(Winchester f.148v-187; Caxton VIII.1-VIII.41; Vinaver, Vol. 1, pp. 372.1-451.31; Shepherd pp. 228.1-279.45)


f. 148v (VIII.1)


Here begynnyth the fyrste boke of Syr Trystrams de

lyones And who was his fadir And hys modyr And how

he was borne and fostyrd And how he was mad^e knyȝt

of kynge Marke of Cornuayle ~//~//~//~//~//~//~//~//~//



here was a kynge that hyght Melyodas and

he was lorde of the contrey of lyones And this

Melyodas was a lykly knyght as ony was Þat

tyme lyvyng And by fortune he wedded kyng Markis sister

of Cornuayle and she was called Elyȝabeth that was cal//

led bothe good and fayre And at that tyme kynge Arthure

Regned and he was hole kynge of Ingelonde· Walys· Scot//

londe and of many othir Realmys how be hit Þer were many

kynges that were lordys of many contreyes But all they

helde Þer londys of kynge Arthure For In walys were ·ij·

kynges and In the Northe were many kynges And In Cor//

nuayle and In the weste were ·ij· kynges· Also In Irelonde

were ·ij· or ·iij· kynges and all were vndir the obeysaunce of

kynge Arthure So was Þe kynge of Fraunce And the kyng

of Bretayne and all the lordshyppis vnto Roome // So whan

this kynge Melyodas had bene with his wyff wyth In a whyle

she wexed grete with chylde and she was a full meke lady

and well she loved hir lorde and he hir agayne So Þer was

grete Joy be twyxte hem // So Þer was a lady In that contrey

that had loved kynge Melyodas longe and by no meane

she neuer cowde gete his love · There fore she lat ordayne

vppon a day as kynge Melyodas rode an huntynge for he

was a grete chacer of dere And Þer be enchauntemente she

made hym chace an harte by hym self a lone tyll that he

com to an olde castell and Þer anone he was takyn presoner

by the lady that loved hym // Whan Elyabeth kynge





f. 149 (VIII.1-2)


Melyodas his wyff myssed hir lorde she was nyȝe oute of

hir wytte And also as grete with chylde as she was she toke

a Jantylwoman with hir and ran in to the fereste suddeynly to

seke hir lorde // And whan she was farre In the foreste she

myght no farther but ryght Þer she gan to travayle faste of hir

chylde and she had many grymly throwys but hir Jantyll wo//

man halpe hir all Þat she myght And so by myracle of oure lady

of hevyn she was delyuerde with grete paynes bus she had takyn

such colde for the defaute of helpe that the depe draughtys

of deth toke hir Þat nedys she muste dye & departe oute of thys

worlde Þer was none othir boote // Whan this quene Elyȝabeth

saw that she myght nat ascape she made grete dole & seyde vnto

hir Jantylwoman whan ye se my lorde kynge Melyodas recom//

maunde me vnto hym and tell hym what paynes I endure

here for his love and how I muste dye here for his sake for de//

fawte of good helpe And lat hym wete that I am full sory to

departe oute of this worlde fro hym There fore pray hym to

be frende to my soule // Now lat me se my lytyll chylde for

whom I have had all this sorow And whan she sye hym she sey//

de thus · A my lytyll son Þou haste murtherd thy modir and there

fore I suppose Þou that arte a murtherer so yonge · Thow arte

full lykly to be a manly man In thyne ayge And by cause I shall

dye of the byrth of the I charge my Jantyll woman that she

pray my lorde the kynge Melyodas that whan he is crystened

let calle hym Trystramis that is as muche to say as a sorowfull

byrth // And Þer with the quene gaff vp the goste and dyed Than Þe

Jantyll woman leyde hir vndir an vmbir of a grete tre And Þan

she lapped the chylde as well as she myght fro colde // Ryght so

there cam Þe barowns of kynge Melyodas folowyng aftir Þe quene

And whan they sye that she was dede and vndirstode none othir

but Þat the kynge was destroyed // Than sertayne of them wolde

f. 149v (VIII.2)


haue slayne the chylde by cause they wolde haue bene lordys

of Þat contrey of lyonesse But than thorow Þe fayre speche of

the Jantyll woman and by the meanys Þat she made Þe moste

party of the barowns wolde nat assente Þer to But than they

latte cary home Þe dede quene and muche sorow was made

for hir Than this meane whyle Merlyon had delyuerde

kynge Melyodas oute of preson on the morne aftir his quene

was dede And so whan the kynge was dede com home Þe moste

party of the barowns made grete Joy // But the sorow that

the kynge made for his quene there myght no tonge tell

// So than the kynge let entyre hir rychely And aftir he let

crystyn his chylde as his wyff had commanded by fore hir

deth // And than he lette calle hym Trystrams the sorowfull

borne chylde // Than kynge Melyodas endured aftir that

vij· yere with oute a wyff And all this tyme Trystrams was

forstred well // Than hit be felle Þat the kynge Melyodas

wedded kynge Howellys of Bretaynes doughter and anone

she had chyldirne by kynge Melyodas than was she hevy

and wroth Þat hir chyldirne sholde nat reioyse Þe contrey of

Lyonesse where fore this quene ordayned for to poyson yong

Trystrams So at the laste she let poyson be put in a pees

of syluer In the chambir where Trystrams and hir chyldir we//

re to gydyrs vnto Þat entente Þat whan Trystrams were thirsty

he sholde drynke Þat drynke And so hit felle vppon a day Þe que//

nys son as he was in Þat chambir aspyed Þe pyese with poyson &

he wente hit had bene good drynke and be cause the chylde

was thirsty he toke the pyese with poyson and dranke frely &

Þer with the chylde suddaynly braste & was dede // So whan

Þe quene of Melodyas wyste of the deth of hir son wete you

well Þat she was hevy But yet Þe kynge vndirstood nothynge

of hir treson Not wythstondynge the quene wolde nat leve


f. 150 (VIII.2)


by ths but effte she lette ordeyne more poyson & putt hit

in a pyese And by fortune kynge Melodyas hir husbonde founde

Þe pyese with wyne where In was Þe poysonAnd as he Þat was

thirstelew toke the pyse for to drynke And as he wolde

haue drunken Þer of the quene aspyed hym & ran vnto hym

& pulde the pyse from hy sodeynly // The kynge mervay//

led of hir why she ded so & remembred hym suddaynly how

hir son was slayne with poyson And than he toke hir by Þe hon//

de And sayde Þou false traytoures Þou shalt telle me what maner

of drynke this is oÞer ellys I shall sle the · And Þer with he pulde

oute his swerde & sware a grete othe Þat he sholde sle hir but

yf she tolde hym Þe trouthe // A mercy my lorde she seyde and

I shall telle you all And than she tolde hym why she wolde

haue slayne Trystrams be cause her chyldir sholde reioyse

his londe // well seyde the kynge & Þer fore ye shall haue Þe

lawe And so she was dampned by the assente of Þe barownes

to be brente And ryght as she was at Þe fyre to take hir ex//

cussion this same yonge Trystrams kneled by fore his fadir

kynge Melodyas and be souȝt hym to gyff hym a doue I woll

well seyde Þe kynge · Than seyde yonge Trystrams geff me

the lyff of your quene my step modir // That is vnryghtfully

asked seyde Þe kynge Melyodas for Þou ouȝte of ryght to hate hir

for she wolde haue slayne Þe with poyson And for Þer sake thy sake

moste is my cause Þat she sholde be dede // Sir seyde Trystrams

as for Þat I be seche you of your mercy Þat ye woll for gyff hir · And as

for my parte god for gyff hir & I do And hit lyked so muche youre

hyghenesse to graunte me my boone for goddis love I requyre

you holde your promyse // Sytthen hit is so seyde Þe kynge woll

Þat ye haue hir lyff & sayde I gyff hir you And go ye to the fyre

& take hir & do with hir what ye woll // So thus Sir Trystra//

mys wente to the fyre & by the commaundemente of Þe kynge

f. 150v (VIII.2-3)


delyuerde hir frome Þe deth // But afftir Þat kynge Melodyas

wolde neuer haue a do with hir as at bedde & at bourde But by

Þe meanys of yonge Trystrams he made Þe kynge and hir

accorded But than the kynge wolde nat suffir yonge

Trystrams to a byde but lytyll In his courte // And than

he lett ordayne a Jantyll man Þat was well lerned & taught

And his name was Gouernayle And than he sente yonge Tris//

trams with Gouernayle In to Fraunce to lerne Þe langage and

nurture & dedis of armys And Þer was Trystrams more Þan

vij· yere // So whan he had lerned what he myght In tho con//

treyes than he com home to his fadir kynge Melyodas a gay//

ne And so Trystrams lerned to be an harper passyng all oÞer

Þat Þer was none suche called In no contrey And so In harpynge

and on Instrumentys of musyke In his youthe he applyed

hym for to lerne And aftir as he growed in myght & strength

he laboured In huntynge & In hawkynge neuer Jantylman

more Þat euer we herde rede of // And as Þe booke seyth he be

gan good mesures of blowynge of beestes of venery & beestes

of chaace & all maner of vermaynes And all Þe tearmys we

haue yet of hawkynge & huntynge And Þer fore the booke of

Sir Trystrams where fore as me semyth all Jantyll men

Þat beryth olde armys ought of ryght to honoure sir Trys//

trams for the goodly tearmys that Jantylmen have & vse

& shall do vnto the day of dome That Þer by In a maner all men

of worshyp may disceuer a Jantylman frome a yoman and a

yoman frome a vylayne · For he Þat Jantyll is woll drawe

hym to Jantyll tacchis & to folow Þenoble customys of Jan//

tylmen // Thus Trystrams enduryd In Cornewayle vnto

Þat he was stronge & bygge vnto Þe ayge of ·xviij· yere · And

than kynge Melyodas had grete Joy of yonge Trystrams &

so had the quene his wyff · For euer aftir in hir lyff be cause sir

f. 151 (VIII.3-4)


Trystrams saved hir frome Þe fyre she ded neuer hate hym mo//

re afftir but euer loved hym & gaff hym many grete gyfftys

for euery astate loved hym where Þat he wente // Than hit be

felle that kynge Angwysh· of Irelonde sente vnto kynge

Marke of Cornwayle for his trwayge Þat Cornuayle had pay//

de many wyntyrs And all Þat tyme kynge Marke was be hynde

of the trwayge for ·vij· yerys And kynge Marke and his ba//

rownes gaff vnto the messyngers of Irelonde thes wordis

& answere that they wolde none pay & bade the messyngers

go vnto Þer kynge Angwysh· and tell hym we woll pay hym

no trwayge but tell youre lorde & he woll all wayes have

trwayge of vs of Cornwayle Bydde hym sende a trusty

frynde knyght of his londe Þat woll fyght for his ryght and

we shall fynde a noÞer for to defende vs // So Þe messyngers

departed In to Irelonde And whan kynge Angwysh· vndyr//

stoode the answere of Þe messyngers he was wrothe And Þan

he called vnto hym Sir Marhalt Þe good knyght Þat was nobly

proved & a knyght of Þe rounde table And this Marhaltt

was broÞer vnto Þe quene of Irelonde · Than Þe kyng seyde

thus Fayre broÞer Sir Marhalt I pray you go vnto Corne//

wayle for my sake to do batayle for oure trwayge of

ryght Þat we of ryght ought to haue And what som evir

ye sp^ende ye shall haue suffyciauntely more than ye shall

nede Sir seyde Sir Marhalte wete you well Þat I shall

nat be loth to do batayle In the ryght of you & your londe

with Þe beste knyght of table rounde for I know them for the

moste party what bene Þer dedis & for to avaunce my dedis

And to encrece my worshyp I woll ryght gladly go vnto

this Journey // So In all haste Þer was made purvyaunce

for Sir Marhalte And he had all thynge Þat hym neded and

so he departed oute of Irelonde And aryved vp In Cornwayle

f. 151v (VIII.4-5)


evyn by castell of Tyntagyll And whan kynge Marke

vndirstood Þat he was Þer a ryved for to fyght for Irelonde

Than made kynge Marke grete sorow whan he vndir//

stood Þat the good knyght Sir Marhalt was com for they

knew no knyght that durste haue a do with hym For at

Þat tyme Sir Marhalte was called one of the famuste

knyghtes of the worlde And thus Sir Marhalte a bode

In the see & euery day he sente vnto kynge Marke for to

pay Þe trwayge Þat was be hynde ·vij· yere oÞer ellys to fynde

a knyght to fyght with hym for Þe trewayge This maner of

message Sir Marhalte sente vnto kynge Marke Than

they of Co^rnwayle lete make cryes that what knyght Þat

wolde fyght for to save Þe trwayge of Cornwayle he shold

be rewarded to fare Þe bettir terme of his lyff // Than som

of the barowns seyde to kynge Marke & counceyled hym

to Þe courte of kynge Arthure for to seke Sir Launcelott

du lake that was Þat tyme named for the mervaylyste

knyghtof pe worlde Than Þer were oÞer barownes & seyde

Þat hit was laboure In vayne by cause Sir Marhalte was

a knyght of rounde table Þer fore ony of hem wolde be loth

to haue a do with oÞer but yf hit were so Þat ony knyght at his

owne rekeyste wolde fyght disgysed & unknown // So Þe

kynge & all his barownes assentyd Þat hit was no boote to

seke aftir no knyght of Þe rounde table // This meane

whyle cam the langayge & Þe noyse vnto kynge Melyodas

how Þat Sir Marhalte a bode faste by Tyntagyll and how

kynge Marke cowde fynde no maner of knyght to fyght

for hym // So whan yonge Trystrams of herde of thys

he was wroth & sore a shamed that Þer durste no knyght

in Cornwayle durste haue a do with Sir Marhalte of Ire//

londe There with all Trystrams wente vnto his fadir


f. 152 (VIII.5)


kynge Melyodas and asked hym counceyle what was

beste to do for to recovir Cornwayle frome bondage for

as me semyth seyde Trystrams hit were shame that Sir

Marhalte the quenys broÞer of Irelonde sholde go a way

onles Þat he were foughtyn with all As for Þat seyde kynge

Melyodas wete you well sonne Trystramys that Sir

Marhalte ys called one of Þe beste knyghtes of Þe worlde And

Þer fore I know no knyght in this contrey is able to macche

hym Alas seyde Sir Trystrams that I were nat made

knyght And yf Sir Marhalte sholde thus departe In to Ire//

londe god let me neuer haue worshyp And Sir seyde Tris//

trams I pray you gyff me leve to ryde to kynge Marke and

so ye woll nat be displesed of kynge Marke woll I be made

knyght I woll well seyde kynge Melyodas that ye be ruled

as youre corrage w woll rule you // Than Trystrams

thanked his fadir And than he made hym redy to ryde In

to Cornwayle // So in the meane whyle Þer com lettyrs of

love fro kynge Faramon of Fraunces doughter vnto Syr                     

Trystrams that were petevous lettyrs but in no wyse                          

Trystrams had no Joy of hir lettyrs nor regarde vnto hir                     

Also she sente hym a lytyll brachet Þat was passynge fayre                

But whan Þe kynges doughter vndirstoode that Trystrams                  

wolde nat love hir as Þe booke seyth ·she dyed And than the            

same squyre Þat brought Þe lettyrs & Þe brachet cam a yen

vnto Sir Trystrams as aftir ye shall In Þe booke tale folo//

wynge So aftir this yonge Trystrames rode vnto hys

eme kynge Marke of Cornwayle And whan he com there

he herde sey Þat Þer wolde no knyght fyght with Sir Marhalt

what ar ye seyde the kynge & frome whens be ye com · sir

seyde Trytrams yf ye woll gyff me Þe ordir of knyth knyȝt//

hode I woll do batayle with Sir Marhalte what ar ye seyde

f. 152v (VIII.5)


the kynge and frome whens be ye com Sir seyde Trys//

trames I com frome kynge Melyodas Þat wedded your systir

and a Jantylman wete you welle I am So kyng Marke

be hylde Trystrams and saw Þat he was but a yonge man

of ayge but he was passyngly well made & bygge // Fay//

re sir seyde Þe kynge what is your name & where were

ye borne Sir my name is Trystrams and in Þe contrey

of lyonesse was I borne ye sey well seyde Þe kynge And

yf ye woll do this batayle I shall make you knyght There

fore cam I to you seyde Trystrams and for none oÞer cause

But than kynge Marke made hym knyght And Þer with all

anone as he had made hym knyght he sente vnto Sir Mar//

halte that he had founde a yonge knyght redy for to take

Þe batayle to the vtteraunce // hit may well be so seyde sir

Marhalte But tell kynge Marke I woll nat fyght with no

knyght but he be of blood royall that is to seye owÞer kynges

son othir quenys son borne of Pryncis oÞer of pryncesses

// Whan kynge Mr Marke vndirstoode Þat he sente for sir

Trystrams de lyones and tolde hym what was Þe answe//

re of Sir Marhalte Than seyde Sir Trystrams sytthen

Þat he seyth so lat hym wete Þat I am commyn of fadir syde and

modir syde of as noble bloode as he is // For sir now shall

ye know that I am kynge Melyodas sonne borne of youre

owne Sistir dame Elyȝabeth that dyed in Þe foreste in Þe

byrth of me // A Jhu seyde kynge Marke ye ar welcom

fayre nevew to me Than In all Þe haste the kynge horsed

Sir Trystrams and armed hym on Þe beste maner that

myght be gotyn for golde othir syluer // And than kynge

Marke sente vnto Sir Marhalte and dud hym to wete

that a bettir man borne than he was hym self sholde fyȝt

with hym And his name ys Sir Trystrams de lyones be

f. 153 (VIII.5-6)


gotyn of kynge Melyodas and borne of kynge Markys

sistir Than was Sir Marhalte gladde & blyeth Þat he sholde

feyght with suche a Jantylman And so by Þe assente of kynge

Marke they lete ordayne Þat they sholde fyght with In an Ilonde

nyȝe Sir Marhaltes shyppis And so was Sir Trystrames

put in to a vessell bothe his horse & he and all that to hym

longed bothe for his body & for his horse Þat he lacked no thyng

// And whan kynge Marke and his barownes of Cornwayle

be helde how yonge Sir Trystrams departed with suche a ca//

ryage to feyght for the ryght of Cornwayle // There

was noÞer man noÞer woman of worshyp but they wepte

to se & vndirstonde so yonge a knyght to Jouparte hym self

for theire ryght // So to shortyn this tale whan Syr

Trystrams a ryved with In the Ilonde he loked to the farÞer

syde & Þer he sawe at an ankyr ·vi· othir shyppis nyȝe to the

londe And vndir Þe shadow of Þe shyppys vppon the londe Þer

hoved Þe noble knyght Sir Marhalte of Irelonde Than

Sir Trystrams commaunded to haue his horse vppon the

londe // And than Gouernayle his servaunte dressed hys

harneys at all maner of ryghtes And than Sir Trystrams

mounted vppon his horse And whan he was In his sa//

dyll well apparayled & his shylde dressed vppon his shol//

dir So Sir Trystrams asked Gouernayle where is this

knyght Þat I shall haue a do with all Sir seyde Gouernayle

se ye hym nat I wente Þat ye had sene hym for yondir he

hovyth vndir Þe vmbir of his shyppys on horse back with

his spere In his honde & his shylde vppon his sholdyr

That is trouthe seyde Sir Trystrams now I se hym //

// Than he commaunded Gouernayle to go to his vessayle a

gayne & commaunde me vnto myne Eme kynge Marke

and pray hym yf Þat I be slayne In this batayle for to

f. 153v (VIII.6-7)


entere my body as hym semyth beste And as for me lette

hym wete I woll neuer be yoldyn for cowardyse And if

I be slayne & fle nat they haue loste no trewayge for me

And yf so be Þat I fle oÞer yolde me as recreaunte bydde myne

Eme bury me neuer in crystyn buryellys And vppon thy lyff

seyde Sir Trystrams vnto Govirnayle that Þou com nat

nyȝe this Ilonde tyll Þat Þou see me ouercom or slayne oÞer

ellis Þat I wynne yondir knyght So they departed sore wepyng

And than Sir Marhalte avysed Sir Trystrames

And seyde thus yonge knyght Sir Trystrams

what doste Þou here me sore repentys of thy corrayge

for wete Þou well I haue bene assayede with many noble

knyghtes And Þe beste knyghtes of this londe haue bene

assayed of myne hondys And also Þe beste knyghtes of

Þe worlde I haue macched them And there fore be my

counceyle returne a yen vnto thy vessell // A fayre

knyght & well preved seyde Sir Trystrams Þou shalt

well wete I may nat for sake Þe in this quarell for I

am for thy sake made knyght & Þou shalt well wete that

I am a kynges sonne borne & gotyn vppon a quene and

suche promyse I haue made at my nevewys requeste

& myne owne sekynge Þat I shall fyght with Þe vnto the

vttirmuste & delyvir Cornwayle frome Þe olde trewage

// And also wete Þou well Sir Marhalte that this ys

the gretteste cause Þat Þou coragyst me to haue a do with

Þe for Þou arte called one of the moste renouned knyghtes

of Þe worlde And by cause of Þat noyse & fame Þat Þou haste

Þou gevyst me corrayge to haue a do with Þe for neuer

yett was I preved with good knyght And sytthen I toke the

order of knyghthode this day I am ryght well pleased

and to me moste worshyp that I may haue a do wyth

f. 154 (VIII.7)


suche a knyght as Þou arte And now wete Þou well Syr

Marhalte that I caste me to grete worshyp on thy body

And yf Þat I be nat preved I truste to god to be worshypfully

preved vppon thy body And to delyuer Þe contrey of Cornway//

le for euer fro all maner of trewayge frome Irelonde for

euer // Whan Sir Marhalte had herde hym sey what he

wolde he seyde thus a gayne fayre knyght sytthen hit

is so Þat Þou castyste to wynne worshyp of me I lette

Þe wete worshyp may Þou none loose by me gyff Þou may

stonde me ·iij· strokys for I lat Þe wete for my noble

dedis preved & seyne kynge Arthure made me knyȝt

of Þe table rounde // Than they be gan to feauter

there sperys & they mette so fersly to gydyrs Þat they

smote aythir oÞer downe bothe horse & man // But sir

Marhalte smote Sir Trystrams a grete wounde in

the syde with his spere And than they a voyded Þer horsis

& pulde oute Þer swerdys & threwe Þer shyldis a fore

them And than they laysshed to gydyrs as men that

were wylde & corrageous // And whan they had stry//

kyn to gydyrs longe Þat there armys fayled Than they

leffte Þer strokys & foyned at brestys & vysours And

whan they sawe that hit myght nat prevayle them

Than they hurteled to gedyrs lyke rammys to beare

eythir othir downe Thus they fought stylle to gydirs

more than halffe a day & eythir of them were woun//

ded passynge sore Þat the blood ran downe passyng sore

frome them vppon Þe grounde // By than Sir Trys//

tramys wexed more fyerser than he dud And Sir

Marhalte fyebled And Sir Trystramys euer more

well wynded & bygger And with a myghty stroke he

smote Sir Marhalte vppon Þe helme suche a buffette

f. 154v (VIII.7-8)


that hit wente thorow his helme and thorow Þe coyffe of

steele and thorow Þe brayne panne And the swerde stake

so faste in the helme & in his brayne panne Þat Sir Trys//

tramys pulled ·iij· tymes at his swerde or euer he myght

pulle hit oute frome his hede And per Sir Marhalte felle

downe on his kneis & Þe edge of his swerde leffte in hys

brayne panne // And suddeynly Sir Marhalte rose grove//

lynge & threw his swerde & his shylde frome hym And so

he ran to his shyppys & fledde his way And Sir Trystramys

had euer his shelde & his swerde // And whan sir Trystramys

saw Sir Marhalte with drow hym he seyde a sir knyght of Þe

rounde table why with drawyst Þou Þe Þou doste thy self & thy

kynne grete shame for I am but a yonge knyght or now I

was neuer preved And raÞer than I sholde with draw me frome

Þe I had rathir be hewyn in pyese mealys // Sir Marhalte

answerde no worde but yeode his way fore gronynge well

Sir knyght seyde Sir Trystrams I promyse Þe thy swerde &

thy shylde shall be myne & thy shylde shall I were in all pla//

cis where I ryde on myne adventures And In the syght of kynge

Arthure and all Þe rounde table // So Sir Marhalte & hys

felyshyp departed In to Irelonde And as sone as he com to the

kynge his broÞer they serched his woundis And whan his hede            

was serched a pyese of Sir Trystrams swerde was there In           

founden & myght neuer be had oute of his hede for no leche         

craffte And so he dyed of Sir Trystramys swerde And that             

pyse of Þe swerde Þe quene his sistir she kepte hit for euer with                   

hir for she thought to be revenged & she myght // Now tur//

ne we a gayne vnto Sir Trystrames that was sore woun//

ded & sore for bledde Þat he myght nat with in a lytyll whyle

stonde whan he had takyn colde & vnnethe styrre hym of hys

lymmes And than he sette hym downe sofftely vppon a lytyll

f. 155 (VIII.8)


hylle and bledde faste Than a none com Gouernayle his man

with his vessell // And Þe kynge & Þe moste party of his barownes

com with procession a yenst Sir Trystrames And whan he was

commyn vnto the londe kynge Marke toke hym In his armys

And he and Sir Dynas the senescyall lad Sir Trystrames

In to the castell of Tyntagyll and than was he cerched In

Þe beste maner & leyde in his bed // And whan kynge Marke

saw his woundys he wepte hertely & so dud all his lordys

So god me helpe seyde kynge Marke I wolde nat for all my

londys Þat my nevew dyed // So Sir Trystrames lay there a

moneth & more & euer he was lyke to dey of Þe stroke that sir

Marhalte smote hym fyrste wyth Þe spere for as Þe Frenshe

booke seyth the spere hede was Invenymed Þat sir Trystrams

myght nat be hole Than was kynge Marke and all hys

barownes passynge hevy for they demed none oÞer but Þat Sir

Trystrames sholde nat recouer Than Þe kynge lette sende for

all maner of lechis & surgeons bothe vnto men & women And

Þer was none Þat wolde be hote hym Þe lyff Than cam Þer a lady

Þat was a wytty lady And she seyde playnly vnto the kyng Mar//

ke and to Sir Trystrames and to all his barownes that he

sholde neuer be hole but yf Þat Sir Trystrames wente in to Þe

same contrey Þat the venym cam fro And in Þat contrey sholde

he be holpyn oÞer ellys neuer // Thus seyde Þe lady vnto Þe kynge

So whan Þe kynge vndirstood hit he lette purvey for Syr

Trystrames a fayre vessell and well vytayled And Þer In was

putt Sir Trystrames and Gouernayle wyth hym And Sir

Trystrames toke his harpe with hym And so he was putt In

to the see to sayle In to Irelonde And so by good fortune he ary//

ved vp In Irelonde evyn faste by a castell where Þe kynge

& Þe quene was And at his aryvayle he sate and harped In

his bedde a merry lay suche one herde they neuer none ^in Irelonde

f. 155v (VIII.8-9)


be fore Þat tyme And whan it was tolde Þe kynge & Þe quene

of suche a syke knyght Þat was suche an harper A none the

kynge sente for hym & lette serche hys woundys And Þan

he asked hym his name Than he answerde & seyde I am

of Þe contrey of lyones And my name is Tramtryste that

was thus wounded In a batayle as I fought for a ladyes

ryght // So god me helpe seyde kynge Anawysh· ye shall

haue all Þe helpe in this londe Þat ye may haue here · But

in Cornwayle but late I had a grete losse as euer had kynge

for Þer I loste Þe beste knyght of Þe worlde his name was

Sir Marhalte a full noble knyght & knyght of the table

rounde And Þer he tolde Sir Tramtryste where fore Sir

Marhalte was slayne // So Sir Tramtryste made sembe//

launte as he had bene sory and bettir he knewe how hit was

than Þe kynge Than Þe kynge for grete fauour made Tram//

tryste to be put in his doughtyrs awarde & kepyng be cause

she was a noble surgeon And whan she had serched hym she

founde in Þe bottom of his wounde Þat Þer in was poyson & so she

healed hym In a whyle And Þer fore Sir Tramtryste kyste

grete love to La beale Isode for she was at Þat tyme Þe fayrest

lady & maydyn of Þe worlde And Þer Tramtryste lerned hir

to harpe & she be gan to haue a grete fantasy vnto hym

And at Þat tyme Sir Palomydes drew vnto La beale Isode

& profirde hir many gyfftys for he loved hir passyngly welle

// All that aspyed Tramtryste And full well he knew Palo//

mydes for a noble knyght & a myghty man And wete you

well Sir Tramtryste had grete despyte at Sir Palomydes

for la beale Isode tolde Tramtryste that Palomydes was

In wyll to be crystynde for hir sake Thus was Þe grete envy

be twyxte Tramtryste and Sir Palomydes Than hit be

felle that kynge Angwysh· lett cry a grete Justis and a

f. 156 (VIII.9)


grete turnemente for a lady that was called the lady

of Þe laundys And she was ny cosyn vnto Þe kynge And what

man wanne her ·iiij· dayes sholde wedde hir & haue all hir

londis // This cry was made in Ingelonde · Walys & Scot//

londe And also in Fraunce & In Bretayne So hit be felle

vppon a day la beale Isode com vnto Tramtryste and tolde

hym of this turnemente he answerde & sayde fayre lady

I am but a feeble knyght And but late I had bene dede had

nat your good ladyshyp bene // Now fayre lady what wolde

ye Þat I sholde do in this mater well ye wote my lady Þat I may

nat Juste A Tramtryste seyde la beale Isode why woll ye

nat haue a do at that turnamente for well I wote that sir

Palomydes woll be Þer And to do what he may And Þer fore sir

Tramtryste I pray you for to be there for ellys Sir Palomy//

des ys lyke to wynne Þe degre // Madam as for Þat hit may be

so for he is a proved knyght And I am but a yonge knyght

and late made And Þe fyrste batayle Þat euer I ded hit mysse hap//

ped me to be sore wounded as ye se But & I wyste that ye

wolde be my bettir lab lady at Þat turnemente woll I be on

this covenaunte So Þat ye woll kepe my counceyle and lette

no creature haue knowlech that I shall Juste but your self

and suche as ye woll to kepe youre counceyle my poure

person shall Jouparte there for youre sake Þat paradventure Sir

Palomydes shall know whan Þat I com There to seyde La//

beale Isode do your beste And as I can seyde la beale Isode I

shall purvey horse and armoure for you at my devyse · As

ye woll so be hit seyde Sir Tramtryste I woll be at youre

commaundemente // So at Þe day of Justys Þer cam sir Pa//

lomydes with a blacke shylde & he ovir threw many knyghtes

Þat all people had mervayle for he put to Þe warre Sir

Gawayne · Gaherys · Aggravayne · Bagdemagus

f. 156v (VIII.9-10)


Kay · Dodynas ·le sauyaige · Sagramour le desyrous · Gunrete

Le petyte & Gryfflet le fyse de du all thes Þe fyrste day sir

Palomydes strake downe to the erthe // And than all maner

of knyghtes were a drad of Sir Palomydes and many cal//

led hym Þe knyght with Þe blacke shylde // So that Sir Palo//

mydes had grete worshyp Than cam kynge Angwyshe

vnto Tramtryste and asked hym why he wolde nat Juste

// Sir he seyde I was but late hurte And as yett I dare nat

aventure Than Þer cam Þe same squyre Þat was sente frome

Þe kyngesdoughter of Fraunce vnto Sir Tramtryste And

whan he had a spyed Sir Trystrames he felle flatte to

his feete And that aspyed la beale Isode what curtesy the

squyre made to Tramtryste And Þer with all suddeynly Sir

Trystrames ran vnto the squyre his name was called

Ebes le renownys and prayde hym hartely In no wyse

to telle his name // Sir seyde hebes I woll nat discovir

your name but yf ye commaunde me Than sir Trystramys

asked hym what he dede in this contreys // Sir he seyde

I com hydir with Sir Gawayne for to be made knyght and

yf hit please you of your hondis Þat I may be made knyght

// Well a wayte on me as to morne secretly and in the

fylde I shall make you knyght // Than had la beale Iso//

de grete suspeccion vnto Tramtryste that he was som

man of worshyp preved & Þer with she comforted her selffe

and kyste more love vnto hym for well she demed he

was som man of worshyp And so on Þe morne sir Palo//

mydes made hym redy to com In to the fylde as he

dud Þe fyrste day And there he smote downe Þe kynge

with Þe ·C· knyghtes And Þe kynge of Scottis // Than had

la beale Isode ordayned & well a rayde Sir Tramtr//

yste with whyght horse and whyght armys and ryght




                              So she lette

f. 157 (VIII.10)


so she lette put hym oute at a prevy postren & he cam

so in to the felde as hit had bene a bryght angell · And

anone Sir Palomydes aspyed hym & Þer with he feautred hys

spere vnto Sir Trystramys and he a gayne vnto hym

And Þer Sir Trystrams smote downe Sir Palomydes vn//

to Þe erthe And than Þer was a grete noyse of people som

seyde Sir Palomydes had a fall Som seyde Þe knyght with

the blacke shylde hath a falle And wete you well la bea//

le Isode was passyng gladde And than Sir Gawayne &

his felowys ·ix· had mervayle who hit myght be that had

smott smytten downe Sir Palomydes Than wolde there

none Juste with Tramtryste but all that Þer were for soke

hym moste & lefte Than Sir Trystramys made hebes

a knyght & caused to put hym self forth and dud ryȝt

well that day So aftir that Sir hebes helde hym with Sir

Trystrams And whan sir Palomydes had reseyved hys

falle wete ye well Þat he was sore a shamed & as prevayly

as he myght he with drew hym oute of Þe fylde // All that a

spyed Sir Tramtryste and lyghtly he rode aftir Sir Palo//

mydes and ouer toke hym & bade hym turne for bettir he

wolde assay hym or euer he departed // Than Sir Palomy//

des turned hym and eythir laysshed at oÞer with Þer swerdys

but at Þe fyrste stroke Sir Trystrames smote downe

Sir Palomydes and gaff hym suche a stroke vppon Þe

hede Þat he felle to the erthe // So than Sir Trystrams

bade hym yelde hym & do his commaundemente oÞer ellis he

wolde sle hym // Whan Sir Palomydes be hylde hys

countenaunce he drad his buffettes so Þat he graunted all

his askynges // well seyde Sir Tramt^ryste this shall be

youre charge fyrst vppon payne of youre lyff Þat ye for

sake my lady la beale Isode and In no maner of wyse that

f. 157v (VIII.10)


ye draw no more to hir // Also this ·xii· monÞe & a day that

ye bere none armys noÞer noe harneys of werre Now

promyse me this othir here shalt Þou dye // Alas seyde Sir

Palomydes for euer I am shamed Than he sware as Sir

Trystrames had commaunded hym // So for dispyte and

angir Sir Palomydes but of his harneyse and threw

them a wey And so Sir Trystrames turned a gayne to Þe

castell where was la beale Isode And by the way he

mette wyth a damesell Þat asked aftir Sir Launcelot

that whan wan the dolorous garde And this damesel·

asked Sir Trystrames what he was for hit was

tolde her Þat hit was he Þat smote downe Sir Palamy//

des by whom the ·x· knyghtes of Arthures were smyttyn

downe Than the damesell prayde Sir Trystrames

to telle her what he was And wheÞer that he were sir

Launcelot du lake for she demed that Þer was no knyȝt

In the worlde Þat myght do suche dedis of armys but

yf hit were Sir Launcelot wete you well Þat I am

nat Sir Launcelot fayre damesell for I was neuer of

suche proves but in god is all he may make me as

good a knyght as Þat good knyght Sir Launcelot is Now

Jantyll knyght put vp thy vyser And whan she be hylde

his vysage she thought she sawe neuer a bettir mannys

vysayge nothir a bettir farynge knyght // So whan

the damesell knew sertaynly Þat he was nat Sir Laun//

celot than she toke hir leve & departed frome hym And Þan

Sir Trystrames rode prevayly vnto the posterne whe//

re kepte hym la beale Isode and Þer she made hym grete

chere & thanked god of his good spede // So a none with

In a whyle Þe kynge & the quene and all Þe courte vn//

dirstood Þat hit was Sir Tramytryste that smote downe 

f. 158 (VIII.10-11)


