle / To whome Lucius ansuerde and sayd ye shalle retorne to your lord and saye ye to hym that I shall subdue hym and alle his londes / Thenne syre Gawayn was wrothe and sayde I hadde leuer than alle Fraunce fyghte ageynst the / and soo hadde I saide syr Borce leuer than alle Bretayne or burgoyne

¶ Thenne a knyght named syre Gaynus nyghe cosyn to the Emperour sayde / loo how these Bretons ben ful of pryde and boost / and they bragge as though they bare up alle the worlde / Thenne syre Gawayne was sore greued Page  170 [leaf 85v] with these wordes / and pulled oute his swerd and smote of his hede / And therwith torned theyr horses and rode ouer waters and thurgh woodes tyl they came to theyre busshement / where as syr Lyonel and syr Bedeuer were houyng / The romayns folowed fast after on horsbak and on foote ouer a chāpayn vnto a wood / thenne syre Boors torned his hors / and sawe a knyghte come fast on / whome he smote thurgh the body with a spere that he fylle dede doune to the erthe / thenne cam Callyburne one of the strengest of pauye and smote doun many of Arthurs knyghtes / And whan syr Bors sawe hym do soo moche harme he adressyd toward hym & smote hym thurȝ the brest that he fylle doune dede to the erthe / Thenne syr Feldenak thought to reuenge the dethe of gaynus vpon syre Gawayn / but syre gawayn was ware therof and smote hym on the hede / whiche stroke stynted not tyl it came to his breste / And thenne he retorned and came to his felawes in the busshement / And there was a recountre / for the busshement brake on the Romayns / and slewe and hewe doune the Romayns and forced the Romayns to flee and retorne / whome the noble knyghtes chaced vnto theyr tentes / Thenne the Romayns gadred more peple / and also foote men cam on / and ther was a newe bataille and soo moche peple that syr Bors and syr Berel were taken / but whan syre gawayn sawe that / he tooke with hym syre Idrus the good knyght and sayd he wold neuer see kynge Arthur but yf he rescued them / and pulled out galatyn his good swerd / and folowed them that ledde tho ij knyghtes awaye / and he smote hym that lad syre Bors / and took syr Bors fro hym and delyuerd hym to his felawes / And syre Idrus in lyke wyse rescowed syre Berel / thenne beganne the bataill to be grete that oure knyȝtes were in grete Ieopardy / wherfore syre Gawayn sente to kyng Arthur for socour and that he hye hym for I am sore wounded / and that oure prysoners may paye good oute of nombre / And the messager came to the kyng and told hym his message / And anon the kynge dyd doo assemble his armye / but anone or he departed the prysoners were comen / and syre gawayn and his felawes gate the felde and put the Romayns to flyght / and after retorned and came with their felauship in suche wyse / that Page  171 [leaf 86r] no man of worship was loste of them / sauf that syr Gawayn was sore hurte / Thenne the kynge dyd do ransake his woundes and comforted hym / And thus was the begynnyng of the fyrst iourney of the brytons and Romayns / and ther were slayne of the Romayns moo than ten thousand / and grete ioye and myrthe was made that nyghte in the hoost of kynge Arthur / And on the morne he sente alle the prysoners in to parys vnder the garde of syre launcelot with many knyghtes & of syr Cador

