IX

(Winchester f. 207-229; Caxton IX.23-IX.44; Vinaver, Vol. 2, pp. 504.17-559.5; Shepherd pp. 306.41-337.6)

 
 
 
 

f. 207 (IX.23)

 

And at the nexte londynge faste by the see there mette

with sir Trystram and with sir Dynadan sir Ector de

marys and sir Bors de Ganys and there sir Ector

Justed with sir Dynadan and he smote hym and hys horse downe

And than sir Trystram wolde haue Justed with sir Bors And

sir Bors seyde that he wolde nat Juste with no Cornyssh knyȝtes

for they ar nat called men of worship And all thys was

done vppon a brydge And with thys cam sir Bleoberys

and sir Dryaunte and sir Bleoberys profird to Juste with sir Ble//

oberys Trystram smote downe sir Bleoberys Than seyde sir

Bors de ganys I wyste neuer cornysh knyght of so grete ava//

lure nor so valyaunte as that knyght that beryth Þe trappours

enbrowdred with crownys And Þan sir Trystram and Sir

Dynadan departed from them in to a foreyst and there mette

them a damesell that cam for the love of sir Launcelot

to seke aftir som noble knyghtes of kynge Arthurs courte

for to rescow sir Launcelot for he was ordayned for by the

treson of quene Morgan le fay to haue slayne hym and

for that cause she ordayned xxxti knyghtes to lye in wayte

for sir Launcelot and thys damesell knew thys treson

And for thys cause she cam for to seke noble knyghtes

to helpe sir Launcelot / For that nyght oÞer the day affter Sir

Launcelot sholde com where thes thirty knyghtes were

And so thys damesell mette with sir Bors and sir Ector

and with sir Dryaunte and there she tolde hem all iiij

of the treson of Morgan le fay and than they promysed

her that they wolde be nyȝe her whan sir Launcelot shold

mete with the thirty knyghtes and if so be they sette vppon

hym we woll do rescowis as we can So the damesell

departed and by aduenture she mette with sir Trystram


f. 207v (IX.23)

 

and with sir Dynadan and there the damesell tolde hem of all the

treson that was ordayned for sir Launcelot // Now fayre damesell

seyde sir Trystram brynge me to that same place where Þey shold

mete with sir Launcelot Than seyde sir Dynadan what woll ye

do hit ys nat for vs to fyght with xxxti knyghtes and wyte you

well I woll nat Þer off as to macche o knyght ij or iij ys I now

and they be men But for to macche xv· knyghtes that I woll

neuer vndirtake // Fy for shame seyde sir Trystram do but youre

parte // Nay seyde sir Dynadan I woll nat Þer off but iff ye woll lende

me your shylde for ye bere a shylde of Cornwayle And for the

Cowardyse that ys named to the knyghtes of Cornwayle by youre

shyldys ye bene euer for borne Nay sayde sir Trystram I woll nat

departe frome my shylde for her sake that gaff hit me But one

thyng seyde sir Trystram I promyse the sir Dynadan but if Þou

wolte promyse me to a byde with me ryght here I shall sle the

for I desyre no more of the but answere one knyght and yf

thy harte woll nat serue the stonde by and loke vppon // Sir

seyde sir Dynadan I woll promyse you to looke vppon and to do

what I may to save my selff but I wolde I had nat mette with you

So than anone thes xxxti knyghtes cam faste by thes iiij· knyȝtes

and they were ware of them and aythir of oÞer and so thes xxxti

knyghtes lette for thys cause that they wolde nat wratth them

if case be they had a do with sir Launcelot And the iiij knyghtes

lette them passe to thys entente that they wolde se and be holde

what they wolde do with sir Launcelot And so the xxxt knyghte

paste on and cam by sir Trystram and by sir Dynadan And Þan

sir Trysramys cryed on hyght lo here ys a knyght a yenste

you for the love of sir Launclot  And there he slew ij with a speare

and x with hys swerde And than cam In sir Dynadan and

he ded passyng well And so of the xxxt knyghtes there yoode


f. 208 (IX.23-4)

 

but x a way and they fledde And all thys batayle saw sir Bors

de ganys and hys iij felowys and than they saw well hit was

the same knyght that Justed with hem at the brydge Than they

toke Þer horsys and rode vnto sir Trystramys and praysed hym

and thanked hym of hys good dedys And they all desyred Sir

Trystram to go with them to Þer lodgynge And he seyde he wold

nat go to no lodgynge Than they iiij· knyghtes prayde hym to

telle hys name Fayre lordys seyde sir Trystramys as at thys

tyme I woll nat telle you my name Than sir Trystram and sir

Dynadan rode forth Þer way tylle they cam to shyperdis and to

herde men and there they asked them if they knew ony lodgyng

there nere honde Sir seyde the herde men here by ys good her//

berow in a castell but there ys such a custom that Þer shall no

knyght herberow there but if he Juste with ij knyghtes and if

he be but o knyght he muste Juste with ij knyghtes and as ye

be sone shall ye be macched Ther ys shrewde herborow seyde

sir Dynadan lodge where ye woll for I woll nat lodge there // Fye

for shame seyde sir Trystramys ar ye nat a knyght of the table

rounde where fore ye may nat with your worship reffuse your lod//

gynge // Not so seyde the herde men for and ye be beatyn and haue

the warse ye shall nat be lodged there and if ye beate them ye shall

well be herberowed // A seyde sir Dynadan I vndirstonde they ar

ij good knyghtes Than sir Dynadan wolde nat lodge there in no

maner But as sir Trystramys requyred hym of hys knyghthode

and so they rode thydir and to make shorte tale sir Trystram and

sir Dynadan smote hem downe bothe and so they entirde in to

the castell and had good chere as they cowde thynke or devyse

And whan they were vnarmed and thouȝt to be myry and

in good reste There cam In at the yatis sir Palomydes and sir

Gaherys requyryng to haue the cusum of castell // what a

ray ys thys seyde sir Dynadan I wolde fayne haue my reste


f. 208v (IX.24)

 

That may nat be seyde sir Trystram Now muste we nedis defende Þe

custum of thys castell in so much as we haue the bettir of Þis lordes

of thys castell And there for seyde sir Trystram nedis muste ye

make you redy // In the devyls name seyde sir Dynadan cam I in

to youre company and so they made them redy And sir Gaherys

encountirde with sir Trystram and sir Gaherys had a falle And

sir Palomydes encountirde with sir Dynadan and sir Dynadan

had a falle than was hit falle for falle So than muste Þey fyȝt

on foote And that wolde nat sir Dynadan for he was sore bru//

sed of that falle that sir Palomydes gaff hym // Than sir Trys//

tramys laced on sir Dynadans helme and prayde hym to helpe

hym / I woll nat seyde sir Dynadan for I am sore wounded of

the xxxti knyghtes that we had a do with all But ye fare

seyde sir Dynadan as a man were oute of hys mynde Þat wold

caste hym selff a way and I may curse the tyme that euer I sye

you for in all the worlde ar nat such ij knyghtes that ar so

wood as ys sir Launcelot and ye sir Trystram for onys I felle

in the felyshyp of sir Launclot as I haue done now with you and he

sette me so a worke that a quarter of a yere I kept my bedde

Jhu deffende me seyde sir Dynadan frome such ij knyghtys

and specially frome youre felyshyp Than seyde sir Trystram

I woll fyght with hem bothe And anone sir Trystram bade

hem com forthe bothe for I woll fyght with you Than sir Palo//

mydes and sir Gaherys dressed and smote at hem bothe Than

sir Dynadan smote at sir Gaherys a stroke or ij and turned

frome hym Nay seyde sir Palomydes hit ys to much shame

for vs ij knyghtes to fyght with one And than he ded bydde

Sir Gaherys stonde a syde with that knyght that hath

no lyste to fyght Than they rode to gydirs and fought longe

and at the laste sir Trystram doubled hys stroke and drove

sir Palomydes a bak more than iij stryddys And Þan by


f. 209 (IX.24-5)

 

one assente sir Gaherys and sir Dynadan wente be twyxt them &

departed them in sundir And than by the assente of sir Trystramys

they wolde haue lodged to gydirs But sir Dynadan seyde he wold

nat lodge in that castell and than he cursed the tyme that euer

he com in theyre felyship and so he toke hys horse and hys har//

neyse and departed Than sir Trystram prayde tho lordys of that

castell to lende hym a man to brynge hym to a lodgynge And

so they ded and ouer toke sir Dynadan and rode to hir lodgynge

ij myle thens with a good man in a pryory and there they

were well at ease And that same nyght Sir Bors and sir

Bleoberys and sir Ector and sir Dryaunte a bode stylle in Þe

same place there as sir Trystram faught with sir Trystramys

xxxti knyghtes and there they mette with sir Launcelot Þe same

nyght and had made promyse to lodge with sir Coll grevaunce

the same nyght But anone as sir Launcelot harde of the

shylde of Cornwayle he wyste well hit was sir Trystram

that had fought with hys enemyes And than sir Launclot

praysed sir Trystram and called hym the man of moste wor//

shyp in the wollde worlde // So there was a knyght in that

pryory that hyght sir Pellynore and he desyred to wete

the name of sir Trystram but in no wyse he coude nat // And

so sir Trystram departed and leffte sir Dynadan in that pryory

for he was so wery and so sore brused that he myght nat ryde

Than thys knyght sir Pellynore seyde vnto sir Dynadan sith

that ye woll nat telle me that knyghtes name I shall ryde affter

hym and make hym to telle me hys name oÞer he shall dye

Þer fore // yet be ware sir knyght seyde sir Dynadan for and

ye folow hym ye woll repente hit // So that knyght Sir

Pellynor rode aftir sir Trystram and requyred hym of Justis

Than sir Trystram smote hym downe and wounded hym


f. 209v (IX.25)

 

thorow the shulder and so he paste on hys way And on the nexte

day folowynge sir Trystram mette with pursyvauntis And they

tolde hym that there was made a grete crye of turnemente

be twener kynge Carados of scotlonde and the kynge of north//

galys and aythir shulde Juste a gayne othir a fore the castell

of maydyns and thes pursyvauntis sought all the contrey

aftir good knyghtes and in especiall kynge Carados lete

make grete sykynge for sir Launcelot And the kynge of north//

gyalis lete seke specially for sir Trystramys delyones And at

that tyme sir Trystramys thought to be at that Justis And

so by aduenture they mette with sir Kay the senesciall

and sir Sagramoure le desirous and sir kay requyred syr Trys//

tram to Juste and sir Trystram in a maner refused hym by

cause he wolde nat be hurte nothir brused a yenste the grete

Justis  that shuld be fore the castell of maydyns And Þer fore

he thought to reste hym and to repose hym And all way

sir kay cryed sir knyght of Cornwayle iuste with me othir ellys

yelde the to me as recreaunte // whan sir Trystram herd hym

sey so he turned vnto hym and than sir kay refused hym

and turned hys backe Than sir Trystram sayde as I fynde

the I shall take the Than sir kay turned wth evyll wyll and

Sir Trystram smote sir Kay downe and so he rode forthe

Than sir Sagramoure le desirous rode aftir sir Trystram

and made hym to Juste with hym And there sir Trystram smote

downe sir Sagamoure frome hys horse and rode hys way

and the same day he mette with a damesell that tolde

hym that he sholde wynne grete worshyp of a knyght

aventures that ded much harme in all that contrey //

Whan sir Trystramys herde her sey sohe was glad to go

with her to wyn worshyp And so sir Trystram rode with that


f. 210 (IX.25-6)

 

damesell a vj· myle And than there mette with hym sir Gawayne

and there with all the Sir Gawayne knew the damesell Þat

she was longynge to quyne Morgan le fay Than sir Gaw//

ayne vndirstood that she lad that knyght to som myschyeff //

And sayde fayre knyght whothir ryde ye now with Þe dame//

sell // Sir seyde sir Trystram I wote nat whothir I shall ryde

but as thys damesell woll lede me Sir seyde sir Gawayne

ye shall nat ryde with her for she and her lady ded neuer goode

but yll And than sir Gawayne pulled oute hys swerde and seyde

damesell but yf Þou telle me anone for what cause Þou

ledyst thys knyght Þou shalt dye for hit ryght anone for

I know all youre ladyes treson and yourys // A mercy

sir Gawayne seyde she and yff ye woll save my lyff I woll telle

you // Say on seyde sir Gawayne and thou shalt haue thy lyff

Sir she seyde quene Morgan my lady hath ordayned a xxxti

ladyes to seke and aspye aftir sir Launcelot or aftir sir Trystram

and by the traynys of thes ladyes who that may fyrste mete

ony of thes ij knyghtes they shulde turne hem vnto Morgan

le fayes castell sayyng that they sholde do dedys of worship And

yy fony of Þo ij knyghtes cam there be xxxt knyghtes liyng and

watchyng in a towre to wayte vppon sir Launcelot or vppon

Sir Trystramys // Fy for shame seyde sir Gawayne that evir

such false treson sholde be wrought or vsed in a quene and a

kyngys systir and a kynge and a quenys douȝtir

Sir seyde sir Gawayne wyll ye stonde with me and we

woll se the malyce of thes knyghtes Sir seyde sir

Trystram go ye to them and hit please you And ye shall se

I woll nat fayle you for hit ys not longe a go syn I and

a felow mette with xxxti of the quenys felyship And god

spede vs so that we won a way with worship So than


f. 210v (IX.26)

 

sir Gawayne and sir Trystram rode towarde the castel where

Morgan le fay was and euer sir Gawayne demed that he was sir

Trystram de lyones by cause he hard that ij knyghtes had slayn

and beatyn xxxti knyghtes And whan they cam a fore Þe cas//

tell Sir Gawayne spake on hyght and seyde quene Morgan

sende oute your knyghtes that ye haue layde in wacche for

sir Launcelot and for sir Trystram · Now seyde sir Gawayne I

know youre false treson and all placis where that I ryde

shall know of youre false treson And now lat se seyde Sir

Gawayne whethir ye dare com oute of youre castell ye xxxti

knyghtesThan the quene spake and all the xxxti knyghtes

at onys and seyde A sir Gawayne full well wotist Þou what

Þou dost and seyst for pride we know the passyng well But

all that Þou spekyst and doyst Þou sayste hit vppon pryde

of that good knyght that ys there with the For Þer be som

of vs know the hondys of that good knyght ouer all well

And wyte Þou well sir Gawayne the knyght that beryth

the armys of Cornwayle we know hym and what he ys

Than sir Gawayne and sir Gaw Trystram departed and rode

on Þer wayes a day or ij to gydirs and there by aduenture

they mette with sir Kay and with sir Sagramour le desyrous

and than they were glad of sir Gawayne and he of them

But they wyst nat what he was with the shylde of Cor//

nwayle but by demyng and thus they rode to gydirs a

day or too And than they were ware of sir Breuse saunȝ

pite chasyng a lady for to haue slayne her for he had slayn

her paramour a fore holde you all stylle seyde sir Gawayne and

shew none of you forth and ye shall se me rewarde yonder

false knyght for and he aspye you he ys so well horsed Þat

he woll ascape a way And than sir Gawayne rode be twyxt

 

f. 211 (IX. 26-7)

 

sir Breuse and the lady and sayde false knyght leve her and haue

a do with me // So whan sir Brewse saw no man but Sir

Gawayne he feautred hys speare and sir Gawayne ayenste

hym And there sir Breuse ouerthrew sir Gawayne and Þan he

rode hym and ouertwarte hym xxti tymys to haue destroyed

hym and sir Trystram saw hym do so vylaunce a dede he

hurled oute a yenste hym // And whan sir Breuse hym saw

with the shylde of Cornwayle he knew hym well that hit

was sir Trystram and than he fledde and sir Trystrams folowed

hym And so sir Breuse was so horsed that he wente hys

way quyte And sir Trystram folowed hym longe affter for he

wolde fayne haue bene avenged vppon hym And so whan he

had longe chaced hym he saw a fayre well and thydir he rode

to repose hym and tyed hys horse tylle a tre And Þan he pul/

led of hys helme and waysshed hys vysayge and hys hondes

and so he felle on slepe And so in the meane whyle cam a //

damesell that had souȝt sir Trystram many wayes and dayes

with In thys londe And whan she cam to the welle she

loked vppon hym and had forgotyn hym as in remem//

braunce of sir Trytrames but by hys horse she knew hym

that hyght Passe Brewell that had ben hys hors many

yerys for whan he was madde in the foreyste sir Fergus

kepte hym // So thys lady dame Brangwayne a bode stylle

tylle he was a wake And whan she saw hym a waked

she salewed hym and he her agayne for aythir knew oÞer

of olde acqueyntaunce Than she tolde sir Trystram how she

had sought hym longe and brode and there she tolde hym

how she had lettirs frome the quene la beall Isode Than a

none seyde lady dame Brangwayne ye shall ryde with me

tylle the turnemente be done at the castell of maydyns // And


f. 211v (IX. 27)

 

than shall ye beare lettirs and tydynges with you And than sir Trystram

toke hys horse and sought lodgynge and there he mette with a good

aunciaunte knyght and prayde hym to lodge with hym Ryght

so com Gouernayle vnto sir Trystram that was glad of the

commyng of the lady And thys olde knyghtes name was Sir

Pellownes and he tolde hym of the grete turnemente that

shulde be at the castell of maydyns And there sir Launcelot

and ij· & xxti knyghtes of hys blood haue ordayne shyldis of

Cornwayle And ryght so there com one vnto sir Pellownes

and tolde hym that sir Persides de Bloyse was com home

Than that knyght hylde vp hys hondys and thanked god

of hys commyng home And there sir Pellownes tolde Sir

Trystram that of ij yere a fore he had nat sene hys son Sir

Persydes Sir seyde sir Trystramys I know youre son well I

nowȝ for a good knyght And so one tyme sir Trystramys

and sir Persydes com to Þer lodgyng both at onys And so they

vnarmed hym and put vppon them such clothyng as Þey

had And than thes ij knyghtes ech well comyd oÞer And whan

sir Persides vndirstood Þat sir Trystram was of Cornwayle he

seyde he was onys in Cornwayle and there I Justed be fore

kynge Mark and so hit happened me at that same day to

ouer throw x· knyghtis And than cam to me sir Trystramys

de lyonas and ouer threw me and toke my lady fro me and Þat

shall I neuer for gete but I shall remembir me and euer I se my

tyme // A sayde sir Trystram now I vndirstonde that ye hate

sir Trystram what deme you that sir Trystram ys nat able to

withstonde youre malyce // yes seyde sir Persydes I know well

that sir Trystram ys a noble knyght and a muche bettir

knyght than I am yet I shall nat owȝe hym my good wyll


f. 212 (IX.27-8)

 

Ryght as they stood thus talkynge at a bay wyndow of Þat castell

they sye many knyghtes ryde to and fro toward the turnemente

And than was sir Trystram ware of a lykly knyght rydyng

vppon a grete blacke horse and a blacke couerde shylde // what

knyght ys that seyde sir Trystram with the blacke shylde and Þe

blacke horse I know hym well seyde sir Persides he ys one of

the beste knyghtes of the worlde Than hit ys sir Launcelot seyde

sir Trystramys Nay seyde sir Persides hit ys sir Palomydes that

ys yett on crystynde Than they saw muche people of the contrey

salew sir Palomydes and seyde with a lowde voice Jhu save

the and kepe the Þou noble knyght sir Palomydes and with In a

whyle aftir there cam a squyer of that castell that tolde sir Pe//

lownes that was lorde of that castell that a knyght with a blacke

shylde had smyttyn downe xiij knyghtes // Now fayre broÞer seyde sir

Tystram vnto sir prosydes lat vs caste on vs lyght clokys & lat

vs go se that play Nat so seyde sir Persides we woll nat go lyke

knavys thydir but we woll ryde lyke men and as good knyȝtes

to withstonde oure enemyes So they armed them and toke Þer

horsys and grete spearys and thydir they rode there as many

knyghtes assayed them selff by fore the turnemente And anone

sir Palamydes saw sir Persides and than he sente a squyar vnto

hym and seyde go Þou to the yondir knyght with the grene shyld

and there In a lyon of gooldys and say hym I requyre hym

to Juste with me and telle hym that my name ys sir Palo//

mydes whan sir Persides vndirstood the rekeyst of sir Palomy//

des he made hym redy and there a none they mette to gydirs

But sir Persides had a falle Than sir Trystram dressed hym to

be revenged vppon sir Palomydes And that saw sir Palomy//

des that was redy and so was nat sir Trystram and toke hym

at a vauntayge and smote hym ouer hys horse tayle whan


f. 212v (IX.28)