Sir Palamydes And than was the muche made of

more than he was to fore // Thus was sir Tram//

tryste longe Þer well cherysshed with Þe kynge & wyth

Þe quene and namely with la beale Isode So vppon a

day Þe quene and la beale Isode made a bayne for sir

Tramtryste And whan he was in his bayne the

quene and Isode hir doughter romed vp & downe In

the chambir the whyles Gouernayle and hebes atten//

dede vppon Tramtryste the quene be helde his swer//

de as hit lay vppon his bedde And than at vnhappis

the quene drew oute his swerde & be hylde hit along

whyle And bothe they thought hit a passynge fayre

swerde but with in a foote and an halff of the poynte

there was a grete pyese Þer of oute brokyn of Þe edge

And whan Þe quene had aspyed Þat gappe in Þe swerde

she remembirde hir of a pyese of a swerde that was

founde In the brayne panne of Sir Marhalte that

was hir broÞer // Alas than seyde she vnto hir doughter

La beale Isode this is Þe same traytoure knyght that

slewe my broÞer thyne eme // whan Isode herde her

sey so she was passynge sore a baysshed for passynge

well she loved Tramtryste and full well she knew

the crewelnesse of hir modir Þe quene // So anone Þer

with all Þe quene wente vnto hir owne chambir & sought

hir cofyr & Þer she toke oute Þe pyese of Þe swerde Þat was

pulde oute of Sir Marhaltys brayne panne aftir

Þat he was dede And than she ran wyth Þat pyese of

Iron vnto Þe swerde hit was as mete as hit myȝt

be as whan hit was newe brokyn And than Þe quene

gryped Þat swerde in hir honde fersely & with all her

myght she ran streyght vppon Tramtryste where

f.158v (VIII.11-12)


he sate in his bayne And Þer she had ryved hym thorowe

had nat Sir hebes bene he gate hir in his armys & pulde

Þe swerde frome her and ellys she had thirste hym throwe

// So whan she was lette of hir evyll wyll she ran to the

kynge her husbonde and seyde A my lorde on hir kneys

knelynge she seyde here haue ye in your house Þat traytoure

knyght Þat slewe my broÞer & your seruaunte Þe noble knyght Sir

Marhalte who is that seyde Þe kynge & where is he Sir

she seyde hit is Sir Tramtryste the same knyght that

my doughter helyd // Alas seyde Þe kynge Þer fore I am ryght hevy

for he is a full noble knyght as euer I sawe in fylde But I

charge you seyde Þe kynge Þat ye haue nat a do with Þat knyght

but lette me dele with hym // Than the kynge wente in to

Þe chambir vnto Sir Tramtryste And than was he gone vn//

to his owne chambir and Þe kynge founde hym all redy ar//

med to mownte vppon his horse // So whan Þe kynge sawe

hym all redy armed to go vnto horse backe The kynge seyde

nay Tramtryste hit woll nat avayle to compare a yenste

me But thus muche I shall do for my worshyp & for thy love

In so muche as Þou arte wyth In my courte hit were no worship

to sle Þe There fore vppon this conducion I woll gyff Þe leve

for to departe frome this courte in savyte so Þou wolte telle me

who was thy fadir and what is thy name And also yf Þou slewe

Sir Marhalte my broÞer / Sir seyde Tramtryste now I shall tell

you all the trouthe my fadyrs name ys Sir Melyodas kynge

of Lyonesse and my modir hyght Elyȝabeth that was sister vnto

kynge Marke of Cornwayle and my modir dyed of me In the

foreste And be cause Þer of she commaunded or she dyed Þat whan

I was crystened they sholde crystyn me Trystrames And be cause

I wolde nat be knowyn In this contrey I turned my name and

let calle me Tramtryste And for the trwage of Cornwayle

f. 159 (VIII.12)


I fought for myne Emys sake and for the ryght of Corn//

wayle that ye had be possessed many yerys And wete you well

seyde sir Trystrames vnto Þe kynge I dud the batayle for the love

 of myne vncle kynge Marke and for the love of the contrey

of cornwayle and for to encrece myne honoure for that same

day Þat I fought with sir Marhalte I was made knyght and neuer

or than dud I no batayle with no knyght and fro me he wente

a lyve & leffte his shylde & his swerde be hynde hym // So

god me helpe seyde the kynge I may nat sey but ye dud as a

knyght sholde do & as hit was youre parte to do for your quarell

and to encrece your worshyp as a knyght sholde do how be hit

I may nat mayntayne you In this contrey with my worship but

Þat I sholde displese many of my barownes and my wyff & my

kynne // Sir seyde Sir Trystrames I thanke you of your good

lordeship Þat I haue had with in here with you And the grete good//

nesse my lady your doughter hath shewed me And Þer fore seyde sir

Trystramys hit may so be Þat ye shall wynne more be my

lyff than be my deth for In the partyes of Ingelonde hit may

happyn I may do you seruyse at som season that ye shall be glad

Þat euer ye shewed me your good lordshyp · wyth more I promyse

you as I am trewe knyght Þat in all placis I shall be my lady

your doughtyrs servaunte & knyght in all ryght & In wronge

And I shall neuer fayle her to do as muche as a knyght may do

Also I be seche your good grace Þat I may take my leve at my lady

youre doughter and at all the barownes & knyghtes I woll woll

seyde the kynge // Than Sir Trystrames wente vnto la

beale Isode and toke his leve And than he tolde what he was

and how a lady tolde hym Þat he sholde neuer be hole vntyll I

cam In to this contrey where Þe poyson was made where

thorow I was nere my deth had nat your ladyshyp bene A Jan//

tyll knyght seyde labeale Isode full wo I am of thy departynge

f. 159v (VIII.12-13)


for I saw neuer man Þat euer I ought so good wyll to And Þer with all

she wepte hertyly // Madam seyde Sir Trystramys ye

shall vndirstonde Þat my name ys sir Trystrames de lyones

gotyn of a kynge & borne of a quene And I promyse you

faythfully I shall be all the dayes of my lyff your knyght //

Gramercy seyde La beale Isode and I promyse you Þer a gaynste

I shall nat be maryed this ·vij· yerys but by your assente and

whom Þat ye woll I shall be maryed to hym & he woll haue

me if ye woll consente Þer to And than sir Trystrames gaff

hir a rynge and she gaff hym anoÞer And Þer with he departed &

com In to the courte amonge all Þe barownes And there

he toke his leve at moste and leste And opynly he seyde a

monge them all Fayre lordys now hit is so that I muste

departe if Þer be ony man here Þat I haue offended vnto or that

ony man be with me greved lette hym complayne hym here

a fore me or Þat euer y departe and I shall amende hit vnto my

power // And yf Þer be ony man that woll proffir me wronge

er sey me wronge oÞer shame me be hynde my backe sey hit

now or ellys neuer And here is my body to make hit good body

a yenste body And all they stood stylle there was nat one that

wolde sey one worde // yett were Þer som knyghtes Þat were of

Þe quenys bloode and of sir Marhaltys blood but they wolde

nat meddyll wyth hym // So sir Trystramys departede and

toke the see and with good wynde he aryved vp at Tyntagyll

in Cornwayle And whan kynge marke was hole in hys

prosperite there cam tydynges Þat sir Trystrames was aryved &

hole of his woundis There of was kynge Marke passynge

glad And so were all Þe barownes // And whan he saw hys

tyme he rode vnto his fadir kynge Melyodas his fadir and

Þer he had all Þe chere Þat Þe kynge and Þe quene coude make hym

And than largely kynge Melyodas and his quene departed of

f. 160 (VIII.13)


Þer londys & goodys to Sir Trystrames Than by the lysence

of his fadir he returned a yen vnto the courte of kynge Mar//

ke and Þer he lyved longe in grete Joy longe tyme vntyll at Þe

laste Þer be felle a Jolesy and an vnkyndenesse be twyxte kynge

Marke and Sir Trystrames for they loved bothe one lady

and she was an erlys wyff that hyght sir Segwarydes And

this lady loved sir Trystrames passyngly well and he loved

hir a gayne for she was a passynge fayre lady And that a

spyed sir Trystrames well Than kynge Marke vndirstode

that and was Jeluse For kynge Marke loved hir passyngly

welle // So hit be felle vppon a day this lady sente a dwarff

vnto sir Trystrames and bade hym as he loved hir Þat he wolde

be with hir Þe nexte nyght folowynge Also she charged you Þat

ye com nat to hir but yf ye be well armed for her lorde

was called a good knyght // Sir Trystrames answerde

to the dwarff and seyde recommaunde me vnto my lady & tell

hir I woll nat fayle But I shall be with her the terme Þat she

hath sette me And Þer with the dwarff departed // And kynge Marke

aspyed Þat the dwarff was with sir Trystrames vppon message

frome Segwarydes wyff / than kynge Marke sente for Þe

dwarff And whan he was comyn he made Þe dwarff by force

to tell hym all why and where fore Þat he cam on message

to sir Trystrames And than he tolde hym // welle seyde kynge

Marke go where Þou wolte And vppon payne of deth that

Þou sey no worde Þat Þou spake with me // So the dwarff departed

And Þat same nyght Þat the steavyn was sette be twyxte Seg//

warydes wyff and sir Trystrames So kynge Marke ar//

med and made hym redy & toke ·ii· knyghtes of his counceyle

with hym And so he rode by fore for to a byde by the wayes for

to wayte vppon sir Trystrames And as sir Trystrames cam

rydynge vppon his way with his speare In his hande kynge

f. 160v (VIII.13-14)


Marke cam hurlynge vppon hym and hys ·ij· knyghtes suddeyn//

ly And all ·iij· smote with Þer sperys And kynge Marke hurt

Sir Trystrames on the breste ryght sore // And than

Sir Trystrames feautred his spere and smote kynge

Marke so sore that he russhed hym to the erthe & brused

hym Þat he lay stylle in a sowne & longe hit was or he

myght welde hym selff And than he ran to the one

knyght & effte to the tothir and smote hem to the colde

erthe Þat they lay stylle And Þer all Sir Trystrames rode

forth sore wounded to the lady & founde hir a bydynge

hym at a postren And Þer she welommed hym fayre & eyÞer

halsed oÞer in armys & so she lette putt vp his horse In the

beste wyse And than she vnarmed hym & so they soupede

lyghtly & wente to bedde with grete Joy & plesaunce And so

in hys ragynge he toke no kepe of his greue wounde Þat

kynge Marke had gyffyn hym // And so sir Trystrames

bledde bothe the ouer shete Þe neyÞer sheate & the pylowes

& the hede shete And with in a whyle Þer cam one be fore Þat

warned her Þat hir lorde Sir Segwarydes was nere honde

with In a bowe drawȝt // So she made Sir Trystrames to

a ryse & armed hym & toke his horse & so departed // So by Þan

was sir Segwarydes hir lorde com And whan he founde

hys bedde troubled & brokyn And so he wente nere and

loked by candyll lyght & sawe Þat Þer had leyne a wounded knyȝt

// A false traytoures he seyde why haste Þou be trayde me

And Þer with all he swange oute a swerde & seyde but yf Þou telle

me all now shalt Þou dey // A my lorde mercy seyde the

lady & helde vp hir hondys & sle me nat & I shall tell you

all who hath bene here // Than anone seyde Segwary//

des seyd and tell me Þe trouthe Anone for drede she seyde

here was sir Trystrames with me & by Þe way as he come

f.161 (VIII.14)


to mewarde he was sore wounded // A false traytoures whe//

re is he be com Sir she seyde he is armed & departed on horse

backe nat yett hens halff a myle // ye sey well seyde Seg//

warydes than he armed hym lyghtly & gate his horse &

rode aftir Sir Trystrames the streyȝt wey vnto Tyn//

tagyll And with in a whyle he ouer toke Sir Trystrams

And than he made hym turne false traytoure knyȝt

And Þer with all sir Segwarydes smote sir Trystrames with a

speare Þat hit all to braste And than he swange oute hys

swerde & smote faste at sir Trystrames Sir knyght seyde

sir Trystrames I counceyle you smyte no more how be hit

for the wrongys Þat I haue done you I woll for bere you as

longe as I may // Nay seyde Segwarydes that shall nat

be for oÞer Þou shalt dye othir ellys I Than sir Trystrames

drew ^oute his swerde & hurled his horse vnto hym freysshely &

thorow Þe waste of the body he smote sir Segwarydes Þat he

felle to the erthe in sowne // And so sir Trystrames departed

& leffte hym Þer & so he rode vnto Tyntagyll and toke hys

lodgynge secretely for hit wolde nat be know Þat he was

hurte // Also Sir Segwarydes men rode afftir their master

& brought hym home or his shylde & Þer he lay longe or he

were hole But at Þe laste he recouerde // Also kynge Marke

wolde nat be a knowyn of Þat he had done vnto sir Trystramys

whan he mette Þat nyght And as for sir Trystramys he knew

nat Þat kynge Marke had mette with hym And so Þe kynge

com ascawnce com to sir Trystrames to comforte hym as

he lay syke in his bedde // But as longe as kynge Marke

lyved he loved neuer aftir sir Trystramys So aftir that thouȝe

Þer were fayre speche love was Þer none And thus hit paste

on many wykes & dayes And all was for gyffyn & for getyn

For sir Segwarydes durste nat haue a do with Sir Trystrames

f. 161v (VIII.14-15)


be cause of his noble proves And also be cause he was ne//

vew vnto kynge Marke there fore he lette hit ouer slyppe

for he Þat hath a prevy hurte is loth to haue a shame oute//

warde // Than hit be felle vppon a day Þat Þe good knyghte

sir Bleoberys de ganys broÞer vnto sir Blamore de ganys

& nye Cosyne vnto the good knyght Syr Launcelot de la//

ke So this sir Bleoberys cam vnto Þe courte of kynge Mar//

ke and Þer he asked kynge Marke to gyff hym a bone what

gyffte Þat I woll aske in this courte // Whan Þe kynge herde

hym aske so he mervayled of his askynge But by cause

he was a knyght of the rounde table & of a grete renowne

kynge Marke graunted hym his hole askynge // Than

seyde sir Bleoberys I woll haue Þe fayreste lady in your

courte Þat me lyste to chose I may nat say nay seyde kynge

Marke now chose hir at your adventure // And so sir Belo//

berys dud chose sir Segwarydes wyff & toke hir by the

honde & so wente his way with her And so he toke his horse

& made sette her be hynde his squyer & rode vppon hys

way // Whan sir Segwarydes herde telle Þat his lady was

gone with a knyght of kynge Arthures courte Than he

armed hym & rode after Þat knyght to rescow his lady //

So whan sir Bleoberys was gone with this lady kynge

Marke and all Þe courte was wroth Þat she was had a

way // Than were Þer sertayne ladyes that knew Þat Þer

was grete love be twene sir Trystrames and her //

And also Þat lady loved sir Trystrames a bovyn all othyr

knyghtes Than Þer was one lady Þat rebuked sir Trystrams

In the horrybelyst wyse & called hym Cowarde knyght

Þat he wolde for shame of hys knyghthode to se a lady

so shamefully takyn a way fro his vncklys courte but

she mente that eythir of hem loved oÞer with entyre herte

f. 162 (VIII.15-16)


But Sir Trystrames answered her thus fayre lady

hit is nat my parte to haue a do in suche maters whyle

her lorde & husbonde ys presente here And yf so be that

hir lorde had nat bene here in this courte Than for

the worshyp of this courte paraventure I wolde haue bene

hir champyon // And yf so be sir Segwarydes spede nat

well hit may happyn that I woll speke with Þat good knyȝt

or euer he passe far fro this contrey // Than with in a why//

le com sir Segwarydes squyres & tolde in Þe theyre master

was betyn sore & wounded at the poynte of deth as he

wolde haue rescowed his lady sir Bleoberys ouer threwe

hym & sore hath wounded hym // Than was kynge

Marke hevy Þer of & all Þe courte // whan sir Trystrames

herde of this he was a shamed & sore a greved And anone

he armed hym & yeode to horse backe And Gouernayle his

seruaunte bare his shylde and his spere And so as Syr

Trystrames rode faste he mette with sir Andret his Cosyn

that by the commaundement of kyng Marke that was

sente to brynge forth ·ij· knyghtes of Arthures courte

that rode by the contrey to seke Þer adventures // whan

sir Trystrames sawe sir Andret he asked hym what ty//

dynges So god me helpe seyde sir Andret there was neuer

worse with me for here by the commaundemente of kynge

Marke I was sente to fecche ·ij· knyghtes of kynge Arthurs

courte and the tone bete me & wounded me and sette

nought be my messayge Fayre Cosyn seyde sir Trystrames

ryde on your way and yf I may mete them hit may happyn

I shall revenge you // So sir Andret rode in to Cornway//

le and sir Trystrames rode aftir the ·ij· knyghtes whyche

that one hyght Sir Sagramoure le desyrous Ant Þat

othir hyght sir Dodynas le savyayge // So with in a whyle

f. 162v (VIII.16)


Sir Trystrames saw hem by fore hym ·ij· lykly knyghtys ·\\

Sir seyde Gouernayle vnto his maystir I wolde counceyle you

nat to haue a do with them for they be ·ij· proved knyghtes of Ar//

thures courte As for that seyde sir Trystrames have ye no

doute but I woll haue a do with them bothe to encrece my

worshyp for hit is many day sytthen I dud any armys ·

do as ye lyste seyde Gouernayle And Þer wyth all anone sir

Trystrames asked them from whens they come & whothir

they wolde & what they dud In those marchis // So sir Sa//

gramoure loked vppon sir Trystrames and had scorne of

his wordys & seyde to hym a gayne Sir be ye a knyght of

Cornwayle where by askyste Þou seyde sir Trystrames for

hit is seldom seyne seyde sir Sagramoure Þat ye cornysshe

knyghtes bene valyaunte men in armys for with In thes ·ij·

owres Þer mette with vs one of you Cornysshe knyghtes and

grete wordys he spake and anone with lytyll myght he was

leyde to the erthe // And as I trow seyde Sir Sagramoure

that ye wolde haue Þe same hausell // Fayre lordys seyde

sir Trystrames hit may so happe Þat I may bettir wyth stonde

you than he ded And wheÞer ye woll or nylle I woll have a

do with you be cause he was my Cosyn Þat ye bete And Þer fore

here do your beste And wete you well but yf ye quyte you

the bettir here vppon this grounde one knyght of Cornway//

le shall beate you bothe // Whan sir Dodynas le savyaige

herde hym sey so he gate a speare In hys honde & seyde sir

knyght kepe thy selff And than they departed & com to gydirs

as hit had bene thundir And sir Dodynas spere braste In

sundir but sir Trystrames smote hym with a more myght Þat

he smote hym clene ouer ^the horse croupyn and nyȝe he had brokyn

his necke // whan sir Sagramoure saw hys felow haue such

a falle he mervayled what knyght he was but so he dressed

f. 163 (VIII.16-17)


his speare with all his myght And sir Trystrames a yenste

hym And so they cam to gydir as thundir And there Sir Trys//

trames smote sir Sagramour a stronge buffette Þat he bare hys

horse & hym to the erthe & in Þe fallynge he brake his thyghe

// So whan this was done sir Trystrames asked them fayre

knyghtes wyll ye ony more · Be there ony bygger knyghtys

in Þe courte of kynge Arthure hit is to you shame to say vs

knyghtes of Cornwayle dishonour for hit may happyn a Cornysh

knyght may macche you // That is trouthe seyde sir Sagra//

moure that haue we well proved But I requyre you seyde

Sir Sagramour telle vs your name be your feyth & trouthe that

ye owȝe to the hyȝe order of knyghthode // ye charge me with

a grete thynge seyde sir Trystrames And sytthyn ye lyste

to wete ye shall know & vndirstonde Þat my name ys sir

Trystrames de lyones kynge Melyodas son and nevew

vnto kynge Marke Than were they ·ij· knyghtes fayne

Þat they had mette with sir Trystrames And so they prayde hym

to a byde in Þer felyshyp // Nay seyde sir Trystrames for I

muste haue a do wyth one of yur felawys his name is sir

Bleoberys de ganys God spede yow well seyde sir Sagra//

moure and sir Dodynas So sir Trystrames departed and

rode onwarde on his way And than was he ware be fore

hym in a valay where rode sir Bleoberys wyth sir Segwa//

rydes lady that rode be hynde his squyre vppon a palfrey

Than sir Trystrames rode more than a pace vntyll Þat he

had ouer take hym // Than spake sir Trystrames A byde ho

seyde knyght of Arthures courte brynge a gayne that lady

or delyuer hir to me I woll do neyÞer noÞer seyde sir Bleoberys

for I drede no Cornysshe knyght so sore Þat me lyste to delyuer

her // why seyde sir Trystrames may nat a Cornysshe knyȝt

do as well as an oÞer knyght // yes this same day ·ij· knyghtes

f. 163v (VIII.17)


of youre courte wyth In this ·iij· myle mette with me And or

euer we departed they founde a Cornysshe knyght good I nowe for

them bothe // what were Þer namys seyde sir Bleobrys sir they

tolde me Þat one hyght sir Sagramoure le desyrous & that

er hyght sir Dodynas le saueayge A · seyde sir Bleoberys

haue ye mette with them // So god me helpe they were ·ij· good

knyghtes & men of grete worshyp And yf ye haue betyn them

bothe ye muste nedis be a good knyght yf hit be so ye have

beatyn them bothe yet shall ye nat feare me but ye shall

beate me or euer ye haue this lady Than defende you seyde

Sir Trystrames so they departed & com to gydir lyke thundir

& eyÞer bare oÞer downe horse & man to the erthe // Than they

a voyded Þer horsys & lasshed to gydyrs egerly with swerdys &

myghtyly now here now Þer trasyng & trauersynge on Þe ryȝt

honde & on the lyffte honde more than ·ij· owres & som tyme

they rowysshed to gydir with suche a myght Þat they lay bothe

grovelynge on Þe erthe Than sir Bleoberys de ganys

sterte a backe & seyde thus // Now Jantyll knyght a why//

le holde your hondes & let vs speke to gydyrs Sey on what

ye well seyde sir Trystrames and I woll answere you and

I can // Sir seyde Bleoberys I wolde wete of whens ye we//

re ^& of whom ye be com and what is your name So god me

helpe seyde sir Trystrames I feare nat to telle you my na//

me wete you well I am kynge Melyodas son & my moÞer

is kynge Markys sistir and my name is sir Trystrames

de lyones and kynge Marke ys myne vncle Truly seyde

Sir Bleoberys I am ryght glad of you for ye ar he that

slewe the knyght honde for honde in Þe Ilonde for the trway//

ge of Cornwayle // Also ye ouer com sir Palomydes Þe good

knyght at Þe turnemente in Irelonde where he bete Sir

Gawayne and his ·ix· felowys // So god me helpe seyde sir 

f. 164 (VIII.17-18)


Trystrames wete you well I am Þe same knyght // Now

I haue tolde you my name telle me yourys with good wyll

that my name is sir Bleoberys de ganys & my broÞer hyght

sir Blamoure de ganys Þat is callyd a good knyght & we be

sistyrs chyldyrn vnto my lorde sir Launcelot de lake Þat we

calle one of Þe beste knyghtes of Þe worlde That is trouthe

seyde sir Trystrames Sir Launcelot ys called pereles of

curtesy & of knyghthode And for his sake seyde sir Trystramys

I wyll nat with my good wylle feyght no more with you for the

grete love I haue to sir Launcelot In good feyth seyde sir Bleo//

berys as for me I wolde be loth to fyght with you but sytthen

ye folow me here to haue thys lady I shall proffir you kynde//

nes & curtesy ryght here vppon this grounde Thys lady

shall be sette be twyxte vs bothe & who Þat she woll go vnto

of you and me lette hym haue hir In pees I woll well seyde

Sir Trystrames for as I deme she woll leve you & com to

me · ye shall preve anone seyde sir Bleoberys So whan she

was sette be twyxte them she seyde thes wordys vnto Sir

Trystrames wete Þou well sir Trystrames de lyones that but

late Þou was Þe man in Þe worlde that I moste loved & trusted

And I wente ye had loved me a gayne a bove all ladyes

But whan Þou sawyste this knyght lede me a way Þou madist

no chere to rescow me but suffirdyst my lorde sir Segwarydes

to ryde after me But vntyll Þat tyme I wente ye had loved me

And Þer fore now I forsake Þe & neuer to love the more And Þer

with all she wente vnto sir Bleoberys // whan sir Trystrames

saw her do so he was wondirly wroth with that lady & a shamed

to com to Þe courte But sir Bleoberys seyde vnto sir Trys//

trames ye ar In the blame for I hyre by this ladyes wordis

that she trusted you a bovyn all erthely knyght And ^as she seyth

ye haue dysseyved hir There fore wete you well Þer may no

f. 164v (VIII.18)


man holde that woll a way And rathir than ye sholde hertely

be displesed with me I wolde ye had her and she wolde a byde with

you // Nay seyde Þe lady so Jhu me helpe I woll neuer go wyth

hym for he that I loved and wente Þat he had loved me for soke

me at my nede And Þer fore sir Trystrames she seyde ryde as

Þou com for though Þou haddyste ouer com this knyght as Þou were

lykly · with the neuer wolde I haue gone And I shall pray thys

knyght so fayre of his knyghthode Þat or evir he passe thys

contrey that he woll lede me to the abbey there my lorde

Sir Segwarydes lyggys So god me helpe seyde sir Bleo//

berys I latte you wete that this good knyght sir Trystrames

be cause kynge Marke gaff me the choyse of a gyffte In

this courte and so this lady lyked me beste Nat wythston//

dynge she is wedded & hath a lorde and I haue also fulfyl//

led my queste she shall be sente vnto hir husbande a gayne

and in especiall moste for your sake sir Trystrames And she

wolde go with you I wolde ye had her I thanke you seyde sir

Trystrames but for her sake I shall be ware what maner

of lady I shall love or truste For had her lorde sir Segwary//

des bene a way from Þe courte I sholde haue bene the fyrste

that sholde a folowed you // But syth ye haue refused me

as I am a trew knyght I shall know hir passyngly well Þat I

shall love oÞer truste And so they toke Þer leve & departed // And so

Sir Trystrames rode vnto Tyntagyll And sir Bleoberys

rode vnto the abbey where sir Segwarydes lay sore woun//

ded & Þer he delyuerde his lady and departed as a noble knyght

So whan sir Segwarydes saw hys lady he was gretly com//

forted And than she tolde hym that sir Trystrames had do//

ne grete batayle with sir Bleoberys and caused hym to bryng

her a gayne So Þat wordis pl^eased sir Segwarydes gretly Þat

Sir Trystrames wolde do so muche And so that lady tolde




                        All the

f. 165 (VIII.18-19)


all Þe batayle vnto kynge Marke be twyxte sir Trystramys

and Sir Bleoberys So whan this was done kynge Mar//

ke caste all Þe wayes that he myght to dystroy sir Trystra//

mes And than Imagened in hym selff to sende sir Trystramys

In to Irelonde for la beale Isode For Sir Trystrames had so

preysed her for hir beaute & hir goodnesse thta that kynge

Marke seyde he wolde wedde hir where vppon he prayde

Sir Trystramys to take this way in to Irelonde for hym

on message & all this was done to the entente to sle sir

Trystramys Nat withstondynge he wolde nat refuse Þe mes//

sayge for no daunger noÞer perell Þat myght falle for the plea//

sure of his vncle // So to go he made hym redy in Þe moste

goodlyest wyse that myght be devysed · For he toke with hym

the moste goodlyeste knyghtes Þat he myght fynde in Þe courte

and they were arayed aftir the gyse Þat was vsed Þat tyme

In the moste goodlyeste maner // So sir Trystrames departed

and toke the see with all his felyshyp And anone as he was

In the see a tempeste toke them & drove them In to Þe coste

of Ingelonde and Þer they aryved faste by Camelot and full

fayne they were to take the londe And whan they were

londed sir Trystrames sette vp his pavylyon vppon the

londe of Camelot And Þer he lette hange his shylde vppon

the pavylyon And Þat same day cam ·ij· knyghtes of kynge

Arthures that one was Sir Ector de marys And that oÞer

was Sir Morganoure And thes ·ij· touched the shylde and

bade hym com oute of the pavylyon for to Juste and he

wolde ·/ Anone ye shall be answeryd seyde sir Trystramys

and ye woll tary a lytyll whyle // So he made hym re//

dy and fyrste he smote downe sir Ector And than sir Morga//

noure all with one speare and sore brused them And whan

they lay vppon the erthe they asked sir Trystramys what

f. 165v (VIII.19-20)


he was and of what contrey he was knyght // Fayre lor//

dis seyde sir Trystrames wete you well Þat I am of Corn//

wayle Alas seyde sir Ector now am I a shamed Þat euer ony

cornysshe knyght sholde ouer com me And than for dispyte

Sir Ector put of his armoure fro hym and wente on foot

and wolde nat ryde // Than hit be felle that sir Bleobe//

rys and sir Blamour de Ganys that were brethyrn they

has assomned kynge Angwysshe of Irelonde for to com to

kynge Arthurs courte vppon payne of forfeture of kynge

Arthurs good grace And yf the kynge of Irelonde come

nat In to that day assygned and sette // the kynge sholde

lose his londys // So by kynge Arthure hit was happened

Þat day that noÞer he neythir sir Launcelot myght nat be Þere

where Þe Jugemente sholde be yevyn · For kynge Arthure

was with sir Launcelot at Joyus garde And so kynge Arthure

assygned kynge Carados and the kynge of scoty scottis

to be there that day as Juges // So whan thes kynges

were at Camelot kynge Angwysshe of Irelonde was

com to know hys accusers Than was sir Blamour de ga//

nys there that appeled the kynge of Irelonde of treson

that he had slayne a Cosyn of thers In his courte In Ire//

londe by treson // Than Þe kynge was sore a baysshed of

his accusacion for why he was at to the sommons of kynge

Arthure And or Þat he com at Camelot he wyste nat whe//

re fore he was sente fore // So whan Þe kynge herde

hym sey his wyll he vndirstood well Þer was none oÞer

remedy but to answere hym knyghtly · for the custom

was suche tho dayes that & ony man were appealed of

ony treson othir of murthure he sholde fyght body for

body oÞer ellys to fynde anoÞer knyght for hym And alle

maner of murthers in tho dayes were called treson

f. 166 (VIII.20-1)