¶ Capitulum vij

NOw torne we to the Emperour of Rome whiche aspyed that these prysoners shold be sente to Parys / and anone he sente to leye in a busshement certayne knyghtes and prynces with syxty thousand men for to rescowe his knyghtes and lordes that were prysoners / And so on the morne as Launcelot and syre Cador chyuetayns and gouernours of all them that conueyed the prysoners as they sholde passe thurgh a wode syr Laūcelot sente certayne knyghtes tespye yf ony were in the woodes to lette them / And whanne the said knyghtes cam in to the wood / anone they aspyed and sawe the grete enbusshement / and retorned and told syr Laūcelot that ther lay in a wayte for them thre score thousand Romayns / And thenne syr Launcelot with suche knyghtes as he hadde and men of warre to the nombre of x M put them in araye and met wyth them and foughte with them manly / and slewe and dretenchid many of the Romayns / and slewe many knyghtes & admyrals of the party of the Romayns and sarasyns / ther was slayne the kynge of lylye and thre grete lordes Aladuke / herawde and heryngdale / but syr Launcelot fought soo nobly that no man myght endure a stroke of his hande / but where he came he shewed his prowesse and myght / for he slewe doune ryght on euery syde / And the Romayns and sarasyns fledde from hym as the sheep fro the wulf or fro the lyon / and putt them alle that abode alyue to flyght / And so longe they fouȝte that tydynges came to kynge Arthur / And anone he graythed hym and came to the bataille / and sawe his knyghtes how they had Page  172 [leaf 86v] vaynquysshed the bataylle / he enbraced them knyght by knyȝte in his armes and said ye be worthy to welde all your honour and worship / there was neuer kynge sauf my self that had so noble knyghtes / Syre sayd Cador there was none of vs failled other / but of the prowesse and manhode of syre Launcelot were more than wonder to telle / and also of his cosyns whiche dyd that daye many noble feates of werre / And also syre Cador tolde who of his knyghtes were slayne / as syr beriel & other syr Morys and syr Maurel two good knyghtes / thenne the kynge wepte and dryed his eyen with a keuerchyef / & sayd your courage had nere hand destroyed yow / For though ye had retorned ageyne / ye had lost no worship / For I calle hit foly / knyghtes to abyde whan they be ouermatched / Nay sayd Launcelot and the other / For ones shamed maye neuer be recouerd