 

he had no speare in hys reste Than sterte vp sir Trystram and toke

horse lyghtly and was wrothe oute of mesure and sore a shamed

of that falle Than sir Trystramys sente vnto sir Palomydes

by Gouernayle and prayde hym to Juste with hym at hys rekeyste

Nay seyde sir Palomydes as at thys tyme I woll nat Juste with

that knyght For I know hym bettir Þan he wenyth And if he      

be wroth· he may ryght hit to morne at the castell may//        

dyns where he may se me and many oÞer knyghtes // So with         

that cam sir Dynadan And whan he saw sir Trystram wroth          

he lyste nat to Jape but seyde lo sir Trystram here may a man           

preve he be neuer so good yet may he haue a falle And he was              

neuer so wyse but he myght be ouer sayne and he rydyth well                

that neuer felle // So sir Trystram was passyng wrothe and seyde                  

to sir Persides and to sir Dynadan I woll revenge me // Ryght so

as they stoode talkynge there cam by sir Trystram a lykly knyȝt

rydyng passyng sobirly and hevyly with a blacke shylde // what

knyght ys that seyde sir Trystram vnto sir Persides I know hym

well seyde sir Persides for hys name ys sir Bryaunte of northe

walis and so he paste on a monge oÞer knyghtes of north walis

And there com In sir Launcelot de lake with a shylde of Þe armys

of Cornwayle and he sente a squyer vnto sir Bryaunte & requy//

red hym to Juste with hym well seyde sir Bryaunte sytthyn

that I am requyred to Juste I woll do what I may And there

sir Launcelot smote downe sir Bryaunte frome hys horse a grete

falle And than sir Trystram mervayled what knyght he was

that bar the shylde of Cornwayle // Sir what so euer he be he

seyde sir Dynadan I warraunte he ys of kynge Bannys

blode whych bene knyghtesof the nobelyst proves in Þe worlde

for to accompte so many for so many Than Þer cam In jj knyȝtes

of north galys that one hyȝt sir Hew de la mountayne and

 

 

 

                                                            the oÞer sir

f. 213 (IX.28-9)

 

the oÞer sir Madok de la mountayne and they chalenged sir Launcelot

foote hote // Sir Launcelot nat refusynge hem but made hym

redy And with one grete speare he smote downe bothe ouer Þer

horse taylis and so sir Launcelot rode hys way By the good lorde

seyde sir Trystram he ys a good knyght that beryth the shylde

of Cornwayle and me semyth he rydith on the beste maner Þat euer

I saw knyght ryde Than the kynge of north galis rode vnto

sir Palomydes and prayed hym hartely for hys sake to Juste

with that knyght that hath done vs of Northgalis dispite Sir

seyde sir Palomydes I am full lothe to haue a do with that knyȝt

and cause why as to morne the grete turnemente shall be And

there fore I wolde kepe my selff freyssh be my wyll // Nay seyde

the kynge of North galis I pray you requyre hym of Justis Sir

seyde sir Palomydes I woll Juste at youre requeste and requyre

that knyght to Juste with me And oftyn I haue seyne aman

at hys owne requeste haue a grete falle Than sir Palomydes

sente vnto sir Launcelot a squyre and requyred hym to Juste //

Fayre felow seyde sir Launcelot telle me thy lordis name Sir my

lordys name ys sir Palomydes the good knyght In good owre

seyde sir Launclot for there ys no knyght I saw thys vij yere

that I had levir haue a do with all and so ayÞer knyghtes

made them redy with ij grete spearys // Nay seyde sir Dynadan

ye shall se that sir Palomydes woll quyte hym ryght well Hyt

may be so seyde sir Trystram but I vndir take that knyght with

the shylde of Cornwayle shall gyff hym a falle I be leve hit

nat seyde sir Dynadan Ryght they spurred Þer horsis & feautred

Þer spearys and aythir smote oÞer And sir Palomydes brake a

speare vppon sir Launclot and he sate and meved nat But sir Launclot

smote hym so harde that he made hys horse to avoyde Þe sadill


f. 213v (IX.29-30)

 

And the stroke brake hys shylde and the hawbarke and had he nat

fallyn he had be slayne // How now seyde sir Trystram I wyst well

by the maner of Þer rydynge bothe that sir Palomydes shulde haue

a falle // Ryght so sir Launcelot rode hys way and rode to a well to

drynke and repose hym And they of northgalis aspyed hym

whoÞer he wente And than Þer folowed hym xij· knyghtes for to

haue myscheved hym for thys cause that vppon the morne at Þe

turnemente at the castell of maydyns that he sholde nat wyn

the victory So they com vppon sir Launcelot suddeynly and

vnnethe he myght put on hys helme and th take hys horse

but they were in hondis with hym And than sir Launcelot

gate hys speare in hys honde and ran thorow them and Þer

he slew a knyght and brake hys speare in hys body Than

he drew hys swerde and smote vppon the ryght honde & vppon

the lyffte honde that with In a few strokis he had slayne

er iij· knyghtes and the remenaunte that a bode he wounded

hem sore all that ded a byde Thus sir Launcelot ascaped fro

hys enemyes of northe walis And than sir Launclot rode hys

way tylle a frynde and lodged hym tylle on the no morowe

for he wolde nat the firste day haue a do in the turnemente

by cause of hys grete laboure And on the first day he was

with kynge Arthur there as he was sette on hye vppon a

chafflet to dscerne who was beste worthy of hys dedis So

sir Launcelot was with kynge Arthur and Justed nat Þe first day

Here begynnyth Þe turnement of Þe castel· maydyns de lyones Þat com

Now turne we vnto sir Trystramys de lyones Þat com

maunded Gouernayle hys seruante to ordayne hym

a blacke shylde with none oÞer remembraunce Þer In And so

sir Persides and sir Trystramys departed from sir Pellownes

and they rode erly toward the turnemente and then Þey


f. 214 (IX. 30)

 

drew them to kynge Carydos syde of Scotlonde And anone knyȝtes

be gan the filde what of the kynge of northgalys syde And

of kynge Carydos and there be gan a grete party // Than Þer was

hurlyng and russhyng Ryght so cam In sir Persides and Sir

Trystram and so they ded fare that day that they put Þe kynge

of north·galis a backe Than cam In sir Bleoberys de ganys

and sir Gaherys with them of north galis And than was Sir

Persides smyttyn a downe and all moste slayne for mo than

xl· horse men wente ouer hym For sir Bleoberys ded grete dedes

of armys And sir Gaherys fayled hym not // Whan sir Trystram

be hylde them and sye them do such dedis of armys he mer//

valyed what they were // Also sir Trystram thouȝt shame that

sir Persides was so done to And than he gate a grete speare

in hys honde and rode to sir Gaherys and smote hym down

frome hys horse And than sir Bleoberys was wrothe and

gate a speare and rode a yenste sir Trystram in grete Ire And

there sir Trystram smote sir Bleoberys frome hys horse

So than the kynge with the C· knyghtes was wrothe and

he horsed sir Bleoberys and sir Gaherys a gayne and Þer be

gan a grete medle And euer sir Trystram hylde them passyng

shorte And ouer sir Bleoberys was passyng bysy vppon Sir

Trystram And there cam In sir Dynadan a yenst sir Trystram

and sir Trsytram gaff hym such a buffette that he sowned

vppon hys horse And so anone sir Dynadan cam to sir

Trystram and seyde sir I know the bettir Þan Þou wenyst

But here I promyse the my trouth · I woll neuer com a gaynst

the more for I promyse the that swerde of thyne shall neuer

com on my helme So with that com sir Bleoberys and

sir Trystram gaff hym such a buffet Þat downe he a baysshed


f. 214 (IX. 30-1)

 

hys hede and than he raught hym so sore by the helme Þat he pulled

hym vndir hys feete And than kyng Arthure blew to lodgyng

Than sir Trystram departed to hys pavylion and sir Dynadan rode

with hym And sir Persides And kynge Arthure than and the

kyngis vppon bothe partyes mervalyed what knyght that was

with the blacke shylde Many knyghtis seyde Þer avyse and som

knew hym for sir Trystram and hylde Þer peace and wolde nat say

So that firste day kynge Arthure and all the kynges and lordis

that were Juges gaff sir Trystram the pryce How be hyt they

knew hym nat but named hym the knyght with the blacke

shylde Than vppon the morne sir Palomydes returned from Þe

kynge of northe galis and rode to kynge Arthurs syde where

was kynge Carados and the kynge of Irelonde And sir Laun//

celottis kynne And sir Gawaynes kynne So sir Palomydes sent

the damsell vnto sir Trystram that he sente to seke hym

whan he was oute of hys mynde in the foreyst And this

damesell asked sir Trystramys what was hys name and what

he was / As for that telle sir Palomydes that he shall nat

wete as at thys tyme vnto the tyme I haue brokyn ij spearys

vppon hym But lat hym wete thys much that I am the

same knyght that he smote downe in the ouer evenynge

at the turnemente and telle hym playnly on what party

that he b· I woll be of the contrary party Sir seyde the dame//

sell ye shall vndirstonde that sir Palomydes woll be on

kynge Arthurs party where the moste noble knyghtes of Þe

worlde be // In the name of god seyde sir Trystram Than woll

I be with the kynge of northe galis be cause of sir Palomy//

des woll be on kynge Arthurs syde and ellis I wolde nat

but for hys sake So whan kyng Arthure was com Þey

blew vnto the fylde and than there be gan a grete party


f. 215 (IX.31)

 

And so kynge Carados Justed with the kynge with the C· knyȝtes

and there kynge Carados had a falle Than was Þer hurlyng

and russhynge And ryght so com In knyghtes of kyng Arthurs

and they bare on se bak the kynge of north galis knyȝtes

Than sir Trystram cam In and be gan so rowȝly and so bygly

that Þer was none myght withstonde hym And thus he endu//

red longe And at the laste by fortune he felle a monge Þe

felyshyp of kyng Ban So Þer fylle vppon hym sir Bors de

ganys and sir Ector de marys and sir Blamour de ganys and

many othir knyghtes And than sir Trystram smote on Þe ryȝt

honde and on the lyffte honde that all lordis and ladyes

spake of hys noble dedis But at the last sir Trystram sholde

haue had the wars had nat the kynge with the C· knyghtes

bene And than he cam with hys felyshyp and rescowed sir

Trystram and brought hym a way frome the knyghtes that

bare the shyldis of Cornwayle And than sir Trystram saw

a noÞer felyship by them selff and there was a xl· knyghtes

to gydir And Þer kay le senescial· was Þer gouernoure Than sir

Trystram rode in a mongyst them and there he smote

downe sir Kay frome hys horse and there he fared a monge

tho knyghtis as a grehounde a monge Conyes Than sir

Launcelot founde a knyght that was sore wounded vppon

the hede // Sir seyde sir Launclot who wounded you so sore Sir he

seyde a knyght that bearyth a blacke shylde and I may curse

the tyme that euer I mette with hym for he ys a devyll and

no man So sir Launcelot departed frome hym and thouȝt to

mete with sir Trystram and so he rode with hys swerde I

drawyn in hys honde to seke sir Trystram and Þan he aspyed

hym hurlynge here and there And at euer stroke sir Trystram


f. 215v (IX.31)

 

well nyȝe smote downe a knyght // A mercy Jhu seyde sir Launcelot

syth the firste tyme that euer I bare armys saw I neuer one knyȝt

do so mervaylous dedys of armys And If I sholde seyde sir Launclot

to hym selff sette vppon thys knyght now I ded shame to my

selff And there with all sir Launclot put vp hys swerde And

than the kynge with the C knyghtes and an C mo of north·

walis sette vppon the xxti knyghtes hylde Þem euer to gydir as

wylde swyne and none wolde fayle oÞer So sir Trystram whan

he be hylde the nobles of thes xxti knyghtes he mervayled

of Þer good dedys for he saw by Þer fare and rule that Þey had

levyr dye than to avoyde the fylde // Now Jhu seyde sir Trystram

well may ye be called valyaunte and full of proves Þat hath

such a sorte of noble knyghtes vnto hys kynne And full lyke

ys he to be a noble man that ys Þer leder and gouernoure

he mente hit by sir Launcelot du lake // So whan sir Trystram

had be holde them longe he thought same to se ij C· knyȝtes

batteryng vppon xxti knyghtes Than sir Trystram rode vnto

the kynge with the C· knyghtes and seyde sir leve your fyȝtynge

with Þo xxti knyghtes for ye wynne no worship of them ye

be so many and they so feaw and wyte you well Þey woll

nat oute of the fylde I se by Þer chere and countenaunce Þat

worship get you none and ye sle them There fore leve your

fyghtynge with them For I to encrese my worship I woll

ryde vnto the xxti knyghtes and helpe them with all my myȝt

and power Nay seyde the kynge with the C· knyghtes

ye shall nat do so now I se youre corayge and curtesye I

woll with draw my knyghtes for youre plesure for euer more

a good knyght woll favoure anoÞer and lyke woll draw


f. 216 (IX.31-2)

 

to lyke Than the kynge with the C knyghtes with drew

hys knyghtes and all thys whyle and longe to fore Sir

Launcelot had wacched vppon sir Trystram in veary

purpose to haue felyshipped with hym And Þan suddeynly

sir Trystram sir Dynadan and Gouernayle hys man rode Þer way

in to the foreyste that no man perceyved where they wente //

So than kynge Arthure blew vnto lodgynge and gaff the

kynge of northgalis the pryce by cause sir Trystram was vppon

hys syde // Than sir Launcelot rode here and there as wode as

a lyon that fauȝted hys fylle be cause he had loste sir Trystram

and so he returned vnto kynge Arthure And than all Þe felde

was In a noyse that with the wynde hit myght be harde ij·

myle how the lordys and ladyes cryed the knyght with Þe blacke

shylde hath won the fylde // Alas seyde kynge Arthure where

ys that knyght be com hit ys shame to all Þo in the fylde so

to lette hym ascape a way frome you but with Jantylnes & cteyse

ye myght haue brought hym vnto me to thys castell of may//

dyns Than kynge Arthur wente to hys knyghtes & comforted

them and seyde my fayre felowis be nat dismayde Þouȝe ye

haue loste the fylde thys day and many were hurte & sore

wounded and many were hole My felowys seyde kyng Arthur

loke that ye be of good chere for to morn I woll be in Þe fylde

with you and revenge you of youre enemyes / So that nyȝt

kynge Arthure and hys knyghtes reposed them selff So the

damesell that com frome la beall Isod vnto sir Trystram

all the whyle the turnement was a doyng she was with

quyene Gwenyuere and euer the quene asked her for what

cause she cam in to that contrey Madame she answerde I

com for none oÞer cause but frome my la beall Isode to wete

of youre well fare for in no wyse she wold nat telle Þe quene


f. 216v (IX.32)

 

that she cam for sir Trystramys sake So thys lady dame Brangwayn

toke hir leve of quene Gwenyuer and she rode aftir sir Trystram and as

she rode thorow the foreyste she harde a grete cry Than she commaun//

ded hir squyar to go in to that foreyste to wyte what was that

noyse and so he cam to a welle and there he founde a knyght

bounden tyll a tre cryyng as he had bene woode and his horse

and hys harneys stondyng by hym And whan he aspyed

the squyar with a brayde he brake hym selff lowse and toke

hys swerde in hys honde and ran to haue slayne that squyer

Than he toke hys horse and fledde to dame Brangwayne &

tolde hir of hys aduenture Than she rode vnto sir Trystramys

pavylon and tolde sir Trystram what aduenture she had founde

in the foreyste A las seyde sir Trystram vppon my hede Þer ys som

good knyght at myschyff Than sir Trystram toke hys horse

and hys swerde and rode thyder and there he harde how the

knyght complayned vnto hym selff and sayde I wofull knyȝt

sir Palomydes what mysse aduenture be fallith me Þat thus

am defoyled with falsehed and treson thorow sir Bors and sir

Ector Alas he sayde why lyve I so longe And than he gate his

swerde in hys honde and made many straunge sygnes and

tokyns and so thorow the rageynge he threw hys swerd in Þat

fountayne Than sir Palomydes wayled and wrange hys

hondys and at the laste for pure sorow he ran in to that

Fountayne and sought aftir hys swerde Than sir Trystram

saw that and ran vppon sir Palomydes and hylde hym in

hys armys faste What art Þou seyde sir Palomydes Þat

holdith me so I am a man of thys foreyste that wold Þe none

harme Alas seyde sir Palomydes I may neuer wyn worship

where sir Trystram ys for euer where he ys and I be there 


f. 217 (IX.32-3)

 

gete I no worshyp and yf he be there a way for the moste party I haue

the gre onles that sir Launcelot be there othir ellis sir Lamerok Than

sir Palomydes sayde onys in Irelonde Sir Trystram put me to Þe wors

and a nothir tyme in Cornwayle and in oÞer placis in thys londe what

wolde ye do seyde sir Trystram and ye had sir Trystram I wolde

fyght with hym seyde sir Palomydes and ease my harte vppon

hym and yet to say the sothe Sir Trystram ys the Jantyllyste

knyght in thys worlde lyvynge // Sir what woll ye do seyde Sir

Trystram woll ye go with me to youre lodgyng // Nay he seyde

to the kynge with the C· knyghtes for he rescowed me frome sir

Bors de ganys and sir Ector and ellis had I bene slayne traytourly

And sir Trystram seyde hym such · kynde wordys that sir Palomy//

des wente with hym to hys lodgynge Than Gouernayle wente

to fore and charged dame Brangwayne to go oute of Þe way

to hir lodgynge And byd ye sir Persides that he make hym no

quarels And so they rode to gedirs tyll they cam to sir Trystram

ys pavylon And there had sir Palomydes all the chere that

myght be had all that nyght But in no wyse sir Trystram

myght nat be knowyn with sir Palomydes And so aftir souper

they yeode to reste and sir Trystram for grete travayle slepte

tylle hit was day // And sir Palomydes myght nat slepe for an//

gwysshe and so in the dawnyng of the day he toke hys horse

prevayly and rode hys way vnto Gaherys and to sir Sagra//

moure le desirous where the were in Þer pavylons for Þey iij

were felowis at the begynnynge of the turnemente And Þan

vppon the morne the kynge blew vnto the turnemente vp//

pon the third day ~  ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~

So the Kynge of Northe galis and the kynge of the

C· knyghtes they ij encountird with kynge Carados

and the kynge of Irelonde and there the kynge with Þe C· knyghtes


f. 217v (IX.33)

 

smote downe kynge Carados and the kynge of north galis smote

downe the kynge of Irelonde So with that cam In sir Palomydes

and he made grete worke for by hys endented shylde he was

well knowyn So Þer cam In kynge Arthur and ded grete dedis

of armys to gydirs and put the kynge of north galis & Þe kyng

with the C· knyghtes to the wars // So with cam In sir Trystram

with hys blak shylde and anone he Justed with sir Palomydes

ouer his horse croupe Th And there by fyne force sir Trystram

smote sir Palomydes ouer hys horse croupe Than kynge Arthure

cryed knyght with the blacke shylde make the redy to me And

in the same wyse sir Trystram smote kynge Arthure And than

by forse of kynge Arthurs knyghtes the kynge and sir Palomy//

des were horsed a gayne Than kynge Arthur with a grete

egir harte he gate a grete speare in hys honde and Þer vppon

the one syde he smote sir Trystram ouer hys horse Than foote

hote sir Palomydes cam vppon sir Trystram as he was vpppon

foote to haue ouer ryddyn hym Than sir Trystram was ware off

hym and stowped a lytyll a syde and with grete Ire he gate

hym by the arme and pulled hym downe frome hys horse

Than sir Palomydes lyghtly a rose and daysshed to gydirs with

theire swerdys myghtyly that many kynges quenys lordys

and ladyes stoode and be helde them And at the last sir Trystram

smote sir Palomydes vppon the helme iij· myghty strokes & at euery

stroke that he gaff he seyde haue thys for sir Trystramys sake

And with that sir Palomydes felle to the erthe grovelynge

Than cam the kynge of the C knyghtes and brouȝt sir Trystram

an horse and so was he horsed a gayne And by that tyme

was sir Palomydes horsed and with grete Ire he Justed vp/

pon sir Trystram with hys speare as hit was in the reyste

And gaff hym a grete dayssh· with hys swerde Than sir 


f. 218 (IX.33-4)

 