// So whan kynge Angwysshe vndirstood his accusyng

he was passynge hevy for he knew Sir Blamoure de

ganys that he was a noble knyght and of noble knyȝtes

comyn // So the kynge of Irelonde was but symply pur//

veyde of his answere There fore Þe Juges gaff hym

respyte by the thirde day to gyff his answere // So the

kynge departed vnto his lodgynge // The meane whyle

there com a lady by sir Trystrames pavylyon makynge

grete dole what aylyth you seyde sir Trystrames that

ye make suche dole // A fayre knyght seyde Þe lady I am

shamed onles that som good knyght helpe me for a grete

lady of worshyp sent by me a fayre chylde and a ryche

vnto sir Launcelot and here by there mette with me a knyȝt

and threw me downe of my palfrey and toke a way the

chylde frome me // well my lady seyde sir Trystramys

and for my lorde sir Launcelotes sake I shall gete you that

chylde a gayne othir he shall beate me // And so sir Trys//

tramys toke his horse and asked Þe lady whyche way

the knyght yoode Anone she tolde hym & he rode aftir

So with in a whyle he ouer toke Þat knyght & bade hym tur//

ne & brynge a gayne the chylde // Anone the knyght

turned his horse & made hym redy to fyght And than

Sir Trystramys smote hym with a swerde such a buffet

that he tumbled to the erthe And than he yelded hym

vnto Sir Trystramys than com thy way seyde Syr

Trystrames and brynge the chylde to the lady a gay//

ne So he toke his horse weykely and rode wyth sir

Trystrames And so by the way he asked his name // sir

he seyde my name is Breunys sanȝe pyte So whan

he had delyuerde that chylde to the lady Sir and in this

the chylde is well remedyed // Than sir Trystramys

f.166v (VIII.21)


lete hym go a gayne that sore repented hym aftir for he

was a grete foo vnto many good knyghtes of kynge Arthu//

res courte // Than whan sir Trystrames was in his pa//

vylyon Gouernayle his man com and tolde hym how that

kynge Angwysh· of Irelonde was com thydir And he was

in grete dystresse And Þer he tolde hym how he was somned

and appeled of murthur So god me helpe seyde sir Trystra//

mes this is the beste tydynges that euer com to me this ·vij

yere For now shall the kynge of Irelonde haue nede of

my helpe for I dere say Þer is no knyght In this contrey Þat

is nat in Arthures courte Þat dare do batayle wyth sir

Blamoure de ganys And for to wynne the love of the

kynge of Irelonde I woll take the batayle vppon me

And Þer fore Gouernayle bere me this worde I charge the

to the kynge · Than Gouernayle wente vnto kynge Ang//

wyshe of Irelonde and salewed hym full fayre // So the

kynge welcommed hym and asked what he wolde // Sir

he seyde here is a knyght nere honde Þat desyryth to spe//

ke wyth you for he bade me sey that he wolde do you

servyse // what knyght is he seyde the kynge // Sir hit

Sir Trystrames de lyones that for the good grace ye

shewed hym in your londys he woll rewarde in thys con//

treys // Com on felow seyde Þe kynge with me anone and

brynge me vnto sir Trystramys So the kynge toke a

lytyll hackeney & but fewe felyshyp with hym tyll Þat he

cam vnto Sir Trystramys pavylyon And whan sir

Trystrames saw the kynge he ran vnto hym & wolde

haue holdyn his styrope But Þe kynge lepe frome his

horse lyghtly & eythir halsed othir in armys // My gra//

cious lorde seyde sir Trystrames graunte mercy of your

grete goodnesse Þat ye shewed vnto me In your marchys

f. 167 (VIII.21-2)


and landys And at that tyme I promysed you to do you

servyse and euer hit lay in my power // A Jantyll knyght

seyde the kynge vnto sir Trystrames now haue I grete

nede of you neuer had I so grete nede of no knyghtys

helpe // hwo so my good lorde seyde sir Trystramys I shall

tyll you seyde the kynge I am assumned & appeled fro my

contrey for the deth of a knyght Þat was kynne vnto the

good knyght sir Launcelot where fore sir Blamour de ga//

nys & sir Bleoberys his broÞer hath appeled me to fyght

wyth hym oÞer for to fynde a knyght in my stede And

well I wote seyde Þe kynge thes that ar comyn of

kynge Banys bloode As sir Launcelot and thes othir

ar passynge good harde knyghtes & harde men for to

wynne in batayle as ony that I know now lyvyng · Sir

seyde sir Trystrames for the good lordeshyp ye shewed

vnto me in Irelonde And for my lady youre doughtirs

sake la beale Isode I woll take the batayle for you vp//

pon this conducion that ye shall graunte me ·ij· thynges

one is that ye shall swere vnto me that ye ar in the

ryght & that ye were neuer consentynge to the knyghtis

deth // Sir than seyde Sir Trystramys whan I haue

done this batayle yf god gyff me grace to spede that

ye shall gyff me a rewarde what thynge resonable

that I woll aske you // So god me helpe seyde Þe kynge

ye shall haue what som euer ye woll · ye sey well seyde

Sir Trystramys Now make your answere Þat your champyon

is redy for I shall dye in your quarell rathir than to be

recreaunte I haue no doute of you seyde the kynge

that and ye sholde haue a do with sir Launcelot de lake

As for sir Launcelot he is called Þe noblyst of Þe worlde

of knyghtes And wete you well Þat the knyghtes of hys

f. 167v (VIII.22)


bloode ar noble men and drede shame And as for sir Ble//

oberys broÞer vnto sir Blamour I haue done batayle wyth

hym Þer fore vppon my hede hit is no shame to calle hym

a good knyght // Sir hit is noysed seyde Þe kynge Þat sir

Blamour is the hardyer knyght as for Þat lat hym be he

shall nat be refused & he were Þe beste knyght Þat beryth

shylde or spere // So kynge Angwysh· departed vnto kynge

Carados and Þe kynges that were that tyme as Juges

and ^tolde them how that he had founde his champyon redy

Than by the commaundementes of the kynges Sir Blamour//

de ganys and Sir Trystramys de lyones were sente

fore to hyre Þer charge And whan they were com be fo//

re the Juges Þer were many kynges & knyghtes Þat ^be hylde

Sir Trystrames and muche speche they had of hym

be cause he slew Sir Marhalte the good knyght And be

cause he for Justed Sir Palomydes the good knyght

So whan they had takyn Þer charge they with drew hem

to make hem redy to do batayle Than seyde sir Bleobe//

rys to his broÞer Sir Blamoure Fayre dere broÞer seyde

he remembir of what kynne we be com of and what

a man is Sir Launcelot de lake noÞer farther ne nere

but brethyrne chyldirne And Þer was neuer none of oure

kynne Þat euer was shamed in batayle but rathir brothir

suffir deth than to be shamed // Brothir seyde Sir

Blamour haue ye no doute of me for I shall neuer shame

none of my bloode · how be I am sure that yondir knyȝt

ys called a passynge good knyght as of his tyme as

ony In the worlde yett shall I neue yelde me noÞer sey

Þe lothe worde // well may he happyn to smyte me dow//

ne with his grete myght of chevalry but raÞer shall he sle

me than I shall yelde me recreaunte // God spede you

f. 168 (VIII.22-3)


well seyde Sir Bleoberys for ye shall fynde hym the

myghtest knyght that euer ye had a do with all I knowe

hym for I haue had a do with hym · God me spede seyde sir

Blamour And Þer with he toke his horse at the one ende of

the lystes And sir Trystramys at the othir ende of the

lystes And so they feautred Þer spearys & com to gedyrs as

hit had be thundir And Þer sir Trystrames thorow grete

myght smote doune sir Blamour and his horse to Þe erthe

Than a none sir Blamour avoyded his horse & pulled

oute hs swerde and toke his shylde be fore hym and

bade sir Trystrames a lyght for thouȝe my horse hath

fayled I truste to god the erthe woll nat fayle me

// And than Sir Trystrames a lyght & dressed hym

vnto batayle and there they laysshed to gedir stronge//

ly rasynge foynynge and daysshynge many sad strokes

that the kynges and knyghtes had grete wondir Þat they

myght stonde for they evir fought lyke woode men

there was neuer seyne of ·ij· knyghtes that fought more

ferselyer for sir Blamour was so hasty he wolde haue no

reste that all men wondirde that they had brethe to

stonde on Þer feete that all the place was bloode that

they fought in And at the laste Sir Trystramys smote

Sir Blamour suche a buffette vppon the helme that he

Þer synked downe vppon his syde And sir Trystramys

stood stylle and be hylde hym // So whan sir Blamour

myght speke he seyde thus Sir Trystrames de lyo//

nes I requyre the as Þou art a noble knyght and the

beste knyght that euer I founde that Þou wolt sle me

oute for I wolde nat lyve to be made lorde of all the

erthe for I had leuer dye here with worshyp than lyve

here with shame / And nedis sir Trystrames Þou muste

f. 168v (VIII.23)


sle me oÞer ellys Þou shall neuer wynne Þe fylde for I woll neuer

sey the lothe worde and Þer fore yf dare sle me sle me I requy//

re the // whan sir Trystrames herde hym sey so knyghtly

in his herte he wyste nat what to do with hym · Remembrynge

hy of bothe partyes of what bloode he was commyn of And

for Sir Launcelottis sake he wolde be loth to sle hym and In

the oÞer party in no wyse he myght nat chose but to make hym

sey the lothe worde othir ellys to sle hym // Than sir Trystra//

mes sterte a backe and wente to the kynges that were Juges

and Þer he kneled downe to fore them & be sought them of there

worshyppis And for kynge Arthurs love and for sir Launce//

lottis sake that they wolde take this mater in Þer hondis for

my fayre lordys seyde sir Trystrames hit were shame and

pyte that this noble knyght that yondir lyeth sholde be slay//

ne for ye hyre well shamed woll he nat be And I pray to

god that he neuer be slayne noÞer shamed for me And as for the

kynge whom I fyght fore I shall requyre hym as I am hys

trew champyon and trew knyght in this fylde Þat he woll haue

mercy vppon this knyght // So god me helpe seyde kynge Ang//

wyshe I woll for your sake Sir Trystrames be ruled as ye woll

haue me And I woll hartely pray Þekynges that be here Juges

to take hit in there hondys // Than the kynges Þat were Juges

called sir Bleoberys to them and asked his advyce My lordys

seyde Sir Bleoberys thoughe my broÞer be beatyn and haue

the worse in his body thorow myght of armys he hath nat

beatyn his harte And thanke god he is nat shamed this day

and rathir than he be shamed I requyre you seyde sir Bleo//

berys lat Sir Trystrames sle hym oute hit shall nat be

so seyde the kynges for his parte his aduersary bothe Þe kynge and

the champyon haue pyte on sir Blamoure his knyghthode

       lordys seyde sir Bleoberys I woll ryght as ye woll

f. 169 (VIII.23-4)


Than the kynges called the kynge of Irelonde & founde

hym goodly & tretable And than by all Þer advyces sir Trys//

trames and sir Bleoberys toke vp sir Blamoure and the

ij· breÞerne were made accorded wyth kynge Angwyshe

and kyssed to gydir & made frendys for euer And than sir Bla//

moure and Sir Trystrames kyssed to gedirs and Þer they ma//

de Þer othis Þat they wolde neuer none of them ·ij· brethirne fyght

wyth sir Trystrames and sir Trystramys made them the same

othe And for Þat Jantyll batayle all the bloode of sir Launcelott

loved sir Trystrames for euer // Than kynge Angwysh· and sir

Trystrames toke Þer leve And so he sayled in to Irelonde wyth

grete nobles & Joy // So whan they were in Irelonde Þe kynge

lete make hit knowyn thorow oute all Þe londe how and In

what maner sir Trystrames had done for hym // Than Þe quene

and all Þat there were made Þe moste of hym Þat they myght But

the Joy Þat la beale Isode made of sir Trystrames Þer myght no

tunge telle for of all men erthely she loved hym moste // Than

vppon a day kynge Angwysh· asked sir Trystrames why he

asked nat his bone Than seyde sir Trystrames now hit is ty//

me Sir this is all that I woll desyre Þat ye woll gyff la beale

Isode youre doughter nat for my self but for myne vncle kyng

Marke shall haue her to wyff for so haue I promysed hym · Alas

seyde the kynge I had leuer than all the londe Þat I haue that ye

wolde haue wedded hir your self Sir and I dud so I were shamed

for euer in this worlde and false of my promyse There fore

seyde sir Trystrames I requyre you holde your promyse that ye

promysed me for this is my desyre that ye woll gyff me la bea//

le Isode to go with me in to Cornwayle for to be wedded vnto

kynge Marke myne vncle As for that kynge Angwysshe

seyde ye shall haue her with yow to do with hir what hit please

you That is for to sey if that ye lyste to wedde hir your selff

f. 169v (VIII.24)


that is me leveste and yf ye woll gyff hir vnto kynge Marke

your vncle Þat is in your choyse So to make shorte conclusyon la

beale Isode was made redy to go with sir Trystrames & dame

Brangwayne wente with hir for hir chyff Jantyll woman with

many oÞer Than quene Isodes modir gaff dame Brangway//

ne vnto hir to be hir Jantyll woman And also she & Gouernayle

had a drynke of the quene and she charged them Þat where

kynge Marke sholde wedde That same day they sholde gyff

them Þat drynke Þat kynge Marke sholde drynke to la beale Iso//

de And than seyde Þe quene ayÞer shall loue oÞer dayes of Þer lyff

So this drynke was gyvyn vnto dame Brangwayne and

vnto Gouernayle So sir Trystrames toke the see & la beale

Isode were in Þer Caban hit happed so they were thyrsty and

than they saw a lytyll flakette of golde stonde by them And

hit semed by the coloure & Þe taste Þat hit was noble wyne //

So sir Trystrames toke the flaket in his honde and seyde

Madame Isode here is a draught of good wyne that dame

Brangwayne your maydyn & Gouernayle my seruaunte hath

kepte for hem selff Than they lowȝe & made good chere &

eyÞer dranke to oÞer frely & they thought neuer drynke that euer

they dranke so swete noÞer so good to them But by Þat drynke

was in Þer bodyes they loved aythir oÞer so well that neuer hir

love departed for well noÞer for woo And thus hit happed fyrst

the love be twyxte Sir Trystrames and la beale Isode Þe

whyche love neuer departed dayes of Þer lyff // So than they

sayled tyll that by fortune they com nye a castell Þat hyght

Plewre and Þer they aryved for to repose them wenynge

to them to haue had good herborow But a none as sir

Trystrames was with In the castell they were takyn

presoners for the custom of Þat castell was suche that who

that rode by that castell & brought ony lady wyth hym

f. 170 (VIII. 24-5)


he muste nedys fyght with the lorde that hyght Brewnour

And yf hit so were that Brewnor wan Þe fylde Than

sholde Þe knyght straunger & his lady be put to deth what

that euer they were And yf hit were so Þat the straunge knyȝt

wan Þe fylde of Sir Brewnor than sholde he dye and hys

lady bothe So this custom was vsed many wyntyrs whe//

re fore hit was called Þe castell Plewre that is to sey

the wepynge castell Thus as Sir Trystrames and

la beale Isode were in preson hit happynd a knyghte

were in preson hit happed a lady com vnto them where

they were to chere them // Than seyde sir Trystrames

vnto the knyght & to the lady what is the cause Þe lorde

of this castell holdyth vs in preson for hit was neuer

the custom of placis of worshyp Þat euer I cam In // whan

a knyght & a lady asked herborow and they to receyve

them & aftir to dystres them that be his gestys sir seyde

the knyght this is the olde custom of this castell that

whan a knyght commyth here he muste nedis fyght with

oure lorde & he Þat is the wayker muste lose his hede

And whan Þat is done if his lady Þat he bryngyth be fow//

ler than is oure lordys wyff she muste lose hir hede

And yf she be fayrer preved than ys oure lady than

shall the lady of this castell lose her hede // So god

me helpe seyde sir Trystrames this is a foule custom

and a shamfull custom but one avauntage haue I

seyde sir Trystrames I haue a lady is fayre y nowe &

and I doute nat for lacke of beaute she shall nat lose

her hede and rathir than I shall lose myne hede I woll

fyght for hit on a fayre fylde // Sir knyght and your

fayre lady I pray you tell your lorde Þat I woll be redy as

to morne wyth my lady and my selff to do batayle if hit

f. 170v (VIII.25)


be so I may haue my horse and myne armoure // Sir seyde

the knyght I vndir take for youre desyre shall be spedde

& Þer fore take your reste & loke that ye be vp be tymes and

make you redy and your lady for ye shall wante no m

no thynge Þat you be hovyth And Þer with he departed & so on Þe

morne be tymys Þat same knyght com to sir Trystramys

and feched hym oute & his lady & brought hym horse

& armoure Þat was his owne & bade hym make hym

redy to the fylde for all Þe astatis & comyns of that

lordshyp were Þer redy to be holde Þat batayle & Juge//

mente Than cam sir Brewnor the lorde of Þe castell

with his lady in his honde musseled & asked sir Trystra//

mes where was his lady for & thy lady be feyrar

than myne with thy swerde smyte of my ladyes hede

And yf my lady be fayrer than thyne with my swerde

I muste stryke of hir hede And if I may wynne Þe

yette shall thy lady be myne & thow shalt lese thy

hede // Sir seyde sir Trystrames this is a foule custom

& an horryble & raÞer than my lady sholde lose hir hede

yett had I leuer lose myne hede // Nay nay seyde Sir

Brewnor the ladyes shall be fyrste shewed to gydir

and Þat one shall haue hir Jugemente Nay I wyll nat

so seyde sir Trystrames for here is none Þat woll gyff

ryghtvous Jugemente But I doute nat seyde sir Trys//

trames my lady is fayrer than youres & Þat woll I

make good with my hondys And who Þat woll sey Þe con//

trary I woll preve hit on his hede And Þer wyh sir

Trystrames shewed forth la beale Isode and turned

hir thryse a boute with his naked swerde in his honde

And so dud sir Brewnor the same wyse to his lady

But whan Sir Brewnor be helde la beale Isode

f. 171 (VIII.25-6)


hym thought he saw neuer a fayrer lady And than he

drad his ladyes hede sholde off And so all Þe people Þat

were Þer presente gaff Jugement Þat la beale Isode was

Þe fayrere lady & Þe bettir made // how now seyde Syr

Trystrames me semyth hit were pyte Þat my lady sholde

lose hir hede But by cause Þou & she of longe tyme haue

vsed this wycked custom & by you bothe hath many good

knyghtes & fayre ladyes bene destroyed for Þat cause hit

were no losse to destroy you bothe // So god me helpe

seyde sir Brewnor for to sey Þe sothe thy lady is fayrer

than myne And that me sore repentys & so I hyre the

people pryvyly sey for of all women I sawe neuer none

so fayre And there fore & Þou wolt sle my lady I doute

nat I shall sle Þe and haue thy lady // well Þou shalt wyn

her seyde sir Trystrames as dere as euer knyght wanne

lady & by cause of thyne owne Jugemente Þou woldist

haue done to my lady if Þat she had bene fowler And by

cuase of Þe evyll custom gyff me thy lady seyde Syr

Trystrames And Þer with all sir Trystrames strode vnto

hym and toke his lady frome hym And with an awke

stroke he smote of hir hede clene // well knyght seyde

Sir Brewnor now haste Þou done me a grete dispyte

Now take thyne horse & sytthen Þat I am ladyles I woll

wynne thy lady & I may Than they toke Þer horsis and

cam to gydir as hit had bne bene thundir And sir Trys//

trames smote Sir Brewnor clene from his horse

and lyghtly he rose vp And as sir Trystrames com

a gayne by hym he threste his horse thorow oute bo//

the shuldyrs Þat his horse hurled here & there & felle

dede to the grounde And euer Sir Brewnor ran afitr

to haue slayne Sir Trystrames but he was lyght &

f. 171v (VIII.26-7)


nymell and voyded his horse // yett or euer sir Trystrames

myght dresse his shylde & his swerde he gaff hym ·iij·

or ·iiij· strokys Than they russhed to gydyrs lyke ·ij·

borys trasynge & trauersynge myghtyly & wysely as ·ij·

noble knyghtes // For this sir Brewnor was a proved knyȝt

& had bene or than Þe deth of many good knyghtes // Soo

thus they fought hurlynge here & there nyȝe ·ij· owres

& aythir were wounded sore // Than at Þe laste sir Brew//

nor russhed vppon sir Trystrames and toke hym in his

armys for he trusted muche to his strengthe // Than

was Sir Trystrames calld Þe strengyst knyght of the

worlde for he was called bygger than sir Launcelotte

But sir Launcelot was bettir brethid // So anone sir

Trystrames threste sir Brewnor downe grovelynge              

And than he vnlaced his helme & strake of his hede                       

And than all they longed to the castell com to hym                       

& dud hym homage & feaute praynge hym that he                         

wolde a byde stylle Þer a lytyll whyle to for do that                   

foule customys So this sir Trystrames graunted Þer

So Þe meane whyle one of Þe knyghtes rode vnto

Sir Galahalte the haute prynce whyche was Sir

Brewnors son a noble knyght & tolde hym what

mysadventure his fadir had & his modir Than cam

Sir Galahalt and Þe kynge with Þe C· knyghtes with hym

And this Sir Galahalte profyrde to fyght wyth Sir

Trystrames hande for hande And so they made hem

redy to go vnto batayle on horse backe wyth grete

corrayge // So a none they mette to gydyrs so hard

Þat aythir bare othir a downe horse and man to the

erthe And whan they a voyded Þer horsis as noble

knyghtes they dressed Þer shyldis & drewe Þer swerdys

f. 172 (VIII.27)


wyth Ire and rancoure and they laysshed to gydyr

many sad strokys And one whyle strykynge & anoÞer

whyle foynynge tracynge & trauersynge as noble

knyghtes Thus they fought longe nere honde halff

a day & aythir were sore wounded // So at Þe laste

Sir Trystrames wexed lyght & bygge & doubled

his strokys and drove Sir Galahalt a backe on Þe

tone syne & on the tothir Þat he was nye myscheved

lyke to be slayne // So wyth Þat cam the kynge wyth

the ·C· knyghtes and all that felyshyp wente freyshly

vppon Sir Trystrames But whan Sir Trystramys

saw them comynge vppon hym Than he wyste well

he myght nat endure So as a wyse knyght of warre

he seyde vnto sir Galahalt the haute prynce Syr ye

shew to me no kyndenesse for to suffir all your men

to haue a do wyth me and ye seme a noble knyght

of your hondys hit is grete shame to you // So god me

helpe seyde sir Galahalt there is none oÞer way but

Þou muste yelde the to me oÞer ellys to dye sir Trys//

trames Sir as for Þat I woll raÞer yelde me to you Þan

dye for Þer is hit is more for the myght of thy men

than of thyne handys And Þer with all sir Trystrames to//

ke his serde by the poynte & put Þe pomell in his

honde and Þer with all com the kynge with Þe ·C· knyghtes

& harde be gan to assayle sir Trystrames lat be seyde

Sir Galahalt that ye be nat so hardy to towche hym

for I haue gyffyn this knyght his lyff // That ys

your shame seyde Þe kynge for he hath slayne youre

fadir & your modir As for that seyde Sir Galahalte

I may nat wyght hym gretly for my fadir had hym

in preso & Inforsed hym to do batayle with hym & my

f. 172v (VIII.27)


fadir hadde suche a custom Þat was a shamefull custom

Þat what knyght & lady com thydir to aske herborow/his

lady nedis dye but yf she were fayrer than my mo//

dir And if my fadir ouer com that knyght he muste

nedis dye For sothe this was a shameful custom

and vsage a knyght for his herborow askynge to

haue suche herborage And for this custom I wolde

neuer draw a boute hym // So god me helpe seyde Þe

kynge this was a shamefull custom Truly seyde

sir Galahalt so semyth me And me semyth hit had

bene grete pyte that this knyght sholde haue bene

slayne For I dare sey he is one of the noblyst knyȝtes

that beryth lyff but yf hit be sir Launcelot du lake

Now fayre knyght seyde Sir Galahalt I requyre

you telle me youre name and of whens ye ar &

whethir Þou wolte // Sir he seyde my name is sir

Trystrames de lyones and frome kynge Marke

of Cornwayle I was sente on messayge vnto kyng

Angwysh· of Irelonde for to fecche his doughtyr

to be his wyff and here she is redy to go wyth me

in to Cornwayle and her name is la beale Isode

Than seyde Sir Galahalte vnto Sir Trystramys

well be ye founde In this marchis And so ye woll

promyse me to go vnto Sir Launcelot and accom//

pany wyth hym ye shall go where ye woll and

youre fayre lady wyth you And I shall promy//

se you neuer in all my dayes shall none suche cus//

tom be vsed in this castell as hath bene vsed here

to fore // Sir seyde sir Trystrames now I late

you wete so god me helpe I wente ye had bene

Sir Launcelot du lake whan I sawe you fyrste




                              And Þer fore

f. 173 (VIII.27-8)


And there fore I dred you the more And sir I promyse

you seyde Sir Trystrames as sone as I may I woll

se sir Launcelot and In felyshyp me with hym for of all the

knyghtes in the worlde I moste desyre his felyshyp And Þan

Sir Trystramys toke his leve whan he sawe his tyme &

toke Þe see And meane whyle worde com to sir Launcelot &

to Sir Trystramys that kynge Carados the myghty kynge

that was made lyke a gyaunte whyche fought wyth Sir

Gawayne and gaff hym suche strokys Þat he sowned in his

sadyll & after Þat he toke hym by Þe coler & pulled hym oute of

his sadyll & bounde hym faste to the sadyll bowȝe & so rode

his way with hym towarde his castell And as he rode sir Launce//

lot by fortune mette with kynge Carados and anone he knew

Sir Gawayne that lay bounde be fore hym A seyde Syr

Launcelot vnto Sir Gawayne how stondyth hit wyth you

Neuer so harde seyde Sir Gawayne onles that ye helpe me

for so god me helpe with oute ye rescow me I know no knyght

Þat may but you oÞer Sir Trystrames where for Sir Launcelot

was hevy at sir Gawaynes wordys And than sir Launcelot bade

Sir Carados ley downe Þat knyght & fyght with me // Thow arte

but a foole seyde sir Carados for I woll serue the in Þe same wy//

se // As for Þat seyde sir Launcelot spare me nat for I warne the

I woll nat spare Þe And than he bounde hym hande & foote

& so threw hym to Þe grounde And than he gate his speare

in his honde of his squyre & departed frome sir Launcelot to

fecche his course & so ayÞer mette wither & brake Þer speares

to theire hondys And than they pulled oute Þer swerdys and

hurled to gydyrs on horse backe more than an owre And at

Þe laste Sir Launcelot smote Sir Carados suche a buffet on

the helme Þat hit perysshed his brayne panne // So than Syr

Launcelot toke sir Carados by Þe coler & pulled hym vndir his

f. 173v (VIII.28-9)


horse fete and than he a lyght and pulled of his helme & strake   

offe his hede // Than sir Launcelot vn bownde sir Gawayne       

So this same tale was tolde to sir Galahalte And to Syr             

Trystrames and sayde now may ye hyre Þe nobles that      

folowyth Sir Launcelot Alas seyde sir Trystrames and I

            had nat this messayge In hande with this fayre lady truly

            I wolde neuer stynte or I had founde sir Launcelot Than syr

            Trystrames and la beale Isode yeode to the see and cam

In to Cornwayle And anone all Þe barownes mette with hym

ANd a none they were rychely wedded wyth grete

nobley But evir as the Frenshe booke seyth sir Trys//

trames and la beale Isode loved euer to gedyrs Than was

Þer grete Joustys & grete turnayynge & many lordys & ladyes

were at Þat feyste And sir Trystrames was moste praysed of

all oÞer // So thus dured Þe feste longe & aftir Þe feste was

done with In a lytyll whyle aftir by the assente of ·ij· ladyes

Þat were with Þe quene they ordayned for hate & envye for to dis//

troy dame Brangwayne that was mayden & lady vnto

la beale Isode and she was sente in to the foreste for to fecch

herbys and Þer she was & bounde hounde & foote to a tre and

so she was bounden ·iij· dayes And by fortune sir Palomydes

founde dame Brangwayne and there he delyuerde hir from

the deth & brought hir to a nunry Þer be syde for to be recouerde

whan Isode the quene myssed hir mayden wete you well

she was ryght hevy as evir any quene myght be for of

all erthely women she loved hir beste & moste cause why

she cam with here oute of here contrey And so vppon a day

quene Isode walked in to the foreste to put a way hir thouȝtes

And Þer she wente hir selff vnto a welle & made grete moone

And suddeynly Þer cam sir Palomydes vnto her & herde all hir

complaynte And seyde madame Isode and ye wolde graunte

f. 174 (VIII.29-30)


me my boone I shall brynge a gayne to you dame Brang//

wayne sauff and sounde // Than the quene was so glad

of his profyr that suddaynly vnavysed she graunte all his

askynge // well madame seyde sir Palomydes I truste to

youre promyse and yf ye woll a byde halff an owre here

I shall brynge hir to you Sir I shall a byde you seyde the

quene Than sir Palomydes rode forth his way to that

nunry & lyghtly he cam a gayne with dame Brangwayne

but by hir good wylle she wolde nat haue comyn to Þe

quene for cause she stoode In adventure of hir lyff / Nat

wythstondynge halff a gayne hir wyll she cam wyth

sir Palomydes vnto the quene And whan the quene

sawe her she was passyng glad // Now madame seyde

Sir Palomydes remembir vppon your promyse for I haue

fulfylled my promyse // Sir Palomydes seyde the quene

I wote nat what is your desyre But I woll Þat ye wete

how be hit that I profyrde you largely I thought none

evyll noÞer I warne you none evyll woll I do // Madame

seyde sir Palomydes as at this tyme ye shall nat know

my desyre but by fore my lorde myne husbonde Þer shall

ye know that ye shall haue your desyre that I promysed

you And than the quene rode home vnto the kynge

and sir Palomydes rode with hir and whan sir Palo//

mydes com be fore the kynge he seyde Sir kynge

I requyre the as Þou arte ryghtvous kynge that

ye woll Juge me the ryght // Telle me your cause

seyde the kynge and ye shall haue ryght // Sir seyde

sir Palomydes I promysed youre quene my lady dame

Isode to brynge a gayne dame Brangwayne that

she had loste vppon this covenaunte that she sholde gra//

unte me a boone that I wolde aske and with oute gruc//

chynge othir advysemente she graunted me // what

f. 174v (VIII.30)


sey ye my lady seyde the kynge // hit is as he seyth so god

me helpe to sey the soth seyde the quene I promysed hym

his askynge for love and Joy I had to se her // Welle

madame seyde the kynge And yf I were hasty to graunte

what boone he wolde aske I wolde well that she perfour//

med her promyse // Than seyde sir Palomydes I woll

that ye wete that I woll haue youre quene to lede hir

and to gouerne her where as me lyste There wyth the

kynge stoode stylle and vnbethought hym of sir Trys//

trames And demed that he wolde rescowe her & than

hastely the kynge answered & seyde take hir to the and

the adventures with all Þat woll falle of hit for as I suppo//

se Þou wolt nat enJoy her no whyle // As for that seyde sir

Palomydes I dare ryght well a byde the adventure //

And so to make shorte tale sir Palomydes toke hir by the

honde and seyde madame grucche nat to go with me for

I desyre no thynge but youre owne promyse // As for Þat

seyde Þe quene wete Þou well I feare nat gretely to go

with the how be hit Þou haste me at avauntage vppon my

promyse for I doute nat I shall be worshypfully rescowed

fro the As for Þat seyde sir Palomydes be as hit be may

So quene Isode was sette be hynde sir Palomydes and

rode his way And anone Þe kynge sente vnto sir T^rystra//

mes but in no wyse he wolde nat be founde for he was

in the foreste an huntynge for Þat was all wayes hys

custom but yf he vsed armes to chace & to hunte in the

forestes // Alas seyde Þe kynge now am I shamed for

euer that be myne owne assente my lady & my quene

shall be devoured // Than cam there forth a knyght

that hyght Lambegus and he was a knyght of sir Trys//

trames My lorde seyde the knyght syth that ye haue

suche truste in my lorde sir Trystrames wete yow

f. 175 (VIII.30)


well for his sake I woll ryde aftir your quene & rescow

her oÞer ellys shall I be beatyn Graunte mercy seyde the

kynge And I lyve sir Lambegus I shall deserue hit and Þan

Sir Lambegus an armed hym & rode aftir them as faste

as she myght And than wyth in a whyle he ouer toke

hem & than sir Palomydes lefte Þe quene // And seyde

what arte Þou seyde Sir Palomydes arte Þou sir

Trystrames Nay he seyde I am his seruaunte & my

name is sir Lambegus that me repentys seyde sir Palo//

mydes I had leuer Þou had bene sir Trystrames I leve you

well seyde sir Lambegus But whan Þou metyste with sir

Trystrames Þou shalt haue bothe thy hondys full and

than they hurteled to gydyrs & all to braste Þer sperys

And than they pulled oute Þer swerdys & hewed on there

helmys & hawbirkes At Þe laste sir Palomydes gaff sir

Lambegus suche a wounde that he felle doune lyke a

dede man to the erthe // Than he loked aftir la beale

Isode and than she was gone he woste nat where // we//

te you well Þat sir Palomydes was neuer so hevy So Þe que//

ne ran In to Þe foreste & Þer she founde a well & Þer in she

had thought to haue drowned her selff And as good for//

tune wolde Þer cam a knyght to her Þat had a castell there

be syde & his name was Sir Adtherpe And whan he

founde Þe quene In that myscheff he rescowed her & brouȝt

hir to his castell And whan he wyste what he was he

armed hym & toke his horse & seyde he wolde be a ven//

ged vppon sir Palomydes and so he rode vnto Þe tyme he

mette with hym And there sir Palomydes wounded hym

sore And by force he made hym to telle Þe cause why

he dud batayle wyth hym And he tolde hym how he

ladde Þe quene la beale Isode in to hys owne castel · Now

f. 175v (VIII.30-1)


brynge me Þer seyde sir Palomydes or Þou shalt of myne han//

dis ^die // Sir seyde sir Adtherpe I am so sore wounded I may

nat folow but ryde you this way & hit shall brynge you

to my castell and Þer in is the quene sir Palomydes rode

tyll that he cam to the castell And at a wyndow la beale

Isode saw Sir Palomydes Than she made Þe yatys to be

shutte strongely // And whan he sawe he myght nat

entir in to the castell he put of his horse brydyll & his

sadyll & so put his horse to pasture & sette hym selff

downe at the gate lyke a man that was oute of his wytt

Þat recked nat of hym selff // Now turne we vnto sir

Trystrames that whan he was com home and wyste

that la beale Isode was gone with sir Palomydes wete

you well he was wrothe oute of mesure / Alas seyde

Sir Trystrames I am this day shamed Than he called

Gauernayle his man & seyde haste the that I were armed

and on horse backe for well I wote sir Lambegus hath

no myght nor strength to wythstonde sir Palomy//

des Alas I had nat bene in his stede // So anone he

was armed & horsed & rode aftir in to the foreyste

And with in a whyle he founde his knyght sir Lambegus

all moste to deth wounded // And sir Trystrames bare

hym to a foster & charged hym to kepe hym welle

And than he rode forth and founde sir Adtherpe so//

re wounded & he tolde all and how the quene had

drowned her selff had nat I bene and how for her

sake I toke vppon me to do batayle with sir Palomydes

where is my lady seyde sir Trystrames sir seyde the

knyght she is sure I nowe wyth in my castell &

she can holde her with In hit Graunte mercy seyde sir

Trystrames of thy grete goodnesse and so he rode


f. 176 (VIII.31)


tyll that he cam nyȝe his castell And than sir Palomy//

des sate at Þe gate & sawe where sir Trystrames cam

and he sate as he had slepe and his horse pastured

a fore hym // Now go Þou gouernayle seyde sir Trys//

trames and bydde hym a wake & make hym redy

So Gouernayle rode vnto hym and seyde sir Palomy//

des a ryse and take to thyne harneys But he was

In suche a study he herde nat what he seyde So Go//

vernayle com a gayne to sir Trystrames & tolde

hym he slepe or ellys he was madde Go Þou a gayne

seyde sir Trystrames and bydde hym a ryse and telle

hym I am here his mortall foo So Gouernayle rode

a gayne and putte vppon hym with the but of his spe//

re And seyde sir Palomydes make Þe redy for wete

Þou welle sir Trystrames hovyth yondir & sendyth the

worde he is thy mortall foo // And Þer with all sir Palo//

mydes a rose stylly with oute ony wordys and gate

hys horse a none and sadylled hym & brydylled hym

and lyghtly he lepe vppon hym and gate his spere

in his honde and aythir feautred Þer spearys & hurled

faste to gedyrs And anone sir Trystrames smote

downe sir Palomydes ouer his horse tayle // Than lyȝt//

ly sir Palomydes put his shylde be fore hym and

drew his swerde and Þer be gan stronge batayle on

bothe partyes for bothe they fought for the love of on

lady and euer she lay on the wallys & be hylde them

how they fought oute of mesure & aythir were woun//

ded passynge sore But sir Palomydes was muche

sorer wounded for they fought thus trasynge & tra//

versynge more than ij· owres Þat well nyȝe for

doole and sorow la beale Isode sowned And seyde alas

f. 176v (VIII.31-2)