¶ Capitulum viij

NOw leue we kynge Arthur and his noble knyghtes whiche had wonne the felde / and had brought theyre prysoners to parys / and speke we of a senatour whiche escaped fro the bataille / and came to Lucius themperour & sayd to hym / Syre emperour I aduyse the for to withdrawe the / what dost thow here / thow shalt wynne noo thynge in these marches but grete strokes oute of al mesure / For this day one of Arthurs knyghtes was worth in the batayll an honderd of ours Fy on the sayd Lucius thow spekest cowardly / for thy wordes greue me more than alle the losse that I had this day / and anone he sende forth a kynge whiche hyghte syr leomye with a grete armye / and badde hym hye hym fast to fore / and he wold folowe hastely after / kynge Arthur was warned pryuely / & sente his peple to Sessoyne / and toke vp the townes & castels fro the Romayns / Thenne the kyng commaunded syr Cador to take the rereward / & to take with hym certayne knyghtes of the round table / and syre Launcelot / syre Bors / syr kay / syre Marrok with syre Marhaus shalle awayte on our persone / Thus the kynge Arthur disperplyd his hoost in dyuerse partyes / to thende that his enemyes shold not escape / whanne the Page  173 [leaf 87r] Emperour was entryd in to the vale of Sessoyne / he myghte see where kynge Arthur was enbatailled and his baner dysplayed / and he was bysette round aboute with his enemyes / that nedes he must fyghte or yelde hym / for he myght not flee / But sayd openly vnto the Romayns / syrs I admoneste you that this day ye fyghte and acquyte yow as men / and remembre how Rome domyneth and is chyef and hede ouer alle the erthe and vnyuersal world / and suffre not these bretons thys day to abyde ageynste vs / & ther with he dyd commaunde hys trōpettes to blowe the blody sownes in suche wyse that the ground trembled and dyndled / Thenne the batails approuched and shoue and showted on bothe sydes and grete strokes were smyten on bothe sydes / many men ouerthrowen / hurte / & slayn and grete valyaunces / prowesses and appertyces of werre were that day shewed / whiche were ouer long to recounte the noble feates of euery man / For they shold conteyne an hole volume / But in especyal kynge Arthur rode in the bataille exhortynge his knyghtes to doo wel / and hym self dyd as nobly with his handes as was possyble a man to doo / he drewe oute Excalibur his swerd / and awayted euer where as the romayns were thyckest and moost greued his peple / and anone he adressyd hym on that parte and hewe and slewe doune ryȝt and rescued his peple / and he slewe a grete gyaunt named galapas / whiche was a man of an huge quantyte and heyghte he shorted hym and smote of bothe his legges by the knees / sayenge Now arte thow better of a syse to dele with / than thou were / and after smote of his hede / there syre gawayn foughte nobly and slewe thre admyrales in that bataill / And so dyd alle the knyghtes of the round table / Thus the bataill bitwene kynge Arthur and Lucius themperour endured longe / Lucius had on his syde many sarasyns / whiche were slayn / and thus the bataille was grete / and oftsydes that one party was at a fordele and anone at an afterdele / whiche endured so longe tyl at the last kyng Arthur aspyed / where Lucius themperour fought / and dyd wonder with his owne handes / And anon he rode to hym / And eyther smote other fyersly / and atte last Lucyus smote Arthur thwart the vysage/ and gaf hym a large wound / And whanne kyng Arthur felte hym self hurte / anon Page  174 [leaf 87v] he smote hym ageyne with Excalibur that it clefte his hede fro the somette of his hede / and stynted not tyl it cam to his breste And thenne themperour fylle doune dede / and there ended his lyf / And whan it was knowen that themperour was slayne anone alle the Romayns with all their hoost put them to flyght / and kynge Arthur with alle his knyghtes folowed the chaas / and slewe doune ryght alle them that they myghte atteyne / And thus was the vyctory gyuen to kynge Arthur & the tryumphe / and there were slayne on the party of Lucius moo than an hondred thousand / And after kyng Arthur dyd doo ransake the dede bodyes / and dyd doo burye them that were slayne of his retenue euery man accordynge to thestate & degree that he was of / And them that were hurte he lete the surgyens doo serche their hurtes and woundes / and commaunded to spare no salues ne medecynes tyl they were hole / Thenne the kyng rode strayte to the place where themperour lucius lay dede / and with hym he fond slayne the Sowdan of Surrey / the kynge of Egypte and of Ethyope / whiche were two noble kynges with xvij other kynges of dyuerse regyons / and also syxty senatours of Rome al noble men / whome the kynge dyd do bawme and gomme with many good gommes aromatyk / and after dyd do cere them in syxty fold of cered clothe of Sendale / and leyd them in chestys of leed / by cause they shold not chauffe ne sauoure / and vpon alle these bodyes their sheldes with theire armes and baners were sette / to thende they shold be knowen of what country they were / and after he fonde thre Senatours whiche were on lyue to whome he sayd / for to saue your lyues I wylle that ye take these dede bodyes / and carye them with yow vnto grete Rome / and presente them to the potestate on my behalue shewynge hym my letters / and telle them that I in my persone shal hastely be atte Rome / And I suppose the Romayns shalle beware how they shal demaunde ony trybute of me / And I commaunde yow to saye whan ye shal come to Rome to the potestate and all the counceylle and Senate / that I sende to them these dede bodyes for the trybute that they haue demaunded / And yf they be not content with these / I shal paye more at my comynge / for other trybute owe I none / ne none other wylle I paye / And me Page  175 [leaf 88r] thynketh this suffyseth for Bretayne / Irlond and al Almayne with germanye / And ferthermore I charge yow to saye to them / that I commaunde them vpon payne of theyre hedes neuer to demaunde trybute ne taxe of me ne of my londes Thenne with this charge and commaundement the thre Senatours afore sayd departed with alle the sayd dede bodyes leynge the body of Lucius in a carre couerd with tharmes of the Empyre al alone / And after alwey two bodyes of kynges in a charyot / and thenne the bodyes of Senatours after them and soo wente toward Rome / and shewed theyr legacyon & message to the potestate and Senate / recountyng the bataylle done in Fraunce / and how the feld was lost and moche people & Innumerable slayne / wherfore they aduysed them in no wyse to meue no more warre ageynste that noble conqueroure Arthur / For his myght and prowesse is most to be doubted seen the noble kynges and grete multytude of knyghtes of the round table / to whome none erthely prynce may compare /