Trystram a voyded hys speare and gate hym by the nek with hys

bothe hondis  and pulled hym clene oute of hys sadle and so he

bare hym a fore hym the lengthe of x spearys and Þan he

lete hym falle at hys aduenture Than sir Trystram was ware

of kynge Arthure with a naked swerde in hys honde And with

hys speare sir Trystram ran vppon kyng Arthure And Þan kyng

Arthure boldely a bode hym and with hys swerde he smote a to

hys speare And there with all sir Trystram was a stooned and

so kynge Arthure gaff hym iij· or iiij·strokis or he myght

gete oute hys swerde And so sir Trystram drew hys swerde and

aythir of them assayled othir passyng harde And with Þat the

grete prease departed Than sir Trystram rode here and there and

ded hys grete payne that a xij of the good knyghtes of the bloode

of kynge Ban that were of sir Launcelottis that day sir Trystram

smote downe that all the estatis mervayled of Þer grete dedis and

all people vppon the knyght with the blacke shylde // So thys cry

was so large that sir Launcelot harde hit and than he gate a

grete speare in hys honde and cam towardis the cry // Than

sir Launcelot cryed knyght with the blacke shylde make ye redy

to Juste with me // Whan sir Trystram harde hym sey so he gate

hys speare in hys honde and ayÞer a beysed Þer hedys downe

lowe and cam to gydir as thundir that sir Trystrams speare

brake in pecis And sir Launcelot by male fortune stroke sir Trys//

tram on the syde a depe wounde nyȝe to the dethe But yet

sir Trystram a voyded nat hys sadyll and so the speare brake

Þer with all And yete sir Trystram gate oute hys swerde and

he russhed to sir Launcelot and gaff hym iij· grete strokes vp//

pon the helme that Þe fyre sprange oute that sir Launcelot a

beysed hys hede low toward hys sadyll bow And so Þer with all

Trystam departed frome the fyde for he felte hym so wounded


f. 218v (IX.34)

 

that he wente he sholde haue dyed And sir Dynadan aspyed hym

and folowed hym in to the foreyste Than sir Launcelot a bode and

ded mervaylous dedys // So whan sir Trystram was departed by the

foreystis syde he a lyght and vnlaced hys harneys & freysshid

hys wounde Than wente sir Dynadan that he sholde haue dyed

and wepte Nay nay seyde sir Trystram neuer drede you sir Dynadan

for I am harte hole and of thys wounde I shall sone be hole

by the mercy of god // And anone sir Dynadan was ware where

cam sir Palomydes rydynge streyte vppon them Than sir Trystram

was ware that sir Palomydes com to haue destroyed hym And

so sir Dynadan gaff hym warnynge and seyde sir Trystram

my lorde ye ar so sore wounded that ye may nat haue a do

with hym there fore I woll ryde a gaynste hym and do to

hym what I may And yf I be slayne ye may pray for my soule

and som the meane whyle ye may with draw you and go

in to the castell or in to the foreyste that he shall nat mete with

you Sir Trystram smyled and seyde I thanke you sir Dynadan

But ye shall vndirstond that I am able to handyll hym And

a none hastely he armed hym and toke hys horse and a

grete speare in hys honde And seyde to sir Dynadan a dew

and rode toward sir Palomydes a soffte pace // whan sir Pa//

lomydes saw hym he a lyȝt and made a countenaunce to

a mende hys horse but he ded hit for thys cause for he a

bode sir Gaherys that cam aftir hym And whan he was

com he rode towarde sir Trystram Than sir Trystram sente vnto sir

Palomydes and requyred hym to Juste with hym And if he

smote downe sir Palomydes he wolde do no more to hym And

if sir Palomydes smote downe sir Trystram he bade hym do

hys vtteraunce And so they were accorded and mette to

gydirs And sir Trystram smote downe sir Palomydes that

f. 219 (IX.34-5)

 

he had a vylaunce falle and lay stylle as he had bene dede &

than sir Trystram ran vppon sir Gaherys and he wold nat haue

Justed but whethir he wolde or wolde nat sir Trystram smote hym

ouer hys horse croupe that he lay stylle And sir Trystram rode hys

way and lefft sir Persides hys squyar with in the pavelons

And sir Trystram and sir Dynadan rode to an olde knyghtes place

to lodge them and thys olde knyght had v· sonnes at Þe turnement

that prayde god hartely for Þer commynge home And so as the

freynshe booke sayeth they com home all v·well beatyn And

whan sir Trystram departed in to the foresyte sir Launclot hylde all

wayes the scowre lyke harde as a man araged that toke

none hede to hym selff and wyte you well there was many

a noble knyght a yenste hym // And whan kyng Arthure

saw sir Launcelot do so mervaylous dedis of armys he than

armed hym and toke hys horse and hys armour and rode in

to the fylde to helpe sir Launcelot and so many knyght cam with

kynge Arthur and to make shorte tale in conclusion the kyng

of north galis and the kynge of the C· knyghtes were put to

the wars And by cause sir Launcelot a bode and was the laste

in the fylde the pryse was gyvyn hym But sir Launcelot noÞer

for kynge quene noÞer knyght wolde Þer off And where Þe cry

was cryed thorow the fylde sir Launcelot hath wonne Þe filde

thys day Sir Launcelot made a noÞer cry contrary sir Trystram

hath· won the fylde for he be gan firste and lengyst hylde

on and so hath he done the firste day Þe secunde and Þe thirde

day Than all the astatis and of degrees hyȝe and lowe seyde

sir Launcelot grete worship for the honoure that he ded to sir

Trystram and for the honour doyng by sir Launcelot he was

at that tyme more praysed and renowned than he had

ouer throwyn v·C· knyghtes And all the peple hole for hys


f. 219v (IX.35)

 

Jantilnes firste the astatis hyȝe and lowe and after the comynalte at

onys cryed sir Launcelot hath won the gre who so euer sayth nay

Than was sir Launcelot wrothe and a shamed And so there with all

he rode to kynge Arthure Alas seyde the kynge we ar all dismayde

that sir Trystram ys thus departed frome vs / Parde seyde kynge Arthur

he ys one of the nobelyst knyghtes that euer I saw holde speare in

honde or swerde and the moste curtayse knyght in hys fyghtyng

for full harde I sye hym be stad seyde kynge Arthure whan he

smote sir Palomydes vppon the helme thryse that he a baysshed

hys helme with hys strokis And also he seyde here ys a stroke

for sir Trystram And Þus he seyde thryse Than kynge Arthure

and sir Launcelot and sir Dodynas le saveage toke Þer horsis to seke

aftir sir Trystram And by the meanys of sir Persides he had tolde

kynge Arthure where sir Trystramys pauylyon was But whan

ther cam there sir Trystram and sir Dynadan was gone Than

kynge Arthur and sir Launclot was hevy and returned a yen to

the castell maydyns makyng grete dole for the hurte of sir Trys//

tram and hys suddeyne departynge So god me helpe seyde kynge

Arthur I am more hevy that I can nat mete with hym than I and

for all the hurtys that all my knyghtes haue had at Þe turnement

And so furth· with cam sir Gaherys and tolde kynge Arthur

how sir Trystram had smytten downe sir Palomydes and hit was

at hys owne requeste Alas seyde kynge Arthur that was grete

dishonoure to sir Palomydes In as much as sir Trystram was so

sore wounded And may we all kyngis and knyghtes and men

of worship sey that sir Trystram may be called a knyght and

one of the beste knyghtes that euery saw dayes of my lyff for

I woll that ye all kyngis and knyghtes know seyde kynge Arthur

that I neuer saw knyght do so mervaylously as he hath done

thes iij dayes for he was the firste that be gan and lengyst

that hylde on save thys laste day And thouȝe he were hurte


f. 220 (IX.25-6)

 

hit was a manly aduenture of ij noble knyghtes And whan ij no//

ble men encountir nedis muste the tone haue the worse lyke as

god wyll suffir at that tyme // Sir as for me seyde sir Launcelot

for all the londys that euer my fadir leffte I wolde nat haue hurt

me sir Trystram and I had knowyn hym at that tyme that I hurte

hym for I saw nat hys shylde For and I had seyne hys blacke

shylde I wolde nat haue medled with hym for many causis seyde

sir Launcelot for but late he ded as muche for me as euer ded

knyght and that ys well knowyn that he had a do with xxxti

knyghtes And no helpe only save sir Dynadan And one thynge

shall I promyse you seyde sir Launcelot Sir Palomydes shall

repente hit as in hys vnknyghtly delynge so for to folow Þat

noble knyght that I be mys fortune hurte hym Þus So sir Launclot

seyd all the worhip that myȝt be spokyn by sir Trystram Than kyng

Arthure made a grete feste to all that wolde com And Þus we

lat passe kynge Arthure And a lityll we woll turne vnto sir

Palomydes that aftir he had a falle of sir Trystram he was nyȝe 

honde araged oute of hys wytte for despite of sir Trystram and

so he folowed hym by aduenture and as he cam by aryver in

hys woodnes he wolde haue made hys horse to haue lopyn

ouer the watir and the horse fayled footyng and felle in Þe ryuer

where fore sir Palomydes was a drad leste he shulde haue

bene drowned And than he avoyde hys horse and swam to

the londe an lete hys horse go downe by aduenture And

whan he cam to the londe he toke of hys harnys and sate

romynge and cryynge as a man oute of hys mynde // Ryght

so cam a damessell evyn by sir Palomydes that was sente

for sir Gawayne and hys brothir vnto sir Mordred that lay

syke in the same place with that olde knyght where sir Trystram

was For as the booke seythe sir Persides hurte so sir Mordred a


f. 220v (IX.36)

 

x· dayes a fore and had hit nat bene for the love of sir Gawayne

and hys brethirn sir Persides had slayne sir Mordred and so this da//

mysell cam by sir Palomydes and he and she had langage to gyder

whych pleased neythir of them and so thys damesell rode her

wayes tyll she cam to that olde knyghtes place And there she

tolde that olde knyght how she mette with the woodist knyght

by aduenture that euer she mette with all // what bare he in hys

shylde seyde sir Trystram Sir hit was endented with whyght and

blacke seyde the damesell A seyde sir Trystram that was Pala//

mydes the good knyght for well I know hym seyde sir Trystram

for one of the beste knyghtes lyvyng in thys realme Than Þat

olde knyght toke a lityll hakeney and rode for sir Palomydes

and brouȝt hym vnto hys owne maner And full well knew

sir Trystram hym but he sayde but lityll For at Þat tyme Sir

Trystram was walkyng vppon hys feete and well a mended

of hir hurtis / And all wayes whan sir Palomydes saw sir

Trystram he wolde be holde hym full mervaylously and euer

hym semed that he had sene hym Than wolde he sey vnto

sir Dynadan and euer I may mete with sir Trystram he shall nat

escape myne hondis / I mervayle seyde sir Dynadan Þat ye do

boste be hynde sir Trystram so for hit ys but late that he was in

youre hondys and ye in hys hondis why wolde ye nat holde

hym whan ye had hym for I saw my selff twyse or thryse

that ye gate but lytyll worship of sir Trystram Than was sir

Palomydes a shamed So leve we them a lityll whyle in the

castell with the olde knyght Sir Darras Now shall we

speke of kynge Arthure that seyde to sir Launcelot had nat

ye bene we had nat loste sir Trystram for he was here dayly

vnto the tyme ye mette with hym and In an evyll tyme seyde

kynge Arthure ye encountred with hym / My lorde Arthure

 

 

 

 

                                                            seyde sir


f. 221 (IX.36)

 

seyde sir Launcelot ye shall vndirstonde the cause ye put now vppon

me that I sholde be causer of hys departicion God knowith hit was

a yenste my wyll But whan men bene hote in dedis of armys

oftyn hit ys seyne they hurte Þer frendis as well as Þer foys And

my lorde seyde sir Launcelot ye shall vndirstonde that sir Trystram

ys a man that I am ryȝt loth to offende to for he hath done

more for me than euer y ded for hym as yet But than sir Laun//

celot mad brynge forthe a boke And Þan seyde sir Launclot here we

ar x· knyghtes that wol swere vppon thys booke neuer to reste one

nyght where we reste anoÞer thys xij month vntyll that we

fynde sir Trystram And as for me seyde sir Launcelot I promyse you

vppon thys booke that and I may mete with hym oÞer with fayrenes

othir with fowlnes I shall brynge hym to thys courte oÞer elles

I shall dye Þer fore And the namys of thes x knyghtes that had

vndirtake thys queste first was sir Launcelot sir Ector de marys

sir Bors de ganys and sir Bleoberys sir Blamour de ganys sir Lucan

de butler sir Vwayne sir Galyhud sir Lyonel · and sir Galyodyn So

thes x· noble knyghtes departed frome the courte of kynge Arthur

and so they rode vppon theire queste to gydirs tyll they com to a

crosse where departed iiij· wayes and there departed the felyship

in iiij to seke sir Trystram And as sir Launcelot rode by aduenture

he mette with dame Brangwayne that was sente in to that

contrey to seke sir Trystram and she fled as faste as her palfrey

myght go So sir Launcelot mette with her and asked why she

fled A fayre knyght seyde dame Brangwayne I fle for drede

of my lyff for here folowith me sir Breuse saunȝ pite to sle me

holde you nyȝe me seyde sir Launcelot And whan he sye sir Breuse

saunȝ pite cryed vnto hym and seyde false knyght destroyer of

ladyes and damesels now thy laste dayes be com Whan sir Breuse


f. 221v (IX. 36-7)

 

saunce pite saw sir Launcelottis shylde he knew hit well for at that tyme

he bare nat the shylde of Cornwayle but he bare hys owne And than

sir Breuse returned and fled and sir Launclot folowed aftir hym But

sir Breuse was so well horsed that whan hym lyst to fle he myȝt

fle whan he wolde and a byde whan he wolde And than sir Laun//

celot returned vnto dame Brangwayne & thanked sir Laun//

celot of hys curtesy and grete laboure

Now woll we speke of sir Lucan de butlere Þat by fortune

he cam rydynge to the same place there as was Sir

Trystram and In he cam for none oÞer entente but to aske her//

berow Than the porter asked what was hys name Sir telle

youre lorde that my name ys sir Lucan de butler a knyght of

the rounde table So the porter yode vnto sir Darras lorde of Þe

place and tolde hym who was there to aske herberow Nay

nay seyde sir Daname that was nevew vnto sir Darras

sey hym that he shall nat be lodged there But lat hym wete Þat

I sir Danam woll mete with hym anone and byd hym make

hym redy So sir Danam com forthe on horse back and Þer they met

to gydirs with spearys And sir Lucan smote downe sir Danam

ouer hys horse croupe And than he fled in to that place And sir Lucan

rode aftir hym many tymys Than sir Dynadan seyde to sir Trys/

tram hit ys shame to se the lordys Cousyne of thys place defoyled

A byde seyde sir Trystram and I shall redresse hit And in Þe meane

whyle sir Dynadan was on horse backe and he Justed with Sir

Lucan and he smote sir Dynadan thorow the thycke of thyghe

and so he rode hys way and sir Trystram was wroth Þat sir Dyna//

dan was hurte and he folowed aftir and thouȝt to avenge hym

and with In a whyle he ouer toke sir Lucan and bade hym turne

and so they mette to gydirs And sir Trystram hurte sir Lucane

passynge sore and gaff hym a falle // So with that com sir Vwayne

a Jantill knyght and whan he saw sir Lucan so hurte he called


f. 222 (IX.37)

 

to sir Trystram to Juste // Fayre knyght seyde sir Trystram telle me

youre name I requyre you // Sir knyght wite you well my name

ys sir Vwayne le fyȝe de roy Vreyne A seyde sir Trystram be my wylle

I wolde nat haue a do with you at no tyme // Sir ye shall nat do

so seyde sir Vwayne but ye shall haue a do with me And than sir

Trystram saw none oÞer boote but rode a yenste hym and ouer threw

sir Vwayne and hurte hym in the syde and so he departed vnto hys

lodgynge a gayne And whan sir Danam vndirstood that sir Trys//

tram had hurte sir Lucan he wolde haue ryddyn aftir hym for to

haue slayne hym But sir Trystram wolde nat suffir hym Than

sir Vwayne lete ordayne an horse liter and brought sir Lucan to

the abbay of Ganys / And the castel there by hyȝt the castell off

Ganys of the whych sir Bleoberys was lorde And at that castell

sir Launcelot promysed all hys felowis there to mete in the queste

of sir Trystram So whan sir Trystram was com to hys lodgynge

there cam a damesell that tolde sir Darras that iij· of hys sunnys

were slayne at that turnemente and ij grevously wounded so

that they were neuer lyke to helpe them selff And all thys was

done by a noble knyght that bare a blacke shylde and that was

he that bare the pryce Than cam one and tolde sir Darras Þat

the same knyght was with In hys courte that bare the blacke

shylde Than sir Darras yode vnto sir Trystramys chambir and Þer

he founde hys shylde and shewed hit to the damesell A sir seyde

the damesell thys same ys he that slewe youre iij sunnys Than

with oute ony taryynge sir Darras put sir Trystram sir Palomy//

des  And sir Dynadan with In a stronge preson And there Sir

Trystram was lyke to haue dyed of grete syknes and euery

day sir Palomydes wolde repreve sir Trystram of olde hate be twyxt

them and euer sir Trystram spake fayre and seyde lytyll // But whan

sir Palomydes se that sir Trystram was falle in syknes Than was


f.222v (IX.37-8)

 

he hevy for hym and comforted hym in all the beste wyse he coude

And at the freynshe booke sayth· cam fourty knyghtes to sir Dar

ras that were of hys owne kynne and they wolde haue slayne sir

Trystram and hys felowis but sir Darras wolde nat but put Þem

in preson and mete and drynke they had So sir Trystram endu//

red there grete payne for syknes had vndir take hym and Þat ys Þe

grettist payne a presoner may haue for all the whyle a pre//

sonere may haue hys helth of body he may endure vndir the

mercy of god and in hope of good delyueraunce // But whan

syknes towchith a presoners body than may a presonere say

all welth ys hym be rauffte and than hath he cause to wayle

and wepe // Ryght so ded sir Trystram whan syknes had vndir//

take hym for than he toke such sorow that he had all moste

slayne hym selff // Now woll we speke and leve sir Trystram

sir Palomydes and sir Dynadan in preson and speke we of othir

knyghtes that sought aftir sir Trystram many dyuerse partyes

of thys londe and some yode in to Cornwayle And by aduenture

sir Gaherys nevew vnto kynge Arthure cam vnto kynge Marke

and there he was well resseyved and sate at kynge Markys

owne table and at hys owne messe Than kynge Marke asked

sir Gaherys what tydynges there was with In the realme of logrys

Sir seyde sir Gaherys the kynge regnys as a noble knyght

And now but late there was a grete Justis and turnemente

that euer y saw with in thys reallme of logres and Þe moste

nobelyste knyghtes were at that Justis But there was one

knyght that ded mervaylously iij dayes and he bare a blacke

shylde and on all the knyghtes that euer y saw he preved Þe beste

knyght That was seyde kynge Marke sir Launcelot oÞer ellis

Sir Palomydes the paynym Not so seyde sir palomydes Gahe


f.223 (IX.38)

 

rys for they were both of the contrary party a gaynste Þe knyght

with the blacke shylde // Than was hit sir Trystram de lyones seyde

kynge and there with all he smote downe hys hede and in hys

harte he feryd sore that sir Trystram sholde gete hym such wor//

ship in the realme of logrys where thorow hym selff shuld nat be

able to withstonde hym Thus sir Gaherys had grete chere with

kynge Marke and with the quene la beall Isode was glad of his

wordis for well she wyste by hys dedis and maners that hit

was sir Trystram And than the kynge made a feste royall and

to that feste cam sir Vwayne le fyȝe de roy Vrayne and som called

hym sir Vwayne le blaunche maynes And thys sir Vwayne cha

lenged all the knyghtesof Cornwayle Than was the kynge

wood wrothe that he had knyghtes to answere hym Than Sir

Andred nevew vnto kynge Marke lepe vp and sayde I woll en/

countir with sir Vwayne Than he yode and armyd hym and

horsed hym in the beste maner And there sir Vwayne mette with

sir Andred and smote hym downe that he sowned on the erthe

Than was kynge Marke sory and wrote oute of mesure that

he had no knyght to revenge hys nevew sir Andret So Þe kynge

called vnto hym sir Dynas le Senesciall and prayde hym for

hys sake to take vppon hym for to Juste with sir Vwayne Sir seyd

sir Dynas I am full lothe to haue a do with ony of the knyȝtes

of the rounde table yet for my love take vppon you for to Juste

So sir Dynas made hym redy to Juste and anone they encoun//

tirde to gydirs with grete spearys · But sir Dynas was ouer

throwyn horse and man a grete falle who was wroth Þan but

kynge Marke alas he seyde haue I no knyght that woll encounter

with yondir knyght Sir seyde sir Gaherys for youre sake I woll Just

So sir Gaherys made hym redy and whan he was armed he rode

in to the fylde And whan sir Vwayne saw sir Gaherys shylde he


f.223v (IX.38-9)