that one I loved and yet do and the oÞer I love nat that they

sholde fyght // And yett hit were grete pyte that I sholde se

Sir Palomydes slayne for well I know by that Þe ende

be done Sir Palomydes is but a dede man by cause Þat he

is nat crystened And I wolde be loth that he sholde dye a

Sareȝen And Þer with all she cam downe and be sought hem for

her love to fyght no more / A madame seyde sir Trystrames

what meane you woll ye haue me shamed for well ye

know that I woll be ruled by you / A myne awne lorde sey//

de la beale Isode full well ye wote I wolde nat your dyshonour

But I wolde Þat ye wolde for my sake spare this vnhappy

Sareȝen sir Palomydes Madame seyde sir Trystrames I

woll leve for youre sake // Than seyde she to Sir Palo//

mydes This shall be thy charge Þou shalt go oute of this

contrey whyle I am quene Þer off / Madame I woll obey

your commaundemente seyde sir Palomydes whyche is sore

a yenste my wylle // Than take thy way seyde la beale Isode

vnto the courte of kynge Arthure And there recommaunde me

vnto quene Gwenyvere and tell her that I sende her worde

Þat Þer be with in this londe but ·iiij· lovers And that is sir Launce//

lot and dame Gwenyuer And Sir Trystrames & quene

Isode and so Sir Palomydes departed with grete hevynesse

And sir Trystrames toke the quene & brought her a gayne

vnto kynge Marke And than was Þer made grete Joy of

hir home commynge Than who was cheryshed but Sir

Trystrames Than Sir Trystrames latte fecche home

Sir Lambegus his knyght frome Þe forsters house and

hit was longe or he was hole But so at Þe laste he recouer//

de thus And thus they lyved with Joy & play a longe whyle

But euer sir Andret that was nye Cosyn vnto sir Trystrams

lay in a wayte be twyxte sir Trystrames and la beale Isode

f. 177 (VIII.32)


for to take hym and devoure hym // So vppon a day sir

Trystrames talked with la beale Isode In a wyndowe And

Þat a spyed Sir Andred and tolde the kynge Than kyng Mar//

ke toke a swerde in his honde & cam to sir Trystrames &

called hym false traytowre and wolde haue stryken hym

but sir Trystrames was nyȝe hym & ran vndir his swerde

and toke hit oute of his honde And than the kynge cryed

Where ar my knyghtes & my men I charge you sle this tray//

towre But at Þat tyme Þer was nat one Þat wolde meve for

his wordys // Whan sir Trystrames sawe Þer was none Þat

wolde be a yenste hym he shoke hys swerde to the kynge

and made countenaunce as he wolde haue strykyn hym

And than kynge Marke fledde and sir Trystrames folo//

wed hym and smote hym ·v· or vj· strokys flatlynge in

Þe necke Þat he made hym falle on the nose And than sir Trys//

trames yode his way and armed hym & toke his horse &

his men & so he rode in to the foreste And Þer vppon a day

Sir Trystrames mette with ·ij· breÞerne Þat were were wyth

kynge Marke knyghtes And Þer he strake of the hede of the

tone broÞer and wounded that oÞer to the deth and he made

hym to bere Þe hede in his helme and ·xxxti·mo he Þer woun//

ded And whan Þat knyght com be fore Þe kynge to say hys

message he dyed Þer be fore Þe kynge & Þe quene Than kyng

Marke called his counceyle vnto hym & asked avyce of his

barownes what were beste to do with sir Trystrames Sir

seyde Þe barowns and in especiall sir Dynas the Senesciall

we woll gyff you counceyle for to sende for sir Trystra//

mes for we woll Þat ^ye we wete many men woll holde with

Sir Trystrames and he were harde be stadde // And sir

seyde Sir Dynas the Senesciall ye shall vndirstonde

that sir Trystrames ys called peereles and makeles of

f. 177v (VIII.32-3)


ony crystyn knyght and of his myght and hardynes we

know none so good a knyght but yf hit be sir Launcelot //

du lake and yff he departe frome your courte And go to kyng

Arthurs courte wete you well he woll so frende hym

Þer that he woll  nat sette by your malyce And Þer fore sir I

counceyle you to take hym to your grace I woll well seyde

Þe kynge Þat he be sente fore Þat we may be frendys // Than

Þe barounes sente for sir Trystrames vndir theire con//

duyte And so whan sir Trystrames com to the kynge he

was well com and no rehersall was made And than

Þer was game and play And than the kynge & Þe quene

wente an huntynge and sir Trystrames S^o the kynge

and the quene made Þer pavylons & Þer tentes in Þat foreste

be syde a ryver and Þer was dayly Justyng & huntyng for

Þer was euer redy ·xxxti· knyghtes to Juste vnto all Þat cam

at that tyme And Þer by fortune com sir Lamorak de galis

and Sir Dryaunte And Þer Sir Dryaunte Justed well

but at the laste he had a falle // Than sir Lamorak pro//

fyrde And whan he be gan he fared so wyth the ·xxxti

knyghtes Þat Þer was nat one off them but he gaff a falle

and som of them were sore hurte I mervayle seyde

kynge Marke what knyght he is Þat doth suche dedis

of armys // Sir seyde sir Trystrames I know hym well

for a noble knyght as fewe now be lyvynge And his

name is sir Lamerake de galys hit were shame seyde

Þe kynge that he sholde go thus a way onles that he

were manne handeled Sir seyde sir Trystrames me

semyth hit were no worshyp for a noble man to haue

a do with hym // And for this cause for at this tyme he

hath done ouer muche for ony meane knyght lyvynge

And as me semyth seyde sir Trystrames hit were

f. 178 (VIII.33)


shame to tempte hym ony more for his horse is wery

and hym selff bothe done this day // well concidered·

hit were I now for sir Launcelot du lake As for that seyde

kynge Marke I requyre you as ye love me & my lady

the quene la beale Isode take youre armys and Juste

with sir Lameroke de galis Sir seyde sir Trystrames ye

bydde me do a thynge that is a yenste knyghthode and

well I can thynke that I shall gyff hym a falle for hit

is no maystry for my horse and y be freysshe and so is

nat his horse & he And wete you well that he woll ta//

ke hit for grete vnkyndenes for euer one good knyght

is loth to take a nothir at a vauntage But by cause

I woll nat displase as ye requyre me so muste I do

and obey youre commaundemente // And so sir Trystra//

mes armed hym and toke his horse and putte hym

forth And Þer sir Lameroke mette hym myghtyly and

what with the myght of his owne spere and of syr

Trystrames spere Sir Lameroke his horse felle to

the erthe and he syttynge in the sadyll // So as sone

as he myght he a voyded the sadyll and his horse

and put his shylde a fore hym and drewe his

swerde And than he bade sir Trystrames a lyght

Þou knyght and Þou darste // Nay sir seyde sir Trystra//

mes I woll no more haue a do wyth you for I

haue done the ouer muche vnto my dyshonoure

and to thy worshyppe // As for that seyde sir Lamerok

I can no the no thanke syn Þou haste for Justed me

on horse backe I requyre the and I be seche the

and Þou be sir Trystrames de lyones feyght with

me on foote I woll nat seyde sir Trystrames

And wete you well my name is sir Trystrames

f. 178v (VIII.33-4)


de lyones and well I know that ye be sir Lamerake de galis

and this haue ^I done to you a yenst my wyll but I was

requyred Þer to but to sey Þat I woll do at your requeste as

at this tyme I woll nat haue no more a do with you at

this tyme for me shamyth of Þat I haue done // As for

Þe shame seyde sir Lamerake on thy party or on myne beare

Þou hit & Þouwyll // For thouȝe a marys sonne hath fayled

me now · yette a quenys sonne shall nat fayle Þe & Þer fore

& Þou be suche a knyght as men calle Þe I requyre Þe a lyȝt

& fyght with me sir Lameroke seyde sir Trystrames I vndir//

stonde your harte is grete And cause why ye haue to sey Þe

soth for hit wolde greve me & ony good knyght sholde

kepe hym freyssh And than to stryke downe a wery knyght

for Þat knyght noÞer horse was neuer fourmed Þat all way

may endure And Þer fore seyde sir Trystrames I woll nat

haue a do with you for me for thynkes of Þat I haue done · As

for Þat seyde sir Lameroke I shall quyte you & euer I se my ty//

me // So he departed frome hym with sir Dryaunte and

by Þe way they mette with a knyght Þat was sente fro dame

Morgan le fay vnto kynge Arthure And as this knyȝt

had a fayre horne harneyste with golde And Þe horne had

suche a vertu Þat Þer myght no lady dry nothir Jantyll wo//

man drynke of Þat horne but yf she were trew to hir hus//

bande & if she were false she sholde spylle all Þe drynke

& if she were trew to her lorde she myght drynke Þer of

pesible And be cause of Þe quene Gwenyvere and in Þe

dispyte of sir Launcelot this horne was sente vnto kynge

Arthure And so by forse sir Lameroke made Þat knyght to

telle all Þe cause why he bare Þe horne And so he tolde hym

all hole // Now shalt Þou bere this horne seyde sir Lamerok

to kynge Marke othir chose to dye · For in Þe dyspyte of Sir

f. 179 (VIII.34)


Trystrames Þou shalt bere hit hym Þat horne And sey that I

sente hit hym for to assay his lady And yf she be trew he shal·

preve her // So this knyght wente his way vnto kynge

Marke and brought hym Þat ryche horne & seyde Þat sir Lamerok

sente hit hym And so he tolde hym Þe vertu of Þat horne // Than

Þe kynge made his quene to drynke Þer of & an ·C· ladyes with

her And Þer were but ·iiij· ladyes of all tho Þat dranke clene

Alas seyde kynge Marke this is a grete dyspyte & swore a

grete othe Þat she sholde be brente & Þeer ladyes also // Than

Þe barowns gadred them to gedyrs & seyde playnly they wol//

de nat haue tho ladyes brente for an horne made by sorsery

Þat cam frome Þe false sorseres & wycche moste Þat is now lyvyng

for Þat horne dud neuer good but caused stryff & bate & all way

in her dayes she was an enemy to all trew lovers // So Þer

were many knyghtes made Þer a vowe Þat & euer they mette wyth

Morgan le fay that they wolde shew her shorte curtesy // Also

Syr Trystrames was passyng wroth Þat sir Lameroke sent

Þat horne vnto kynge Marke for well he knew Þat hit was

done in Þe dispyte of hym And Þer fore he thought to quyte

Sir Lameroke Than Sir Trystrames vsed dayly and

nyghtly to go to quene Isode evir whan he myght And euer

sir Andret his cosyn wacched hym nyght by nyght for to

take hym with la beale Isode And so vppon a nyght sir Andret

aspyed his owre & Þe tyme whan sir Trystrames went to

his lady // Than sir Andret gate vnto hym ·xij· knyghtis

And at mydnyght he sette vppon sir Trystrames secretly

& suddeynly And Þer sir Trystrames was takyn nakyd a bed

with la beale Isode and so was he bounde hande & foote and

kepte tyll day / And than by Þe assente of kynge Marke and of

Sir Andret and of som of Þe barownes Sir Trystramys

was lad vnto a chapell Þat stood vppon Þe see rockys there

f. 179v (VIII.34)


for to take his Jugemente And so he was lad bounden

with xl· knyghtes And whan sir Trystrames saw Þat Þer was

none oÞer boote but nedis he muste dye // Than seyde he

fayre lordis remembir what I haue done for the Contrey

of Cornwayle & what Jouparte I haue bene In for Þe wele of

you all // For whan I fought with sir Marhalte the good knyȝ

I was promysed to be bettir rewarded whan ye all refused

to take Þe batayle Þer fore as ^ye be good Jantyll knyghtes se me

nat thus shamfully to dye for hit is shame to all knyght//

hode thus to se me dye // For I dare sey seyde sir Trystrams

that I mette neuer with no knyght but I was as good as he or better

// Fye vppon Þe seyde sir Andrete false traytur thow arte with

thyne advauntage for all thy boste Þou shalt dye this day // A

my kynnysman And now arte to me full vnfrendely But

& Þer were no more but Þou & I Þou woldyst nat put me to deth

No seyde sir Andred And there with he drew his swerde & wolde

haue slayne hym // So whan sir Trystrames sye hym

make Þat countenaunce he loked vppon bothe his hondis Þat

were faste boundyn vnto ·ij· knyghtes & suddeynly he pulde

them bothe vnto hym and vnwrayste his hondis & lepe

vnto his cosyn sir Andred and wroth his swerde oute of

his hondis · And than he smote sir Andret that he felle dow//

ne to the erthe · And so he fought Þat he kylde ·x· knyghtys

So than sir Trystrames gate the chapell & kepte hyt

myghtyly Than the crye was grete & peple drew faste

vnto sir Andret mo than an ·C· So whan sir Trystramys

saw the peple draw vnto hym he remembyrd he was

naked and sparde faste Þe ch chapell dore & brake the

brev barrys of a wyndow & so he lepe oute & felle vppon

the craggys in Þe see And so at Þat tyme sir Andret nothir

f.180 (VIII.34-5)


none of his felowys myght nat gete hym But whan they

were departed Gouernayle and Sir Lambegus And Sir Sen//

trayle de lushon that were sir Trystrames men fought sore

aftir Þer maystir whan they herde he was a scaped And so on

Þe robbys they founde hym & with towels pulde hym vp / And

than Sir Trystrames asked where was la beale Isode sir

seyde Gouernayle she is put in a laȝar cote // Alas seyde sir

Trystrames that is a full vngoodly place for suche a

fayre lady And yf I may she shall nat be longe Þer And so

he toke hys men & wente Þer as was la beale Isode and

sette her a way & brought hir in to a fayre foreste to a

fayre maner And so he a bode there with hir // So now this

good knyght bade his men departe For at Þat tyme he myght

at helpe them And so they departed all save Gouernayle &

so vppon a day sir Trystrames rode in to the foreste for to

disporte hym And Þer he felle on slepe And so happynde there

cam to sir Trystrames ^a Ja man Þat he had slayne his brothir

And so whan this man had founde hym he shotte hym tho//

row Þe sholdir And anone sir Trystrames sterte vp & kylde

Þat man And In Þe meane tyme  hit was tolde vnto kynge·

Marke how Sir Trystrames and la beale Isode were

in Þat same maner And thydir he cam with many knyghtes to sle

Sir Trystrames And whan he cam there be founde hym

gone And anone he toke la beale Isode home with hym and

kepte her strayte Þat by no meane she myght neuer wryght

nor sende // And whan sir Trystrames com toward Þe

maner he founde Þe tracke of many horse // And loked a boute

in Þe place & knew Þat his lady was gone And than Sir

Trystrames toke grete sorow & endured with grete sorow

and payne longe tyme · For the arow Þat he was hurte

wyth all was envenomed // So by Þe meane of la beale Isode

f. 180v (VIII.35-6)


she made a lady Þat was Cosyn vnto dame Brangwayne

and she cam vnto sir Trystrames and tolde hym that he

myght nat be hole by no meanys · For thy lady Isode

may nat helpe Þe there fore she byddyth you haste you

in to Bretayne vnto kyng howell And Þer shall ye fyn//

de his doughter Þat is called Isode le blaunche maynes And

Þer shall ye fynde his Þat she she shall helpe you // Than sir

Trystrames and Gouernayle gate them shyppyng And

so sayled in to Bretayne // And whan kyng howell

knew Þat it was sir Trystrames he was full glad of

hym // Sir seyde Sir Trystrames I am com vnto this

contrey to haue helpe of youre doughter & so she heled hym

There was an Erle Þat hyght Grype And thys

Erle made grete warre vppon hym and putte

the kynge to Þe worse & be seged hym And on a tyme

sir keyhydyns that was sonne to the kynge howell

and as he Issewed oute he was sore wounded nyȝe to

Þe deth // Than Gourenayle wente to the kynge  and

seyde sir I counceyle you to desyre my lorde sir Trystra//

mes as in your nede to helpe you // I woll do by youre

counceyle seyde Þe kynge And so he yode vnto sir Trys//

trames and prayde hym as in his warrys to helpe

hym for my sonne sir keyhidyns may nat go vnto the

fylde // Sir seyde sir Trystrames I woll go to the

fylde & do what I may // So Sir Trystrames Issued

oute of the towne wyth suche felyshyp as he myght

make and ded suche dedys Þat all Bretayne spake of

hym And than at Þe laste by grete force he slew Þe erle

Grype his owne hondys & mo than an ·C· knyghtes he

slew Þat day And than sir Trystrames was resceyved

in to Þe cyte worshypfully with procession // Than kyng





f. 181 (VIII.36)


howell enbraced hym In his armys And seyde sir Trystra//

mes all my kynge dom I woll resygne to you // God de//

fende seyde sir Trystrames for I am be holdyn Þer to for

your doughtyrs sake to do for you more than that // So

by Þe grete meanes of Þe kynge & his sonne Þer grewe

grete love be twyxte Isode and sir Trystrames for Þat

lady was bothe goode & fayre and a woman of noble

bloode & fame And for be cause Þat sir Trystrames had

suche chere and ryches & all oÞer plesaunce Þat he had all

moste for sakyn la beale Isode And so vppon a tyme sir

Trystrames aggreed to wed this Isode le blaunche/

maynes and so at Þe laste they were wedded & solemp//

ly hylde Þer maryayge // And so whan they were a bed

both sir Trystrames remembirde hym of his olde

lady la beale Isode And than he toke such a thoughte

suddeynly that he was all dismayde & oÞer chere made he

none noÞer with clyppynge & kyssynge as for fleyshely lus//

tys sir Trystrames had neuer a do with hir suche mencion

makyth Þe freynshe booke // Also hit makyth menci//

on that the lady wente Þer had be no plesure but kyssyng

& clyppynge And In the meane tyme Þer was a knyght

in Bretayne his name was sir Suppynabyles and he

com ouer the see in to Inglonde And so he com in to the

courte of kynge Arthure And Þer he mette with sir Launce//

lot du lake and tolde hym of the maryayge of Sir

Trystrames Than seyde sir Launcelot fye vppon hym

vntrew knyght to his lady Þat so noble a knyght as sir

Trystrames is sholde be founde to his fyrst lady and

love vntrew Þat is Þe quene of Cornwayle But sey

ye to hym thus seyde sir Launcelot that of all knyghtes

in the worlde I haue loved hym & all was for his noble

f. 181v (VIII.36-7)


dedys And lette hym wete Þat the love be twene hym and

me is done for euer And Þat I gyff hym warnyng from

this day forth I woll be his mortall enemy So depted

sir Suppynabiles vnto bretayne a gayne & Þer he founde

sir Trystrames and tolde hym Þat he had bene In kynge

Arthures courte // Than sir Trystrames seyde herd

ye ony thynge ^or me So god me helpe seyde sir Suppy//

nabyles Þer I harde Sir Launcelot speke ^of you/grete

shame And that ye ar a false knyght to youre lady

And he bade me do you to wyte Þat he woll be youre

mortall foo in euery place where he may mete you

That me repentyth seyde sir Trystrames for of all

knyghtes I loved moste to be in his felyshyp Than sir

Trystrames was a shamed & made grete mone

Þat euer any knyghtes sholde defame hym for the sake of

his lady And so in this meane whyle la beale Isode

made a lettir vnto quene Gwenyvere complaynyng

her of the vntrouthe of Sir Trystrames how he had

wedded Þe kynges doughter of Bretayne // So quene

Gwenyuer sente hir a noÞer letter & bade her be of goode

comforte for she sholde haue Joy aftir sorow for sir

Trystrames was so noble a knyght called Þat by craft

of sorsery ladyes wolde make suche noble to wedde

them but Þe ende quene Gwenyuer seyde shulde be thus

Þat he shall hate her & love you bettir than euer he dud

// So leve we sir Trystrames in Bretayne & speke

we of sir Lameroke de galys Þat as he sayled his shyppe

felle on a rocke & disperysshed all save sir Lameroke

and his squyer for he swamme so myghtyly Þat fysshers

of Þe Ile of servayge toke hym vp And his squyer

was drowned and the shypmen had grete laboure

f. 182 (VIII.37-8)


to save sir Lameroke his lyf for all Þe comforte Þat they

coude do And Þe lorde of that Ile hyght sir Nabon

le noyre a grete myghty gyaunte And thys Sir

Nabon hated all the knyghtes of kynge Arthures

and in no wyse he wolde do hem no favoure And

thes fysshers tolde sir Lameroke All Þe gyse of Syr

Nabon how Þer com neuer knyght of kynge Arthurs

but he distroyed hym And the laste batayle Þat euer he

ded was wyth Sir Nanowne le Petyte and whan

he had wonne hym he put hym to a shamefull deth

in the despyte of kynge Arthure he was drawyn

lym meale // That for thynkes me seyde sir Lamerok

for that knyghtes deth for he was my cosyn And yf

I were at myne ease as well as euer I was I wolde

revenge his deth // Pease seyde Þe fysshers & make

here no wordys for or euer ye departe frome hens sir

Nabon muste know Þat ye haue bene here othir ellis

we shall dye for your sake // So that I be hole seyde sir

Lameroke of my mysse ease Þat I haue takyn in the

see I woll that ye telle hym that I am a knyght

of kynge Arthures for I was neuer ferde to reuayne

Now turne we vnto sir Trystrams ¶ My lorde

that vppon a day he toke a lytyll barget and

and hys wyff Isode le blaunce maynys wyth Syr

keyhydyns her broÞer to sporte hem on the costis / And

whan they were frome Þe londe Þer was a wynde

Þat drove hem in to the coste of walys vppon this Ile

of servage where as was sir Lameroke and there

Þe barget all to rove And Þer dame Isode was hurte

and as well as they myght they gate in to Þe forest

And Þer by a well he sye sir Segwarydes and a

f. 182v (VIII.38)


damesell with hym And than aythir salewed oÞer sir seyde

Sir Segwarydes I know you well for sir Trystramys

de lyones the man in the worlde Þat I haue moste

cause to hate by cause ye departed Þe love be twene

me & my wyff But as for that seyde sir Segwary//

des I woll neuer hate a noble knyght for a lyght

lady And Þer fore I pray you to be my frende and

I woll be yourys vnto my power for wete you well

ye ar harde be stadde in this valey And we shall

haue I nowe a do ayÞer to succoure oÞer And so Sir

Segwarydes brought sir Trystrames to a lady

Þer by that was borne in Cornwayle And she tolde

hym all Þe perels of Þat valay how Þer cam neuer knyȝt

there but he were takyn presonere or slayne //

wete you well fayre lady seyde sir Trystrames

that I slewe sir Marhalte and delyuerde Cornwayle

frome Þe trewage of Irelonde And I am he that

delyuerde the kynge of Irelonde from sir Blamoure

de Ganys and I am he that bete sir Palomydes

and wete you well Þat I am sir Trystrames de lyo//

nes that by the grace of god shall delyuer this Ile

wofull Ile of seruage so sir Trystrames was wel·

eased Þat nyght Than one tolde hym Þer was a knyȝt

of kynge Arthurs that wracc wrakked on Þe rockes

what is his name seyde sir Trystrames we wote

nat seyde the fysshers but he kepyth hit no counsel·

that he is a knyght of kynge Arthurs And by Þe

myghty lorde he settyth nought // I pray you seyde

Sir Trystrames and ye may brynge hym hydir

Þat I may se hym And if he be ony of Þe noble knyt

knyghtes I know hym Than the good lady prayde

f. 183 (VIII.38)


the fysshers to brynge hym to hir place // So on the

morne they brougt hym thydir in a fysshers gar//

mente And as sone as sir Trystrames sy hym he smy//

led vppon hym and knew hym well But he knew

nat sir Trystrames Fayre sir seyde sir Trystrams

me semyth be youre chere that ye haue bene dese//

sed but late // And also me thynkyth I sholde know

you here to forne // I woll well sedye sir Lamerok

that ye haue seyne me for the nobelyst knyghtes of

the table rownde haue seyne me & mette with me

Fayre sir seyde sir Trystrames telle me youre

name // Sir vppon a covenaunte I woll tell you

so that ye telle me wheÞer Þat ye be lorde of thys

Ilonde or no that is callyd sir Nabon le noyre

I am nat noÞer I holde nat of hym but I am his foo

as well as ye be And so shall I be founde or I de//

parte of this Ile // well seyde sir Lamerok syn ye

haue seyde so largely vnto me my name is Syr

Lamerok de galys son vnto kynge Pellynore for

sothe I trow well seyde sir Trystrams fore and ye

seyde oÞer I know the contrary // what ar ye seyde

Sir Lamerok that know so me For sothe sir I am

sir Trystrames de lyones A sir r^emembir ye nat of

Þe fall ye dud gyff me onys and aftir that ye re//

fused to fyght on foote with me // Sir that was

nat for no feare that of you but me shamed at

Þat tyme to haue more a do with you for as me se//

med ye had I nowe a do But sir wete you well

for my kyndenesse ye put many ladyes to a re//

preff whan ye sent the horne from Morgan//

le fay vnto kynge Marke and hit sholde haue

f. 183v (VIII.38-9)


gone to kynge Arthure where as ye dud Þat in dispyte

of me // well seyde he and hit were to do a gayne so wolde

I do for I had leuer stryff and debate felle in kyng Markys

courte rether than in kynge Arthurs courte for Þe honour

of bothe courtes be nat lyke // As to Þat seyde sir Trystrams

I know well // But that Þat was done was done for dispy//

te of me but all youre malyce I thanke god hurte nat

gretly · there fore syde seyde sir Trystrames ye shall leve

all youre malyce & so woll I and lette vs assay how we

may wynne worshyp be twene you & me vppon this gyaunte

Sir Nabon le noyre that is lorde of this Ilonde to destroy

hym // Sir seyde Sir Lameroke now I vndirstonde youre

knyghthode hit may nat be false Þat all men sey for of youre

bounte nobles & worshyp of all knyghtes ye ar pereles

& for your curtesy & Jantylnes I shewed you vnkyndnesse and

that now me repentyth So in the meane tyme cam wor//

de Þat sir Nabon had made a cry that all people sholde be

at his castell the ·v· day aftir And the same day the sonne

of Nabon sholde be made knyght & all the knyghtes of Þat

valey and there a boute sholde be there to Juste And all

tho of Þe val Realme of Logrys sholde be Þer to Juste wyth

them of northe walys and thydir cam ·v·C· knyghtes And so

they of Þe contrey brought thydir sir Lamerok and sir Trys//

trames and sir keyhydyns and sir Segwarydes for they

durste none oÞer wyse do And than Nabon lete sir Lamerok

horse and armour at his owne desyre And so sir Lamerok

Justed and dud suche dedis of armys Þat sir Nabon and all Þe

people seyde Þer was neuer knyght that euer they sie Þat dud such

dedis of armys for as Þe booke seyth he for Justed all that

were Þer for the moste party of ·v·C· knyghtes Þat none a bode

hym in his sadyll // Than sir Nabon profirde sir Lamerok

f. 184 (VIII.39)


to play his play with hym for I saw neuer one knyght do so

muche vppon one day // I woll well seyde sir Lameroke

play as I may but I am wery and sore brused & Þer aythir

gate a speare but this sir Nabone wolde nat encountir

with sir Lameroke but smote his horse in the forhede & so slew

hym And than sir Lameroke yode on foote and turned his

shylde and drew his swerde and Þer be gan stronge batayle

on foote // But sir Lameroke was so sore brused & shorte

brethid Þat he traced and trauersed som what a backe // Fayre

felow seyde sir Nabone holde thy honde and I shall shewe Þe

more curtesy than euer I shewyd knyght be cause I haue sene

this day thy noble knyghthode And there fore stonde Þou by

and I woll wete whethir ony of thy felowys woll haue

a do with me // whan sir Trystrames harde Þat he seyde sir

Nabone lende me horse and sure armoure and I woll

haue a do with you well felow seyde sir Nabone go Þou to

yondir pavylyon and arme Þe of the beste Þou fyndyst there

& I shall play sone a mervayles pley wyth Þe Than seyde

sir Trystrames loke ye play well oÞer ellys paraventure I

shall lerne you a new play // That is well seyde seyde sir

Nabone So whan sir Trystrames was armed as hym

lyked beste & well shylded & swerded he dressed to hym on

foote for well I know Þat sir Nabone wolde nat a byde a stroke

with a speare And Þer fore he woll sle all knyghtes horse // Now

fayre felow seyde sir Nabone latte vs play And so they fouȝt

longe on foote trasynge and trauersynge smytynge and foy//      

nynge longe with oute ony reste // So at Þe laste sir Nabone         

prayde hym to tell hym his name Sir seyde he my name                 

is sir Trystrames de lyones a knyght of Cornwayle why//               

che am vndir kynge Marke A Þou arte well com seyde                

sir Nabone for of all knygtes I haue moste desyred to fyght           

f. 184v (VIII.39-40)


wyth all othir ellys wyth sir Launcelot And so they wente

than egerly to gydir that at Þe laste sir Trystrames slew

sir Nabone And so forth with all he lepe to his sonne and

strake of his hede // Than all the contrey seyde they wol//

de holde of sir Trystrames all the hole valay of servage

Nay seyde sir Trystrames I woll nat so · For here is a wor//

shypfull knyght Sir Lameroke de galys that for me

he shall be lorde of this Ile For he hath done here grete

dedis of armys // Nay seyde sir Lameroke I woll nat be

lorde of this contrey for I haue nat deserued hit as well

as ye Þer fore gyff ye hit where ye woll for I woll haue

// well seyde sir Trystrames syn ye noÞer I woll nat haue

hit lett vs gyf hit vnto hym that hath nat so well

deserued hit // Sir do as ye lyste for the gyfte is owres

for I woll none and I had deserued hit And so by assente

hit was yevyn vnto sir Segwarydes And he thanked

them and so was he lorde & worshypfully he dud gouerne

hem And than sir Segwarydes delyvirde all Þe presoners

& sette good gouernaunce in Þat valey And so he turned in

to Cornwayle and tolde kynge Marke and la beale Isode

how sir Trystrames had avaunced hym in Þe Ile of ser//

vayge And Þer he proclaymed in all Cornwayle of all

the aventures of thes ·ij· knyghtes And so was hit opynly

knowyn But full wo was la beale Isode whan she her//

de telle that sir Trystrames had with hym Isode le blaun//

che maynys // So turne we vnto sir Lamerok that rode

towarde Kynge Arthures courte And so sir Trystramys

wyff & sir keyhydyns toke a vessell & sayled in to Bretay//

ne vnto Kynge howell where they were well com &

whan they herde of thes adventures they mervayled

of his noble dedys // Now turne we vnto sir Lameroke

f. 185 (VIII.40)


that whan he was departed frome sir Trystrames he rode

oute of the foreste tyll he cam to an Ermytage And whan

the Ermyte sawe hym he asked frome whens he com · sir

I am com frome this valey // That mervayle we off

for this ·xxti· wyntir seyde Þe Ermyte I saw neuer knyȝt

passe this contrey but he was oÞer slayne oÞer vylansely

wounded or passe as a poore presonere // Sir tho evyll

customys are for done seyde sir Lameroke for sir Trys//

trames hath slayne youre lorde Sir Nabone and his

sonne // Than was the Ermyte glade and all his bre//

thirne for he seyde Þer was neuer suche a tirraunte a

monge crystyn men And Þer fore seyde the Ermyte Þis

valey & fraunchyse shall euer holde of sir Trystrames

So on the morne sir Lameroke departed and as he rode

he sawe ·iiij· knyghtes fyght a yenste one & Þat one knyȝt

defended hym well but at Þe laste the ·iiij· knyghtes had

hym downe // And than sir Lameroke wente be twexte

them and asked them why they wolde sle Þat one knyght

and seyde hit was shame ·iiij· a yenste one // Thow

shalt well wete seyde Þe ·iiij· knyghtes that he is false

So that ^is your tale seyde sir Lameroke And whan I here hym

speke I woll sey as ye sey Sir seyde sir Lameroke how

sey you can ye nat excuse you none oÞer wyse but that

ye ar a false knyght // Sir yett can I excuse me bothe

with my worde and with my hondys And that woll I make

good vppon one of the beste of them my body to his body

Than spake they all at onys we woll nat Jouparte

oure bodyes But wete Þou welle they seyde and kynge

Arthure were here hym selff hit sholde nat lye in his

power to save his lyff · That is seyde to largely seyde

Sir Lamerok but many spekyth be hynde a man more

f. 185v (VIII.40)


than he woll seye to his face And for be cause of youre

wordis ye shall vndirstonde Þat I am one of Þe symplyst

of kynge Arthures courte And in Þe worshyp of my

lorde now do your beste and in Þe dispyte of you I shall

rescow hym And than they layshed all at onys to Syr

Lameroke But at ij· strokis he had slayne ·ij of them

Than the oÞer ·ij· fled // So than sir Lamerok turned

a gayne vnto that knyght and horsed hym & asked

hym his name // Sir my name is sir Froll of Þe oute

Ilys And so he rode with Sir Lameroke and bare hym

company And as they rode by the way they sawe a

semely knyght rydynge and commynge a yenst them

and all In whyght // A seyde sir Froll yondir knyght

Justed but late wyth me and smote me downe Þer

fore I woll Juste with hym // ye shall nat do so seyde

Sir Lamerok be my counceyle and ye woll tell me

your quarell where ye Justed at his requeste oÞer he

at youres Nay seyde sir Froll I Justed with hym at my

requeste Sir than woll I counceyle you deale no mo//

re with hym for lyke his countenaunce he sholde be/a

noble knyght and no Japer for me thynkys he sholde

be of Þe rounde table // As for Þat I woll nat spare seyde

sir Froll Than he cryed and seyde sir knyght make Þe

redy to Juste That nedyth nat seyde Þe whyghte

knyght for I haue no luste to Jape noÞer Juste So they

feautred Þer sperys and Þe whyght knyght ouerthrewe

Sir Froll and than he rode his way a soffte pace //

Than Sir Lameroke rode aftir hym & prayde hym

to tell his name for me semyth ye sholde be of the

felyshyp fo Þe rounde table // Sir vppon a covenaunte

f. 186 (VIII.40-1)


