(Winchester f. 113v-148; Caxton VII.1-VII.36; Vinaver, Vol.1, pp. 293.1-363.21; Shepherd pp. 177.16-227.23)




f. 113v (VII.I)

i in Arthurs dayes whan he helde Þe Rounde table moste plenou//

re hit fortuned the kynge commaunded that Þe hyȝe feste of Pen//

tecoste sholde be holden at a cite and a castell In tho dayes that

was called Kynke Kenadonne uppon Þe sondys Þat marched nyȝe wa

lys / So evir Þe kynge had a custom Þat at Þe feste of Pentell

coste in especiall a fore oPer festys in the yere he wolde nat go

Þat day to mete vnto Þat he had herde oÞer sawe of a gete mer//

vayle // And for Þat custom all maner of strange adventures com

by fore Arthure as at Þat feste be fore all oÞer festes // And so sir

Gawayne a lytyll to fore Þe none of the day of pentecoste a

spyed at a wyndowe ·iij· men uppon horse bak and a dwarfe

vppon foote and so the ·iij· men a lyght and Þe dwarff kepte Þer

horsis And one of Þe men was hyȝar than the tothir tweyne by

a foote and an half // Than Sir Gawayne wente vnto Þe kyng

and sayde sir go to your mete for here at hande comyth strange

adventures / So Þe kynge wente vnto his mete with many oÞer

kynges And Þer were all Þe knyghtes of Þe rounde table onles that

ony were presoners oÞer slayne at recountyrs // Than at Þe hyȝe

feste euer more they sholde be fulfylled the hole numbir of an :C:

& fyffty for than was Þe rounde table fully complysshed // Ryȝt

so com In to the halle ·ij· men well be sayne and rychely and

vppon Þer sholdyrs Þer lened Þe goodlyest yonge man and Þe fay//

reste Þat euer they all sawe And he was large and longe & brode

In the shuldyrs well vysaged and the largyste & Þe fayreste

handis Þat euer man sye // But he fared as he myght nat go no//

thir bere hym self but yf he lened uppon Þer shuldyrs // Anone

as Þe kynge saw him Þer was made peas and rome & ryght

so they yode with hym vnto the hyȝe deyse with oute seyynge of ony

wordys / Than this yonge muche man pullyd hym a bak

and easyly streyghte vp ryght seynge Þe moste noble kynge

kynge Arthure god you blysse and all your fayre felyshyp &


f. 114 (VII.I)


In especiall the felyshyp of Þe table rounde // And for this cause

I come hydir to pray you and requyre you to gyff me ·iij· gyf//

tys : And they shall nat be vnresenable asked but that ye

may worshypfully graunte hem me and to you no grete

hurte noÞer losse / And Þe fyrste donne and gyffte I woll aske

now & Þe tothir ·ij· gyfftes I woll aske this day ·xij· monÞe wher

fore som euer ye holde your hyȝe feste // Now aske ye seyde kyng

Arthure and ye shall haue your askynge // Now sir this is my

petycion at this feste that ye woll geff me mete & drynke

suffyciauntly for this ·xij· monthe and at Þat day I woll aske

myne oÞer ·ij· gyfftys // My fayre son seyde kyng Arthure aske

bettyr I counseyle Þe for this is is but a symple askyng for

myne herte gyveth me to the gretly Þat Þou arte com of men

of worshyp · And gretly my conceyte fayleth me but Þou shalt

preve a man of ryght grete worshyp // Sir he seyde Þer of be

as be may for I haue asked Þat I woll aske at this tyme // Well

seyde Þe kynge ye shall haue mete & drynke I nowe I nevir

for bade hit my frynde noÞer my foo // But what is thy name

I wolde wete // Sir I can nat tell you / That is mervayle

seyde Þe kynge Þat you knowyste nat thy name and Þou arte one

of Þe goodlyest yonge men Þat euer I saw / Than Þe kyng be toke

hym to Sir Kay the styewarde and charged hym Þat he had of all

maner of metys & drynkes of the beste And also Þat he had of all maner

of fyndynge as though he were a lordys sone // That shall

lytyll nede seyde Sir Kay to do suche coste vppon hym for I

vndirtake he is a vylayne borne & neuer woll make man for

& he had be com of jantyll men he wolde haue axed horse &

anmour · but as he is so he askyth // And sythen he hath no na//

me I shall gyff hym a name whyche shall be called Beaw//

maynes that is to say Fayre handys // And in to Þe kychyn I

shall brynge hym And Þer he shall have fatte browes euery day


f. 114v (VII.1-2)


that he shall be as fatte at Þe ·xij· monÞe ende as a porke hog

Ryght so the ·ij· men departed & lefte hym with Sir Kay Þat scorned

and mocked hym // There at was Sir Gawayne wroth &

in especiall Sir Launcelot bade sir Kay leve his mockyng for

I dare ley my hede he shall preve a man of grete worshyp

Lette be seyde Sir Kay hit may not be by reson for as he is

so he hath asked // yett be ware seyde Sir Launcelot So ye

gaff Þe good knyght Brunor Sir Dynadans brothir a name

& ye called hym La cote male tayle and Þat turned you to anger

aftirwarde // As for Þat seyde sir Kay this shall neuer prove none

suche For Sir Brunor desyred euer worshyp and this desyryth

euer mete & drynke & brotthe vppon payne of my lyff he was

fosterde vp in som abbey And how sum euer hit was they fay//

led mete & drynke & so hydir he is com for his sustynaunce

// And so Sir Kay bade gete hym a place & sytte downe to

mete So Bewmaynes wente to the halle dore & sette hym

downe amonge boyes & laddys & Þer he ete sadly / And than

Sir Launcelot aftir mete bade hym com to his chambir and

Þer he sholde haue mete & drynke I nowe And so ded Sir Ga//

wayne but he refused them all for he wolde do none oÞer

but as Sir Kay commaunded hym for no profyr But as tow//

chyng Sir Gawayne he had reson to proffer hym lodgyng

mete & drynke for Þat proffer com of his bloode for he was

nere kyn to hym than he wyste off But Þat Sir Launelot

ded was of his grete jantylnesse & curtesy // So thus he

was putt In to Þe kychyn & lay nyghtly as Þe kychen boyes

dede And so he endured all Þat ·xij· monthe & neuer dyspleased

man noÞer chylde but all wayes he was meke & mylde But

euer whan he saw ony justyng of knyghtes Þat wolde he se &

he myght And euer Sir Launcelot wolde gyff hym golde to

spende & clothis And so ded Sir Gawayne And where Þer


f . 115 (VII.2)


were ony mastryes doynge Þer at wolde he be And Þer myght

none caste barre noÞer stone to hym by ·ij· yardys // Than

wolde Sir Kay sey how lykyth you my boy of the kychyn So

this paste on tyll Þe feste of Whytsontyde And at Þat tyme

Þe kynge hylde hit at Carlyon In the moste royallyst wyse

Þat myght be lyke as he dud yerely // But Þe kyng wolde no

mete ete uppon Whytsonday untyll he harde of som adven//

tures Than com Þer a squyre vnto Þe kynge and seyde sir ye

may go to your mete for here commyth a damesell with som strange

adventures // Than was Þe kyng glad & sette hym doune

Ryght so Þer cam a damesell vnto Þe halle & salewed Þe kyng

and prayde hym of succoure for whom seyde the kynge

what is Þe adventure // Sir she seyde I haue a lady of grete

worshyp to my sustir & she is be seged with a tirraunte Þat she

may nat oute of hir castell And by cause ye here ar called the

noblyst knyghtes of Þe worlde I com to you for succoure

what is youre lady called & where dwellyth she And who

is he & what is his name Þat hath be seged her Sir kynge

she seyde as for my ladyes name Þat shall nat ye know for

me as at thys tyme but I lette you wete she is a lady off

grete worshyp & of grete londys And as for Þat tyrraunte

Þat be segyth her & destroyeth hir londis he is kallyd Þe rede

Knght of Þe rede laundys I know hym nat seyde Þe kyng

Sir seyde Sir Gawayne I know hym well for he is one

of Þe perelest knyghtes of the worlde men sey Þat he hath ·vij·

mennys strengthe And from hym I ascapyd onys full harde

with my lyff // Fayre damesell seyde kynge there bene knyȝtes

here that wolde do hir power for to rescowe your lady But

by cause ye woll not telle hir name noÞer where she dwellyth

Þerfore none of my knyghtes Þat here be nowe shall go with you

be my wylle Than muste I seke forther seyde Þe damesell


f. 115v (VII.3-4)


// So with thes wordys com Beawmaynes be fore Þe kyng

whyle Þe damesell was Þer And thus he sayde Sir kyng

god thake you I haue bene this ·xij· monÞe In your kychyn

& haue had my full sustynaunce And now I woll aske

my oÞer ·ij· gyfftys Þat bene be hynde // Aske on now uppon

my perell seyde Þe kynge // Sir this shall be my fyrste ·ij·

gyffte of Þe ·ij· gyfftis Þat ye woll graunte me to haue

this adventur of this damesell for hit be longyth

vnto me // Thou shalt have hit seyde Þe kyng I graun//

te hit the // Than sir this is Þat oÞer gyffte Þat ye shall gra//

unte me Þat Sir Launcelot du Lake shall make me knyght

for of hym I woll be made knyght & ellys of none And

whan I am paste I pray you lette hym ryde aftir me

& make me knyght whan I requyre hym // All thys

shall be done seyde Þe kynge // Fy on Þe seyde Þe damesell

shall I haue none but one Þat is your kychyn knave Than

she wexed angry and anone she toke hir horse // And with

Þat Þer com one to Bewmaynes & tolde hym his horse & armour

was com for hym & a dwarff had brought hym all thyng

Þat neded hym In Þe rycheste wyse // There at Þe courte

had muche mervayle from whens com all Þat gere So

whan he was armed Þer was none but fewe so goodly a

man as he was And ryght so he cam In to Þe halle & toke

his leve of kyng Arthure And Sir Gawayne and of Sir

Launcelot and prayde hym to hyȝe aftyr hym And so he

departed and rode afftyr the damesell

But Þer wente many aftir to be holde how well he

was horsed and trapped In cloth of golde but

he had neyÞer speare noÞer shylde Than Sir Kay seyde all

opynly In Þe hall I woll ryde aftir my boy of Þe kychyn

to wete wheÞer he woll know me for his bettir // yet seyde


f. 116 (VII.4)


Sir Launcelot and Sir Gawayne a byde at home // So

Sir Kay made hym redy & toke his horse & his speare

& rode aftir hym // And ryght as Beawmynes ouer toke

Þe damesell Ryght so com Sir Kay and seyde Beawmaynes

what sir how ye nat me// Than he turned his horse &          

knew hit was Sir Kay that had done all Þe dyspyte to hym

as ye have herde be fore // Than seyde Beawmaynes

yee I how you well for an vn jantyll knyght of Þe courte

& Þerfore be ware of me // There with Sir Kay put his spe//

re in Þe reest & ran streyght vppon hym // And Beawmay//

nes com as faste uppon hym with his swere and with a foyne

threste hym thorow Þe syde Þat Sir Kay felle downe as he

had bene dede // Than Beawmaynes a lyght downe and

toke Sir Kayes shylde & his speare & sterte vppon his

owne horse & rode his way // All this saw Sir Launcelot

& so dud Þe damesell & than he bade his dwarff sterte vp//               

pon sir Kayes horse and so he ded By Þat Sir Launcelot was             

com / And anone he profyrde Sir Launcelot to juste & ayÞer             

made hem redy & com to gydir so fersly Þat eyÞer bare oÞer downe 

to the erthe & sore were they brused // Than Sir Launcelot

a rose and halpe hym frome his horse And than Beawmay//

nes threw his shylde frome hym & profyrd to fyght wyth

Sir Launcelot on foote So they russhed to gydyrs lyke ·ij·

borys trasyng & trauersyng & foynyng Þe mountenaunce of

an houre // And Sir Launcelot felte hym so bygge that he

mervayled of his strengthe for he fought more lyker a

gyaunte than a knyght And his fyghtyng was so passyng

durable & passyng  perelous // For Sir Launcelot had so much

a do with hym Þat he dred hym self to be shamed // And seyde

Beawmaynes feyght nat so sore your quarell & myne is nat

grete but we may sone leve of Truly Þat is trouth seyde


f. 116v (VII.4-5)


Beawmaynes but hit doth me good to fele your myght and

yet my lorde I shewed nat Þe utteraunce // In goddys name

seyde Sir Launcelot for I promyse you be Þe fayth of my body

I had as muche to do as I myght have to save my self fro

you un shamed And Þerfore have ye no dought of none

erthely knyght hope ye so Þat I may ony whyle stonde a

proved knyght Do as ye have done to me seyde Sir

Launcelot and I shall be your warraunte // Than I pray

you seyde Beawmaynes geff me Þe order of knyghthod

// Sir than muste ye tell me your name of ryght and of

what kyn ye be borne // Sir so Þat ye woll nat dyscouer me

I shall tell you my name // Nay sir seyde Sir Launcelotte

and Þat I promyse you by Þe feyth of my body vntyll hit be

opynly knowyn // Than he seyde my name is Garethe

and brothir vnto Sir Gawayne of fadir syde & modir sy//

de // A sir I am more gladder of you than I was for evir

me thought ye sholde be of grete bloode & that ye cam

nat to Þe courte noÞer for mete noÞer drynke // Than sir La//

unmlot gaff hym Þe order of knyghthode And Than Sir

Gareth prayde hym for to departe and so he to folow the

lady // So sir Launcelot departed frome hym & com to Sir

Kay and made hym to be borne home vppon his shylde &

so he was heled harde with Þe lyff And all men scorned sir

Kay and In especiall Sir Gawayne and Sir Launcelot seyde

Þat hit was nat his parte to rebuke no yonge man for full

lytyll knowe ye of what byrth he is com of & for what

cause he com to Þe courte And so we leve of Sir Kay and

turne we vnto Beawmaynes whan Þat he had ouer takyn

Þe damesell anone she seyde what doste Þou here Þou stynkyst

all of Þe kychyn thy clothis bene bawdy of Þe grece and

talow // What wenyste Þou seyde Þe lady Þat I woll a low the



The for


f. 117 (VII.5)


the for yondir knyght Þat Þou kylde Nay truly for Þou

slewyst hym vnhappyly & cowardly Þerfore turne a gay//

ne Þou bawdy kychyn knave I know Þe well for Sir Kay na//

med the Beawmaynes what art Þou but a luske & a turner

of brochs & a ladyll-waysher // Damesell seyde Sir Be//

awmaynes sey to me what ye woll yet woll nat I go fro

you what som euer ye sey For I have vndir take to kynge

Arthure for to encheve your adventure & so shall I fynyssh hit

to the ende oÞer ellys I shall dye Þerefore // Fye on Þe kychyn

knave wolt Þou fynyssh myne adventure Þou shalt anone

be mette with all Þat Þou woldyst nat for all Þe broth Þat euer Þou

souped onys to loke hym In the face As for Þat I shall assay

seyde Beawmaynes So ryght thus as they rode In Þe wood

Þer com a man fleyng all Þat euer he myght // WhoÞer wolt Þou seyde

Beawmaynes a lorde he seyde help me for here by In a

slade is ·vi· theffis Þat haue takyn my lorde & bounde hym

sore & I am a ferde lest Þat they woll sle hym // Brynge

me thydir seyde Beawmaynes and so they rode to gydirs

vnto they com Þer as was Þe knyght bounden & streyte he rode

vnto them & strake one to Þe deth And than an oÞer & at Þe

thirde stroke he slew Þe thirde And than Þeer ·iij· fledde and

he rode aftir them & ouer toke them And than they ·iij·  turned

agayne and assayled Sir Beawmaynes harde but at Þe

laste he slew them & reterned & vnbounde Þe knyght And Þe

knyght thanked hym & prayde hym to ryde with hym to his

castell Þer a lytyll be syde And he sholde worshypfully re//

warde hym for his good dedis // Sir seyde Beawmaynes

I woll no rewarde haue · Sir this day I was made knyght

of noble Sir Launcelot And Þerfore I woll no rewarde ha//

ve but god rewarde me And also I muste folowe thys

damesell // So whan he com nyȝhe to hir she bade hym


f. 117v (VII.5-6)


ryde vttir for Þou smellyst all of Þe kychyn what wenyst Þou

Þat I haue Joy of Þe for all this dede for Þat Þou haste done is but

mysse happe But Þou shalt se sone a syght Þat shall make the to

turne a gayne & Þat lyghtly // Than Þe same knyght rode

aftir Þe damesell & prayde hir to lodge with hym all Þat nyght

And be cause hit was nere nyght Þe damesell rode with hym

to his castell & Þer they had grete chere And at souper Þe knyȝt

sette Sir Beawmaynes a fore Þe damesell// Fy Fy than

seyde she sir knyght ye ar vncurtayse to sette a kychyn

page a fore me hym semyth bettir to styke a swyne than

to sytte a fore a damesell of hyȝe parage // Than Þe knyȝt

was a shamed at hir wordys & toke hym vp & sette hym

at a syde bourde & sate hym self be fore hym / So all that

nyght they had good chere & myrry reste // And on Þe morne

the damesell toke hir leve & thanked Þe knyght & so departed

& rode on hir way vntyll they come to a grete foreste &

Þer was a grete ryver & but one passage & Þer were redy ·ij·

knyghtes on the farther syde to lette Þe passage // What sey

you seyde Þe damesell woll ye macche yondir ·ij· knyghtis

er ellys turne agayne Nay seyde sir Bewmaynes I woll

nat turne a yen and they were ·xi· mo And Þer with all he russhed

vnto Þe watir & in myddys of Þe watir eythir brake her spe//

rys vppon oÞer to Þer hondys And than they drewe Þer swerdis

& smote egirly at othir And at Þe laste Sir Beawmaynes

smote Þe othir vppon Þe helme Þat his hede stoned and Þer with

all he felle downe in the watir & Þer was he drowned and

than he spored his horse vppon the londe & Þer with all Þe toÞer

knyght felle uppon hym brake his speare And so they drew              

hir swerdys & fought longe to gydyrs // But at Þe laste           

Sir Beawmaynes clevid his helme & his hede downe to

passage                        Þe shuldyrs and so he rode vnto Þe damesell & bade hir ryde


f. 118 (VII.6-7)


furth on hir way Alas she seyde Þat euer suche a kychyn

payge sholde have Þe fortune to destroy such ·ij· knyghts

yet Þou wenyste Þou haste done doughtily that is nat so

for the fyrste knyght his horse stumbled & Þer was drow//

ned in Þe watir & neuer hit was be thy force noÞer be thy myȝte

And Þe laste knyght by mys happe Þou camyste be hynde

hym & by mysse fortune Þou slewyst hym // Damesell

seyde Beawmaynes ye may sey what ye woll But

whom som euer I have a do with all I trust to god to serve

hym or I and he departs And Þer fore I recke nat what ye

sey so Þat I may wynne your lady // Fy Fy foule kychyn knave

Þou shalt se knyghts Þat shall a bate thy boste // Fayre

damesell gyff me goodly langgage & than my care is

paste For what knyghts som euer they be I care nat ne

I doute hem nought // Also seyde she I sey hit for thyne

a vayle for yett mayste Þou turne a yen with thy wor//

shyp for & Þou folow Þou arte but slayne for I se all Þat

evir Þou doste is by mysse adventure & nat by preves of

thy hondys // Well damesell ye may sey what ye woll

But where som euer ye go I woll folow you // So this

Beawmaynes rode with Þat lady tyll evynsonge & euer she

chydde hym & wolde nat reste So at Þe laste they com

to a blak launde & Þer was a blak hauthorne & Þeron hynge

a bauer & on the oÞer syde Þer hynge a blak shylde & by hit

stoode a blak speare grete & longe and a grete blak

horse couered wyth sylk and a blak stone faste by // Also

Þer sate a knyght all armed In blak harneyse and his

name was called Þe knyght of Þe blak laundis This

damesell whan she sawe Þat knyght she bade hym fle

downe Þat valey for his hors was nat sadeled // Gra//

mercy seyde Beawmaynes for all way ye wolde haue


f. 118v (VII.7)


me a cowarde So whan Þe blak knyght saw hir he seyde

damesell have ye brought this knyght frome Þe courte

of kynge Arthure to be your champyon // Nay fayre knyȝt

this is but a kychyn knave Þat was fedde In kyng Arthurs

kychyn for almys // Than sayde Þe knyght why commyth

he in such aray for hit is shame Þat he beryth you compa//

ny Sir I can not be delyuerde of hym for with me he rydyth

magre my hede God wolde seyde she Þat ye wolde putte

hym from me oÞer to sle hym & ye may for he is an unhap//

py knave & unhappyly he hath done this day thorow mysse

happe for I saw hym sle ·ij· knyghts at Þe passage of Þe watir

& oÞer dedis he ded be forne ryght mervaylouse & thorow

unhappynesse // That mervayles me seyde Þe blak knyght

Þat ony man of worshyp woll have a do with hym · Sir they kne//

we hym nat seyde Þe damesell And for by cause he rydyth

with me they wene Þat he be som man of worshyp borne // That

may be seyde Þe blak knyght how be hit as ye say Þat he is

no man of worshyp borne he is a full lykly persone & full

lyke to be a stronge man but this muche shall I graunte

you seyde Þe knyght I shall put hym downe on foote & his

horse & harneyse he shall leve with me · For hit were shame

to me to do hym ony more harm // Whan sir Beawmay//

nes harde hym sey thus he seyde sir knyght Þou arte full lar//

ge of my horse & harneyse I lat Þe wete hit coste Þe nought

& wheÞer Þou lyke well othir evyll this launde woll I passe

magre thyne hede & horse ne harneyse gettyst Þou none of

of myne but yf Þou wynne hem with thy hondys Þerfore lat se

what Þou canste do Seyste Þou that seyde Þe blak knyght Now

yelde thy lady fro the for hit be semed neuer a kychyn knave

to ryde with such a lady // Thow lyest seyde Beawmaynes

I am a jantyll man borne & of more hyȝe lynage than


f. 119 (VII.7-8)


Þou and that woll I preve on thy body // Than in grete

wretth they departed Þer horsis & com to gydyrs as hit had be//

ne thundir & Þe blak knyghts speare brake And Beawmay//

nes threste hym thorow bothe sydis & Þer with his speare

brake & Þe truncheon was left stylle in his syde But ne

virÞeles Þe blak knyght drew his swerde & smote many

egir strokys of grete myght & hurte Bewmaynes full sore

but at Þe laste Þe blak knyght with in an owre & an half he

felle downe of his horse in a sowne & Þer dyed // And than sir

Bewmaynes sy hym so well horsed & armed than he a lyȝt            

downe & armed hym In his armour and so toke his horse and       

rode aftir Þe damesell // Whan she sawe hym com she seyde a    

way kychyn knave oute of Þe wynde for Þe smelle of thy baw//  

dy clothis grevyth me // Alas she seyde Þat euer such a knave

sholde by mysse happe sle so good a knyght as Þou hast done

but all is thyne unhappynesse // But here by is one Þat shall

pay Þe all thy paymente And Þerfore yett I rede Þe flee hit may

happyn me seyde Bewmaynes to be betyn oÞer slayne But

I warne you fayre damesell I woll nat fle away nothir

leve your company for all Þat ye can sey for euer ye sey Þat they

woll sle me othir bete me but how som euer hit happenyth

I ascape & they lye on the grounde // And Þerfore hit were

as good for you to holde you stylle thus all day rebukyng

me · for a way wyll I nat tyll I se Þe vttirmuste of this jour//

nay oÞer ellys I woll be slayne othir thorowly betyn Þerfore

ryde on your way for folow you I woll what som euer happyn me

Thus as they rode to gydyrs they sawe a knyght comme

dryvande by them all in grene bothe his horse & his

harneyse · And whan he com nye Þe damesell he asked hir is

Þat my brothir Þe blak knyght Þat ye have brought with you / Nay

nay she seyde this unhappy kychyn knave hath slayne thy brothir


f. 119v (VII.8)


thorow unhappynes // Alas seyde Þe grene knyght is grete

pyte Þat so noble a knyght as he was sholde so vnhappyly be

slayne & namely of a knavis honde as ye say Þat he is // A

traytoure seyde Þe grene knyght Þou shalt dye for sleyng of

my brothir he was a full noble knyght And his name was

Sir Perarde I defye Þe seyde Sir Bewmaynes for I lette

Þe wete I slew hym knyghtly & nat shamfully · There wyth

all Þe grene knyght rode vnto an horne Þat was grene and

hit hynge vppon a thorne And Þer he blew ·iij· dedly motis And

anone Þer cam ·ij· damesels & armed hym lyghtly And than

he toke a grete horse & a grene shylde & a grene spere and

than they ran to gydyrs with all Þer myghts & brake Þer sperys vn//

to Þer hondis and than they drewe Þer swerdys & gaff many sad

strokys & eyÞer of them wounded oÞer full ylle and at Þe laste at

an ovirtwarte stroke Sir Bewmaynes with his horse strake

Þe grene knyghts horse vppon Þe syde Þat he felle to Þe erthe

And than the grene knyght voyded his horse delyuerly and

dressed hym on foote // That sawe Bewmaynes and Þerwith all

he a lyght and they russhed to gydyrs lyke ·ij· myghty kem//

pys a longe whyle & sore they bledde bothe // Wyth that

come Þe damesell & seyde my lorde Þe grene knyght why

for shame stonde ye so longe fyghtynge with Þat kychyn knave

Alas hit is shame Þat evir ye were made knyght to se suche

a lad to macche you as Þe wede growyth ouer Þe corne // Þer

with Þe grene knyght was a shamed & Þerwith all he gaff a grete

stroke of myght and clave his shylde thorow // Whan Beaw//

maynes saw his shylde clovyn a sundir he was a lytyll a

shamed of Þat stroke and of hir langage // And than he gaff

hym suche a buffette vppon Þe helme Þat he felle on his kneis

And so suddeynly Bewmaynes pulde hym on the grounde

grovelynge And than the grene knyght cryed hym mercy


f. 120 (VII.8)


And yelded hym vnto Bewmaynes And prayde hym nat

to sle hym // All is in vayne seyde Bewmaynes for Þou

shalt dye but yf this damesell Þat cam with me pray me to

save thy lyff And Þer with all he vnlaced his helme lyke as

he wolde sle hym // Fye vppon the false kychyn payge

I woll never pray the to save his lyff for I woll nat be so

muche in thy daunger // Than shall he dye seyde Beaw//

maynes Nat so hardy Þou bawdy knave seyde Þe damesell that

Þou sle hym // Alas seyde Þe grene knyght suffir me nat to

dye · for a fayre worde spekyng // Fayre knyght seyde the

grene knyght save my lyfe & I woll for gyff the Þe deth of

my brothir and for euer to be com thy man // And ·xxxt· knyȝtes

that hold of me for euer shall do you servyse // In Þe devyls

name seyde Þe damesell Þat suche a bawdy kychyn knave shol//

de have ·xxxt· knyghtes servyse and thyne // Sir knyght seyde         

Bewmaynes all this a vaylyth Þe nought but yf my dame//              

sell speke to me for thy lyff And there with all he made a sem         

blaunte to sle hym // lat be seyde Þe damesell Þou bawdy kychyn

knave sle hym nat for and Þou do Þou shalt repente hit // Dame//

sell seyde Bewmaynes your charge is to me a plesure and

at youre commaundemente his lyff shall be saved & ellis nat

// Than he sayde sir knyght with Þe gene armys I releyse Þe

quyte at this damesels requeste for I woll nat make hir

wroth for I woll fulfylle all Þat she chargyth me // And

than Þe gene knyght kneled downe & dud hym homage

with his swerde // Than sayde Þe damesell me repentis of

this grene knyghtes damage and of your brothirs deth the

blak knyght for of your helthe I had grete mystir // for I dre//

de me sore to passe this foreste // Nay drede you nat seyde

Þe grene knyght for ye all shall lodge with me this nyght

and to morne I shall helpe you thorow this forest // So they


f. 120v (VII.8-9)


toke Þer horsys & rode to his maner Þat was faste by And euer this

damesell rebuked Bewmaynes and wolde nat suffir hym

to sitte at hir table but as Þe grene knyght toke hym & sate

with hym at a syde table damesell mervayle me thynkyth

seyde Þe grene knyght why ye rebuke this noble knyghte

as ye do for I warne you he is a full noble man and I knowe

no knyght Þat is able to macche hym there fore ye do grete

wronge so to rebuke hym fur he shall do you ryght goode

servyse · For what som euer he makyth hym self he shall preve

at Þe ende Þat he is com of full noble blood & of kynges lyna//

ge // Fy fy seyde Þe damesell hit is shame for you to sey hym

suche worshyp truly seyde Þe grene knyght hit were shame

to me to sey hym ony dysworshyp for he hath previd hym

self a bestir knyght than I am And many is Þe noble knyght

Þat I haue mette with all in my dayes // And neuer or this tyme

founde I no knyght his macche And so Þat nyght they yoode

vnto reste And all nyght Þe grene knyght commaundede

·xxxt· knyghtes prevyly to wacche Bewmaynes for to kepe

hym from all treson they all arose and herde Þer masse and

brake Þer faste And than they toke Þer horsis & rode Þer way //

And Þe grene knyght conveyed hem thorow Þe foreste // than

Þe grene knyght seyde my lorde Sir Bewmaynes my body

& this ·xxxt· knyghtes shall be all way at your sommons bothe

erly & late at your callynge and whothir Þat euer ye woll sende

us · ye sey well seyde Sir Bewmaynes whan Þat I calle vp//

pon you ye muste yelde you vnto kynge Arthure And all

your knyghtes if Þat I so commaunde you // We shall be redy at

all tymes seyde Þe grene knyght // Fy fy vppon Þe In

Þe devyls name seyde Þe damesell Þat euer eny good knyght

sholde be obedyent vnto a kychyn knave // So than departed

the grene knyght & Þe damesell And than she seyde vnto


f. 121 (VII.9-10)