 

rode to hym and seyde sir ye do nat youre parte for the firste tyme Þat euer ye

were made knyght of the rounde table ye sware that ye shuld nat

haue a do with none of youre felyship wyttyngly And parde Sir

Gaherys ye know me well I now by youre my shylde And so do I know

you by youre shylde And thauȝe ye wolde breke your othe I woll

nat breke myne for there ys nat one here noÞer ye that shall thynk

I am a ferde of you but that I durst ryght well haue a do with

you and yet we be syster sonnys Than was sir Gaherys a shamed

and so there with all euery knyght wente Þer way And sir Vwayne

rode oute of the contrey Than kynge Marke armed hym & toke

hys horse and hys speare with a squyar with hym and Þan

he rode a fore sir Vwayne and suddeynly at a gap he ran vppon

hym all moste thorow the body and so Þer leffte hym So with in

a whyle there cam sir kay and founde sir Vwayne and asked

hym how he was hurte I wote nat seyde sir Vwayne why noÞer

where fore but by treson I am sure I gate thys hurte For here

cam a knyght suddeynly vppon me or that I was ware & sud//

deynly hurte me Than there was com sir Andred to seke kyng

Marke Thou traytoure knyght seyde Kay and I wyst hit were

Þou that thus traytourely haste hurte thys noble knyght

Þou shuldist neuer passe my hondys Sir seyde sir Andred I ded

neuer hurte hym and that I reporte me to hym selff // Fy on

you false knyghtes of Cornwayle seyde sir Kay for ye nauȝt worth

So sir kay made cary sir Vwayne to the abbay of the black crosse

and the was he heled Than sir Gaherys toke hys leve of kyng

Marke but or he departed he seyde sir kynge ye ded a fowle shame

whan ye flemyd sir Trystram oute of thys contrey for ye nedid

nat to haue douȝted no knyght and he had bene here and so

he departed Than cam sir Kay the senesciall vnto kynge Marke


f. 224 (IX.39)

 

and there he had god chere shewynge outewarde Now fayre

lordys seyde kynge Marke woll ye preve ony aduenture in thys

foreyste of Morrys whych ys an harde aduenture as I know

ony Sir seyde sir Kay I woll preve hit And sir Gaherys seyde he

wolde be avysed for kynge Marke was euer full of treson And Þer

with all sir Gaherys departed and rode hys way And by the same

way that sir Kay sholde ryde he leyde hym downe to reste char//

gynge hys squyar to wayte vppon hym and yf sir Kay comme

warne me whan he commyth So with In a whyle sir Kay com rydyng

that way and than sir Gaherys toke hys horse and mette hym

and seyde sir Kay ye ar nat wyse to ryde at the rekeyste of kynge

Marke for he delith all with treson Than seyde sir Kay I requyre

you that we may preve well thys aduenture I woll nat fayle

you seyde sir Gaherys and so they rode that tyme tylle a lake that

was that tyme called the perelous lake and there they a bode vnder

the sawe of the wood The meane whyle kynge Marke with In the

castell of Tyntagyll avoyded all hys barownes and all oÞir

save such as were prevy with hym that were a voyded oute

of the chambir And than he let calle hys nevew sir Andred

and bade arme hym and horse hym lyghtly for by Þat tyme

hit was nyȝe mydnyght And so kynge Marke was armed

all in blacke horse and all and so at a prevy postern they ij·

yssued oute with Þer verlattes with them and so rode tylle they com

to that lake Than sir Kay aspyed them firste and gate hys spere

in hys honde and profirde to Juste And kynge Marke rode a yenst

hym and smote ech oÞer full harde for the moone shone as the

bryght day And at that Justis sir Kayes horse felle downe for

hys horse was nat so bygge as the kynges horse was And sir

Kayes horse brused hym full sore Than sir Gaherys was wrothe


f.224v (IX.39)

 

that sir Kay had a falle Than he cryed knyght sitte Þou faste in thy sadle

for I wolle revenge my felow Than kyng Marke was a ferde of sir

Gaherys and so with evyll wylle kynge Marke rode a yenste hym

And sir Gaherys gaff hym such a stroke that he felle downe And so

forth with all sir Gaherys ran vnto sir Andred and smote hym

frome hys horse quyte that hys helme smote in the erthe and

nyȝe had brokyn hys neke And there with all sir Gaherys a lyȝt

and gate vp sir Kay and than they yeode bothe on foote to them

and bade them yelde them and telle Þer namys othir ellis they sholde

dey Than with grete payne sir Andred spake firste and seyde

hit ys kynge Marke of Cornwayle there fore be ye ware what

ye do And I am sir Andred hys cousyn Fy on you bothe seyde sir

Gaherys for ye ar false traytours and false treson haue

ye wrought vndir youre semble chere that ye made vs For

hit were pite that ye sholde lyve ony lenger seyde sir Gaherys

Save my lyff seyde kynge Marke and I woll make a mendys

and concider that I am a kynge anoynted hit were Þe more

shame seyde sir Gaherys to save thy lyff for Þou arte a kynge

anoynted with creyme And Þer fore Þou sholdist holde with all men

of worship and there fore Þou arte worthy to dye And so with

that he laysshed at kynge Marke and he couerde hym with

hys shylde and defended hym as he myght And than sir Kay

laysshed at sir Andret and there with all kynge Marke yelded

hym vnto sir Gaherys and than he kneled a downe and made

hys othe vppon the crosse of the swerde that neuer whyle he

lyved he wolde be a yenste Arraunte knyghtes And also he

sware to be good fryende vnto sir Trystram of euer he cam In

to Cornwayle And by that tyme sir Andret was on Þe erthe

And sir Kay· wolde haue slayne hym // lat be seyde sir Gaherys

sle hym nat I pray you // Sir hit were pite seyde syr Kay


f. 225 (IX. 39-40)

 

that he sholde lyve ony lenger for he ys cousyn nyȝe vnto sir Trystram

and euer he hath bene a traytoure vnto hym and by hym he was

exhyled oute of Cornwayle and there fore I woll sle hym seyde

sir Kay // ye shall nat do so seyde sir Gaherys for sytthyn I haue

yevyn the kynge hys lyff I pray you gyff hym hys lyffe And

there with all sir Kay lete hym go And so they rode her wayes

vnto sir Dynas le senesciall for by cause they harde sey that

he loved well sir Trystram So they reposed them and sone aftir

they rode vnto the realme of logrys / and so with In a lityll while

they mette wyth sir Launcelot that all wayes had dame Brang/

wayne with hym to that entente he wente to haue mette the

sunner with sir Trystram and sir Launcelot asked what tydynges

in Cornwayle and whethir they harde of sir Trystram Sir

kay and sir Gaherys answerde that they harde nat of hym

And so they tolde worde by worde of Þer aduenture Than sir

Launcelot smyled and seyde harde hit ys to take oute off the

fleysshe that ys bredde in the boone and so they made hem

myrry to gydirs // Now leve we of thys tale and speke

we of sir Dynas that had with In the castell a paramour and she

loved a nothir knyght bettir than hym And so whan sir

Dynas was oute an huntynge she slypped downe by a towell

and toke with hir ij brachettis and so she yode to Þe knyght

that she loved And whan sir Dynas cam home and myste

hys paramoure and hys brachettes than was he Þe more wro//

ther for hys brachettis more than for hys lady So than

her rode aftir the knyght that had hys paramoure and bade

hym turne and Juste // So sir Dynas smote hym downe

that with the falle he brake his legge and hys arme And

than hys lady and paramour cryed and seyde sir Dynas mercy

and she wolde love hym bettir than euer she ded // Nay seyde


f. 225v (IX. 40)

 

sir Dynas I shall neuer truste them that onys betrayeth me

and there fore as ye haue be gunne so ende for I woll nevir

meddil with you And so sir Dynas departed and toke hys bra//

chettis with hym and so he rode to hys castell // Now woll

we turne vnto sir Launcelot that was ryght hevy that

he cowth neuer hyre no tydynges of sir Trystram for all this

whyle he was in preson with sir Darras sir Palomydes

and sir Dynadan Than dame Brangwayne toke hyr

leve to go in to Cornwayle And sir Launcelot sir Kay and sir

Gaherys rode to seke the contrey of Surluse // Now spe//

kith thys tale of sir Trystram and of hys ij felowis for euery

day sir Palomydes brawled and seyde langayge a yenste sir

Trystram Than seyde sir Dynadan I mervayle of the Sir

Palomydes whethir and Þou haddyst sir Trystram here I

trow Þou woldiste do none harme For and a wolff and

a sheepe were to gydir in a preson the wolff wolde suffir

the sheepe to be in pees And wyte Þou well seyde sir Dyna//

dan thys same ys sir Trystram at a worde and now mayst

Þou do thy beste with hym and lette se now skyffte hit with

youre handys Than was sir Palomydes a baysshed & seyde

lityll Than seyde sir Trystram to sir Palomydes I haue harde

muche· of youre magre a yenste me but I woll nat meddill

with you at thys tyme be my wylle by cause the lorde of this

place that hath vs in gouernaunce for and I dred hym nat

more than I do the sone hit sholde be skyffte And so they

peaced hem selff // Ryght so cam In a damesell and seyde

knyghtes be of good chere for ye ar sure of youre lyves &

that I harde my lorde sir Darras sey so Than were they

all glad for dayly they wente to haue dyed Than sone after

thys sir Trystram fyll syke that he wente to haue dyed //


f. 226 (IX.40)

 

Than sir Dynadan wepte and so ded sir Palomydes vndir

them bothe makynge grete sorow So a damesell cam In to Þem

and founde them mournynge Than she wente vnto sir Darras

and tolde hym how the myghty knyght that bare the blacke

shylde was lyckly to dye That shall nat be seyde sir Darras

for god deffende whan knyghtes com to me for succour Þat I sholde

suffir hem to dye with In my preson There fore seyde sir Dar

ras go fecche me that syke knyght and hys felowis a fore me

And whan sir Darras saw sir Trystram I brought a fore hym

he seyde sir knyght me repentis of youre sykenes for ye ar cal//

led a full noble knyght and so hit semyth by you And wyte

you well that hit shall neuer be seyde that I sir Darras shall

destroy such a noble knyght as ye ar in preson how be hit

that ye haue slayne iij of my sunnes where fore I was gretely

a greved But now halt Þou go and thy felowys and take

youre horse and youre armour for they haue bene fayre &

clene kepte and ye shall go where hit lykith you vppon this

covenaunte that ye knyght woll promyse me to be good frynde

to my sunnys ij· that bene now on lyve and also Þat ye telle me

thy name // Sir as for my name ys sir Trystram de lyones &

in Cornwayle was I borne and nevew I am vnto kyng Marke

And as for the dethe of youre ij sunnes I myght nat do with all

for and they had bene the nexte kyn that I haue I myȝt haue

done none othir wyse And if I had slayne hem by treson oÞer

trechory I had bene worthy to haue dyed // All thys I cosider

seyde sir Darras that all that ye ded was by fors of knyghthode

and that was the cause I wolde nat put you to dethe But sith ·

ye be sir Trystram the good knyght I pray you hartyly to be my

good frynde and my sunnes Sir seyde sir Trystram I promyse you by

the faythe of my body euer whyle I lyve I woll do you seruye for


f. 226v (IX.40-1)

 

ye haue done to vs but as a naturall knyght ouȝt to do Than

sir Trystram reposed hym there a whyle tylle that he was a

mended of hys syknes And whan he was bygge and stronge

they toke Þer leve and euery knyght toke Þer horses & harneys and

so departed ad rode to gydirs tyll they cam to a crosse way // Now

felowis seyde sir Trystram here woll we departe in sundir And

by cause sir Dynadan had the firste aduenture of hym I woll be

S                                                                             // gyn

O as sir Dynadan rode by a well he founde a lady ma//

kyng grete dole // What aylith you seyde sir Dynadan

Sir knyght seyde the lady I am the wofullyst lady of the worlde

for with in thys v· dayes here com a knyght called sir Breuse

saunȝ pite and he slewe myne owne brothir and euer syns

he hath kepte me at hys owne wylle and of all men in the

worlde I hate hym moste And there fore I requyre you of

knyghthode to avenge me for he woll nat tarry but be

here anone // lat hym com seyde sir Dynadan and by cause

of honoure of all women I woll do my parte So with this

cam sir Breuse and whan he saw a knyght with his lady

he was wood wrothe And than he seyde kepe the sir knyȝt

from me And so they hurled to gydirs as the thundir and

aythir smote othir passynge sore But sir Dynadan put

hym thorow the shuldir a grevous wounde and or euer sir Dy//

nadan myght turne hym sir Breuse was gone and fledde

Than the lady prayde hym to brynge hyr to a castell there

be syde but iiij myle And so sir Dynadan brouȝt her there

and she was well com for the lorde of that castell was

hir vncle And so sir Dynadan rode hys way vppon hys

aduenture // Now turnyth thys tale vnto sir Trystram that

by aduenture he cam to a castell to aske lodgyng where


f. 227 (IX.41)

 

In was quene Morgan le fay And so whan sir Trystram was let In

to that castell· he had good chere all that nyght And so vppon the

morne whan he wolde haue departed the quene seyde wyte you

well you shall nat departe lyghtly for ye ar here as a presonere //

Jhu deffende me seyde sir Trystram for I was but late a presonere

Now fayre knyght seyde the quene ye shall a byde with me tyll Þat

I wyte what ye ar and frome whens ye cam And euer the quene

wolde sette sir Trystram on her one syde and her paramour on hir oÞer

syde And euer more the quene wolde be holde sir Trystram And

there at thys othir knyght was Jeleous and was in wyll

suddeynly to haue renne vppon hym with a swerde but he

for bare for shame Than the quenene seyde vnto sir Trystram

telle me youre name and I shall suffir you to departe whan

ye wyll vppon that covenaunte madame I woll telle you my

name ys sir Trystram de lyones / A seyde quene Morgan le fay

and I had wyst that Þou sholdist nat haue departed so sone as Þou

shalte But sitthyn I haue made a promyse I wolde holde hit with

that Þou wolte promyse me to beare vppon the A shylde I shall

delyuer the for at the castell of the harde roche where kynge

Arthure hath cryed a grete turnemente and there I pray you

that ye woll be and to do as much of dedys of armys for me

as ye may do For at the castell of maydyns sir Trystram ye

ded mervaylous dedis of armys as euer I harde knyght do

Madame seyde sir Trystram let me se the shylde Þat I shall

beare Than the shylde was brought forthe and the fylde was

gouldes with a kynge and a quene there In paynted and

a knyght stondynge a boven them with hys foote stan//

dynge vppon the kynges hede and the othir vppon the quenys

hede Madame seyde sir Trystram thys ys a fayre shylde and

a myghty but what signyfyeth this kynge and Þis quene

and that knyght stondynge vppon bothe Þer hedis // I shall


f. 227v (IX.41-2)

 

telle you seyde Morgan le fay hit signyfieth kynge Arthure

and que Gwenyuer and a knyght that holdith them bothe in bon//

dage and In sevage // Madame who ys that knyght seyde sir

Trystram // Sir that shall ye nat wyte as at thys tyme seyde the

quene But as the freynshe booke seyde quene Morgan loved sir

Launcelot beste and euer she desired hym and he wolde neuer love

her nor do no thynge at her rekeyste and there fore she hylde

many knyghtes to gydir to haue takyn hym by strengthe And

by cause that she demed that sir Launcelot loved quene Gwe//

nyuer paramour and she hym a gayne There fore dame Morgan

ordayned that shylde to put sir Launcelot to a rebuke to that

entente the kynge Arthure myght vndirstonde the love

be twene them // So sir Trystram toke that shylde and promysed

hir to beare hit at the turnemente of the castell of harde

roche But sir Trystram knew nat of that shylde that hit was

ordayned a yenste sir Launcelot but aftirwarde he knew hit

So sir Trystram toke hys leve of the quene and toke the shylde with

hym Than cam the knyght that hylde Morgan le fay whos

name was sir Hemyson and he made hym redy to folow Sir

Trystram Now fayre knyght seyde Morgan ryde ye nat aftir

that knyght for ye shall wynne no worshyp of hym Fye

on hym coward knyght seyde sir Hemyson for I wyste nevir

good knyght com oute of Cornwayle But yf hit were Sir

Trystram de lyones // Sir what and that be he // Nay nay he

seyde he ys with la beall Isode and thys ys but a daffysshe

knyght Alas my fayre frynde ye shall fynde hym the beste

knyght that euer ye mette with all for I know hym bettir Þan

ye do // Madame for youre sake seyde Hemyson I shall sle

hym A fayre frynde seyde the quene me repentith that ye

woll folow that knyght for I feare me sore of your a gayne


f. 228 (IX. 42-3)

 

commynge And so with thys Þis knyght rode hys way wood wrothe

aftir sir Trystram as faste as he had be chaced with knyghtes // So

whan sir Trystram harde a knyght com aftir hym so faste he re//

turned a boute and saw a knyght commynge a gaynste hym

And whan he com nyȝe to sir Trystram he cryed on hyȝt & seyde

sir knyght  kepe the fro me Than they russhed to gydirs as

hit had bene thundir And sir Hemyson brused hys speare

vppon sir Trystram but hys harneys was so god Þat he myght

nat hurte hym And sir Trystram smote hym harder and bare

hym thorow the body and fylle ouer hys horse croupe Than sir

Trystram turned to haue done more with hys swerde but he sy

so much bloode go frome hym that hym semed lyckly to dye

And so he departed frome hym and cam to a fayre maner to an

olde knyght And there sir Trystram lodged // Nowe leve we Sir

Trystram and speke we of the knyght that was wounded to

the dethe Than hys varlette a lyȝt and toke of hys helme and

than he asked hys lorde wheÞer there were ony lyff in hym //

There ys in me lyff seyde the knyght but hit ys but lytyll

and there fore lepe Þou vp be hynde me whan Þou haste hol//

pyn me vp and holde me faste that I falle nat and brynge

me to quene Morgan for the deepe drawȝtes  of dethe drawith

to my harte that I may nat lyve for I wolde speke with her fayne

or I dyed For my soule woll be in grete perell and I dye For with

grete payne hys varlet brought hym  to the castell and Þere

sir Hemyson fylle downe dede // Whan Morgan le fay saw hym

dede she made grete sorow oute of reson and than she lette

dispoyle hym vnto hys shirte and so she lete put hym in to

a tombe And a boute the tombe she lete wryte he lyeth Sir

Hemyson slayne by the hondis of sir Trystram de lyones // Now

turne we vnto sir Trystram that asked the knyght hys oste if he


f.228v (IX.43-4)

 

saw late ony knyghtes aventures // Sir he seyde here lodged Þe laste

nyght sir Ector de marys and a damesell with hym // And Þat damesell

tolde me that he was one of the beste knyghtes of the worlde That

ys nat so seyde sir Trystram fir I know iiij bettir knyghtes of his owne

blood And the firste ys sir Launcelot du lake calle hym the beste

knyght And sir Bors de ganys sir Bleoberys de ganys and Sir

Blamour de ganys and also sir Gaherys / Nay seyde hys oste sir Gaw//

ayne ys the bettir knyght That ys nat so seyde sir Trystram for I haue

mette with hem bothe and I haue felte sir Gaherys for the bettir

knyght And sir Lamorak I calle hym as good as ony of them excepte

sir Launcelot // Sir why name ye nat sir Trystram sayde hys oste for

I accompte hym as good a knyght as ony of them I knowe nat

sir Trystram seyde sir Trystram thus they talked and boarded as longe

as them thought best and than wente to reste And on Þe morne

sir Trystram departed and toke hys leve of hys oste and rode towarde

the roche deure And none aduenture but that And so he rested

nat tylle he cam to the castell where he saw v· C· tentes // So

the kynge of Scottes And the kynge of Irelonde hylde a gaynste

kynge Arthurs knyghtes and there be gan a grete medle

So there cam In sir Trystram and ded mervaylous dedis of ar/

mys for he smote downe many knyghtes And euer he was be fore

kynge Arthure with that shylde And whan kynge Arthure

saw that shylde he mervayled gretly in what entent hit was

made But que Gwenyuer demed as hit was where fore she was

hevy Than was Þer a damesell of quene Morgan in a chambir

by kynge Arthure and whan she harde kynge Arthure speke

of that shylde than she spake opynly vnto kynge Arthure Sir

kynge wyte you well thys shylde was ordayned for you to warn

you of youre shame and dishonoure that longith to you and

youre quene And than anone that damesell pycked her a way

pryvayly that no man wyste where she was be com Than was

 

 

 

                                                                kynge Arthure


f.229 (IX. 44)