that ye woll nat telle my name And also that ye woll

tell me youres // Sir my name is sir Lamerok de galis

And my name is sir Launcelot du lake Than they putt

vp Þer swerdys and kyssed hertely to gydirs & aythir ma//

de grete Joy of oÞer Sir seyde sir Lameroke and hit please

you I woll do you seruyse // God deffende sir Þat ony of so no//

ble a blood as ye be sholde do me seruyse Than seyde sir

Launcelot I am In a queste Þat I muste do my selff a lone

Now god spede you seyde sir Lameroke and so they

departed // Than sir Lamerok com to Sir Froll & horsed

hym a gayne and seyde sir what knyght is Þat seyde sir

Froll sir hit is nat for you to know no Þer is no poynte

of youre charge // ye ar the more vncurteyse seyde sir

Froll and there fore I woll departe felyshyp // ye may

do as ye lyste And yett be my company ye haue savid

the fayryst floure of your garlonde // So they departed

Than wyth in ·iij· dayes sir Lamerok founde a knyȝt

at a well slepynge and his lady sate with hym & waked

Ryght so com sir Gawayne and toke Þe knyghtes lady &

sette hir vp be hynde hys squyere // So sir Lamerok rode

aftir sir Gawayne and seyde sir turne a yen Than seyde

sir Gawayne what woll ye do with me I am nevew vn//

to kynge Arthure Sir for Þat cause I woll for beare

you othir ellys that lady sholde a byde with me Than

Sir Gawayne turned hym & ran to hym Þat ought the

Þe lady with his speare but Þe knyght wyth pure myght

smote downe sir Gawayne and toke his lady with hym

And all this sye Sir Lamerok And seyde to hym selff

but I revenge my felow he woll sey me dishonoure

in kynge Arthurs courte Than sir Lamerok retur//

ned & profyrde Þat knyght to fyght // Sir I am redy


f. 186v (VIII.41)


seyde he And there they cam to gedyrs with all theire

myght // And sir Lamerok smote the knyght thorow

bothe sydis that he fylle to the erthe dede // Than Þat

lady rode to Þat knyghtis brothir that hyght sir Belly//

aunce le orgulus that dwelled faste Þer by and tolde

hym how his broÞer was slayne // Alas seyde he I woll

be revenged and so he horsed hym and armed hym

and with in a whyle he ouer toke sir Lamerok and bade

hym turne and leve that lady for Þou and I muste

play a new play for thow haste slayne my broÞer

Sir Froll that was a bettir knyght than euer was

Þou ye may well sey hit seyde sir Lamerok but this day

in the playne fylde I was founde the bettir knyght

So they rode to gydyrs and vnhorsed eche oÞer and

turned Þer shyldis and drew Þer swerdys & foughte

myghtyly as noble knyghtes preved Þe space of ·ij·

owres So than sir Bellyaunce prayde hym to telle

hym his name // Sir my name is sir Lameroke

de galys A seyde sir Bellyaunce Þou  arte the man

in the worlde Þat I moste hate for I slew my sunnys

for thy sake where I saved thy lyff and now Þou

haste slayne my brothir sir Froll Alas how sholde I be

accorded with the Þer fore defende Þe Þou shalt dye Þer is none

er way nor remedy // Alas seyde sir Lameroke full well

me ought to know you for ye ar the man Þat moste haue

done for me And there with all sir Lamerok kneled a downe

and be sought hym of grace // A ryse vp seyde sir Bellyaun//

ce othir ellys Þer as Þou knelyste I shall sle the That shall

nat nede seyde sir Lameroke for I woll yelde me to you nat

for no feare of you nor of youre strength but youre good//

nesse makyth me to lothe to haue a do with you // where fore

I requyre you for goddis sake and for Þe honour of knyghthode

f. 187 (VIII.41-IX.1)


for gyff me all Þat I haue offended vnto you // Alas seyde Sir

Bellyaunce leve thy knelynge oÞer ellys I shall sle the with

oute mercy // Than they yode a gayne to batayle & aythir

wounded othir that all Þe grounde was blody Þer as they fouȝt

And at Þe laste sir Bellyaunce with drew hym a backe & sette

hym downe a lytyll vppon an hylle for he was faynte

for bledynge that he myght nat stonde // Than sir Lame//

roke threw his shylde vppon his backe and cam vnto hym

and asked hym what chere // well seyde sir Bellyaunce A sir

yett shall I shew you favoure in youre male ease A knyght

seyde sir Bellyaunce vnto sir Lamerok Þou arte a foole for and

I had the at suche a vauntage as Þou haste me I sholde sle

the but thy Jantylnesse is so good and so large Þat I muste

nedys for gyff the myne evyll wyll // And than sir Lamero//

ke kneled a downe and vnlaced fyrst his vmbrere and

than his owne // And than aythir kyssed othir with wepynge

tearys Than sir Lamerok led sir Bellyaunce to an abbey

faste by and Þer sir Lamerok wolde nat departe from sir Belly//

aunce tylle he was hole and than they were sworne to

gydyrs Þat none of hem sholde neuer fyght a yenste oÞer

So sir Lamerok departed and wente to the courte of Arthur


Here levyth of the tale of Sir Lamerok And of Syr

Trystramys And here be gynnyth the tale of Syr

La Cote male tayle That was a good knyght



O the courte of kynge Arthure there cam a yon//

ge man bygly made And he was rychely be seyne

And he desyred to be made a knyght of the kynges but

his ouer garmente sate outw ouerthwartely how be hit hit

was ryche cloth of golde // what is youre name seyde



¶ Capitulum primum

Hit was a kyng that hyghte Melyodas / and he was lord and kynge of the countre of Lyonas And this Melyodas was a lykely knyght as ony was that tyme lyuynge / And by fortune he wedded kynge Markys syster of Cornewaille / And she was called Elyzabeth that was callyd bothe good and fair And at that tyme kynge Arthur regned / and he was hole kynge of Englond / walys and Scotland & of many other royammes how be it there were many kynges that were lordes of many countreyes / but alle they held their landes of kyng Arthur / for in walys were two kynges / and in the north were many kynges / And in Cornewail and in the west were two kynges /

¶ Also in Irland were two or thre kynges and al were vnder the obeissaunce of kyng Arthur / So was the kynge of Fraunce and the kyng of Bretayn and all the lordshippes vnto Rome / So whan this kyng Melyodas hadde ben with his wyf / within a whyle she waxid grete with child and she was a ful meke lady / and wel she loued her lord / & he her ageyne / soo there was grete ioye betwixe them / Thenne ther was a lady in that countrey that had loued kynge Melyodas longe / And by no meane she neuer coude gete his loue therfore she lete ordeyne vpon a day as kynge Melyodas rode on huntynge / for he was a grete chacer / and there by an enchauntement she made hym chace an herte by hym self alone / til that he came to an old Castel / and there anone he was taken prysoner by the lady that hym loued / Whanne Elyzabeth kyng Melyodas myst her lord / and she was nyghe oute of her wytte and also as grete with child as she was she took a gentylwoman with her / and ranne in to the forest to seke her lord / And whanne she was ferre in the forest she myghte no ferther for she byganne to trauaille fast of her child / And she had many grymly throwes / her gentylwoman halp her alle that she myghte / And soo by myracle of oure lady of heuen she was delyuerd with grete paynes / But she had taken suche cold for the defaute of helpe that depe draughtes of deth toke her / that nedes she must dye and departe oute of this world / ther was Page  274 [leaf 137v] none other boote / And whanne this quene Elyzabeth sawe that ther was none other bote / thenne she made grete dole / and said vnto her gentylwoman / whan ye see my lord kyng Melyodas recommaunde me vnto hym / and telle hym what paynes I endure here for [ gis ] loue / and how I must dye here for his sake for defaute of good helpe / and lete hym wete that I am ful sory to departe out of this world fro hym / therfor pray hym to be frende to my soule / Now lete me see my lytel child / for whome I haue had alle this sorowe / And whanne she sawe hym she said thus / A my lytel sone thou hast murthered thy moder / and therfore I suppose thou that arte a murtherer soo yong / thou arte ful lykely to be a manly man in thyn age / And by cause I shal dye of the byrthe of the / I charge the gentylwoman / that thou pray my lord kynge Melyodas that whan he is crystned lete calle hym Trystram that is as moch to saye / as a sorouful byrthe / And ther with this quene gafe vp the ghoost and dyed / Thenne the gentylwoman leyd her vnder an vmbre of a grete tree / and thenne she lapped the chyld as wel as she myght for cold / Ryghte soo ther came the Barons folowynge after the quene /

¶ And whan they sawe that she was dede / and vnderstood none other but the kynge was destroyed /

¶ Capitulum secundum

THenne certayne of them wold haue slayne the child / by cause they wold haue ben lordes of the countrey of Lyonas / But thenne thorou the faire speche of the gentylwoman / and by the meanes that she made / the moost party of the Barons wold not assente ther to / And thenne they lete cary home the dede quene / and moche dole was made for her / Thenne this meane whyle Merlyn delyuerd kynge Melyodas out of pryson on the morne after his quene was dede / And so when the kynge was come home / the moost party of the barons made grete ioye / But the sorou that the kyng made for his quene that myghte no tong telle Soo thenne the kynge lete entere her rychely and after he lete crystene his child as his wyf commaunded afore her Page  275 [leaf 138r] deth / And thenne he lete calle hym Trystram the sorouful borne child /

¶ Thenne the kynge Melyodas endured seuen yeres without a wyf / And alle this tyme Trystram was nourysshed wel /

¶ Thenne hit befelle that kynge Melyodas wedded kynge Howles doughter of Bretayne / and anone she hadde children of kynge Melyodas / thenne was she heuy and wrothe / that her children shold not reioyce the Countrey of Lyones / wherfor this quene ordeyned for to poysone yong Tristram / So she lete poyson be put in a pyece of syluer in the chamber where as Trystram and her children were to gyders / Vnto that entente that whanne Trystram were thursty he shold drynke that drynke / And so hit felle vpon a daye the quenes sone as he was in that chamber / aspyed the pyece with poyson / and he wende hit hadde ben good drynke / and by cause the child was thursty he tooke the pyece with poyson and dranke frely / and there with al sodenly the child brast & was dede / whanne the quene Melyodas wyst of the dethe of her sone wete ye wel that she was heuy / But yet the kyng vnderstode no thynge of her treason /

¶ Not withstandynge the quene wold not leue this / but efte she lete ordeyne more poyson / and putte hit in a pyece / And by fortune kyng Melyodas her husband fond the pyece with wyn where was the poyson / and he that was moche thursty took the pyece for to drynke ther oute And as he wold haue dronken therof / the Quene aspyed hym / and thenne she ranne vnto hym / and pulled the pyece from hym sodenly

¶ The kyng merueilled why she dyd soo / and remembyrd hym how her sone was sodenly slayne with poyson / And thenne he took her by the hand and sayd / thou fals traitresse thou shalte telle me what manere of drynke this is / or els I shalle slee the / And ther with he pulled oute his swerd / and sware a grete othe that he shold slee her / but yf she told hym trouthe / A mercy my lord sayd she / and I shalle telle you alle / And thenne she told hym why she wold haue slayne Trystram / by cause her chyldren shold reioyced his land / wel said the kyng Melyodas / and therfor shal ye haue the lawe / And soo she was dampned by the assente of the Barons to be brent / and thenne was ther made a grete fyre / & ryght as she was at the fyre to take he execucion / yong Page  276 [leaf 138v] Trystram knelyd afore kynge Melyodas / and besought hym to gyue hym a bone / I wylle wel said the kynge ageyne /

¶ Thenne saide yonge Trystram gyue me the lyf of thy quene my stepmoder / That is vnryghtfully asked said kyng Melyodas / for thou oughte of ryght to hate her / for she wold haue slayne the with that poyson and she myghte haue hadde her wille / And for thy sake moost is my cause that she sholde dye Syr saide Trystram as for that I byseche you of your mercy that ye wille forgyue hit her / And as for my parte god forgyue it her and I doo / and soo moche it lyked your hyhenes to graunte me my bone / for goddes loue I requyre you hold your promyse / Sythen hit is soo said the kynge I wille that ye haue her lyf / thenne said the kynge I gyue her to you / and go ye to the fyre and take her / and doo with her what ye wylle / Soo syre Trystram wente to the fyre / and by the commaundement of the kyng delyuerd her from the dethe / But after that kynge Melyodas wold neuer haue adoo with her as at bedde and borde / But by the good meanes of yong Trystram he made the kynge and her accorded / But thenne the kynge wold not suffre yonge Trystram to abyde no lenger in his courte

¶ Capitulum iij

ANd thenne he lete ordeyne a gentylman that was wel lerned and taughte / his name was gouernayle / and thenne he sente yonge Trystram with Gouernayle in to Fraunce to lerne the langage / and nurture / and dedes of armes / And there was Trystram more than seuen yeres /

¶ And thenne whanne he wel couthe speke the langage and hadde lerned alle that he myght lerne in that countreyes / thenne he came home to his fader kynge Melyodas ageyne / and so Trystram lerned to be an harper passynge alle other that there was none suche called in no countrey / and soo in harpynge & on Instrumentys of musyke he applyed hym in his yongthe for to lerne / And after as he growed in myght and strengthe he laboured euer in huntynge and in haukynge soo that neuer Page  277 [leaf 139r] gentylman more that euer we herd rede of /

¶ And as the book sayth / he beganne good mesures of blowyng of beestes of venery and beestes of chace / and alle manere of vermayns / and alle these termes we haue yet of haukyng and huntyng And therfore the book of venery / of haukynge and huntynge is called the book of syr Trystram / Wherfor as me semeth alle gentylmen that beren old armes oughte of ryght to honoure syre Trystram for the goodly termes that gentilmen haue and vse / and shalle to the daye of dome / that there by in a maner alle men of worship maye disseuer a gentylman fro a yoman / and from a yoman a vylayne / For he that gentyl is wylle drawe hym vnto gentil tatches / and to folowe the custommes of noble gentylmen

¶ Thus syr Trystram endured in Cornewaile vntyl he was bygge / and stronge / of the age of xviij yeres / And thenne the kynge Melyodas had grete ioye of syr Trystram / and soo had the quene his wyfe / For euer after in her lyf by cause syre Trystram saued her from the fyre she dyd neuer hate hym more after / but loued hym euer after / and gaf Trystram many grete yeftes for euery estate loued hym / where that he wente

¶ Capitulum quartum

THenne it befelle that kynge Anguysshe of Irland / sente vnto kynge Marke of Cornewaile for his truage that Cornewaile had payed many wynters / And alle that tyme kynge Marke was behynde of the truage for seuen yeres / And kyng Marke and his Barons gaf vnto the messager of Irland these wordes and ansuere that they wold none paye / and bad the messagyer goo vnto his Kynge Anguysshe / and telle hym we wille paye hym no truage / but telle youre lord / and he wille alweyes haue truage of vs of Cornewaile / bydde hym sende a trusty knyghte of his land / that wille fyghte for his ryght / and we shalle fynde another for to defende oure ryght / With this ansuer the messagers departed in to Irland /

¶ And whanne kynge Anguysh vnderstood the ansuere of the messagers / he was wonderly wroth Page  278 [leaf 139v] And thenne he callyd vnto hym syr Marhaus the good knyght that was nobly preued / and a knyghte of the table round / And this Marhaus was broder vnto the quene of Irland /

¶ Thenne the kynge sayd thus / Fayre broder sir Marhaus I praye yow goo in to Cornewaile for my sake and do bataille for our truage that of ryght we oughte to haue / and what someuer ye spende ye shalle haue suffyciently more than ye shal nede / Syre saide Marhaus wete ye wel that I shalle not be lothe to doo bataille in the ryght of you and your land with the best knyght of the table rounde / for I knowe them for the moost party what ben theire dedes / and for to auaunce my dedes and to encreace my worship I wylle ryght gladly goo vnto this iourneye for our ryghte

¶ Soo in alle haste there was made purueaunce for syr marhaus / and he hadde al thynge that to hym neded / and soo he departed out of Irland / and arryued vp in Cornewaile euen fast by the castel of Tyntagil / And whan kynge Marke vnderstood that he was there arryued to fyghte for Irland /

¶ Thenne made kynge marke grete sorou whan he vnderstood that the good and noble knyghte sire Marhaus was come / For they knewe no knyght that durste haue adoo with hym / For at that tyme syre Marhaus was called one of the famosest and renoumed knyghtes of the world

¶ And thus syre Marhaus abode in the see / and euery daye he sente vnto kynge Marke for to paye the truage that was behynde of seuenyere / outher els to fynde a knyght to fyghte with hym for the truage / This maner of message syre Marhaus sente dayly vnto kynge Marke /

¶ Thenne they of Cornewayle lete make cryes in euery place that what knyght wold fyghte for to saue the truage of Cornewaile he sholde be rewarded soo that he sholde fare the better terme of hys lyf /

¶ Thenne some of the Barons sayde to kynge Marke / and counceiled hym to sende to the courte of Kynge Arthur for to seke syre Launcelot du lake that was that tyme named for the merueilloust Knyght of alle the worlde /

¶ Thenne there were somme other Barons that counceylled the Kynge not to doo soo & said that it was laboure in vayn / Page  279 [leaf 140r] by cause syr Marhaus was a knyght of the round table / therfor ony of hem will be loth to haue adoo with other / but yf hit were ony knyght at his owne request wold fyghte dysguysed and vnknowen / Soo the kynge and alle his barons assented that it was no bote to seke ony knyght of the round table /

¶ This meane whyle came the langage and the noyse vnto kynge Meliodas hou that sire Marhaus abode bataille faste by Tyntagil / And how kyng Marke couthe fynde no maner knyghte to fyghte for hym / Whan yong Trystram herd of thys / he was wrothe and sore ashamed that ther durst no knyghte in Cornewaile haue adoo with syr Marhaus of Irland /

¶ Capitulum quintum

THere with al Trystram wente vnto his fader Kynge Meliodas and asked hym counceil what was best to doo for to recouer Cornewaile from truage / For as me semeth said sir Tristram it were shame that syr Marhaus the quenes broder of Irland shold goo aweye onles that he were foughten with alle

¶ As for that said kyng Meliodas wete you wel sone Tristram that syre Marhaus is called one of the best knyghtes of the world and knyghte of the table round / And therfore I knowe no knyghte in this countre that is able to matche with hym /

¶ Allas saide syre Tristram that I am not made knyght / And yf sir Marhaus shold thus departe in to Irland / god lete me neuer haue worship and I were made knyght I shold matche hym / And syr said Trystram I pray you gyue me leue to ryde to kynge Mark / and soo ye be not displeasyd / of kynge Marke wille I be made Knyght / I wille wel saide kyng Meliodas that ye be ruled as your courage wille rule you

¶ Thenne sir Trystram thanked his fader moche / And thenne he made hym redy to ryde in to Cornewaile /

¶ In the meane whyle there came a messager with letters of loue fro kynge Faramon of Fraunces doughter vnto syre Trystram that were ful pyteous letters & in them were wryten many complayntes of loue / but syre Tristram had no Ioye of her letters nor Page  280 [leaf 140v] regard vnto her / Also she sente hym a lytel brachet that was passynge fayre / But whan the kynges doughter vnderstood that syre Trystram wold not loue her / as the book sayth / she dyed for sorou /

¶ And thenne the same squyer that broughte the letter and the brachet came ageyne vnto syr Trystram / as after ye shalle here in the tale

¶ Soo this yonge syre Trystram rode vnto his eme kynge Marke of Cornewayle /

¶ And whanne he came there / he herd say that ther wold no knyghte fyghte with syre Marhaus / Thenne yede sir Tristram vnto his eme and sayd / syre yf ye wylle gyue me thordre of knyghthode / I wille doo bataille with syr Marhaus / What are ye said the kynge and from whens be ye comen / Sir said Trystram I come fro kynge Melyodas that wedded your syster and a gentylman wete ye wel I am

¶ Kynge Marke behelde sir Trystram and sawe that he was but a yonge man of age / but he was passyngly wel maade and bygge /

¶ Faire syre said the kynge what is youre name and where were ye borne / Syre sayd he ageyne / my name is Trystram / and in the countreye of Lyones was I borne / Ye saye wel said the kynge / and yf ye wille doo this batayll I shalle make yow knyghte / Therfore I come to you sayd syre Trystram and for none other cause

¶ But thenne kynge Marke made hym knyghte / And there with al anone as he had made hym knyght he sente a messager vnto syre Marhaus with letters that said / that he hadde fonde a yonge knyghte redy for to take the bataile to the vttermest / hit may wel be said syre Marhaus /

¶ But telle kynge Marke I wille not fyghte with no knyghte but he be of blood royal / that is to saye outher kynges sone outher quenes sone borne of a prynce or pryncesse /

¶ Whanne Kynge Marke vnderstood that / he sente for syre Trystram de lyones and tolde hym what was the ansuer of syr Marhaus /

¶ Thenne sayd syre Trystram sythen that he seyth soo / lete hym wete that I am comen of fader syde and moder syde of as noble blood as he is /

¶ For syre now shalle ye knowe that I am kynge Melyodas sone borne of youre own syster dame Elyzabeth that dyed in the forest in the byrthe of me / O Ihesu said kynge Mark ye are welcome faire neuewe Page  281 [leaf 141r] to me /

¶ Thenne in alle the haste the kynge lete horse syr Tristram and arme hym in the best maner that myghte be had or goten for gold or syluer /

¶ And thenne kynge Marke sente vnto sir Marhaus / and dyd hym to wete that a better born mā than he was hym self shold fyghte with hym / and his name is sir Trystram de lyonas goten of kynge Melyodas / and borne of kynge Markes syster / Thenne was sir Marhaus glad and blythe that he shold fyghte with suche a gentylman / and soo by the assente of kynge Mark and of syr Marhaus they lete ordeyne that they shold fyghte within an Iland nyghe syr Marhaus shyppes / and soo was syr Trystram putte in to a vessel both his hors and he and all that to hym longed bothe for his body and for his hors / Syre Trystram lacked no thynge / And whan kynge Marke and his Barons of Cornewaile beheld how yonge syr Trystram departed with suche a caryage to fyghte for the ryghte of Cornewaile / there was neyther man ne woman of worship but they wepte to see and vnderstande soo yonge a knyght to Ieoparde hym self for their ryghte /

¶ Capitulum sextum

SOo to shorten this tale whan syr Trystram was arryued within the Iland / he loked to the ferther syde / & there he sawe at an anker syxe shippes nyghe to the land / and vnder the shadowe of the shippes vpon the land / there houed the noble knyghte syr Marhaus of Irland / Thenne syr Trystram commaunded his seruaunt gouernail to brynge his hors to the land and dresse his harneis at al manere of ryghtes / And thenne whan he had soo done / he mounted vpon his hors And whan he was in his sadel wel apparailled / & his shelde dressid vpon his sholder / Trystram asked Gouernayle where is this knyghte that I shal haue adoo with alle / Syre sayd Gouernaile / see ye hym not / I wende ye had sene hym yonder he houeth vnder the vmbre of his shippes on horsbak with his spere in his hand and his sheld vpon his sholder / That is trouthe sayd the noble knyghte syre Trystram now I see hym wel ynouȝ Thenne he commaunded his seruaunt Gouernayle Page  282 [leaf 141v] to goo to his vessaile ageyne / and commaunde me vnto myne eme kynge Marke / and praye hym / yf that I be slayn in this bataille for to entere my body as hym semed best / & as for me lete hym wete I will neuer yelde me for cowardyse / and yf I be slayne and flee not / thenne they haue lost no truage for me And yf soo be that I flee or yelde me as recreaūt / bydde myn eme neuer berye me in Crysten beryels / And vpon thy lyf said syr Trystram to Gouernayle / come thou not nyghe this Iland tyl that thou see me ouercomen or slayne / or els that I wynne yonder knyght / soo eyther departed from other sore wepynge

¶ Capitulum septimum

ANd thenne syr Marhaus auysed syr Trystram and said thus / yonge knyght syr Trystram what dost thou here / me sore repenteth of thy courage / for wete thou wel I haue ben assayed / and the best knyghtes of this land haue ben assayed of my hand / And also I haue matched with the best knyghtes of the world / and therfor by my counceille retorne ageyne vnto thy vessaile / And faire knyght and wel preued knyght said syre Trystram thou shalt wel wete I maye not forsake the in this quarel / for I am for thy sake made knyght And thou shalt wel wete that I am a kynges sone born and goten vpon a quene / and suche promyse I haue made att my neuews request and myn owne sekyng that I shalle fyghte with the vnto the vttermest / and delyuer Cornewaile from the old truage / And also wete thou wel syr Marhaus / that this is the grettest cause that thou couragest me to haue adoo with the / For thou art called one of the moost renoumed knyghtes of the world / and by cause of that noyse and same / that thou hast / thou gyuest me courage to haue adoo with the / for neuer yet was I preued with good knyghte / And sythen I toke the ordre of knyghthode this day / I am wel pleasyd that I maye haue adoo with so good a knyght as thou arte / And now wete thou wel syr Marhaus that I caste me to gete worship on thy body / And yf that I be not preued / I trust to god that I shal be worshipfully preued vpon thy body / and to delyuer the countrey of Cornewaile for euer fro al Page  283 [leaf 142r] maner of truage from Irland for euer / Whanne syr Marhaus had herde hym saye what he wold / he saide thenne thus ageyn Fair Knyght sythen it is soo that thou castest to wynne worship of me / I lete the wete / worship may thou none lese by me yf thou mayst stande me thre strokes / for I lete the wete / for my noble dedes preued and sene / Kyng Arthur made me knyghte of the table round / Thenne they beganne to feutre theyre speres / and they mette soo fyersly to gyders / that they smote eyther other doune / bothe hors and all / But sir Marhaus smote syr Trystram a grete wounde in the syde with his spere / & thenne they auoyded their horses / and pulled oute their swerdes / and threwe their sheldes afore them / And thenne they lasshed to gyders as men that were wyld and couragyous / And whan they hadde stryken soo to gyder longe / thenne they lefte her strokes / and foyned at their brethes and vyfours / & when they sawe that that myght not preuaile them / thēne they hurtled to gyders lyke rammes to bere eyther other doun / thus they fought stylle more than half a day / and eyder were wounded passyng sore / that the blood ranne doune fresshly fro them vpon the ground / By thenne syr Trystram waxed more fressher / than syr Marhaus and better wynded and bygger / and with a myghty stroke he smote syr Marhaus vpon the helme suche a buffet that hit went thorou his helme / and thorou the coyfe of stele and thorou the brayn pan / and the swerd stak soo fast in the helme and in his brayn pan that sir Trystram pulled thryes at his swerd or euer he myght pulle it out from his hede / & there Marhaus felle doun on his knees the edge of Tristrams swerd left in his brayne pan / And sodenly syr Marhaus rose grouelynge / and threwe his swerd and his shelde from hym / and soo ranne to his shippes and fledde his waye / and sir tristram hadde euer his shelde and his swerd / And whan sir Tristram sawe sir Marhaus withdrawe hym / he said A sir knyght of the roūd table why withdrawest thou the / thou dost thy selfe and thy kyn grete shame / for I am but a yong Knyghte / or now I was neuer preued / and rather than I shold withdrawe me from the / I had rather be hewen in C pyeces / Syr marhaus ansuerd no worde but yede his way sore gronynge / Well sir knyght said sir Tristram I promyse the thy suerd and thy Page  284 [leaf 142v] sheld shal be myn / and thy sheld shalle I were in al places where I ryde on myn aduentures and in the syghte of kyng Arthur and alle the round table

¶ Capitulum viij

ANon sir Marhaus and his felauship departed in to Irland / And as soone as he came to the kynge his broder / he lete serche his woundes /

¶ And whan his hede was serched / a pyece of syre Trystrams swerd was founden therin / and myghte neuer be had oute of his hede for no surgeons / and soo he dyed of syr Trystrams swerd / and that pyece of the swerd the quene his syster kepte hit for euer wyth her / for she thoughte to be reuengyd and she myghte /

¶ Now torne we ageyne vnto syr Trystram that was sore wounded / and ful sore bled that he myȝt not within a lytel whyle when he had take cold vnnethe stere hym of his lymmes / and thēne he sette hym doune softely vpon a lytel hylle / and bledde fast / Thenne anone came Gouernaile his man with his vessel And the kynge and his barons came with procession ageynst hym / And whan he was come vnto the land / Kynge Marke toke hym in his armes / and the kynge and sir Dynas the senescal ladde syr Tristram in to the castel of Tyntygail / And thenne was he serched in the best maner / and leid in his bedde / And whan kynge Marke sawe his woundes / he wepte hertely and soo dyd alle his lordes / So god me help said kyng Mark I wolde not for alle my landes that my neuewe dyed / Soo syr Trystram laye there a moneth and more / and euer he was lyke to deye of that stroke that sir Marhaus smote hym fyrst with the spere / For as the Frensshe book saith / the speres hede was enuenymed that syr Trystram myghte not be hole / Thenne was kynge Mark and alle his barons passynge heuy / For they demed none other / but that syr Trystram shold not recouer / Thenne the kynge lete sende after alle manere of leches & surgens bothe vnto men and wymmen / and there was none / that wold behote hym the lyf / Thenne came there a lady that was a ryght wyse lady / & she said playnly vnto kyng mark and to sir Trystram and to alle his barons that he shold neuer Page  285 [leaf 143r] be hole / but yf sire Trystram wente in the same countrey that the venym came fro / and in that countrey shold he be holpen or els neuer / Thus said the lady vnto the Kynge / whan kynge Marke vnderstood that / he lete purueye for syr Trystram a faire vessel / wel vytailled / and therin was put syr Trystram and gouernail with hym / and sir Tristram toke his harp with hym / and soo he was putte in to the see to sayle in to Irland / and soo by good fortune he arryued vp in Irland euen fast by a castel where the Kynge and the quene was / and at his arryuayl he sat and harped in his bedde a mery lay suche one herd they neuer none in Irland afore that tyme /

¶ And whan it was told the Kyng and the quene of suche a Knyght that was suche an harper / anone the Kyng sente for hym / and lete serche his woundes / and thenne asked hym his name / then he ansuerd I am of the countrey of Lyonas / & my name is Tramtryst that thus was wounded in a bataille as I fought for a ladyes ryght / So god me help said kyng Anguysshe ye shal haue al the helpe in this land that ye may haue here / But I lete you wete in Cornewaile I had a grete losse / as euer hadde kynge / for there I lost the best knyghte of the world / his name was Marhaus a ful noble knyghte and Knyght of the table round / and there he told syr Trystrā wherefore syr Marhaus was slayne / Syr Trystram made semblaunt as he had ben sory / and better knewe he how hit was than the kynge

¶ Capitulum ix

THenne the kynge for grete fauoure maade Tramtryst to be put in his doughters ward and kepyng by cause she was a noble surgeon / And whan she had serched hym / she fond in the bottome of his wound that therin was poyson / And soo she heled hym within a whyle / and therfore Tramtrist cast grete loue to la beale Isoud / for she was at that tyme the fairest mayde and lady of the worlde / And there Tramtryst lerned her to harpe / and she beganne to haue grete fantasye vnto hym / And at that tyme sir Palamydes the sarasyn was in that countrey and wel cherysshed with the kynge and the Page  286 [leaf 143v] quene / And euery day syr Palamydes drewe vnto la beale Isoud / and profered her many yeftes / for he loued her passyngly wel / Al that Aspyed Tramtryst / and ful wel knewe he syr Palamydes for a noble knyght and a myghty man / And wete ye wel syr Tramtryst had grete despyte at syr palomydes / for la beale Isoud told Tramtryst that Palamydes was in wylle to be crystened for her sake / Thus was ther grete enuy betwixe Tramtryst and syr Palamydes / Thenne hit befelle that kynge Anguysshe lete crye a grete Iustes and a grete turnement for a lady that was called the lady of the laundes / and she was nyghe cosyn vnto the kynge / And what man wanne her / thre dayes after he shold wedde her and haue alle her landes / This crye was made in England / walys Scotland and also in Fraunce and in Bretayne / It befelle vpon a day la beale Isoud came vnto syr Tramtryst and told hym of this turnement / he ansuerd and sayd sayr lady I am but a feble knyghte / and but late I had ben dede / had not your good ladyship ben / Now fayre lady what wold ye I shold doo in this matere / wel ye wote my lady that I maye not Iuste / A Tramtryst said la beale Isoud why wille ye not haue ado at that turnement / wel I wote syr Palamydes shall be there / and to doo what he maye / And therfore Tramtryst I pray you for to be there / for els syr Palamydes is lyke to wynne the degree / Madame said Tramtrist as for that / it may be soo / for he is a proued knyght / and I am but a yong knyght and late made / and the fyrst batail that I dyd it myshapped me to be soore wounded as ye see / But and I wyst ye wold be my better lady / at that turnement I will be so that ye wille kepe my counceille and lete no creature haue knouleche that I shalle Iuste but your self / and suche as ye wil to kepe your counceil / my poure persone shall I Ieoparde there for your sake that parauentur sir Palamydes shal knowe whan that I come / Therto said la beale Isoud do your best & as I can said la beale Isoud I shal purueye hors and armour for you at my deuyse / as ye will soo be hit said syr Trātrist I wille be at your cōmaundement / So at the day of Iustes / ther cam sir Palamydes with a black sheld / & he ouerthrew many knyghtes that alle the peple had merueylle of hym / Page  287 [leaf 144r] For he putte to the werse syr Gawayne / Gaherys / Agrauayn Bagdemagus / kay / Dodyus le saueage / Sagramor le desyrus / Gumret le petyte / and Gryslet le fyse de dieu / Alle these the fyrste daye syr Palamydes strake doune to the erthe / And thenne alle maner of knyghtes were adred of sir Palamydes and many called hym the knyght with the black shelde / Soo that day syre Palamydes had grete worshyp /

¶ Thenne cam kynge Anguysshe vnto Tramtryst / and asked hym why he wold not Iuste / Syr he said I was but late hurte / and as yet I dare not auenture me /

¶ Thenne came there the same squyer that was sente from the kynges doughter of Fraunce / vnto syr Trystram / And whanne he had aspyed syre Tristrā he felle flat to his feete / Alle that aspyed la Bele Isoud / what curtosye the squyer made vnto syr Trystram / And therwith al sodenly syr Trystram ranne vnto his squyer whos name was Heles le renoumes / and praid hym hertely in noo wyse to telle his name / Syr said Heles I wille not discouer your name / but yf ye commaunde me