Bewmaynes why folowyste Þou me kychyn knave caste a

way thy shylde & thy spere and fle away yet I counseyle

Þe be tyme or Þou shat sey right sone alas · For and Þou were as

wyght as Sir Launcelot Sir Trystrams or Þe good knyȝt

Sir Lamerok Þou shalt not passe a pace here Þat is called Þe pace

perelus // Damesell seyde Bewmaynes who is a ferde

let hym fle for hit were shame to turne a gayne syth I

haue ryddyn so longe with you · Well seyde she ye shall sone

wheÞer ye woll or woll not // So with In a whyle they saw

a whyght towre as ony snowe well macchecolde all a

boute & double dyked & ouer Þe towre gate Þer hynge a fyffty

shyldis of dyuers coloures And undir Þat towre Þer was

a fayre medow And Þer In was many knyghtes & squyres

to be holde scaffoldis & pavylons for Þer vppon Þe morne

sholde be a grete turnemente And Þe lorde of Þe towre

was with in his castell & loked oute at a wyndow & saw

a damesell a dwarff and a knyght armed at all poyn//

tis // So god me help seyde Þe lorde with Þat knyght woll

I juste for I se Þat he is a knyght arraunte And so he armed

hym & horsed hym hastely whan he was on horsebak

with his shylde & his spere hit was all rede bothe his

horse & his harneyse & all Þat to hym be longed // And

whan Þat he com nyȝe hym he wente hit had be his broÞer

Þe blak knyght // And than lowed he ry cryed & seyde bro//

thir what do ye here in this marchis // Nay nay seyde

Þe damesell hit is nat he For this is but a kychyn knave

Þat was brought vp for almys in kynge Arthurs courte

// Neuer Þe lesse seyde Þe rede knyght I woll speke with hym

or he departe // A seyde this damesell this knave hathe

slayne your brother And Sir kay named hym Bewmaynes

And this horse & this harneyse was thy brothirs the blak


f. 121v (VII.10)


knyght // Also I sawe thy brothir Þe gene knyght ouer

com of his hondys // But now may ye be revenged on

hym for I may nevir be quyte of hym // Wyth this euery

knyght departed in sundir & cam to gydir all that they myȝt

dryve // And aythir of Þer horsis felle to the erthe // Than

they a voyde theire horsis & put Þer shyldis be fore hem

& drew Þer swerdys & eythir gaff oÞer sad strokys now here

now Þer trasyng trauersyng & foynyng rasyng & hurlyng

lyke ·ij· borys Þe space of ·ij· owrys // Than she cryde on

hyght to Þe rede knyght Alas Þou noble rede knyght thyn//

ke what worshyp hath euer more folowd Þe lette neuer a

kychyn knave endure Þe so longe as he doth // Than Þe

rede knyght wexed wroth & doubled his strokes & hurte

Bewmaynes wondirly sore Þat the bloode ran downe to

Þe grounde Þat hit was wondir to see Þat stronge batayle yet

at Þe laste Bewmaynes strake hym to Þe erthe // And as he

wolde haue slayne Þe rede knyght he cryed mercy noble

knyght sle me nat & I shall yelde me to the wyth fyffty

knyghtes with me Þat be at my commaundemente & for gyff the

all Þe dispyte Þat Þou haste done to me And Þe deth of my

brothir the blak knyght and Þe wynnyng of my brothir

Þe grene knyght // All this a vaylyth nat seyde Beaw//

maynes but if my damesell pray me to save thy lyff

And Þer with he made semblaunte to stryke of his hede // let

be Þou Bewmaynes and sle hym nat for he is a noble knyȝt

And nat so hardy uppon thyne hede but Þat Þou save hym         

// Than Bewmaynes bade Þe rede knyght to stonde vp       

and thanke this damesell now of thy lyff // Than Þe rede   

knyght prayde hym to se his castell and to repose them

all Þat nyght // So Þe damesell graunte hym & Þer they had

good chere But all wayes this damesell seyde many


f. 122 (VII.10-11)


foule wordys vnto Bewmaynes where of Þe rede knyght

had grete mervayle And all Þat nyght Þe rede knyȝt made

·iij· score knyghtes to wacche Bewmaynes that he sholde ha//

ve no shame noÞer vylony / And vppon Þe morne they herde

masse and dyned & Þe rede knyght com be fore Bewmaynes

with his ·iij· score knyghtes & Þer he profyrd hym his omage and

feawte at all tymes he & his knyghtes to do hym servyse

// I thanke you seyde Bewmaynes but this ye shall gra//

unte me whan I calle vppon you to com be fore my lorde

kynge Arthure and yelde you vnto hym to be his knyȝtes

Sir seyde Þe rede knyght I woll be redy & all my felyship

at youre somonns // So sir Bewmaynes departed and Þe da//

mesell and euer she rode chydyng hym In the fowleste ma//

ner wyse that she cowde

Damesell seyde Bewmaynes ye ar uncurteyse so

to rebuke me as ye do for me semyth I haue done

you good servyse & euer ye thretyn me I shall be betyn wyth

knyghtes that we mete but euer for all your boste they all

all lye in the duste or in the myre And Þerfore y pray

you rebuke me no more And whan ye se me betyn or

yoldyn as recreaunte than may you bydde me go from

you shamfully but erste I let you wete I woll nat departe

from you · For than I were worse than a foole And I wolde

departe from you all the whyle Þat I wynne worshyp // Well

seyde she ryght sone shall mete the a knyght Þat shall pay

the all thy wagys for he is Þe moste man of worshyp

of Þe worlde excepte kyng Arthure I woll well seyde

Bewmaynes the more he is of worshyp Þe more shall

be my worshyp to haue a do with hym // Than anone

they were ware where was a fore them a Cyte rych

and fayre and be twyste them and the Cyte a myle and


f. 122v (VII.11)


more there was a fayre medow Þat semed new mowyn &

Þerin was many pavylons fayre to be holde // lo seyde

Þe damesell yondir is a lorde Þat owyth yondir Cyte &

his custom is whan Þe wedir is fayre to lye in this

medow to juste and to turnay and euer Þer is a boute hym

v· C· knyghtes & jantyll men of Armys And Þer is all ma//

ner of gamys Þat ony jantyll man can devyse // That

goodly lorde seyde Bewmaynes wolde I fayne se // Þou

shalt se hym tyme I nowe seyde Þe damesell // And so

as she rode nere she a spyed the pavelon where the

lorde was // lo seyde she syeste Þou yondir pavylyon Þat

is all of Þe coloure of Inde and all maner of thyng that

Þer is a boute men & women & horsis trapped shyldis &

sperys was all of Þe coloure of Inde And his name is

Sir Parsaunte of Inde the moste lordlyest knyght Þat

euer Þou lokyd on // hit may well be seyde Sir Bewmay//

nes But be he neuer so stoute a knyght in this felde I

shall a byde tyll that I se hym vndir his shylde // A

foole seyde she Þou were bettir to flee be tymes // Why

seyde Bewmaynes and he be suche a knyght as ye ma//

ke hym he woll nat sette vppon me with all his men

For and Þer com no more but one at onys I shall hym

nat fayle whylys my lyff may laste // Fy fy seyde Þe

damesell Þat evir suche a stynkyng kychyn knave sholde

blowe suche a boste // Damesell he seyde ye ar to bla//

me so to rebuke me for I had leuer do ·v· batayles than

so to be rebuked // lat hym com and than let hym doo

his worste // Sir she seyde I mervayle what thou art

and of what kyn Þou arte com for boldely Þou spekyst

and boldely Þou haste done Þat haue I sene There fore I

pray Þe save thy self and Þou may for thyne horse & Þou


f. 123 (VII.11)


have had grete travayle & I drede Þat we dwelle ovir

longe frome the seege · For hit is hens but ·vij· myle

and all perlous passage we ar paste sauff all only Þis

passage and here I drede me sore last ye shall cacche

som hurte Þerfore I wolde ye were hens Þat ye were nat

brused nothir hurte with this stronge knyght But I

lat you wete this Sir Persaunte of Inde is no thyng

of myght nor strength vnto Þe knyght Þat lyeth at the

seege a boute my lady As for that seyde Bewmaynes

be as be may for sytthen I am com so nye this knyght

I woll preve his myght or I departe frome hym & ellis

I shall be shamed and I now with drawe fro hym // And

Þerfore damesell haue ye no doute by the grace of god

I shall so dele with this knyght Þat with In ·ij· owrys after none

I shall delyuer hym And than shall we com to Þe seege

be day lyght // A Jesu I mervayle haue I seyde Þe dame//

sell what maner a man ye be for hit may neuer be oÞer

but that ye be com of Jantyll bloode · For so fowle &

shamfully dud neuer woman revyle a knyght as I haue

done you and euer curteysly ye haue suffyrde me and

Þat com neuer but of Jantyll bloode // Damesell seyde

Bewmaynes a knyght may lytyll do Þat may nat suffir

a Jantyll woman for what som euer ye seyde vnto me

I toke none hede to your wordys for the more ye seyde

Þe more ye angred me And my wretthe I wrekid

vppon them Þat I had a do with all the mysseyyng that

ye mysseyde me in my batayle furthered me much

and caused me to thynke to shew & preve my selffe

at Þe ende what I was for peraventure thouȝe hit

lyst me to be fedde In kynge Arthures courte I

myght haue had mete in oÞer placis but I ded hit


f. 123v (VII.11-12)


for to preve my frendys and Þat shall be knowyn a noÞer

day wheÞer Þat I be a jantyll man borne or none // For I latte

yow wete fayre damesell I have done you Jantyll mannys

servyse And peraventure bettir seruyse yet woll I do or I departe

frome you // Alas she seyde fayre Bewmaynes for gyff

me all Þat I have mysse seyde or done a yenste you with all my wyll

seyde he I for geff hit you for ye dud no thyng but as ye shol//

de do for all youre evyll wordys pleased me // Damesell

seyde Bewmaynes syn hit lykyth you to sey thus fayre vn//

to me wote ye well hit gladdyth myne herte gretly And

now me semyth Þer is no knyght lyvyng but I am able I now

for hym // Wyth this Sir Persaunte of Inde had aspyed

them as they hoved in Þe fylde And knyghtly he sente vnto them

wheÞer he cam In warre or in pece // Sey to thy lorde I take no

force but wheÞer as hym lyste // So Þe messyngere wente a

yen vnto sir Persaunte and tolde hym all his answere // Well

than I woll have a do with hym to the vtteraunce and so he pur//

veyde hym & rode a yenste hym // Whan Bewmaynes sawe

hym he made hym redy & mette with all theire myghtes to gedir

as faste as Þer horse myght ren and braste Þer spearys eythir In

iij· pecis and Þer horsis felle downe to the erthe And delyuerly they

a vayded Þer horsis and put Þer shyldis be fore them and drew Þer

swerdys and gaff many grete strokys Þat som tyme they hurled

so to gydir Þat they felle grovelyng on the grounde // Thus they

fought ·ij· owres & more Þat there shyldes & hawbirkes were all

for hewyn and in many placis wounded // So at Þe laste Sir

Bewmaynes smote hym thorow Þe coste of the body & than

he returyed hym here & Þer and knyghtly maynteyned his batayle

longe tyme // And at Þe laste though hym loth were Beaw//

maynes smote Sir Persaunte a bovyn vppon Þe helme Þat he

felle grovelynge to the erthe and than he lepte vppon hym


f. 124 (VII.12)


ouerthwarte and vnlaced his helme to haue slayne hym // Þan

Sir Persaunte yelded hym and asked hym mercy // Wyth Þat

com Þe damesell & prayde hym to save his lyff · I woll well he

seyde for hit were pyte this noble knyght sholde dye Gramer//

cy seyde Sir Persaunte for now I wote well hit was ye that                        

slew my broÞer the blak knyght at Þe blak thorne he was a full               

noble knyght his name was Sir Perarde Also I am sure Þat                      

ye ar he Þat wan myne oÞer broÞer Þe grene knyght his name is           

Sir Pertholope Also ye wan my broÞer Þe rede knyght Sir Pery//

mones And now sir ye haue wonne me · This shall I do for to

please you ye shall haue homage and feawte of me & of an

C· knyghtes to be all wayes at your commaundemente to go and

ryde where ye woll commaunde vs And so they wente vnto sir

Persauntes pavylyon and dranke wyne & ete spycis And afterwar//

de Sir Persaunte made hym to reste vppon a bedde vntyll supper

tyme and aftir souper to bedde a yen // So whan Sir Bewmay//

nes was a bedde Sir Persaunte had a doughter a fayre lady

of ·xviij· yere of ayge and Þer he called hir vnto hym & charged

hir & commaunded hir vppon his blyssyng to go vnto Þe knyghtis

bed & lye downe by his syde and make hym no strange chere

but good chere and take hym In your armys & kysse hym & loke

Þat this be done I charge you as ye woll haue my love and my

good wylle // So sir Persauntis doughter dud as hir fadir bade

hir and so she yode vnto Sir Bewmaynes bed and pryvyly

she dispoyled hir and leyde hir downe by hym And than he

awooke and sawe her and asked her what she was // Sir she

seyde I am sir Persauntis dougher Þat by the commaundemente

of my fadir I am com hydir Be ye a pusell or a wyff Sir she

seyde I am a clene maydyn // God deffende me seyde he than

Þat euer I sholde defoyle you to do Sir Persaunte suche a shame

There fore I pray you fayre damesell aryse oute of this bedde


f. 124v (VII.12-13)


er ellys I woll // Sir she seyde I com nat hydir by myne owne

wyll but as I was commaunded // Alas seyde sir Bewmay//

nes I were a shamefull knyght & I wolde do youre fadir

ony dysworshyp but so he kyste her and so she departed & com

vnto sir Persaunte hir fadir and tolde hym all how she

had sped Truly seyde Sir Persaunte what som euer he

be he is com of full noble bloode and so we leve hem Þer

tyll on the morne // And so on the morne Þe damesell

and Sir Bewmaynes herde masse & brake there faste &

so toke Þer leve // Fayre damesell seyde Sir Persaunte who//

thir warde ar ye away ledynge this knyght Sir she sey//

de this knyght is goynge to Þe castell daungerous Þer as

my systir is be seged // A · ha · seyde Sir Persaunte Þat is

the knyght of the rede launde whyche is Þe moste pere//

lyste knyght Þat I know now lyvynge and a man that is

wyth outen mercy And men sey that he hath ·vij· men//

nes strength god save you Sir Bewmaynes frome that

knyght for he doth grete wronge to Þat lady and Þat is grete

pyte for she is one of Þe fayreste ladyes of Þe worlde &

me semyth Þat your damesell is hir sister · ys nat your name

lyonet Sir so I hyght and my lady my sister hyght dame

lyones Now shall I tell you seyde Sir Persaunte This

rede knyght of Þe rede laundys hath layne longe at Þat

seege well-nye this ·ij· yerys and many tymes he my3t

haue had hir & he had wolde but he prolongyth the tyme

to this entente For to haue Sir launcelot du lake to do ba//

tayle with hym or with sir Trystrams othir Sir lamerok

de galys oÞer sir Gawayne and this is his taryynge so

longe at the sege // Now my lorde seyde Sir Persaunt

of Inde be ye stronge and of good herte for ye shall ha//

ve a do with a good knyght · let me dele seyde sir Bewmaynes


Sir seyde


f. 125 (VII.13)


Sir seyde this damesell Lyonet I requyre you Þat ye woll

make this Jantyll man knyght or evir he fyght with Þe

rede knyght I woll with all myne herte seyde sir Persaunte

and hit please hym to take Þe order of knyghthode of so

symple a man as I am // Sir seyde Bewmaynes I thanke

you for I am bettir spedde For sertayly Þe noble knyghte

Sir Launcelot made me knyght // A seyde Sir Persaunte

of a more renouned man myght ye nat be made knyghte

of For of all knyghtes he may be called cheff of knyghthode

and so all Þe worlde scythe that be twyxte ·iij· knyghtes is de//

parted clerely knyghthode That is sir Launcelot du Lake

Sir Trystrams de lyones And sir Lamerok de galys thes

bere now Þe renowne yet Þer be many oÞer noble knyghtis

as Sir Palomydes the Saresyn And Sir Saphir his bro//

thir Also sir Bleobrys And sir Blamour de ganys his bro//

thir Also sir Bors de ganys And sir Ector de marys

and Sir Percivale de galys thes & many mo bene noble

knyghtes but Þer be none Þat bere the name but thes ·iij· a

bovyn seyde there fore god spede you well seyde sir Per//

saunte for and ye may macche Þat rede knyght ye shall be

called the ·iiij· of Þe worlde // Sir seyde Bewmaynes

I wolde fayne be of good fame and of knyghthode And I

latte you wete I am com of good men for I dare say my

fadir was a noble man And so that ye woll kepe hit in

cloce and this damesell I woll tell you of what kynne

I am com of // We woll nat discouer you seyde they bothe

tylle ye commaunde vs by the fayth we owe to Jesu // Tru//

ly than sayde he my name is Sir Gareth of Orkenay &

kynge lott was my fadir and my modir is kyng Arthurs

sistir hir name is dame Morgawse And sir Gawayne ys

my brothir And sir Aggravayne and sir Gaherys and I


f. 125v (VII.13-14)


am yongeste of hem all And yette wote nat kynge

Arthure noÞer Sir Gawayne what I am // So the booke

seyth Þat the lady that was be seged had worde of hir sisteris

comyng by the dwarff & a knyght with hir and how he had

passed all Þe perelus passages// What maner a man is he

seyde Þe lady he is a noble knyght truly madam seyde

Þe dwarff and but a yonge man but he is as lykly a

man as euer ye saw ony // What is he & of what kynne

seyde Þe lady is he com & of whom was he made knyȝt

madam seyde Þe dwarff he was kynges son of Orkeney

but his name I woll nat tell you as at this tyme but

wete you well of Sir Launcelot was he made knyght

for of none oÞer wolde he be made knyght And sir Kay

named hym Bewmaynes how a scaped he seyde the lady

frome Þe brethyrn of Sir Persaunte madam he seyde

as a noble knyght sholde // First he slew ·ij· breÞerne

at a passage of a water · A seyde she they were ·ij· good

knyghtes but they were murtherers That one hyght

Sir Gararde le breuse And Þater hyght Sir Arnolde

le Bruse Than madam he recountird at Þe blak knyȝt

and slew hym in playne batayle and so he toke his hors

and his armoure and fought with Þe grene knyght &

wanne hym In playne batayle and in lyke wyse he

served Þe rede knyght & aftir in Þe same wyse he served

Þe blew knyght and wanne hym In playne batayle

Than sayde Þe lady he hath ouercom Sir Persaunte of

Inde that is one of the noblest knyghtes of Þe worlde

Trewly madam seyde Þe dwarff he hath wonne all

the ·iiij· breÞerne and slayne Þe blak knyght and yet

he dud more to fore he ouerthrew Sir kay & leffte

hym nye dede vppon the grounde // Also he dud a


f. 126 (VII.14)


grete batayle wyth Sir Launcelot and Þer they departed

on evyn hondis · And than Sir Launcelot made hym knyght

// Dwarff seyde Þe lady I am gladde of thys tydynges Ther

fore go Þou unto an hermytage of myne here by and bere

with the of my wyne In too flagons of syluer they ar of ·ij· ga//

lons And also ·ij· caste of brede with the fatte venyson I bake

& deynte foules And a cuppe of golde here I delyuer Þe that

is ryche of precious stonys And bere all this to myne her//

mytage and putt hit in Þe hermytis hondis And sytthyn

go Þou to my sistir and grete her welle and commande me

vnto that Jantyll knyght and pray hym to ete & drynke

and make hym stronge // And say hym I thanke hym of his

curtesy and goodnesse that he wolde take vppon hym suche

labur for me Þat neuer ded hym bounte noÞer curtesy // Also pray

hym that he be of good herte and corrage hym self for he

shall mete with a full noble knyght but he is noÞer of curtesy

bounte noÞer Jantylnesse for he attendyth vnto no thyng but

to murÞer And that is Þe cause I can nat prayse hym noÞer love

hym // So this dwarff departed & com to sir Persaunt where

he founde Þe damesell Lynet And Sir Bewmaynes And Þer

he tolde hem all as ye haue herde And than they toke Þer leve

But Sir Persaunte toke an amblynge hakeney and convey//

ed them on Þer wayes and than be toke he them vnto god And

so with in a lytyll whyle they com to the hermytage And there

they dranke Þe wyne and ete Þe venyson and the foulys bakyn

// And so whan they had repasted them well the dwarff retour//

ned a yen with his vessell vnto the castell And Þer mette wyth

hym Þe rede knyght of Þe rede laundys and asked hym from

whens he com and where he had bene // Sir seyde Þe dwarf

I have bene with my ladyes sistir of Þe castell and she hath bene

at kynge Arthurs courte & brought a knyght with her // Than


f. 126v (VII.14-15)


I a compte her travayle but lorne for though she had brouȝt

with hir Sir Launcelot Sir Trystrams Sir Lameroke othir

Sir Gawayne I wolde thynke my self good I nowe for them

all hit may well be seyde Þe dwarff but this knyght hathe

passed all Þe perelouse passages and slayne Þe blak knyghte

and oÞer ·ij· mo and wonne Þe grene knyght Þe rede knyght

and Þe blew knyght than is he one of thes ·iiij· Þat I have be

fore rehersyd // he is none of thes seyde Þe dwarff but he

is a kynges son // what is his name seyde Þe rede knyght of

Þe rede laundis that woll I nat tell you but Sir Kay on scor//

ne named hym Bewmaynes I care nat seyde Þe knyght

what som evir he be for I shall sone delyuer hym and yf I ouer

macche hym he shall haue a shamfull deth as many othir

have had // That were pyte seyde Þe dwarff And hit is pyte

Þat ye make suche shamfull warre vppon noble knyghtes

Now leve we the knyght and Þe dwarff & speke we of

Bewmaynes that all nyght lay in the hermyta//

ge and vppon Þe morne he and Þe damesell Lynet harde Þer

masse and brake Þer faste and than they toke Þer horsis & rode

thorow oute a fayre foreste And than they com to a playne

and saw where was many pavylons and tentys And a fay//

re castell and Þer was muche smoke & grete noyse // And

whan they com nere Þe sege Sir Bewmaynes aspyed on

grete trees as he rode how Þer hynge full godly armed

knyghtes by Þe necke and Þer shyldis a boute Þer neckys with Þer

swerdis and gylte sporys vppon Þer helys // And so Þer hynge

nyȝe a fourty knyghtes shamfully with full ryche armys Than

Sir Bewmaynes a bated his countenaunce and seyde

what menyth this // Fayre Sir seyde the damesell a bate

nat youre chere for all this syght for ye muste corrage

youre self oÞer ellys ye bene all shente // For all these


f. 127 (VII.15)


knyghtes wm hydir to this sege to rescow my sistir dame Lyo//

nes And whan Þe rede knyght of Þe rede launde had ouercom

hem he put them to this shamefull deth with oute mercy and

pyte and in the same wyse he woll serve you but yf ye quyte

you the bettir // Now Jesu defende me seyde sir Bewmay//

nes frome suche vylans deth and shondeshyp of harmys

for rathir than I sholde so be faryn with all I woll raÞer be slayne

in playne batayle // So were ye bettir seyde Þe damesell

for trust nat In hym is no curtesy but all goth to Þe deth

er shamfull mourther · And Þat is pyte seyde Þe damesell for

he is a full lykly man and a noble knyght of proves

and a lorde of grete londis and of  grete possessions //

// Truly seyde Sir Bewmaynes he may be well a good

knyght but he vsyth shamefull customys And hit is

mervayle that he enduryth so longe that none of the

noble knyghtes of my lorde Arthurs haue nat dalte

with hym // And than they rode vnto Þe dykes and saw

them double dyked wyth full warly wallys And there

were was grete noyse of mynstralsy and Þe see bete

uppon that one syde of Þe wallys where were many

shyppis and marynars noyse with hale and how // And also

Þer was faste by a Sygamoure tre and Þer on hynge an hor/

ne the grettyst that euer they sye of an Olyvauntes bone

and this knyght of Þe rede launde hath honged hit up

Þer to this entente that yf Þer com my arraunte knyghte

he muste blowe that horne and than woll he make hym

redy and com to hym to do batayle //  But Sir pray you

seyde Þe damesll blow ye nat Þe horne tyll hit be hygh

none for now hit is a boute pryme and now encresyth

his myght that as men say he hath  ·vij· mennys strength

// A fy for shame fayre damesell sey ye nevir so more


f. 127v (VII.15-16)


to me // For and he were as good a knyght as euer was

ony I shall neuer fayle hym In his moste myght for oÞer

I woll wynne worshyp worshypfully othir dye knyȝtly

in Þe felde And Þer with he spored his horse streyte to Þe Sy//

gamoure tre and so blew Þe horne egirly that all Þe seege

and Þe castell range Þer off // And than Þer lepe oute ma//

ny knyghtes oute of Þer tentys and pavylyons And they with

in Þe castell loked ovir Þe wallys and oute at wyndowis

// Than the rede knyght of Þe rede laundis armed hym

hastely and too barouns sette on his sporys on his helys

and all was blood rede his armour spere and shylde &

an Erle buckled his helme on his hede and than they

brought hym a rede spere and a rede stede and so he rode

in to a lytyll vale vndir the castell Þat all that were in

Þe castell and at Þe sege myght be holde Þe batayle //

// Sir seyde Þe damesell Lynet vnto Sir Bewmaynes

loke ye be glad and lyght for yondir is your dedly ene//

my and at yondir wyndow is my lady my sistir dame

Lyones where seyde Bewmaynes yondir seyde the

damesell and poynted with her fyngir That is trouth

seyde Bewmaynes She be semyth a farre Þe fayryst lady

that euer I lokyd vppon and truly he seyde I aske no better

quarell than now for to do batayle for truly she shall

be my lady and for hir woll I fyght & euer he loked vp

to the wyndow with glad countenaunce // And this lady

dame Lyones made curtesy to hym downe to the erth

holdynge up bothe her hondys // Wyth Þat the rede

knyght calle vnto Bewmaynes And seyde sir knyȝt

leve thy be holdyng and loke on me I counsayle the

for I warne Þe well she is my lady & for hir I haue

done many stronge batayles // Geff Þou so haue


f. 128 (VII.16)


done seyde Bewmaynes me semyth it was but waste

laboure for she lovyth none of thy felyshyp and Þou to

love that lovyth nat the is but grete foly for & I vndir//

stoode that she were nat ryght glad of my commynge I wol//

de be avysed or I dud batayle for hir But I vndirstonde

by Þe segynge of this castell she may for here thy felyshyp

and Þer fore wete Þou well Þou rede knyght I love hir and

woll rescow hir othir ellys to dye Þer fore Sayst Þou that

seyde Þe rede knyght me semyth Þou oughtyste of reson

to be ware by yondir knyghtes that Þou sawyste hange on

yondir treis // Fy for shame seyde Bewmaynes that

euer Þou sholdyst sey so or do so evyll for in that Þou shamest thy

self and all knyghthode and Þou mayste be sure Þer woll no

lady love the that knowyth the & thy wykked customs

And now Þou wenyste that Þe syght of tho honged knyȝtes

shulde feare me Nay truly nat so Þat shamefull syght caw//

syth me to have courrage and hardynesse a yenst Þou muche

more than I wolde haue a gaynste the and Þou were

a well ruled knyght // make Þe redy seyde Þe rede knyght

and talke no more with me // Than they putt Þer sperys

in Þe reste & com to gedyrs with all the myght Þat they had

bothe and aythir smote oÞer in the myddys of Þer shyldis Þat

the paytrels sursynglys and crowpers braste and felle

to the erthe bothe and the raynys of Þer brydyls in there

hondys // And so they lay a grete whyle sore a stoned

that all that were in the castell and in the sege wente

Þer neckys had bene broste // Than many a straunger &

othir seyde Þat the straunge knyght was a bygge man

and a noble Jouster for or now we sawe neuer no knyght

macche the rede knyght of Þe rede laundys thus they

seyde bothe with In and with oute // Than lyghtly & delyuerly


f. 128v (VII.16-17)


they avoyded Þer horsis and putt Þer shyldis a fore them and

drew theire swerdys and ran to gydyrs like ·ij· fers lyons

and eythir gaff othir suche ·ij· buffettys vppon Þer helmys

that they reled bakwarde bothe ·ij· stredys and than they

recouerde bothe and hew grete pecis of othyrs harneyse

and Þer shyldys Þat a grete parte felle in the fyldes

nd than thus they fought tyll hit was paste none

And neuer wolde stynte tyll at Þe laste they lacked

wynde bothe and than they stoode waggyng stagerynge

pantynge blowynge & bledyng that all that be helde them for the

moste party wepte for pyte // So whan they had rested

them a whyle they yode to batayle a gayne trasyng trauer//

synge foynynge and rasynge as ·ij· borys And at som tyme

they toke Þer bere as hit had bene ·ij· rams and horled to

gydyrs that som tyme they felle grovelynge to the erthe

And at som tyme they were so a mated that aythir toke

ers swerde in the stede of his owne And thus they endu//

red tyll evynsonge // That Þer was none that be helde

them myght know whethir was lyke to wynne Þe batay//

le And theire armoure was so for hewyn that men myȝt

se Þer naked sydys And in oÞer placis they were naked but

euer Þe nakyd placis they dud defende And Þe rede knyghte

was a wyly knyght in fyghtyng and that taught Bew//

maynes to be wyse but he a bought hit full sore or he did

asspye his fyghtynge // And thus by assente of them both

they graunted aythir othir to reste And so they sette hem

downe vppon ·ij· molle hyllys there be sydys Þe fyghtynge

place and eythir of them vnlaced othir helmys & toke

Þe colde wynde for aythir of Þer pagis was faste by them

to com whan they called them to vnlace Þer harneyse & to

sette hem on a gayne at there commaundemente // And


f. 129 (VII.17)


than Sir Bewmaynes whan his helme was off he

loked vp to Þe wyndowe And Þer he sawe Þe fayre lady

dame Lyones And she made hym suche countenaunce that

his herte waxed lyght and joly and Þer with he bade Þe rede

knyght of Þe rede laundis make hym redy and lette us do

oure batayle to the vtteraunce I woll well seyde Þe knyght

and than they laced on Þer helmys and a voyded Þer pagys

and yode to gydyrs and fought freysshly But Þe rede knyȝt

of Þe rede laundys a wayted hym at an ouerthwarte and

smote hym with that his swerde felle oute of his honde

and yette he gaff hym a noÞer buffette vppon the helme Þat

he felle grovelynge to the erthe and Þe rede knyghte

felle ouer hym for to holde hym downe Than cryed the

maydyn Lynet on hyght and seyde A Sir Bewmaynes wher

is thy corrayge be com Alas my lady my sistir be holdyth

the and she shrekis and wepys so that hit makyth myne

herte hevy// Whan sir Bewmaynes herde hir sey so he a

brayded vp with a grete myght and gate hym vppon hys

feete and lyghtly he lepe to his swerde and gryped hit in

his honde and dowbled his pace vnto Þe rede knyght and Þer

they fought a new batayle to gydir // But sir Bewmaynes

than doubled his strokys and smote so thycke that his swerde

felle oute of his honde and than he smote hym on the helme

that he felle to the erthe And Sir Bewmaynes felle vppon

hym and vnlaced his helme to have slayne hym and than                    

he yelded hym and asked mercy And seyde with a lowde voyce a    

noble knyght I yelde me to thy mercy // Than Sir Bewmay//             

nes be thought hym on his knyghtes that he had made to be              

honged shamfully And than he seyde I may nat with my worship

to save thy lyff for the shamefull dedys Þat Þou haste caused

many full good knyghtes to dye // Sir seyde Þe rede knyght


f. 129v (VII.17-18)


holde youre hande & ye shall knowe the causis why I putte

hem to so shamefull a deth // Sey on seyde Sir Bewmaynes

Sir I loved onys a lady fayre & she had hir breÞerne slayne

and she tolde me hit was Sir Launcelot du lake othir ellys

Sir Gawayne and she prayed me as I loved hir hertely that

I wolde make hir a promyse by the faythe of my body knyght//

hode for to laboure in armys dayly vntyll Þat I had mette with

one of them and all that I myght ouercom I sholde put them

to vylans deth // And so I ensured her to do all Þe vylany vnto

Arthurs knyghtes And Þat I sholde take vengeaunce vppon all

these knyghtes and Sir now I woll telle the Þat euery day my

stengthe encresyth tylle none vntyll I haue ·vij· mennys

strength // Than cam Þer many erlys and barowns & noble

knyghtes and prayde that knyght to save his lyff & take hym

to your presoner And all they felle vppon Þer kneis and prayde

hym of mercy Þat he wolde save his lyff And sir they all seyde

hit were fayrer of hym to take omage and feaute and lat

hym holde his londys of you than for to sle hym for by

his deth ye shall have none advauntage And his mysse

dedys that be done may not be vndone And Þer fore make

ye a mendys for all partyes and we all woll be com youre

men and do you omage and feaute // Fayre lordys seyde

Bewmaynes wete you well I am full loth to sle this knyȝt

neuerthelesse he hath done passynge ylle and shamefully // But

in so muche all Þat he dud was at a ladyes requeste I blame

hym Þe lesse and so for your sake I woll relece hym Þat he shall

have his lyff vppon this covenaunte Þat he go in to this castell

and yelde hym to the lady And yf she woll for gyff & quyte

hym I woll well with this he make hir a mendys of all Þe tres//

passe Þat he hath done a yenst hir and hir landys // And also

whan that is done that he goo vnto Þe courte of kyng Arthur


f. 130 (VII.18)