¶ Capitulo nono

NOw torne we vnto kynge Arthur and his noble knyghtes whiche after the grete bataylle acheued ageynste the Romayns / entryd in to Lorayne braban and Flaundres and sythen retorned in to hault Almayn / and so ouer the mōtayns in to lombardye / and after in to Tuskane / wherin was a Cyte / whiche in no wyse wold yelde them self ne obeye / wherfore kynge Arthur biseged it / and lay longe aboute hit / and gaf many assaultes to the Cyte / And they within deffended them valyauntly / Thenne on a tyme the kynge called syr florence a knyght / and sayd to hym they lacked vytaylle / and not ferre from hens ben grete forestes and woodes / wherin ben many of myn enemyes with moche bestyayl / I wyl that thou make the redy and goo thyder in foreyeng / and take with the syr Gawayn my neuew / Syre wysshard / syre Clegys / Syre Cleremond and the Captayn of Cardef with other / & brynge with yow alle the beestes that ye there can gete / And anone these knyghtes made them redy / and rode ouer holtys & hyllys thurgh forestes and woodes / tyl they cam in to a fayr medow Page  176 [leaf 88v] ful of fayre floures and grasse / And there they rested them & theyr horses alle that nyghte / And in the spryngynge of the day in the next morne / syre Gawayn took his hors and stale away from his felauship to seke some aduentures / And anon he was ware of a man armed walkynge his hors easyly by a wodes syde / and his sheld laced to his sholdre syttynge on a stronge courser withoute ony man sauyng to a page berynge a myghty spere . The knyght bare in his sheld thre gryffons of gold in sable charbuncle the chyef of syluer / whan syre Gawayn aspyed this gay knyght / he fewtryd his spere and rode strayt to hym / and demaūded of hym from whens that he was that other ansuerd and sayd he was of Tuscane / and demaunded of syre gawayn / what profryst thow proude knyghte the so boldly / here getest thou no praye / thou mayst proue whā thou wylt / for thou shalt be my prysoner or thou departe /

¶ Thenne sayd gawayn / thou auauntest the gretely and spekest proude wordes / I coūceylle the for alle thy boost that thou make the redy / and take thy gere to the / to fore gretter grame falle to the

¶ Capitulum x

THenne they took theyr speres and ranne eche at other with alle the myghte they had / and smote eche other thurgh their sheldes in to theyr sholders / wherfore anone they pulled oute their swerdes / and smote grete strokes that the fyre sprange oute of their helmes / Thenne syre gawayne was al abashed and with galatyn his good swerd he smote thurgh shelde and thycke hauberke made of thyck maylles and al to russhed and brake the precious stones / and made hym a large wounde / that men myghte see bothe lyuer and long / Thenne groned that knyght / and adressyd hym to syr Gawayn / & with an awke stroke gaf hym a grete wound and kytte a vayne / whiche greued gawayn sore / and he bledde sore /