 

kynge Arthure sad and wrothe and asked frome whens com that

damesell And there was nat one that knew her noÞer wyst nat

where she was be com Than quene Gwenyuere called to sir Ector

de marys and there she made hyr complaynte to hym and seyde

I wote well thys shylde was made by Morgan le fay in Þe dispite

of me and of sir Launcelot where for I drede me sore leste I shall

be distroyed And euer the kynge be hylde sir Trystram that ded so

mervaylous dedis of armys Þat he wondred sore what knyȝt

hit myght be and well he wyste hit was nat sir Launcelot

And also hit was tolde hym that sir Trystram was in Bretayne

with Isode le blaunche maynys for he demed and he had bene in

the realme of logrys sir Launcelot oÞer som of hys felowis Þat were

in the queste of sir Trystram that they sholde haue founde hym

or that tyme So kynge Arthure had mervayle what knyȝt

he myght be And euer kynge Arthurs ye was on that shylde

And all that aspyed the quene and Þat made hir sore a ferde Than

vppon Þe ryght honde &  vppon the lyffte honde Þat vnnethe no knyȝt

myght with stonde hym And the kynge of Scottes & Þe kynge of

Irelonde be gan to with draw them // Whan kynge Arthur aspyed

that he thought Þe knyght with Þe rode straunge shylde sholde nat

ascape hym Than he called vnto sir Vwayne le blaunche maynes

and bade hym arme hym & make hym redy So anone kyng Ar//

thure & sir sir Vwayn dressed Þem be fore sir Trystram & requyred hym

to telle where he hadde that shylde Sir he seyde I had hit of quene

Morgan le fay suster to kynge Arthure So here levith of this

booke for hit ys the firste booke of sir Trystram de lyones And Þe secunde

boke be gynneth where sir Trystram smote downe kynge Arthure

and sir Vwayne by cause why he wolde nat telle hem where fore

that shylde was made bnut to sey the soth sir Trystram coude nat

telle the cause for he knew hit nat


 

¶ Capitulum xxiij

ANd at the next landynge faste by the see / there mette with sir Tristram & with sir Dynadan sir Ector de marys and sir Bors de ganys / and there sir Ector Iusted with syr Dynadan / and he smote hym and his hors doun And thenne sir Tristram wold haue Iusted with syre Bors and sir Bors said that he wolde not Iuste with no Cornysshe knyghtes / for they are not called men of worship / and all this was done vpon a brydge / and with this came sire Bleoberys and syr Dryaunt / and sir Bleoberys profered to Iuste with syr Tristram / and there sir Tristram smote doune syr Bleoberys / Thenne said sire Bors de ganys / I wist neuer Cornyssh knyghte of soo grete valoure nor soo valyaunt as that knyȝt that bereth the trappours enbroudred with crounes / And thenne sir Tristram and syr Dynadan departed fro them in to a forest / and there mette them a damoysel that came for the loue of sire launcelot to seke after somme noble knyghtes of kyng Arthurs courte for to rescowe sir launcelot / and soo sir launcelott was ordeyned / for by the treason of quene Morgan le fay to haue slayne sir launcelot / and for that cause she ordeyned thyrtty knyghtes to lye in a wayte for sir launcelot / and this damoysel knewe this treason / And for this cause the damoysel came for to seke noble knyghtes to helpe syr Launcelot / For that nyght or day after syr launcelot shold come where these xxx knyghtes were / And soo this damoysel mette with syre Bors and sire Ector and with sir Dryaunt / and there she told hem alle four of the treason of Morgan le fay / and thenne they promysed her that they wold be nyghe where sire launcelot shold mete with the xxx knyȝtes / & yf soo be they set vpon hym / we wil do rescowes as we can / so the damoysel departed / and by aduenture the damoisel met with sir tristram & with sir Dynadan / & there the damoysel told hem al the treason that was ordeyned for sir launcelot / Fair damoysel said sir tristram bryng me to that same place where they shold mete with sir launcelot Thenne said sir Dynadan what will ye do / hit is not for vs to fyghte with thyrtty knyghtes / and wete you wel I wylle Page  374 [leaf 187v] not thereof / as to matche one knyght two or thre is ynough and they be men / But for to matche xv knyghtes that wille I neuer vndertake / fy for shame said sire Tristram / doo but youre parte / Nay said sir Dynadan I will not therof / but yf ye wil lene me your sheld / for ye bere a sheld of Cornewaile / and for the cowardyse that is named to the knyȝtes of Cornewaile by your sheldes ye be euer forborne / Nay said syr Tristram I will not departe from my sheld for her sake that gaf it me / But one thyng said sir Tristram I promyse the syr Dynadan / but yf thou wilt promyse me to abyde with me / here I shalle slee the For I desyre no more of the / but ansuer one knyghte / And yf thy herte wille not serue the / stande by and loke vpon me and them / Syre said syre Dynadan I promyse you to loke vpon & to doo what I may to saue my self / but I wold I had not mette with you / Soo thenne anone these thyrtty knyghtes cam fast by these four knyghtes / and they were ware of them / and eyther of other / And soo these thyrtty knyghtes lete for thys cause that they wold not wrathe them yf caas be that they had adoo with syr launcelot / and the four knyghtes lete them passe to this entent that they wold see and beholde what they wold doo with syr launcelot / and soo the thyrtty knyghtes paste on / and came by sir Tristram and by sir Dynadan / and thenne sir Tristram cryed on hyghe / loo here is a knyght ageynste you for the loue of sire launcelot / and there he slewe two with one sperd and ten with his swerd / And thenne came in syre Dynadan and he dyd passynge wel / and soo of the thyrtty knyghtes there wente but ten awey / and they fledde / Al this bataille sawe sir Bors de ganys and his thre felawes / and thenne they sawe wel hit was the same knyghte that Iusted with hem at the brydge / thenne they took their horses and rode vnto syr Tristram and praysed hym and thanked hym of his good dedes / and they alle desyred syre Tristram to goo wyth hem to their lodgynge / and he said nay / he wold not go to no lodgynge / Thenne they alle four knyghtes praid hym to telle hem his name / Faire lordes said syr Tristram / as at this tyme I wille not telle you my name /

¶ Capitulum xxiiij /

THēne sir Tristram & sir Dynadan rode forth theire weye tyl they came to the sheepherdes & to the herde men / &Page  375 [leaf 188r] there they asked hem yf they knewe ony lodgynge or herberough there nyghe hand /

¶ Forsothe syrs sayde the herdemen / here by is good lodgynge in a castel / But there is suche a customme that there shalle no knyghte be herberowed but yf he Iuste with two knyghtes / and yf he be but one knyghte / he must Iuste with two / And as ye be therin soone shalle ye be matched / There is shrewde herberowe said syre Dynadan / lodge where ye will / for I wille not lodge there / Fy for shame sayd sir Tristram are ye not a knyghte of the table round / wherfore ye may not with your worship refuse your lodgynge / Not soo said the herd men / for and ye be beten / and haue the wers ye shalle not be lodged there / and yf ye bete them ye shalle be wel herberowed A said syr Dynadan they are two sure knyghtes / Thenne sire Dynadan wold not lodge there in no manere / but as sire Tristram requyred hym of his knyghthode / and so they rode thyder / and to make shorte tale syr Tristram and sir Dynadan smote hem doune bothe / and soo they entred in to the castel and had good chere / as they coude thynke or deuyse / And whanne they were vnarmed and thought to be mery and in good rest / there came in at the yates syre Palomydes and syre Gaherys requyrynge to haue the customme of the castel / what aray is this said sire Dynadan / I wold haue my rest / that may not be said sir Tristram / Now must we nedes defende the customme of this castel / in soo moche as we haue the better of the lordes of this castel / and therfore saide sire Tristram / nedes muste ye make you redy / In the deuyls name said sir Dynadan came I in to your company / and so they made them redy And sir Gaherys encountred with sire Tristram / and syr Gaherys had a falle / and sir Palamydes encountred with sir Dynadan / and sir Dynadan had a falle / thenne was hit fall for falle / Soo thenne muste they fyghte on foote / that wold not syr Dynadan / for he was so sore brysed of the falle that syre Palomydes gaf hym / Thenne sir Tristram vnlaced syre Dynadans helme / and praid hym to helpe hym / I wille not sayde syr Dynadan for I am sore wounded of the thyrtty knyghtes that we hadde but late agoo to doo with alle

¶ But ye fare said sire Dynadan vnto syr Tristram as a madde man and as a man þt is oute of his mynde þt wold cast hym self awey Page  376 [leaf 188v] and I may curse the tyme that euer I sawe you / For in al the world are not two suche knyghtes that ben so wode as is sire launcelot and ye syr Tristram / for ones I felle in the felauship of syr launcelot as I haue done now with you and he set me a werke that a quarter of a yere I kepte my bedde / Ihesu defende me said syr Dynadan from suche two knyghtes / and specially from your felauship / Thenne said syre Tristram I will fyghte with hem both / Thenne syr Tristram badde hem come forth both / for I wille fyghte with you / thenne syr Palomydes and syr Gaherys dressid them / and smote at hem bothe / thenne Dynadan smote at syr Gaherys a stroke or two / and torned from hym / nay said sir Palomydes / it is to moche shame for vs two knyghtes to fyghte with one / And thenne he dyd byd syr Gaherys stande a syde with that knyght that hath no lyste to fyghte / Thenne they rode to gyders and fought longe / and atte last syr Tristram doubled his strokes / and drofe syre Palomydes a bak / more than thre strydes / And thenne by one assente syre Gaherys and syr Dynadan wente betwixe them / and departed them in sonder / And thenne by assent of syr Tristram they wold haue lodged to gyders / But syre Dynadan wold not lodge in that castel / And thenne he cursed the tyme that euer he came in their feauship / and soo he took his hors / and his harneis / and departed / thenne sir Tristram prayd the lordes of that castel to lene hym a man to brynge hym to a lodgynge / and soo they dyd / and ouertoke sir Dynadan / and rode to their lodgynge two myle thens with a good man in a pryory / and there they were wel at ease / And that same nyght sir Bors and sire Bleoberys and sir Ector and syre Dryaunt / abode stylle in the same place there as sire Tristram fouȝt with the thyrtty knyghtes / and there they mette with syr Launcelot the same knyght / and had made promyse to lodge with syr Colgreuaunce the same nyght /

¶ Capitulum xxv

BVt anone as the noble Knyghte syre launcelot herd of the shelde of Cornewayle thenne wyst he wel that hyt Page  377 [leaf 189r] was sire Tristram that fought with his enemyes / And thenne syre Launcelot praysed syre Tristram / and called hym the man of moost worship in the world /

¶ Soo there was a knyght in that pryory that hyght Pellinore / and he desyred to wete the name of sire Tristram / but in no wyse he coude not / and so syr Tristram departed and lefte sir Dynadan in the pryory / for he was soo wery and soo sore brysed that he myghte not ryde / Thenne this knyght syre Pellinore said to sire Dynadan / sythen that ye wille not telle me that knyghtes name I will ryde after hym / and make hym to telle me his name / or he shall dye therfore / Beware sir knyght said sir Dynadan / for and ye folowe hym / ye shalle repente hit / Soo that knyghte sire Pellinore rode after sire Tristram and requyred hym of Iustes / thēne sir Tristram smote hym doune and wounded hym thoruȝ the sholder / and soo he past on his way / And on the next day folowyng syr Tristram mette with pursyuaūts / and they told hym that there was made a grete crye of turnement bitwene kynge Carados of scotland and the kynge of Northwalys / & eyther shold Iuste ageyne other at the castel of maydens / and these pursyuaūtes sought alle the coūtrey after the good knyȝtes / and in especyal kynge Carados lete make sekynge for sir launcelot du lake / and the kyng of Northgalys lete seke after sir Tristram de lyonas /

¶ And at that tyme syr Tristram thought to be at that Iustes / and soo by aduenture they mette with sire kay the seneschal and syr Sagramor le desyrus / and syr kay requyred sir Tristram to Iuste / and sire Tristram in a maner refused hym / by cause he wold not be hurte nor brysed ageynste the grete Iustes that shold be bifore the castel of maydens / and therfore he thought to repose hym and to reste hym / And alway sir kay cryed sir knyȝt of Cornewaile Iust with me / or els yelde the to me as recreaunte / whan sir Tristram herd hym saye soo / he torned to hym / and thenne sire kay refused hym and torned his bak / Thenne syr Tristram said as I fynde the / I shalle take the / Thenne sire Kay torned with euylle wylle / and syre Tristram smote syr kay doune / and soo he rode forthe /

¶ Thenne syre Sagramore le desyrus rode after syre Tristram / and maade hym to Iuste with hym / and there syre Tristram smote doune syre Sagramor le desyrus from his hors Page  378 [leaf 189v] and rode his way / and the same day he mette with a damoysel that told hym that he shold wynne grete worship of a knyȝt aduenturous that dyd moche harme in alle that countrey /

¶ Whanne sir Tristram herd her say soo / he was gladde to goo with her to wynne worship / So sire Tristram rode with that damoysel a vj myle / and thenne mette hym syre Gawayne / and there with alle syre Gawayne knewe the damoysel / that she was a damoysel of Quene Morgan le fay / Thenne sir Gawayne vnderstode that she ladde that knyght to somme meschyef / Faire knyght said sire Gawayne whyder ryde you now wyth that damoysel / Syr said sire Tristram I wote not whyder I shalle ryde / but as the damoysel wylle lede me / Syr saide syre Gawayne ye shalle not ryde with her / for she and her lady did neuer good but ylle / And thenne sir Gawayne pulled oute his swerd / and said / damoysel / but yf thou telle me anon / for what what cause thou ledest this knyȝt with the thou shalt dye for hit ryght anone / I knowe alle your ladyes treason / & yours / Mercy syre Gawayne she said / and yf ye wille saue my lyf / I wille telle you / Saye on said sir Gawayne / and thow shalte haue thy lyf / Syre she said Quene Morgan le fay my lady hath ordeyned a xxx ladyes to seke & to aspye after sir laūcelot or sir tristram / & by þe trainys of these ladyes who þt may fyrst mete ony of these two knyghtes they shold torne hem vnto Morgan le fays castel / sayenge that they shold doo dedes of worship / & yf ony of tho two knyȝtes cam there / there be xxx knyghtes lyenge and watchyng in a toure to wayte vpon sir launcelot or vpon syre tristram / Fy for shame said sire Gawayne that euer suche fals treason shold be wrought or vsed in a quene and a kynges syster / and a kynge and quenes doughter

¶ Capitulum xxvj

SYr said sire Gawayne wille ye stande with me / and we wille see the malyce of these thyrtty knyghtes / syr said sir tristram goo ye to hem / and hit please you / and ye shal see I wille not fayle you / for hit is not long a go syn I and a felawe mette with thyrtty knyȝtes of that quenes felauship Page  379 [leaf 190r] And god spede vs soo that we may wynne worship / So thēne sir Gawayne and sire tristram rode toward the castel where Morgan le fay was / and euer sir Gawayne demed wel that he was sire tristram de lyones by cause he herd that two knyghtes had slayne and beten thyrtty knyghtes / And whanne they came afore the castel sir Gawayn spak on hyghe / and said Quene Morgan le fay sende oute youre knyghtes / that ye haue leyd in a watche for sir laūcelot & for sir tristram / Now said sir Gawayne I knowe your fals treason / and thorou all places where that I ryde men shall knowe of your fals treason / And now lete see sir Gawayn / whether ye dare come out of your castel ye thyrtty knyghtes / thenne the quene spak and al the thyrtty knyghtes attones / and said / sir Gawayne ful wel wetest thou what thou dost and saist / For by god we knowe the passynge wel / But alle that thou spekest / and dost / thow saist hit vpon pryde of that good Knyghte that is there with the / For there be somme of vs that knowen full wel the handes of that knyght ouer alle wel / And wete thou wel sir gawayne / hit is more for his sake than for thyn that we wylle not come oute of this castel / For wete ye wel sir Gawayne the Knyght that bereth the armes of Cornewaile / we knowe hym / and what he is / thenne sir Gawayne and sir tristram departed and rode on their wayes a day or two to gyders / and there by aduenture they met with syr Kay and syr Sagramor le desyrus / And thenne they were glad of syr gawayne / and he of them / but they wiste not what he was with the shelde of Cornewaile / but by demynge / And thus they rode to gyders a daye or two / And thenne they were ware of syr Breuse saūce pyte chacynge a lady for to haue slayne her / for he had slayn her peramour afore / Hold you all stylle said syr Gawayne & shewe none of you forthe / and ye shalle see me reward yonder fals Knyght / for and he aspye you he is so wel horsed that he wille escape awey / And thenne syre Gawayne rode betwix syr Breuse and the lady / and said fals knyghte leue her / and haue adoo with me / whan syr Breuse sawe no moo but syre gayne he feutryd his spere / and syr Gawayne ageynst hym / and there syr Breuse ouerthrewe syr Gawayne / and thenne he rode ouer hym / & ouerthwart hym twenty tymes to haue destroyed Page  380 [leaf 190v] hym / and whan sire Tristram sawe hym doo soo vylaynous a dede / he hurled oute ageynste hym / And whan syr Breuse sawe hym with the shelde of Cornewaile / he knewe hym well / that it was syre Tristram / and thenne he fledde / and sir Tristram folowed after hym / and syr Breuse saunce pyte was so horsed that he wente his waye quyte / and sir Tristram folowed hym longe / for he wold fayne haue ben auengyd vpon hym / And soo whanne he hadde longe chaced hym / he sawe a fayre welle / and thyder he rode to repose hym / and teyed his hors til a tree /

¶ Capitulum xxvij

ANd thenne he pulled of his helme and wasshed his vysage / and his handes / and soo he felle on slepe /

¶ In the meane whyle came a damoysel that had sought sir tristram many wayes and dayes within this land / And whanne she came to the welle she loked vpon hym / & had forgeten hym as in remembraunce of sire Tristram / but by hys hors she knewe hym / that hyghte passe Brewel / that had ben sire Tristrams hors many yeres / For whanne he was mad in the forest / syr Fergus kepte hym / Soo this lady dame Brangwayne abode stylle tyl he was awake / Soo whanne she sawe hym wake / she salewed hym / and he her ageyn / sor eyther knewe other of old acqueyntaunce / thenne she told hym how she had sought hym longe and brode / and there she told hym hou she hadde letters from quene la beale Isoud / Thenne anon sire Tristram redde them / and wete ye well / he was gladde / for theryn was many a pyteous complaynte / Thenne sir Tristram said / lady Brangwayne ye shalle ryde with me tyl that turnement be done at the castel of maydens / And thenne shalle ye bere letters and tydynges with you / And thenne sire tristram took his hors and sought lodgynge / and there he mette wyth a good auncyent knyght and prayd hym to lodge with hym Ryȝt so came Gouernaile vnto sir Tristram / that was glad of that lady / Soo this old knyghtes name was sir Pellownus / and he told of the grete turnement that shold be att the Castel of maydens / And there sir launcelot and xxxij knyȝtes Page  381 [leaf 191r] of his blood had ordeyned sheldes of Cornewaile / and ryȝte soo there came one vnto syr Pellounes / and told hym that sir Persydes de bloyse was come home / thenne that knyght helde vp his handes and thanked god of his comynge home / and there sir Pellounes told syr Tristram that in two yeres he had not sene his sone syr Persydes / Syr said sir Tristram I knowe your sone wel ynough for a good knyght / soo on a tyme syr Tristram and syr Persydes came to their lodgynge both at ones / and soo they vnarmed hem / and putte vpon hem their clothynge / And thenne these two knyghtes eche welcomed other / And whanne syr Persydes vnderstode that sir Tristram was of Cornewaile / he said he was ones in Cornewaile / and there I Iusted afore kynge Marke / And soo it happed me at that tyme / to ouerthrowe ten knyghtes / and thenne came to me syre Tristram de lyones and ouerthrewe me / and took my lady awey from me / and that shalle I neuer forgete / but I shalle remembre me and euer I see my tyme / A said sir trystram now I vnderstande that ye hate syr Tristram / what deme ye / wene ye that sir Tristram is not able to withstande your malyce / yes said sir Persydes I knowe wel that sir Tristram is a noble knyght and a moche better knyght than I / yet shalle I not owe hym my good wille /

¶ Ryght as they stode thus talkynge at a bay wyndowe of that castel / they sawe many knyghtes rydynge to and fro toward the turnement / And thenne was sire Tristram ware of a lykely knyght rydyng vpon a grete black hors / and a black couerd shelde / what knyȝte is that said sire Tristram with the black hors & the blak sheld he semes a good knyȝt / I knowe hym wel said sir Persydes he is one of the best knyghtes of the world / thenne is it syre Launcelot said sir Tristram / nay said syre Persydes / hit is syr Palomydes / that is yet vncrystened /