And that he aske Sir Launcelot mercy & Sir Gawayne for Þe

evyll wylle he hath had a yenst them // Sir seyde the rede

knyght all this woll I do as ye commaunde me & syker assu//

raunce and borowys ye shall haue // So whan Þe assurauns

was made he made his omage and feaute And all tho erlys

& barouns with hym And than Þe mayden Lynet com to Sir

Bewmaynes and vnarmed hym and serched his woundis

and staunched the blood and in lyke wyse she dud to Þe rede

knyght of Þe rede laundis And Þer they suggeourned ·x· dayes

in there tentys // And euer Þe rede knyght made all his lordis

and seruauntys to do all the plesure vnto Sir Bewmaynes

that they myght do // And so with in a whyle Þe rede knyghte

yode vnto Þe castell and putt hym In her grace And so she

resseyved hym vppon suffyciaunte surete So that all her

hertys were well restored of all Þat she coude complayne

// And than he departed vnto the courte of kynge Arthure and

there opynly the rede knyght putt hym self in Þe mercy of

Sir Launcelot and of Sir Gavvayne and Þer he tolde opynly

how he was ouercom & by whom And also he tolde all the

batayles frome Þe begynnyng to the endynge // Jesu mercy

seyde kynge Arthure And Sir Gawayne we mervayle

muche of what bloode he is com for her is a noble knyght

//haue ye no mervayle seyde Sir Launcelot for ye shall

ryght well know that he is com of full noble bloode And

as for hys myght & hardynesse Þer bene but full few now

lyvynge Þat is so myghty as he is and of so noble provesse

//hit semyth by you seyde kynge Arthure that ye know his

name and frome whens he comm // I suppose I do so seyde sir

Launcelot or ellys I wolde not have yeffyn hym the hyȝe

order of knyghhode but he gaff me suche charge at Þat tyme

that I woll neuer discouer hym vntyll he requyre me or ellis


f. 130v (VII.18-19)


hit be knowyn opynly by som oÞer // Now turne we vnto Sir

Bewmaynes that desyred dame Lynet that he myght se hir

lady // Sir she seyde I wolde ye saw hir fayne // Than Sir

Bewmaynes all armed toke his horse & his spere and rode

streyte vnto the castell And whan he com to the gate he

founde Þer men armed and pulled vp Þe ra draw brygge and

drew Þe portcolyse // Than he mervayled why they wolde

nat suffir hym to entir And than he loked vp to a wyndow

& Þer he sawe fayre dame lyones that seyde on hyght go thy

way Sir Bewmaynes for as yet Þou shalt nat haue holy my

love vnto the tyme Þat Þou be called one of Þe numbir of the

worthy knyghtes · And there fore go & laboure in worshyp

this ·xij· monthe and than ye shall hyre newe tydyngs

// Alas fayre lady seyde sir Bewmaynes I haue nat de//

served Þat ye sholde shew me this straungenesse And I hadde

wente I sholde haue had ryght good chere with you & vnto

my power I haue deserved thanke and well I am sure I

haue bought your love with parte of the beste bloode with in my

body // Fayre curteyse knyght seyde dame Lyonesse be nat

displeased noÞer be nat ouer hasty for wete you well youre

grete travayle noÞer your good love shall nat be loste for I

consyder your grete laboure & your hardynesse your bounte & your

goodnesse as me ought to do // And there fore go on your

way and loke Þat ye be of good comforte for all shall be for

your worshyp & for the best And parde a ·xij· monthe woll sone

be done And trust me fayre knyght I shall be trewe to

you and neuer be tray you but to my deth I shall love you

and none oÞer And Þer with all she turned frome Þe wyndowe

And Sir Bewmaynes rode a waywarde frome Þe castell

makynge grete dole And so he rode now here now there

he wyste nat whoÞer tyll hit was durke nyght // And than


f. 131 (VII.19)


hit happened hym to com to a pore mannys house and Þer he

was herborowde all that nyght // But sir Bewmaynes

had no reste but walowed & wrythed for the love of the

lady of Þat castell // And so vppon the morn he toke his

horse & rode vntyll vndyrn and than he com to a brode

watir & Þer he a lyght to slepe & leyde his hede vppon hys

shylde and be toke his horse to the dwarff & commaunded the

dwarff to wacche all nyght // Now turne we to Þe lady

of Þe same castell Þat thought muche vppon Bewmaynes

And than she called vnto hir Sir Gryngamoure hir broÞer

and prayde hym in all maner as he loved hir hertely Þat

he wolde ryde aftir Sir Bewmaynes and euer haue ye

wayte vppon hym tyll ye may fynde hym slepyng for I

am sure In his hevynesse he woll a lyght a downe in som

place and lay hym downe to slepe & Þerfore haue ye youre

wayte vppon hym in prevy maner & take his dwarff and

com your way wyth hym as faste as ye may // For my

sistir Lynet tellyth me Þat he can telle of what kynrede he

is com of & in Þe meane whyle I and my sistir woll ryde

vntyll your castell to wayte whan ye brynge with you the

dwarff and than woll I have hym in examynacion my

self for tyll Þat I know what is his ryght name and of

what kynrede he is commyn shall I neuer be myrry at my

herte/ Sistir seyde sir Gryngamour all this shall be done

aftir your entente And so he rode all that oÞer day and the

nyght tyll he had lodged hym And whan he sawe Sir

Bewmaynes faste on slepe he com stylly stalkyng be

hynde Þe dwarff & plucked hym faste vndir his arme

and so rode his way with hym vntyll his owne castell

// And this Sir Gryngamoure was all in blak his armour

& his horse & all Þat tyll hym longyth But euer as he rode


f. 131v (VII.19-20)


with the dwarff towarde Þe castell he cryed vntyll his lorde

and prayde hym of help And there wyth a woke Sir Beawmay//

nes and vp he lepte lyghtly and sawe where Þe blak knyȝt

rode his way way wyth the dwarff & so he rode oute of

his syght // Than Sir Bewmaynes put on his helme

& buckeled on his shylde and toke his horse & rode afftir

hym all Þat euer he myght thorow mores & fellys & grete

sloughis Þat many tymes his horse & he plunged ouer there

hedys in depe myres for he knewe nat Þe way but toke

Þe gayneste way in Þat woodenesse // That many tymes

he was lyke to peryshe And at Þe laste hym happened to

com to a fayre grene way and Þer he mette with a poore

man of the contray and asked hym wheÞer he mette nat

with a knyght vppon a blak horse & all blak harneyse and

a lytyll dwarff syttynge be hynde hym with hevy chere

// Sir seyde the poore man here by me com Sir Gryn//

gamoure the knyght with suche a dwarff and there fore

I rede you nat to folow hym for he is one of Þe perelyst

knyghtes of Þe worlde and his castell is here nere hon//

de but ·ij· myle // There fore we a vyse you ryde nat

aftir Sir Gryngamour but yf ye owe hym good wylle

// So leve we Sir Bewmaynes rydyng toward Þe castell

and speke we of Sir Gryngamoure and Þe dwarff anone

as Þe dwarff was com to Þe castell dame Lyonesse and dame

Lynet hir systir asked Þe dwarff where was his mastir bor//

ne and of what lynage was he com And but yf Þou telle

me seyde dame Lyonesse Þou shalt neuer a scape this castel

but euer here to be presonere As for that seyde Þe dwarff

I feare nat gretly to telle his name & of what kynne

he is commyn of // Wete you well he is a kynges son and

a quenys And his fadir hyght kynge Lot of Orkeney


f. 132 (VII.20)


And his modir is sistir to knyn kyng Arthure And he

is broÞer to Sir Gawayne and his name is Sir Gareth

of Orkenay And now I haue tolde you his ryght name

I pray you fayre lady lat me go to my lorde a gayne

for he woll neuer oute of this contrey tyll he haue me

a gayne and yf he be angry he woll do harme or Þat

he be stynted & worcheyou wrake in this contrey · As

for that be as be may // Nay seyde Sir Gryngamoure

as for Þat thretynge we woll go to dynere & so they way//

shed and wente to mete & made hem mery & well at

ease by cause Þe lady Lyonesse of the castell perelus was

Þer they made Þe getter joy // Truly madam seyde Lynet

vnto hir sistir well may he be a kyngys son for he hath

many good tacchis for he is curtyese & mylde and the

most sufferynge man Þat euer I mette with all For I dare

sey Þer was neuer jantyll woman revyled man in so foule

a maner a I have rebuked hym And at all tymes he gaff

me goodly & meke answers a gayne And as they sate

thus talkynge Þer cam Sir Gareth in at Þe gate with hys

swerde drawyn in his honde and cryed a lowde Þat all

Þe castell myght hyre Þou traytour knyght sir Grynga//

moure delyuer me my dwarff a gayne or by the fayth

Þat I owȝe to god and to the hygh ordir of knyghthode I

shall do the all Þe harme Þat may lye in my power // Þan

Sir Gryngamour loked oute at a wyndow And seyde sir

Gareth of Orkenay leve thy bostyng wordys for Þou

gettyst nat thy dwarff a gayne // Than cowarde

knyght seyde Gareth brynge hym with the and com

& do batayle with me & wynne hym & take hym // So

well I do seyde Sir Gryngamoure and me lyste but

for all thy grete wordys Þou gettyst hym nat A fayre


f. 132v (VII.20-1)


lady seyde dame Lynet I wolde he hadde his dwarff a gayne for

I wolde he were nat wroth: for now he hath tolde me all my

desyre I kepe no more of Þe dwarff // And also broÞer he hath done

muche for me & delyuerde me frome Þe rede knyght of the rede

laundis // And Þerfore broÞer I owe hym my servyse a fore all knyghtes

lyvynge And wete you well that I love hym by fore all othyr

knyghtes lyvynge and full fayne I wolde speke with hym But in

no wyse I wolde nat Þat he wyste what I were but as I were

a nothir strange lady// well sistir seyde Sir Gryngamour sythen

that I know no your wyll I woll obey me now vnto hym And so Þer

with he wente downe And seyde Sir Gareth I cry you mercy

and all Þat I haue mysse done I woll a mende hit at your wylle &

Þerfore I pray you Þat ye wolde a lyght & take suche chere as I

can make you In this castell // Shall I haue my dwarff seyde

Sir Gareth yee Sir & all Þe plesure Þat I can make you for as

sone as your dwarff tolde me what ye were & of what kynde

ye ar com & what noble dedys ye haue done in this marchis

than I repented me of my dedys // Than Sir Gareth a lyȝt

and Þer com his dwarff & toke his horse // A my felow seyde sir

Gareth I haue had muche adventures for thy sake And so sir

Gryngamoure toke hym by the honde & ledde hym In to Þe halle

where his owne wyff was / And than com forth dame Lyones

a rayde lyke a prynces & Þer she made hym passyng good chere &

he hir a gayne And they had goodly langage & lovely countenaunce

And Sir Gareth thought many tymes Jesu wolde Þat Þe lady of

this castell perelus were so fayre as she is And Þer was all maner

of gamys & playes of daunsyng & syngynge And euer more sir

Gareth be helde Þat lady and Þe more he loked on her Þe more he

brenned in love Þat he passed hym self farre in his reson & forth

towardys nyght they yode vnto souper // And Sir Gareth myȝt

nat ete for his love was so hoote Þat he wyst nat where he was





      All thes lokis


f. 133 (VII.21)


All thes lokys aspyed Sir Gryngamour And than aftir souper

he called his sistir dame Lyonesse vntyll a chambir And sayde

fayre sistir I haue well a spyed your countenaunce be twyxte you

& this knyght And I woll sistir Þat ye wete he is a full noble

knyght & yf ye can make hym to a byde here I woll do hym all

Þe plesure Þat I can For and ye were bettir than ye ar ye were

well be wared vppon hym // Fayre broÞer seyde dame Lyonesse

I vndirstonde well Þat the knyght is a good knyght & com he

is oute of a noble house nat withstondyng I woll assay hym bettir

how be hit I am moste be holde to hym of ony erthely man for

he hath had grete labour for my love and passed many dangerous

passagis // Ryght so Sir Gryngamour wente vnto sir Gareth &

seyde Sir make ye good chere for ye shall haue none oÞer cause

For this lady my sistir is youres at all tymes hir worshyp

saved for wete you well she lovyth you as well as ye do hir

& bettir yf bettir may be // And I wyste Þat seyde Sir Gareth

there lyved nat a gladder man than I wolde be / vppon my

worshyp seyde Sir Gryngamoure truste vnto my promyse

and as longe as hit lykyth you ye shall suggeourne with me

and this lady shall be wyth vs dayly & nyghtly to make you

all Þe chere that she can // I woll well seyde Sir Gareth for

I have promysed to be nyȝe this contray this ·xij· monthe & well

I am sure kynge Arthure and oÞer noble knyghtes woll fynde

me where Þat I am wyth In this ·xij· monthe for I shall be souȝt

& founden yf Þat I be on lyve // And than Sir Gareth wente

vnto the lady dame Lyonesse and kyssed hir many tymes and

eythir made grete joy of oÞer and Þer she promysed hym hir love

sertaynly to love hym and none oÞer dayes of hir lyff // Than

this lady dame Lyonesse by the assent of hir broÞer tolde Sir

Gareth all Þe trouthe what she was & how she was Þe same

lady that he dud batayle fore and how she was lady of Þe castell


f. 133v (VII.21-2)


perelus And Þer she tolde hym how she causid hir broÞer to take a way

his dwarff // For this cause to know the sertayne what was your

name and of what kyn ye were com And than she lette fette be

be fore hym hir systir Lynet that had ryddyn with hym many //

a wylsom way // Than was Syr Gareth more gladder Þan

he was to fore and than they trouthe plyght oÞer to love and neuer

to fayle whyle Þer lyff lastyth // And so they brente bothe in hoote

love Þat they were acorded to a bate Þer lustys secretly // And there

dame Lyonesse counceyled Sir Gareth to slepe in none oÞer place

but In Þe halle & Þer she promysed hym to com to his bed a lytyll

a fore mydnyght // This counceyle was nat so prevyly kepte

but hit was vndirstonde for they were but yonge bothe & tendir

of ayge and had nat vsed suche craufftis to forne / Where fore

Þe damesell Lyonett was a lytyll dysplesed & she thought hir sister

dame Lyonesse was a lytyll ouer hasty Þat she myght nat a byde

hir tyme of maryage and for savyng of hir worshyp she thouȝt

to a bate Þer hoote lustis And she fete ordeyne by hir subtyle craufftes

that they had nat theire intentys neythir with othir as in her delytes

vntyll they were maryed And so hit paste on at aftir souper

was made a clene avoydaunce Þat euery lorde & lady sholde go

vnto his reste // But Sir Gareth seyde playnly he wolde

go no farther than the halle for in suche placis he seyde was

convenyaunte for an arraunte knyght to take his reste In

// And so Þer was ordayned grete cowchis & Þer on fethirbeddis

and Þer he leyde hym downe to slepe And with in a whyle came

dame Lyonesse wrapped in a mantell furred with Ermyne and

leyde hir downe by the sydys of Sir Gareth And Þer with all he be

gan to clyppe hir & to kysse hir And Þer with all he loked be fore

hym & sawe an armed knyght with many lyghtes a boute hym · &

this knyght had a longe gysarne in his honde & made a grymme

countenaunce to smyte hym // Whan Sir Gareth sawe hym


f. 134 (VII.22)


com In that wyse he lepte oute of his bedde and gate In

his hande a swerde & lepte towarde Þat knyght // And whan

Þe knyght sawe sir Gareth com so fersly vppon hym he smote

hym with a foyne thorow the thycke of Þe thygh that Þe wounde

was a shafftemonde brode & had cutte a too many vaynes &

synewys And Þer with all Sir Gareth smote hym vppon Þe helme

suche a buffette that he felle grovelyng And than he lepe ouer

hym & vnlaced his helme & smote off his hede fro the body

And than he bled so faste Þat he myght not stonde but so he ley//

de hym downe vppon his bedde and Þer he sowned and lay as

he had bene dede // Than dame Lyonesse cryed a lowde Þat sir

Gryngamoure harde hit & com downe And whan he sawe sir

Gareth so shamfully wounded he was sore dyspleased & seyde

I am shamed Þat this noble knyght is thus dishonoured // Sir

seyde Sir Gryngamour how may this be Þat this noble knyght is

thus wounded // Brothir she seyde I can nat telle you for hit

was nat done by me noÞer be myne assente For he is my lorde

and I am his And he muste be myne husbonde // There fore

brothir I woll Þat ye wete I shame nat to be with hym nor to do

hym all Þe plesure Þat I can // Sistir seyde Gryngamour and I

woll that ye wete hit and Gareth bothe that hit was neuer

done by me noÞer be myne assente this vnhappy dede was neuer

done And Þer they staunched his bledyng as well as they myȝt

& grete sorow made sir Gryngamour and dame Lyonesse And

forth with all com dame Lyonett and toke vp the hede in the

syght of them all and a noynted hit with an oyntemente Þer as

hit was smyttyn off And In the same wyse he ded to the othir

parte Þer as the hede stake // And than she sette hit to gydirs

& hit stake as faste as euer hit ded and Þe knyght a rose lyghtly

vp & Þe damesell Lyonett put hym in hir chambir All this saw

Sir Gryngamour and dame Lyonesse And so ded Sir Gareth and


f. 134v (VII.22-3)


well he a spyed that hit was dame Lyonett that rode with hym

thorow Þe perelouse passages // A well damesell seyde sir Gareth

I wente ye wolde nat haue done as ye haue done // My lorde

Sir Gareth seyde Lyonett all that I haue done I woll a vowe

hit and all shall be for your worshyp & vs all And so with in a

whyle Sir Gareth was nyȝe hole and waxed lyght and

jocounde and sange & daunced // That a gayne Sir Gareth

& dame Lyonesse were so hoote in brennynge love that they

made Þer covenarauntes covenauntes at the ·x· nyght aftir that

she sholde com to his bedde And be cause he was wounded

a fore he leyde his armour & his swerde nygh his beddis syde

// And ryght as she promysed she com // And she was nat so

sone In his bedde but she a spyed an armed knyght commynge

towarde the bed and a none she warned Sir Gareth And lyȝtly

thorow the good helpe of dame Lyonesse he was armed and

they hurled to gydyrs with grete Ire & malyce all aboute the

halle // And Þer was grete lyght as hit had be Þe numbir of ·xxt

torchis bothe by fore and be hynde // So Sir Gareth stray//

ned hym so thathis olde wounde braste a yen on bledynge

but he was hote and corragyous and toke no kepe but with

his grete forse he strake downe the knyght & voyded hys

helme and strake of his hede // Than he hew Þe hede vppon

an ·C· pecis And whan he had done so he toke vp all tho pecis

and threw them oute at a wyndow in to the dychis of the

castel And by this done he was so faynte that vnnethis he

myght stonde for bledynge and by than he was all moste

vnarmed he felle in a dedly sowne in the floure // Than

dame Lyonesse cryed that Sir Gryngamoure herde her

And whan he com and founde Sir Gareth in Þat plyght

he made grete sorow and Þer he a waked Sir Gareth and

gaff hym a drynke Þat releved hym wondirly well // But


f. 135 (VII.23)


the sorow that dame Lyonesse made Þer may no tunge telle

for she so fared with hir self as she wolde haue dyed // Ryȝt

so come this damesell Lyonett be fore hem all and she had

fette all the gobbettis of Þe hede Þat Sir Gareth had throwe

oute at the wyndow And Þer she a noynted hit as she dud to

fore and put them to the body in Þe syght of hem all // Well

damesell Lyonett seyde Sir Gareth I haue nat deserued all

this dyspyte Þat ye do vnto me Sir knyght she seyde I haue

no thynge done but I woll a vow hit And all Þat I haue

done shall be to your worshyp and to vs all // Than was

Sir Gareth staunched of his bledynge but Þe lechis seyde

Þer was no man Þat bare Þe lyff sholde heale hym thorowly of

of his wounde but yf they heled them that caused Þe stroke

by enchauntemente // So leve we Sir Gareth there wyth

Sir Gryngamour and his Sisters and turne we vnto kyng

Arthure that at Þe nexte feste of Pentecoste there cam

Þe grene knyght & fyfty knyghtes with hym and yeldyd them all

vnto kynge Arthure Than there com the rede knyghte

and his broÞer and yelded them to kynge Arthure wyth

·iij· score knyghtes with them // Also Þer com Þe blew knyght &

his broÞer and yelded hem to kyng Arthure And Þe grene

knyghtes name was Sir Partholype And Þe rede knyȝtes

name was Sir Perymones And Þe blew knyghtes name

was sir Persaunte of Inde thes ·iij· breÞerne tolde kynge

Arthure how they were ouercom by a knyght Þat a damesell

had with hir & she called hym sir Bewmaynes Jesu seyde

Þe kynge I mervayle what knyght he is & of what lynage

he is com here he was with me a ·xij· monthe & poorely

and shamefully he was fostred And Sir Kay I scorne named

hym Bewmaynes So ryght as Þe kynge stode so talkyng

with thes ·iij· breÞerne Þer com Sir Launcelot du Lake and tolde


f. 135v (VII.23)


the kynge Þat there was com a goodly lorde with ·v· C· knyghtys

with hym // Than the kynge was at Carlyon for Þer was Þe feste

holde And thidir com to hym this lorde and salewed Þe kynge

with goodly maner // What wolde ye seyde kynge Arthure And

what is your Erande Sir he seyde I am called Þe rede knyght

of Þe rede laundis but my name is Sir Ironsyde And Sir

wete you well hydir I am sente vnto you frome a knyght

Þat is called Sir Bewmaynes for he wanne me in playne

batayle had hande for hande And so ded neuer knyght but he

that euer had Þe bettir of me this ·xxt· wyntir And I am com//

maunded to yelde me to you at your wyll // ye ar welcom

seyde Þe kynge for ye haue bene longe a grete foo of ow//

res to me & to my courte and now I truste to god I shall

so entrete you that ye shall be my frende Sir bothe I

& thes ·v· C· knyghtes shall all wayes be at your sommons to

do you suche seruryse as may lye in oure powers // gra//

mercy seyde kynge Arthure I am muche be holdyng vnto

Þat knyght Þat hath so put his body in devoure to worshyp

me and my courte // And as to the Sir Ironsyde Þat is called

Þe rede knyght of Þe rede laundys Þou arte called a perelouse

knyght And yf Þou wolte holde of me I shall worshyp the

& make Þe knyght of the table rounde but than Þou muste

be no man murtherer // Sir as to that I haue made

my promyse vnto Sir Bewmaynes neuer more to vse such

customs For all the shamefull customs Þat I used I ded hit

at Þe requeste of a lady Þat I loved And Þer fore I muste goo

vnto Sir Launcelot and vnto Sir Gawayne and aske

them for gyffnesse of the evyll wyll I had vnto them

for all tho Þat I put to deth was all only for Þe love of

Sir Launcelot and of Sir Gawayne They bene here

seyde Þe kynge be fore Þe now may ye sey to them what


f. 136 (VII.23-4)


ye woll // And than he kneled downe vnto Sir Launcelot

and to Sir Gawayne And prayde them of forgeffnesse

of his enmyte Þat he had a yenste them // Than goodly

they seyde all at onys god for gyff you & we do And we

pray you Þat ye woll telle vs where we may fynde Sir

Bewmaynes Fayre lorde sayde Sir Ironsyde I can nat

telle you for hit is full harde to fynde hym for such yon//

ge knyghtes as he is whan they be in Þer adventures bene

neuer a bydyng in no place But to sey the worshyp Þat the

rede knyght of Þe rede laundys And Sir Persaunte

and his breÞerne seyde by him hit was mervayle to hy//

re // Well my fayre lordys seyde kynge Arthure wete

you well I shall do you honour for the love of Sir Bew//

maynes and as sone as euer I may mete with hym I shal

make you all vppon a day knyghtes of Þe table rounde

And as to the Sir Persaunte of Inde Þou hast bene euer

called a full noble knyght and so hath euer more thy

·iij· breÞerne bene called But I mervayle seyde the

kn kynge Þat I here nat of Þe blak knyght your broÞer he was

a full noble knyght // Sir seyde Pertolype the grene

knyght // Sir Bewmaynes slew hym In a recountir

with hys spere his name was Sir Perarde that was

grete pyte seyde Þe kynge and so seyde many knyghtes for

thes ·iiij· brethyrne were full well knowyn in kynge

Arthures courte for noble nob knyghtes for long tyme

they had holdyn werre a yenste the knyghtes of Þe rownde

table · Than Partolype the grene knyght tolde Þe kyng

that at a passage of the watir of Mortayse Þer encountird

Sir Bewmaynes with too breÞerne that euer for the moste party

kepte that passage and they were ·ij· dedly knyghtes and Þer

he slew the eldyst broÞer in the watir & smote hym vppon


f. 136v (VII.24-6)


the hede suche a buffette Þat he felle downe In Þe watir and

Þer was he drowned And his name was Sir Garrarde le//

Brewse and aftir he slew the oÞer broÞer vppon Þe londe hys

name was Sir Arnolde le brewse So than the kynge

wente to mete and were served in the beste maner And

as they sate at the mete Þer com In the quene of Orkenay

with ladyes and knyghtes a grete number // And than Sir

Gawayne Sir Aggravayne And Sir Gaherys a rose &

wente to hir modir & salewed hir vppon Þer kneis and asked

hir blyssynge For of ·xv· yere be fore they had not sene

hir // Than she spake vppon hyght to hir broÞer kynge Ar//

thure where have ye done my yonge son Sir Gareth for

he was here a mongyst you a ·xij· monthe And ye made

a kychyn knave of hym Þe whyche is shame to you all

// Alas Where have ye done my nowne dere son Þat was

my joy and blysse // A dere modir seyde Sir Gawayne I

knew hym nat · Nothir I seyde Þe kynge that now me re//

pentys but thanked be god he is previd a worshypfull

knyght as ony Þat is now lyvyng of his yerys And I shall

nevir be glad tyll Þat I may fynde // A brothir seyde Þe quene

ye dud your self grete shame whan ye a mongyst you kepte

my son In the kychyn and fedde hym lyke an hogge · / Fayre

sistir seyde kynge Arthure ye shall ryght well wete that I

knew hym nat noÞer no more dud Sir Gawayne nothir his

breÞerne but sytthe hit is so seyde Þe kynge that he thus

is gone frome vs all we muste shape a remedy to fynde

hym // Also Sistir me semyth ye myght haue done me

to wete of his commynge And than if I had nat done well to

hym ye myght haue blamed me for whan he com to Þis

courte he cam lenynge vppon too mennys sholdyrs as

though he myght nat haue gone And than he asked


f. 137 (VII.26-7)


me ·iij· gyfftys And one he asked that same day & that

was that I wolde gyff hym mete I nowȝe Þat ·xij· monÞe

And the oÞer ·ij· gyfftys he asked that day ·xij· monÞe And

that was that he myght haue Þe adventure of Þe damesel

Lyonett And Þe thirde that Sir Launcelot sholde make hym

knyght whan he desyred hym And so I graunted hym all

my desyre and many in this courte mervayled that he

desyred his sustynaunce for a ·xij· monÞe And Þer by we de//

med many of vs that he was nat com oute of a noble

house // Sir seyde the quene of Orkenay vnto kynge Arthure

her broÞer wete you well that I sente hym vnto Þou ryght well

armed and horsed and worshypfully be sene of his body and

golde & syluer plente to spende // hit may be so seyde Þe kyng

but Þer of sawe we none save that same day that he departed

frome vs knyghtes tolde me Þat Þer com a dwarff hyder suddey//

nely and brought hym armour and a good horse full well

and rychely be seyne And Þer at all we had mervayle frome

whens Þat rychesse com Than we demed all that he was

com of men of worshyp // BroÞer seyde Þe quene all that

ye sey we be leve for euer sytthen he was growyn he was

feythfull and trew of his promyse // But I mervayle seyde

she that Sir Kay dud mok and scorn hym and gaff hym to

name Bewmaynes yet Sir Kay seyde Þe quene named

hym more ryghtevously than he wende for I dare sey he

is as fayre an handid man and he be on lyve as ony ly//

vynge // Sistir seyde Arthure lat this langage now be

stylle and by the grace of god he shall be founde and he

be with in this ·vij· realmys and lette all this passe and

be myrry for he is preved to a man of worshyp and that

is my joy // Than seyde Sir Gawayne and his breÞerne

vnto kynge Arthure Sir and ye woll gyff vs leve we woll


f. 137v (VII.27)


go seke oure broÞer // Nay sayde Sir Launcelot that shall not

nede And so seyde Sir Bawdwyn of Brytaygne for as by

oure advyse the kynge shall sende vnto dame Lyonesse for

as by owre avyse a messyngere and pray hir that she wolle

com to the courte in all haste Þat she may & doute ye nat she

woll ctm And than she may gyff you Þe beste counceyle where

ye shall fynde Sir Gareth this is well seyde of you seyde Þe

kynge // So than goodly lettyrs were made & Þe messyngere

sente forth Þat nyght & day wente tyll he com to the castel pere//

lous And than Þe lady dame Lyonesse was sente fore Þer as she

was with Sir Gryngamour hir broÞer and Sir Gareth And whan

she undirstoode this messyngere she bade hym ryde on his

way vnto kynge Arthure And she wolde com aftir in all

Þe moste goodly haste // Than she com vnto sir Gryngamour

and to sir Gareth and tolde hem all how kyng Arthure hadde

sente for hir · That is be cause of me seyde Sir Gareth  Now

avyse ye me seyde dame Lyonesse what I shall sey & in what

maner I shall rule me · My lady & my love seyde Sir Gareth

I pray you In no wyse be ye a knowyn where I am · But well

I wote my modir is Þer and all my breÞerne & they woll take

vppon hem to seke me I woll Þat they do // But this madam I

woll ye sey & avyse Þe kynge whan he questyons with you of

me Than may ye sey this is your avyse that and hit lyke his

good grace ye woll do make a cry a yenst the assumpcion of

of oure lady that what knyght Þat prevyth hym beste he shall

wedde you and all your lande // And yf so be Þat he be a wedded

man that wynnes Þe degre he shall haue a coronallof golde

sette with stonys of vertu to the valew of a ·Ml·li· and a whyght

jarfawcon // So dame Lyonesse departed and to com off And to

breff this tale // Whan she com to kynge Arthure she was

nobly resseyved and Þer she was sore questyonde of the kynge &


f. 138 (VII.27)


of the queen of Orkenay And she answered where Sir Gareth

was she coude not tell // But this muche she seyde vnto

kynge Arthure Sir by your avyse I woll let cry a turnemente

that shall be done be fore my castell at Þe assumption of oure

lady And Þe cry shall be this that you my lorde Arthure shall

be there and your knyghtes and I woll purvey that my knyghtes

shall be a yenste youres And than I am sure I shall hyre of

Sir Gareth this is well a vysed seyde kynge Arthure And so

she departed and the kynge And she made grete provysion to the

turnemente // Whan dame Lyonesse was com to the Ile of

Avylyon that was Þe same Ile there as hir broÞer sir Gryngamour

dwelled than she tolde hem all how she had done & what promyse

she had made to kynge Arthure Alas seyde Sir Gareth I haue

bene so sore wounded with vnhappynesse sitthyn I cam In to this

castell that I shall nat be able to do at that turnemente lyke

a knyght for I was neuer thorowly hole syn I was hurte // Be

ye of good chere seyde Þe damesell Lyonett for I vndirtake with

In this ·xv· dayes to make you as hole and as lusty as euer ye

were // And than she leyde an oynemente and salue to hym

as hit pleased hir that he was neuer so freyshe noÞer so lusty as

he was tho // Than seyde the damesell Lyonett sende you vnto

Sir Persaunte of Inde and assumpne hym that he be redy Þer

with hole assomons of knyghtes lyke as he made his promyse //

// Also that ye sende vnto Ironsyde that is knyght of Þe rede

laundys and charge hym Þat he be Þer with you wyth his hole

somme of knyghtes And than shall ye be able to macche wyth

kynge Arthure and his knyghtes // So this was done and

all knyghtes were sente fore vnto the castell perelous // Þan

the rede knyght answerde and sayde vnto dame Lyonesse &

to Sir Gareth ye shall vndirstonde Þat I haue bene at Þe courte

of kynge Arthure and Sir Persaunte of Inde and his broÞerne


f. 138v (VII.27)


and Þer we haue done oure omage as ye comaunded vs // Also

seyde Sir Gareth I have takyn vppon me with Sir Persaunte

of Inde and his breÞerne to holde party a gaynste my lorde sir

Launcelot and the knyghtes of Þat courte And this have I done

for the love of my lady dame Lyonesse and you my lorde sir

Gareth ye haue well done seyde Sir Gareth Butt wete

ye well we shall be full sore macched with the moste nobleste

knyghtes of the worlde Þerfore we muste purvey vs of good

knyghtes where we may may gete hem // ye sey well seyde

Sir Persaunte and worshypfully And so the cry was ma//

de In Ingelonde Walys Scotlonde Irelonde & Cornw//

ayle And In all the oute Iles And In Bretayne and

many contrayes that at oure Iady day the assumpsion

next folowynge sholde com to the castell perelus be sy//

de the Ile of Avylon // And Þer all knyghtes whan they

com Þer sholde chose whethir them lyste to be on Þe tone

party with the knyghtes of Þe castell oÞer to be with kyng Arthur

on Þe tothir party And ·ij· monthis was to the day that Þe

turnamente sholde be // And so many good knyghtys

Þat were at hir large helde hem for the moste party all

this tyme a yenste kynge Arthure and Þe knyghtes of the

rounde table and so they cam In the syde of castell // And

Sir Epynogrys was Þe fyrste & he was Þe kynges son of

Northumbirlonde // And Sir Palamydes the saresyn

was a noÞer And Sir Safere And Sir Segwarydes hys

breÞerne but they bothe were crystynde And Sir Malegry//

ne and Sir Bryan de les Iles a noble knyght And Sir

Grummor & Grummorson ·ij· noble knyghtes of Scotlond And

Sir Carados of the dolowres towre a noble knyght And

Sir Terquyne his broÞer And Sir Arnolde and sir Gauter

ij· breÞerne good knyghtes of Cornuayle // Also Þer com Sir


f. 139 (VII.27-8)