¶ Thenne the knyghte sayd to syre Gawayn / bynde thy wounde or thy blee chaunge / for thou bybledest al thy hors and thy fayre armes / For alle the Barbours of Bretayne shal not conne staunche thy blood / For who someuer is hurte with this blade he shalle Page  177 [leaf 89r] neuer be staunched of bledynge / Thenne ansuerd gawayn hit greueth me but lytyl / thy grete wordes shalle not feare me ne lasse my courage / but thow shalt suffre tene and sorow or we departe / but telle me in hast who maye staunche my bledynge / That may I doo sayd the knyght yf I wylle / And so wyll I yf thou wylt socoure an ayde me that I maye be crystned and byleue on god / And therof I requyre the of thy manhode / and it shalle be grete meryte for they soule I graunte said Gawayne so god helpe me taccomplysshe alle thy desyre / But fyrst telle me what thou soughtest here thus allone / and of what londe and legeaunce thou arte of / Syre he sayd my name is Pryamus / and a grete prynce is my fader / and he hath ben rebelle vnto Rome and ouer ryden many of theyr londes / My fader is lyneally descended of Alysaunder and of hector by ryght lygne / And duke Iosue and Machabeus were of oure lygnage / I am ryght enherytour of Alysaunder and auffryke and alle the oute yles / yet wyl I byleue on thy lord that thow byleuest on / And for thy laboure I shalle yeue the tresour ynough / I was soo elate and hauteyn in my hert that I thought no man my pere ne to me semblable / I was sente in to this werre with seuen score knyghtes / and now I haue encountred with the whiche hast gyuen to me of fyghtyng my fylle / wherfore syr knyghte I pray the to telle me what thow arte / I am no knyght sayd gawayn / I haue ben brought vp in the garderobe with the noble kynge Arthur many yeres for to take hede to his armour and his other araye / and to poynte his paltockes that longen to hym self / At yole last he made me yoman and gaf to me hors and harneys and an honderd pound in money / And yf fortune be my frend / I doubte not / but to be wel auaunced and holpen by my lyege lord / A sayd Pryamus / yf his knauys be so kene and fyers / his knyȝtes ben passynge good / Now for the kynges loue of heuen whether thou be a knaue or a knyghte telle thou me thy name / By god sayd syre Gawayn / Now wyl I saye the sothe / my name is syre gawayn and knowen I am in his courte and in his chambre / and one of the knyghtes of the round table / he dubbed me a duke with owne hand / Therfore grutche not yf this grace is to me fortuned / hit is the goodnesse of god Page  178 [leaf 89v] that lente to me my strengthe / Now am I better pleasyd sayd Pryamus than thou haddest gyuen to me al the prouynce and parys the ryche / I had leuer to haue ben torn with wylde horses / than ony varlet had wonne suche loos / or ony page or pryker shold haue had prys on me / But now syre knyghte I warne the / that here by is a duke of Lorayne with his armye and the noblest men of Dolphyne and lordes of lombardye / with the garneson of godard / and sarasyns of Southland ynombred lx M of good men of armes / wherfor but yf we hye vs hens / it wylle harme vs bothe / for we ben sore hurte / neuer lyke to recouer / but take hede to my page that he no horne blowe / For yf he doo ther ben houynge fast by an C knyȝtes awaytynge on my persone / and yf they take the / ther shall no raunson of gold ne syluer acquyte the / Thenne syre gawayne rode ouer a water for to saue hym / And the knyghte folowed hym / and soo rode forthe tyl they came to his felawes / whiche were in the medowe / where they had ben al the nyghte Anone as syre wychard was ware of syre gawayn and sawe that he was hurte / he ranne to hym soroufully wepynge / and demaunded of hym who had soo hurte hym / and gawayn told how he had foughten with that man / and eche of them hadde hurte other / and how he had salues to hele them / but I can telle yow other tydynges / that soone we shal haue adoo with many enemyes / Thenne syre pryamus and syre gawayn alyghted / and lete theire horses grase in the medowe and vnarmed them / And thenne the blood ranne fresshly fro theyre woundes / And pryamus toke fro his page a vyolle ful of the four waters that came oute of paradys / and with certayne baume enoynted theyr woundes / and wesshe them with that water / & within an houre after / they were both as hole as euer they were / And thenne with a trompet were they alle assembled to counceylle / And there pryamus told vnto them / what lordes and knyghtes had sworne to rescowe hym / and that without faill they shold be assailled with many thousandes / wherfor he counceilled them to withdrawe them / Thenne syre gawayn sayd it were grete shame to them to auoyde withoute ony strokes / Wherfore I aduyse to take oure armes and to make vs redy to mete with these sarasyns and mysbyleuyng men / and wyth Page  179 [leaf 90r] the helpe of god we shal ouerthrowe them and haue a fayre day on them / And syre Florens shall abyde styll in thys felde to kepe the stale as a noble knyghte / and we shal not forsake yonder felawes / Now sayd Pyramus seasse your wordes / for I warne yow ye shal fynde in yonder woodes many peryllous knyghtes / they wylle put forthe beestes to calle yow on / they be out of nombre / and ye are not past vij C whiche ben ouer fewe to fyght with soo many / Neuertheles sayd syr gawayn we shal ones encountre them / and see what they can do and the beste shalle haue the vyctory