¶ Capitulum xxviij

THenne they sawe moche people of the countrey salewe sire Palomydes / And within a whyle after / ther cam a squyer of the castel / that told syre Pellounes that was lord of that castel / that a knyght with a blak sheld had Page  382 [leaf 191v] smyten doune thyrten knyȝtes / Fayr broder said sir Tristram vnto syr Persydes / lete vs caste vpon vs clokes / and lete vs goo see the play / Not soo said sir Persydes / we wille not goo lyke knaues thyder / but we wille ryde lyke men and good knyghtes to withstande oure enemyes / Soo they armed them and took their horses and grete speres / and thyder they went there as many knyȝtes assayed hem self before the turnement And anone sir Palomydes sawe sir Persydes / and thenne he sente a squyer vnto hym and said / goo thou to the yonder knyght with the grene sheld and therin a lyon of gooldis / and say hym I requyre hym to Iuste with me / and telle hym that my name is sire Palomydes / whanne sir Persydes vnderstood that request of syre Palomydes / he made hym redy / and there anone they mette to gyders / but syre Persydes had a falle Thenne syre Tristram dressid hym to be reuengyd vpon sir palomydes / and that sawe syre Palomydes that was redy / and soo was not sire Tristram and took hym at auauntage / and smote hym ouer his hors tayle whanne he had no spere in his reyste / Thenne starte vp syre Tristram and took his hors lyȝtely / and was wrothe oute of mesure / and sore ashamed of that falle / Thenne sire Tristram sente vnto syr Palomydes by Gouernaile and prayd hym to Iuste with hym at his request Nay said sire Palomydes as att this tyme I wille not Iuste with that knyght / for I knowe hym better than he weneth / And yf he be wrothe / he may ryghte it to morne att the castel of maydens / where he maye see me and many other knyghtes with that came syr Dynadan / and whanne he sawe sire Tristrā wrothe / he lyst not to Iape / lo sayd sir Dynadan / here may a mā preue / Be a man neuer soo good yet maye he haue a falle / & he was neuer soo wyse but he myght be ouersene / and he rydeth wel that neuer fylle / Soo syre Tristram was passynge wrothe and sayd to syre Persydes and to syre Dynadan I wille reuenge me / Ryghte soo as they stood talkyng there / there came by sir Tristram a lykely knyght rydyng passynge soberly and heuyly with a blak shelde / what knyght is that said sir Tristram vnto syr Persydes / I knowe hym well said sir Persydes / for his name is sire Bryaunt of Northwalys / soo he paste on amonge other knyghtes of Northwalys / And there came Page  383 [leaf 192r] in syre launcelot du lake with a sheld of the armes of Cornewaile / and he sente a squyer vnto syr Bryaunt / and requyred hym to Iuste with hym / wel said syr Bryaunt / sythen I am requyred to Iuste / I wille doo what I may / and there syre launcelot smote doune syr Bryaunt from his hors a grete falle / And thenne syr Tristram merueiled what knyght he was that bare the sheld of Cornewaile / what so euer he be said syr Dynadan I warante you he is of Kynge Bannys blood / the whiche ben knyghtes of the moost noble prowesse / in the world for to accompte soo many for soo many / Thenne there came two knyȝtes of Northgales / that one hyghte Hewe de la montayne / and the other syr Madok de la montayne / & they chalengyd fire launcelot foote hote / Syr Launcelot not refusyng hem but made hym redy / with one spere he smote hem doune bothe ouer their hors croupes / and soo sir launcelot rode his way / By the good lord said sire Tristram he is a good knyght that bereth the shelde of Cornewaile / and me semeth he rydeth in the best maner that euer I sawe knyghte ryde / Thenne the kynge of Northgalys rode vnto syre Palomydes / and praid hym hertely for his sake to Iuste with that knyght that hath done vs of Northgalys despyte / Syr said sir Palomydes I am ful lothe to haue adoo with that knyght / and cause why is / for as to morne the grete turnement shalle be / And therfor I wille kepe my self fresshe by my wille / Nay said the kyng of Northgalys I pray you requyre hym of Iustes / syre sayd syr palomydes I wille Iuste at your request / and requyre that knyght to Iuste with me / and often I haue sene a man haue a falle at his owne request

¶ Capitulum xxix

THenne sir palomydes sente vnto sir launcelot a squyer and requyred hym of Iustes / Fair felawe seid sir launcelot / telle me thy lordes name / Syre said the squyer my lordes name is syr Palomydes the good knyght / In good houre said sir launcelot / for there is no knyght that I sawe thys seuen yeres that I had leuer adoo with all than with hym / Page  384 [leaf 192v] And so eyther knyghtes made hem redy with two grete speres Nay said syr Dynadan ye shalle see that sir Palomydes will quyte hym ryght wel / hit may be soo said sir Tristram / but I vndertake that knyght with the sheld of Cornewayle shal gyue hym a falle / I bileue hit not said sir Dynadan / Ryght so they spored their horses / and feutryd their speres / and eyther hytte other / and syr palomydes brake a spere vpon sire launcelot / and he sat and meued not / but sir Launcelot smote hym so lyghtly that he made his hors to auoyde the sadel / and the stroke brake his shelde and the hauberke/ and had he not fallen / he had be slayne / how now said sir Tristram / I wiste wel by the maner of their rydyng bothe that sire Palomydes shold haue a falle / Ryght so sir launcelot rode his way and rode to a well to drynke and to repose hym / and they of Northgalys aspyed hym whyther he rode / and thenne there folowed hym twelue knyghtes for to haue meschyeued hym / for this cause that vpon the morne at the turnement of the castel of maydens that he shold not wynne the vyctory / Soo they came vpon sir launcelot sodenly and vnnethe he myght putte vpon hym his helme / and take his hors but they were in handes with hym / & thenne sir launcelot gat his spere and rode thorou them / and there he slewe a knyght and brake his spere in his body / Thenne he drewe his swerd and smote vpon the ryght hand and vpon the lyfte hand soo that within a fewe strokes he had slayne other thre knyghtes / and the remenaunt that abode he wounded hem sore alle that dyd abyde / Thus syr launcelot escaped from his enemyes of Northwalys / and thenne sir launcelot rode his way tyl a frende & lodged hym tyl on the morne / for he wold not the fyrste daye haue adoo in the turnement by cause of his grete labour / And on the fyrst day the was with kyng Arthur there as he was set on hyhe vpon a schaffold to discerne who was best worthy of his dedes / So sir Launcelot was with kyng Arthur / and Iusted not the fyrst daye /

¶ Capitulum xxx

NOw torne we vnto sir Tristram de lyones that commaunded Gouernaile his seruaunt to ordeyne hym a blak sheld with none other remembraunce therin / Page  385 [leaf 193r] And soo syre Persydes and syr Tristram departed from their hooste syr Pellounes / and they rode erly toward the turnement / and thenne they drewe hem to kynge Carados syde of Scotland / and anone knyȝtes beganne the felde what of kynge Northgalys party / and what of kynge Carados party / & there began grete party / Thenne there was hurlyng and rasshynge / Ryght soo came in syr Persydes and sire Tristram / and soo they dyd fare that they put the kyng of Northgalys abak Thenne came in syre Bleoberys de ganys and syre Gaherys with them of Northaglys / and thenne was sir Persydes smyten doune / and alle moost slayne / For moo than xl horsmen wente ouer hym / For syr Bleoberys dyd grete dedes of armes and syre Gaherys fayled hym not / whanne sire Tristram byheld them / and sawe hem doo suche dedes of armes / he merueyled what they were / Also sir Tristram thought shame that sir Persydes was soo done to / and thenne he gat a grete spere in his hand / and thenne he rode to sire Gaherys and smote hym doune from his hors / And thenne was sire Bleoberys wroth and gate a spere and rode ageynst sir Tristram in grete yre / & there syre Tristram mette with hym / and smote sir Bleoberys from his hors / Soo thenne the kynge with the honderd knyghtes was wrothe / and he horsed sire Bleoberys and sir gaherys ageyne / and there beganne a grete medle / and euer sir tristram held them passynge shorte / and euer sir Bleoberys was passynge besy vpon syre Tristram / and there came sire Dynadan ageynst syre Tristram / and sire Tristram gaf hym suche a buffet that he swouned in his sadel / Thenne anone sir Dynadan cam to sire Tristram / and said syr I knowe the better than thow wenest / But here I promyse the my trouthe I wille neuer come ayenst the more / for I promyse the that swerd of thyn shal neuer come on myn helme / with that came sir Bleoberys / and syr Tristram gaf hym suche a buffet that doune he leyd his hede / and thenne he raught hym so sore by the helme / that he pulled hym vnder his hors feet / And thenne kyng Arthur blewe to lodgynge / Thenne syre Tristram departed to his pauelione / and sire Dynadan rode with hym / and sire Persydes & kyng Arthur thenne and the kynges vpon bothe partyes merueylled what knyght that was with the blak shelde / Many said their Page  386 [leaf 193v] aduyse / and some knewe hym for syre Tristram / and helde their pees and wold nought say / Soo that fyrste day kyng Arthur and alle the kynges and lordes that were Iuges gaf sir Tristram the pryce / hou be hit they knewe hym not but named hym the knyght with the black sheld

¶ Capitulum xxxj

THenne vpon the morne sire Palomydes retorned from the kynge of Northgalys / and rode to kyng Arthurs syde where was kynge Carados and the kynge of Irland / & syr launcelots kynne and sir Gawayns kynne / Soo sire palomydes sente the damoyfel vnto sire Tristram that he sente to seke hym whanne he was oute of his mynde in the forest / and thys damoysel asked sire Tristram / what he was / and what was his name / As for that said sir Tristram telle sir Palomydes ye shalle not wete as at this tyme vnto the tyme I haue broken two speres vpon hym / But lete hym wete thus moche said sir Tristram / that I am the same knyghte that he smote doune in ouer euenyng at the turnement & telle hym playnly / on what party that syre Palomydes be / I wille be of the contrary parte Syre said the damoysel ye shalle vnderstande that sir Palomydes wille be on kyng Arthurs syde / where the moost noble knyghtes of the world ben / In the name of god said sir Tristram / thenne wille I be with the kynge of Northgalys by cause syr Palomydes wille be on kynge Arthurs syde / and els I wold not but for his sake /

¶ Soo whanne kynge Arthur was come they blewe vnto the felde / and thenne there began a grete party / and soo kynge Carados Iusted with the kynge of the honderd knyghtes / and there kynge Carados hadde a falle / thenne was there hurlynge and rasshynge / and ryght so cam in knyghtes of kynge Arthurs / and they bare on bak the kynge of Northgalys knyghtes / Thenne sir Tristram came in and beganne so roughly and soo bygly that there was none myght withstande hym / and thus sire Tristram dured longe /

¶ And at the last syr Trystram felle amonge the felauship of kynge Ban / and there felle vpon hym syr Bors de ganys / and syr Ector de marys / and sire Blamor de ganys / & many Page  387 [leaf 194r] other knyghtes / And thenne sir Tristram smote on the ryght hand and on the lyfte hand that alle lordes and ladyes spak of his noble dedes / But at the last syre Tristram shold haue had the werse / had not the kynge with the honderd knyghtes ben / And thenne he came with his felauship and rescowed sir Tristram / and brought hym awey from tho knyghtes that bare the sheldes of Cornewaile / and thenne sir Tristram sawe another felauship by them self / and there were a xl Knyghtes to gyder / and sir Kay the Seneschal was there gouernour / Thenne sire Tristram rode in amongest them / and there he smote doune syr Kay from his hors / and there he sared among tho Knyghtes lyke a grey hound among conyes / Thenne syre launcelot fond a Knyght that was sore wounded vpon the hede / Sir said sir launcelot who wounded you so sore / Sire he said a Knyght that bereth a black shelde / and I maye curse the tyme that euer I mette with hym for he is a deuyl and no man Soo sire launcelot departed fro hym / & thought to mete with sir Tristram / and soo he rode with his swerd drawen in his hand to seke sir Tristram / and thenne he aspyed hym how he hurled here and there / and at euery stroke syr Tristram wel nygh smote doune a knyght / O mercy Ihesu said the kynge syth the tyme I bare armes sawe I neuer no knyght do so merueillous dedes of armes / And yf I shold sette vpon this knyght said sir Launcelot to hym self I dyd shame to my self / & there with al sir launcelot put vp his swerd / And then̄e the Kyng with the C Knyȝtes / and an honderd more of Northwalys set vpon the twenty of sir launcelots kyn / and they xx Knyȝtes held them euer to gyder / as wylde swyne and none wold faile other / & so whan sir Tristram beheld the noblesse of these xx Knyghtes / he merueiled of their good dedes / for he sawe by their fare and by theil reule that they had leuer deye than auoyde the felde /

¶ Now Ihesu saide syre Tristram wel maye he be valyaunte and ful of prowesse that hath suche a sorte of noble Knyghtes vnto his kynne / and ful lyke is he to be a noble man that is their leder and gouernour / he mente hit by sir Launcelot du Lake /

¶ Soo whanne syre Tristram had beholden them long / he thouȝt shame to see / ij / C knyȝtes batteryng Page  388 [leaf 194v] vpon twenty knyghtes /

¶ Thenne sire Tristram rode vnto the kynge with the honderd knyghtes / and said syre leue youre fyghtynge with tho twenty knyghtes / for ye wynne no worship of them / ye be soo many / and they soo fewe / And wete ye well they wille not oute of the felde I see by their chere and countenaunce / and worship gete ye none and ye slee them / therfore leue your fyghtynge with them / for I to encreace my worship / I wyll ryde to the twenty knyghtes and helpe them with all my myghte and power /

¶ Nay said the kynge with the honderd knyghtes / ye shall not do so / Now I see youre courage and curtosy / I wille withdrawe my knyȝtes for your pleasyr / for euermore a good knyght wylle fauoure another / and lyke wille drawe to lyke /

¶ Capitulum xxxij

THenne the kyng with the honderd knyghtes withdrewe his knyghtes / And al this whyle and long tofore syr launcelot had watched vpon syr Tristram with a very purpos to haue felaushipped with hym / And thenne sodenly syr Tristram / syr Dynadan / and Gouernaile his man rode their waye in to the forest that no man perceyued where they wente / Soo thenne kynge Arthur blewe vnto lodgynge / and gaf the kynge of Northgalys the pryce by cause syr Tristram was vpon his syde / Thenne syr launcelot rod here and there so wood as lyon that fauted his fylle by cause he had loste syre Tristram / and soo he retorned vnto kynge Arthur / and thenne in alle the felde was a noyse that with the wynde hit myght be herd two myle thens / how the lordes and ladyes cryed the knyght with the blak shelde hath wonne the felde

¶ Allas said kynge Arthur where is that knyght become / hit is shame to alle tho in the felde so to lete hym escape awey from you / but with gentylnes and curtosy ye myght haue brought hym vnto me to the castel of maydens

¶ Thenne the noble kynge Arthur wente vnto his knyghtes and comforted them in the best wyse that he coude / and sayd / my fayre felawes be not dysmayed / how be hit ye haue loste Page  389 [leaf 195r] the felde this daye and many were hurte and sore wounded / and many were hole /

¶ My felawes said kynge Arthur loke that ye be of good chere / for to morne I wille be in the feld with you and reuenge you of youre enemyes

¶ Soo that nyght Kynge Arthur and his knyghtes reposed them self /

¶ The damoysel that came from la Beale Isoud vnto syr Tristram alle the whyle the turnement was adoynge she was with Quene Gueneuer / and euer the Quene asked her for what cause she came in to that Countrey

¶ Madame she ansuerd I come for none other cause but from my lady la Beale Isoud to wete of your welfare / For in no wyse she wold telle the Quene that she came for syr Tristrams sake / Soo this lady dame Brangwayne took her leue of Quene Gueneuer / and she rode after syr Tristram / And as she rode thurgh the forest she herd a grete crye / thenne she commaunded her squyer to goo in to that forest to wete what was that noyse / and soo he came to a welle and there he fond a Knyght bounden tyl a tree cryeng as he had ben wode and his hors and his harneis standynge by hym / And whan he aspyed the squyer / ther with he abraide / and brake hym self loos and took his swerd in his hand / and ranne to haue slayne that squyer / Thenne he took his hors and fledde all that euer he myght vnto dame Brangwayne / and told her of his aduenture / Thenne she rode vnto syr Tristrams pauelione / and told sire Tristram what aduenture she had fonde in the forest / Allas said syr Tristram vpon my heede there is somme good Knyghte at meschyef / Thenne sire Tristram tooke his hors and his swerd / and rode thyder / there he herd how the Knyght complayned vnto hym self and sayd / I woful knyght syre palomydes what mysauenture befalleth me / that thus am defoiled with falshede and treason thorou syre Bors and syre Ector / Allas he sayde why lyue I soo longe / And thenne he gat his swerd in his handes / and maade many straunge sygnes and tokens / and soo thorou his ragynge he threwe his swerd in to that fontayne

¶ Thenne sir Palomydes wayled and wrange his handes / And at the laste for pure sorow he ranne in to that Fontayne ouer his bely / and soughte after Page  390 [leaf 195v] his swerd / Thenne sir Tristram sawe that and ranne vpon syr Palomydes / and helde hym in his armes fast / what arte thou said Palomydes that holdeth me soo / I am a man of this forest that wold the none harme / Allas said sire Palomydes I maye neuer wynne worship where syr Tristram is / For euer where he is / and I be there thenne gete I no worship / And yf he be awey / for the moost party I haue the gree / onles that sir Launcelot be there or syr Lamorak / Thenne sire Palomydes said ones in Irland syr Tristram putte me to the werse / and another tyme in Cornewaile and in other places in this land What wold ye do said syre Tristram & ye had sir Tristram / I wold fyghte with hym said sir Palomydes and ease my hert vpon hym / and yet to saye the sothe syre Tristram is the gentelyst knyght in this world lyuynge / what wil ye doo sayd sir Tristram wille ye goo with me to youre lodgynge / Nay sayde he I wille goo to the kynge with the honderd knyghtes / for he rescowed me from sire Bors de ganys / and sir Ector / & els had I ben slayne traitourly / Syre Tristram said hym suche kynde wordes that syre Palomydes wente with hym to his lodgynge / Thenne Gouernaile wente to fore / and charged dame Brangwayn to goo oute of the way to her lodgynge / and byd ye syre Persydes that ye make hym no quarels / And so they rode to gyders tyl they came to sire Tristrams pauelione / and there syre Palomydes had alle the chere that myght be had all that nyghte / But in no wyse sire Palomydes myȝt not knowe what was syr Tristram / and soo after souper they yede to reste And syr Tristram for grete trauaile slepte tylle it was daye / And syr Palomydes myghte not slepe for anguysshe / and in the daunynge of the daye he tooke his hors pryuely / and rode his waye vnto syr Gaherys and vnto syr Sagramour le desyrus / where they were in their pauelions / for they thre were felawes at the begynnynge of the turnement / And thenne vpon the morne the kynge blewe vnto the turnement vpon the thyrdde daye /

¶ Capitulum xxxiij /

Page  391 [leaf 196r]

SOo the kynge of Northgalys and the kynge with the honderd knyghtes they two encountred with kyng carados and with the kynge of Irland / and there the kynge with the honderd knyghtes smote doune kynge Carados / and the kynge of Northgalys smote doune the kynge of Irland / With that came in syr Palomydes / and whan he cam he made grete werke / for by his endented shelde he was well knowen / Soo came in kynge Arthur / and dyd grete dedes of armes to gyders / and putte the kynge of Northgalys and the kynge with the honderd knyghtes to the werse / With this came in syr Tristram with his black shelde / And anone he Iusted with syre palomydes / and there by fyne force syr Tristram smote syre palomydes ouer his hors croupe / Thenne kynge Arthur cryed Knyght with the black shelde make the redy to me / and in the same wyse sir Tristram smote kynge Arthur / And thenne by force of kyng Arthurs knyghtes the kynge and sir palomydes were horsed ageyne / Thenne kyng Arthur with a grete egre herte he gate a spere in his hand / and therupon the one syde he smote syr Tristram ouer his hors / Thenne foote hote syr Palomydes cam vpon sir Tristram as he was vpon foot to haue ouer ryden hym / Thenne sir Tristram was ware of hym / & there he stouped a syde / and with grete yre he gate hym by the arme / and pulled hym doune from his hors / Thenne syre palomydes lyghtely arose / and thenne they dasshed to gyder myghtely with their swerdes / and many kynges / Quenes and lordes stode and beheld them / And at the laste syre Tristram smote syre palomydes vpon the helme thre myȝty strokes / and at euery stroke that he gaf hym he said this for syre Tristrams sake / With that syre Palomydes felle to the erthe grouelynge / Thenne came the kynge with the honderd knyghtes / & broughte syre Tristram an hors / and soo was he horsed ageyn By thenne was syr Palomydes horsed / and with grete yre he Iusted vpon syr Tristram with his spere as hit was in the reyste and gaf hym a grete dasshe with his swerd /

¶ Thenne sir Tristram auoyded his spere / and gate hym by the neck with his bothe handes / and pulled hym clene oute of his sadel / and soo he bare hym afore hym the lengthe of ten speres / & thenne in the presence of hem al he lete hym falle at his Page  392 [leaf 196v] aduenture / Thenne sire Tristram was ware of kynge Arthur / with a naked suerd in his hand / and with his spere sir Tristram ranne vpon kynge Arthur / and thenne kynge Arthur boldely abode hym and with his swerd he smote atwo his spere / and there with alle syre Tristram stonyed / and soo kynge Arthur gaf hym thre or four grete strokes or he myȝt gete out his swerd / and at the last sir Tristram drewe his swerd and assailed other passynge hard / with that the grete prees departed / thenne sir Tristram rode here and there and dyd his grete payne that xj of the good knyghtes of the blood of kynge Ban that was of sire launcelots kyn / that daye syre Tristram smote doune / that alle the estates merueilled of his grete dedes and alle cryed vpon the knyght with the black sheld