Trystrams de Lyones And with hym Sir Dynas Þe Senesci//

all and Sir Saduk But this sir Trystrams was nat at

Þat tyme knyght of Þe rounde table but he was at that tyme

one of Þe beste knyghtes of Þe worlde And so all thes noble

knyghtes accompanyed hem with Þe lady of Þe castell & with Þe rede

knyght of Þe rede laundys / But as for Sir Gareth he wol//

de nat take vppon hym but as othir meane knyghtis

Than turne we to kynge Arthure that brought wyth

hym Sir Gawayne Aggravayne Gaherys his breÞern

And than his nevewys as Sir Uwayne le blaunche maynes

and Sir Agglovale Sir Tor Sir Percivale de galys Sir

Lamerok de galys Than com Sir Launcelot du Lake with his

breÞerne nevewys & cosyns as Sir Lyonell Sir Ector de ma//

rys Sir Bors de gaynys And Sir Bleobrys de gaynes

Sir BIamour de gaynys And Sir Galyhodyn Sir Galyhud

and many mo of Sir Launcelottys kynne And Sir Dyna//

dan Sir Lacote male tayle his broÞer a knyght good And Sir

Sagramoure le desyrus Sir Dodynas le Saveage And all

Þe moste party of Þe rounde table Also Þer cam with kynge Arthure

thes kynges the kyng of Irelonde kynge Angwysauns & the

kynge of Scotlonde kynge Carados And kynge Uryens of

the londe of Gore and kynge Bagdemagus and his son

Slr Mellyagauns and sir Galahalte the noble prynce All

thes prynces and Erlys Barowns & noble knyghtes as

Sir Braundyles Sir Uwayne led Avoutres And Sir Kay

sir Bedyvere sir Melyot de Logres Sir Petypace of wyn//

chilse Sir Gotlake All thes com with kynge Arthure and mo

Þat be nat here rehersid // Now leve we of thes knyghtes and

kynges and lette vs speke of the grete aray Þat was made with

In the castell and a boute Þe castell for this lady dame Lynesse

ordayned grete aray vppon hir party for hir noble knyghtys


f. 139v (VII.28)


for all maner of lodgynge and vytayle that cam by londe and

by watir that Þer lacked no thynge for hir party noÞer for Þe othir

party but Þer was plente to be had for golde & syluer for kynge

Arthure and all his knyghtes And than Þer cam the herbygeours

frome kynge Arthure for to herborow hym & his kyngys

deukis Erlys Barons knyghtes // Than Sir Gareth prayde

dame Lyonesse and Þe rede knyght of Þe rede laundys and

Sir Persaunte and his breÞerne And Sir Gryngamour that

in no wyse Þer sholde none of them telle his name & make

no more of hym than of Þe leste knyght Þat Þer was for he sey//

de I woll nat be knowyn of neythir more ne lesse nothir

at Þe begynnynge noÞer at Þe endyng // Than dame Lyones

seyde vnto Sir Gareth Sir I wolde leve with you a rynge

of myne but I wolde pray you as ye love me hertely

lette me haue hit a gayne whan the turnemente is done

For Þat rynge encresyth my beawte muche more than hit

is of my self And the vertu of my rynge is this Þat that is

grene woll tume to rede and that Þat is rede woll turne

in lyknesse to grene And that Þat is blewe woll turne to

whyghte And that Þat is whyght woll in lyknesse to blew

And so hit woll do of all maner of coloures · Also who Þat beryth

this rynge shall lose no bloode and for grete love I woll

gyff you this rynge // Gramercy seyde Sir Gareth myne

owne lady for this rynge is passynge mete for me for

hit woll turne all maner of lyknesse that I am in And Þat

shall cause me Þat I shall nat be knowyn // Than Sir

Gryngamour gaff Sir Gareth a bay coursor Þat was a pas//

synge good horse Also he gaff hym good armour & sure and

a noble swerde Þat som tyme Sir Gryngamours fadir wan

vppon an hethyn tyrraunte And so this euery knyght made

hym redy to Þat turnemente // And kynge Arthure was


f. 140 (VII. 28-9)


commyn ·ij· dayes to fore the Assumption of oure lady and Þer

was all maner of Royalte of all maner of mynstralsy Þat myȝt

be founde // Also Þer cam quene Gwenyvere and thequene

of Orkeney Sir Garethis moÞer And vppon Þe assumpcion

day whan masse & matyns was done there was herodys

with trumpettis commaunded to blow to the felde And so Þer com

oute Sir Epynogrys the kynges son of Northumbirlonde

frome Þe castell and Þer encountyrde with hym Sir Sagramoure

le desyrous and eythir of them brake there sperys to theire

handis And than com In Sir Palomydes oute of Þe castell

and Þer encountyrd with hym Sir Gawayne And eythir of them

smote oÞer so harde Þat bothe good knyghtes & Þer horsis felle to the

erthe And than the knyghtes of eythir party rescowed oÞer// Þan

cam In Sir Safer And Sir Segwarydes breÞerne to Pala//

mydes And Þer encountyrd Sir Aggravayne with Sir Safer

And sir Gaherys encountyrd with Sir Segwarydes So Sir

Safer smote downe sir Aggravayne And Sir Malegryne

a knyght of Þe castell encountyrd with Sir Uwayne le blaunche

maynes And smote downe Sir Malegryne that he had all

moste broke his necke // Than Sir Bryan de les Iles and

Grummor and Grummorson knyghtes of Þe castell encountyrde

with Sir Agglovale And Sir Tor and smote them of Þe castell

downe // Than com In Sir Carados of Þe dolowres towre

and Sir Terquyne knyghtes of Þe castell And Þer encountyrd

with hem Sir Percivale de galys And Sir Lamerok his broÞer

and Þer they smote downe eche othir hors & man to the erthe

& eythir partyes rescowed oÞer & horsed them a gayne And sir

Arnolde and Sir Gawter knyghtes of Þe castell encountird

wyth Sir Brandyles and Sir Kay And thes ·iiij· knyghtes

encountyrde myghtely & brake Þer sperys to theyre handis

// Than com In Sir Trystrams Sir Saduk and sir Dynas


f. 140v (VII.29)


knyghtes of Þe castall And Þer encountyrd with Sir Trystrams

Sir Bedyvere And Sir Bedyvere was smyttyn to the erthe

bothe horse & man And Sir Sadoke encountyrde wyth sir

Petypace and Þer sir Sadoke was ouerhrowyn And Þer Sir

Uwayne les avoutres smote downe Sir Dynas Þe Senesci//

all than com In Sir Persaunte of Inde a knyght of the

castell & ther encounlyrde with hym Sir Launcelot du lake

and Þer he smote Sir Persaunte horse and man to Þe erthe

// Than come In Sir Pertolype frome Þe castell and Þer

encountyrde with hym Sir Lyonell and Þer sir Pertolype the

grene knyght smote downe Sir Lyonell brothir to sir Laun//

celot and all this was marked wyth noble herrodis who

bare hym beste & Þer namys And than com In to the felde sir

Perimones the grene knyght Sir Persauntis brothir Þat

was a knyght of Þe castell And he encountyrde wyth sir

Ector de marys and aythir of hem smote oÞer so harde that

hir sperys and horsys and they felle to the erthe // And

than com In the rede knyght of the rede laundis and sir

Gareth frome the castell And Þer encountyrde with hem Sir

Bors de gaynys and Sir Bleobrys And Þer Þe rede knyght

and Sir Bors smote oÞer so harde Þat hir sperys braste and

Þer horsys felle grovelynge to the erthe // Than sir Blamour

brake an oÞer spere vppon Sir Gareth but of that stroke

Sir Blamour felle to the erthe · That sawe Sir Galyhuddyn

and bade Sir Gareth kepe hym And Sir Gareth smote hym

anone to the erthe // Than sir Galyhud gate a spere to

a venge his broÞer And In the same wyse Sir Gareth ser//

ved hym And in Þe same maner Sir Gareth served sir Dyll

nadan and hls broÞer Sir Lakote male tayle And sir Sagra//

moure le desyrus and Sir Donyas le saveage all these

knyghtes he bare hem downe with one speare whan kynge





Anguyshauns of


f. 141 (VII.29)


Anguyshauns of Irelonde sawe Sir Gareth fare so he mer//

vayled what knyght he was for at one tyme he semed gre//

ne and anoÞer tyme at his gayne commynge hym semed blewe

And thus at euery course Þat he rode too & fro he chonged whyȝt

to rede & blak that Þer myght neyÞer kynge noÞer knyght have

no redy cognysshauns of hym // Than kynge Anguyshaunce

the kynge of Irelonde encountyrde with Sir Gareth and there

Sir Gareth smote hym frome his horse sadyll and all And

than com In kynge Carados of Scotlonde and Sir Gareth

smote hym downe horse and man And In the same wyse he

served kynge Vryens of Þe londe of Gore And than come In

Sir Bagdemagus and sir Gareth smote hym downe horse

and man to the erthe And kynge Bagdemagus son Sir

Mellyagauns brake a spere vppon Sir Gareth myghtyly

and knyghtly And than Sir Galahalte the noble prynce

cryed on hyght knyght with Þe many coloures well haste Þou

Justed · Now make Þe redy Þat I may Juste with the Sir Gareth

herde hym & gate a grete spere and so they encountyrde to

gydir & Þer the prynce brake his spere But Sir Gareth smo//

te hym vppon Þe buff syde of the helme Þat he reled here and

Þer and had falle downe had nat his men recouerde hym // So

god me helpe seyde kynge Arthure that same knyght with Þe

many coloures is a good knyght where fore Þe kynge called

vnto hym Sir Launcelot and prayde hym to encountir with Þat

knyght Sir seyde Sir Launcelot I may well fynde In myne

herte for to for bere hym as at this tyme for he hath had

travayle I nowe this day · And whan a good knyght doth so

well vppon som day hit is no good knyghtes parte to lette hym

of his worshyp and namely whan he seyth a good knyghte

hath done so grete labur for peraventure seyde Sir Launcelot

his quarell is here this day And peraventure he is beste beloved


f. 141v (VII.29-30)


with this lady of all Þat bene here for I se well he paynyth hym

& enforsyth hym to do grete dedys And Þer fore seyde Sir

Launcelot as for me this day he shall haue Þe honour thouȝe

hit lay In my power to put hym frome hit yet wolde I

nat // Than whan this was done Þer was drawynge of

swerdys And than Þer be gan a sore turnemente And Þer dud

Sir Lameroke mervaylus dedys of armys & by twyxte

Sir Lameroke and Sir Ironsyde that was Þe rede knyght

of Þe rede laundys Þer was a stronge batayle And sir Palo//

mydes and Sir Bleobrys be twyxte them was full grete

batayle And Sir Gawayne and Sir Trystrams mett & Þer

Sir Gawayne had Þe worse for he pulled Sir Gawayne

frome his horse And Þer he was longe vppon foote & defouled

// Than com In Sir Launcelot and he smote sir Terquyn

and he hym And than cam Þer in Sir Carados his broÞer and

bothe at onys they assayled hym and he as Þe moste noblyst

knyght of Þe worlde worshypfufly fought with hem bothe &

helde them hote Þat all men wondred of Þe nobles of sir Laun//

celot And than com In Sir Gareth and knew that hit was

Sir Launcelot that fought with tho perelous knyghtes & parted

them in sundir and no stroke wolde he smyte Sir Launcelot

That aspyed Sir Launcelot and demed hit sholde be Þe good

knyght Sir Gareth And than Sir Gareth rode here and Þer

and smote on Þe ryght honde and on Þe lyffte honde // That

all folkys myght well aspye where Þat he rode And by fortune

he mette with his broÞer Sir Gawayne and Þer he put hym to the

wors for he put of his helme & so he serued ·v· or ·vi· knyghtes

of Þe rounde table that all men seyde he put hym in moste

payne & beste he dud his dever // For whan sir Trystrams

be hylde hym how he fyrste justed and aftir fought so welle

with a swerde // Than he rode vnto Sir Ironsyde and to Sir


f. 142 (VII.30)


Persaunte of Inde and asked hem be Þer fayth what maner a

man knyght yondir knyght is Þat semyth in so many dyvers

coloures // Truly me semyth seyde Sir Trystrams that

he puttyth hym self in grete payne for he neuer sesyth wo//

te nat ye what he is seyde Ironsyde no seyde sir Trystrams

than shall ye knowe that this is he Þat lovyth Þe lady of the

castell & she hym a gayne And this is he Þat wanne me whan

I be seged the lady of this castell And this is he that wanne sir

Persaunte of Inde and his ·iij· brethirne what is his name

seyde Sir Trystrams and of what bloode is he com Sir

he was called in the courte of kynge Arthure Bewmay//

nes But his ryght name is sir Gareth of Orkeney broÞer

vnto Sir Gawayne By my hede seyde Sir Trystrams he

is a good knyght and a bygge man of armys And yf he be

yonge he shall preve a full noble knyght // Sir he is but

a chylde he seyde And of Sir Launcelot he was made knyȝt

// There fore is he muche Þe bettir seyde Sir Trystrams

And than Sir Trystrams Sir Ironsyde And sir Persaunte

and his breÞerne rode to gydyrs for to helpe Sir Gareth &

than Þer was many sadde strokis And than Sir Gareth rode

oute on the tone syde to a mende his helme // Than seyde

his dwarff take me your rynge Þat ye lose hit nat whyle Þat

ye drynke And so whan he had drunkyn he gate on hys

helme and egirly toke his horse and rode In to the felde

and leffte his rynge with his dwarff for the dwarff was

glad Þe rynge was frome hym For than he wyste well

he sholde be knowyn And whan Sir Gareth was In the

felde all folkys sawe hym well & playnly Þat he was In

yealow colowres and there he raced of helmys & pulled

downe knyghtes That kynge Arthure had mervayle what

knyght he was For the kynge sawe by his horse that hit was


f. 142v (VII.30-1)


the same knyght but by fore he was In so many coloures and

now he is but in one coloure and that is yolowe // Now goo

seyde kynge Arthure vnto dyvers herowdys and bede hem ry//

de a boute hym and a spye yf ye can se what maner of knyght

he is · For I have spered of many knyghtes this day that is vp//

pon his partt and all sey that they knowe hym nought But

at Þe laste an herrowde rode nyȝe Sir Gareth he coude

and Þer he sawe wryten aboute his helme in golde seyynge

this helme is Sir Garethis of Orkeney Than Þe heroude

cryed as he were woode and many herewdys with hym This is

Sir Gareth of Orkenay In the yealow armys there by all Þe

kynges and knyghtes of kynge Arthurs party be helde & a wayted

and than they presed all knyghtes to be holde hym And euer the

herrowdys cryed & seyde this is Sir Gareth kynge Lottys

son of Orkeney And whan sir Gareth aspyed that he was

discouerde than he dowbled his strokys & smote downe Þer Sir

Sagramoure and his broÞer sir Gawayne A broÞer seyde sir

Gawayne I wente ye wolde have smyttyn me so · Whan he

herde hym sey so he thrange here and there And so with grete

payne he gate oute of Þe pres & Þer he mette with his dwarff

// A boy seyde Sir Gareth Þou haste be gyled me fowle this

day of my rynge // Geff hit me faste that I may hyde my

body with all and so he toke hit hym And than they all wyste

where he was be comm // And Sir Gawayne had in maner a

spyed where Sir Gareth rode and than he rode aftir with

all his myght // That aspyed Sir Gareth and rode wyghtly

in to the castell for all that Sir Gawayne coude do he wyste

nat where he was be com & whan Sir Gareth wyste that

Sir Gawayne was paste he asked Þe dwarff of beste counsayle

// Sir seyde Þe dwarff me semyth hit were beste now that

ye ar ascaped frome spyynge Þat ye sende my lady dame Lyones


f. 143 (VII.31-2)


of Þe castell hir rynge · hit is well avysed seyde Sir Gareth

Now have hit here & bere hit her & sey Þat I recommaunde

me vnto hir good grace and sey hir I woll com whan I may

& pray hir to be trewe & faythfull to me as I woll be to hir

// Sir seyde the dwarff hit shall be done as ye commaunde me

and so he rode his way and dud his erande vnto Þe lady // Þan

seyde she where is my knyght Sir Gareth madam he bade me

sey Þat he wolde nat be longe frome you // And so lyghtly the

dwarff com a gayne vnto Sir Gareth that wolde full fayne

have had a lodgynge for he had nede to be reposed · And than

fell Þer a thundir and a rayne as hevyn & erthe sholde go to

gydir // And Sir Gareth was nat a lytyll wery for of all

that day he had but lytyll reste noÞer his horse nor he // So

thus Sir Gareth rode longe in that foreste vntyll nyght

cam and euer hit lyghtned & thundirde as hit had bene wylde

At Þe laste by fortune he cam to a castell & Þer he herde Þe way//

tis vppon the wallys // Than Sir Gareth rode vnto the

barbycan of Þe castell & prayed Þe porter fayre to lette hym In

to the castell // The porter answerde vngoodly a gayne &

sayde Þou gettyste no lodgynge here Fayre sir sey not so For

I am a knyght of kynge Arthurs and pray Þe lorde and Þe lady

of this castell to gyff me herborow for the love of kynge Arthour

//Than Þe porter wente vnto Þe douches & tolde hir how there

was a knyght of kynge Arthures wolde have herborow latte

hym In seyde Þe douches for I woll se that knyght And for kynge

Arthurs love he shall nat be herborowles // Than she yode

up in to a towre ouer a gate with tourchis I lyght // Whan sir Ga//

reth saw that lyght he cryed on hyȝe whethir Þou be lorde or

lady Gyaunte oÞer Champyon I take no forse so that I may haue

herborow as for this nyght and yf hit be so that I muste ne//

dis fyght spare me nat to morne whan I have rested me for


f. 143v (VII.32)


bothe I and myne horse be wery // Sir knyght seyde Þe lady ye

speke knyghtly and boldely but wete you well the lorde of

this castell lovyth nat kynge Arthure noÞer none of hys cour//

te for my lorde hath euer bene a yenste hym And Þer fore thow

were bettir nat to com with In his castell // for & Þou com In

this nyght Þou muste com vndir this fourme that where

som euer Þou mete hym by fylde oÞer by strete Þou muste yelde Þe to

hym as presonere Madam seyde Sir Gareth what is your

lorde and what is his name / Sir my lordys name is the

deuke de la rouse // Well Madam seyde Sir Gareth I shal

promyse you in what place I mete youre lorde I shall yelde

me vnto hym & to his good grace with Þat I vndirstonde that

he woll do me no shame And yf I vndirstonde Þat he woll I

woll relece my self & I can with my spere & my swerde // ye

say well seyde the deuches / Than she lette Þe draw brygge

downe & so he rode In to the halle & Þer he a lyght And Þe horse

was ladde In to the stable & in the halle he vnarmed hym

& seyde madam I woll nat oute of this halle this nyght //

/ And whan hit is day lyght lat se who woll have a do with

me than he shall fynde me redy // Than was he sette

vnto souper and had many good dysshis Than sir Gareth

lyste well to ete and full knyghtly he ete his mete & egirly

Also Þer was many a fayre lady by hym & som seyd they ne//

vir sawe a goodlyer man nothir so well of etynge // Þan

they made hym passynge good chere and shortly whan

he had souped his bedde was made Þer & so he rested hym

all nyght & in the morne he herde masse & brake hys

faste & toke his leve at Þe douches & at them all & than//

ked hir goodly of hir lodgyng and of hir good chere // And

than she asked hym his name // Truly madam he seyde

my name is Sir Gareth of Orkeney and som men call


f. 144 (VII.32-3)


me Bewmaynes than knew she well hit was Þe same

knyght Þat faught for dame Lyonesse So sir Gareth depar//

ted and rode vp vnto a mountayne & Þer mette hym a kny3t

his name was Sir Bendaleyne And he seyde to sir Ga//

reth Þou shalt nat passe this way for oÞer Þou shalt juste with

me othir ellys be my presonere Than woll I juste seyde

Sir Gareth And so they lette Þer horsis ren & Þer Sir Gareth

smote hym thorow oute Þe body And sir Bendelayne rode

forth to his castell Þer be syde and there dyed So sir Ga//

reth wolde haue rested hym fayne · so hit happed hym

to com to Sir Bendalaynes castell than his knyghtys

& servauntys aspyed Þat hit was he Þat had slayne there lor//

de Than they armed ·xxt· good men & com oute & assay//

led Sir Gareth and so he had no spere but his swerde &

so he put his shylde a fore hym & Þer they brake ·x· sperys

vppon hym And they assayled hym passyngly sore but euer sir

Gareth defended hym as a knyght So whan they sawe

they myght nat ouercom hym they rode frome hym and

toke Þer counceyle to sle his horse And so they cam In vppon

Sir Gareth And so with hir sperys they slewe his horse &

than they assayled hym harde // But whan he was on

foote Þer was none that he faught but he gaff hym such

a buffette that he dud neuer recouer So he slew hem by one

& one tyll they were but ·iiij· and Þer they fledde // And

Sir Gareth toke a good horse that was one of theires &

rode his way // Than he rode a grete pace tyll that he

cam to a castell and Þer he herde muche mournyng of lady//

es and jantyll women So at the laste Þer cam by hym a

payge Than he asked of hym what noyse is this that

I hyre with in this castell // Sir knyght seyde the payge

here be with in this castell ·xxxt· ladyes and all they be


f. 144v (VII.33)


wydowys For here is a knyght Þat waytyth dayly vppon this

castell and he is callyd Þe browne knyght wyth oute pyte

and he is Þe perelust knyght Þat now lyvyth And Þerfore sir seyde

Þe payge I rede you fle // Nay seyde Sir Gareth I woll nat

fle though Þou be a ferde of hym // Than the payge saw where

cam Þe browne knyght & sayde lo yondir he commyth // lat me dele

with hym seyde Sir Gareth And whan aythir of othir had a fyghte

they let theire horsis ren And Þe browne knyght brake his spere

And Sir Gareth smote hym thorow Þe body Þat he ouer threwe to the

grounde sterke dede So Sir Gareth rode into the castell and          

prayde Þe ladyes Þat he myght repose hym // Alas seyde Þe ladyes        

ye may nat be lodged here // yes hardely make hym good chere                       

seyde the payge for this knyght hath slayne your enemy // Than

they all made hym good chere as lay in theire power But wete

you well they made hym good chere for they myght none oÞer do

for they were but poore // And so on the morne he wente to masse

And Þer he sawe the ·xxxt· ladyes knele and lay grovelynge vppon

dyverse toumbis makynge grete dole and sorow Than sir Ga//

reth knew well that in tho tombis lay Þer lordys Fayre ladyes

seyde Sir Gareth ye muste at the next feste be at the courte

of kynge Arthure And sey Þat I Sir Gareth sente you thydir // Sir

we shall do your commaundemente seyde Þe ladyes // So he departed and

by fortune he cam to a mountayne & Þer he founde a goodly knyght

that bade hym a byde sir knyght & Juste with me // What ar ye sey//

de Sir Gareth my name is he seyde called deuke de larowse

A sir ye ar the same knyght Þat I lodged onys with in your castell &

Þer I made promyse vnto youre lady Þat I sholde yelde me to you // A

seyde Þe deuke arte Þou that proude knyght that profyrde to fyght

with my knyghtes Þer fore make Þe redy for I woll have a do wyth you

// So they let Þer horsis renne And Þer Sir Gareth smote the deuke

downe frome his horse but Þe deuke lyghtly a voyded his horse


f. 145 (VII. 33-4)


and dressed his shylde and drew his swerde and bade Sir Gareth

a lyght and fyght with hym So he dud a lyght and they dud grete

batayle to gedyrs more than an houre & eythir hurte oÞer full

sore but at Þe laste Sir Gareth gate Þe deuke to the erthe and

wolde have slayne hym & than he yelded hym // Than muste

ye go seyde Sir Gareth vnto kynge Arthure my lorde at Þe

next hyȝe feste & sey that I Sir Gareth sente you thydir // We

shall do this seyde Þe deuke & I woll do you omage & feaute wyth

an som of  ·C·  som of knyghtes with me & all Þe dayes of my lyff

ro do you servyse where ye woll commaunde me // So Þe deuke de//

parted and Sir Gareth stoode Þer a lone and as he stoode he sey an

armed knyght on horsebak commynge towarde hym // Than sir

Gareth mownted vppon horsebak and so with oute ony wordis

they ran to gedir as thundir And Þer that knyght hurte sir Gareth

vndir Þe syde with his spere And than they a lyght & drewe there

swerdys & gaff grete strokys Þat the bloode trayled downe to the

grounde & so they fought ·ij· owres // So at the laste there com

Þe damesell Lyonette that som men calle the damesell Savyage &

she com rydynge vppon an ambelynge mule & Þer she cryed all

on hygh Sir Gawayne leve thy fyghtynge with thy brothir Sir

Gareth And whan he herde hir sey so he threwe a way his shyl//

de & his swerde and ran to Sir Gareth and toke hym In his

armys and sytthen kneled downe & asked hym mercy // What ar

ye seyde sir Gareth that ryght now were so stronge and so

myghty and now so sodeynly is yelde to me // A Sir Gareth

I am your broÞer sir Gawayne that for youre sake have had grete

laboure & travayle // Than Sir Gareth vnlaced hys helme

and kneled downe to hym and asked hym mercy Than they a rose

bothe and braced eythir othir in there armys & wepte a grete

whyle or they myght speke and eythir of them gaff oÞer the pryse

of Þe batayle & there were many kynde wordys be twene them


f. 145v (VII.34)


Alas my fayre broÞer seyde Sir Gawayne I ought of ryght to

worshyp you and ye were nat my broÞer for ye have worshipte

kynge Arthure and all his courte for ye have sente mo wor//

shypfull knyghtes this ·xij· monthe than ·v· the beste of Þe rounde

table hath done excepte Sir Launcelot Than cam Þe lady savy//

aige that was the lady Lyonet that rode with Sir Gareth so long

and Þer she dud staunche Sir Gareths woundis and Sir Gaw//

aynes Now what woll ye do seyde Þe damesell saveaige me

semyth hit were beste Þat kynge Arthure had wetynge of you

bothe for your horsis ar so brused that they may not beare // Now

fayre damesell seyde Sir Gawayne I pray you ryde vnto

my lorde myne unkle kynge Arthure and tell hym what

adventure is be tydde me here And I suppose he woll nat

tary longe // Than she toke hir mule and lyghtly she rode

to kynge Arthure that was but ·ij· myle thens // And whan

she had tolde hir tydynges to the kynge The kynge bade gete

me a palferey And whan he was on horse bak he bade the

lordys and ladyes com aftir & they wolde and Þer was sadelyng

& brydelyng of quenys & prynces horsis and well was he

Þat sonneste myght be redy // So whan the kynge cam Þer he saw

Sir Gawayne And Sir Gareth sitt vppon a lytyll hyllys syde

// Than the kynge a voyded his horse and whan he cam nye

to Sir Gareth he wolde a spokyn & myght nat and Þer wyth

he sanke downe in a sowȝe for gladnesse And so they sterte vn//

to theire uncle and requyred hym of his good grace to be of

good comforte // wete you well Þe kynge made grete Joy and

many a petevous complaynte he made to sir Gareth and euer

he wepte as he had bene a chylde // So with this com his mo//

dir the quene of Orkeney dame Morgawse And whan she

saw Sir Gareth redyly in the vysage she myght nat wepe

but sodeynly felle downe In a sowne and lay Þer a grete whyle


f. 146 (VII.34-5)


lyke as she had bene dede And than Sir Gareth recomforted

hir In suche wyse that she recovirde & made good chere // Þan

the kynge commaunded Þat all maner of knyghtes Þat were vndir his

obeysaunce sholde make Þer lodgynge ryght Þer for the love of

his ·ij· nevewys And so hit was done & all maner of purveyars

purveyde Þat there lacked no thynge that myght be gotyn for

golde noÞer sylver nothir of wylde nor tame // And than by the

meanys of the damesell saveaige Sir Gawayne and Sir

Gareth were held of Þer woundys & Þer they suggeourned ·viij·

dayes // Than seyde kynge Arthure vnto the damesell save//

aige I mervayle that youre sistyr dame Lyonesse comyth nat

hydir to me and in especiall that she commyth nat to vysyte

hir knyght my nevewe Sir Gareth that hath had so muche

travayle for hir love // My lorde seyde Þe damesell Lyonette

ye muste of your good grace holde hir excused for she knowyth

nat that my lorde Sir Gareth is here // Go ye than for hir

seyde kynge Arthure that we may be a poynted what is beste

to done accordynge to the plesure of mv nevewe // Sir seyde

the damesell hit shall be do And so she rode vnto hir sistir &

as lyghtly as she myght make hir redy she cam on Þe morne

with hir broÞer Sir Gryngamour and with hir fourty knyghtes And so

whan she was com she had all the chere Þat myght be done bothe

of the kynge and of many oÞer knyghtes & also quenys // And a

monge all thes ladyes she wast named Þe fayryst & pyereles

// Than whan Sir Gareth mette with hir there was many a

goodly loke & goodly wordys that all men of worshyp had

Joy to be holde them // Than cam kynge Arthure & many

othir kynges and dame Gwenyvere and quene Morgawse

his modir And Þer the kynge asked his nevew sir Gareth wheÞer

he wolde haue this lady as peramour er ellys to have hir to his

wyff // My lorde wete you well Þat I love hir a bovyn all ladyes


f. 146v (VII.35)


lyvynge // Now fayre lady sayde kynge Arthure what sey

ye // My moste noble kynge seyde dame Lyonesse wete you

well that my lorde Sir Gareth ys to me more lever Þan

to haue & welde as my husbonde than ony kyng oÞer prynce

that is crystyned and if I may nat haue hym I promyse

you I woll neuer haue none · For my lorde Arthure seyde

dame Lyonesse wete you well he is my fyrste love and he

shall be Þe laste & yf ye woll suffir hym to haue his wyll

and fre choyse I dare say he woll haue me // That is

trouthe seyde Sir Gareth and I haue nat you & welde you

as my wyff Þer shall neuer lady noÞer jantyll woman rejoyse

me // What nevew seyde the kynge is Þe wynde in that

dore // For wete you well I wolde nat for Þe stynte my

crowne to be causer to with draw your hertys // And wete you

well ye can nat love so well but I shall raÞer encrece hyt

than discrece hit And also ye shall haue my love and my

lordeshyp in the uttirmuste wyse Þat may lye in my power

// And in the same wyse seyde Sir Garethys modir // So

a none Þer was made a provysion for the day of maryaige

& by the kynges advyse hit was provyded Þat hit sholde be

at Mychael · masse folowyng at KyngKenadowne by the

see syde For Þer is a plentevouse contrey And so hit was

cryed in all the placis thorow the Realme And than

sir Gareth sente his somons to all tho knyghtes & ladyes

that he had wonne in batayle to fore Þat they sholde be at

his day of maryage at Kyng Kenadowne by the see syde

And than dame Lyonesse and Þe damesell Lyonet wyth

sir Gryngamour rode to Þer castell And a goodly and a ry//

che rynge she gaff to Sir Gareth And he gaff hir a

noÞer And kynge Arthure gaff hir a ryche bye of golde

and so she departed And kynge Arthure and his felyshyp


f. 147 (VII.35-6)