¶ Capitulum x

THenne syr Trystram asked hym what de dyd in those countreyes / syr he sayd / I came hyder with syr Gawayn for to be made knyght / And yf it please you of your handes that I may be made knyghte / Awaite vpon me as to morn secretely / and in the feld I shal make you a knyght / Thenne had la beale Isoud grete suspecyon vnto Tramtryst that he was somme man of worship proued / and ther with she comforted her self / and cast more loue vnto hym than she had done tofore

¶ And soo on the morne syr Palamydes maade hym redy to come in to the feld as he dyd the fyrst day / And there he smote doune the kynge with the C knyghtes and the kynge of Scottes /

¶ Thenne had la beale Isoud ordeyned and wel arayed syr Trystram in whyte hors and harneis / And ryght soo she lete putte hym oute at a preuy posterne / & soo he came in to the feld as it had ben a bryght angel / And anone syr Palamydes aspyed hym / and ther with he feutrid a spere vnto syr Tramtrist / and he ageyne vnto hym / And Page  288 [leaf 144v] there syr Trystram smote doune syr Palamydes vnto the erth And thenne there was a grete noyse of people / some sayd / syre Palamydes hadde a falle / some said the knyght with the blak shelde had a falle / And wete you wel la beale Isoud was passynge gladde / And thenne sire Gawayne and his felawes ix had merueille what knyghte it myght be that had smyten doune syr Palamydes / Thenne wold there none Iuste with Tramtryst / but alle that there were forsoke hym / moost & lest / Thenne syr Trystram made Heles a knyght / and caused hym to put hym self forthe / and dyd ryght wel that day / So after syr Heles held hym with syr Trystram / And whan syre Palamydes had receyued this falle / wete ye wel that he was sore ashamed / And as pryuely as he myght / he withdrewe hym oute of the feld / Alle that aspyed syre Trystram / and lyghtly he rode after syre Palamydes and ouertoke hym / and badde hym torne / for better he wold assaye hym / or euer he departed / Thenne syr Palamydes torned hym and eyther lasshed at other with their swerdes / But at the fyrste stroke syre Trystram smote doune Palamydes / and gaf hym suche a stroke vpon the hede that he felle to the erthe / Soo thenne Tristram badde yelde hym / and doo his commaundement or els he wold slee hym / whan syre Palamydes beheld his countenaunce / he dredde his buffets soo / that he graunted al his askynges / Wel said / said sir Tristram / this shalle be your charge / Fyrst vpon payne of your lyf that ye forsake my lady la beale Isoud / and in no maner wyse that ye drawe not to her / Also this twelue moneth and a day / that ye bere none armour nor none harneis of werre /

¶ Now promyse me this or here shalt thou dye / Allas saide Palamydes for euer I am ashamed /

¶ Thenne he sware as syr Trystram hadde commaunded hym / Thenne for despyte and anger / syre Palamydes cutte of his harneis / and threwe them aweye / And soo syr Trystram torned ageyne to the Castel where was la beale Isoud / and by the weye he mette with a damoysel that asked after syre launcelot that wanne the dolorous gard worshipfully / & this damoysel asked sire Tristram what he was / For it was tolde her that it was he that smote doune syr Palamydes / by whom the x knyghtes of kynge Arthurs were smyten doune / Page  289 [leaf 145r] Thenne the damoysel prayd syr Trystram to telle her what he was / And whether that he were syr Launcelot du lake / for she demyd that there was no knyght in the world myghte do suche dedes of armes / but yf it were Launcelot / Fayre damoysel sayd syr Trystram wete ye wel that I am not syr launcelot for I was neuer of suche prowesse / but in god is al that he maye make me as good a knyght as the good knyght sir laūcelot / Now gentyl knyght said she / put vp thy vysure / & whan she beheld his vysage / she thouȝt she sawe neuer a better mās vysage / nor a better farynge knyght / And thenne whan the damoysel knewe certaynly that he was not syre launcelot / thenne she took her leue and departed from hym / And thenne syre Trystram rode pryuely vnto the posterne where kepte hym la beale Isoud / and there she made hym good chere and thanked god of his good spede / Soo anone within a whyle the kynge and the quene vnderstood that hit was Tramtryst that smote doune syre Palamydes / thenne was he moche made of more than he was before

¶ Capitulum xj

THus was sir Tramtryst longe there wel cherysshed / with the kynge and the quene / and namely with la beale Isoud / So vpon a daye / the quene and la beale Isoud made a bayne for syre Tramtryst / And whan he was in his bayne / the quene and Isoud her doughter romed vp & doune in the chamber / and there whyles Gouernail and Heles attendyd vpon Tramtryst / & the quene beheld his swerd there as it laye vpon his bedde / And thēne by vnhap the quene drewe oute his swerd / and beheld it a longe whyle / and bothe they thoughte it a passynge fayre swerd / but within a foote and an half of the poynte there was a grete pyece there of oute broken of the edge / And whan the quene aspyed that gap in the swerd / she remembryd her of a pyece of a swerd / that was foūde in the brayne pan of syre Marhaus the good knyght that was her broder / Allas thenne said she vnto her doughter la beale Isoud / this is the same traytour knyghte that slewe my broder thyn eme / Whanne Isoud herd her saye Page  290 [leaf 145v] soo / she was passynge sore abasshed / for passyng wel she loued Tramtryst / and ful wel she knewe the cruelnes of her moder the quene / Anon there with alle the quene went vnto her owne chamber / and soughte her cofre / and there she toke oute the pyece of the swerd that was pulled out of syr Marhaus hede after that he was dede / And thenne she ranne with that pyece of yron to the swerd that laye vpon the bedde / And whanne she putte that pyece of stele and yron vnto the swerd / hit was as mete as it myghte be / whan it was newe broken / And thēne the quene gryped that swerd in her hand fyersly / & with alle her myghte she ranne streyghte vpon Tramtryst where he sat in his bayne / And there she hadde ryued hym thorou hadde not syr Heles goten her in his armes / and pulled the suerd from her / and els she hadde threst him thorou / Thenne whanne she was lettyd of her euyl wylle / she ranne to the kynge Anguyssh her husband and sayde on her knees / O my lord here haue ye in your hous that traitour knyght that slewe my broder and your seruaunt that noble knyght syr Marhaus / Who is that said kynge Anguysshe and where is he / Syr she said hit is syr Tramtryst the same knyght that my doughter helyd Allas said the kynge therfore am I ryght heuy / for he is a ful noble knyght as euer I sawe in felde /

¶ But I charge you said the kyng to the quene that ye haue not ado with that knyght / but lete me dele with hym / Thenne the kynge went in to the chambre vnto syr Tramtryst / and thenne was he gone vnto his chambre / and the kynge fond hym al redy armed to mounte vpon his hors / Whanne the kynge sawe hym al redy armed to goo vnto horsbak / the kynge said nay Tramtryst hit wille not auaile to compare the ageynst me / But thus moche I shalle doo for my worship and for thy loue in soo moch as thou arte within my courte / hit were no worship for me to slee the / Therfore vpon this condycyon I wille gyue the leue for to departe from this courte in saufte / so thou wilt telle me who was thy fader / and what is thy name / and yf thou slewe syr Marhaus my broder

¶ Capitulum xij

Page  291 [leaf 146r]

SYr said Trystram now I shalle telle you alle the trouthe / my faders name is sir Melyodas kynge of Lyonas / & my moder hyȝt Elyzabeth that was sister vnto kynge Marke of Cornewaile / & my moder dyed of me in the foreste / And by cause therof she commaunded or she dyed that whan I were crystened / they shold crystene me Trystram / & by cause I wold not be knowen in this countrey I turned my name and lete me calle Tramtryst / & for the truage of Cornewayle I fought for myn emes sake / & for the ryght of Cornewaile that ye had posseded many yeres / And wete ye well said Trystram vnto the kynge I dyd the bataille for the loue of myn vnkel kynge Marke / and for the loue of the countreye of Cornewaile / and for to encreace myn honoure / For that same day that I fought with sir Marhaus I was made knyȝt And neuer or than dyd I no bataile with no knyght / & fro me he went alyue & lefte his sheld & his suerd behynde / so god me helpe said the kyng I may not say but ye dyd as a knyght shold / & it was your part to doo for your quarel / & to encreace your worship as a knyght shold / how be it I may not mayntene you in this countrey with my worship onles that I shold displease my barons & my wyf / & her kyn / Syr said Trystram I thanke you of your good lordship that I haue had with you here / and the grete goodenes my lady your doughter hath shewed me / & therfor said sir Tristram it may so happen that ye shalle wynne more by my lyf than by my dethe / for in the partyes of Englond it may happen I may doo you seruyse at some season that ye shal be glad that euer ye shewed me your good lordship /

¶ With more I promyse you as I am true knyȝt that in all places I shal be my lady your douȝters seruaunt / & knyȝt in ryght & in wrong / & I shal neuer fayle her to doo as moche as a knyght maye doo

¶ Also I byseche your good grace that I may take my leue at my lady your doughter and at alle the Barons and knyghtes / I wille wel said the kynge /

¶ Thenne sire Tristram wente vnto la beale Isoud / and tooke his leue of her / And thenne he tolde her all what he was and how he had chaunged his name by cause he wold not be knowen / & hou a lady told hym he þt shold neuer be hole tyl he cam in to this coūtrey where Page  292 [leaf 146v] the poyson was made / where thorou I was nere my dethe had not your ladyship ben / O gentyl knyght said la beale Isoud ful wo am I of thy departynge / for I sawe neuer man that I oughte soo good wille to / and there with all she wepte hertely / Madame said sire Trystram ye shalle vnderstande that my name is sir Trystram de lyones goten of kyng Melyodas and borne of his quene / And I promyse you feythfully that I shal be alle the dayes of my lyf your knyghte / Gramercy said La beale Isoud / and I promyse you there ageynste that I shalle not be maryed this seuen yeres but by your assent / and to whome that ye wille shalle be maryed to / hym wylle I haue / and he wille haue me yf ye wil consente / And thenne syre Trystram gaf her a rynge and she gaf hym another / and ther with he departed fro her / leuynge her / makynge grete dole and lamentacion / and he streyghte wente vnto the Courte amonge alle the Barons / and there he took his leue at moost and leest / and openly he said amonge them all / Faire lordes now it is soo that I muste departe / Yf there be ony man here that I haue offended vnto / or that ony man be with me greued / lete complayne hym here afore me or that euer I depart and I shal amende it vnto my power / And yf there be ony that wil profer me wronge or say of me wrong / or shame behynde my bak / saye hit now or neuer / and here is my body to make it good body ageynst body / And alle they stood stylle / ther was not one that wold saye one word / yet were there some knyghtes that were of the quenes blood and of sire Marhaus blood / but they wold not medle with hym /

¶ Capitulum xiij

SOo sir Tristram departed and toke the see / & with good wynde he aryued vp at Tyntagyl in Cornewaile / & whan kyng Mark was hole in his prosperite ther cam tydynges that sir Tristram was arryued and hole of his woundes / therof was kynge marke passyng glad / & soo were alle the barons / & whan he sawe his tyme he rode vnto his fader kyng melyodas / & there he had al the chere that the kyng & the quene coude make hym / And thenne largely Kyng Melyodas and his quene departed of their landes and goodes to sire Trystram /

¶ Thenne by the lycence of Kyng Page  293 [leaf 147r] Melyodas his fader he retorned ageyne vnto the court of kynge Mark / and there he lyued in grete ioye long tyme / vntyl at the laste there befelle a Ialousye and an vnkyndenes betwyxe kynge Marke and sir Tristram / for they loued bothe one lady / And she was an erles wyf that hyght syre Segwarydes / And this lady loued syre Trystram passyngly wel / And he loued her ageyne for she was a passynge fayr lady / And that aspyed sir Tristram wel /

¶ Thenne kynge Mark vnderstood that and was Ialous / for kyng Marke loued her passyngly wel / Soo it felle vpon a day / this lady sent a dwerf vnto sir Tristram and badde hym as he loued her / that he wold be with her the nyȝt nexte folowynge / Also she charged you that ye come not to her but yf ye be wel armed / for her lord was called a good knyghte

¶ Syre Trystram answerd to the dwerf / recommaunde me vnto my lady / and telle her I wille not fayle but I wille be with her the terme that she hath sette me / and with this ansuer the dwerf departed / And kynge Marke aspyed that the dwerfe was with syre Trystram vpon message from Segwarydes wyf / thenne kyng Marke sent for the dwerfe / And whanne he was comen / he maade the dwerf by force to telle hym alle why and wherfore that he came on message from sire Tristram

¶ Now said kynge Marke goo where thou wolt / and vpon payne of dethe that thou saye no word that thou spakest with me / soo the dwerf departed from the kynge /

¶ And that same nyghte that the steuen was sette betwixt Segwarydes wyfe & syr Trystram kynge Marke armed hym / and made hym redy and took two knyghtes of his counceylle with hym / and soo he rode afore for to abyde by the waye / for to awayte vpon sir Trystram /

¶ And as sire Trystram came rydynge vpon hys waye with his spere in his hand / kynge Marke came hurtlynge vpon hym with his two knyghtes sodenly / And alle thre smote hym with theyre speres / and kynge Marke hurte syre Trystram on the brest ryght sore / And thenne syre Tristram feutryd his spere / and smote his vnkel kynge Marke soo sore that he rasshyd hym to the erthe / and brysed hym that he laye stylle in a swoune / and longe hit was or euer Page  294 [leaf 147v] he myghte welde hym self / And thenne he ranne to the one knyght / and efte to the other / and smote hem to the cold erthe / that they laye stylle / And ther with alle sir Tristram rode forthe sore wounded to the lady / and fonde her abydynge hym at a posterne

¶ Capitulum xiiij

ANd there she welcomed hym fayre / and eyther halsed other in armes / and soo she lete putte vp his hors in the best wyse / and thenne she vnarmed hym / And soo they souped lyghtely and wente to bedde with grete ioye and plesaunce / and soo in his ragyng he took no kepe of his grene wound that kynge Marke had gyuen hym / And soo syr Tristram bebled both the ouer shete and the nether & pelowes / and hede shete / and within a whyle ther came one afore that warned her that her lord was nere hand within a bowe draughte Soo she made sir Trystram to aryse / and soo he armed hym / and tooke his hors and so departed / By thenne was come segwarydes her lord / and whan he fond her bedde troubled & broken and wente nere and beheld it by candel lyghte / thenne he sawe that there had layne a wounded knyght / A fals traitresse thenne he said / why hast thou bitrayed me / and there with alle he swange oute a swerd and said / but yf thou telle me who hath ben here / here thou shalt dye / A my lord mercy sayd the lady / and helde vp her handes / sayeng / slee me not / and I shall telle you alle who hath ben here / Telle anone said segwarydes to me alle the trouthe / Anone for drede she saide here was sir Trystram with me / and by the way as he came to me ward / he was sore wounded / A fals traitresse said segwarides where is he become / sir she said he is armed and departed on hors bak not yet hens half a myle / ye saye wel said segwarydes thenne he armed hym lyghtly / and gate his hors and rode after syre Tristram that rode streyght waye vnto Tyntagyl / And within a whyle he ouertoke sire Tristram / And thenne he badde hym torne fals traitour knyghte / and syr Tristram anon torned hym ageynst hym / And there with al segwarides smote syr Trystram with a spere that it alle to braste /

¶ And Page  295 [leaf 148r] thenne he swange oute his swerd / and smote fast at syr Tristram / Syre knyght said syre Trystram I counceyle you that ye smyte no more how be it for the wronges that I haue done you / I wille forbere you as longe as I maye /

¶ Nay sayd Segwarides that shalle not be / for outher thou shalt dye or I / Thenne syre Tristram drewe out his swerd and hurtled his hors vnto hym fyersly / and thorou the waste of the body he smote syre Segwarides that he felle to the erthe in a swoune / And soo sire Tristram departed and lefte hym there And soo he rode vnto Tyntagil and tooke his lodgynge secretely for he wold not be knowen that he was hurte

¶ Also sir Segwarides men rode after theyr maister / whome they fond lyenge in the feld sore wounded / and brouȝt hym home on his shelde / and there he lay longe or that he were hole / but at the laste he recouerd

¶ Also kynge Marke wold not be aknowen of that sir Tristram and he hadde mette that nyght / And as for syre Trystram he knewe not that kynge Marke had mette with hym / And soo the kynges astaūce came to sir Tristram to comforte hym as he laye seke in his bedde / But as longe as kynge Marke lyued / he loued neuer sire Trystram after that / though there was fayre speche / loue was there none / And thus it past many wekes and dayes / & alle was forgyuen and forgotten / For sire Segwarydes durste not haue ado with sir Tristram by cause of his noble prowesse And also by cause he was neuewe vnto kynge Marke / therfore he lete it ouer slyp / for he that hath a pryuy hurte is loth to haue a shame outward

¶ Capitulum xv /

THenne hit befelle vpon a daye that the good knyghte Bleoberys de ganys broder to Blamore de ganys / & nyghe cosyn vnto the good knyght sir launcelot du lake / This Bleoberys came vnto the courte of kynge Marke / & there he asked of kynge Marke a bone to gyue hym what yeft that he wold aske in his courte

¶ Whanne the kyng herd hym aske soo / he merueilled of hys Page  296 [leaf 148v] askynge / but by cause he was knyghte of the round table / & of a grete renomme / kynge Marke graunted hym his hole askynge / thenne saide sire Bleoberys I wille haue the fayrest lady in your Courte that me lyst to chese / I maye not say nay sayd kynge marke / Now chese at youre aduenture And soo sir Bleoberys dyd chese syr segwarydes wyf / and toke her by the hand and soo wente his waye with her / and soo he tooke his hors and gart sette her behynde his squyer and rode vpon his way / When sir segwarydes herd telle that his lady was gone with a knyght of kynge Arthurs courte /

¶ Thenne he armed hym and rode after that knyght for to rescowe his lady / soo whan Bleoberys was gone with this lady / kyng Mark and all the courte was wroth that she was awey / thenne were there certayne ladyes that knewe that there was grete loue bitwene sir Tristram and her / and also that lady loued sir Tristram aboue alle other knyghtes / Thenne there was one lady that rebuked sir Tristram in the horryblest wyse / and called hym coward knyghte / that he wold for shame of his knyghthode see a lady soo shamefully be taken aweye / fro his vnkels courte / But she ment that eyther of hem hadde loued other with entiere hert / But sire Tristram ansuerd her thus / Faire lady it is not my parte to haue adoo in suche maters whyle her lord and husband is present here / And yf hit hadde ben that her lord hadde not ben here in this courte / thenne for the worship of this courte perauentur / I wold haue ben her champyon / And yf so be / sir segwarides spede not wel / it may happen that I wille speke with that good knyght / or euer he passe from this countrey / Thenne within a whyle came one of sir segwarydes squyers / and told in the court that sir segwarides was beten sore and wounded to the poynte of dethe / as he wold haue rescowed his lady / sir Bleoberis ouerthrewe hym and sore hath wounded hym / Thenne was kynge marke heuy therof / and alle the courte / When sire Tristram herd of this / he was ashamed and sore greued / And thenne was he soone armed and on horsbak / & gouernaile his seruaunt bare his shelde and spere / And soo as sire Tristram rode fast / he mette with sir Andret his cosyn that by the commaundement of kynge Marke was sente brynge forth & euer it laye in his power / ij / Page  297 [leaf 149r] knyghtes of Arthurs Courte that rode by the countrey to seke their aduentures / Whan syr Trystram sawe sir Andret / he asked hym what tydynges / Soo god me helpe said syre Andret / ther was neuer worse with me / for here by the commaundement of kynge Mark I was sente to fetche two knyghtes of kynge Arthurs courte / and that one bete me / and wounded me / and sette nought by my message / Faire cosyn said sir tristram ryde on your way / and yf I may mete them / it may happen I shal reuenge you / So syr Andret rode in to Cornewaile And syr Tristram rode after the two knyghtes the whiche one hyght Sagramor le desyrus / & the other hyght Dodynas le saueage /

¶ Capitulum xvj /

THenne within a whyle syr Trystram sawe hem afore hym two lykely knyghtes / Sir said Gouernaile vnto his maister / sir I wold counceile you nought to haue ado with hem / for they ben two preued knyghtes of Arthurs Courte / As for that said syr Trystram haue ye no doute / but I wille haue adoo with hem to encreace my worship / for it is many daye sythen I dyd ony dedes of armes / doo as ye lyste said Gouernaile / and there with alle anone syr Trystram asked them / from whens they came / and wheder they wold / and what they dyd in tho marches / Syre Sagramore loked vpon syre Tristram / and hadde scorne of his wordes / & asked hym ageyne / Fair knyghte be ye a knyght of Cornewaile / where by aske ye hit said sir Tristram / For it is seldom sene said sir Sagramore that ye Cornysshe knyghtes ben valyaunte men of armes / For within these two houres there mette vs one of you cornysshe knyghtes / and grete wordes he spak / and anon with lytel myght he was leyd to the erthe / And as I trowe sayd sir Sagramore ye shal haue the same handsel that he hadde Faire lordes said sire Tristram it may soo happen that I maye better withstande than he dyd / and whether ye will or nyl / I wil haue ado with you / by cause he was my cosyn that ye bete And therfore here do your best / & wete ye wel but yf ye quyte you the better here vpon this ground / one knyȝt of cornewaile shal bete you both / Whan sire Dodynas le saueage herd hym saye soo he gatte a spere in his hand and said / sire knyghte Page  298 [leaf 149v] thy self / And thenne they departed and came to gyders as it had ben thonder / And syr Dodynas spere brast in sonder / but syr Trystram smote hym with a more myght / that he smote hym clene ouer the hors croupe that nyghe he hadde broken his neck / Whanne syre Sagramour sawe his felawe haue suche a falle / he merueylled what knyȝt he myght be / And he dresseth his spere with alle his myght / and syr Trystram ageynst hym and they came to gyders as the thonder / and ther sir Tristram smote syr Sagramore a stronge buffet that he bare his hors & hym to the erthe / and in the fallyng he brake his thygh / whan this was done / syr Trystram asked hem / Fayre knyghtes will ye ony more / Be there no bygger knyȝtes in the courte of kynge Arthur / it is to you shame to say of vs knyȝtes of Cornewayle dishonoure / for it may happen a Cornysshe knyght may matche you / that is trouthe said syr Sagramore / that haue we wel preued / but I requyre the sayd syre Sagramore telle vs youre ryght name by the feythe and trouthe that ye owe to the hyghe ordre of knyghthode / ye charge me with a grete thynge said syr Trystram / and sythen ye lyst to wete hit / ye shal knowe and vnderstande that my name is syr Trystram de lyonas kynge Melyodas sone / and neuewe vnto kynge Marke Thenne were they two knyghtes fayne / that they had mette with Trystram / and soo they praid hym to abyde in their felauship / Nay said sire Tristram / for I must haue ado with one of your felawes / his name is syr Bleoberys de ganys / god spede you wel said syr Sagramore and Dodynas / Syre Trystram departed and rode on ward on his waye / And thenne was he ware before hym in a valeye where rode syr Bleoberys with sir Segwarydes lady that rode behynde his squyer vpon a palfroy

¶ Capitulum xvij

THēne syr Trystram rode more than a paas vntyl that he had ouertake hym / Thenne spak syr Trystram abyde he said knyght of Arthurs courte / brynge ageyne that lady or delyuer her to me / I wille doo neyther said Bleoberys / for I drede no Cornysshe knyght soo sore that me lyste Page  299 [leaf 150r] to delyuer her / why said syr Tristram may not a Cornysshe knyght doo as wel as another knyght / this same daye two knyghtes of your Courte within this thre myle mette with me / And or euer we departed / they fonde a Cornyssh knyght good ynough for them bothe / what were their names said Bleoberis / they told me said syr Trystram that the one of them hyghte syr Sagramore le desyrus / and the other hyghte Dodynas le saueage / A said syr Bleoberys haue ye met with them Soo god me helpe they were two good knyghtes and men of grete worship / And yf ye haue bete them bothe / ye must nedes be a good knyght / but yf it soo be / ye haue bete them bothe / yet shalle ye not fere me / but ye shalle bete me / or euer ye haue thys lady / Thenne defende you said syr Tristram / soo they departed and came to gyder lyke thonder / and eyder bare other doune hors and alle to the erthe / Thenne they auoyded their horses / and lasshed to gyder egerly with swerdes and myghtely / now tracyng and trauersynge on the ryght hand and on the lyfte hand more than two houres / And somtyme they rasshed to gyder with suche a myght that they laye bothe grouelynge on the ground / Thenne sir Bleoberis de ganys starte abak / and said thus / Now gentyl good knyght a whyle hold your handes / & lete vs speke to gyders / Saye what ye wille said Trystram / & I wille ansuere you / Sire saide Bleoberys I wold wete of whens ye be / and whom ye be come / and what is your name / Soo god me help said syr Trystram I fere not to telle you my name / Wete ye wel I am kynge Melyodas sone / and my moder is kyng Markes sister / and my name is sir Tristram de Lyonas and kynge Marke is myn vnkel / Truly said Bleoberys I am ryght gladde of you / for ye are he that slewe marhaus the knyght hand for hand in an Iland for the truage of Cornewaile / Also ye ouercame sir Palamydes the good knyght at a turnement in an Iland / where ye bete sir Gawayne & his nyne felawes / Soo god me helpe said sir Trystram wete ye wel that I am the same knyȝt / Now I haue told you my name / telle me yours with good will / Wete ye wel that my name is sir Bleoberys de ganys / and my broder hyghte sire Blamore de ganys / that is called a good knyght and we be syster children vnto my lord sir Laūcelot du lake that we calle Page  300 [leaf 150v] one of the best knyghtes of the world / That is trouthe said sir Tristram / sir Launcelot is called pierles of curtosy and of knyghthode / and for his sake said sir Trystram I will not with my good wille fyghte no more with you for the grete loue I haue to sir Launcelot du lake / In good feith said Bleoberys / as for me / I will be lothe to fyghte with you / But sythen ye folowe me here to haue this lady / I shal profer you kyndenys curtosy and gentilnes right here vpon this ground / This lady shalle be betwixe vs bothe / and to whome that she wille go / lete hym haue her in pees / I wille wel said Tristrā For as I deme she wille leue you / and come to me / ye shalle preue hit anone said Bleoberys

¶ Capitulum xviij

SOo whan she was sette betwixe them bothe / she sayd these wordes vnto sir Tristram / wete ye wel syr Tristram de lyones that but late thou was the man in the world that I moost loued and trusted / And I wende thou haddest loued me ageyne aboue alle ladyes / But whan thou sawest this knyght lede me awey thou madest no chere to rescowe me / but suffred my lord Segwarydes ryde after me / but vn tyl that tyme I wend thou haddest loued me / And therfore now I wille leue the / and neuer loue the more / & there with alle she went vnto sir Bleoberys / Whan syr Tristram sawe her doo soo / he was wonderly wrothe with that lady & ashamed to come to the courte / sir Tristram said sir Bleoberys ye are in the defaute / for I here by these ladyes wordes / she before this day trusted you aboue alle erthly knyghtes / and as she saith ye haue deceyued her / therfore wete ye wel / ther may noo man hold that wille aweye / and rather than ye shold be hertely displeasyd with me / I wold ye had her / and she wold abyde with you / Nay said the lady / so god me help I wil neuer goo with hym / For he that I loued most / I wende he had loued me / And therfore sire Trystram she said ryde as thou cam / for though thou haddest ouercome this knyȝt as ye was lykely / with the neuer wold I haue gone / And I shall pray this knyghte soo faire of his knyghthode that or euer he passe Page  301 [leaf 151r] this countrey / that he wille lede me to the Abbeye / there my lord syr Segwarydes lyeth Soo god me helpe said Bleoberis I lete yow wete good knyght sire Trystram by cause kynge Marke gaf me the choyse of a yefte in this courte / and so this lady lyked me best / Not withstandynge she is wedded and hath a lord / and I haue fulfylled my quest / she shall be sent vnto her husband ageyne / And in especyal moost for youre sake sir Trystram / And yf she wold goo with you / I wold ye had her / I thanke you said syr Trystram / but for her loue I shal beware what manere a lady I shalle loue or truste / For had her lord syr Segwarydes ben away from the courte I shold haue ben the fyrst that shold haue folowed yow / but sythen ye haue refused me / as I am true knyght I shalle her knowe passyngly wel that I shal loue or trust / and soo they took theyr leue one fro thother and departed / And soo sir tristram rode vnto Tyntagyl / and syr Bleoberys rode vnto the abbay where syr segwarydes lay sore wounded / and there he delyuerd his lady / and departed as a noble knyght / & whan sir segwarydes sawe his lady / he was gretely comforted / and thenne she told hym that sir Trystram had done grete bataill with syre Bleoberys / and caused hym to brynge her ageyne / These wordes pleasyd sir segwarydes ryght wel that sir tristram wold doo soo moche / and soo that lady told alle the bataill vnto kynge Marke betwixe syr Trystram and sir Bleoberys

¶ Capitulum xix

THenne whanne this was done / kynge Mark cast alweyes in his hert how he myght destroye syr Tristram And thenne he ymagyned in hym self to sende sir tristram in to Irland for la beale Isoud / For sir Trystram had soo preysed her beaute and her goodnes that kynge Mark said he wold wedde her / where vpon he praid syr Tristram to take his wey in to Irland for hym on message / And all this was done to the entente to slee syr Tristram / Not withstandynge syr Trystram wold not reffuse the message for no daūger nor peryl that myght falle for the pleasyr of his vnkel / but Page  302 [leaf 151v] to goo he made hym redy in the most goodlyest wyse that myght be deuysed / For sir Tristram tooke with hym the mooste goodlyest knyghtes that he myght fynde in the courte / & they were arayed after the gyse that was thenne vsed in the goodlyest maner / So sir Tristram departed and toke the see with alle his felauship / And anone as he was in the brode see / a tempest toke hym and his felauship and drofe them bak in to the coste of Englond / And there they arryued fast by Camelot / and ful fayne they were to take the land /

¶ And whan they were landed sir Tristram sette vp his pauelione vpon the land of Camelot / and there he lete hange his shelde vpon the pauelione / And that same day came two knyghtes of kynge Arthurs / that one was sir Ector de marys and sir Morganor And they touched the shelde / and badde hym come oute of the pauelione for to Iust and he wold Iust / ye shalle be ansuerd said sir Tristram and ye wille tarye a lytel whyle / Soo he made hym redy / and fyrste he smote doune sir Ector de marys / and after he smote doune sir Morganor alle with one spere / and sore brysed them / And whan they laye vpon the erthe / they asked sir Tristram what he was / and of what countrey he was knyghte / Faire lordes said sir Tristram wete ye wel that I am of Cornewaile / Allas said sire Ector now am I ashamed / that euer ony Cornysshe knyghte shold ouercome me / And thenne for despyte syre Ector put of his armour fro hym / and wente on foot and wold not ryde

¶ Capitulum xx

THenne it felle that sire Bleoberys and sire Blamore de ganys that were bretheren they hadde assomoned the kyng Anguysshe or Irland for to come to Arthurs Court vpon payne of forfeture of kyng Arthurs good grace And yf the kynge of Irland came not in at the day assigned and sette / the kynge shold lese his landes / So by hit happend that at the day assigned kyng Arthur neither sire Launcelot myght not be there for to gyue the Iugement / for kynge Arthur was with sir launcelot at the castel ioyous gard / And so Page  303 [leaf 152r] kynge Arthur assigned kyng Carados and the kyng of scottes to be there that day as Iuges / So whan the kynges were at Camelot / kynge Anguysshe of Irland was come to knowe is accusars / Thenne was there Blamore de ganys and appeled the kynge of Irland of treason / that he hadde slayne a cosyn of his in his courte in Irland by treason / The kyng was sore abasshed of his accusacion / for why / he was come att the somons of kynge Arthur / And or that he came at Camelot / he wist not wherfore has was sente after / And whanne the kyng herd sir Blamor saye his wille / he vnderstood wel there was none other remedy but to ansuere hym knyghtly / for the custome was suche in tho dayes / that and ony man were appealed of ony treason or murther / he shold fyghte body for body / or els to fynde another knyght for hym / And alle maner of Murtherers in tho dayes were callid treason / So whan kyng Anguysshe vnderstood his accusynge / he was passynge heuy / for he knewe sir Blamor de ganys that he was a noble knyght / and of noble knyghtes comen / Thenne the kynge of Irland was symply purueyed of his ansuere / therfore the Iuges gaf hym respyte by the thyrdde daye to gyue his ansuere / Soo the kynge departed vnto his lodgynge / the mean whyle ther came a lady by sir Trystrams pauelione makyng grete dole / what eyleth you said sir Tristram that ye make suche dole / A fayre knyght said the lady I am ashamed onles that som good knyght helpe me / for a grete lady of worship sente by me a fayre child and a ryche vnto sir launcelot du lake / and here by there mette with me a knyghte and threwe me doune fro my palfray and took aweye the child from me / wel my lady said syr Tristram / and for my lord syr Launcelots sake I shalle gete you that child ageyne / or els I shalle be beten for hit / And soo sire Tristram tooke his hors / and asked the lady whiche wey the knyght rode / And thenne she tolde hym And he rode after hym / and within a whyle he ouertoke that knyght / And thenne syr Tristram badde hym come and gyue ageyne the child

¶ Capitulum xxj

Page  304 [leaf 152v]

The knyghte torned his hors / and he made hym redy to fyghte / And thenne sir Trystram smote hym with a swerd suche a buffet / that he tombled to the erthe / And thenne he yelded hym vnto sir Tristram / thenne come thy waye sayd sire Trystram and brynge the child to the lady ageyne / Soo he took his hors wekely and rode with sir Trystram / and thenne by the way syr Trystram asked hym his name / Thenne he said my name is Breunis saunte pyte / Soo whanne he hadde delyuerd that child to the lady / he said / sir as in this the child is wel remedyed / Thenne sir Trystram lete hym goo ageyne that sore [ reyentyd ] hym after / for he was a grete foo vnto many good knyghtes of kynge arthurs courte /