¶ Capitulum xxxiiij

THenne this crye was soo large / that sir launcelot herd it / And thenne he gate a grete spere in his hand / and came towardes the crye / Thenne sir launcelot cryed / the knyght with blak shelde make the redy to Iuste with me / Whanne sire Tristram herd hym say so he gate his spere in his hand / and eyther abeyshed doun their hedes / and came to gyder as thonder / and sire Tristrams spere brake in pyeces / and syr launcelot by male fortune stroke sir Tristram on the syde a depe wound nyghe to the dethe / But yet syr Tristram auoyded not his sadel / and soo the spere brak / there with all sir tristram that was wounded gate oute his swerd / and he rasshed to sir launcelot / and gaf hym thre grete strokes vpon the helme that the fyre sprange there oute / and sir launcelot abeyshed his hede lowely toward his sadel bowe / And there with alle sir tristram departed from the felde / for he felte hym soo woūded that he wende he shold haue dyed / and sir Dynadan aspyed hym and folowed hym in to the forest / Thenne sir launcelot abode & dyd many merueyllous dedes / Soo whan fire Tristram was departed by the forests syde / he alyght & vnlaced his harneis and fresshed his woūd / thēne wende sir Dynodan that he shold Page  393 [leaf 197r] haue dyed / Nay nay saide sire Tristram / Dynadan / neuer drede the / for I am herte hole / & of this wounde I shal soone be hole by the mercy of god /

¶ By that sir Dynadan was ware where came palomydes rydynge streyghte vpon them / And thenne syre Tristram was ware that syre Palomydes came to haue destroyed hym / and so syre Dynadan gaf hym warnyng and saide sire Tristram my lord ye are soo sore wounded that ye may not haue adoo with hym / therfore I wille ryde ageynst hym and doo to hym what I maye / And yf I be slayne ye maye praye for my soule and in the meane whyle ye maye withdrawe you and goo in to the castel / or in the foreste that he shalle not mete with you /

¶ Syre Tristram smyled and said I thanke you syre Dynadan of your good wylle / but ye shalle wete that I am able to handle hym / And thenne anone hastely he armed hym and took his hors / and a grete spere in his hand and said to syre Dynadan Adieu / & rode toward syre Palamydes a softe paas

¶ Thenne whanne sire Palomydes sawe that / he made countenaunce to amende his hors / but he dyd hit for this cause / For he abode sire Gaherys that came after hym /

¶ And whanne he was come he rode toward syre Tristram /

¶ Thenne syre Tristram sente vnto syr palomydes and requyred hym to Iuste with hym / And yf he smote doune sir Palomydes / he wold doo no more to hym / And yf it so happend that sire Palomydes smote doune syr Tristram he badde hym do his vtteraunce / So they were accorded / thenne they mette to gyders / and syre Tristram smote doune sir palomydes / that he had a greuous falle / soo that he laye stylle as he hadde ben dede / And thenne sire Trystram ranne vpon syr Gaherys / and he wold not haue Iusted But whether he wolde or not syre Tristram smote hym ouer his hors croupe that he laye stylle as though he had ben dede / And thenne syr Tristram rode his waye and lefte syre Persydes squyer within the pauelions / and syre Tristram and syre Dynadan rode to an old knyghtes place to lodge them / And that olde knyght had fyue sones at the turnement / for whome he prayed god hertely for their comyng home /

¶ And so as the frensshe book faith they cam home al / v / wel beten / And whan syr Tristram departed in to the forest syr laūcelot held alwey Page  394 [leaf 197v] the stoure lyke hard as a man araged that took no heede to hym self / and wete ye wel there was many a noble knyghte ageynst hym / And whanne kyng Arthur sawe sir Launcelot doo soo merueyllous dedes of armes / he thenne armed hym / & took his hors and his armour / and rode in to the felde to helpe syr launcelot / and so many knyghtes came in with kyng Arthur / and to make short tale in conclusion the kyng of Northgalys / and the kynge of the honderd knyghtes were putte to the wers / and by cause syre launcelot abode and was the last in the feld / the pryce was yeuen hym / But sir Laūcelot wold neyther for kyng / Quene ne knyghte haue the pryce / but where the crye was cryed thorugh the felde / syr launcelot sir launcelot hath wonne the felde this day / syre Launcelot lete make an other crye contrary syr Tristram hath wonne the feld / for he baganne fyrst and last he hath endured / and soo hath he done the fyrst day / the second and the thyrd day /

¶ Capitulum xxxv

THenne alle the estates and degrees hyhe and lowe sayd of syr launcelot grete worship / for the honour that he dyd vnto syr Tristram / and for that honour doyng to sir Tristram he was at that more preysed and renoumed than and he had ouerthrowen v C knyghtes / and all the peple holy for this gentylnes / fyrst the estates bothe hyhe and lowe / and after the comynalte cryed at ones syre Launcelot hath wonne the felde who soo euer saye nay / Thenne was syre Launcelot wroth and ashamed / and soo there with alle he rode to kynge Arthur / Allas said the kynge we are alle dysmayed that syr Tristram is thus departed from vs / By god said kynge Arthur he is one of the noblest knyȝtes that euer I sawe hold spere or swerd in hand / and the moost curteyst knyght in his fyghtyng / for ful hard I sawe hym sayd kyng Arthur whanne he smote syr Palomydes vpon the helme thryes / that he abasshed his helme with his strokes / and also he said / here is a stroke for syr Tristram / and thus thryes he sayd / Thenne kynge Arthur / syr launcelot / and sire Dodynas le saueage took their horses to seke sir Tristram / and by the menes Page  395 [leaf 198r] of syr Persydes / he had told kyng Arthur where syr Tristram was in his pauelione / but whanne they came there / syr Tristram and sir Dynadan were gone / thenne kynge Arthur and syr launcelot were heuy / and retorned ageyne to the castel of maydens makyng grete dole for the hurte of syre Trystram / & his sodeyne departynge / Soo god me helpe said kyng Arthur I am more heuy that I can not mete with hym / thenne for al the hurtes that alle my knyghtes haue had at the turnement Ryght soo came sir Gaherys and told kyng Arthur how syr Tristram had smyten doune syr Palomydes / and it was atte syr Palomydes owne request / Allas said Kyng Arthur that was grete dishonoure to syre Palomydes in as moche as syre Tristram was sore wounded / and now may we alle kynges and knyȝtes and men of worship saye that syre Tristram may be called a noble knyght and one of the best Knyghtes that euer I sawe the dayes of my lyf / For I wille that ye al kynges and Knyghtes knowe said Kynge Arthur that I neuer sawe Knyghte doo so merueyllously as he hath done these thre dayes / for he was the first that began and that lengest held on sauf last day / And though he was hurte it was a manly aduenture of two noble Knyghtes / and whan two noble men encountre nedes must the one haue the werse lyke as god wil suffre at that tyme /

¶ As for me said sir launcelot for alle the landes that euer my fader lefte me I wold not haue hurte sir Tristram and I had knowen hym at that tyme / that I hurt hym was for I sawe not his sheld / For and I had sene his black sheld / I wold not haue medled with hym for many causes/ for late he dyd as moche for me as euer dyd Knyght and that is wel knowen that he had adoo with thyrtty Knyȝtes / and no helpe saue syr Dynadan / And one thynge shalle I promyse said syr launcelot / syr Palomydes shalle repente it as in his vnkyndely delynge for to folowe that noble knyght that I by myshap hurted thus / Syr launcelot sayd alle the worship that myght be said by sir Tristram / Thenne kyng Arthur made a grete feest to alle that wold come / And thus we lete passe Kynge Arthur / and a lytyl we wille torne vnto sir Palomydes that after he had a falle of sire Tristram / he was nyghe hand araged oute of his wyt for despyte of sir Tristram Page  396 [leaf 198v] And soo he folowed hym by aduenture / And as he came by a ryuer in his woodenes / he wold haue made his hors to haue lepte ouer / and the hors fayled footynge / and felle in the Ryuer / wherfore syre palomydes was adrad left he shold haue ben drouned / and thenne he auoyded his hors / and swamme to the land / and lete his hors goo doune by aduenture /

¶ Capitulum xxxvj /

ANd whanne he came to the land he took of his harneis / and satte rorynge and cryenge as a man oute of his mynde / Ryght so came a damoysel euen by syr Palomydes that was sente fro syr Gawayne and his broder vnto sir mordred that lay seke in the same place with that old knyȝt where syr Tristram was / For as the Frensshe book saith syr Persydes hurte soo syr Mordred a ten dayes afore / and had not ben for the loue of sir Gawayne and his broder / syr Persydes had slayne sir Mordred / and soo this damoysel came by sir palomydes / and she and he had langage to gyder / the whiche pleasyd neyther of them / and soo the damoysel rode her wayes tyl she came to the old knyghtes place / & there she told that old knyght how she mette with woodest knyght by aduenture that euer she mette with all / what bare he in his sheld said sir Tristram / hit was endented with whyte and black saide the damoysel / A said sir Tristram that was sir palomydes / the good knyght / For wel I knowe hym said sir Tristram for one of the best knyghtes lyuynge in this realme / Thenne that old knyght took a lytel hackney and rode for syre palomydes / and brought hym vnto his owne manoyr / and ful wel knewe sire Tristram syr Palomydes / but he said but lytel / for at that tyme syr Tristram was walkyng vpon his feet / and wel amended of his hurtes / and alweyes whan sire Palomydes sawe syr Tristram / he wold behold hym ful merueillously / And euer hym semed that he hadde sene hym / Thenne wold he saye vnto syre Dynadan and euer I may mete with syre Tristram he shal not escape myn handes / I merueile said sir Dynadan þtPage  397 [leaf 199r] ye booste behynde syr Tristram / for it is but late that he was in youre handes / and ye in his handes / why wold ye not holde hym whanne ye hadde hym / for I sawe my self twyes or thryes that ye gat but lytel worship of sir Tristram / thenne was syr Palomydes ashamed / Soo leue we them a lytyl whyle in the old castel / with the old knyght sir Darras /

¶ Now shall we speke of Kynge Arthur / that said to sir Launcelot had not ye ben / we had not lost syre Tristram for he was here dayly vnto the tyme ye mette with hym / and in an euylle tyme sayd Arthur ye encountred with hym / My lord Arthur said Launcelot ye putte vpon me that I shold ben cause of his departycyon / god knoweth hit was ageynste my wille / But whan men ben hote in dedes of armes ofte they hurte their frendes as wel as their foes / And my lord said sir launcelot ye shal vnderstande that sir Tristram is a man that I am loth to offende for he hath done for me more than euer I dyd for hym as yet / But thenne sir Launcelot made brynge forth a book and thēne sir launcelot said / here we are ten Knyghtes that wil swere vpon a book neuer to reste one nyght where we rest another this twelue moneth vn tyl that we fynde syr Tristram / And as for me said syre Launcelot I promyse you vpon this book that and I may mete with hym / outher with fayrenes or foulnesse I shalle brynge hym to this courte / or els I shalle dye therfore / And the names of these ten knyghtes that hadde vndertake this quest were these folowynge / Fyrst was sir Launcelot / syr Ector de Marys / syr Bors de ganys and Bleoberis and syre Blamor de ganys / and Lucan the botteler / syr Vwayne / syr Galyhud / Lyonel and Gaylodyn / Soo these x noble knyghtes departed from the courte of kynge Arthur / and soo they rode vpon their quest to gyders vntyl they came to a crosse where departed four wayes / and there departed the felauship in four to seke syr Tristram / And as syr launcelot rode by aduenture he mette with dame Brangwayn that was sent in to that countrey to seke sir Tristram / and she fled as faste as her palfrey myght goo / Soo sire Launcelot mette with her and asked her why she fledde /

¶ A fayre knyghte said dame Brangwayne I flee for drede of my lyf / for here foloweth me syr Breuse saunce pyte to slee me / Hold you nyghe me sayd Page  398 [leaf 199v] sir launcelot / Thenne whanne sire Launcelot sawe sir Breuse saunce pyte / syre launcelot cryed vnto hym / and said / fals knyght destroyer of ladyes and damoysels / now thy last dayes be come / Whanne sire Breuse saunce pyte sawe sire launcelots shelde he knewe hit wel / for at that tyme he bare not the armes of Cornewaile / but he bare his owne shelde / And thenne syre Breuse fled / and syr Tristram folowed after hym / But sir Breuse was soo wel horsed that whan hym lyst to flee he myght wel flee / and also abyde whan hym lyft / And thenne sire launcelot retorned vnto dame Brangwayne and she thanked hym of his grete labour /

¶ Capitulum xxxvij

NOw wille we speke of sir Lucan the buttelere that by fortune he came rydyng to the same place there as was syr Tristram / and in he came in none other entente / but to aske herberowe / thenne the porter asked what was his name / Telle your lord that my name is syr Lucan the botteler a knyghte of the round table / Soo the porter wente vnto syre Darras lord of the place / and told hym who was there to aske herborouȝ / Nay nay seid syr Daname that was neuewe to syr Darras / saye hym that he shalle not be lodged here / But lete hym wete that I syr Daname wyll mete with hym anon and bydde hym make hym redy / So sire Daname came forth on horsbak / and there they mette to gyders with speres / and sir Lucan smote doune syr Daname ouer his hors croupe / and thēne he fledde in to that place / and sir Lucan rode after hym / & asked after hym many tymes / Thenne syr dynadan said to sire Tristram hit is shame to see the lordes cosyn of this place defoiled / Abyde said sir Tristram and I shalle redresse it / and in the meane whyle syr Dynadan was on horsbak and he Iustid with Lucan þe botteler / & ther sir lucan smote doune dynadā thurȝ the thyck of the thyghe / and soo he rode his way / and sire tristram was wrothe that sir Dynadan was hurte / & folowed after and thought to auenge hym / and within a whyle he ouertook sir lucan / and badde hym torne / and soo they mette to gyders soo that sire Tristram hurt sir Lucan passynge sore / and Page  399 [leaf 200r] gaf hym a falle / With that came sire Vwayne a gentyl knyȝt And whanne he sawe fire Lucan soo hurte / he called syre tristram to Iuste with hym / Faire knyght said sire Tristram telle me your name I requyre you / Syre knyghte wete ye wel my name is syre Vwayne le fyse de roy Vreyne / A saide sire Tristram by my wille I wold not haue adoo with you at no tyme / ye shalle not soo said sir Vwayne but ye shalle haue adoo with me / And thenne sire Tristram sawe none other boote but rode ageynst hym and ouerthrewe syr Vwayn and hurte hym in the syde / and soo he departed vnto his lodgynge ageyne / And whanne sire Dynadan vnderstood that syr Tristram had hurte sir Lucan / he wold haue ryden after syr Lucan for to haue slayne hym / but sir Tristram wold not suffre hym /

¶ Thenne syr Vwayne lete ordeyne an hors lytter / and brought sir Lucan to the abbey of Ganys / and the castel there by hyght the castel of Ganys / of the whiche syr Bleoberys was lord / And at that Castel sire launcelot promysed alle his felawes to mete in the quest of syr Tristram / Soo whan sir tristram was come to his lodgyng ther cam a damoisel þt told sir Darras that thre of his sones were slayne at that turnement and two greuously woūded that they were neuer lyke to helpe them self / And alle this was done by a noble knyghte that bare the black shelde / and that was he that bare the pryce /

¶ Thenne came there one and told syr Darras that the same knyght was within hym that bare the black sheld / Thenne sir Darras yede vnto sir Tristrams chamber / and there he fond his sheld shewed it to the damoysel / A syr said the damoysel that same is he / that slewe your thre sones / Thenne withoute ony taryenge sir Darras putte syre Tristram and syre Palomydes and syr Dynadan within a strong pryson / and there sir Tristram was lyke to haue dyed of grete sekenesse / and euery day syr Palomydes wold repreue sir Tristram of old hate betwixe them / And euer sir Tristram spak fayre and said lytel / But whan sir Palomydes sawe the fallynge of sekenesse of sir Tristram thenne was he heuy for hym / and comforted hym in alle the best wyse he coude / And as the Frensshe booke saith there came fourty knyghtes to sire Darras / that were of his owne kyn / and they wold haue slayne sire Tristram andPage  400 [leaf 200v] his two felawes / but sire Darras wold not suffre that but kepte them in pryson / and mete and drynke they had / So sire Tristram endured there grete payne / for sekenesse had vndertake hym / and that is the grettest payne a prysoner maye haue For alle the whyle a prysoner may haue his helthe of body / he maye endure vnder the mercy of god and in hope of good delyueraunce / But whanne sekenes toucheth a prysoners body / thenne may a prysoner say al welthe is hym berafte / and thenne he hath cause to wayle and to wepe / Ryȝt so dyd syre Tristram whanne sekenes had vndertake hym / for thenne he tooke suche sorou that he had almost slayne hym self

¶ Capitulum xxxviij

NOw wille we speke and leue sir Tristram / syre Palomydes / & syr Dynadan in pryson / and speke we of other knyghtes that soughte after syre Tristram many dyuerse partyes of this land / and some yede in to Cornewaile / and by aduenture syr Gaheryse neuewe vnto kyng Arthur came vnto Kynge Mark / and there he was wel receyued / and satte atte kynge Marks owne table & ete of his owne messe /

¶ Thenne kynge Mark asked sir Gaheryse what tydynges there were in the royalme of Logrys / Syre said syr Gaheryse the Kyng regneth as a noble knyght / and now but late there was a grete Iustes and turnement as euer I sawe ony in the realme of Logrys / and the moost noble knyghtes were at that Iustes / But there was one knyght that dyd merueyllously thre dayes / and he bare a black shelde / and of alle knyghtes that euer I sawe he preued the best knyȝt / thrnne said Kyng mark that was syre launcelot or syre palomydes the paynym / Not soo said syr Gaherys / for bothe syre launcelot and sire Palomydes were on the contrary party ageynst the Knyght with the blak shelde / thenne was it sir Tristram said the kyng / ye said sir Gaheryse And there with all the Kyng smote doun his hede / & in his herte he feryd sore that syre Tristram shold gete hym suche worship in the Royame of Logrys / where thorou that he hym self shold not be able to withstande hym / Thus syre Gaheryse Page  401 [leaf 201r] had grete chere with kynge Marke / and with quene la Beale Isoud the whiche was gladde of syr Gaheryse wordes / For wel she wist by his dedes and maners / that it was syr Tristram / And thenne the kynge made a feest Royal / and to that feest came sir Vwayne le fyse de roy Vreyne / and somme callid hym Vwayne le blaunche maynys / And this syr Vwayn chalengyd alle the knyghtes of Cornewaile / Thenne was the kyng woode wroth that he had no knyghtes to ansuer hym / Thenne sire Andred neuewe vnto kynge Mark lepte vp and said I wille encountre with syr Vwayne / Thenne he yede and armed hym and horsed hym in the best maner / And there syre Vwayne mette with syre Andred and smote hym doune that he swouned on the erthe / Thenne was kynge Marke sory and wrothe oute of mesure that he had no knyghte to reuenge his neuewe sir Andred / Soo the kynge called vnto hym syr Dynas the seneschal / and praid hym for his sake to take vpon hym to Iuste with sir Vwayne / Syr said syr Dynas I am ful lothe to haue adoo with ony knyght of the round table / yet said the kyng for my loue take vpon the to Iuste / Soo syr Dynas made hym redy / and anone they encountred to gyders with grete speres / but sire Dynas was ouerthrowen hors and man a grete falle / who was wrothe but kynge Marke / Allas he said haue I no knyght that wille encountre with yonder knyghte Syr said sir Gaheryse for your sake I wille Iuste / So sir Gaherys made hym redy / and whanne he was armed he rode in to the felde / And whanne sir Vwayne sawe syr Gaheryses sheld he rode to hym and said / sir ye doo not youre parte / For sire the fyrst tyme ye were made Knyght of the round table ye sware that ye shold not haue a do with your felauship wetyngly And par dy sir Gaheryse ye knewe me wel ynouȝ by my shelde & so do I knowe you by your sheld / and thouȝ ye wold breke your othe / I wold not breke myn / for there is not one here nor ye that shall thynke I am aferd of yow / but I durst ryght wel haue adoo with you / and yet we be sister sones / Thenne was sir Gaheryse ashamed / and soo there with alle euery knyght wente their way / and sir Vwayne rode in to the countrey / Thenne kyng mark armed hym and tooke his hors and his spere with a squyer with hym / And thenne he rode afore sir Page  402 [leaf 201v] Vwayne / and sodenly at a gap he ranne vpon hym as he that was not ware of hym / and there he smote hym al most thurgh the body / and there lefte hym / So within a whyle there cam sir Kay / and fonde sir Vwayne / and asked hym how he was hurte / I wote not said sir Vwayne why nor wherfore / but by treason I am sure I gat this hurte / for here came a knyghte sodenly vpon me or that I was ware / and sodenly hurte me /