rode towarde Kyng Kenadowne And Sir Gareth brouȝt

his lady on the way and so cam to the kynge a gayne &

rode wyth hym lorde Þe grete chere that sir Launce//

lot made of Sir Gareth and he of hym for there was

no knyght that Sir Gareth loved so well as he dud sir

Launcelot and euer for the moste party he wolde euer be In

Sir Launcelottis company · For evir aftir she Sir Gareth

had aspyed Sir Gawaynes conducions he wythdrewe

hym self fro his broÞer Sir Gawaynes felyshyp for he

was evir vengeable and where he hated he wolde be

a venged with murther and Þat hated Sir Gareth So hit drew             

faste to Mychaelmas Þat thydir cam Þe lady dame Lyonesse Þe       

lady of the castell perelus and hir sistir the damesell Lyonet             

with Sir Gryngamour her broÞer with hem for he had the conduyte  

of thes ladyes and there they were lodged at the devyse of

kynge Arthure And vppon Myghelmas day the bysshop of

Caunturbyry made the weddyng be twene Sir Gareth &

dame Lyonesse with grete solempnyte // And kynge Arthure

made Sir Gaherys to wedde the damesell saveage dame

Lyonet And Sir Agfrauayne kynge Arthure made to wedde

dame Lyonesseis neese a fayre lady lady hir name was

dame Lawrell And so whan this solempnyte was done

Than com In the grene knyght Sir Pertolope with ·xxxt·

knyghtes and Þer he dud omage and feaute to Sir Gareth and

all thes knyghtes to holde of hym for euer more // Also Sir Per//

tolope seyde I pray you Þat at this feste I may be your chambirlay//

ne // with good wyll seyde Sir Gareth syth hit lyke you to take

so symple an offyce // Than com In the rede knyght wyth ·iij·

score knyghtes with hym And dud to Sir Gareth omage & feaute

and all tho knyghtes to holde of hym for euer more // And than sir

Perimones prayde Sir Gareth to graunte hym to be his chyeff


f. 147v (VII.36)


butler at the hygh feste I woll well seyde Sir Gareth that ye

have this offyce and hit were bettir // Than com In sir Per//

saunte of Inde wyth an ·C· knyghtes with hym & Þer he dud omage

& feaute and all his knyghtes sholde do hym seryse & holde Þer

londis of hym for evir And Þer he prayde Sir Gareth to make

hym his sewear cheyff at Þat hyȝe feste // I woll well seyde

Sir Gareth that ye have hit and hit were bettir // Than

com In the deuke de la rouse with an ·C· knyghtes with hym and

Þer he dud omage & feaute to Sir Gareth and so to holde there

londis of hym for euer more And he requyred Sir Gareth Þat

he myght serve hym of the wyne Þat day of the hyȝe feste I woll

well seyde Sir Gareth and hit were bettir // Than cam the

rede knyght of the rede laundis that hyght Sir Ironsyde &

he brought with hym ·iij· hundred knyghtes And Þer he dud omage

& feaute And all tho knyghtes to holde Þer londys of hym for euer

And than he asked of Sir Gareth to be his kerverr I woll well

seyde Sir Gareth and hit please you // Than com In to the

courte ·xxxt· ladyes and all they semed wydvws & tho ladyes

brought with hem many fayre jantyll women And all they kne//

led downe at onys vnto kynge Arthure and vnto Sir Gareth

and Þer all tho ladyes tolde the kynge how that sir Gareth had

delyuerde them fro the dolorous towre & slew the browne knyght

with oute pyte and Þer fore all we and oure ayres for euer more

woll do omage vnto Sir Gareth of Orkeney // So than the

kynges quenys Pryncis Erlys Barouns & many bolde knyȝtes

wente to mete and well may ȝe wete Þat there was all maner

of plente and all maner revels and game with all maner of myn//

stralsy Þat was vsed tho dayes // Also Þer was grete Justys ·iij·

dayes But Þe kynge wolde nat suffir Sir Gareth to Juste

be cause of his new bryde for as the freynsh boke seyth that

dame Lyonesse desyred of the kynge that none that were wedded


f. 148 (VII.36)


sholde Juste at that feste // So the fyrste day ther Justed Sir

Lameroke de gelys for he euer threwe ·xxxt· knyghtes and dud

passyng mervelus dedis of armys // And than kynge Arthu//

re made Sir Persaunte and his bretherne knyghtes of the rounde

table to ther lyvys ende and gaff hem grete landys // Also the

secunde day ther Justed Sir Trystrams beste & he ouer threw ·xl·

knyghtes And dud ther mervelus dedis of armys And the kynge Ar//

thure made Sir Ironsyde that was the red rede knyght of the

rede laundys a knyght of the table rounde to his lyvis ende

and gaff hym grete landis // Than the thirde day there Justed

Sir Launcelot and he ouer threw ·l· knyghtes and dud many dedis

of armys that all men wondird // And there kynge Arthure

made the deuke de la Rowse a knyght of the table rounde to

his lyvys ende and gaff hym grete londis to spende // But

whan this Justis was done Sir Lameroke And Sir Trystrams

departed suddeynly and wolde nat be knowyn for the whych kyng

Arthure and all the courte was sore dysplesid and so they helde

the courte fourty dayes with grete solempnyte // And thus Sir

Gareth of Orkeney was a noble knyght that wedded dame

Lyonesse of the castell parelus // And also Sir Gaheris wed//

ded her sistir dame Lyonette that was called the damesell sa//

veaige // And Sir Aggravayne wedded dame Lawrell a

fayre lady wyth grete and myghty londys wyth grete

ryches I gyffyn wyth them that Ryally they myght lyve

tyll theire lyvis ende // And I pray you all that redyth

this tale to pray for hym that this wrote that god sende

hym good delyueraunce sone and hastely Amen


Here endyth the tale of Sir Gareth of Orkeney









¶ Capitulum primum

WHan Arthur held his round table moost plenour / it fortuned that he commaunded that the hyhe feest of Pentecost shold be holden at a cyte and a Castel the whiche in tho dayes was called kynke kenadonne vpon the sondes that marched nyghe walys /

¶ Soo euer the kyng hadde a custom that at the feest of Pentecost in especyal afore other feestes in the yere he wold not goo that daye to mete vntyl he had herd or sene of a grete merueylle / And for that custome alle maner of straunge aduentures came before Arthur as at that feest before alle other feestes / And soo sire Gawayne a lytyl to fore none of the daye of Pentecost aspyed att a wyndowe thre men vpon horsbak and a dwarf on foote / and soo the thre men alighte and the dwarf kepte their horses / and one of the thre men was hyher than the other tweyne by a foote and a half Thenne sir Gawayne wente vnto the kynge and sayd / sire go to your mete / for here at the hande comen straunge aduentures So Arthur wente vnto his mete with many other kynges / And there were all the knyghtes of the round table only tho that were prysoners or slayn at a recountre / thenne at the hyhe feest euermore they shold be fulfilled the hole nombre of an C and fyfty / for thenne was the round table fully complisshed Ryght soo cam in to the halle two men wel bisene and rychely / and vpon their sholders there lened the goodlyest yong man & the fairest that euer they al sawe / & he was large and long and brode in the sholders & wel vysaged / and the fayrest and the largest handed that euer man sawe / but he ferd as though he myght not goo nor bere hym self / but yf he lened vpon their sholders / Anon as Arthur sawe hym there was made pees & rome / & ryght so they yede with hym vnto the hyghe deyse without sayeng of ony wordes / thenne this moche yong man pulled hym a bak and easily stretched vp streyghte / sayeng kynge Arthur god you blisse and al your fair felauship / and in especial the felauship of the table rounde / And for thys cause I am come hyder to praye you and requyre you to gyue me thre yeftes / and they shalle not be vnresonably asked / but that ye may worshipfully and honorably graunte hem me / and to you Page  214 [leaf 107v] no grete hurte nor losse / And the fyrst done and gyfte I wil aske now / and the other two yeftes I wylle aske this daye twelue moneth / where someuer ye hold your hyghe feest / Now aske sayd Arthur / and ye shalle haue your askyng

¶ Now syre this is my petycyon for thys feest / that ye wylle gyue me mete and drynke suffycyauntly for this twelue moneth / and at that day I wylle aske myn other two yeftes

¶ My fayr sone sayd Arthur aske better I counceille the for this is but a symple askynge / for my herte geueth me to the gretely that thou arte come of men of worshyp / and gretely my consayte fayleth me / but thou shalt preue a man of ryghte grete worship / Syre he sayd / ther of be as it be may I haue asked that I wylle aske / wel sayd the kynge ye shal have mete & drynke ynouȝ / I neuer deffended þt none / nother my frende ne my foo / But what is thy name I wold wete / I can not telle you sayd he / that is merueylle sayd the kynge / that thou knowest not thy name / and thou arte the goodlyest yong man one that euer I sawe / Thenne the kyng betook hym to sir kay the steward / and charged hym that he shold gyue hym of al maner of metes and drynkes of the best / and also that he hadde al maner of fyndynge as though he were a lordes sone / that shal lytel nede sayd syr kay to doo suche cost vpon hym For I dare undertake he is a vylayne borne / and neuer will make man / for and he had come of gentylmen he wold haue axed of you hors and armour / but suche as he is so he asketh And sythen he hath no name / I shall yeue hym a name that shal be Beaumayns that is fayre handes / and in to the kechen I shalle brynge hym / and there he shal haue fatte broweys euery day þt he shall be as fatte by the twelue monethes ende as a porke hog / ryght soo the two men departed and belefte hym to syr kay / that scorned hym and mocked hym

¶ Ca ij

THere at was sir Gawayn wroth / & in especyal sir launcelot bad sir kay leue his mockyng / for I dare laye my hede he shall preue a man of grete worship / lete be / said sir kay / it may not be by no reason / for as he is / so he hath asked / Beware said syre Launcelot / so ye gafe the good knyȝt Brewnor syre Dynadamys broder a name / and ye called hym la cote male tayle / and that tourned you to anger after-Page  215 [leaf 108r] ward / As for that sayd syr kay this shall neuer preue none suche / For syr Brewnor desyred euer worship and thys desyreth breed & drynke / & brothe vpon payne of my lyf he was fostred vp in some abbay / and how someuer it was they fayled mete and drynke / and soo hyther he is come for his sustenaunce

¶ And soo syre kay badde gete hym a place and sytte doune to mete / soo Beaumayns wente to the halle dore / and sette hym doune amonge boyes and laddys / & there he ete sadly / And thenne syre launcelot after mete badde hym come to his chamber / And there he shold haue mete and drynke ynough / And soo dyd syre Gawayne / but he reffused hem al / he wold doo none other / but as syr kay commaunded hym for no profer / But as touchynge syre Gawayn he hadde reson to profer hym lodgyng mete and drynke / for that profer came of his blood / for he was nere kynne to hym than he wyst But that as syre launcelot dyd was of his grete gentylnes and curtosye

¶ Soo thus he was putte in to the kechyn and laye nyghtly as the boyes of the kechen dyd / And soo he endured alle that twelue moneth / and neuer displeasyd man nor chylde / but alweyes he was meke & mylde / But euer whanne that he sawe ony Iustynge of knyghtes / that wold he see and he myght / And euer syre launcelot wold gyue hym gold to spende and clothes / and soo dyd syre Gawayne / and where there were ony maystryes done / there atte wold he be / and there myghte none cast barre nor stone to hym by two yerdys / Thenne wold syre kay saye how lyketh yow my boye of the kechyn / soo it past on tyl the feest of Whytsontyde / And at that tyme the kynge helde hit att Carlyon in the moost royallest wyse that myghte be / lyke as he dyd yerly / But the Kynge wold no mete ete vpon the whyysonday vntyl he herd some aduentures / Thenne cam ther a squyer to the Kyng / and said / syre ye maye goo to your mete / for here cometh a damoysel with somme straunge aduentures / thenne was the Kynge gladde and sette hym doune /

¶ Ryghte soo ther came a damoysel in to the halle and salewed the Kynge and prayd hym of socour / for whome sayd the Kynge what is the aduenture /

¶ Syre she sayd I haue a lady of grete worship and renomme / and she is byseged with a tyraunte so that she may Page  216 [leaf 108v] not oute of her castel / And by cause here are callyd the noblest knyghtes of the world / I come to you to praye you of socour / What heteth your lady and where dwelleth she / & who is he / & what is his name that hath byseged her / syre kyng she saide / as for my ladyes name that shall not ye knowe for me as at this tyme / but I lete you wete she is a lady of grete worship and of grete landes / And as for the tyraunt that bysyegeth her and destroyeth her landes he is called the rede knyght of the reed laundes / I knowe hym not sayd the kynge / Syre said syre Gawayne / I knowe hym wel for he is one of the perilloust knyghtes of the world / men saye that he hath seuen mennys strengthe / and from hym I escaped ones ful hard / with my lyf / Fayre damoysel sayd the kynge there ben knyȝtes here wolde doo her power for to rescowe your lady / but by cause ye wylle not telle her name nor where she dwelleth / therfor none of my knyghtes that here be now shal goo with yow by my wylle / thenne must I speke further sayd the damoysel

¶ Capitulum iij

WYth these wordes came before the kynge Beaumayns whyle the damoysel was ther / & thus he said syr Kyng god thanke you I haue ben this xij monethe in your kechyn and haue hadde my ful sustenaūce and now I will aske my two yeftes that ben behynde / Aske vpon my peryl said the kynge / Syre this shal be my two gyftes / fyrst that ye wil graunte me to haue this aduenture of the damoysel / for hit belongeth vnto me / thou shalt haue hit sayd the kyng I graunte it the / thenne syr this is the other yeft / that ye shal bydde Launcelot du lake to make me knyȝt for of hym I wil be made knyght and els of none / And whanne I am paste I praye yow lete hym ryde after me and make me Knyght / whan I requyre hym / Al this shal be done sayd the Kynge / Fy on the sayde the damoysel / shalle I haue none but one that is your kechyn page / thenne was she wrothe and toke her hors and departed / And with that there cam one to Beaumayns and told hym his hors and armour was come for hym / and there was the dwarf come with all thyng that hym neded in the rychest maner / ther at al the court had moche merueill from whens cam al þtPage  217 [leaf 109r] gere / Soo whanne he was armed ther was none but fewe soo goodely a man as he was / and ryght soo as he came in to the halle and took his leue of kyng Arthur & sir Gawayn & syr launcelot / and prayed that he wolde hyhe after hym / and soo departed and rode after the damoysel

¶ Capitulum iiij

BVt there wente many after to behold how wel he was horsed and trapped in clothe of gold / but he had neyther shelde nor spere / Thenne syr kay sayd al open in the halle I wylle ryde after my boye in the kechyn to wete / whether he wylle knowe me for his better / Said syr launcelot and sir gawayn yet abyde at home / So syr kay made hym redy and took his hors and his spere and rode after hym / And ryghte as Beaumayns ouertook the damoysel / ryghte soo cam syre kay & sayd Beumayns what syre knowe ye not me / Thenne he torned his hors / and knewe hit was sir kay / that had done hym alle the despyte as ye haue herde afore / ye sayd beaumayns I knowe yow for an vngentyl knyghte of the courte / and therfore beware of me / There with syre kay putte his spere in the reyste / and ranne streyghte vpon hym / and beaumayns cam as fast vpon hym with his swerd in his hand / and soo he putte awey his spere with his swerd and with a foyne thrested hym thorou the syde / that syr kay felle doune as he had ben dede / & he alyght doune and took sir kayes shelde and his spere / and starte vpon his owne hors and rode his waye / Al that sawe syr launcelot and soo dyd the damoysel / And thenne he badde his dwarf starte vpon sir kayes hors / and soo he dyd / by that syre Launcelot was come / thenne he profered sir laūcelot to Iuste / and eyther made hem redy / and they came to gyder soo fyersly that eyther bare doune other to the erthe / and sore were they brysed / Thenne sir launcelot arose and halpe hym fro his hors And thenne beaumayns threwe his sheld from hym / and profered to fyghte with sir launcelot on foote / and soo they rasshed to gyders lyke borys tracynge / rasynge and foynynge to the Page  218 [leaf 109v] mountenaunce of an houre / and syre launcelot felte hym soo bygge that he merueylled of his strengthe / for he fought more lyker a gyaunt than a knyght / and that his fyghtynge was durable and passynge perillous / For syr launcelot had so moche adoo with hym that he dred hym self to be shamed / and sayd Beaumayns fyghte not so sore / youre quarel and myn is not soo grete but we may leue of / Truly that is trouthe sayd Beaumayns / but it doth me good to fele your myght / and yet my lord I shewed not the vtteraunce

¶ Capitulum quintum

IN goddes name sayd syr launcelot / for I promyse you by the feythe of my body I had as moche to doo as I myght to saue my self fro you vnshamed / and therfore haue ye no doubte of none erthely knyghte / Hope ye so that I maye ony whyle stand a proued knyght sayd Beaumayns / ye sayd Launcelot / doo as ye haue done / and I shal be your waraunt / Thenne I praye you sayd Beaumayns yeue me the ordre of knyghthode / thenne must ye telle me your name seyd launcelot / and of what kynne ye be borne / Syr soo that ye wylle not discouer me I shal sayd Beaumayns / nay sayd syre laūcelot / and that I promyse yow by the feithe of my body / vn tyl hit be openly knowen / Thenne syr he sayd my name is Gareth and broder vnto syr Gawayn of fader and moder / A syr said Launcelot I am more gladder of you than I was / For euer me thouȝte ye shold be of a grete blood / and that ye cam not to the courte neyther for mete ne for drynke / And thenne sire Launcelot gaf hym thordre of knyȝthode / and thenne sire Gareth prayd hym for to departe and lete hym goo / Soo syre launcelot departed from hym and came to syre kay and maade hym to be born home vpon his shelde / and so he was helyd hard with the lyf / and al men scorned syr kay / and in especyal sir Gawayne and syre launcelot sayd it was not his parte to rebuke no yong man / for ful lytel knewe he of what byrth he is comen / and for what cause he came to this courte / and soo we leue syr kay and torne we vnto Beaumayns / whanne he had ouertaken the damoysel / anone she sayd what dost thow here / thou stynkest al of the kechyn / thy clothes ben bawdy of Page  219 [lead 110r] the greece and talowe that thou gaynest in kyng Arthurs kechyn / wenest thou sayd she that I alowe the for yonder knyȝt that thou kyllest / Nay truly / for thou slewest hym vnhappely and cowardly / therfor torne ageyn bawdy kechyn page / I knowe the wel / for syre kay named the Beaumayns / what arte thou but a luske and a torner of broches and a ladyl wessher Damoysel sayd Beaumayns saye to me what ye wylle / I wylle not goo from you what someuer ye say / for I haue vntertake to kynge Arthur for to acheue your aduenture / and so shal I fynysshe it to the ende / eyther I shal dye therfore / Fy on the kechyn knaue wolt thou fynysshe myn aduenture / thou shalt anone be met with al / that thou woldest not for alle the brothe that euer thou soupest ones loke hym in the face / I shal assaye sayd Beaumayns / Soo thus as they rode in the woode / ther came a man fleynge al that euer he myghte / whether wolt thou sayd Beaumayns / O lord he said / helpe me / for here by in a slade are syxe theues that haue taken my lord and bounde hym / soo I am aferd lest they wyl slee hym / Brynge me thyder said Beaumayns / and soo they rode to gyders vntyl they came there as was the knyghte bounden / and thenne he rode vnto hem / and strake one vnto the dethe / and thenne an other / and at the thyrd stroke he slewe the thyrdde theef / and thenne the other thre fledde / And he rode after hem / and he ouertook hem / and thenne tho thre theues tourned ageyne and assayled Beaumayns hard / but at the last he slewe them / & retorned and vnbounde the knyghte / And the knyght thanked hym / and prayd hym to ryde with hym to his castel there a lytel besyde / and he shold worshipfully rewarde hym for his good dedes / Syr sayd Beaumayns I wille no reward haue / I was this day made knyghte of noble syr launcelot / & therfor I wylle no reward haue / but god rewarde me / And also I must folowe this damoysel / And whan he came nyghe her she bad hym ryde fro her / for thou smellyst al of the kechyn / Wenest thou that I haue Ioye of the / for al this dede that thou hast done nys but myshappen the / But thou shalt see a syghte shal make the torne ageyne and that lyghtly / Thenne the same knyght whiche was rescowed of the theues rode after that damoysel and prayed her to lodge with hym alle that nyghte And by cause it was nere nyght / the damoysel rode with hym Page  220 [leaf 110v] to his castel / and there they had grete chere / and at souper the knyght sat syr Beumayns afore the damoisel / Fy fy said she syr knyghte ye are vncurtoys to sette a kechyn page afore me hym bysemeth better to stycke a swyne than to sytte afore a damoysel of hyhe parage / thenne the knyght was ashamed atte her wordes / and took hym vp / and sette hym at asyde bord / and sette hym self afore hym / and soo al that nyght they had good chere and mery reste /

¶ Capitulum sextum

ANd on the morn the damoisel & he took their leue & thanked the knyght / and soo departed / and rode on her way / vntyl they came to a grete forest / And there was a grete ryuer and but one passage / and ther were redy two knyghtes on the ferther syde to lette them the passage / what saist thou sayd the damoysel / wylt thou matche yonder knyghtes or torne ageyne / Nay sayd syr Beaumayns I wyl not torne ageyn and they were syxe mo / And ther with al he rasshyd in to the water / and in myddes of the water eyther brake their speres vpon other to their handes / and thenne they drewe their swerdes / and smote egerly at other / And at the last syr Beaumayns smote the other vpon the helme that his hede stonyed / and there with alle he felle doune in the water / and there was he drowned / And thēne he sporyd his hors vpon the londe / where the other knyghte felle vpon hym / and brake his spere / and soo they drewe theyr swerdes / and foughte longe to gyders At the laste syre Beaumayns clafe his helme and his heede doune to the sholders / and soo he rode vnto the damoysel & bad her ryde forth on her way / Allas she sayd that euer a kechen page shold haue that fortune to destroye suche two douȝty knyghtes / thou wenest thou hast done doughtely that is not soo / For the fyrste knyghte his hors stumbled / and there he was drouned in the water / and neuer it was by thy force / nor by thy myght / And the last knyghte by myshap thou camyst behynde hym and myshappely thou slowe hym / Damoysel sayd Beaumayns ye maye saye what ye wyl / but with whom someuer I haue a doo with al I truste to god to serue hym or he Page  221 [leaf 111r] departe / And therfor I recke not what ye say soo that I may wynne youre lady / Fy fy foule kechen knaue thou shalt see knyghtes that shal abate thy boost / Fayre damoysel gyue me goodly langage / and thenne my care is past / for what knyghtes someuer they be / I care not ne I doubte hem not / Also sayd she I saye it for thyne auayle / yet mayst thou torne ageyne with thy worship / for and thou folowe me / thou arte but slayne / for I see alle that euer thou dost is but by mysauenture / and not by prowesse of thy handes / wel damoysel ye may say what ye wylle / but where someuer ye goo I wylle folowe you Soo this Beaumayns rode with that lady tyl euensong tyme and euer she chyde hym and wold not reste / And they cam to a black launde / and there was a black hauthorne / & theron henge a blak baner / and on the other syde there henge a black shelde / and by hit stode a black spere grete and longe / and a grete black hors couerd with sylke / and a black stone fast by

¶ Capitulum septimum

THer sat a knyghte al armed in black harneis / and his name was þe knyȝt of the blak laūde / thēne þe damoysel whanne she sawe that knyghte she badde hym flee doun that valey for his hors was not sadeled / Gramercy sayd Beaumayns / for alweyes ye wold haue me a coward / with that the black knyghte / whanne she came nyghe hym spak / & sayd damoysel haue ye broughte this knyghte of kynge Arthur to be your champyon / Nay fayr knyghte sayd she / this is but a kechyn knaue that was fedde in kynge Arthurs kechyn for almesse / Why cometh he sayd the knyghte in suche aray / hit is shame that he bereth you company / syr I can not be delyuerd of hym sayd she / for with me he rydeth maugre myn hede / god wold that ye shold put hym from me / outher to slee hym and ye may / for he is an vnhappy knaue / and vnhappely he hath done this day / thorou myshappe I sawe hym slee two knyghtes at the passage of the water / and other dedes he dyde beforne ryght merueyllous and thorou vnhappynes / that merueylled me sayd the black knyghte that ony man that is of worshyp wylle haue adoo with hym / they knowe hym not sayd the damoysel / And for by cause he rydeth with me / they wene that he Page  222 [leaf 111v] be some man of worship borne / that may be / sayd the blak knyghte / how be it as ye say that he be no man of worshyp he is a ful lykely persone / and ful lyke to be a stronge man / but thus moche shal I graunte you sayd the black knyghte / I shal putte hym doune vpon one foote / and his hors and hys harneys he shal leue with me / for it were shame to me to doo hym ony more harme / Whanne syre Beaumayns herd hym saye thus / he sayd syre knyghte thou art ful large of my hors and my harneys / I lete the wete it coste the noughte / & whether hit lyketh the or not this launde wylle I passe maulgre thyn hede / And hors ne harneys getest thou none of my / but yf thou wynne hem with thy handes / and therfor lete see what thou canst doo / Sayst thou that sayd the black knyghte / now yelde thy lady fro the / for it besemeth neuer a kechyn page to ryde with suche a lady / Thou lyest sayd Beaumayns I am a gentyl man borne and of more hyghe lygnage than thou / & that wyl I preue on thy body / Thenne in grete wrathe they departed with theyr horses / and came to gyders as hit had ben the thonder / and the black knyghtes spere brake / and Beaumayns threste hym thorou bothe his sydes / and there with his spere brak / and the truncheon lefte stylle in his syde / But neuertheles the black knyght drewe his suerd / and smote many eger strokes and of grete myghte / and hurte Beaumayns ful sore / But at the laste the black knyghte within an houre and an half he felle doune of his hors in swoune / and there he dyed / And thenne Beaumayns sawe hym soo wel horsed and armed / thenne he alyghte doune and armed hym in his armour / and soo took his hors and rode after the damoysel / Whanne she sawe hym come nyghe / she sayd awey kechyn knaue oute of the wynde / for the smelle of thy baudy clothes greueth me / Allas she sayd that euer suche a knaue shold by myshap slee soo good a knyghte as thou hast done / but alle thys is thyn vnhappynes / But here by is one shal paye the alle thy payement / and therfore yet I counceylle the / flee / it may happen me sayd Beaumayns to be beten or slayne / but I warne you fayre damoysel I wyll not flee awey / nor leue your company for al that ye can say / for euer ye say that they wil kylle me or bete me / but how someuer hit happeneth I escape / and Page  223 [leaf 112r] they lye on the groūd / And therfore it were as good for you to hold you styll thus al day rebukynge me / for aweye wille I not tyl I see the vttermest of this Iourneye / or els I wylle be slayne / outher truly beten / therfore ryde on your waye / For folowe you I wille what someuer happen

¶ Capitulum octauum

THus as they rode to gyders they sawe a knyght come dryuend by them al in grene bothe his hors & his harneis / And whanne he came nyghe the damoysel he asked her / is that my broder the black Knyȝte that ye haue brought with yow / Nay nay she sayd this vnhappy kechen knaue hath slayne your broder thorou vnhappynesse / Allas sayd the grene knyghte that is grete pyte that soo noble a knyghte as he was shold soo vnhappely be slayne / and namely of a knaues hand as ye say that he is / a traytour sayd the grene knyghte thou shalt dye for sleynge of my broder / he was a ful noble knyghte and his name was syr Pereard / I defye the said Beaumayns / for I lete the wete I slewe hym knyghtely and not shamefully / There with al the grene knyghte rode vnto an horne that was grene / and hit henge vpon a thorne / and there he blewe thre dedely motys / and there came two damoysels and armed hym lyghtely / And thenne he took a grete hors / and a grene shelde and a grene spere / And thenne they ranne to gyders with al their myghtes and brake their speres vnto their handes / And thenne they drewe their swerdes / and gaf many sadde strokes / and either of them wounded other ful yll And at the last at an ouerthwart Beaumayns with his hors strake the grene knyghtes hors vpon the syde that he felle to the erthe / And thenne the grene knyghte auoyded his hors lightly / and dressid hym vpon foote / That sawe Beaumayns And there with al he alighte and they rasshed to gyders lyke two myghty kempys a longe whyle / and sore they bledde bothe / with that cam the damoysel / and said my lord the grene knyghte / why for shame stande ye soo longe fyghtyng with the kechyn knaue / Allas it is shame that euer ye were made knyghte to see suche a ladde to matche suche a knyghte / as the Page  224 [leaf 112v] wede ouer grewe the corne / There with the grene knyght was ashamed / and there with al he gaf a grete stroke of myghte & clafe his shelde thorou / Whan Beaumayns sawe his shelde clouen a sonder / he was a lytel ashamed of that stroke and of her langage / And thenne he gaf hym suche a buffet vpon the helme that he felle on his knees / And soo sodenly Beaumayns pulled hym vpon the ground grouelynge / And thenne the grene knyghte cryed hym mercy / and yelded hym vnto syre Beaumayns / and prayd hym to slee hym not / Al is in vayn said Beaumayns for thou shalt dye but yf this damoysel that came with me praye me to saue thy lyf / and ther with al he vnlaced his helme lyke as he wold slee hym / Fy vpon the false kechen page / I wyll neuer pray the to saue his lyf / for I will neuer be soo moche in thy daunger / Thenne shalle he deye sayde Beaumayns / Not soo hardy thou bawdy knaue sayd the damoysel / that thou slee hym / Allas sayd the grene knyghte suffre me not to dye for a fayre word may saue me / Fayr knyȝt said the grene knyghte saue my lyf / & I wyl foryeue the / the dethe of my broder / and for euer to become thy man / and xxx knyghtes that hold of me for euer shal doo you seruyse / In the deuyls name sayd the damoysel that suche a bawdy kechen knaue shold haue the and thyrtty knyghtes seruyse / Syr knyght said Beaumayns alle this auaylleth the not / but yf my damoysel speke with me for thy lyf / And therwith al he made a semblaunt to slee hym / lete be sayd the damoysel thou baudy knaue / slee hym not / for and thou do / thou shalt repente it Damoysel said Beaumayns your charge is to me a pleasyr and at your commaundement his lyf shal be saued / & els not Thenne he said sir Knyghte with the grene armes I releace the quyte at this damoysels request / for I wylle not make her wrothe / I wille fulfylle al that she chargeth me / And thenne the grene knyghte kneled doune / and dyd hym homage with his swerd / thenne said the damoisel me repenteth grene knyghte of your dommage / and of youre broders dethe the black knyghte / for of your helpe I had grete myster / For I drede me sore to passe this forest / Nay drede you not sayd the grene knyghte / for ye shal lodge with me this nyghte / and to morne I shalle helpe you thorou this forest / Soo they tooke theyre Page  225 [leaf 113r] horses and rode to his manoyr whiche was fast there besyde

¶ Capitulum ix

ANd euer she rebuked Beaumayns and wold not suffre hym to sytte at her table / but as the grene knyghte took hym and sat hym at a syde table / Merueylle me thynketh said the grene knyght to the damoysel why ye rebuke this noble knyghte as ye doo / for I warne you damoysel he is a full noble knyght / and I knowe no knyght is abel to matche hym therfor ye doo grete wrong to rebuke hym / for he shall do yow ryght good seruyse / for what someuer he maketh hym self / ye shalle preue at the ende that he is come of a noble blood and of kynges lygnage / Fy fy said the damoisel it is shame for you to saye of hym suche worship / Truly said the grene knyȝt it were shame for me to sey of hym ony disworship / for he hath preued hym self a better knyght than I am / yet haue I mett with many knyghtes in my dayes / and neuer or this tyme haue I fond no knyght his matche / and so that nyghte they yede vnto rest / and al that nyght the grene knyght commaunded thyrtty knyghtes pryuely to watche Beaumayns for to kepe hym from al treason / And soo on the morne they al arose and herd their masse and brake theyr fast / and thenne they tooke their horses / and rode on theire waye / and the grene knyghte conueyed hem thorou the forest / and there the grene Knyghte said my lord Beaumayns I & these thyrtty knyghtes shall be alweye at your somons both erly and late at your callyng and whether that euer ye wille sende vs / it is wel said / sayd Beaumayns / whanne that I calle vpon you / ye must yelde you vnto kynge Arthur and all your knyghtes / yf that ye so commaunde vs / We shal ben redy at all tymes said the grene knyght / Fy fy vpon the in the deuyls name saide the damoysel that ony good knyghtes shold be obedyent vnto a kechyn knaue / Soo thenne departed the grene Knyghte and the damoysel / And thenne she said vnto Beaumayns why folowest thou me thou kechyn boye / caste away thy shelde and thy spere / and flee aweye / yet I counceille the by tymes or thou shalt say ryght soone Allas for were thou as wyȝte as euer was wade Page  226 [leaf 113v] or Laūcelot / Trystram / or the good knyghte syr lamaryk thou shalt not passe a paas here that is called the paas perillous / Damoysel said Beaumayns who is aferd lete hym flee / for it were shame to torne ageyne sythen I haue ryden soo longe with yow / wel said the damoysel ye shal sone whether ye wyll or not