¶ Capitulo xj

THenne syre Florence callyd to hym syre florydas with an honderd knyghtes and droofe forth the herde of bestes / Thenne folowed hym vij honderd men of armes / and syr Feraunt of spayne on a fayr stede came spryngynge oute of the woodes / and came to syre Florence and axyd hym why he fledde / Thenne syre Florence took his spere / and rode ageynste hym / and smote hym in the forhede and brake his necke bone / Thenne all thother were meued / and thought to auenge the dethe of syr Feraunt / and smote in emonge them / and there was grete fyghte and many slayne and leyd doune to grounde / and syr Florence with his C knyghtes alwey kepte the stale and foughte manly /

¶ Thenne whan Pryamus the good knyght perceyued the grede fyght / he wente to syre Gawayn / and badde hym that he shold goo and socoure his felauship / whiche were sore bystad with their enemyes / Syr greue yow not sayd syre Gawayn / For theyr gree shall be theirs I shall not ones meue my hors to them ward / but yf I see mo than ther ben / For they ben stronge ynough to matche them / & with that he sawe an erle called syre Ethelwold and the duk of duchemen cam lepyng out of a wood with many thousādes & pryamus knyȝtes / & cam strayte vn to the bataylle / thēne sir gawayn comforted his knyghtes / and bad them not to be abasshed / for al shal be ours / thēne they began to wallope & mette with their enemyes / there were mē slayn & ouerthrowen on euery Page  180 [leaf 90v] syde / Thenne threstyd in amonge them the knyghtes of the table round / and smote doune to the erthe alle them that wythstode them / in soo moche that they made them to recuyelle & flee / By god sayd syre Gawayn this gladeth my herte / for now ben they lasse in nombre by xx M / Thenne entryd in to the bataylle Iubaunce a geaunt / and fought and slewe doune ryght and distressyd many of our knyghtes / emonge whome was slayne syre Gherard a knyght of walys / Thenne oure knyghtes toke herte to them / and slewe many sarasyns / And thenne came in syr Priamus with his penon / and rode with the knyghtes of the round table / and fought so manfully that many of their enemyes lost theyr lyues / And ther syr Pryamus slewe the Marquys of Moyses land / and syre gawayn with his felawes so quytte hem that they had the feld / but in that stoure was syr Chestelayne a chyld and ward of syre Gawayne slayne / wherfore was moche sorou made / and his deth wes soone auengyd / Thus was the bataille ended and many lordes of lombardye and sarasyns left dede in the feld /

¶ Thenne syre florence and syre Gawayne herberowed surely theyr peple / and token grete plente of bestyal of gold & syluer and grete tresour and rychesse and retorned vnto kyng Arthur whiche lay styl at the syege / And whanne they came to the kynge / they presented theyr prysoners and recounted theyre aduentures / and how they had vaynquysshed theyre enemyes

¶ Capitulum xij

NOw thanked be god sayd the noble kynge Arthur / But what maner man is he that standeth by hym self hym semed no prysoner / Syre sayd Gawayne this is a good man of armes / he hath matched me / but he is yolden vnto god and to me for to bycome Crysten had not he haue be we shold neuer haue rotorned / wherfor I pray yow that he may be baptysed / for ther lyueth not a nobler man ne better knyght of his handes / thenne the kyng lete hym anon be crystned / and dyd doo calle hym his fyrste name Pryamus / and made hym a duke and knyghte of the table round