¶ Thenne whan sir Tristram was in his pauelione / Gouernaile his man cam / and told hym how that kynge anguysshe of Irland was come thyder / and he was putte in grete distresse / and there gouernaile told sir Trystram / how kynge anguysshe was somoned and appealed of murther / Soo god me help said sir Tristram these ben the best tydynges that euer came to me this vii yere / for now shalle the kynge of Irland haue nede of my helpe for I dare saye there is no knyght in this countrey that is not of arthurs courte dare doo bataille with syre Blamore de ganys / and for to wynne the loue of the kyng of Irland I wil take the batail vpon me / and therfor gouernaile brynge me I charge the to the kyng / Thenne Gouernaile wente vnto kynge anguysshe of Irland and salewed hym fayre / the kynge welcomed hym / and asked hym what he wolde / Syr saide Gouernaile / here is a knyghte nere hande that desyreth to speke with you / he badde me saye he wolde doo you seruyse / what Knyght is he saide the Kynge / syr he said hit is sir Tristram du lyonas that for your good grace ye shewed hym in your landes wyll rewarde you in these countreyes / Come on felawe said the kynge with me anone / and shewe me vnto sir Trystram / soo the Kyng took a lytel hackney and but fewe felauship with him vntyl he came vnto sir Tristrams pauelione / and whanne syre Trystram sawe the Kynge / he ranne vnto hym and wold haue holden his styrope / But the kynge lepte from his hors lyghtly / and eyther halsed other in armes / my gracious Lord sayde sire Trystram gramercy of your grete goodnesses shewed Page  305 [leaf 153r] vnto me in your marches and landes / And at that tyme I promysed you to doo my seruyse / and euer it laye in my power / & gentyl knyght said the kynge vnto sir Tristram / now haue I grete nede of you / neuer had I soo grete nede of no knyghtes helpe / How soo my good lord said sire Trystram / I shalle telle you said the kynge I am assomoned and appeled fro my countrey for the deth of a knyght that was kyn vnto the good knyght sir Launcelot / wherfor sir Blamor de ganys broder to sir Bleoberys hath appeled me to fyghte with hym / outher to fynde a knyght in my stede / And wel I wote said the kyng these that are come of kynge Bans blood as sir Launcelot & these other are passynge good knyghtes and hard men for to wynne in bataille as ony that I knowe now lyuynge / Syre said sir Trystram / for the good lordship ye shewed me in Irland and for my lady youre doughters sake / La Beale Isoud I wille take the bataille for you vpon this condycyon / that ye shalle graūte me two thynges / that one is that ye shal swere to me that ye are in the ryght that ye were neuer consentynge to the knyȝtes dethe / Syr thenne said sir Tristram when that I haue done this bataille yf god yeue me grace that I spede that ye shalle gyue me a reward what thynge resonable that I wille aske of you / Soo god me help said the kyng ye shal haue what someuer ye will aske / It is wel said / said sir Trystram

¶ Capitulum xxij

NOw make your ansuer that youre Champyon is redy For I shalle dye in your quarel rather than to be racreaunt / I haue no doubte of you said the kynge / that and ye shold haue adoo with sir Launcelot du lake / Syr said sir Tristram as for sire Launcelot he is called the noblest knyghte of the worlde / And wete ye wel that the knyghtes of his blood are noble men and drede shame / And as for Bleoberys broder to syr Blamor I haue done bataille with hym / therfore vpon my hede / it is no shame to call hym a good knyght / It is noysed said the kynge / that Blamor is the hardyer knyghte / sire as for that lete hym be / he shal neuer be refused / & as he were Page  306 [leaf 153v] the best knyght that now bereth shelde or spere / Soo kyng Anguysshe departed vnto kynge Carados / and the kynges that were that tyme as Iuges / and told hem that he hadde fonde his champyon redy / Thenne by the commaundementes of the kynges sir Blamor de ganys and sire Tristram were sente for to here the charge / And whan they were come beforne the Iuges / there were many kynges and knyghtes biheld sire Tristram / and moche speche they had of hym by cause he slewe sir Marhaus the good knyght / and by cause he foriusted sir Palamydes the good knyght /

¶ So when they had taken theire charge / they withdrewe hem to make hem redy to doo bataile / Thenne said sir Bleoberys to his broder sir Blamore / fayr dere broder remembre of what kyn we be come of / and what a man is sir launcelot du lake / neyther ferther nor nere but brother children / and ther was neuer none of oure kyn that euer was shamed in bataille / and rather suffre deth broder than to be shamed / Broder said Blamore haue you no doute of me / for I shal neuer shame none of my blood / hou be it I am sure that yonder knyghte is called a passynge good knyght as of his tyme one of the world / yet shal I neuer yelde me nor say the lothe word / wel may he happen to smyte me doun with his grete myȝt of chyualry / but rather shalle he slee me than I shal yelde me as recreaunt / God spede you wel said Bleoberys for ye shal fynde hym the myghtyest knyght that euer ye hadde ado with all / for I knowe hym for I haue had ado with hym God me spede said Blamor de ganys / and therwith he tooke his hors at the one ende of the lystes / and sire Trystram atte other ende of the lystes / and soo they feutryd theyre speres / & came to gyders as it had ben thonder / and there sir Tristram thorou grete myght smote doune sir Blamore and his hors to the erthe / Thenne anone sir Blamor auoyded his hors and pulled oute his swerd / and threwe his shelde afore hym / and badde sir Trystram alyghte / for though an hors hath failed me I truste to god the erthe wil not faile me / And thenne syre Trystram alyght and dressid hym vnto batail / and there they lasshed to gyder strongly as racyng and tracyng / foynynge and dasshyng many sad strokes that the kynges and knyghtes had grete wonder that they myghte stande / for euer they Page  307 [leaf 154r] fought lyke wood men so that there were neuer knyghtes sene fyghte more fyersly than they dyd / for sire Blamore was so hasty he wold haue no rest that alle men wondred that they had brethe to stande on their feet / and alle the place was blody that they fought in / And at the laste syre Tristram smote sir Blamor suche a buffet vpon the helme that he there felle doune vpon his syde / and sir Trystram stode and beheld hym /

¶ Capitulum xxiij

THenne whan sir Blamor myghte speke / he said thus Syre Tristram de Lyones I requyre the as thou art a noble knyghte and the best knyghte that euer I fond that thou wilt slee me oute / for I wold not lyue to be made lord of alle the erth / for I haue leuer dye with worship than lyue with shame / and nedes sir Tristram thou must slee me / or els thou shalt neuer wynne the feld / for I wille neuer saye the lothe word / And therfore yf thou dare slee me / slee me / I requyre the / Whanne sir Tristram herd hym saye soo knyghtely / he wyste not what to doo with hym / he remembryng hym of bothe partyes of what blood he was comen / and for sir Launcelots sake he wold be lothe to slee hym / and in the other party in no wyse he myghte not chese / but that he must make hym to saye the lothe word or els to slee hym / Thenne syre Tristram starte abak and went to the kynges that were Iuges / and ther he kneled doun to fore hem and besoughte hem for their worshippes and for kynge Arthurs and sir Laūcelots sake that they wold take this mater in theyr handes / For my fayre lordes said sir tristram hit were shame and pyte / that this noble knyght that yonder lyeth shold be slayne / for ye here wel / shamed wille he not be / and I pray to god that he neuer be slayne nor shamed for me / And as for the kyng for whome I fyghte fore I shalle requyre hym as I am his true champyon and true knyght in this felde that he wille haue mercy vpon this knyghte / So god me helpe said kynge Anguysshe I wil for your sake syre tristram be ruled as ye wylle haue me / For I knowe you for my true knyghte /

¶ And therfore I Page  308 [leaf 154v] wylle hertely pray the kynges that ben here as Iuges to take hit in theire handes / And the kynges that were Iuges called syr Bleoberys to them / and asked hym his aduyse

¶ My lordes said Bleoberys / though my broder be beten and hath the wers thorou myghte of armes I dare saye though syre Trystram hath beten his body / he hath not beten his herte / and I thanke god he is not shamed this daye / And rather than he shold be shamed / I requyre you sayd Bleoberys lete sir Tristram slee hym oute / It shalle not be soo said the kynges / for his parte aduersary bothe the kynge and the champyon haue pyte of syre Blamors knyghthode / My lordes said Bleoberys I wille ryght wel as ye wille /

¶ Thenne the kynges called the kynge of Irland and fond hym goodely and tretabyl / And thenne by alle their aduyses syre Tristram and syre Bleoberys toke vp sire Blamore / and the two bretheren were accorded with kynge Anguysshe / and kyssed and made frendys for euer / And thenne sire Blamor and sire Trystram kyssed to gyders / and there they made their othes that they wold neuer none of them two bretheren fyghte with syre Trystram / and syre Trystram made the same oth And for that gentyl bataille alle the blood of syre Launcelot loued sire Trystram for euer /

¶ Thenne kynge Anguysshe and syre Tristram toke theire leue ande sailed in to Irland with grete noblesse and ioye /

¶ Soo whanne they were in Irland / the kynge lete make it knowen thoroute alle the land how and in what manere syre Trystram had done for hym

¶ Thenne the Quene and alle that there were made the moost of hym that they myghte / But the Ioye that la beale Isoud made of syr Tristram there myghte no tonge telle / for of alle men erthely she loued hym moost

¶ Capitulum xxiiij

THenne vpon a daye kynge Anguysshe asked syr Tristram why he asked not his bone / For what someuer he had promysed hym / he shold haue hit withoute fayle Page  309 [leaf 155r] Syre sayd sire Trystram now is hit tyme this is alle that I wylle desyre that ye wylle gyue me la beale Isoud youre doughter not for my self but for myn vnkel kynge Marke that shalle haue her to wyf / for soo haue I promysed hym / Allas said the kynge I had leuer than alle the land that I haue / ye wold wedde her youre self / Syre and I dyd than I were shamed for euer in this world / and fals of my promyse / Therfore said sire Trystram I praye you hold your promyse that ye promysed me / for this is my desyre that ye wylle gyue me la Beale Isoud to goo with me in to Cornewaile for to be wedded to kynge Marke myn vnkel /

¶ As for that sayd kynge Anguysshe ye shalle haue her with you to doo with her what it please you / that is for to saye yf that ye lyst to wedde her your self that is me leuest / And yf ye wille gyue her vnto kynge Marke youre vnkel that is in youre choyse /

¶ Soo to make short conclusion la beale Isoud was made redy to goo with syre Trystram and dame Bragwayne wente with her for her chyef gentylwoman with many other / thenne the quene Isouds moder gaf to her and dame Bragwayne her doughters gentilwoman and vnto Gouernaile a drynke and charged them that what day kynge Marke shold wedde that same daye they shold gyue hym that drynke / soo that kynge Marke shold drynke to la beale Isoud / and thenne said the Quene I vndertake eyther shalle loue other the dayes of their lyf / Soo this drynke was yeuen vnto dame Bragwayne and vnto Gouernaile / And thenne anone syre Trystram tooke the see / and la Beale Isoud / and whan they were in theire caban hit happed soo that they were thursty / and they sawe a lytyl flacked of gold stande by them / and hit semed by the coloure and the taste that it was noble wyn / Thenne sire Trystram toke the flacket in his hand / and sayd Madame Isoud here is the best drynke that euer ye drank that dame Bragwayne youre mayden and Gouernayle my seruaunt haue kepte for them self / Thenne they lough and made good chere and eyther dranke to other frely / and they thoughte neuer drynke that euer they dranke to other was soo swete nor soo good / But by that theyr drynke was in their Page  310 [leaf 155v] bodyes / they loued eyther other so wel that neuer theyr loue departed for wele neyther for wo / And thus it happed the loue fyrste betwixe sire Tristram and la beale Isoud / the whiche loue neuer departed the dayes of their lyf / soo thenne they sayled tyl by fortune they came nyghe a castel that hyght Pluere And there by arryued for to repose them wenyng to them to haue hadde good herborouȝ / but anon as sir Trystram was within the castel / they were taken prysoners / for the customme of the castel was suche who that rode by that castel and brought ony lady he must nedes fyghte with the lord that hyghte Breunor And yf it were soo that Breunor wanne the feld / thenne shold the knyght straunger and his lady be putte to dethe what that euer they were / and yf hit were so that the straunge knyghte wanne the feld of sir Breunor / thenne shold he dye and his lady bothe / this custome was vsed many wynters / for hit was called the castel pluere that is to saye the wepynge castel

¶ Capitulum xxv

THus as sire Trystram and la beale Isoud were in pryson / hit happed a knyght and a lady came vnto them / where they were to chere them / I haue merueille said Tristram vnto the knyȝt and the lady what is the cause the lord of this Castel holdeth vs in pryson / hit was neuer the custome of no place of worship that euer I came in / whan a knyghte and a lady asked herborugh / and they to receyue hem / & after to destroye them that ben his gestes / Syr said the knyȝt this is the old custome of this castel that whan a knyght cometh here / he must nedes fyghte with our lord / and he that is weyker muste lese his hede / And whan that is done yf his lady that he bryngeth / be fouler than out lordes wyf / she must lese her heede / And yf she be fayrer preued than is oure lady / thenne shal the lady of this castel lese her heede / Soo god me help said sire Tristram this is a fowle custome and a shameful / But one auaūtage haue I said sir Trystram I haue a lady is fayre ynouȝ fayrer sawe I neuer in alle my lyfe dayes / And I doubte Page  311 [leaf 156r] not for lack of beaute she shalle not lese her heed / and rather than I shold lese my heede I wille fyghte for hit on a fayre felde /

¶ Wherfore Syre knyght I pray you telle your lord that I wille be redy as to morne with my lady and my selfe to doo batail yf hit be so I maye haue my hors and myne armour / Syre said that knyght I vndertake that youre desyre shalle be spedde ryght wel / And thenne he sayd take youre rest and loke that ye be vp by tymes and make you redy and your lady / for ye shall wante no thynge that you behoueth / and ther with he departed and on the morne by tymes that same knyghte came to sire Trystram and fetched hym oute and his lady & brouȝte hym hors and armour that was his owne / and badde hym make hym redy to the feld / for alle the estates and comyns of that lordship were there redy to behold that bataille and Iugement /

¶ Thenne came syre Breunor the lord of that Castel wyth his lady in his hand muffeld / and asked syre Trystram where was his lady / for and thy lady be fayrer than myn wyth thy swerd smyte of my ladyes hede / and yf my lady be fayrer than myn / with my swerd I muste stryke of her heed / And yf I maye wynne the / yet shalle thy lady be myne / and thou shalt lese thy hede /

¶ Syre said Trystram this is a fowle custome and horryble / and rather than my lady shold lese her heed / yet had I leuer lese my hede /

¶ Nay nay said sire Breunor the ladyes shalle be fyrst shewed to gyder / and the one shalle haue her Iugement / Nay I wille not soo said sire Tristram / For here is none that wille gyue ryghteuous Iugement / But I doubte not said sir Tristram my lady is fayrer than thyne / And that wille I preue and make good with my hand / And who someuer he be that wille saye the contrary I wille preue hit on his hede And there with sire Tristram shewed la beale Isoud / and torned her thryes aboute with his naked swerd in his hand And whanne syre Breunor sawe that he dyd the same wyse torne his lady / But whanne syre Breunor beheld la beale Isoud / hym thoughte he sawe neuer a fayrer lady / and thenne he dradde his ladyes hede shold be of / and soo al the peple Page  312 [leaf 156v] that were there present gaf Iugement that la beale Isoud was the fayrer lady and the better made / how now said sir Tristrā me semeth it were pyte that my lady shold lose her heed / but by cause thou and she of long tyme haue vsed this wycked custome / and by you bothe haue many good knyghtes and ladyes ben destroyed / for that cause it were no losse to destroye you bothe / Soo god me help said sir Breunor for to saye the sothe / thy lady is fayrer than myn / and that me sore repenteth And soo I here the peple pryuely saye / for alle wymmen I sawe none soo fayre / and therfor and thou wilt slee my lady I doute not but I shal slee the and haue thy lady /

¶ Thou shalt wynne her said sir Trystram as dere as euer knyȝt wan lady / And by cause of thyn owne Iugement as thou woldest haue done to my lady yf that she had ben fouler / and by cause of the evyl custome gyue me thy lady said Trystram / & there with alle sir Tristram strode vnto hym and toke his lady from hym / and with an auke stroke he smote of her hede clene / wel knyght said sir Breunor now hast thou done me a despyte /

¶ Capitulum xxvj

NOw take thyn hors sythen I am lady les I wil wyn thy lady and I may / thenne they took their horses / & came to gyders as hit had ben the thonder / and sire Trystram smote sir Breumor clene from his hors / and lyȝtely he rose vp And as sir Trystram came ageyne by hym / he threst his hors thorou oute both the sholders that his hors hurled here and there / and felle dede to the ground / And euer sir Breunor ranne after to haue slayne sire Tristram / but sire Tristram was lyght and nymel and voyded his hors lightely / And or euer sir Trystram myght dresse his sheld and his swerd / the other gaf hym thre or foure sadde strokes

¶ Thenne they rasshed to gyders like two bores tracyng and trauercyng myȝtely and wysely as two noble knyghtes / For this sire Breunor was a proued knyghte and hadde ben or than the dethe of many good knyghtes / that it was pyte that he had so long endured / Thus they fouȝt hurlyng here & there nyȝ two houres &Page  313 [leaf 157r] eyder were wounded sore / thenne at the last sir Breunor rasshed vpon sir Trystram and tooke hym in his armes / for he trusted moche to his strengthe / Thenne was sir Trystram called the strengest and the hyest knyght of the world / For he was called byggar than sir laūcelot / but sir Launcelot was better brethed / Soo anone sire Trystram thrust syr Breunor doune grouelynge / and thenne he vnlaced his helme / and strake of his hede / And thenne al they that longed to the castel cam to hym and dyd hym homage and feaute prayenge hym / that he wold abyde there stylle a litel whyle to fordo that foule custom Syr Trystram graunted ther to / the meane whyle one of the knyghtes of the castel rode vnto sire Galahad the haut prynce the whiche was sir Breunors sone / whiche was a noble knyȝt and told hym what mysauenture his fader hadde and his moder

¶ Capitulum xxvij

THenne came sir Galahad and the kyng with the honderd knyghtes with hym / and this syr Galahad profered to fyghte with sir Trystram hand for hand / and soo they made them redy to go vnto bataile on horsbak with grete courage / Thenne sir Galahad and sir Trystram mette to gyders soo hard that eyder bare other doune hors and alle to the erthe / And then̄e they auoyded their horses as noble knyghtes and dressid theire sheldes and drewe their swerdes with Ire & rancour / and they lasshed to gyder many sadde strokes / and one whyle strykynge another whyle foynynge / tracynge and trauersynge as noble knyghtes / thus they fought long nere half a day and eyder were sore wounded / At the last sire Trystram waxed lyghte and bygge / and doubled his strokes and drofe syr Galahad abak on the one syde and on the other / so that he was lyke to haue ben slayne / With that came the kynge with the honderd knyghtes and all that felauship went fyersly vpon sir Tristram / whan sir Trystram sawe them comyng vpon hym / thenne he wist wel he myghte not endure /

¶ Thēne as a wyse knyght of werre he said to sir Galahaud the haut prynce syre ye shewe to me no knyghthode for to suffre alle youre men to haue adoo with me al at ones /

¶ And as me semeth ye be a Page  314 [leaf 157v] noble knyghte of your handes / hit is grete shame to you / So god me helpe said sire Galahad there is none other waye but thou must yelde the to me / outher els to dye said sir Galahad to sir Trystram I wille rather yelde me to you than dye / for that is more for the myght of your men than of your handes / And ther with alle sir Trystram tooke his owne suerd by the poynte / and put the pomel in the hand of sir Galahad / there with alle came the kynge with the honderd knyghtes / and hard beganne to assaylle sir Trystram / lete be said sir Galahad be ye not soo hardy to touche hym / for I haue gyuen this knyght his lyf / that is youre shame said the kynge with the C knyghtes / hath he not slayne your fader and your moder / As for that said syre Galahad I may not wyte hym gretely for my fader had hym in pryson / and enforced hym to doo bataill with hym / and my fader had suche a customme that was a shameful custome that what knyght came there to aske herborouh his lady must nedes deye but yf she were fayrer than my moder / And yf my fader ouercame that knyght he must nedes deye / This was a shameful customme and vsage / a knyghte for his herberowe askynge to haue suche herborage /

¶ And for this customme I wold neuer drawe aboute hym / So god me helpe said the kynge this was a shameful customme / Truly said syre Galahad soo semed me / and me semed it had ben grete pyte that this knyght shold haue ben slayne / for I dare saye he is the noblest man that bereth lyf / but yf it were sir laūcelot du lake / Now fayre knyght said sir Galahad I requyre the telle me thy name / and of whens thou arte / and whyder thou wolt / Syr he said my name is sir Trystram du lyones & from kynge Marke of Cornewaile I was sente on message vnto kynge Anguysshe of Irland for to fetche his doughter to be his wyf / & here she is redy to go with me into Cornewaile / and her name is la beale Isoud / and / sir Trystram said sir Galahad the haut prynce / wel be ye fonde in these marches / & soo ye wille promyse me to goo vnto syr Launcelot du lake / and accompanye with hym / ye shalle goo where ye wylle / and your fayre lady with you / And I shalle promyse you neuer in al my dayes shal suche custommes be vsed in this castel as haue ben vsed / Syr said syre Trystram now I lete you wete Page  315 [leaf 158r] soo god me helpe I wende ye had ben syr launcelot du lake / whan I sawe you fyrste / and therfore I dredde you the more And sire I promyse you said sir Tristram as soone as I may I wille see sir launcelot / and enfelaushippe me with hym / for of alle the knyghtes of the world I moost desyre his felauship

¶ Capitulum xxviij

ANd thēne sir Tristram took his leue whan he sawe his tyme and tooke the see / And the meane whyle word came vnto sir Launcelot and to sir Trystram that sire Carados the myghty kynge that was made lyke a gyaunt / that fought with sir Gawayn and gaf hym suche strokes that he swouned in his sadel / and after that he took hym by the coller /and pulled hym oute of his sadel / and fast bounde hym to the sadel bowe / and so rode his wey with hym toward his castell / And as he rode by fortune sir Launcelot mette with sire Carados and anone he knewe sire Gawayne / that lay bounde after hym / A said sir Launcelot vnto sire Gawayne how stande it with you / Neuer so hard said sir gawayn onles that ye helpe me / for so god me help without ye rescowe me I knowe no knyght that may but outher you or syr Trystram / where for sir Launcelot was heuy of sir Gawayns wordes / And thenne sir Launcelot bad sir Carados leye doune that knyghte / & fyghte with me / thou arte but a foole saide sire Carados / for I wylle serue you in the same wyse / as for that said sir Launcelot spare me not / for I warne the I wille not spare the / And thenne he bond sir Gawayne hand and foot / and so threwe hym to the ground / And thenne he gate his spere of his squyer / and departed from syr launcelot to fetche his cours / and soo eyther met with other / and brake their speres to their handes / & thenne they pulled out swerdes / and hurtled to gyders on horsbak more than an houre / And at the laste sire launcelot smote sir Carados suche a buffet vpon the helme that it perched his brayne pan / So thenne sir Launcelot toke sir Carados by the coller and pulled hym vnder his hors feet / And thenne he alyȝte and pulled of his helme / and strake of his hede / And thenne Page  316 [leaf 158v] sir Launcelot vnbounde sir Gawayne / soo this same tale was told to sir Galahad and to sir Trystram / here maye ye here the noblenes that foloweth sir launcelot / Allas said syr Trystram and I had not this message in hand with this fayre lady / truly I wold neuer stynte or I had fonde syre Launcelot / Thenne sire Trystram and la beale Isoud wente to the see & came in to Cornewaile / and there alle the barons mette hem /

¶ Capitulum xxix

ANd anone they were rychely wedded with grete nobley / But euer as the frensshe book sayth sir Trystram and la beale Isoud loued euer to gyders /

¶ Thenne was there grete Iustes and grete torneyenge / and many lordes and ladyes were at that feest / and sir Trystram was most preysed of alle other / thus dured the feest longe / and after the feest was done / within a lytel whyle after by the assent of two ladyes that were with quene Isoud / they ordeyned for hate and enuy for to destroye dame Bragwayne / that was mayden and lady vnto la beale Isoud / and she was sente in to the forest for to fetche herbes / & there she was mette & bounde feete and hand to a tree / and soo she was bounden thre dayes / And by fortune sir Palamydes fond dame Bragwayne / and there he delyuerd her from the dethe / and brought her to a nonnery there besyde for to be recouerd / whanne Isoud the quene myst her mayden / wete ye wel she was ryght heuy as euer was ony quene / for of alle erthely wymmen she loued her best / the cause was for she came with her oute of her countreye / And soo vpon a day quene Isoud walked in to the forest to putte aweye her thoughtes / and ther she wente her self vnto a welle / and made grete mone / and sodenly there came Palamydes to her / and had herd alle her complaynte / and sayd Madame Isoud and ye wille graunte me my bone / I shalle brynge to you dame Bragwayne sauf and sound / And the quene was so glad of his profer / that sodenly vnauysed she graūted alle his askynge / wel madame said Palamydes I trust to your promyse / And yf ye wille abyde here half an houre / I shal brynge her to you / I shall abyde you said la beale Isoud Page  317 [leaf 159r] And sir Palamydes rode forth his way to that nonnery / and lyghtly he came ageyne with dame Bragwayne / but by her good wille she wold not haue comen ageyne / by cause for loue of the quene she stood in auēture of her lyf / Notwithstandyng half ageynst her wille she wente with sir Palamydes vnto the quene / And whan the quene sawe her / she was passyng glad Now madame said Palamydes remembre vpon your promyse / for I haue fulfilled my promyse / Sir Palamydes said the quene I wote not what is your desyre / But I wille that ye wete how be it I promysed you largely I thought none euyl nor I warne you none ylle wille I doo / Madame said sir palamydes / as at this tyme ye shalle not knowe my desyre / but bifore my lord your husband there shalle ye knowe that I wil haue my desyre that ye haue promysed me / And therwith the quene departed and rode home to the kynge / and sir palamydes rode after her / And whan syr Palamydes came before the kynge / he said sir kyng I requyre you as ye be a ryghteuous kynge that ye wille Iuge me the ryght / Telle me your cause said the kynge and ye shalle haue ryght /

¶ Capitulum xxx

SYre said Palamydes I promysed your Quene Isoud to brynge ageyne dame Bragwayne that she had lost vpon this couenaunt that she shold graunte me a bone that I wold aske / and without grutchynge outher auysemēt she graunted me / what saye ye my lady said the kynge / hit is as he saith soo god me help said the quene / to saye the sothe / I promysed hym his askynge for loue and ioye that I had to see her / Wel madame said the kynge / and yf ye were hasty to graunte hym what bone he wold aske / I wylle wel that ye performe your promyse / Thenne said Palamydes I will that ye wete that I wille haue your quene to lede her and gouerne her where as me lyst / There with the kynge stood styll and bethought hym of sir Trystram / and demed that he wold rescowe her / And thenne hastely the kynge ansuerd take her with the aduētures that shal falle of hit / for as I suppose thou wylt Page  318 [leaf 159v] not enioye her noo whyle / As for that said Palamydes I dare ryght wel abyde the aduenture / and soo to make short tale / sir Palamydes toke her by the hand / and said Madame grutche not to goo with me / for I desyre no thynge but your own promyse / As for that said the quene I fere not gretely to go with the / hou be it thou hast me at auauntage vpon my promyse / For I doute not I shalle be worshipfully rescowed from the / As for that said sir Palamydes be it as it be maye / So quene Isoud was sette behynde Palamydes / and rode his way / anon the kynge sente after syr Trystram / but in no wyse he coude be foūde / for he was in the forest an huntyng / for that was alweyes his custome / but yf he vsed armes / to chase and to hunte in the forestes / Allas said the kynge now I am shamed for euer that by myn owne assente my lady and my quene shalle be deuoured / Thenne came forth a knyght his name was lambegus / and he was a knyght of syr Trystram / My lord sayd this knyght sythe ye haue truste in my lord sire Tristram / wete ye wel for his sake I wille ryde after your quene and rescowe her / or els I shal be beten / Gramercy saide the kynge / & I lyue sir Lambegus I shal deserue hit / And thenne sir Lambegus armed hym / and rode after as fast as he myghte / And thenne within a whyle he ouertoke sir Palamydes / And thenne sir Palamydes lefte the quene / what arte thou saide Palamydes / arte thou Trystram / nay he saide I am his seruaunte / and my name is Lambegus / that me repenteth saide Palamydes / I hadde leuer thou haddest ben sire Trystram / I bileue you wel said Lambegus / but when thou metest with sir Trystram thou shalt haue thy handes ful / And thenne they hurtled to gyders and alle to braste their speres / and thenne they pulled oute their swerdes / and hewed on helmes and hauberkes / At the laste sire Palamydes gaf sir Lambegus suche a wound that he felle doun lyke a dede knyghte to the erthe / Thenne he loked after la beale Isoud / and thēne she was gone he nyst where / wete ye wel sir Palamydes was neuer soo heuy / So the quene ranne in to the forest / and there she fond a wel / and theryn she hadde thoughte to haue drouned her self / And as good fortune wold ther came a knyght to her that hadde a Castel therby his name was sire Adtherp / And when he fonde the quene Page  319 [leaf 160r] in that meschyef / he rescowed her / and broughte her to his castel / And whanne he wyst what she was he armed hym / and took his hors and said / he wold be auengyd vpon palamydes and soo he rode on tyll he mette with hym / and there sir Palamydes wounded hym sore / and by force he made hym to telle hym the cause why he dyd bataille with hym / and how he had ladde the quene vnto his castel / Now brynge me there said palamydes or thou shalt dye of my handes / Sir said sir Adtherp I am soo wounded I may not folowe / but ryde you this way and hit shalle brynge you in to my castel / and there within is the quene / Thenne sire Palamydes rode styll tyl he came to the Castel / And at a wyndowe La Beale Isoud sawe sir Palamydes / thenne she made the yates to be shette strongly / And whan he sawe he myght not come within the castel / he putte of his brydel and his sadel / and putte his hors to pasture / and sette hym self doune atte gate lyke a man that was oute of his wytte that retchyd not of hym self /

¶ Capitulum xxxj

NOw torne we vnto sir Tristram that whanne he was come home / and wyste la Beale Isoud was gone with syr Palamydes wete ye wel he was wrothe oute of mesure / Allas said sir Trystram I am this day shamed / Thenne he cryed to Gouernaile his man / haste the that I were armed and on horsbak / for wel I wote Lambegus hath no myghte nor strengthe to withstande sir Palamydes / Allas that I haue not ben in his stede / Soo anone as he was armed and horsed sir Tristram and Gouernaile rode after in to the forest / and within a whyle he fond his knyght Lambegus al moost woūded to the dethe / and syre Trystram bare hym to a foster / and charged hym to kepe hym wel / And thenne he rode forth and there he fond syr Adtherp sore wounded / and he told hym hou the quene wold haue drouned her self had not he ben / And how for her sake & loue he had taken vpon hym to doo bataille with sir Palamydes / where is my lady said sire Trystram / Syr said the knyght she is sure ynough within my Castel / &Page  320 [leaf 160v] she can hold her within hit / Gramercy said syre Trystram of thy grete goodenes / and soo he rode tyl he came nyghe to that Castel / and thenne syr Trystram sawe where syr Palamydes sat at the gate slepynge / and his hors pastured fast afore hym Now goo thou Gouernaile said sire Tristram / and byd hym awake / and make hym redy / So Gouernayle rode vnto hym / and said sir Palamydes aryse and take to the thyn harneis but he was in suche a study he herd not what Gouernayle said So Gouernaile came ageyne and told syre Trystram he slepte or els he was madde / Goo thou ageyne said sire Tristram / and bydde hym aryse / and telle hym that I am here his mortal foo / So Gouernaile rode ageyne and putte vpon hym the but of his spere / and said sir Palamydes make the redy / for wete ye wel syr Tristram houeth yonder and sendeth the word he is thy mortal foo / And there with all sire Palamydes arose stylly withoute wordes and gate his hors / and sadeled hym / and brydeled hym / and lyghtely he lepte vpon / and gat his spere in his hand / and eyder feutryd their speres and hurtled faste to gyders / and there Tristram smote doune sire Palamydes ouer his hors tayle / Thenne lightely sire Palamydes putte his sheld afore hym and drewe his swerd / And there beganne stronge bataill on bothe partyes / for both they fought for the loue of one lady / and euer she laye on the walles and behelde them / hou they foughte oute of mesure / and eyther were woūded possyng sore / but Palamydes was moche sorer woūded / thus they fought tracynge and trauercyng more than two houres that wel nygh for dole and sorowe la beale Isoud swouned /

¶ Allas she said that one I loued and yet doo / and the other I loue not / yet it were grete pyte that I shold see sir palamydes slayne / for wel I knowe by that tyme the ende be done sir Palamydes is but a dede knyȝt / by cause he is not crystened I wold be lothe that he shold dye a sarasyn / And there with alle she came doune and bisought sire Trystram to fyghte no more / A madame saide he what meane you / wille ye haue me shamed / wel ye knowe I wille be ruled by you / I wylle not your dishonour saide la beale Isoud but I wold that ye wold for my sake spare this vnhappy sarasyn Palamydes / Madame said syre Trystram I wille leue fyghtynge at this Page  321 [leaf 161r] tyme for your sake /

¶ Thenne she said to sire Palamydes this shalle be your charge that thou shalt goo oute of this countrey whyle I am therin / I wille obeye your commaundement said sire Palamydes / the whiche is sore ageynst my wylle

¶ Thenne take thy waye said la beale Isoud vnto the Courte of kynge Arthur / and there recommaūde me vnto quene Gueneuer / and telle her that I send her word / that ther be withyn this land but four louers / that is sire Launcelot du lake and Quene Gueneuer and sire Trystram de lyonas and quene Isoud