¶ Capitulum x

SOo within a whyle they sawe a toure as whyte as ony snowe wel matchecold al aboute / and doubel dyked / And ouer the toure gate there henge a fyfty sheldes of dyuerse colours / and vnder that toure there was a fayr medow And therin were many knyghtes and squyers to behold scaffoldes and pauelions / for there vpon the morn shold be a grete turnement / and the lord of the toure was in his castel and loked out at a wyndowe / and sawe a damoysel / a dwarf and a knyȝt armed at al poyntes / So god me helpe said the lord with þt knyȝt wyll I Iuste / for I see that he is a kniȝt arraūt & soo he armed hym and horsed hym hastely / And whanne he was on horsbak with his shelde and his spere / it was al rede bothe his hors and his harneis / and alle that to hym longeth / And whanne that he came nyghe hym he wende it hadde ben his broder the black knyghte / And thenne he cryed a loude broder what doo ye in these marches / nay nay sayd the damoysel / it is not he / this is but a kechyn knaue that was brought vp for almesse in kynge Arthurs courte / Neuertheles sayd the reed knyghte I wylle speke with hym or he departe / A sayd the damoysel this knaue hath kylled thy broder / and syre kay named hym Beaumayns / and this hors and this harneis was thy broders the black knyghte / Also I sawe thy broder the grene knyghte ouercome of his handes / Now maye ye be reuenged vpon hym / for I may neuer be quyte of hym

¶ With this eyther knyghtes departed in sondre / and they cam to gyder with alle their myght / and eyther of their horses fell to the erthe / and they auoyded their horses / and put their sheldes afore them and drewe their swerdes / and either gaf other sadde strokes / now here / now there / rasyng / tracyng / foynynge and hurlynge lyke two bores the space of two houres / And thenne she cryed on hyhe to the rede knyghte / Allas thou noble Page  227 [leaf 114r] reed knyghte / thynke what worship hath folowed the / lete neuer a kechyn knaue endure the soo longe as he doth / Thenne the reed knyght waxed wrothe and doubled his strokes and hurte Beaumayns wonderly sore that the blood ranne doune to the ground that it was wonder to see that stronge bataille / Yet at the last syre Beaumayns strake hym to the erthe / and as he wold haue slayne the reed knyghte he cryed mercy sayeng Noble knyghte slee me not / and I shall yelde me to the with fyfty knyghtes with me that be at my commaundement And I forgyue the al the despyte that thou hast done to me / and the dethe of my broder the black knyghte / All this auailleth not said Beaumayns / but yf my damoysel praye me to saue thy lyf / And therwith he maade semblaunt to stryke of his hede / Lete be thou Beaumayns slee hym not / for he is a noble knyghte / and not soo hardy vpon thyne hede but thou saue hym / Thenne Beaumayns badde the reed knyghte stand vp and thanke the damoysel now of thy lyf /

¶ Thenne the reed knyght praid hym to see his castel / and to be there al nyghte Soo the damoysel thenne graunted hym / and there they had mery chere / But alweyes the damoysel spak many foule wordes vnto Beaumayns wherof the reed knyght had grete merueylle / and alle that nyghte the reed knyghte maade thre score knyghtes to watche Beaumayns that he shold haue no shame nor vylony / And vpon the morne they herd masse and dyned / and the reed knyghte came before Beaumayns with his thre score knyghtes / and there he profered hym his homage and feaute at al tymes he and his knyghtes to doo hym seruyse / I thanke you said Beaumayns / but this ye shalle graunte me / whanne I calle vpon you to come afore my lord kynge Arthur and yelde you vnto hym to be his knyghtes / Syr said the reed knyghte I wille be redy and my felauship at your somons / So syr Beaumayns departed and the damoysel and euer she rode chydynge hym in the fowlest manere / Page  228 [leaf 114v]

¶ Capitulum xj

DAmoysel said Beaumayns ye are vncurteis so to rebuke me / as ye doo / for me semeth I haue done you good seruyse / and euer ye threate me I shal be betyn with knyghtes that we mete / but euer for al your boost they lye in the dust or in the myre / and therfor I pray you rebuke me no more / And whan ye see me beten or yolden as recreaūt thenne may ye bydde me goo from you shamefully / but fyrste I lete you wete I wylle not departe from you / for I were werse than a foole and I wold departe from you all the whyle that I wynne worship / wel said she / ryght soone ther shall mete a knyght shal paye the alle thy wages / for he is the most man of worship of the world excepte kyng Arthur / I will wel said Beaumayns / the more he is of worship / the more shalle be my worship to haue adoo with hym / Thenne anone they were ware / where was afore them a Cyte ryche and fayre And betwixe them and the Cyte a myle and a half there was a fayre medowe that semed newe mowen / and therin were many pauelions fayre to beholde / Lo said the damoysel yonder is a lord that oweth yonder cyte / and his custome is whan the weder is fayr to lye in this medowe to Iuste and torneye / And euer there ben aboute hym fyue honderd knyghtes & gentilmen of armes / and there ben alle maner of games that ony gentylman can deuyse / That goodly lord saide Beaumayns wold I fayne see / thou shalt see hym tyme ynough saide the damoysel / and soo as she rode nere she aspyed the pauelione / where he was / Loo sayd she seest thou yonder pauelione that is al of the coloure of Inde and al maner of thynge that there is aboute men and wymmen / and horses trapped / sheldes and speres were all of the colour of Inde and his name is sir persant of Inde the moost lordlyest knyghte that euer thou lokest on / Hit may wel be said Beaumayns / but be he neuer so stoute a knyghte in this felde / I shalle abyde tyl that I see hym vnder his shelde / A foole said she thou were better flee by tymes / why sayd Beaumayns and he be suche a knyghte as ye make hym he wylle not sette vpon me with alle his men / or with his / v / C knyghtes / For and ther come no more but one Page  229 [leaf 115r] at ones / I shall hym not fayle whylest my lyf lasteth / Fy fy said the damoysel that euer suche a stynkynge knaue shold blowe suche a boost / Damoysel he said ye ar to blame soo to rebuke me / For I had leuer do fyue batails / than so to be rebuked / lete hym come and thenne lete hym doo his werst / Syre she said I merueylle what thou arte and of what kyn thou arte come / boldly thou spekest / and boldly thou hast done / that haue I sene / therfore I praye the saue thy self and thou mayst / for thy hors and thou haue had grete traueylle / And I drede we dwelle ouer longe from the sege / For hit is but hens seuen myle / and alle perillous passages we ar past saue al only this passage / and there I drede me sore lest ye shalle ketche some hurte / therfore I wold haue ye were hens that ye were not brysed nor hurte with this stronge knyghte / But I lete you wete this syr Persant of ynde is no thyng of myȝte nor strength vnto the knyghte that leid the syege aboute my lady / As for that said syre Beaumayns be it as it be may / For sythen I am come soo nyghe this knyght I wille preue his myghte or I departe from hym / and els I shalle be shamed / and I now withdrawe me from hym / And therfore damoysel haue ye no doubte by the grace of god I shall so dele with this knyghte that within two houres after none I shalle delyuer hym And thenne shal we come to the syege by day lyghte / O Ihesu merueille haue I said the damoysel what maner a man ye be / for hit may neuer ben otherwyse but that ye be comen of a noble blood / for soo foule ne shamefully dyd neuer woman rule a knyghte as I haue done you / and euer curtoisly ye haue suffred me / and that cam neuer but of a gentyl blood /

¶ Damoysel sayd Beaumayns a knyght may lytel do that may not suffre a damoisel / for what someuer ye said vnto me / I took none hede to your wordes / for the more ye sayd the more ye angryd me / and my wrathe I wrekyd vpon them that I had adoo with al / And therfor alle the myssayenge that ye myssayed me / fordered me in my bataill & caused me to thynke to shewe & preue my self at the ende what I was / for peraventur thouȝ I had mete in kyng Arthurs kechyn / yet I myȝt haue had mete ynouȝ in other places / but alle that I dyd it for to preue & assaye my frendes / and that shalle be knowen Page  230 [leaf 115v] another day / and whether that I be a gentylman borne or none / I lete you wete fayre damoysel I haue done you gentilmans seruyse / and parauentur better seruyse yet wille I do or I departe from you / Allas she said fayre Beaumayns forgyue me alle that I haue myssaid or done ageynst the / wyth alle my herte said he I forgyue it yow / for ye dyde no thyng but as ye shold doo / for al your euyl wordes pleasyd me / & damoysel saide Beaumayns syn hit lyketh you to saye thus fayre vnto me / wete ye wel it gladeth my herte gretely / and now me semeth ther is no knyght lyuynge but I am able ynough for hym

¶ Capitulum Duodecimum

WYth this sir Persant of ynde had aspyed them as they houed in the felde / and knyȝtly he sente to them whether he came in werre or in pees / say to thy lord said beaumayns I take no force / but whether as hym lyst hym self / Soo the messager went ageyne vnto syr Persaunt / and told hym alle this ansuer / wel thenne will I haue adoo with hym to the vtteraunce / and soo he purueyed hym and rode ageynst hym / And Beaumayns sawe hym and made hym redy / & ther they mette with all that euer theyr horses myght renne / and braste their speres eyther in thre pyeces / & their horses rassed so to gyders that bothe their horses felle dede to the erthe & lyȝtly they auoyded their horses / and put their sheldes afore them / & drewe their swerdes / and gaf many grete strokes that somtyme they hurtled to gyder that they felle grouelyng on the ground Thus they fought two houres and more that their sheldes & theyr hauberkes were al forhewen / & in many stedys they were wounded / So at the last syr Beaumayns smote hym thorou the cost of the body / & thenne he retrayed hym here & there & knyghtly mayntened his batail long tyme / And at the last though hym lothe were Beaumayns smote sir Persant aboue vpon the helme that he felle grouelyng to the erthe / & thenne he lepte vpon hym ouerthwart and vnlaced his helme to haue slayne hym / Thenne syr Persant yelded hym & asked hym mercy / with that cam þe damoisel & praid to saue his lyf / I wil wel / for it were pyte this noble knyȝt shold dye / gramercy sayd Persaunt gentyl knyȝt & damoysel / For certeynly now I Page  231 [leaf 116r] wote wel it was ye that slewe my broder the black knyghte / at the black thorne / he was a ful noble knyȝte / his name was syr Perard / Also I am sure that ye are he that wanne myn other brother the grene knyght / his name was syre Pertolepe Also ye wanne my broder the reed knyght syr Perrymones / And now syn ye haue wonne these / this shal I do for to please you ye shal haue homage & feaute of me / & an C knyghtes to be alweyes at your commaundement to go & ryde where ye wil commaunde vs / & so they wente vnto sir Persauntes pauelione & dranke the wyne / & ete spyeces / & afterward sire Persaunte made hym to reste vpon a bedde vntyl souper tyme / and after souper to bedde ageyne / whan Beaumayns was abedde syr Persaunt had a lady a faire douȝter of xviij yere of age and there he called her vnto hym / & charged her & commaunded her vpon his blessynge to go vnto the knyghtes bedde / and lye doun by his syde / & make hym no straunge chere / but good chere / and take hym in thyne armes & kysse hym / & loke that this be done I charge you as ye wil haue my loue & my good wil So syr Persants doughter dyd as her fader bad her / and soo she wente vnto syr Beaumayns bed / & pryuely she dispoylled her / & leid her doune by hym / & thenne he awoke & sawe her & asked her what she was / syre she said I am sir Persants douȝter that by the commaundement of my fader am come hyder / Be ye a mayde or a wyf said he / sir she said I am a clene maiden / God defende sayd he that I shold defoyle you to doo syre Persaunt suche a shame / therfore fayre damoysel aryse oute of this bedde or els I wille / Syre she said I cam not to you by myn owne wille but as I was commaunded / Allas said syr Beaumayns I were a shameful knyghte and I wolde do your fader ony disworship / and so he kyst her and soo she departed and came vnto syr Persant her fader / & told hym alle how she had spedde / Truly saide syre Persaunt what someuer he be / he is comen of a noble blood / and soo we leue hem there tyl on the morne

¶Capitulum xiij

Page  232 [leaf 116v]

¶ Capitulum xiij

ANd soo on the morne the damoysel & sir Beaumayns herd masse & brake their fast / and soo took their leue Fair damoysel said Persant whether ward ar ye way ledyng this knyghte / syr she said this knyghte is goyng to the sege / that besyegeth my syster in the castel Dangerus / A a sayd persaunt that is the knyghte of the reed launde / the whiche is the moost peryllous knyghte that I knowe now lyuyng / and a man that is withouten mercy / and men sayen that he hath seuen mens strength / god saue you said he to Beaumayns from þt knyghte / for he doth grete wrong to that lady / and that is grete pyte / for she is one of the fairest ladyes of the world / & me semeth that your damoysel is her suster / is not your name Lynet said he / ye sir said she / and my lady my susters name is dame Lyonesse / Now shal I telle you said syr Persaunt / thys reed knyghte of the reed laund hath layne long at the syege wel nyghe this two yeres / and many tymes he myghte haue had her and he had wold / but he prolongeth the tyme to thys entent / for to haue sir laūcelot du lake to doo bataill with hym or sir Trystram or syr Lamerak de galys / or syre Gawayne / & this is his taryenge soo longe at the syege / Now my lord syre Persaunt of ynde saide the damoysel Lynet I requyre you that ye wille make this gentilman knyghte or euer he fyghte with the reed knyghte / I will with all my herte said syr Persaunt and it please hym to take the ordre of knyghthode of so symple a man as I am / Sire said Beaumayns I thanke you for your good wil / for I am better sped / for certaynly the noble knyght sir Launcelot made me knyght / A said sir Persant of a more renomed knyghte myghte ye not be made knyghte / For of alle knyghtes he maye be called chyef of knyghthode / & so all the world saith that betwixe thre knyghtes is departed clerly knyghthode / that is laūcelot du lake / syr Trystram de lyones and sir Lamerak de galis / these bere now the renommee / there ben many other knyghtes as sir Palamydes the sarasyn and sir Sasere his broder / Also sir Bleoberys and sire Blamore de ganys his broder / Also syr Bors de Ganys & syr Ector de marys & sir Percyuale de galis / these & many mo ben noble kniȝtes / but ther be none þt passe þe iij aboue said / therfor god Page  233 [leaf 117r] spede you wel said syr Persant / for and ye may matche the rede knyghte ye shalle be called the fourth of the world / sir said Beaumayns I wold fayne be of good fame / and of knyghthode / And I lete you wete I am of good men / for I dare say my fader was a noble man / and soo that ye wil kepe hit in close / and this damoysel / I wyl telle you of what kyn I am We wille not discouer you said they both tyl ye commaunde vs by the feythe we owe vnto god /

¶ Truly thenne saide he / my name is Gareth of Orkeney and kynge Lot was my fader / & my moder is kynge Arthurs syster / her name is Dame Morgawse / and sir Gawayne is my broder / and sir Agrauayne & sir Gaheryes / and I am the yongest of hem alle / And yet wote not kyng Arthur nor sir Gawayn what I am

¶ Capitulum xiiij

SOo the book saith / that the lady that was biseged had word of her systers comynge by the dwerf and a knyghte with her / and how he had passed al the perillous passages / what manere a man is he said the lady / he is a noble knyght truly madame said the dwerf and but a yong man / but he is as lykely a man as euer ye sawe ony / what is he sayd the damoysel / and of what kynne is he comen / and of whome was he made knyghte / Madame said the dwerf he is the kynges sone of Orkeney / but his name I wille not telle you as at this tyme / but wete ye wel of syre launcelot was he maade knyght / for of none other wolde he be maade knyghte / and sire kay named hym Beaumayns / how escaped he said the lady from the bretheren of Persaunt /

¶ Madame he said as a noble knyghte shold / Fyrste he slewe two bretheren att a passage of a water / A saide she they were good knyghtes but they were murtherers / the one hyght Gherard de breusse / & the other knyght hyght sir Arnolde le Brewse / thenne madame he recountred with the black knyght / and slewe hym in playne batail & so he toke his hors & his armour & fouȝt with the grene knyght & wanne hym in playn bataill / & in lyke wyse he serued the reed knyȝt / and aftir in the same wyse he serued the blewe knyȝt & wan hym in playn batail / thēne said the lady he hath ouercome sir Persaūt of Inde / one of the noblest knyȝtes of the world / & þe dwerf said he hath wōne al the iiij bretherē & slayn Page  234 [leaf 117v] the blak knyght / and yet he dyd more tofore he ouerthrewe sir kay and lefte hym nyghe dede vpon the ground / Also he dyd a grete batayll with syre launcelot / and there they departed on euen handes / And thenne syre launcelot made hym knyghte / Dwerf sayd the lady I am gladde of these tydynges / therfor go thou in an hermytage of myn here by / and there shalt thow bere with the of my wyn in two flagans of siluer / they ar of two galons / and also two cast of brede with fatte veneson bake and deynte foules / and a cop of gold here I delyuer the / that is ryche and precyous and bere all this to myn hermytage / and put it in the hermytes handes / And sythen go thow vnto my syster and grete her wel / and commaūde me vnto that gentyl knyghte / and praye hym to ete and to drynke and make hym stronge / and say ye hym I thanke hym of his curtosye and goodenes that he wold take vpon hym suche labour for me that neuer dyd hym bounte nor curtosye /

¶ Also pray hym that he be of good herte & courage / for he shalle mete with a ful noble knyghte / but he is neyther of bounte / curtosye / nor gentylnes / for he attendyth vnto nothynge but to murther / & that is the cause I can not prayse hym nor loue hym / So this dwerf departed / and came to syre Persant where he fond the damoysel lynet and syr Beaumayns / and there he tolde hem alle as ye haue herd / and thenne they took theyr leue / but syr Persant took an ambelyng hacney and conueyed hem on theyr wayes / And thenne belefte hem to god / and soo within a lytil whyle they came to that heremytage / and there they dranke the wyne / and ete the veneson and the foules baken / And so whan they had repasted hem wel / the dwerf retorned ageyn with his vessel vn to the castel ageyne / and there mette with hym the reed knyght of the reed laundes / and asked hym from whens that he came / and where he had ben / Syr sayd the dwerf I haue ben with my ladyes syster of this castel and she hath ben at kynge Arthurs courte / and broughte a knyghte with her / thenne I accompte her trauaille but loste / For though she had broughte with her syre launcelot / sir Trystram / syr Lamerak or syr gawayne / I wold thynke my selfe good ynough for them all / it may well be said the dwerf / but this knyghte hath passed alle the peryllous passages & slayn Page  235 [leaf 118r] the black knyghte and other two mo / and wonne the grene knyght / the reed knyghte and the blewe knyghte / thenne is he one of these four that I haue afore reherced / He is none of tho said the dwerf / but he is a kynges sone / what is his name sayd the reed knyght of the reed laund / that wille I not telle you seyd the dwerf / but sire kay upon scorne named hym Beaumayns / I care not said the knyght what knyghte soo euer he be / for I shal soone delyuer hym / And yf I euer matche hym he shalle haue a shameful dethe as many other haue had that were pyte sayd the dwerf / And it is merueill that ye make suche shameful warre vpon noble knyghtes

¶ Capitulum xv

NOo leue we the knyghte and the dwerf / and speke we of Beaumayns that al nyȝt lay in the hermytage / & vpon the morne he and the damoysel lynet herd their masse / and brake their fast / And thenne they toke theyr horses / and rode thorou oute a fair forest / and thenne they came to a playne and sawe where were many pauelions and tentys / and a fayr castel / and there was moche smoke and grete noyse / and whanne they came nere the sege / syr Beaumayns aspyed vpon grete trees as he rode / how there henge ful goodly armed knyghtes by the neck and theire sheldes aboute theire neckys with their swerdes / and gylt spores vpon their heles / and soo there henge nyghe a fourty knyghtes shamefully with ful ryche armes / Thenne sir Beaumayns abated his countenaunce & sayd what meneth this / Fayre syre said the damoysel abate not your chere for all this syghte / for ye must courage your self or els ye ben al shente / for all these knyghtes came hyder to this sege to rescowe my syster Dame lyones / and whanne the reede knyghte of the reed laund hadde ouercome hem / he putte them to this shameful dethe withoute mercy and pyte / And in the same wyse he wyll serue you / but yf ye quyte you the better Now Ihesu deffende me said Beaumayns from suche a vylaynous dethe and shenship of armes / For rather than I sholde so be faren with all / I wolde rather be slayn manly in playn Page  236 [leaf 118v] bataille / Soo were ye better said the damoysel / for trust not in hym is no curtosye but alle goth to the deth or shameful murther / and that is pyte / for he is a ful lykely man / wel made of body / and a ful noble knyghte of prowesse and a lorde of grete laundes and possessions / Truly said Beaumayns / he may wel be a good knyghte / but he vseth shameful customs and it is merueylle that he endureth so longe that none of the noble knyghtes of my lord Arthurs haue not delt with hym And thenne they rode to the dykes and sawe them double dyked with ful warly wallis / and there were lodged many grete lordes nyghe the wallys / and there was grete noyse of mynstralsy / and the see betyd vpon the one syde of the walles where were many shippes and maryners noyse with hale & how And also there was fast by a Sykamore tree / and ther henge an horne the grettest that euer they sawe of an Olyfantes bone / and this knyght os the reed laund had hanged it vp ther that yf ther came ony arraunt knyghte / he muste blowe that horne / and thenne wylle he make hym redy & come to hym to doo bataille / But syr I pray you said the damoysel Lynet blowe ye not the horne tyl it be hyghe none / for now it is aboute pryme / & now encreaced his myghte / that as men say he hath seuen mens strengthe / A fy for shame fair damoisel say ye neuer soo more to mo / For and he were as good a knyghte as euer was I shalle neuer fayle hym in his moost myghte / for outher I wille wynne worship worshipfully or dye knyghtely in the felde / and ther with he spored his hors streyghte to the Sykamore tree / and blewe soo the horne egerly that alle the sege and the castel range therof / And thenne there lepte oute knyghtes oute of their tentys and pauelions / and they within the castel loked ouer the wallis and oute att wyndowes / Thenne the reed knyghte of the reed laūdes armed hym hastely / and two barons sette on his spores vpon his heles / and alle was blood reed his armour spere and shelde / And an Erle bucled his helme vpon his hede / and thenne they broughte hym a rede spere and a rede stede / and soo he rode into a lytyl vale vnder the castel / that al that were in the castel and at the sege myghte behold the bataill Page  237 [leaf 119r]

¶ Capitulum xvj

SYre sayd the damoysel Lynet vnto syr Beaumayns loke ye be gladde and lyght / for yonder is your dedely enemy / and at yonder wyndowe is my lady syster dame Lyones / where sayd Beaumayns / yonder said the damoysel & poynted with her fynger / that is trouthe sayd Beaumayns / She besemeth a ferre the fayrest lady that euer I loked vpon and truly he said I aske no better quarel than now for to do bataylle / for truly she shalle be my lady / and for her I wylle fyghte / And euer he loked vp to the wyndowe with gladde countenaunce / And the lady Lyones made curtosy to hym doune to the erthe with holdynge vp bothe their handes / Wyth that the reed knyghte of the reed laundes callid to syr Beaumayns / leue syr knyghte thy lokynge / and behold me I coūceille the / for I warne the wel she is my lady / and for her I haue done many stronge batails / Yf thou haue so done said Beaumayns / me semeth it was but waste labour / for she loueth none of thy felauship / and thou to loue that loueth not the / is but grete foly / For and I vnderstode that she were not glad of my comynge / I wold be auysed or I dyd bataille for her / But I vnderstande by the syegyng of this castel she may forbere thy felauship / And therfor wete thou wel thou rede knyghte of the reed laundes / I loue her / and wille rescowe her or els to dye / Saist thou that said the reed knyghte / me semeth / thou oughte of reson to beware by yonder knyghtes that thow sawest hange vpon yonder trees / Fy for shame said Beaumayns that euer thou sholdest saye or do so euyl for in that thou shamest thy self and knyghthode / and thou mayst be sure ther wylle no lady loue the that knoweth thy wycked custommes And now thou wenest that the syghte of these hanged knyghtes shold fere me / Nay truly not so / that shameful syght causeth me to haue courage and hardynes ageynste the more than I wold haue had ageynst the / and thou were a wel ruled knyght / make the redy said the reed knyghte of the reed laūdes / and talke no lenger with me / Thenne syre Beamayns badde the damoysel goo from hym / and thenne they putte their speres in their reystes and came to gyders with alle their myȝt Page  238 [leaf 119v] that they had bothe / and eyther smote other in myddes of their sheldes that the paytrellys / sursenglys and crowpers braste / and felle to the erthe bothe / and the reynys of their brydels in their handes / and soo they laye a grete whyle sore stonyed that al that were in the castel and in the sege wende their neckes had ben broken / and thenne many a straunger and other sayd the straunge knyȝt was a bygge man / and a noble Iuster / for or now we sawe neuer noo knyghte matche the reed knyghte of the reed laundes / thus they sayd bothe within the castel and withoute / thenne lyghtly they auoyded theyr horses and put their sheldes afore them / and drewe their swerdes and ranne to gyders lyke two fyers lyons / and eyther gafe other suche buffets vpon their helmes that they relyd bacward bothe two strydys / and thenne they recouerd bothe and hewe grete pyeces of theire harneis and theire sheldes / that a grete parte felle in to the feldes

¶ Capitulum xvij

ANd thenne thus they foughte tyl it was past none / and neuer wold stynte tyl att the laste they lacked wynde bothe / and thēne they stode wagyng and scateryng pontyng / blowynge and bledynge that al that behelde them for the moost party wepte for pyte / Soo whan they had restyd them a whyle / they yede to bataille ageyne / tracyng racyng foynyng as two bores / And at some tyme they toke their renne as hit had ben two rammys & hurtled to gyders that somtyme they felle grouelyng to the erthe / And at somtyme they were so amased that eyther took others swerd in stede of his owne / Thus they endured tyl euensong tyme / that there was none that beheld them myghte knowe whether was lyke to wynne the bataill / and their armour was so fer hewen that men myȝt see their naked sydes / and in other places / they were naked / but euer the naked places they dyd defende / and the rede knyghte was a wyly knyght of werre / and his wyly fyhtyng taughte syr Beaumayns to be wyse / but he aboughte hit fulle sore or he dyd aspye his fyghtynge / And thus by assente of them bothe they graunted eyther other to rest / and so they sette Page  239 [leaf 120r] hem doune vpon two molle hylles there besydes the fyghtynge place / and eyther of hem vnlaced his helme / and toke the cold wynde / for either of their pages was fast by them to come whā they called to vnlace their harneis and to sette hem on ageyn at their commaundement / And thenne whan syr Beaumayns helme was of / he loked vp to the wyndowe / and there he sawe the faire lady Dame Lyones / and she made hym suche countenaunce that his herte waxed lyghte and Ioly / and ther with he bad the reed knyghte of the reed laundes make hym redy and lete vs doo the bataille to the vtteraunce / I will wel said the knyghte / and thenne they laced vp their helmes / and their pages auoyded / & they stepte to gyders & foughte fresshely / but the reed knyghte of the reed laundes awayted hym / & at an ouerthwart smote hym within the hand / that his swerd felle oute of his hand / and yet he gaf hym another buffet vpon the helme that he felle grouelynge to the erthe / & the reed knyghte felle ouer hym / for to holde hym doune / Thenne cryed the maiden Lynet on hyghe / O syr Beaumayns where is thy courage become / Allas my lady syster beholdeth the and she sobbeth and wepeth / that maketh myn herte heuy / when syr Beaumayns herd her saye soo / he abrayed vp with a grete myght and gate hym vpon his feet / and lyghtely he lepte to his swerd and gryped hit in his hand and doubled hys paas vnto the reed knyghte and there they foughte a newe bataille to gyder / But sir Beaumayns thenne doubled his strokes / and smote soo thyck that he smote the swerd oute of his hand / and thenne he smote hym vpon the helme that he felle to the erthe / and sir Beaumayns felle vpon hym / and vnlaced his helme to haue slayne hym / and thenne he yelded hym and asked mercy / and said with a lowde vois O noble knyghte I yelde me to thy mercy / Thenne syr Beaumayns bethoughte hym vpon the knyghtes that he had made to be hanged shamefully / and thenne he said I may not with my worship saue thy lyf / for the shameful dethes that thou hast caused many ful good knyghtes to dye / Syre saide the reed knyghte of the reed laundes hold your hand and ye shalle knowe the causes why I put hem to so shameful a dethe / saye on said sir Beaumayns / Syre I loued ones a lady a faire damoisel / and she Page  240 [leaf 120v] had her broder slayne / and she said hit was syr launcelot du lake / or els syr gawayn / and she praide me as that I loued her hertely that I wold make her a promyse by the feith of my knyghthode for to laboure dayly in armes vnto I mette wyth one of them / and alle that I myghte ouercome I shold putte them vnto a vylaynous dethe / and this is the cause that I haue putte alle these knyghtes to dethe / and soo I ensured her to do alle the vylony vnto kynge Arthurs knyghtes / and that I shold take vengeaūce vpon alle these knyghtes and syr now I wille the telle that euery daye my strengthe encreaceth tylle none / and al this tyme haue I seuen mens strengthe

¶ Capitulum xviij

THenne came ther many Erles and Barons and noble knyghtes and praid that knyghte to saue his lyf and take hym to your prysoner / And all they felle vpon their knees and prayd hym of mercy / and that he wolde saue his lyf / and syr they all sayd it were fairer of hym to take homage and feaute / and lete hym holde his landes of you than for to slee hym / by his deth ye shal haue none auauntage and his mysdedes that ben done maye not ben vndone / And therfor he shal make amendys to al partyes & we al wil become your men and doo you homage and feaute / Fayre lordes said Beaumayns / wete you wel I am ful lothe to slee this knyȝt neuertheles he hath done passyng ylle and shamefully / But in soo moche al that he dyd was at a ladyes request I blame hym the lesse / and so for your sake I wil releace hym that he shal haue his lyf vpon this couenaunt / that he goo within the castel / and yelde hym there to the lady / And yf she wil forgyue and quyte hym / I wil wel / with this he make her amendys of al the trespas he hath done ageynst her and her landes /

¶ And also whanne that is done that ye goo vnto the courte of kyng Arthur / and there that ye aske syr Launcelot mercy / & syr Gawayn for the euyl wil ye haue had ageynst them / sire said the reed knyght of the reed laundes / al this wil I do as ye commaunde / and syker assuraunce and borowes ye shal haue / And soo thenne whan the assuraunce was made / he made Page  241 [leaf 121r] his homage and feaute / and alle tho erles and barons wyth hym / And thenne the mayden Lynet came to syre Beaumayns / and vnarmed hym and serched his woundes / and stynted his blood / and in lyke wyse she dyd to the rede knyghte of the reed laundes / and there they soiourned ten dayes in their tentes / and the reed knyghte made his lordes and seruauntes to doo alle the pleasyre that they myghte vnto syre Beaumayns / And soo within a whyle the reed knyghte of the reed laundes yede vnto the castel / and putte hym in her grace And soo she receyued hym vpon suffysaunt seurte / so alle her hurtes were wel restored of al that she coude complayne / and thenne he departed vnto the Courte of kyne Arthur / and there openly the reed knyghte of the reed laundes putte hym in the mercy of syre Launcelot and syr Gawayne / and there he told openly how he was ouercome and by whome / and also he told alle the batails from the begynnynge vnto the endynge / Ihesu mercy sayd kynge Arthur and sire Gawayne we merueylle moche of what blood he is come / for he is a noble knyghte / Haue ye no merueille saide sire Launcelot / for ye shal ryght wel wete that he is comen of a ful noble blood / and as for his myghte and hardynes ther ben but fewe now lyuynge that is so myghty as he is / and so noble of prowesse It semeth by yow said kynge Arthur that ye knowe his name / and fro whens he is come / and of what blood he is / I suppose I doo so said Launcelot / or els I wold not haue yeuen hym thordre of knyȝthode / but he gaf me suche charge at that tyme that I shold neuer discouer hym vntyl he requyred me or els it be knowen openly by some other