¶ Thenne there was come syre Andred to seke kynge Marke

¶ Thou traytour knyght said sir kay / and I wiste it were thou that thus traitourly hast hurte this noble knyghte / thow sholdest neuer passe my handes / Syre saide sir Andred I dyd neuer hurte hym / and that I wylle reporte me to hym self / Fy on you fals knyghtes said syr kay / for ye of Cornewaile ar nought worthe / Soo syr kay made cary syr Vwayne to the abbay of the black Crosse / and there he was helyd / And thenne syr Gaherys took his leue of kynge Mark / But or he departed he sayd / syre kynge ye dyd a foule shame vnto you & your Courte whan ye bannysshed sir Tristram out of this coūtrey / for ye neded not to haue doubted no knyght and he had ben here / and soo he departed

¶ Capitulum xxxix

THenne there came syre kay the Seneschal vnto kynge Marke / and there he hadde good chere shewyng outeward / Now sayre lordes said he wille ye preue ony aduenture in the forest of Morris in the whiche I knowe wel is as hard an aduenture as I knowe ony / Syr said sir kay / I wille preue hit / And sir Gaheryse said he wold be auysed For kynge Mark was euer ful of treason / and there with al syr Gaheryse departed and rode his waye / And by the same waye that syre Kay shold ryde / he leyd hym doune to reste chargynge his squyer to wayte vpon sir kay / and warne me whanne he cometh / Soo within a whyle sir kay came rydynge that way / and thenne sir Gaheryse tooke his hors and met hym and sayd sire kay ye are not wyse to ryde at the request of kynge Mark for he deleth alle with treason / Thenne said sire kay I requyre you lete vs preue this aduenture / I shal not fayle Page  403 [leaf 202r] you said sir Gaherys / and soo they rode that tyme tyl a lake / that was that tyme called the peryllous lake / And there they abode vnder the shawe of the wood /

¶ The meane whyle kyng Marke within the castel of Tyntagyl auoyded alle his barōs & alle other sauf suche as were pryuy with hym / were auoyded oute of his chamber / And thenne he lete calle his neuewe sir Andred / and badde arme hym and horse hym lyghtely / & by that tyme it was mydnyght / And soo kynge Marke was armed in blak hors and alle / and soo att a pryuy posterne they two yssued oute with their varlets with them / and rode tylle they came to that lake / Thenne sir Kay aspyed them fyrst and gat his spere / and profered to Iuste / And kynge Mark rode ageynst hym / and smote eche other ful hard / for the mone shone as the bryght day / And there at that Iustes sir Kayes hors fylle doune / for his hors was not so bygge as the kynges hors and sir kayes hors brysed hym ful sore / Thenne sire Gaherys was wrothe that sir kay had a falle / Thenne he cryed knyght sytte thou fast in thy sadel / for I wille reuenge my felawe / Thenne kynge Marke was aferd of syr Gaherys / and so with euyl wylle kynge Marke rode ageynst hym / and sir Gaherys gaf hym suche a stroke that he felle doun / So thenne forth with all syr Gaheryse ranne vnto syr Andred and smote hym from his hors quyte that his helme smote in the erthe / and nyhe had broken his neck / And there with al syr Gaherys alyghte and gate vp sir Kay / And thenne they yode bothe on foote to them / and badde them yelde them / and telle theire names other they shold dye / Thenne with grete payne sire Andred spak fyrst & said hit is kynge Marke of Cornewaile / therfore be ye ware what ye do / and I am sir Andred his cosyn / Fy on you bothe said sir Gaheryse for a fals traitour / and fals treason hast thou wrouȝt / and he both vnder the fayned chere that ye made vs / it were pyte said sir Gaherys that thou sholdest lyue ony lenger / Saue my lyf said kynge Marke and I wil make amendys & consyder that I am a kynge anoynted / it were the more shame said sir Gaherys to saue thy lyf / thou arte a kynge enoynted with creme / and therfore thou sholdest holde with alle men of worship / And therfor thou arte worthy to dye / With that he lasshed at kyng Mark without sayeng ony more &Page  404 [leaf 202v] couerd hym with his sheld and defended hym as he myghte / and thenne sir kay lasshed at sir Andred / and there with all kynge Marke yelded hym vnto syr Gaherys / And thenne he kneled adoune / and made his othe vpon the crosse of the suerd that neuer whyle he lyued he wold be ageynst arraunt knyghtes / And also he sware to be good Frende vnto sir Tristram / yf euer he came in to Cornewaile / By thenne sir Andred was on the erthe / and sir Kay wold haue slayne hym / lete be said sir Gaherys / slee hym not I pray you / It were pyte said syre kay that he shold lyue ony lenger / for this is nygh cosyn vnto syr Tristram / and euer he hath ben a traytour vnto hym / & by hym he was exyled oute of Cornewaile / and therfor I will slee hym sayd sir Kay / ye shalle not said Gaherys sythen I haue gyuen the kynge his lyf / I pray you yeue hym his lyf / and there with alle sir Kay lete hym goo / And soo sir Kay and syre Gaherys rode their way vnto Dynas the Seneschal for by cause they herd say that he loued wel sir Tristram / Soo they reposed them there / and soone after they rode vnto the royamme of Logrys / And soo within a lytel whyle they mette with sire Launcelot that alweyes had dame Bragwayn with hym / to that entente / he wende to haue mette the sooner with sir Tristram / and syr launcelot asked what tydynges in Cornewaile / and whether they herd of sir Tristram or not / Syr Kay and sir Gaherys ansuerd and said that they herd not of hym Thenne they told sir launcelot word by word of theire aduenture / Thenne syr launcelot smyled and said / hard hit is to take oute of the flesshe that is bred in the bone / and soo maade hem mery to gyders

¶ Capitulum xl

NOw leue we of this tale / and speke we of syr dynas that had within the castel a peramour / and she loued another knyghte better than hym / And so whanne syr Dynas wente oute on huntynge / she slypped doune by a tuell / And took with her two brachets / and soo she yede to the knyght that she loued / and he her ageyne /

¶ And whanne sir Page  405 [leaf 203r] Dynas come home / and myst his peramour and his brachets thenne was he the more wrother for his Brachets than for the lady / Soo thenne he rode after the knyght that had his peramour and badde hym torne and Iuste / So syr Dynas smote hym doune that with the falle he brake his legge and his arme / And thenne his lady and peramour cryed sire Dynas mercy / and said she wold loue hym better than euer she dyd / Nay said sir Dynas I shalle neuer truste them that ones bytrayed me / and therfor as ye haue begonne so ende / for I wyll neuer medle with you / And so sir Dynas departed and tooke his brachets with hym / and soo rode to his castel / Now wil we torne vnto sir launcelot that was ryght heuy that he coude neuer here no tydynges of sir Tristram / for al this whyle he was in pryson with sir Darras / Palomydes / & Dynadan / Thenne dame Brangwayne took her leue to goo in to Cornewaile and syr launcelot / syr kay / & syr Gaherys rode to seke sir Tristram in the countrey of Surleuse / Now speketh this tale of sir tristram and of his two felawes / for euery daye syre Palomydes brauled and sayd langage ageynst syr Tristram I merueyle said sir Dynadan of the syr Palomydes / and thou haddest syre Tristram here / thou woldest do hym no harme / For and a wolf and a shepe were to gyders in a pryson / the wolf wold suffre the sheep to be in pees / and wete thou wel said sire Dynadan this same is sire Tristram at a word / and now maist thou doo thy best with hym / & lete see now yf ye can skyfte it with your handes / thenne was sire Palomydes abasshed and said lytyl/ syr Palomydes thenne said syr Tristram / I haue herd moche of your maugre ageynst me / but I wille not medle with you as at this tyme by my wille / by cause I drede the lord of this place that hath vs in gouernaunce / for and I dredde hym not more than I doo the / soone hit shold be skyfte / soo they peaced them self / Ryght soo came in a damoysel and said knyghtes be of good chere for ye are sure of your lyues / and that I herd say my lord syre Darras / Thenne were they gladde alle thre / For dayly they wende they shold haue dyed /

¶ Thenne soone after this syr Tristram fylle seke that he wende to haue dyed / thenne syr Dynadan wepte / and soo dyd sire Palomydes vnder them bothe makyng grete sorou /

¶ Soo a damoysel Page  406 [leaf 203v] came in to them and fonde them mornynge / Thenne she wente vnto sire Darras / and told hym how that myghty knyghte that bare the black shelde was lykely to dye / That shalle not be sayd sir Darras / for god defende whanne Knyghtes come to me for socour that I shold suffre hem to dye within my pryson / Therfor said sir Darras to the damoysel / fetche that knyȝt and his felawes afore me / And thenne anone sir Darras sawe sir Tristram brought afore hym / he said sire Knyghte me repenteth of thy sekenesse / for thou arte called a ful noble knyght / and soo hit semeth by the / And wete ye wel it shall neuer be said that syr Darras shalle destroye suche a noble knyght as thou arte in pryson / how be hit / that thou hast slayn / iij of my sones / where by I was gretely agreued / But now shalt thou goo and thy felawes / and youre harneis & horses haue ben fayre and clene kepte / and ye shall goo where hit lyketh you vpon this couenaunt / that thou Knyght wilt promyse me to be good frende to my sones two that ben now on lyue / and also that thou telle me thy name / Syr said he as for me my name is sir Tristram de Lyones / and in Cornewaile was I born and neuewe I am vnto Kynge Marke / And as for the deth of your sones I myght not doo with alle / For and they had ben the next kyn þt I haue / I myȝt haue done none other wyse/ And yf I had slayne hem by treason or trechery I hadde ben worthy to haue dyed / Alle this I consyder said syr Darras/ that alle that ye dyd was by force of knyghthode / and that was the cause I wold not putte you to deth / But sythe ye be syr Tristram the good knyght I pray you hertely to be my good frend and to my sones / Syr said sire Tristram I promyse yow by the feithe of my body euer whyle I lyue I wille do yow seruyse / for ye haue done to vs but as a naturel Knyghte ought to doo / Thenne sir Tristram reposed hym there tyl that he was amended of his sekenesse / And whanne he was bygge and stronge / they took their leue / and euery knyght took their horses and soo departed and rode to gyders tyl they came to a crosse way / Now felawes said syr Tristram here wylle we departe in sondry wayes / and by cause sire Dynadan hadde the fyrst aduenture of hym I wille begynne

Page  407 [leaf 204r]

¶ Capitulum xlj

SOo as sir Dynadan rode by a welle / he fond a lady makyng grete dole / what eyleth you said sir Dynadan Syre knyght said the lady I am the wofullest lady of the world / for within these fyue dayes / here came a knyght called sir Breuse saunce pyte / and he slewe myn owne broder / And euer syns he hath kepte me at his owne will / and of al men in the world I hate hym moost / And therfor I requyre you of knyghthode to auenge me / for he wille not tary but be here anone / Lete hym come said sire Dynadan / And by cause of honour of alle wymmen I wylle doo my parte / With this cam syr Breuse / And whan he sawe a Knyght with his lady / he was wood wrothe / And thenne he said sir Knyght kepe the from me / soo they hurled to gyder as thonder / and eyther smote other passynge sore / But syre Dynadan putte hym thurgh the sholder a greuous wounde / and or euer sir Dynadan myght torne hym syr Breuse was gone and fledde / Thenne the lady prayd hym to brynge her to a Castel there besyde but four myle thens / and soo sir Dynadan brought her there / & she was welcome / for the lord of that castel was her vnkel / and soo syre Dynadan rode his way vpon his aduenture / Now torne we this tale vnto syre Tristram that by aduenture he cam to a castel to aske lodgynge / wherin was quene Morgan le fay / & soo whan sire Tristram was lete into that castel / he had good chere alle that nyght / And vpon the morne whan he wold haue departed / the Quene said / wete ye wel ye shall not departe lyghtely / for ye are here as a prysoner / Ihesu defende said syr Tristram / for I was but late a prysoner / Fayr knyght sayd the quene ye shalle abyde with me tyl that I wete what ye ar and from whens ye come / And euer the Quene wold set syr Tristram on her owne syde / and her peramour on the other syde / And euer Quene Morgan wold beholde syr Tristram / & ther at the knyght was Ialous / and was in wille sodenly to haue ronne vpon syr Tristram with a swerd / but he lefte it for shame / then̄e the quene said to sir Tristram telle me thy name &Page  408 [leaf 204v] I shalle suffre you to departe whan ye will / vpon that couenaunt I telle you my name is syr Tristram de lyones / A sayd Morgan le fay / and I had wyst that thou sholdest not haue departed soo soone as thou shalt / But sythen I haue maade a promyse / I wille holde hyt / with that thou wilt promyse me to bere vpon the a shelde that I shall delyuer the / vnto the castel of the hard roche where kynge Arthur had cryed a grete turnement / and there I pray you that ye wille be / and to doo for me as moche dedes of armes as ye maye doo / For att the Castel of maydens syr Tristram ye dyd merueillous dedes of armes as euer I herd knyght doo / Madame said syr Tristram lete me see the shelde that I shalle bere / Thenne the shelde was brought forth / and the feld was guldyssh with a kynge and a quene therin paynted / and a knyght standynge aboue them vpon the kynges hede / and the other vpon the quenes / Madame said sir Tristram this is a fayre shelde and a myȝty But what sygnefyeth this kynge and this quene / and that knyght standynge vp bothe their hedes / I shalle telle you said Morgan le fay hit sygnefyeth kynge Arthur and quene gueneuer and a knyght that holdeth them both in bondage and in seruage / who is that knyght said syre Tristram / that shalle ye not wete as at this tyme / said the quene / but as the Frensshe book saith Quene Morgan le fay loued sir launcelot best / and euer she desyred hym / and he wold neuer loue her / nor doo no thyng at her request / and therfor she held many Knyghtes to gyder / for to haue taken hym by strengthe / And by cause she demed that syr Launcelot loued Quene Gueneuer peramour / and she hym ageyne / therfore Quene Morgan le fay ordeyned that sheld to put sir launcelot to a rebuke to that entent that kyng Arthur myght vnderstande the loue bitwene them / Thenne sir Tristram took that sheld and promysed her to bere hit atte turnement at the castel of the hard roche / But sir Tristram knewe not that that sheld was ordeyned ageynst syr launcelot / but afterward he knewe hit

¶ Capitulum xlij

Page  409 [leaf 205r]

SOo thenne sire Tristram took his leue of the Quene / and took the sheld with hym / Thenne came the knyȝte that helde Quene Morgan le fay / his name was syre Hymeson / and he made hym redy to folowe syre Tristram / fayr frende said Morgan le fay ryde not after that knyght / for ye shalle not wynne no worship of hym / Fy on hym coward saide sire Hemyson / for I wyst neuer good knyghte come oute of Cornewaile / but yf hit were syr Tristram de Lyones / what & that be he said she / Nay nay said he / he is with la beale Isoud and this is but a daffyssh knyght / Allas my fair frende ye shalle fynde hym the best knyght that euer ye mette with alle / For I knowe hym better than ye doo / for your sake said sir Hemyson I shalle slee hym / A fayr frende said the Quene me repenteth that ye wylle folowe that knyght / for I fere me sore of youre ageyne comynge / with this / this knyghte rodd his waye woode wrothe / and he rode after syr Tristram as fast as he hadde ben chaced with knyghtes / Whanne sir Tristram herd a knyghte come after hym soo fast / he retorned aboute / and sawe a knyȝt comynge ageynst hym / And whanne he came nyghe to sir Tristram / he cryed on hyghe syr knyght kepe the from me / Thenne they rasshed to gyders as hit had ben thonder / and sir Hemyson brysed his spere vpon syr Tristram / but his harneis was soo good that he myght not hurte hym / And syre Trystram smote hym harder and bare hym thorou the body / and fylle ouer his hors croupe / Thenne sire Tristram torned to haue done more with his swerd / but he sawe soo moche blood go from hym that hym semed he was lykely to deye / And so he departed from hym / and came to a fayre manoyre to an old knyȝt and there syre Tristram lodged

Capitulum xliij

¶ Now leue to speke of sir Tristram / and speke we of the knyght that was wounded to the dethe / thenne his varlet alyght and took of his helme / and thēne he asked his lord whether there were only lyf in hym / there is in me lyf saide the knyghte but hit is but lytyl / and therfore lepe thou vp behynde me / whan thou hast holpen me vp / and holde me fast that I falle not / and brynge me to Quene Morgan le fay / for depe drauȝtes of dethe drawen to my herte that I may not lyue / for I wold fayne speke with her or I dyed / For els my soule wyll Page  410 [leaf 205v] be in grete perylle and I dye / for with grete payne his varlet brought hym to the Castel / and there syr Hemyson fylle doun dede / whanne Morgan le fay sawe hym dede / she made grete sorou oute of reason / And thenne she lete despoylle hym vnto his shyrte / and soo she lete hym putte in to a tombe / And aboute the tombe she lete wryte / Here lyeth syr Hemyson slayne by the handes of sire Tristram de lyones /

¶ Now torne we vnto syre Tristram that asked the knyght his hoost yf he sawe late ony knyghtes aduenturous / Sir he said the last nyght here lodged with me Ector de marys and a damoysel with hym / and that damoysel told me that he was one of the best knyghtes of the world / that is not soo said sir Tristram / for I knowe four better knyghtes of his owne blood / and the fyrst is syr launcelot du lake / calle hym the best knyght / and sir Bors de ganys Syr Bleoberys / syr Blamor de ganys and syr Gaheris / nay said his hoost / sir Gawayne is a better knyght than he / that is not soo said syr Tristram / for I haue mette with hem bothe / & I felte syr Gaherys for the better knyght and sir Lamorak I calle hym as good as ony of them / excepte sir launcelot / Why name ye not sir Tristram said his hoost / for I accompte hym as good as ony of them / I knowe not sire Tristram said tristram / thus they talked and bourded as longe as them lyste / and thenne wente to reste / And on the morne sir Tristram departed and took his leue of his hoost / and rode toward the roche deure / and anone aduenture had sire Tristram but that / & soo he rested not tyl he came to the castel where he sawe fyue C tentys

¶ Capitulum xliiij

THenne the kynge of Scottes and the kyng of Irland helde ageynst kynge Arthurs knyghtes / and there beganne a grete medle / So came in syr Tristram and dyd merueillous dedes of armes / for there he smote doune many knyȝtes / And euer he was afore kynge Arthur with that shelde / And whanne kynge Arthur sawe that shelde / he meruyylled gretely in what entente hit was made / but Quene Gueneuer demed as it was wherfor she was heuy / Thēne was ther a Page  411 [leaf 206r] damoysel of Quene Morgan in a chamber by kynge Arthur / And whan she herd kynge Arthur speke of that shelde / thēne she spak openly vnto kynge Arthur / syre kynge wete ye well this sheld was ordeyned for you to warne you of your shame and dishonour / and that longeth to you and your Quene / And thenne anone that damoysel pyked her awey pryuely / that no man wyst where she was become / Thenne was kynge Arthur sadde and wrothe and asked from whens came that damoysel / there was not one that knewe her / nor wyste where she was become / Thenne Quene Gueneuer called to her sir Ector de marys / and there she made her complaynte to hym / and said I wote wel this sheld was made by Morgan le fay / in despyte of me and sir Launcelot / wherfore I drede me sore lest I shold be destroyed / And euer the kynge bihelde syre Tristram that dyd soo merueillous dedes of armes that he wōdred sore what knyght he myght be / and wel he wyst hit was not syr launcelot / And hit was told hym that syr Tristram was in petyte Bretayne with Isoud la blaunche maynys / for he demyd and he had ben in the realme of Logrys / syr launcelot or somme of his felawes that were in the quest of syr Tristram that they shold haue fond hym or that tyme / So kyng Arthur had merueylle what knyght he myghte be / And euer syr Arthurs eye was on that shelde / Alle that aspyed the Quene / and that made her sore aferd / Thenne euer syr Tristram smote doune knyghtes wonderly to beholde what vpon the ryght hand and vpon the lyfte hand that vnnethe no knyȝt myght withstande hym / And the kyng of Scottes and the kyng of Irland beganne to withdrawe hem / Whanne Arthur aspyed that / he thought that that Knyght with the straunge sheld shold not escape hym / Thenne he called vnto hym syre Vwayn la blaunche maynys / and bad hym arme hym and make hym redy / Soo anone kynge Arthur and sir Vwayne dressid them bifore sir Tristram and requyred hym to telle hem where he had that shelde / Syr he said I had it of Quene Morgan le fay sister vnto kynge Arthur

¶ Soo here endeth this history of this book / for it is the firste book of sire Tristram de Iyones / and the second book of sir tristram foloweth

 
 
 

 

Home -- Biography -- Morte Darthur -- Links -- Transcriptions

I -- II -- III -- IV -- V -- VI -- VII -- VIII -- IX -- X -- XI -- XII -- XIII -- XIV -- XV