¶ Capitulum xxxij

ANd soo syre Palamydes departed with grete heuynes And sir Tristram took the quene and brouȝte her ageyne to kynge Marke / And thenne was there made grete Ioye of her home comynge / who was cherysshed but sir Trystram / Thenne sir Trystram lete fetche syr Lambegus his knyȝte fro the fosters hous and hit was longe or he was hole / but at the last he was wel recouerd / thus they lyued with Ioye and play a long whyle / But euer sir Andred that was nygh cosyn to syr Trystram lay in a watche to wayte betwix sir Trystram and la beale Isoud for to take hem and sklaundre hem / Soo vpon a day syr Tristram talked with la beale Isoud in a wyndowe / and that aspyed sir Andred and told it to the kynge / Thenne kynge Marke took a swerd in his hand and came to sir Tristram and called hym fals traitour / and wold haue stryken hym / But sir Trystram was nyghe hym and ranne vnder his swerd and tooke his oute of his hande / And thenne the kynge cryed where are my knyghtes and my men / I charge you slee this traitour / But at that tyme there was not one wold meue for his wordes / Whanne syre Trystram sawe that there was not one wold be ageynst hym / he shoke the swerd to the kynge and made countenaunce as though he wold haue stryken hym / And thenne kynge Marke fledde / and sire tristram folowed hym and smote vpon hym fyue or sixe strokes flatlynge on the neck that he made hym to falle vpon the nose / & thenne sir Tristram yede his waye and armed hym and tooke Page  322 [leaf 161v] his hors and his men / and soo he rode in to that forest / And there vpon a daye syr Trystram mette with two bretheren that were knyghtes with kynge Marke / and there he strake of the hede of the one / & wounded the other to the dethe / and he maade hym to bere his broders hede in his helme vnto the kynge / and thyrtty moo there he wounded / And whan that knyght came before the kynge of saye his message / he there dyed afore the kynge and the quene / Thenne kynge Marke called his counceill vnto hym / and asked aduyse of his barons what was best to doo with sire Trystram / Syr said the barons in especyal Syre Dynas the Seneschal / syr / we wille yeue you counceyll for to sende for sir Tristram / for we wille that ye wete / many men wille holde with syre Trystram / and he were hard bestad And syr said sire Dynas ye shalle vnderstande that sir Tristram is called pyerles and makeles of ony Crysten knyghte / and of his myghte and hardynes we knewe none soo good a knyght / but yf hit be sire Launcelot du lake / And yf ye departe from your Courte and goo to kynge Arthurs courte / wete ye wel he wille gete hym suche frendes there that he wylle not sette by your malyce / And therfore syre I counceyle yow to take hym to youre grace / I wylle wel said the kynge that he be sente for / that we maye be frendes / Thenne the Barons sente for syr Tristram vnder a sauf conduyte / And soo whan syre Tristram came to the kynge / he was welcome / and no rehersail was made / and there was game and playe / and thenne the kynge and the quene wente on huntynge and sir Tristram

¶ Capitulum xxxiij

THe kynge and the quene made their pauelions & theire tentes in that forest besyde a Ryuer / and ther was dayly huntynge and Iustynge / for there were euer xxx knyghtes redy to Iuste vnto alle them that came in at that tyme / And there by fortune came sire Lamerak de galys and sir Dryaunt / and there syre Dryaunt Iusted ryght wel / but at the laste he had a falle / Thenne sire Lamerak profered to Iuste / And whan he began he ferd so with the thyrtty knyȝtes Page  323 [leaf 162r] that there was not one of hem but that he gaf hym a falle / and somme of them were sore hurte / I merueyle said kyng Mark what knyght he is that doth suche dedes of armes / Sir said sire Tristram / I knowe hym wel for a noble knyght / as fewe now ben lyuynge / and his name is sir Lamorak de Galys / it were grete shame saide the kynge that he shold goo thus aweye onles that somme of you mette with hym better / Syre said syre Tristram me semeth it were no worship for a noble man to haue adoo with hym / And for by cause at this tyme he hath done ouer moche for ony meane knyght lyuynge / therfore as me semeth hit were grete shame and vylony to tempte hym ony more at this tyme / in soo moche as he and his hors are wery bothe For the dedes of armes that he hath done this daye and they be wel consydered / it were ynough for sir Launcelot du lake /

¶ As for that said kynge Marke I requyre you as ye loue me and my lady the Quene La beale Isoud take youre armes and Iuste with sire Lamorak de Galys /

¶ Syre said sir Tristram ye byd me doo a thynge that is ageynst knyghthode / And wel I can deme that I shal gyue hym a falle / For hit is no maystry / for my hors and I ben fresshe bothe / and so is not his hors and he / and wete ye wel / that he wil take hit for grete vnkyndenes / For euer one good is lothe to take another at disauauntage / But by cause I wil not displease yow / as ye requyre me / soo wille I doo and obeye your commaundemēt And soo sire Tristram armed hym and took his hors / & putt hym forth / and there sire Lamerak mette hym myghtely / and what with the myght of his owne spere / and of sire Tristram spere syr Lamoraks hors felle to the erthe / and he syttynge in the sadel / Thenne anone as lyghtly as he myghte he auoyded the sadel and his hors / and put his shelde afore hym and drewe his swerd / And thenne he badde sir Tristram alyghte thou knyght and thou darst / Nay said sire Tristram I wil no more haue adoo with the / for I haue done to the ouer moche vnto my dishonour and to thy worship /

¶ As for that said sir Lamorak I can the no thanke / syn thou hast foriusted me on horsbak I requyre the and I biseche the / and thou be sir Tristram / fyghte with me on foote /

¶ I wylle not soo Page  324 [leaf 162v] said ore Tristram / And wete ye wel my name is sire Tristrā de lyones / and wel I knowe ye be sire Lamorak de Galys / And this that I haue done to you was ageynst my wylle / but I was requyred therto / but to saye that I wille doo atte youre request / as at thys tyme I will haue no more ado with you / for me shameth of that I haue done /

¶ As for the shame said sire Lamorak on thy party or on myne / beare thou hit & thou wilt / For though a marys sone hath fayled me / now a Quenes sone shalle not fayle the / And therfore and thou be suche a knyghte as men calle the / I requyre the / alyghte / and fyghte with me / Syre Lamorak said sire Tristram I vnderstande youre herte is grete / and cause why ye haue / to saye the sothe / for hit wold greue me and ony knyght shold kepe hym fresshe / and thenne to stryke doune a wery knyghte / for that knyghte nor hors was neuer fourmed that alwey myght stāde or endure / And therfore said sire Tristram I wille not haue adoo with you / for me forthynketh of that I haue done / as for that said sire Lamorak I shal quyte you and euer I see my tyme /

¶ Capitulum xxxiiij

NOo he departed from hym with sire Dryaun / and by the weye they mette with a knyȝt that was sente from Morgan le fay vnto kynge Arthur / and this knyght hadde a fayre horne harnest with gold / and the horne had suche a vertue that there myght no lady ne gentilwoman drynke of that horne / but yf she were true to her husband / And yf she were fals she shold spylle alle the drynke / And yf she were true to her lord she myght drynke peasyble / and by cause of the quene Gueneuer and in despyte of sire Launcelot this horne was sente vnto kynge Arthur / and by force sire Lamorak made that knyghte to telle alle the cause why he bare that horne /

¶ Now shalte thou bere this horn sayd Lamorak vnto kyng Marke or els chese thou to dye for it / For I telle the playnly in despyte and repreef of sire Tristrams thou shalte bere that horne vnto kynge Marke his vnkel / and say thou to hym that Page  325 [leaf 163r] I sent hit hym for to assay his lady /

¶ And yf she be true to hym he shal preue her / Soo the knyghte wente his waye vnto kynge Marke and broughte hym that ryche horne / and sayd that sir Lamorak sente hit hym / and there to he told hym the vertue of that horne

¶ Thenne the kynge maade Quene Isoud to drynke therof / and an honderd ladyes / and there were but four ladyes of alle tho that dranke clene /

¶ Allas saide kynge Marke this is a grete despyte / and sware a grete othe / that she shold be brente and the other ladyes /

¶ Thenne the Barons gadred them to gyder and said playnly they wold not haue tho ladyes brente for an horne maade by sorcery that came from as fals a sorceresse and wytche as tho was lyuynge / For that horne dyd neuer good but caused stryf and debate / and alweyes in her dayes she had ben an enemy to alle true louers / Soo there were many knyghtes made their auowe / and euer they met with Morgan le fay that they wold shewe her short curtosye /

¶ Alfo sir Tristram was passynge wrothe that sire Lamorak sente that horne vnto kynge Marke for wel he knewe that hit was done in the despyte of hym / And therfor he thoughte to quyte sire Lamorak /

¶ Thenne syre Tristram vsed dayly and nyghtely to go to quene Isoud whanne he myght / and euer syre Andred his cosyn watched hym nyght and daye for to take hym with la Beale Isoud / And soo vpon a nyght syre Andred aspyed the houre and the tyme whan sir Trystram wente to his lady /

¶ Thenne syre Andred gate vnto hym twelue knyghtes / and at mydnyghte he sette vpon sire Tristram secretely and sodenly / and there sire Tristram was take naked a bedde with la beale Isoud / and thenne was he boūd hande and foot / and soo was he kepte vntyl daye /

¶ And thenne by the assent of kynge Marke and of syr Andred and of somme of the Barons syre Tristram was ledde vnto a chappel that stode vpon the see rockes there for to take his Iugement / and soo he was ledde bounden with fourty knyghtes / And whan sire Tristram sawe that there was none other boote / but nedes that he must dye / thenne said he fayr lordes remembre what I haue done for the Countreye of Cornewaile / and in what Ieopardy I haue ben in for the wele of you alle / For whan I fouȝt for the truage of cornewaile with Page  326 [leaf 163v] sir Marhaus the good knyght / I was promysed for to be better rewarded / whanne ye alle reffused to take the betaille / therfore as ye be good gentyl knyghtes / see me not thus shamefully to dye / for it is shame to alle knyghthode thus to see me dye / For I dare saye said sire Tristram that I neuer met with no knyght but I was as good as he / or better / Fy vpon the said sir Andred fals traitour that thou arte with thyn auaūcynge / for alle thy boost thou shalt dye this daye / O Andred Andred said sir Tristram thou sholdest be my kynnesman / and now thou art to me ful vnfrendely / but and there were no mo but thou and I / thou woldest not putte me to deth / No said sir Andred / and ther with he drewe his swerd / and wold haue slayne hym / Whanne sir Tristram sawe hym make suche countenaunce / he loked vpon bothe his handes that were fast bounden vnto two knyghtes / and sodenly he pulled them bothe to hym / and vnwrast his handes / and thenne he lepte vnto his cosyn syr Andred and wrothe his swerd oute of his handes / thenne he smote sir Andred that he fylle to the erthe / and soo sir Tristram foughte tyl that he hadde kylled x knyghtes / So thenne sir Tristram gate the chappell and kepte hit myghtely / thenne the crye was grete / and the peple drewe faste vnto sire Andred moo than an honderd / whanne sir Tristram sawe the peple drawe vnto hym he remembryd he was naked / & sperd fast the chappel dore and brake the barrys of a wyndowe / and soo he lepte oute and fylle vpon the crackys in the see / And so at that tyme sir Andred nor none of his felawes myghte gete to hym at that tyme /

¶ Capitulum xxxv

SOo whanne they were departed / Gouernaile and sire Lambegus and sire Sentraille de lushon that were sir Tristrams men soughte their maister / whanne they herd he was escaped / thenne they were passynge gladde / and on the rockes they fond hym / and with tuels they pulled hym vp / And thenne sire Tristram asked hem where was la beale Isoud / for he wende she had ben had aweye of Andreds peple / Syr said Gouernaile she is put in a lazar cote

¶ Allas Page  327 [leaf 164r] said syre Trystram this is a ful vngoodely place for suche a fayre lady / And yf I maye she shalle not be longe there / And soo he took his men and wente there as was la Beale Isoud / and fette her aweye and broughte her in to a forest to a fayre manoyre / and sire Tristram there abode with her / Soo the good knyghte badde his men goo from hym / For att this tyme I maye not helpe you / soo they departed alle sauf Gouernaile / And soo vpon a daye sir Tristram yede in to the forest for to disporte hym / and thenne hit happend / that there he felle on slepe / And there came a man that sire Tristram afore hand had slayne his broder / And whan this man hadde foūd hym he shotte hym thorou the sholder with an arow / and sir Tristram lepte vp and kylled that man / And in the meane tyme it was told kynge Marke / how sir Tristram and la beale Isoud were in that same manoir / and as soone as euer he myght thyder he came with many knyȝtes to slee sir Tristram And whanne he came there / he fond hym gone / and there he took la beale Isoud home with hym / and kepte her strayte that by no meane neuer she myght wete nor sende vnto Trystram nor he vnto her / And thenne whanne syre Tristram came toward the old manoir / he fond the trak of many horses / and ther by he wiste his lady was gone / And thenne sir Tristram took grete sorou / and endured with grete payne long tyme / for the arowe that he was hurte with al was enuenymed / Thenne by the meane of la Beale Isoud she told a lady that was cosyn vnto dame Bragwayne / and she came to sir Tristram and told hym that he myght not be hole by no meanes / For thy lady la beale Isoud maye not helpe the / therfor she byddeth you haste in to Bretayne to kynge Howel / and there ye shal fynde his douȝter Isoud le blaunche maynys / and she shal helpe the / Thenne sir tristram and gouernaile gat them shyppyng / and soo sailed in to Bretayne / And whan kynge Howel wist that it was sir tristram / he was ful gladde of hym / Syre he said I am comen in to this countrey to haue help of your doughter / For hit is tolde me / that there is none other may hele me but she / and soo within a whyle she heled hym / Page  328 [leaf 164v]

¶ Capitulum xxxvj

THere was an Erle that hyghte Gryp / And this Erle maade grete werre vpon the kynge / and putte the kynge to the werse / and byseged hym / And on a tyme syre kehydyus that was sone to kynge Howel / as he yssued oute / he was sore wounded nyghe to the dethe /

¶ Thenne Gouernaile wente to the kynge and said / syre I counceyle you to desyre my lord syre Tristram as in your nede to helpe you / I wille doo by your counceylle said the kynge / and soo he yede vnto syr Trystram and praid hym in his warris to helpe hym / for my sone kehydyus may not goo in to the felde

¶ Sire said sir Tristram I wille goo to the feld and doo what I maye / Thenne sir Tristram yssued out of the towne with suche felauship as he myght make / and dyd suche dedes that alle Bretayne spake of hym / And thēne at the last by grete myghte and force he slewe the Erle Gryp with his owne handes / and moo than an honderd knyghtes he slewe that daye / And thenne sire Tristram was receyued worshipfully with procession

¶ Thenne kynge Howel enbraced hym in his armes / and said sire Tristram alle my kyngdome I wille resygne to the / God defende said sir Tristram / For I am beholden vnto you for youre doughters sake to doo for you /

¶ Thenne by the grete meanes of kynge Howel & kehydyus his sone by grete profers there grewe grete loue betwixe Isoud and sire Trystram / for that lady was bothe good and fayre / and a woman of noble blood & fame

¶ And for by cause sir Tristram had suche chere and Rychesse and alle other plesaunce that he hadde / all moost he hadde forsaken la beale Isoud / And soo vpon a tyme sir Trystram agreed to wedde Isoud la blaunche maynys / And at the laste they were wedded / and solempnly held theyr maryage / And soo whanne they were abedde bothe / sire Tristram remembryd hym of his old lady la beale Isoud / And thenne he toke suche a thought sodenly that he was alle desmayed / and other chere maade he none but with clyppynge and kyssynge as for other flesshly lustes sire Trystram neuer thoughte nor hadde adoo with her / suche mencyon maketh the frensshe booke Page  329 [leaf 165r] Also it maketh mencyon that the lady wende there had ben no pleasyr but kyssynge and clyppynge /

¶ And in the meane tyme there was a knyght in Bretayne his name was Suppynabyles / and he came ouer the see in to Englond / And thenne he came in to the court of kynge Arthur / and he met with sir Launcelot du lake / and told hym of the maryage of syre Tristram / Thenne said sire Launcelot / Fy vpon hym vntrue knyghte to his lady that soo noble a knyghte as sir Trystram is shold be foūde to his fyrst lady fals / la beale Isound / quene of Cornewaile / But saye ye hym this / said sire Launcelot that of alle knyghtes in the world I loued hym moost / and had moost ioye of hym / and alle was for his noble dedes / and lete hym wete the loue bitwene hym and me is done for euer / And that I gyue hym warnyng from this daye forth as his mortal enemy

¶ Capitulum xxxvij

THenne departed syr Suppynabyles vnto Bretayne ageyne / and there he fond sir Tristram / and told hym / that he had ben in kynge Arthurs courte / Thenne said sir Tristram herd ye ony thynge of me / Soo god me help saide syre Suppynabyles / there I herd sire Launcelot speke of you grete shame / and that ye be a fals knyght to your lady / and he bad me doo you to wete that he wille be your mortal enemy in euery place where he may mete you / That me repenteth said Tristram / for of alle knyghtes I loued to be in his felauship / Soo syre Tristram made grete mone and was ashamed that noble knyghtes shold dessame hym for the sake of his lady / And in this meane whyle la beale Isoud maade a letter vnto Quene Gueneuer complaynyng her of the vntrouthe of Sir Tristram and how he hadde wedded the kynges doughter of Bretayne / Quene Gueneuer sente her another letter / and badde her be of good chere / for she shold haue Ioye after sorou / for sire tristram was so noble a knyȝt called / that by craftes of sorcery ladyes wolde make suche noble men to wedde them / but in the ende Quene Gueneuer said hit shal be thus / that he shalle hate her / and loue you better than euer he dyd to fore

¶ So leue Page  330 [leaf 165v] we sire Trystram in Bretayne and speke we of sire Lamerak de galys / that as he sayled his shyp felle on a rok and perysshed all / saue sire Lamerak and his squyer / and there he swam myghtely / and fysshers of the yle of seruage toke hym vp and his squyer was drouned / and the ship men had grete laboure to saue sire Lamoraks lyf / for alle the comfort that coude doo / and the lord of that yle hyght syre Nabon le noyre a grete myghty gyaunt / And this sir Nabon hated alle the knyghtes of kynge Arthurs / and in no wyse he wold doo hem fauoure / And these fysshers told sir Lamorak alle the gyse of syre Nabon / how there came neuer knyghte of kynge Arthurs but he destroyed hym / And atte last bataille that he dyd was slayne syr Nanowne le petyte / the which he put to a shameful dethe in despyte of kynge Arthur / for he was drawen lymme meale / That forthynketh me said sir Lamerak for that knyghtes dethe / for he was my cosyn / And yf I were at myn ease as wel as euer I was I wold reuenge his dethe / Pees sayd the fysshers and make here no wordes / for or euer ye departe from hens syre Nabon must knowe that ye haue ben here / or els we shold dye for your sake / So that I be hole said Lamorak of my disease / that I haue taken in the see / I wille that ye telle hym that I am a knyȝt of kynge Arthurs / for I was neuer aferd to reneye my lord /

¶ Capitulum xxxviij

NOw tourne we vnto sire Trystram that vpon a daye he took a lytel Barget and his wyf Isound la blaūche maynys with sire kay hedyus her broder to playe hem in the cosstes / And whan they were from the land / there was a wynde drofe hem in to the coste of walys vpon this yle of seruage / where as was syre Lamorak and there the Barget all to rose and there dame Isoud was hurte / and as wel as they myȝte they gate in to the forest / and there by a welle he sawe Segwarydes and a damoysel / And thenne eyther salewed other / syre sayde Segwarydes I knowe you for sire Tristram de Lyones the man in the world that I haue moost cause to hate by cause Page  331 [leaf 166r] ye departed the loue bitwene me and my wys / but as for that sayd Segwarydes I wil neuer hate a noble knyȝt for a lyȝt lady / And therfore I pray you be my frende and I wille be yours vnto my power / for wete ye wel / ye are hard bestad in this valey / and we shalle haue ynough to doo eyther of vs to socoure other / And thenne sir Segwarydes brought sir Trystram to a lady there by that was borne in Cornewaile / and she told hym alle the peryls of that valey / and how ther cam neuer knyght there but he were taken prysoner or slayne / wete you wel fair lady said sir Trystram that I slewe sire Marhaus and delyuerd Cornewaile from the truage of Irland / And I am he that delyuerd the kynge of Irlande from sire Blamor de ganys / and I am he that bete sire Palamydes / and wete ye wel I am sire Trystram de lyones that by the grace of god shalle delyuer this woful yle of seruage / So sir Tristram was wel eased / thenne one told hym there was a knyghte of kyng Arthur þt had wrackyd on the rockes / what is his name said sir Tristram / we wote not said the fysshers but he kepeth it no counceil but that he is a knyghte of Kynge Arthurs / and by the myghty lord of this yle he setteth nought by / I praye you said sir [ Tdestram ] and ye maye brynge hym hyder that I maye see hym / And yf he be ony of the Knyghtes of Arthurs I shalle knowe hym / Thenne the lady prayed the fysshers to brynge hym to her place / Soo on the morowe they brouȝt hym thyder in a fysshers rayment / And as soone as sire Tristram sawe hym he smyled vpon hym and knewe hym wel / but he knewe not sir Tristram / Fair sir saide sire Tristram me semeth by your chere ye haue ben diseased but late / and also me thynketh I shold knowe you here to fore / I wille wel said sir Lamorak that ye haue sene me and mette with me / Fair sir saide sir tristram telle me your name / vpon a couenaunt I wil telle you said sir Lamorak / that is / that ye wil telle me whether ye be lord of this Iland or noo that is called Nabon le noyre / For sothe said sir tristram I am not he nor I hold not of hym I am his foo as wel as ye be / and soo shal I be foūde or I departe out of this yle / Wel said sir Lamorak syn ye haue saide soo largely vnto me / My name is sire Lamorak de galis sone vnto kynge pellinore / forsothe I trowe wel said sir tristram / Page  332 [leaf 166v] for and ye said other / I knowe the contrary / What are ye said syre Lamorak that knoweth me / I am sir Trystram de lyones / A syre remembre ye not of the falle ye dyd yeue me ones / and after ye refused me to fyghte on foot / that was not for fere I had of you said sire Tristram / but me shamed att that tyme to haue more a doo with you / for me semed ye hadde ynough / but sire Lamorack for my kyndenes many ladyes ye putte to a repreef / whan ye sente the horne from Morgan le fay to kynge Marke where as ye dyd this in despyte of me / Well said he / and it were to doo ageyne / soo wold I doo / for I had leuer stryf and debate felle in kyng Marks courte rather than Arthurs courte / for the honour of bothe courtes be not y lyke As to that said sir Tristram I knowe wel /

¶ But that that was done it was for despyte of me / but alle youre malyce I thanke god hurte not gretely / Therfor said sir Tristram ye shal leue alle your malyce / and soo wille I and lete vs assay hou we may wynne worship bitwene you and me vpon this gyaunt sir Nabon le noyre / that is lord of this Iland to destroye hym / Sir said sir Lamorak now I vnderstande your knyghthode / it maye not be fals that alle men saye / for of your bounte nobles and worship of alle knyghtes ye are pyerles / And for your curtosy and gentilnes I shewed you vngentilnesse / & that now me repenteth

¶ Capitulum xxxix

IN the meane tyme there cam word that sir Nabon had made a crye that alle the peple of that yle shold be at his castel the fyfthe day after /

¶ And the same daye the sone of Nabon shold be made knyghte / and alle the knyghtes of that valey and there about shold be there to Iuste and all tho of the Royamme of Logrys shold be there to Iuste with them of Northwalys / and thyder came fyue honderd knyghtes / and they of the countrey brought thyder syre Lamorak and sir Tristram and syre kehydyus and sire Segwarides / for they durst none other wyse doo / and thenne sir Nabon lent sire Lamorak hors and armour at sire Lamoraks desyre / and sire Lamorak Iusted and dyd suche dedes of armes that Nabon and all the Page  333 [leaf 167r] peple said there was neuer knyȝt that euer they sawe do suche dedes of armes / for as the Frensshe book saith he foriusted alle that were there for the moost party of fyue honderd knyghtes that none abode hym in his sadel Thenne sir Nabon profered to playe with hym his playe / for I sawe neuer no knyghte doo soo muche vpon a daye / I wille wel said sire Lamorak playe as I may but I am wery and sore brysed / and there eyther gate a spere / but Nabon wold not encountre with sire Lamorak / but smote his hors in the forhede and soo slewe hym / and thenne sire Lamorak yede on foote and torned his shelde and drewe his swerd / and there beganne stronge bataill on foote / But sir Lamorak was so sore brysed and shorte brethed that he tracyd and trauercyd somwhat abak / Fair felawe said syre Nabon hold thy hand and I shalle shewe the more curtosye / than euer I shewed knyght by cause I haue sene this daye thy noble knyghthode / And therfore stand thou by and I wil wete whether ony of thy felawes wille haue adoo with me / Thenne whan sir Tristram herd that / he stepte forth and and said Nabon lende me hors and sure armour and I wille haue adoo with the Wel felawe said sir Nabon goo thou to yonder pauelione and arme the of the best thou fyndest there / and I shalle playe a merueillous playe with the / Thenne said sire Tristram loke ye playe wel or els peraduentur I shalle lerne you a newe play that is wel said felawe said sir Nabon / So whan sir Tristram was armed as hym lyked best and wel shelded and swerded / he dressid to hym on foote / For wel he knewe syr Nabon wold not abyde a stroke with a spere / therfore he wold slee alle knyghtes horses / Now fair felawe said sir Nabon lete vs playe / Soo thenne they foughte longe on foote tracynge and trauercynge smytynge and foynynge longe withoute ony rest / Atte last sir Nabon praid hym to telle hym his name / Syre Nabon I telle the my name is sir Tristram de lyones a knyȝt of Cornewail vnder kynge Marke / thou art welcome said sir nabon / for of alle knyghtes I haue moost desyred to fyghte with the or with sir Launcelot / Soo thenne they wente egerly to gyders and sire tristram slewe sire nabon / and soo forth with he lepte to his sone / and strake of his hede / and thenne al the countrey sayde / they wold holde of sire Tristram / nay saide sire Tristram Page  334 [leaf 167v] I wille not soo / here is a worshipfull knyght sir Lamorak de galys that for me he shalle be lord of this countreye / for he hath done here grete dedes of armes / nay said sir Lamorak I wil not be lord of this countrey / for I haue not deserued it as wel as ye / therfore gyue ye hit where ye wille for I will none haue / Wel saide sire Tristram syn ye nor I wille not haue hit / lete vs yeue hit to hym that hath not so wel deserued hit / Doo as ye lyst said Segwarydes / for the yefte is yours for I wil none haue and I had deserued hit / Soo was it yeuen to segwarydes wherof he thanked hem / and soo was he lord / & worshipfully he dyd gouerne hit / And thenne sir Segwarydes delyuerd alle prysoners and sette good gouernaunce in that valey / and soo he torned in to Cornewaile / and told kynge Mark and la beale Isoud how sir Tristram had auaunced hym to the yle of seruage / and there he proclamed in al Cornewaile of alle the aduentures of these two knyghtes / so was hit openly knowen / But ful wo was la Beale Isoud when she herde telle that sire Tristram was wedded to Isoud la blaunche maynys

¶ Capitulum xl

SOo torne we vnto sir Lamorak that rode toward Arthurs courte / and sire Tristrams wyf and Kehydyus took a vessel and sailed in to Bretayne vnto kynge Howel where he was welcome / And whan he herd of these aduētures they merueilled of his noble dedes / Now torne we vnto sir Lamorak that whan he was departed from sire Tristram / he rode oute of the forest tyll he came to an hermytage / whan the heremyte sawe hym / he asked hym from whens he came / sir said sir Lamorak I come fro this valey / sir said the hermyte therof I merueille / For this xx wynter I sawe neuer no knyght passe this countrey / but he was other slayne or vylaynously wounded or passe as a poure prysoner / Tho ylle customs said sir lamorak are fordone / for sir Tristram slewe your lord sir Nabon and his sone / thenne was the heremyte gladde and all his bretheren / for he said ther was neuer suche a tyraunt among crysten men / And therfor said the hermyte this valey and fraūceis Page  335 [leaf 168r] we wille holde of sire Tristram / Soo on the morowe sir Lamorak departed / And as he rode he sawe four knyghtes fyghte ageynst one / and that one knyght defended hym wel but atte last the four knyghtes had hym doune / And thenne sir Lamorak wente betwixe them / and asked them why they wold slee that one knyght / and said hit was shame four ageynst one / Thou shalt wel wete said the four knyghtes that he is fals / that is youre tale said sir Lamorak / And whanne I here hym also speke / I wille say as ye saye /

¶ Thenne said Lamorak / a knyght can ye not excuse you / but that ye are a fals knyghte / Syr said he yet can I excuse me both with my word & with my handes / that I wille make good vpon one of the best of them my body to his body /

¶ Thenne spake they al attones / we wil not Ieopardy our bodyes as for the / But wete thou wel they saide and kynge Arthur were here hym self it shold not lye in his power to saue his lyf / That is to moche said / said sire Lamorak / but many speke behynde a man more than they wylle saye to his face / And by cause of your wordes ye shalle vnderstande that I am one of the symplest of kynge Arthurs courte / in the worship of my lord now doo your best / and in despyte of you I shalle rescowe hym / And thenne they lasshed alle at ones to sir Lamorak / but anone at two strokes syre Lamorak had slayne two of them / and thenne the other two fledde

¶ Soo thenne sire Lamorak torned ageyne to that knyghte / & asked hym his name / syre he sayde my name is sire Frolle of the oute Iles / thenne he rode with sire Lamorak and bare hym company / And as they rode by the waye / they sawe a semely knyght rydynge ageynst them / and all in whyte / A said Frol yonder knyght Iusted late with me and smote me doune / therfore I wil Iuste with hym / ye shal not doo soo said sire Lamorak by my counceil / and ye will telle me your quarel whether ye Iusted at his request / or he at yours / Nay said sir Frol / I Iusted with hym at my request / Syr said Lamorak / thēne wil I coūceile you dele no more with hym / for me semeth by his countenaunce he shold be a noble knyght / and no Iaper / for me thynketh / he shold be of the table round / therfor I wil not spare said sir Frol / and thenne he cryed and said / sir knyȝt make Page  336 [leaf 168v] the redy to Iust / That nedeth not said the whyte knyghte / For I haue no luste to Iuste with the / but yet they feutryd theyr speres / and the whyte knyghte ouerthrewe sire Frol / and thēne he rode his waye a softe paas / Thenne sir Lamorak rode after hym / and praid hym to telle hym his name / for me semeth ye shold be of the felauship of the round table / Vpon a couenaunt said he I wille telle you my name / soo that ye wylle not discouer my name / and also that ye wille telle me yours / Thenne said he my name is sir Lamorak de galys / And my name is sir Launcelot du lake / thenne they putte vp their suerdes / and kyssed hertely to gyders / and eyder made grete Ioye of other / Syr said sir Lamorak and hit please you I wyll do you seruyse / God defende said Launcelot that ony of soo noble a blood as ye be shold doo me seruyse / Thenne he saide more I am in a quest that I must doo my self alone / Now god spede you said sir Lamorak / and so they departed / Thenne sir Lamorak came to sir Frol and horsed hym ageyne / what knyght is that said sir Frol / sir he said it is not for you to knowe nor it is no poynte of my charge / ye are the more vncurteis saide sire Frol / and therfore I wille departe fro yow / ye may doo as ye lyst said sir Lamorak / and yet by my company ye haue saued the fayrest floure of your garland / soo they departed

¶ Capitulum xlj

THenne within two or thre dayes syr Lamorak fond a knyghte at a welle slepynge / and his lady sate with hym and waked / Ryght so came sir Gawayne and toke the knyghtes lady / and sette her vp behynde his squyer / Soo syre Lamorak rode after syre Gawayne / and said sire Gawayne / torne ageyne / And thenne said sir Gawayne what wylle ye do with me / for I am neuewe vnto kyng Arthur / syre said he for that cause I wil spare you / els that lady shold abyde wyth me / or els ye shold Iuste with me / Thenne sire Gawayne torned hym and ranne to hym that ought the lady with his spere / but the knyght with pure myght smote doune syre Gawayne / and took his lady with hym / Alle this sir Lamorak saw and said to hym self / but I reuenge my felawe / he will say of Page  337 [leaf 169r] me dishonour in kynge Arthurs courte / Thenne sire Lamorak retorned and profered that knyght to Iuste / Syr said he I am redy / and there they came to gyders with alle their myght / and there sir Lamorak smote the knyght thorou both sydes / that he fylle to the erthe dede / thenne that lady rode to that knyghtes broder that hyght Belliaūce le orgulus / that duelled fast ther by / and thenne she told hym how his broder was slayne / Allas said he I wille be reuengyd / and soo he horsed hym / & armed hym / and within a whyle he ouertook syre Lamorak / and badde hym torne and leue that lady / for thou and I must playe a newe playe / for thou hast slayne my broder syre Froll that was a better knyghte than euer were thou / It myghte wel be said sir Lamorak / but this day in the felde I was foūd the better / Soo they rode to gyder / and vnhorsed other / & torned their sheldes / and drewe their swerdes / and foughte myghtely as noble knyghtes preued by the space of two houres / So thēne sir Bellyaunce prayed hym to telle hym his name / Syr said he my name is sire Lamorak de galys / A said syr Bellyaunce / thou arte the man in the world that I moost hate / for I slewe my sones for thy sake / where I saued thy lyf / and now thou hast slayne my broder syr Frol / Allas how shold I be accorded with the / therfore defende the / for thou shalt dye ther is none other remedy /

¶ Allas said sir Lamorak ful wel me ought to knowe you / for ye are the man that moost haue done for me / And there with alle sire Lamorak knelyd doune / and bisought hym of grace / Aryse said sir Bellyaunce / or els there as thou knelest I shalle slee the / That shal not nede saide sire Lamorak / for I wyl yelde me vnto you / not for fere of yow / nor for your strengthe / but your goodenes maketh me ful loth to haue adoo with you / wherfore I requyre you for goddes sake / and for the honour of knyghthode forgyue me al that I haue offended vnto you / Allas said Belleaunce leue thy knelynge or els I shal slee the withoute mercy / Thenne they yede ageyne vnto batail / and either wounded other that al the ground was blody there as they foughte / And at the laste Belleaunce withdrewe hym abak and sette hym doune softely vpon a lytil hylle / for he was so faynte for bledyng that he myght not stande / Thenne sir lamorak threwe his shelde vpon his Page  338 [leaf 169v] bak / and asked hym what chere / wel said syr Belliaunce / A syr yet shalle I shewe you faueour in your male ease / A knyght syr Belliaunce said syr Lamorak thou arte a foole / for and I had had the at suche auauntage as thou hast done me I shold slee the / but thy gentylnes is so good and so large / that I must nedes forgyue the myn euylle wille / And thenne sire Lamorak knelyd adoune / and vnlaced fyrst his vmberere / and thenne his owne / and thenne eyther kyssed other with wepynge teres / Thenne sire Lamerak ledde sir Belliaūce to an Abbay fast by / and there sire Lamorak wold not departe from Bellyaunce tyl he was hole / And thenne they sware to gyders that none of hem shold neuer fyghte ageynst other / So syre Lamorak departed and wente to the courte of kynge Arthur /

¶ here leue we of sire Lamorak and of sir Tristram




Home -- Biography -- Morte Darthur -- Links -- Transcriptions

I -- II -- III -- IV -- V -- VI -- VII -- VIII -- IX -- X -- XI -- XII -- XIII -- XIV -- XV