¶ Capitulum xix

NOw torne we vnto syr Beaumayns that desyred of Lynet that he myght see her syster his lady / Syre she said I wold fayne ye sawe her / Thenne syr Beaumayns al armed hym and toke his hors and his spere and rode streyȝt vnto the castel / And whanne he cam to the gate he fond there many men armed and pulled vp the drawe brydge / & drewe Page  242 [leaf 121v] the porte cloose /

¶ Thenne merueilled he why they wold not suffre hym to entre / And thenne he loked vp to the wyndow And there he sawe the fair Lyones that said on hyghe go thy way / syr Beaumayns / for as yet thou shalt not haue holy my loue vnto the tyme that thou be callyd one of the nombre of the worthy knyghtes / And therfor goo laboure in worship this twelue monethe / and thenne thou shalt here newe tydynges / Allas faire lady said Beaumayns I haue not deserued that ye shold shewe me this straungenes / and I had wend that I shold haue ryght good chere with you and vnto my power I haue deserued thanke / and wel I am sure I haue boughte your loue with parte of the best blood within my body Fayre curteis knyghte said Dame Lyones / be not displeasyd nor ouer hasty / for wete you wel / your grete trauaill nor good loue shal not be lost / for I consydre your grete trauail & labour / your bounte and your goodenes as me oughte to doo / And therfore goo on your wey / and loke that ye be of good comforte for all shal be for your worship / and for the best / & perde a twelue moneth wille soone be done / and trust me fair knyghte I shal be true to you and neuer te bitraye you / but to my dethe I shalle loue you / and none other / And ther with alle she torned her from the wyndowe / and syr Beaumayns rode awey ward from the castel makyng grete dole / and soo he rode here and there & wyste not ne where he rode tyl hit was derke nyghte / And thenne it happend hym to come to a poure mans hous and there he was herborowed all that nyghte / But syr Beaumayns hadde no rest but walowed and wrythed for the loue of the lady of the castel / And soo vpon the morowe he took his hors and rode vn tyl vnderne / and then̄e he came to a brode water / and there by was a grete lodge / and there he alyghte to slepe and leid his hede vpon the shelde / and bitoke his hors to the dwarf / and commaunded hym to watche al nyghte / Now torne we to the lady of the same castel / that thoughte moche vpon Beaumayns / and thenne she called vnto her syr Gryngamore her broder / and praid hym in al maner as he loued her hertely that he wold ryde after syr Beaumayns / and euer haue ye wayte vpon hym tyl ye may fynde hym slepynge / for I am sure in his heuynes he wil alyȝt doun Page  243 [leaf 122r] in some place / and leye hym doune to slepe / And therfor haue ye your wayte vpon hym / and in the preuyest manere ye can take his dwerf / and go ye your waye with hym as faste as euer ye maye or syr Beaumayns awake / For my syster Lynet telleth me that he can telle of what kynreed he is come / and what is his ryghte name / And the meane whyle I and my syster wille ryde vnto youre castel to awayte whanne ye brynge with you the dwerf / And thenne whan ye haue broughte hym vnto youre Castel / I wylle haue hym in examynacion my self / vnto the tyme that I knowe what is his ryghte name / and of what kynred he is come / shalle I neuer be mery at my herte

¶ Syster said syre Gryngamore alle thys shalle be done after your entente / And soo he rode alle the other daye and the nyghte tylle that he fond syre Beaumayns lyenge by a water and his hede vpon his shelde for to slepe /

¶ And thenne whanne he sawe syre Beaumayns fast on slepe / he cam stylly stalkyng behynde the dwerf and plucked hym fast vnder his arme / and soo he rode aweye with hym as faste as euer he myght vnto his owne castel And this syre Gryngamors armes were alle black and that to hym longeth / But euer as he rode with the dwerf toward his castel / he cryed vnto his lord / and prayd hym for helpe / And there with awoke syre Beaumayns / and vp he lepte lyghtly / & sawe where the Gryngamor rode his waye with the dwerf / and soo syr Gryngamor rode oute of his syghte /

¶ Capitulum xx

THenne syre Beaumayns putte on his helme anone / and buckeled his shelde / and tooke his hors / and rode after hym alle that euer he myghte ryde thorou marys and feldes and grete dales / that many tymes his hors and he plonged ouer the hede in depe myres / for he knewe not the wey / but took the gaynest waye in that woodenes that many tymes he was lyke to perysshe / And at the laste hym happend to come to a fayre grene waye And there he mette with a poure man of the countreye whom he salewed & asked hym / Page  244 [leaf 122v] whether he mette not with a knyghte vpon a black hors & all black harneis a lytel dwerf syttynge behynde hym with heuy chere / Syre saide this poure man here by me came syre Gryngamor the knyght with suche a dwerf mornyng as ye saye / & therfore I rede you not folowe hym / For he is one of the perylloust knyghtes of the world / and his castel is here nyhe hand but two myle / therfor we aduyse you ryde not after syr Gryngamor but yf ye owe hym good wille / Soo leue we syre Beaumayns rydynge toward the castel and speke we of sir Gryngamor and the dwerf / Anone as the dwerf was come to the castel / dame Lyones and dame Lynet her syster asked the dwerf where was his maister borne / and of what lygnage he was come / And but yf thou telle me said dame Lyones thou shalt neuer escape this castel / but euer here to be prysoner As for that said the dwerf I fere not gretely to telle his name and of what kynne he is come / Wete ye wel he is a kynges sone / and his moder is syster to kyng Arthur / and he is broder to the good knyghte of syre Gawayne / and his name is syre Gareth of Orkeney / and now I haue told you his ryght name / I praye you fayre lady lete me goo to my lord ageyne / for he wille neuer oute of this countrey vntyl that he haue me ageyne / And yf he be angry / he wil doo moche harme or that he be stynte / and worche you wrake in this countray As for that thretyng sayd syr Gryngamore be it as it be may We wille goo to dyner / and soo they wasshed and wente to mete / and made hem mery and wel at ease / by cause the lady Lyones of the castel was there / they made grete Ioye

¶ Truly Madame sayd Lynet vnto her syster wel maye he be a kynges sone / for he hath many good tatches on hym / for he is curteis and mylde and the moost sufferynge man that euer I mette with al / For I dar saye ther was neuer gentylwoman reulyd man in soo foule a manere / as I haue rebuked hym / And at all tymes he gafe me goodely and meke ansuers ageyne

¶ And as they sate thus talkynge / ther came sire Gareth in at the gate with an angry countenaunce and his swerd drawen in his hand / and cryed aloude that alle the castel myȝt here hit sayeng thou traitour syre Page  245 [leaf 123r] Gryngamor delyuer me my dwerf ageyn / or by the feith that I owe to the ordre of knyghthode I shal doo the al the harme that I can / Thenne syr Gryngamor loked oute at a wyndow and said syr gareth of Orkeney leue thy bostyng wordes / for thou getest not thy dwerf ageyne / Thou coward knyghte sayd syr Gareth brynge hym with the / and come and doo bataylle with me / and wynne hym and take hym / So wille I do said syr Gryngamor and me lyst / but for al thy grete wordes thou getest hym not / A fayr broder said dame Lyones I wold he had his dwerf ageyne / for I wold he were not wroth / for now he hath told me al my desyre I kepe nomore of the dwerf And also broder he hath done moche for me / and delyuerd me from the reed knyghte of the reed laundes / and therfor broder I owe hym my seruyse afore al knyghtes lyuynge / And wete ye wel that I loue hym before al other / and ful fayne I wold speke with hym / But in no wyse I wold that he wist what I were / but that I were another straunge lady / Wel said syr Gryngamor sythen I knowe now your wille / I wylle obeye now vnto hym / And ryght ther with al he wente doun vnto syr Gareth / and said syr I crye you mercy / and al that I haue mysdone I wille amend hit at your wille / And therfore I pray you that ye wold alyghte / and take suche chere as I can make you in this castel / Shal I haue my dwerfe saide syre Gareth / ye syr / and alle the pleasaunce that I can make you / for as soone as your dwerf told me what ye were and of what blood ye ar come / and what noble dedes ye haue done in these marches / thenne I repentyd of my dedes / And thenne syre Gareth alyghte / and ther came his dwerf & took his hors / O my felawe said syr gareth / I haue had many aduentures for thy sake / And soo syre Gryngamor tooke hym by the hand / and ledde hym in to the halle where his own wyf was

¶ Capitulum xxj

Page  246 [leaf 123v]

ANd thenne came forth Dame Lyones arayed lyke a pryncesse / and there she made hym passyng good chere and he her ageyne / and they had goodely langage & louely countenaunce to gyder / And syre Gareth thought many tymes Ihesu wold that the lady of the castel perillous were so fayre as she was / there were al maner of games & playes of dauncyng and syngynge / And euer the more syre Gareth bihelde that lady / the more he loued her / and so he brenned in loue that he was past hym self in his reason / and forth toward nyghte they yede vnto souper / and syre Gareth myghte not ete for his loue was soo hote / that he wist not where he was Alle these lokes aspyed syr Gryngamor / and thenne at after souper he callid his syster Dame Lyones vnto a chamber / and sayd / fair syster I haue wel aspyed your coūtenaūce betwixe you and this knyght / And I wil syster that ye wete he is a ful nobel knyȝt / & yf ye can make hym to abyde here I wil do hym all the pleasyr þt I can / for & ye were better than ye ar ye were wel bywaryd vpon hym / Fayre broder said Dame lyones I vnderstande wel that the knyghte is good & come he is of a noble hous / Notwithstandyng I wille assaye hym better how be it I am moost beholdyng to hym of ony erthely mā for he hath had grete labour for my loue / and passid many a daungerous passage / Ryght soo syr Gryngamor wente vnto syr Gareth and said syre make ye good chere / for ye shal haue none other cause / for this lady my syster is yours at al tymes her worship saued / for wete ye wel she loueth you as wel as ye doo her and better / yf better may be / And I wist that said syr Gareth / ther lyued not a gladder man than I wold be Vpon my worship said syr Gryngamor trust vnto my promyse And as long as it lyketh you ye shal soiourne with me and this lady shal be with vs dayly and nyghtly to make yow alle the chere that she can / I wille wel said syre Gareth / For I haue promysed to be nyghe this countrey this twelue moneth / And wel I am sure kynge Arthur and other noble knyghtes wille fynde me where that I am within this twelfe moneth / For I shal be soughte and founden yf that I be on lyue

¶ And thenne the noble knyghte syre Gareth wente vnto the dame Lyones whiche he thēne moche loued / & kyst her Page  247 [leaf 124r] many tymes / and eyther made grete Ioye of other / And there she promysed hym her loue certaynly to loue hym and none other the dayes of hyr lyf / Thenne this lady dame Lyones by the assente of her broder told syr Gareth alle the trouth what she was / And how she was the same lady that he dyd batail for / and how she was lady of the castel peryllous / and there she told hym how she caused her broder to take awey his dwerf

¶ Capitulum xxij

FOr this cause to knowe the certaynte what was your name / and of what kynne ye were come / And thenne she lete fetche tofore hym Lynet the damoysel that had ryden with hym many wylsome wayes / Thenne was syre Gareth more gladder than he was to fore / And thēne they trouthplyte eche other to loue / and neuer to faylle whyles their lyfe lasteth / And soo they brente bothe in loue that they were accorded to abate their lustes secretely / And there Dame Lyones counceylled syr Gareth to slepe in none other place but in the halle / And there she promysed hym to come to his bedde a lytel afore mydnyght / This counceil was not soo pryuely kepte but it was vnderstande / for they were but yonge bothe and tendyr of age / and had not vsed none suche craftes to forne / Wherfor the damoysel Lynet was a lytel displeasyd / and she thoughte her syster Dame Lyones was a lytel ouer hasty / that she myghte not abyde the tyme of her maryage / And for sauyng their worship / she thoughte to abate their hote lustes /

¶ And so she lete ordeyne by her subtyl craftes that they had not their ententes neyther with other as in her delytes / vntyl they were maryed / And soo it past on / At after souper was made clene auoydaunce / that euery lord and lady shold goo vnto his rest / But syr Gareth said playnly he wold goo noo ferther than the halle / for in suche places he said was conuenyent for an arraunt knyȝt to take his rest in / and so there were ordeyned grete couches / & theron fether beddes / & there leyde hym doune to slepe / & within a whyle cam dame Lyones wrapped in a mantel furred with Ermyne & leid her doun besydes syr gareth / And there with alle he beganne to kysse her / And thenne he loked afore hym and there he apperceuyued [ and sawe come an armed knyght with many lyghtes aboute hym / and sawe come an armed knyȝt with many lyghtes about hym  ]/ & this knyghte had a longe Gysarme in his hand / and maade grym countenaunce to smyte hym / Whanne syre Gareth sawe hym come in that wyse / he lepte oute of his bedde and gate in his hand his swerd and lepte strayte toward that knyght / And whanne the knyght sawe syr Gareth come so fyersly vpon hym / he smote hym with a foyne thorou the thycke of the thyȝ that the wound was a shaftmon brode and had cutte atwo many vaynes and senewes / And there with al syr Gareth smote hym vpon the helme suche a buffet that he felle grouelyng / and thenne he lepte ouer hym and vnlaced his helme and smote of his hede fro the body / And thenne he bledde so fast that he myghte not stande / but soo he leid hym doun vpon his bedde / and there he swouned and laye as he had ben dede Thenne dame Lyones cryed alowde / that her broder syr Gryngamor herd / and came doune / And whan he sawe syr Gareth soo shamefully wounded / he was sore displeasyd and sayd I am shamed that this noble knyghte is thus honoured / Syr sayd syr Gryngamore hou may this be / that ye be here / and thys noble knyghte wounded / Broder she said I can not telle yow For it was not done by me nor by myn assente / For he is my lord and I am his / and he must be myn husband / therfore my broder I wille that ye wete I shame me not to be with hym / nor to doo hym alle the pleasyr that I can / Syster said syre Gryngamore / and I will that ye wete it and syr Gareth both that it was neuer done by me nor by my assente that this vnhappy dede was done / And there they staunched his bledynge as wel as they myght / and grete sorou made sir Gryngamor and Dame Lyones / And forthe with al came Dame Lynet and toke vp the hede in the syghte of hem alle / and enoynted it with an oyntement there as it was smyten of / and in the same wyse she dyd to the other parte there as the hede stak / And thenne she sette it to gyders / and it stak as fast as euer it did And the knyghte arose lyghtely vp / and the damoysel Lynet put hym in her chambre / Alle this sawe sir Gryngamor and dame Lyones / and soo dyd sir Gareth / and wel he espyed that it was the damoysel Lynet that rode with hym thorou the peryllous passages / A wel damoysel said syre Gareth I [ wende wold  ]not haue done as ye haue done / My lord Gareth said Lynet / alle that I haue done I will auowe / and alle that I haue done shal be for youre honoure and worship / and to vs alle / And soo within a whyle syr Gareth was nyghe hole / & waxid lyghte and Iocounde / and sange / daunced and gamed / and he and dame Lyones were soo hote in brennynge loue that they made their couenaunte at the tenth nyghte after that she shold come to his bedde / And by cause he was woūded afore / he laid his armour / and his swerd nyghe his beddes syde

¶ Capitulum xxiij

RYght as she promysed she came / and she was not soo soone in his bedde / but she aspyed an armed knyghte comyng toward the bedde / there with alle she warned syr Gareth / and lyghtly thorou the good helpe of Dame Lyones he was armed / and they hurtled to gyders with grete Ire & malyce al aboute the halle / and there was grete lyght as it had ben the nombre of xx torches bothe before and behynd / soo that syr Gareth strayned hym / soo that his old wounde braste ageyne on bledyng / but he was hote and couragyous and toke no kepe / but with his grete force he stroke doune that knyghte / and voyded his helme / and strake of his hede / Thenne he hewe the hede in an honderd pyeces / And whan he had done so he took vp alle tho pyeces and threwe hem oute at a wyndow in to the dyches of the castel / and by this done / he was so faynt that vnnethes he myght stande for bledyng / And by thenne he was al most vnarmed / he felle in a dedely swoune in the flore / And thenne dame Lyones cryed soo that syr Gryngamor herd / And whan he cam and fond syr Gareth in that plyte he made grete sorou / & there he awaked sir Gareth / and gaf hym a drynke that releued hym wonderly wel / but the sorou that Dame Lyones made there maye no tonge telle / for she soo faryd with her self as she wold haue dyed /

¶ Ryghte soo cam this damoysel Lynet before hem al / and she had fette alle the goblets of the hede that syr Gareth had throwen out at a wyndowe / and there she enoynted hem as she had done to fore / & set them to gyder ageyn / wel damoisel Lynet said syre Gareth / Page  250 [leaf 125v] I haue not deserued alle this despyte that ye doo vnto me / sir knyghte she said / I haue no thynge do / but I will auowe / And al that I haue done shalle be to your worship and to vs al / And thenne was syre Gareth staūched of his bledyng But the leches said / that ther was no man that bare the lyf / sholde hele hym thorou oute of his wounde / but yf they heled hym that caused that stroke by enchauntement / So leue we syr Gareth there with syr Gryngamore and his systers / and torne we vnto kynge Arthur that at the nexte feest of Pentecost helde his feest / and there cam the grene knyȝt with fyfty knyghtes / and yelded hem all vnto kynge Arthur / And so there came the reed knyghte his broder / and yelded hym to kyng Arthur and thre score knyghtes with hym / Also there came the blewe knyghte broder to them with an honderd knyghtes / & yelded hem vnto kynge Arthur / and the grene knyghtes name was Partolype / and the reed knyghtes name was Perymones / and the blewe knyghtes name was syr Persant of Inde / these thre bretheren told kynge Arthur how they were ouercome by a knyghte that a damoysel had with her / and called hym Beaumayns / Ihesu sayd the kynge I merueylle what knyghte he is / and of what lygnage he is come / He was with me a twelue monethe / and pourely and shamefully he was fostred / and syre kay in scorne named hym Beaumayns / Soo ryghte as the kyng stode soo talkyng with these thre bretheren / there came syr Launcelot du lake and told the kynge that there was come a goodly lord with vj C knghtes with hym / thenne the kynge wente oute of Carlyon / for there was the feest / and there came to hym this lord / and salewed the kynge in a goodly manere / What wylle ye sayd kyng Arthur / and what is youre erand / Syr he said my name is the reed knyghte of the reed laundes / but my name is syr Ironsyde / and syre wete ye wel / here I am sente to yow / of a knyght that is called Beaumayns / for he wanne me in playne bataille hande for hand / and soo dyd neuer no knyght but he that euer had the better of me this xxx wynter / the whiche commaunded to yelde me to yow at youre wylle / ye are welcom said the kyng / for ye haue ben long a grete foo to me and my Courte / and now I truste to god I shalle Page  251 [leaf 126r] soo entreate you that ye shal be my frend / Syre / bothe I and these fyue honderd knyghtes shal alweyes be at your somons to doo you seruyse as maye lye in oure powers / Ihesu mercy said kyng Arthur I am moche beholdynge vnto that knyght / that hath put soo his body in deuoyre to worshippe me & my Courte / And as to the Ironsyde that art called the reed knyghte of the reed laundes thou arte called a peryllous knyȝt And yf thou wylt holde of me I shal worshippe the and make the knyghte of the table round / but thenne thou must be no more a murtherer / Syre as to that I haue promysed vnto syre Beaumayns neuer more to vse suche custommes / for all the shameful customes that I vsed I dyd at the request of a lady that I loued / and therfor I must goo vnto syr Launcelot and vnto syre Gawayne / and aske them foryeuenes of the euyll wylle I had vnto them / for alle that I put to deth was al only for the loue of syr Launcelot and of syr Gawayne / They ben here now said the kynge afore the / now maye ye saye to them what ye wylle / And thenne he kneled doune vnto syre Launcelot and to syre Gawayne and prayd them of foryeuenes of his enemytee that euer he had ageynste them /

¶ Capitulum xxiiij

THenne goodely they said al at ones / god foryeue you and we do / and praye you that ye will telle vs where we may fynde syr Beaumayns / Fayre lordes said syr Ironsyde I can not telle you / for it is ful hard to fynde hym / for suche yong knyghtes as he is one / whanne they be in their aduentures ben neuer abydynge in no place /

¶ But to saye the worship that the reed knyghte of the reed laundes and syr persaunt and his broder said of Beaumayns / it was merueil to here / Wel my fayre lordes said kynge Arthur / wete yow wel / I shalle do you honour for the loue of syr Beaumayns / and as soone as euer I mete with hym I shalle make you al vpon one day knyghtes of the table round / And as to the syre Persaunt of Inde thou hast ben euer called a ful noble knyghte / and soo haue euer ben thy thre bretheren called / But I merueil said the kyng that I here not of the black knyȝt your Page  252 [leaf 126v] broder / he was a ful noble knyghte / Syr sayd Pertolype the grene knyȝt syr Beaumayns slewe hym in a recoūtre with his spere / his name was syr Perard / that was grete pyte sayd the kynge and soo said many knyghtes / For these four bretheren were ful wel knowen in the courte of kynge Arthur for noble knyghtes / for long tyme they had holden werre ageynst the knyghtes of the round table / Thenne sayd Pertolepe the grene knyghte to the kynge atte a passage of the water of mortayse there encountred syr Beaumayns with two bretheren that euer for the moost party kepte that passage / and they were two dedely knyghtes / and there he slewe the eldest broder in the water / and smote hym vpon the heede suche a buffet that he felle doune in the water / and there he was drouned / & his name was sir Garard le brewse / and after he slewe the other broder vpon the lond / his name was syr Arnold le brewse /

¶ Capitulum xxvj


SOo thenne the kyng and they wente to mete / and were serued in the best manere / And as they satte at the mete / ther came in the quene of Orkeney with ladyes & knyȝtes a grete nombre / And thenne syr Gawayn / syr Agrauayn and Gaherys arose / and wente to her / and salewed her vpon their knees / and asked her blyssyng / For in xv yere they had not sene her / Thenne she spak on hyghe to her broder kynge Arthur / where haue ye done my yong sone syr Gareth / he was here amongst you a twelue moneth / & ye made a kechyn knaue of hym / the whiche is shame to you all / Allas where haue ye done my dere sone that was my Ioye and blysse / O dere moder said syr Gawayn I knewe hym not / Nor I said the kynge that now me repenteth / but thanked be god he is preued a worshipful knyghte as ony is now lyuyng of his yeres / & I shal neuer be glad tyl I may fynde hym / A broder sayd the quene vnto kyng Arthur and vnto syr Gawayne and to alle her sones / ye dyd your self grete shame whan ye amongst you kepte my sone in the kechyn and fedde hym lyke a poure hog / Fayr sister said kyng Arthur ye shall ryghte wel wete / I knewe hym not / nor nomore dyd syre Gawayn / nor his Page  253 [leaf 127r] bretheren / but sythen it is soo said the kyng that he is thus gone from vs alle / we must shape a remedy to fynde hym / Also syster me semeth ye myght haue done me to wete of his comynge / And thenne and I had not done wel to hym / ye myȝt haue blamed me / For whan he cam to this courte he came lenyng vpon two mens sholders as though he myght not haue gone / And thenne he asked me thre yeftes / and one he asked the same day / that was that I wold gyue hym mete ynough that twelue moneth / and the other two yeftes he asked that day a twelue moneth / and that was that he myghte haue thaduenture of the damoysel Lynet / and the thyrd was that syre Launcelot shold make hym knyght whan he desyred hym / And soo I graunted hym alle his desyre / and many in this Courte merueilled that he desyred his sustenaunce for a twelf monethe / And there by we demed many of vs that he was not come of a noble hous / Syre said the Quene of Orkeney vnto kynge Arthur her broder / wete ye wel that I sente hym vnto you ryghte wel armed and horsed and worshipfully bysene his body / and gold and syluer plente to spend / it may be said the kynge / but therof sawe we none / sauf that same daye as he departed from vs / knyghtes told me that ther came a dwerf hyder sodenly and broughte hym armour and a good hors ful wel and rychely bysene / and there at we al had merueille / fro whens that rychesse came / that we demed al that he was come of men or worship / Broder said the Quene alle that ye saye I byleue / for euer sythen he was growen / he was merueillously wytted / and euer he was feythful & true of his promesse / But I merueille said she that syre kay dyd mocke hym and scorne hym / and gaf hym that name Beaumayns / yet syr kay said the quene named hym more ryghteuously than he wende / For I dare saye and he be on lyue / he is as fair an handed man and wel disposed as ony is lyuynge / Syre said Arthurle te this langage be stylle / and by the grace of god he shal be founde / and he be within these seuen royames / and lete alle this passe and be mery / for he is proued to be a man of worship / and that is my Ioye

¶ Capitulum xxvij

Page  254 [leaf 127v]

THenne said syr Gawayne and his bretheren vnto arthur / syre and ye wyl gyue vs leue we wille go and seke oure brother / Nay said syr Launcelot that shalle ye not nede / and so said syr Bawdewyn of Bretayne / for as by oure aduys the kynge shal sende vnto dame Lyones a messager / and praye her that she wille come to the courte in alle the hast that she may / and doubte ye not she wille come / And thēne she may gyue you best coūceille where ye shal fynde hym This is wel said of you said the kyng / Soo thenne goodely letters were made / and the messager sente forth that nyghte & day he wente tyl he cam vnto the castel perillous / And thenne the lady dame Lyones was sente fore there as she was wyth syr Gryngamor her broder and syre Gareth / and whan she vnderstode this message / she badde hym ryde on his way vnto kynge Arthur / and she wold come after in al goodely hast

¶ Thenne whan she came to syr Gryngamor and to sir Gareth she told hem al how kyng Arthur had sente for her / that is by cause of me said syr Gareth / Now auyse me said dame Lyones what shalle I saye and in what manere I shal rule me / My lady and my loue said sir Gareth I pray you in no wyse be ye aknowen where I am / but wel I wote my moder is there and alle my bretheren / and they wille take vpon hem to seke me / I wote wel that they doo / But this madame I wold ye sayd and aduysed the kynge whan he questyoned with you of me / Thenne maye ye say / this is your aduys that and hit lyke his good grace / ye wille doo make a crye ayenst the feest of thassumpcion of our lady that what knyghte there preueth hym best he shal welde you and all your land / And yf soo be that he be a wedded man that his wyf shall the degre and a coronal of gold besette with stones of vertue to the valewe of a thousand pound and a whyte Iarfaucon / Soo dame Lyones departed / and came to kynge Arthur where she was nobly receyued / and there she was sore questyoned of the kyng and of the quene of Orkeney / And she ansuerde where syr Gareth was she coude not telle / But thus moche she said vnto Arthur / syre I wille lete crye a turnement that shal be done before my castel at the Assumpcion of oure lady / and the crye shal be this that you my lorde Arthur shalt be there / &Page  255 [leaf 128r] your knyghtes / and I will puruey that my knyghtes shalle be ageynst yours / And thenne I am sure ye shall here of syr Gareth / this is wel aduysed said kynge Arthur / and soo she departed / And the kynge and she maade grete prouysyon to that turnement / Whan dame Lyones was come to the yle of Auylyon that was the same yle ther as her broder syr Gryngamor dwelte / thenne she told hem al how she had done / and what promyse she had made to kynge Arthur / Allas said syr Gareth / I haue been soo wounded with vnhappynes sythen I cam in to this castel that I shal not be abyl to doo at that turnement lyke a knyghte / for I was neuer thorouly hole syn I was hurte / Be ye of good chere said the damoysel Lynet / for I vndertake within these xv dayes to make you hole and as lusty as euer ye were / And thenne she leid an oynement & a salue to hym as it pleasyd to her that he was neuer so fressh nor soo lusty / Thenne said the damoysel Lynet / send you vnto syr Persaunt of ynde / and assomone hym and his knyghtes to be here with you as they haue promysed / Also that ye send vnto syr Ironsyde that is the reed knyghte of the reed laundes / and charge hym that he be redy with you with his hole somme of knyghtes / and thenne shalle ye be abyl to matche with kynge Arthur and his knyghtes / Soo this was done & alle knyghtes were sente for vnto the castel peryllous / & thenne the reed knyght ansuerd and said vnto dame Lyones and to syre Gareth / Madame & my lord syr Gareth ye shal vnderstande that I haue ben at the court of kynge Arthur and sire Persaunt of Inde and his bretheren / and there we haue done oure homage as ye commaunded vs / Also syr Ironsyde sayd I haue taken vpon me with syre Persaunt of Inde and his bretheren to hold party ageynst my lord sir Launcelot and the knyghtes of that courte / And this haue I done for the loue of my lady Dame Lyones and you my lord sir Gareth / ye haue wel done said syr Gareth / But wete you wel ye shal be ful sore matched with the moost noble knyghtes of the world / therfor we must purueye vs of goode knyghtes where we may gete them / That is wel said / said sir Persaunt and worshipfully And soo the crye was made in England / walis and scotland Ireland / Cornewaille / & in alle the oute Iles and in bretayn Page  256 [leaf 128v] and in many countreyes that at the feest of our lady the assumpcion next comyng men shold come to the castel peryllous besyde the yle of Auylyon / And there al the knyghtes that ther came shold haue the choyse whether them lyst to be on the one party with the knyghtes of the castel or on the other party with kynge Arthur / And two monethes was to the daye that the turnement shold be / & so ther cam many good knyȝtes that were at her large and helde hem for the moost party ageynst kynge Arthur and his knyghtes of the round table / cam in the syde of them of the castel / For syr Epynogrus was the fyrst / and he was the kynges sone of Northumberland / & syr Palamydes the sarasyn was another / and syr Safere his broder / and syre Segwarydes his broder / but they were crystned / and syre Malegryne another / and syr Bryan des les Ilelys a noble knyghte / and syr Grummore gummursum a good knyghte of Scotland / and syr Carados of the dolorous toure a noble knyghte and syr Turquyn his broder / and syr Arnold and syre Gauter two bretheren good knyghtes of Cornewaile / there cam syr Trystram de lyones / and with hym syr Dynadas the seneschal / and sir Saduk / but this syr Tristram was not at that tyme knyght of the table round / but he was one of the best knyghtes of the world / And soo all these noble knyghtes accompanyed hem with the lady of the castel and with the reed knyghte of the reed laundes / but as for sir Gareth he wold not take vpon hym more but as other meane knyghtes

¶ Capitulum xxviij

ANd thenne ther cam with kynge Arthur sir Gawayn Agrauayne / Gaherys his bretheren / And thenne his neuewes syr Vwayn le blaunche maynys / and syr Aglouale syr Tor / sir Percyuale de galys / and syre Lamorrak de galis Thenne came sir Launcelot du lake with his bretheren neuews and cosyns as sir Lyonel / sir Ector de marys / syr bors de ganys and sir Galyhodyn / syre Galihud and many moo of syre Launcelots blood and syre Dynadan / sir la coote male tayle / his broder a good knyghte / and sir Sagramore a good knyȝt Page  257 [leaf 129r] And al the most party of the round table / Also ther cam with kynge Arthur these knyghtes the kynge of Ireland / kynge Agwysaunce / and the kyng of Scotland kyng Carados and kynge Vryens of the londe of gore and kyng Bagdemagus and his sone syr Melyaganus and syr Galahault the noble prynce / Alle these kynges prynces and Erles Barons and other noble knyghtes / as syre Braundyles / syre Vwayne les auowtres / and syre kay / syr Bedeuere / syr Melyot de logrys syr Petypase of wynkelsee / syr Godelake / alle these came with kynge Arthur and moo that can not ben reherced /