¶ And thenne anon the kynge lete do crye assaulte to the cyte / and there was rerynge of laddres brekyng of wallys and the dyche fylled / Page  181 [leaf 91r] that men with lytel payne myȝt entre in to the cyte / thēne cam out a duchesse / & Clarysyn the countesse with many ladyes & damoysels / and knelyng bifore kynge Arthur requyred hym for the loue of god to receyue the cyte / & not to take it by assaulte for thenne shold many gyltles be slayne / thēne the kyng aualyd his vyser with a meke & noble coūtenaūce / & said madame ther shal none of my subgettys mysdoo you ne your maydens / ne to none that to yow longen / but the duke shal abyde my Iugement / thenne anone the kyng commaunded to leue the assault / & anon the dukes oldest sone brought out the keyes / & knelyng delyuerd them to the kyng / & bysouȝt hym of grace / & the kyng seased the toun by assent of his lordes / & toke the duc & sent hym to douer there for to abyde prysoner terme of his lyf & assigned certayn rentes for the dower of the duchesse & for her children / Thenne he made lordes to rule tho londes & lawes as a lord ought to do in his owne countrey / & after he took his iourney toward Rome / & sent sir Florys & syr florydas to fore with v C men of armes / & they cam to the cyte of vrbyne & leid there a busshement there as them semed most best for them / & rode to fore the toune / where anon yssued oute moche peple & skarmusshed with the fore rydars / thēne brake out the busshement & wan the brydge & after the toun / & set vpon the wallis the kynges baner / thēne cam the kynge vpon an hille & sawe the Cyte & his baner on the wallys / by whiche he knewe that the Cyte was wonne / & anone he sente & commaunded that none of his lyege men shold defoule ne lygge by no lady / wyf / ne maide / & whan he cam in to the cyte / he passid to the castel / and comforted them that were in sorou / & ordeyned ther a captayn a knyȝt of his own coūtrey / & whan they of Melane herd that thylk cyte was wōne / they sent to kyng Arthur grete sōmes of money / & besouȝt hym as their lord to haue pyte of them / promysyng to be his subgettys for euer / & yelde to hym homage & fealte for the lādes of plesaūce & pauye / petersaynt & the port of tremble / & to gyue hym yerly a melyon of gold al his lyf tyme / thēne he rydeth in to Tuskane & wynneth tounes & castels & wasted al in his way that to hym wil not obeye / & so to spolute & viterbe & fro thens he rode in to the vale of vycecoūte emong the vynes And fro thens he sente to the senatours to wete / whether they Page  182 [leaf 91v] wold knowe hym for theyr lord / But soone after on a saterday came vnto kynge Arthur alle the senatours that were left on lyue / and the noblest Cardynals that thenne dwellyd in Rome / And prayd hym of pees / and profered hym ful large And bysought hym as gouernour to gyue lycence for vj wekes for to assemble alle the Romayns / And thenne to crowne hym Emperour with creme as it bylongeth to so hyhe astate / I assente sayd the kynge lyke as ye haue deuysed / and at crystemas there to be crowned / and to holde my round table with my knyghtes as me lyketh / And thenne the senatours maade redy for his Intronysacyon / And at the day appoynted as the Romaunce telleth he came in to Rome / and was crouned emperour by the popes hand with all the ryalte that coude be made / And sudgerned there a tyme / and establysshed all his londes from Rome in to Fraunce / and gaf londes and royammes vnto his seruauntes and knyghtes to eueryche after his desert in suche wyse that none complayned ryche ne poure / & he gafe to syre Pryamus the duchye of Lorayne / and he thanked hym and sayd he wold serue hym the dayes of his lyf / and after made dukes and erles / and made euery man ryche / Thenne after this alle his knyghtes and lordes assembled them afore hym / and sayd blessyd be god your warre is fynysshed and your conquest acheued / in soo moche that we knowe none soo grete ne myghty that dar make warre ageynst yow / wherfore we byseche you to retorne homeward / and gyue vs lycence to goo home to our wyues / fro whome we haue ben longe / and to reste vs / for your Iourney is fynysshed with honour & worship [ woship ] / Thenne sayd the kyng / ye saye trouthe / and for to tempte god it is no wysedome / And therfore make you redy and retorne we in to Englond / Thenne there was trussyng of harneis and bagage and grete caryage / And after lycence gyuen he retorned and commaunded that noo man in payne of dethe shold not robbe ne take vytaylle / ne other thynge by the way but that he shold paye therfore / And thus he came ouer the see and londed at sandwyche / ageynste whome Quene Gweneuer his wyf came and mette hym / and he was nobly receyued of alle his comyns in euery cyte and burgh / and grete yeftes presented to hym at his home comyng to welcome hym with /

Page  183 [leaf 92r]

¶ Thus endeth the fyfthe booke of the conqueste that kynge Arthur hadde ageynste Lucius the Emperoure of Rome / and here foloweth the syxth book whiche is of syr Launcelot du lake



Home -- Biography -- Morte Darthur -- Links -- Transcriptions

I -- II -- III -- IV -- V -- VI -- VII -- VIII -- IX -- X -- XI -- XII -- XIII -- XIV -- XV