¶ Now leue we of these kynges and knyghtes / and lete vs speke of the grete araye that was made within the castel and aboute the castel for bothe partyes / the lady Dame Lyones ordeyned grete aray vpon her party for her noble knyghtes for al maner of lodgyng and vytaille that cam by land & by water that ther lacked no thynge for her party nor for the other but there was plente to be had for gold and syluer for kynge Arthur and his knyghtes / And thenne ther cam the herbegeours from kynge Arthur for to herberowe hym & his kynges / dukes Erles Barons and knyghtes / And thenne syr Gareth prayd dame Lyones and the reed knyghte of the reed laundes / and syr Persant and his broder / and syre Gryngamor that in no wyse ther shold none of them telle not his name and make no more of hym than of the leest knyghte that there was / for he said I wille not be knowen of neyther more ne lesse / neyther at the begynnynge neyther at the endynge

¶ Thenne Dame Lyones said vnto syr Gareth / syre I wylle lene you a rynge / but I wold pray you as ye loue me hertely lete me haue it ageyne whanne the turnement is done /

¶ For that rynge encreaceth my beaute moche more than it is of hym self / And the vertu of my rynge is that / that is grene it will torne to reed / and that is reed it wil torne is lykenes to grene / And that is blewe it wil torne in lykenes of whyte / and that is whyte it wil torne in lykenes to blewe / and so it wil doo of al manere of colours / Also who that bereth my rynge / shalle lese no blood / and for grete loue I will gyue you thys rynge / Gramercy said syr Gareth myn own lady / for this rynge is passynge mete for me / for it wille torne al manere of Page  258 [leaf 129v] lykenes that I am in / and that shalle cause me that I shall not be knowen / Thenne syr Gryngamor gaf syr Gareth a bay courser that was a passyng good hors / Also he gafe hym good armoure and sure and a noble swerd that somtyme syre Gryngamors fader wanne vpon an hethen Tyraunt / And soo thus euery knyghte made hym redy to that turnement & kyng Arthur was comen two dayes to fore thassumpcion of our lady / And there was al maner of Royalte of al mynstralsye / that myghte be founde / Also there cam quene Gweneuer and the quene of Orkeney syr Gareths moder / And vpon the assumpcion day whanne masse and matyns were done there were herowdes with trompettes commaunded to blowe to the feld And soo there came oute syr Epynogrus the kynges sone of Northumberland from the castel / and there encountred with hym syre Sagramor le desyrus / and eyther of hem brake their speres to their handes / And thenne came in syre Palamydes oute of the Castel / and there encountred with hym Gawayne and eyther of hem smote other so hard that bothe the good knyghtes and their horses felle to the erthe / And thenne knyghtes of eyther party rescowed their knyghtes / And thenne cam in syr Safere and syre Segwarydes bretheren to syre Palamydes / and there encountred syr Agrauayne with syr Safere and syr Gaherys encountred with syre Segwarydes / So syr Safere smote doune Agrauayne syr Gawayns broder / and sir Segwarydes syr Saferys broder And syr Malgryne a knyȝt of the Castel encountred with syr Vwayne le blaunche maynys / And there syre Vwayne gaf syr Malgryn a falle / that he had almost broke his neck

¶ Capitulum xxix

THenne syr Bryan de les yles and Grummore grummorssum knyghtes of the Castel with syre Aglouale and syre Tor smote doun syr Gromere Gromorson to the erth Thenne cam in syr Carados of the dolorous toure / & syr Turquyne knyghtes of the Castel / and there encoūtred with hem syr Percyuale de galys & syr Launcelot de galys / that were two bretheren / And there encountred syr Percyuale with syre Page  259 [leaf 130r] Caradus / and eyther brake their speres vnto their handes / & thenne syr Turquyn with syre Lamerak / and eyther of hem smote doune others hors and alle to the erthe / and eyther partyes rescowed other / and horsed them ageyn / And syr Arnold and syr Gautere knyghtes of the castel encountred with syre Braundyles and syr kay / and these four knyghtes encountred myghtely / and brake their speres to their handes / Thenne came in syr Trystram / syre Saduk / and syre Dynas knyghtes of the castel / and there encountred syr Trystram wyth syre Bedyuere / and there syr Bedyuere was smyten to the erthe bothe hors and man / And syr Saduk encountred with sir Petypase / and there syr Saduk was ouerthrowen / And there Vwayne les auoutres smote doune syr Dynas the seneschal / Thenne came in syr Persaunt of Inde a knyght of the castel And there encountred with hym syr Launcelot du lake / and there he smote syr Persaunts hors and man to the erthe / thenne came syr Pertylope from the castel / and there encountred with hym syr Lyonel / and there syr Pertylope the grene knyght smote doune syr Lyonel broder to syr Laūcelot / All this was marked by noble heroudes / who bare hym best / and theire names / And thenne came in to the feld syre Perymones the grene knyght syr Persaunts broder that was a knyght of the Castel / and he encountred with syr Ector de marys / and eyther smote other so hard / that bothe their horses and they felle to the erthe / And thenne came in the reed knyght of the reed laundes and syr Gareth from the castel / and there encountred with hem syr Bors de ganys and syr Bleoberys / and there the reed knyghte and syr Bors smote other so hard that her speres brast and their horses felle grouelynge to the erthe Thenne syr Blamor brake his spere vpon syr Gareth / but of that stroke syr Blamor felle to the erthe / whan syr Galyhoudyn sawe that / he bad sir gareth kepe hym / & sire gareth smote hym to the erthe / thenne sire Galyhud gate a spere to auenge his broder / & in the same wyse sir gareth serued hym / & sir Dynadan & his broder la cote male tayle / & sir Sagramor desirus & sir Dodynas le saueage / All these he bare doun with one spere / Whan kyng Aguysaūce of Irland sawe syr Gareth fare so he merueiled what he myȝt be þt one tyme semed grene & another Page  260 [leaf 130v] tyme at his ageyne comyng he semed blewe / And thus at euery cours that he rode to and fro he chaunged his colour so that ther myghte neyther kynge nor knyghte haue redy congnyssaunce of hym / Thenne syr Anguyssaunce the kyng of Irland encountred with syr Gareth / and there syr Gareth smote hym from his hors sadyl and all / And thenne came kyng Caradus of Scotland and syr Gareth smote hym doun hors and man / And in the same wyse he serued kyng Vryens of the land of Gore / And thenne came in syr Bawdemagus / and syr Gareth smote hym doune hors and man to the erthe And Bawdemagus sone Melyganus brake a spere vpon sir Gareth myghtely and knyghtely / And thenne syr Galahaut the noble prynce cryed on hyghe knyghte with the many colours wel hast thou Iusted / Now make the redy that I maye Iuste with the / Syre Gareth herd hym / and he gat a grete spere / and soo they encountred to gyder / and there the prynce brake his spere / But syr Gareth smote hym vpon the lyfte syde of the helme / that he relyd here and there / and he had falle doune had not his men recouerd hym / Soo god me help sayd kynge Arthur that same knyght with the many colours is a good knyghte / wherfor the kynge called vnto hym syr Launcelot and praid hym to encountre with that knyghte / Syr said Launcelot I may wel fynde in my herte for to forbere hym as at this tyme / for he hath hadde trauail ynough this day / & whan a good knyghte doth soo wel vpon somme day / it is no good knyghtes parte to lette hym of his worship / And namely whan he seeth a Knyght hath done soo grete labour / for peraduenture said syr Launcelot his quarel is here this day / & perauentur he is best byloued with this lady of al that ben here / for I see wel / he payneth hym & enforceth hym to do grete dedes / & therfor said syr launcelot as for me this day he shall haue the honour / though it lay in my power to put hym fro it / I wold not

¶ Capitulum xxx

THenne whanne this was done / there was drawynge of swerdes / And thenne there began a sore turnement Page  261 [leaf 131r] And there dyd syr Lamerak merueyllous dedes of armes / & betwixe syr Lamerak and syre Ironsyde that was the reed knyghte of the reed laūdes there was strong batail / & betwix syre Palamides & Bleoberys there was a strong batail / & sir Gawayne and syr Trystram mette / and there syr Gawayne had the werse / for he pulled syre Gawayne from his hors / And there he was long vpon foote and defouled / Thenne cam in syr Launcelot and he smote syr Turquyne / and he hym / & thenne came syr Caradus his broder / and bothe at ones they assayled hym / & he as the moost noblest knyght of the world worshipfully foughte with hem bothe / that al men wondred of the noblesse of syr launcelot / And thenne came in syr Gareth and knewe that it was sir launcelot that fought with tho two peryllous knyghtes / And thenne syr Gareth came with his good hors and hurtled hem in sonder / & no stroke wold he smyte to syr Launcelot / that aspyed sir launcelot & demed it shold be the good knyghte syre Gareth / & thenne syr Gareth rode here and there / & smote on the ryght hand & on the lyfte hand that alle the folke myghte wel aspye where that he rode / and by fortune he mette with his broder syr Gawayn / and there he put syr Gawayne to the werse / for he put of his helme / and so he serued fyue or syxe knyghtes of the rounde table that alle men said / he put hym in the most payne / and best he dyd his deuoyr / For whan syr Trystram beheld hym how he fyrst Iusted and after foughte so wel with a swerd / Thenne he rode vnto syr Ironsyde and to syre Persaunt of ynde and asked hem by their feythe / what maner a knyghte is yonder knyght that semeth in soo many dyuerse colours / Truly me semeth sayd Trystram that he putteth hym self in grete payne for he neuer ceaseth / Wote ye not what he is sayd syr Ironsyde / No said syr Trystram / thenne shal ye knowe that this is he that loueth the lady of the castel and she hym ageyne / and this is he that wanne me whan I byseged the lady of this castel / and this he that wanne syr Persaunt of ynde / and his thre bretheren / what is his name sayd syr Trystram and of what blood is he come / he was called in the courte of kyng Arthur Beaumayns / but his ryȝt name is sir Gareth of Orkeney broder to sir Gawayn / by my hede said sir Tristram he is a good kniȝt Page  262 [leaf 131v] knyght and a bygge man of armes / & yf he be yong he shalle preue a ful noble knyghte / he is but a child they all saide & of syr Launcelot he was made knyȝt / therfor is he mykel the better said Trystram / And thenne syr trystram / syr Ironsyde / syr Persaunt and his broder rode to gyders for to helpe sir gareth / & thenne there were gyuen many strong strokes / And thenne syr Gareth rode oute on the one syde to amende his helme / & thenne said his dwerf take me your ryng that ye lese it not whyle that ye drynke / And so whan he had dronken he gat on his helme / & egerly took his hors & rode in to the felde & lefte his rynge with his dwerf / and the dwerf was gladde the ryng was from hym / for thenne he wist wel he shold be knowen And thenne whan syr Gareth was in the felde all folkes sawe hym wel / & playnly that he was in yelowe colours / & there he rassyd of helmes & pulled doun knyȝtes that kynge Arthur had merueylle what knyȝt he was / for the kyng sawe by his here that it was the same knyght

¶ Capitulum xxxj

BVt by fore he was in so many colours and now he is but in one colour that is yelowe / Now goo said kyng Arthur vnto dyuerse heroudes and ryde aboute hym & aspye what maner knyghte he is / for I haue speryd of many knyghtes this day that ben vpon his party / and all saye they knowe hym not / And so an heroude rode nyhe Gareth as he coude / and there he sawe wryten aboute his helme in golde / This helme is syr gareth of Orkeney / Thenne the heroude cryed as he were wood / & many heroudes with hym / This is syre gareth of Orkeney in the yelowe armes that by all kynges and knyghtes of Arthurs beheld hym & awayted / & thenne they pressyd al to beholde hym / & euer the heroudes cryed this is syre gareth of Orkeney kyng Lots sone / and whan syr gareth aspyed that he was discoueryd / thenne he doubled his strokes / & smote doune syr Sagramore & his broder sir gawayn / O broder saide sir gawayn I wende ye wolde not haue stryken me / so whan he herd hym say so he thrang here & there / & so with grete payne he gat out of the prees / and there he mette with his dwerf / O boye said syr gareth thou hast begyled me foule this day that thou kepte my rynge / Gyue it me anone ageyn that Page  263 [leaf 132r] I may hyde my body with al / and soo he tooke it hym / And thenne they all wist not where he was become / and syr Gawayn had in maner aspyed where syr Gareth rode / and thenne he rode after with alle his myghte / that aspyed syr Gareth and rode lyghtely in to the forest that syr Gawayn wist not where he was become / And whan syr Gareth wyst that syr Gawayn was past / he asked the dwerf of best counceil / Syr said the dwerf / me semeth it were best now that ye are escaped fro spyeng that ye send my lady dame lyones her rynge / It is wel aduysed said syr Gareth / now haue it here and bere it to her / And saye that I recommaunde me vnto her good grace / and saye her I will come whan I maye / and I pray her to be true and feythful to me as I wil be to her / Syr said the dwerf it shal be done as ye commaunde / and soo he rode his waye and dyd his eraund vnto the lady / Thenne she said where is my knyghte syr Gareth / Madame said the dwerf he bad me saye / that he wold not be long from you /

¶ And soo lyghtely the dwerf cam ageyne vnto syr Gareth that wold ful fayne haue had a lodgyng / for he had nede to be reposed / And thenne felle there a thonder and a rayne as heuen and erthe shold goo to gyder / And syr Gareth was not a lytyl wery / for of al that day he had but lytel rest neyther his hors nor he / So this syr Gareth rode soo longe in that forest vntyl the nyghte came And euer it lyghtned and thondred as it had ben woode At the last by fortune he came to a Castel / and there he herd the waytes vpon the wallys

¶ Capitulum xxxij /

THenne syr Gareth rode vnto the barbycan of the castel / and praid the porter fayr to lete hym in to the castel / The porter ansuerd vngoodely ageyne / and saide thow getest no lodgyng here / Fayr syr say not soo for I am a knyȝte of kynge Arthurs / & pray the lord or the lady of this castel to gyue me herberow for the loue of kynge Arthur / Thenne the porter wente vnto the duchesse / and told her how ther was a knyghte of kyng Arthurs wold haue herberowe / lete hym in said the duchesse / for I wille see that knyghte / And for kyng Arthurs sake he shalle not be herberoules /

¶ Thenne she yode vp in to a toure ouer the gate with greete torche lyght / whan sir Gareth sawe that torche lyghte he cryed Page  264 [leaf 132v] on hyhe whether thou be lord or lady gyaunt or champyon I take no force so that I may haue herberowe this nyghte / & yf hit so be that I must nedes fyghte / spare me not to morne when I haue restyd me for bothe I and myn hors ben wery / Syr knyghte said the lady thou spekest knyghtly and boldly / but wete thou wel the lord of this castel loueth not kyng Arthur / nor none of his court / for my lord hath euer ben ageynst hym and therfor thou were better not to come within this castel / For and thou come in this nyghte / thou must come in vnder suche fourme that where someuer thou mete my lord by styȝ or by strete / thou must yelde the to hym as prysoner / Madame said syre Gareth what is your lord and what is his name / syr my lordes name is the duke de la rouse / wel madame said syr Gareth I shal promyse yow in what place I mete your lord I shalle yelde me vnto hym and to his good grace with that I vnderstande he wille do me no harme / And yf I vnderstand that he wille I wil releace my self and I can with my spere and my swerd / ye say wel said the duchesse / and thenne she lete the drawe brydge doune / and soo he rode in to the halle / and there he alyghte / and his hors was ledde in to a stable / & in the halle he vnarmed hym / & saide madame I will not oute of this holle this nyghte / And whan it is daye lyght / lete see / who wil haue adoo with me / he shal fynde me redy / Thenne was he sette vnto souper / and had many good dysshes / thenne syr Gareth lyst wel to ete / and knyghtely he ete his mete / and egerly / there was many a fair lady by hym / & some said they neuer sawe a goodlyer man nor so wel of etynge / thenne they made hym passyng good chere / & shortly whan he had souped his bedde was made there so he rested hym al nyghte / And on the morne he herd masse & brake his fast & toke his leue at the duchesse / & at them al / & thanked her goodely of her lodgyng & of his good chere / & thenne she asked gym his name / Madame he saide truly my name is Gareth of Orkeney / & some men calle me Beaumayns / thēne knewe she wel it was the same knyȝt that fouȝt for dame lyones / so sir gareth departed & rode vp in to a montayne / & ther mette hym a knyghte / his name was syr Bendelayne and sayd to syr Gareth thou shalt not passe this way / for outher thou shalt Iuste with me or Page  265 [leaf 133r] els be my prysoner / Thenme wille I Iuste said syr Gareth / And soo they lete their horses renne / and there syr Gareth smote hym thorou oute the body / and syr Bendalyne rode forth to his castel there besyde and there dyed / So syr gareth wold haue rested hym / and he cam rydynge to Bendalaynis castel / Thenne his knyghtes and seruauntes aspyed that it was he that had slayne their lord / Thenne they armed xx good men and cam out and assailled syr gareth / and soo he had no spere but his swerd / and put his shelde afore hym / and there they brake their speres vpon hym / and they assailled hem passyngly sore / But euer syr gareth deffended hym as a knyght

¶ Capitulum xxxiij

SOo whan they sawe that they myghte not ouercome hym / they rode from hym / and took their counceylle to slee his hors / and soo they cam in vpon syr gareth / and with speres they slewe his hors / and thenne they assailled hym hard But whan he was on foote / there was none that he raughte but he gaf him suche a buffet that he dyd neuer recouer / So he slewe hem by one and one tyl they were but foure / and there they fledde / and sire gareth took a good hors that was one of theirs and rode his waye / Thenne he rode a grete paas til that he came to a castel and there he herd moche mornynge of ladyes and gentylwymmen / so ther cam by hym a page / what noyse is this said syr gareth that I here within this castel / Syre knyghte said the page here ben within this castel thyrtty ladyes and alle they be wydowes / For here is a knyght that wayteth dayly vpon this castel / and his name is the broun knyght withoute pyte / and he is the perylloust knyght that now lyueth / And therfor sir said the page I rede you flee / Nay said sir gareth I wille not flee though thou be aferd of hym / And thenne the page sawe where came the broune knyghte / loo said the page yonder he cometh / lete me dele with hym said syre gareth / And whan eyther of other had a syghte they lete theyr horses renne / and the broune knyghte brake his spere and sir gareth smote hym thorou oute the body that he ouerthrewe hym to the ground stark dede / So sir gareth rode in to the castel & praid the ladyes þt he myȝt repose hym / allas said the ladyes ye may not be lodged here / make hym good chere said the page Page  266 [leaf 133v] for this knyghte hath slayne your enemy / thenne they al made hym good chere as laye in their power / But wete ye wel they maade hym good chere for they myghte none otherwyse doo for they were but poure / And so on the morne he wente to masse / and there he sawe the thyrtty ladyes knele / and lay grouelyng vpon dyuerse tombes makynge grete dole and sorowe / Thenne syr Gareth wyst wel that in the tombes lay theire lordes / Fayre ladyes said syr Gareth ye must at the next feeste of Pentecost be at the court of kynge Arthur / and saye that I syr Gareth sente you thyder / we shal doo this said the ladyes Soo he departed / and by fortune he came to a mountayne / & there he found a goodely knyght that badde hym abyde syr knyghte and Iuste with me / what are ye said syr Gareth / My name is said he the duke de la rowse / A syr ye ar the same knyghte that I lodged ones in your Castel / And there I made promyse vnto your lady that I shold yelde me vnto yow A said the duke arte thou that proud knyghte that proferest to fyghte with my knyghtes / therfore make the redy for I wil haue adoo with you / Soo they lete their horses renne / and ther syr Gareth smote the duke doune from his hors / But the duke lyghtly auoyded his hors / and dressid his shelde and drewe his swerd / and bad syr Gareth alyghte and fyghte with hym / Soo he dyd alyghte / and they dyd grete batail to gyders more than an houre / and eyther hurte other ful sore / Att the last sir Gareth gat the duke to the erthe / and wold haue slayn hym / and thenne he yelded hym to hym / Thenne must ye goo said sir Gareth vnto syr Arthur my lord at the next feest and saye that I sir Gareth of Orkeney sente you vnto hym / hit shal be done said the duke / and I wil doo to yow homage and feaute with an C knyȝtes with me / and alle the dayes of my lyf to doo you seruyse where ye wille commaunde me /

¶ Capitulum xxxiiij

SOo the duke departed / and sir Gareth stode there alone and there he sawe an armed knyght comyng toward hym / Thenne syre Gareth toke the dukes shelde / and Page  267 [leaf 134r] mounted vpon horsbak / and soo withoute bydyng they ranne to gyder as it had ben the thonder / And there that knyȝt hurt syr Gareth vnder the syde with his spere / And thenne they alyghte / and drewe their swerdes / and gafe grete strokes that the blood trayled to the ground / And soo they foughte two houres / At the last there came the damoysel Lynet that somme men calle the damoysel saueage / and she came rydynge vpon an ambelynge meule / and there she cryed al on hyghe / syr Gawayne syr Gawayne leue thy fyghtynge with thy broder syre Gareth / And whan he herd her saye soo he threwe aweye hys shelde and his swerd / and ranne to syre Gareth / and tooke hym in his armes / and sythen kneled doune and asked hym mercy / What are ye said syr Gareth that ryght now were soo stronge and soo myghty / and now so sodenly yelde you to me O Gareth I am your broder syr Gawayn that for youre sake haue had grete sorou and labour / Thenne syr Gareth vnlaced his helme / and knelyd doune to hym / and asked hym mercy / thenne they rose both and enbraced eyther other in their armes and wepte a grete whyle or they myghte speke / and eyther of hem gaf other the pryce of the bataille / And there were many kynde wordes bitwene hem / Allas my faire broder said sir gawayn perde I owe of ryghte to worshippe you / and ye were not my broder / for ye haue worshipped kyng Arthur and all his courte / for ye haue sente me mo worshipful knyghtes this twelue moneth than syxe the best of the round table haue done excepte sir Launcelot / Thenne cam the damoysel saueage that was the lady Lynet that rode with sir gareth soo longe / and there she dyd staunche sir gareths woundes / and sir gawayns Now what wille ye doo said the damoysel saueage / me semeth that it were wel do þt Arthur had wetyng of you both for your horses are soo brysed that they may not bere / Now faire damoysel said syr Gawayne / I praye you ryde vnto my lord myn vnkel kynge Arthur / and telle hym what aduenture is to me betyd here / and I suppose he wille not tary long / Thenne she tooke her meule and lyghtly she came to kynge Arthur / that was but two myle thens / And whan she had told hym tydynges the kynge bad gete hym a palfroy /

¶ And whan he was vpon his bak he badde the lordes and ladyes come after who Page  268 [leaf 134v] that wold / and there was sadelyng and brydelyng of quenes horses and prynces horses / & wel was hym that soonest myght be redy / Soo whan the kynge came there as they were he sawe syr Gawayn and syr Gareth sytte vpon a lytel hylle syde / & thenne the kynge auoyded his hors / And whanne he cam nyghe syre Gareth / he wold haue spoken but he myghte not / and therwith he sanke doune in a swoune for gladnesse / and soo they starte vnto theyr vnkyl / and requyred hym of his good grace to be of good comforte / Wete ye wel the kyng made grete ioye and many a pyteous complaynte he made to syr Gareth / And euer he wepte as he had ben a chyld / With that cam his moder the quene of Orkeney dame Morgause / And whan she sawe syr Gareth redely in the vysage she myghte not wepe but sodenly felle doun in a swoune / and lay there a grete whyle lyke as she had ben dede / And thenne syr Gareth recomforted his moder in suche wyse that she recouerd and made good chere / Thenne the kynge commaunded that al maner of knyghtes that were vnder his obeissaunce shold make their lodgyng ryght there for the loue of his neuewes / And soo it was done and al manere of purueaunce purueyd that ther lacked nothyng that myghte be goten of tame nor wylde for gold or syluer / And thenne by the meanes of the damoysel Saueage syr Gawayne and syr Gareth were heled of their woundes / and there they soiourned eyght dayes / Thenne said kyng Arthur vnto the damoysel saueage I merueylle that your syster Dame Lyones cometh not here to me / and in especyal that she cometh not to vysyte her knyghte my neuewe syre Gareth that hath had soo moche trauaille for her loue / My lord said the damoysel Lynet ye must of your good grace hold her excused / For she knoweth not that my lord syr Gareth is here / Go thēne for her said kynge Arthur that we may be apoynted what is best to done accordyng to the plesyr of my neuewe / Syr said the damoysel that shal be done / and soo she rode vnto her syster / And as lyghtely as she myght made her redy & she cam on the morne with her broder syr Gryngamor / and with her xl knyȝtes / And so whan she was come she had alle the chere that myghte be done bothe of the kynge and of many other kynges and quenes Page  269 [leaf 135r]

¶ Capitulum xxxv

ANd amonge alle these ladyes she was named the fayrest and pyereles / Thenne whanne syr Gawayn sawe her / there was many a goodely loke and goodely wordes that alle men of worship had ioye to beholde them / Thenne cam kynge Arthur and many other kynges and dame Gweneuer & the quene of Orkeney / And there the kyng asked his neuew syre Gareth whether he wold haue that lady as peramour or to haue her to his wyf / My lord wete yow wel that I loue her aboue al ladyes lyuynge / Now fayre lady said kyng Arthur what say ye / Moost noble kynge said dame Lyones wete yow wel that my lord syr Gareth is to me more leuer to haue and welde as my husband than ony kyng or prynce that is crystened / and yf I maye not haue hym I promyse yow I wylle neuer haue none / For my lord Arthur sayd dame Lyones wete ye wel he is my fyrst loue and he shal be the laste / And yf ye wil suffre hym to haue his wyl and free choyse I dare saye he wylle haue me / That is trouthe said syr Gareth / And I haue not you and weld not you as my wyf / there shal neuer lady ne gentylwoman reioyce me / What neuewe said the kynge is the wynde in that dore / for wete ye wel I wold not for the stynte of my croune to be causar to withdrawe your hertes / And wete ye wel ye con not loue so wel but I shal rather encrease hit than dystresse hit / And also ye shal haue my loue and my lordship in the vttermest wyse that may lye in my power / And in the same wyse said sir Gareths moder / thenne there was made a prouysyon for the day of maryge / and by the kynges aduyse it was prouyded that it shold be at Mychelmas folowyng at kynkenadon by the see syde / for ther is plentyful countrey / And soo it was cryed in al the places thurgh the royamme / And thenne syr Gareth sent his somones to alle these knyghtes and ladyes that he had wonnen in batail to fore that they shold be at his day of maryage at kynkenadon by the sandys / And thenne dame Lyones and the damoysel Lynet with syr Gryngamor rode to theire castel / and a goodely and a ryche rynge she gaf to syr Gareth / and he gaf her another / And kyng Arthur gaf her a ryche bee of Page  270 [leaf 135v] gold / and soo she departed / and kyng Arthur and his felauship rode toward Kynkenadon / and syr Gareth broughte his lady on the way / & so cam to the kyng ageyne and rode with hym / Lord the grete chere that syr launcelot made of sir Gareth and he of hym / for there was neuer no knyght that syr gareth loued so wel as he dyd syr Launcelot / and euer for the most party he wold be in syr launcelots company / for after syr Gareth had aspyed sir Gawayns condycions he withdrewe hym self fro his broder syr Gawayns felauship / for he was vengeable / and where he hated he wold be auengyd with murther and that hated syr gareth

¶ Capitulum xxxvj

SOo hit drewe faste to Mychelmas / and thyder came dame Lyones the lady of the castel peryllous and her syster dame Lynet with syre gryngamor her broder with hem / For he had the conduyte of these ladyes / And there they were lodged at the deuyse of kyng Arthur / And vpon mychelmas day the Bisshop of Caunterbury made the weddyng betwixe syr gareth and the lady Lyones with grete solempnyte / and kyng Arthur made gaherys to wedde the damoysel saueage / that was dame Lynet / and kyng Arthur made syr Agrauayne to wedde dame Lyones nees a fayr lady / her name was dame Laurel / And so whan this solemnacion was done / thenne came in the grene knyghte syr Pertylope with thyrtty knyghtes / and there he dyd homage and feaute to syr gareth and these knyghtes to hold of hym fro euermore / Also sir Pertilope said I pray you that at this feest I maye be your chamberlayne / with a good wil said syr gareth / syth it lyketh you to take soo symple on offyce / Thenne come in the reed knyghte with thre score knyghtes with hym / and dyde to syr Gareth homage and feaute / and alle tho knyghtes to hold of hym for euermore / And thenne this syr Perymonyes praide sir gareth to graunte hym to be his chyef botteler at that hyghe feest I wil wel saide sir gareth that ye haue this offyce and it were better / Thenne came in syr Persant of Inde with an C knyghtes with hym / and there he dyd homage and feaute / and Page  271 [leaf 136r] al his knyghtes shold doo hym seruyse / and hold their londes of hym for euer / and there he prayd syr Gareth to make hym his Sewar chyef at the feest / I wil wel said syr Gareth that ye haue it & it were better / Thenne cam the dukde la rowse with an C knyghtes with hym / and there he dyd homage and feaute to syr Gareth / and soo to hold theire londes of hym for euer / And he requyred syr Gareth that he myght serue hym of the wyn that day at that feest / I wil wel sayd syr Gareth and it were better / Thenne came in the reed knyȝte of the reed laundes that was syr Ironsyde / and he broughte with hym thre honderd knyghtes / and there he dyd homage & feaute / and al these knyghtes to hold their landes of hym for euer / And thenne he asked syr Gareth to be his keruer / I will wel said syr Gareth and it please you / Thenne came in to the courte thyrtty ladyes / and alle they semed wydowes / and tho thyrtty ladyes broughte with hem many fayre gentylwymmen / And alle they kneled doune at ones vnto kyng arthur and vnto syr Gareth / and there al tho ladyes told the kyng how syr Gareth delyuerd hem from the dolorous toure / and slewe the broune knyght withoute pyte / And therfore we and oure heyres for euermore wille doo homage vnto syr Gareth of Orkeney / So thenne the kynges and quenes / prynces & erlys Barons and many bold knyghtes wente vnto mete / & well maye ye wete there were al manere of mete plentyuously / alle manere rules and games with al manere of mynstralsy that was vsed in tho dayes /

¶ Also there was grete iustes thre dayes / But the kynge wold not suffre syre Gareth to Iuste by cause of his newe bryde / for as the fresshe book sayth that dame Lyones desyred of the kynge that none that were wedded shold Iuste at that feest / Soo the fyrst day there Iusted sir lamerak de galys / for he ouerthrewe thyrtty knyghtes / & did passyng merueillously dedes of armes / and thenne kyng Arthur made syr Persuant and his two bretheren knyghtes of the round table to their lyues ende / and gaf hem grete londes / Also the second daye there Iusted Trystram best / and he ouerthrew fourty knyghtes / and dyd there merueillous dedes of armes And there kynge Arthur made Ironsyde that was the reed knyghte of the reed laundes a knyghte of the table round to Page  272 [leaf 136v] his lyues ende / and gaf hym grete landes / The thyrd day there Iusted syr launcelot du lake / and he ouerthrewe fyfty knyghtes and dyd many merueyllous dedes of armes that all men wondred on hym / And there kynge Arthur made the duke de la rouse a knyghte of the round table to his lyues ende / and gaf hym grete landes to spende / But whan this Iustes were done / syr Lamerak and syr Trystram departed sodenly / & wold not be knowm / for the whiche kyng Arthur and all the court were sore displeasyd / And soo they helde the courte fourty dayes with grete solempnyte / And this syr Gareth was a noble knyghte and a wel rulyd and fayr langaged

¶ Thus endeth this tale of syr Gareth of Orkeney that wedded dame Lyones of the castel peryllous / And also syr Gaherys wedded her syster dame Lynet / that was called the damoysel saueage / And syr Agrauayne wedded dame Laurel a fary lady and grete and myghty landes with grete rychesse gaf with them kyng Arthur that ryally they myght lyue tyl their lyues ende


Here foloweth the viij book the which is the first book of sir Tristram de Lyones / & who was his fader & his moder / & hou he was borne and fosteyrd / And how he was made knyghte


Home -- Biography -- Morte Darthur -- Links -- Transcriptions

I -- II -- III -- IV -- V -- VI -- VII -- VIII -- IX -- X -- XI -- XII -- XIII -- XIV -- XV